News

Category: koodalmanikyam

കൂടല്‍മാണിക്യം തിരുവുത്സവം : വരവ്ചിലവ് കണക്കുകള്‍ അവതരിപ്പിച്ചു

ഇരിങ്ങാലക്കുട : മെയ് 6 മുതല്‍ 16 വരെ നടന്ന കൂടല്‍മാണിക്യം തിരുവുത്സവത്തിന്റെ ഭാഗമായുള്ള വരവ് ചിലവ് കണക്കുകള്‍ വ്യാഴാഴ്ച്ച നടന്ന ഭക്തജനങ്ങളുടെ യോഗത്തില്‍ അവതരിപ്പിച്ചു. 8030616 രൂപ വരവും 8025243 ചിലവുമുള്ള കണക്കുകള്‍ ആണ് അവതരിപ്പിച്ചത്. സെപ്റ്റംബര്‍ 23 നു കാലാവധി കഴിയുന്ന പനമ്പിള്ളി രാഘവമേനോന്‍ ചെയര്‍മാനായുള്ള കൂടല്‍മാണിക്യം ദേവസ്വം മാനേജിങ് കമ്മിറ്റിയുടെ അവസാന യോഗമായിരുന്നു ഇത്. യോഗത്തില്‍ കണക്കുകള്‍ കൈയടിച്ചു പാസ്സാക്കി. ചെയര്‍മാന്‍ പനമ്പിള്ളി രാഘവമേനോന്റെ അധ്യക്ഷതയില്‍ ചേര്‍ന്ന യോഗത്തില്‍ എ .എസ് ശ്രീവല്ലഭന്‍ നമ്പൂതിരി, വി. പി രാമചന്ദ്രന്‍ ജെ .മനോജ്, സി .മുരാരി അശോകന്‍ ഐത്താടന്‍, ടി .എ വിനോദ്കുമാര്‍ ദേവസ്വം അഡ്മിനിസ്ട്രേറ്റര്‍ എ എം സുമ എന്നിവര്‍ പങ്കെടുത്തു. ഈ മാനേജ്‌മന്റ് കമ്മിറ്റിയുടെ ഭരണകാലത്ത് കാര്യമായ പരാതികള്‍ ഒന്നും ഇല്ലാതെ തന്നെ ഉത്സവാഘോഷങ്ങള്‍ നടത്താന്‍ കഴിഞ്ഞത് അഭിമാനകരമായ നേട്ടമായി കാണുന്നു എന്ന് സ്ഥാനം ഒഴിയുന്ന ദേവസ്വം ചെയര്‍മാന്‍ പറഞ്ഞു.

ശ്രീ കൂടല്‍മാണിക്യം ക്ഷേത്രനടയില്‍ ആഴ്ചകളായി മാലിന്യക്കൂമ്പാരം

ഇരിങ്ങാലക്കുട : പരിപാവനമായ ശ്രീ കൂടല്‍മാണിക്യം കിഴക്കേ ക്ഷേത്രനടയ്ക്ക് മുന്നില്‍ ആഴ്ചകളായി മാലിന്യങ്ങളും മറ്റു വസ്തുക്കളും കൂട്ടിയിട്ടിരിക്കുന്നത് ഭക്തജനങ്ങള്‍ക്ക് വേദനയുളവാക്കുന്നു. ഒരു മാസം നീണ്ടു നിന്ന നാലമ്പല ദര്‍ശന തീര്‍ത്ഥാടനത്തിന് ശേഷം ബാക്കി വന്ന നിര്‍മാണ വസ്തുക്കളും അവശിഷ്ടങ്ങളും ആഴ്ചകളായിട്ടും ക്ഷേത്രനടയില്‍ കുന്നു കൂട്ടിയിട്ടിരിക്കുകയാണ്. ഇതിവിടെ നിന്നും മാറ്റുവാനുള്ള നടപടികള്‍ ഇതുവരെ അധികൃതര്‍ എടുത്തിട്ടില്ല. തുരുമ്പു പിടിച്ച കമ്പികളും മറ്റും ദര്‍ശനത്തിനു വരുന്നവര്‍ക്ക് അപകടകരമായ രീതിയിലാണ് കിഴക്കേ നടവഴിക്കു സമീപം അലക്ഷ്യമായി ഇട്ടിരിക്കുന്നത്. ക്ഷേത്രനടയിലെ ഭണ്ടാരത്തിനോട് ചേര്‍ന്ന് ദര്‍ശനത്തിനെത്തിയവര്‍ ഉപേക്ഷിച്ചു പോയ നൂറുകണക്കിന് ചെരുപ്പുകള്‍ കുന്നുകൂട്ടിയിട്ടുണ്ട്. ക്ഷേത്രനടയ്ക്കു മുന്നിലെ റോഡില്‍ മഴ പെയ്താല്‍ വെള്ളക്കെട്ടും പതിവായി തീര്‍ന്നിരിക്കുന്നു. ഇവിടെ ഉണ്ടായിരുന്ന ഡ്രൈനേജ് സംവിധാനത്തിന് സമീപം മാലിന്യം നിക്ഷേപിക്കുന്നതിനാല്‍ ഇത് പ്രവര്‍ത്തന രഹിതമാണ്. നിലവിലെ ഭരണ സമിതിയുടെ കാലാവധി തീരാന്‍ ദിവസങ്ങള്‍ മാത്രം ബാക്കിയുള്ളത് കൊണ്ട് ഇത്തരം കാര്യങ്ങളില്‍ ശ്രദ്ധ കുറവാണെന്നു പരക്കെ ആക്ഷേപമുണ്ട്.

തിരുവോണനാളിലെ കൂടല്‍മാണിക്യ സന്നിധിയിലെ പൂക്കളങ്ങള്‍

ഇരിങ്ങാലക്കുട : തിരുവോണനാളിലെ കൂടല്‍മാണിക്യസന്നിധിയില്‍ വിരിഞ്ഞ പൂക്കളം ദര്‍ശിക്കാന്‍ നൂറുകണക്കിനാളുകള്‍ എത്തിച്ചേര്‍ന്നു. ഓണത്തിന്റെ പത്ത് നാളുകളിലായി കൂടല്‍മാണിക്യ സ്വാമിയുടെ സന്നിധിയില്‍ പൂക്കളം ഒരുക്കുന്നത് ഈ വര്‍ഷവും അത്തനാളില്‍ തുടങ്ങിയിരുന്നു. തിരുവോണനാളില്‍ അഞ്ചു പൂക്കളങ്ങളാണ് കിഴെക്കെ ഗോപുരത്തിനു പുറത്ത് നടവഴിയില്‍ വിരിഞ്ഞത്. കൂടല്‍മാണിക്യം ക്ഷേത്ര സന്നിധിയില്‍ ക്ഷേത്രത്തിന്റെ തെക്കേനടയില്‍ താമസിക്കുന്ന ഒരു കൂട്ടം ചെറുപ്പക്കാരാണ് കഴിഞ്ഞ പതിനേഴു വര്‍ഷകാലമായി പൂക്കളം ഒരുക്കുന്നത് . ഓരോ വര്‍ഷവും പഴയ ആളുകള്‍ മാറുമ്പോള്‍ പുതിയ തലമുറക്കാര്‍ വരുന്നതിനാല്‍ പാരമ്പര്യ കളം, ഡിസൈന്‍ കളം , മൂന്നു ദിവസം കൂടല്‍മാണിക്യ സ്വാമികളം എന്നിങ്ങനെയാണ് പൂക്കളം ഒരുക്കുന്നത്. രാത്രി ഇടുന്ന പൂക്കളം പുലര്‍ച്ചെ പൂര്‍ത്തിയാക്കും. ഓണം വരെ രാവിലെ ദര്‍ശനത്തിനു എത്തുന്നവര്‍ക്കായി കണിയായി എല്ലാദിവസവും വ്യത്യസ്തമായ വര്‍ണ പൂക്കളങ്ങള്‍ ഉണ്ടായിരുന്നു. പൂക്കളങ്ങള്‍ക്കുമുന്നില്‍നിന്നും സെല്‍ഫി പകര്‍ത്താന്‍ പ്രായഭേതമന്യേ ഇത്തവണയും തിരക്കായിരുന്നു

പതിവുതെറ്റിക്കാതെ കൂടല്‍മാണിക്യ സന്നിധിയില്‍ കൂട്ടായ്മ്മയുടെ പൂക്കളങ്ങള്‍

ഇരിങ്ങാലക്കുട : ഓണത്തിന്റെ പത്ത് നാളുകളിലായി കൂടല്‍മാണിക്യ സ്വാമിയുടെ സന്നിധിയില്‍ പൂക്കളം ഒരുക്കുന്നത് ഈ വര്‍ഷവും അത്തനാളില്‍ തുടങ്ങി. കൂടല്‍മാണിക്യം ക്ഷേത്ര സന്നിധിയില്‍ ക്ഷേത്രത്തിന്റെ തെക്കേനടയില്‍ താമസിക്കുന്ന ഒരു കൂട്ടം ചെറുപ്പക്കാരാണ് കഴിഞ്ഞ പതിനേഴു വര്‍ഷകാലമായി പൂക്കളം ഒരുക്കുന്നത് . ഓരോ വര്‍ഷവും പഴയ ആളുകള്‍ മാറുമ്പോള്‍ പുതിയ തലമുറക്കാര്‍ വരുന്നതിനാല്‍ പാരമ്പര്യ കളം, ഡിസൈന്‍ കളം ,3 ദിവസം കൂടല്‍മാണിക്യ സ്വാമികളം എന്നിങ്ങനെയാണ് പൂക്കളം ഒരുക്കുന്നത്. രാത്രി ഇടുന്ന പൂക്കളം പുലര്‍ച്ചെ പൂര്‍ത്തിയാക്കും. ഓണം വരെ രാവിലെ ദര്‍ശനത്തിനു എത്തുന്നവര്‍ക്കായി കണിയായി എല്ലാദിവസവും വ്യത്യസ്തമായ വര്‍ണ പൂക്കളങ്ങള്‍ ഉണ്ടാകും.വിനായക ചതുര്‍ത്ഥിയും അത്തവുമായതിനാല്‍ വെള്ളിയാഴ്ച ഗണപതിയുടെ രൂപകളം ഇട്ടാണ് ഇത്തവണ പൂക്കളം ആരംഭിച്ചത്.

ഹര്‍ത്താല്‍ : കെ എസ് ആര്‍ ടി സിയുടെ നാലമ്പല സര്‍വിസുകള്‍ മുടങ്ങി

ഇരിങ്ങാലക്കുട : തീര്‍ത്ഥാടകരുടെ വാഹനങ്ങള്‍ തടയില്ലെന്ന് ഹര്‍ത്താല്‍ അനുകൂലികള്‍ അറിയിച്ചിട്ടും ഇരിങ്ങാലക്കുട കൂടല്‍മാണിക്യം ക്ഷേത്രത്തില്‍നിന്നും ആരംഭിക്കുന്ന കെ എസ് ആര്‍ ടി സിയുടെ നാലമ്പല സവിസുകള്‍ ഞായറാഴ്ച രാവിലെ മുടങ്ങിയതില്‍ ഭക്തജനങ്ങള്‍ക്ക് പ്രതിഷേധം. രാവിലെ ആറുമണിക്കുള്ള രണ്ടു ബസ്സിലേക്കും കൂടെ നൂറിലധികം നാലമ്പല തീര്‍ത്ഥാടകര്‍ എത്തിയെങ്കിലും ബസ്സുകള്‍ ഓടുന്നില്ലെന്ന കെ എസ് ആര്‍ ടി സി യുടെ അറിയിപ്പ് ലഭിച്ചതിനെ തുടര്‍ന്ന് ഇവര്‍ക്ക് തിരിച്ചുപോകേണ്ട അവസ്ഥവന്നു. സുരക്ഷയേകാന്‍ ബസ്സുകളില്‍ പോലീസ് പോകാന്‍ തയാറല്ലാത്തതിനെ തുടര്‍ന്നാണ് സവിസുകള്‍ പിന്‍വലിച്ചതെന്ന ഭക്തരുടെ ആരോപണം ശരിയല്ലെന്ന ഇരിങ്ങാലക്കുട പോലീസ് സബ് ഇന്‍സ്‌പെക്ടര്‍ സുശാന്ത് പ്രതികരിച്ചു. തങ്ങളുടെ ഫോഴ്സ് എല്ലാ സഹകരണവും നല്‍കാന്‍ തയാറാണെന്നും അദ്ദേഹം അറിയിച്ചു. സര്‍വീസ് വേണമോ എന്ന് തീരുമാനിക്കുന്നത് കെ എസ് ആര്‍ ടി സിയാണെന്നും ആദ്ദേഹം പറഞ്ഞു. ഹര്‍ത്താലാണെന്നു അറിയാതെ പുലര്‍ച്ചെ മുതല്‍ പലരും കെ എസ് ആര്‍ ടി സിയുടെ നാലമ്പല സര്‍വിസുക്കള്‍ക്കായി എത്തിയിരുന്നു. തീര്‍ത്ഥാടകരുടെ വാഹങ്ങള്‍ തടയില്ലെന്ന ധാരണയിലായിരുന്നു ഇവരില്‍ പലരും. ജില്ലാ ആസ്ഥാനത്തുനിന്നും അറിയിപ്പ് ലഭിച്ചതിനെ തുടര്‍ന്നാണ് നാലമ്പല സര്‍വീസുകള്‍ ഹര്‍ത്താല്‍ദിനത്തില്‍ നിര്‍ത്തിവച്ചതെന്ന് ഇരിങ്ങാലക്കുട കെ എസ് ആര്‍ ടി സി അധികൃതരും അറിയിച്ചു.

കൂടല്‍മാണിക്യത്തില്‍ നാലമ്പല ദര്‍ശന തിരക്ക്

ഇരിങ്ങാലക്കുട : സംഗമപുരിയില്‍ നാലമ്പല ദര്‍ശനത്തിന് വന്‍ ഭക്തജനത്തിരക്കാണ് അനുഭവപ്പെടുന്നത്. ഇത്തവണ ക്ഷേത്രത്തിനകത്ത് ഭക്തജനങ്ങള്‍ക്ക് മഴകൊള്ളാതെ നില്‍ക്കു സൗകര്യം കൂടിയിട്ടുണ്ട്. 5000 പേര്‍ക്ക് 20 വരികളിലായി നില്‍ക്കുവാനുള്ള പന്തല്‍ ഉള്ളതിനാല്‍ ക്ഷേത്രത്തിനു പുറത്തേക്ക് വരികള്‍ നീളുന്നില്ല. വെള്ളിയാഴ്ചയും ശനിയാഴ്ചയും പതിവില്‍ക്കവിഞ്ഞ ഭക്തജനത്തിരക്ക് ഉണ്ട്. പാര്‍ക്കിങ് ഗ്രൗണ്ടില്‍ വാഹങ്ങള്‍ നിറഞ്ഞതിനാല്‍ കുട്ടന്‍കുളത്തിനുസമീപവും സമീപറോഡുകളിലും വാഹങ്ങള്‍ പാര്‍ക്ക് ചെയ്തിട്ടുണ്ട് . ശ്രീരാമ സഹോദരങ്ങളുടെ പ്രതിഷ്‌ഠയുള്ള തൃപ്രയാര്‍, ഇരിങ്ങാലക്കുട, മൂഴിക്കുളം, പായമ്മല്‍ ക്ഷേത്രങ്ങളിലായാണ് നാലമ്പല ദര്‍ശനം നടക്കുന്നത്. കര്‍ക്കിട മാസത്തില്‍ ഒരേ ദിവസം നാല് ക്ഷേത്രങ്ങളിലും തൊഴുതാല്‍ പുണ്യം ലഭിക്കുമെന്നാണ് വിശ്വാസം. തൃപ്രയാര്‍ ശ്രീരാമ ക്ഷേത്രത്തില്‍ നിര്‍മ്മാല്യം തൊഴുത ശേഷം ഉഷപൂജയ്‌ക്ക് മുമ്പ് ഇരിങ്ങാലക്കുട കൂടല്‍മാണിക്യം ഭരത ക്ഷേത്രത്തിലെത്തണം. തുടര്‍ന്ന് ഉച്ചയ്‍ക്ക് മുമ്പ് മൂഴിക്കുളത്തെ ലക്ഷ്മണ പെരുമാള്‍ ക്ഷേത്രത്തിലും പായമ്മല്‍ ശത്രുഘ്‍ന ക്ഷേത്രത്തിലും ദര്‍ശനം പൂര്‍ത്തിയാക്കി തൃപ്രയാറില്‍ മടങ്ങിയെത്തുന്നതോടെ നാലമ്പല ദര്‍ശനം പൂര്‍ത്തിയാകും. ദ്വാപര യുഗത്തില്‍ ശ്രീകൃഷ്‍ണന്‍ പൂജിച്ചിരുന്ന വിഗ്രഹങ്ങള്‍ ക്ഷേത്രം സ്ഥാനികള്‍ക്ക് ലഭിച്ചുവെന്നും ഇത് പിന്നീട് നാലിടത്തായി പ്രതിഷ്‌ഠിച്ചുവെന്നാണ് ഐതീഹ്യം. ഭക്തജനങ്ങള്‍ക്കായി ക്ഷേത്രങ്ങളില്‍ മികച്ച സൗകര്യങ്ങള്‍ ഏര്‍പ്പെടുത്തിയിട്ടുണ്ട്. തീര്‍ത്ഥാടന കാലത്തോടനുബന്ധിച്ച് ഇരിങ്ങാലക്കുടയില്‍നിന്നും കെഎസ്ആര്‍ടിസി പ്രത്യേക സര്‍വ്വീസുകളും നടത്തുന്നുണ്ട്.

കൂടല്‍മാണിക്യം കംഫര്‍ട്ട് സ്റ്റേഷനിലെ മാലിന്യം ദേവസ്വം ഭൂമിയില്‍ ഒഴുക്കി. പ്രതിഷേധവുമായി കൗണ്‍സിലര്‍മാരും നാട്ടുകാരും

ഇരിങ്ങാലക്കുട : കൂടല്‍മാണിക്യം കംഫര്‍ട്ട് സ്റ്റേഷനിലെ മാലിന്യം തോട്ടിലേക്ക് തള്ളാനുള്ള നീക്കം വാര്‍ഡ് കൗണ്‍സിലര്‍മാരും ഭക്തജന സമിതിയും ഇടപെട്ട് തടഞ്ഞു. കൊട്ടിലയ്ക്കല്‍ പറമ്പില്‍ സ്ഥതി ചെയുന്ന കൂടല്‍മാണിക്യം കംഫര്‍ട്ട് സ്റ്റേഷന്റെ മാലിന്യമാണ് ക്ഷേത്രഭൂമിയുടെ അതിര്‍ത്തിയിലുള്ള രാമന്‍ചിറ തോട്ടിലേക്ക് ഒഴുക്കി വിടാന്‍ നീക്കം നടത്തിയിരുന്നതെന്ന് വാര്‍ഡ് കൗണ്‍സിലര്‍മാരായ സന്തോഷ് ബോബനും അമ്പിളി ജയനും പരാതിപ്പെട്ടു. കംഫര്‍ട്ട് സ്റ്റേഷന്റെ കക്കൂസ് ടാങ്ക് നിറഞ്ഞതിനെ തുടര്‍ന്ന് കര്‍ക്കിടകം പിറക്കുന്നതിന് മുമ്പെ ദേവസ്വം ടാങ്കുകള്‍ വ്യത്തിയാക്കുവാന്‍ തൊഴിലാളികളെ നിയോഗിച്ചിരുന്നു. ഇവര്‍ കക്കൂസ് മാലിന്യം ബക്കറ്റില്‍ കോരി കംഫര്‍ട്ട് സ്റ്റേഷന്റെ തെക്കുഭാഗത്തുള്ള ദേവസ്വം ഭൂമിയിലെ ചിറയിലേക്ക് നിക്ഷേപിക്കുകയായിരുന്നു. ഈ ചിറയില്‍ നിന്നുള്ള തോട് രാമന്‍ചിറ തോട്ടിലും അതുവഴി ഷണ്‍മുഖം കനാലിലുമാണ് പതിക്കുന്നത്. കഴിഞ്ഞ ശനിയാഴ്ച പ്രദേശവാസികള്‍ ഇടപെട്ട് മാലിന്യം ചിറയിലേക്ക് ഒഴുക്കാനുള്ള നീക്കം തടസ്സപ്പെടുത്തിയിരുന്നു. എതിര്‍പ്പുയര്‍ന്നതിനെ തുടര്‍ന്ന് കംഫര്‍ട്ട് സ്റ്റേഷന് മുന്നില്‍ വലിയ കുഴിയെടുത്ത് ഈ മാലിന്യം മണ്ണിട്ടുമൂടിയതായി കൗണ്‍സിലര്‍മാര്‍ പറഞ്ഞു. കനത്തമഴയില്‍ ദേവസ്വം ഭൂമിയില്‍ തള്ളിയ കക്കൂസ് മാലിന്യത്തില്‍ വെള്ളം കയറിയതോടെ പ്രദേശവാസികള്‍ ആശങ്കയിലായി. തടഞ്ഞു നിറുത്തിയിരിക്കുന്ന മാലിന്യത്തിന്റെ കെട്ട് രാത്രി പൊട്ടിച്ച് രാമന്‍ചിറയിലേക്ക് ഒഴുക്കുമോയെന്ന ഭീതിയും ജനങ്ങള്‍ക്കുണ്ടായിരുന്നു. ഇതിനെ തുടര്‍ന്നാണ് കൗണ്‍സിലര്‍മാരും ഭക്തജനങ്ങളും നാട്ടുകാരും സ്ഥലത്തെത്തിയത്. തുടര്‍ന്ന് നഗരസഭ ഹെല്‍ത്ത് ഇന്‍സ്പക്ടര്‍ രതീഷ്, ആരോഗ്യവിഭാഗം ഉദ്യോഗസ്ഥരായ സുധീര്‍, അനില്‍, അഡിഷണല്‍ എസ്.ഐ തോമസിന്റെ നേതൃത്വത്തിലുള്ള പോലിസ് സംഘവും സ്ഥലത്തെത്തിയിരുന്നു. പൊതുസ്ഥലത്ത് കക്കൂസ് മാലിന്യം തള്ളിയ ദേവസ്വം അധികൃതര്‍ക്കെതിരെ ക്രിമിനല്‍ നടപടിപ്രകാരം കേസെടുക്കണമെന്ന് ആവശ്യപ്പെട്ട് സന്തോഷ് ബോബനും അമ്പിളി ജയനും നഗരസഭയില്‍ പരാതി നല്‍കി. ദേവസ്വം പറമ്പില്‍ കെട്ടി നിറുത്തിയിരിക്കുന്ന കക്കൂസ് മാലിന്യം രാമന്‍ചിറ തോട്ടിലേക്ക് തുറന്ന് വിടാനുള്ള നീക്കം പ്രതിഷേധാര്‍ഹമാണെന്ന് ഭക്തജന സമിതി സെക്രട്ടറി സി. സന്തോഷ് വാര്‍ത്താകുറിപ്പില്‍ പറഞ്ഞു. അതിനാല്‍ അടിയന്തിരമായി മാലിന്യം നിര്‍മ്മാര്‍ജ്ജനം ചെയ്യാന്‍ ദേവസ്വം നടപടിയെടുക്കണമെന്നും സന്തോഷ് ആവശ്യപ്പെട്ടു. പോലിസ് ഉദ്യോഗസ്ഥരും ആരോഗ്യവകുപ്പ് ഉദ്യോഗസ്ഥരും ദേവസ്വം ജീവനക്കാരുമായി വിഷയം സംസാരിക്കുകയും കര്‍ശന നിര്‍ദ്ദേശം നല്‍കുകയും ചെയ്തു. അടുത്ത ദിവസം തന്നെ മാലിന്യങ്ങള്‍ സുരക്ഷിതമായി സംസ്‌കരിക്കാനുള്ള നടപടികള്‍ എടുത്തിട്ടുണ്ടെന്നു ദേവസ്വം അഡ്മിനിസ്‌ട്രേറ്റര്‍ പറഞ്ഞു.

നാലമ്പല തീര്‍ത്ഥാടനം : അനധികൃത പാര്‍ക്കിങ് തുടരുന്നു

ഇരിങ്ങാലക്കുട : കര്‍ശനമായ നിയന്ത്രണം ഉണ്ടായിട്ടും കൂടല്‍മാണിക്യം ക്ഷേത്രത്തിനടുത്ത് വിശാലമായ കൊട്ടിലയ്ക്കല്‍ പാര്‍ക്കിംഗ് ഗ്രൗണ്ടില്‍ പാര്‍ക്ക് ചെയ്യാതെ സമീപത്തെ വഴികളില്‍ ഇപ്പോഴും നാലമ്പല തീര്‍ത്ഥാടകരുടെ വാഹനങ്ങള്‍ പാര്‍ക്ക് ചെയ്യുന്നത് മൂലം ഉണ്ടാകുന്ന ഗതാഗതക്കുരുക്ക് സമീപ വാസികള്‍ക്ക് ബുദ്ധിമുട്ട്‌ ഉണ്ടാക്കുന്നു. പാട്ടമാളി റോഡ്, പി ഡബ്ലിയു ഡി റോഡ്, മഹാത്മാഗാന്ധി ലൈബ്രറി റോഡ്, റസ്റ്റ് ഹൗസ് എം ജി റോഡ് എന്നിവിടങ്ങളിലാണ് തീര്‍ത്ഥാടനക്കാലം ആരംഭിച്ച ആദ്യ ആഴ്ചകളില്‍ തന്നെ വാഹനങ്ങള്‍ പാര്‍ക്ക് ചെയ്യുന്നത്. പോലീസിന്റെ കര്‍ശന നിര്‍ദേശം ഉണ്ടായിട്ടും ഇത്തരം പാര്‍ക്കിങ്ങുകള്‍ തുടരുന്നുണ്ട്. ഈ വഴികളിലെ വീടുകളിലെ സ്ലാബുകളും മറ്റും വാഹനങ്ങള്‍ കയറി തീര്‍ത്ഥാടനക്കാലത്ത് കേടു വരുന്നത് നിത്യ സംഭവമാണ് അതുമാത്രമല്ല വീടിന്റെ ഗേറ്റിനു മുന്നില്‍ വലിയ ബസ്സുകള്‍ അടക്കം മണിക്കൂറുകള്‍ പാര്‍ക്ക് ചെയ്യുന്നത് മൂലം വീട്ടുകാര്‍ക്കും അവരുടെ വാഹനങ്ങള്‍ക്കും പുറത്തുകടക്കാനും അകത്തുവരാനും ബുദ്ധിമുട്ട്‌ ഉണ്ടാക്കുന്നു . അനധികൃത പാര്‍ക്കിംഗ് തടയാന്‍ എല്ലാ റോഡുകളിലും പോലീസിനെ വിന്യസിച്ചിട്ടുണ്ടെന്നു പോലീസ് പറയുന്നു . നോ പാര്‍ക്കിംഗ് സൂചന ബോര്‍ഡുകള്‍ ഇവിടെ ഉടന്‍ സ്ഥാപിക്കാനും ഉദ്ദേശമുണ്ട്.

നാലമ്പല ദര്‍ശനത്തിനു കൂടല്‍മാണിക്യം ക്ഷേത്രത്തില്‍ ആരംഭം

ഇരിങ്ങാലക്കുട : കര്‍ക്കിടക പുണ്യം തേടിയുള്ള ഭക്തജനങ്ങളുടെ യാത്രക്ക് ഇന്ന് മുതല്‍ ആരംഭം കുറിച്ചു . നാലമ്പലങ്ങളില്‍ ഭരത പ്രതിഷ്ഠയുള്ള ക്ഷേത്രമായ കൂടല്‍മാണിക്യം ക്ഷേത്രത്തില്‍ വന്‍ സജീകരണങ്ങളാണ് ഇത്തവണയും ഒരുക്കിയിരിക്കുന്നത് . ഭക്തര്‍ക്ക്‌ മഴ നനയാതെ ദര്‍ശനം നടത്തുന്നതിനായി കിഴക്കേ നടയിലും പടിഞ്ഞാറും വടക്കേ നടയിലും പന്തലുകള്‍ ,വാഹനങ്ങള്‍ ആവശ്യമായ സൗകര്യങ്ങള്‍ പാര്‍ക്ക് ചെയ്യുന്നതിന് വിപുലമായ സൗകര്യങ്ങളും ഒരുക്കിയിട്ടുണ്ട്. അയ്യായിരം പേര്‍ക്ക് വരി നില്‍ക്കാവുന്ന കിഴക്കേ നടപ്പുരയോട് ചേര്‍ന്നുള്ള പന്തലിനു പുറമെ ഇത്തവണ ഊട്ടു പുരക്കും കൂത്തമ്പലത്തിനുമിടയില്‍ പതിനായിരം പേര്‍ക്ക് വരി നില്‍ക്കാനുള്ള കൂറ്റന്‍ പന്തല്‍ ഇത്തവണ ഒരുക്കുന്നത് പ്രത്യേകതയാണ് . റോഡില്‍ ക്യൂ നീണ്ടു ഗതാഗതസ്തംഭനം ഒഴിവാക്കനായിട്ടാണ് ക്ഷേത്രമതില്കെട്ടിനകത്തു ഭക്തജനങ്ങള്‍ക്ക്‌ നില്‍ക്കാനായി കൂറ്റന്‍ പന്തല്‍ ഒരുക്കിയിരിക്കുന്നത് എന്ന് ദേവസ്വം അധികൃതര്‍ പറഞ്ഞു. കിഴക്കേ നടയിലൂടെയാണ് പ്രവേശനം നല്‍കുക. കിഴക്കേ നടയിലൂടെ അകത്തേയ്ക്ക് കടന്ന് ദര്‍ശനം നടത്തിയ ശേഷം പടിഞ്ഞാറേ

നടയിലൂടെ പുറത്തേയ്ക്ക് ഇറങ്ങും. തുടര്‍ന്ന് കുലീപിനി തീര്‍ത്ഥക്കുളം വലം വച്ച ശേഷം കിഴക്കേ നടയിലെത്തും. കിഴക്കേ നടയിലാണ് പ്രസാദ വിതരണം നടക്കുക. ഭക്തജനങ്ങള്‍ക്ക് വഴിപാട് നടത്താന്‍ സൗകര്യത്തിന് നാല് കൗണ്ടറുകള്‍ ഒരുക്കും. കുട്ടംകുളം മുതല്‍ ക്ഷേത്രം വരെ പാര്‍ക്കിങ് നിരോധിച്ചിട്ടുണ്ട്. പകരം കൊട്ടിലാക്കല്‍ പറമ്പിലാണ് പാര്‍ക്കിങ്ങിന് സൗകര്യം ഒരുക്കിയിരിക്കുന്നത്. കര്‍ക്കിടക പുണ്യം തേടി പ്രായഭേദമേന്യേ നിരവധി ഭക്തജനങ്ങളാണ് ഇന്ന് രാവിലെ 5 മണി മുതല്‍ ക്ഷേത്രത്തില്‍ എത്തിച്ചേര്‍ന്നത്. നാലമ്പല ദര്‍ശനത്തിന്റെ ഭാഗമായി കെ എസ് ആര്‍ ടി സി യുടെ രണ്ടു ബസ്സുകള്‍ സര്‍വീസ് ആരംഭിച്ചിട്ടുണ്ട്. നാലമ്പല തീര്‍ത്ഥാടകര്‍ക്കായി ഇരിങ്ങാലക്കുട കെ.എസ്.ആര്‍.ടി.സി. സ്റ്റാന്‍ഡില്‍ നിന്ന് രണ്ട് സ്‌പെഷല്‍ ബസ്സുകളാണ്   നടത്തുക. രാവിലെ 6നും 6.30-നും കൂടല്‍മാണിക്യം ക്ഷേത്രത്തിനു മുന്നില്‍ നിന്നും സര്‍വീസ് ആരംഭിക്കും.  93 രൂപയാണ് ടിക്കറ്റ് നിരക്ക്. രാമായണമാസം കഴിയുന്നതുവരെ പ്രത്യേക സര്‍വീസ് ഉണ്ടായിരിക്കും.

 

നാലമ്പല ദര്‍ശനത്തിനുള്ള കെ.എസ്‌.ആര്‍.ടി.സി ബസ്സുകള്‍ സര്‍വ്വീസ് ആരംഭിച്ചു

ഇരിങ്ങാലക്കുട : നാലമ്പല തീര്‍ത്ഥാടകര്‍ക്കായുള്ള രണ്ടു സ്പെഷ്യല്‍ കെ.എസ്‌.ആര്‍ടി.സി ബസ്സുകളുടെ ഫ്‌ളാഗ് ഓഫ് പ്രൊഫ കെ യു അരുണന്‍ എം എല്‍ എ നിര്‍വഹിച്ചു . കൂടല്‍മാണിക്യം ക്ഷേത്ര പരിസരത്ത് വച്ച് നടന്ന ചടങ്ങില്‍ കൂടല്‍മാണിക്യം ദേവസ്വം ചെയര്‍മാന്‍ പനമ്പിള്ളി രാഘവമേനോന്‍, ദേവസ്വം മാനേജിഗ് കമ്മിറ്റി അംഗങ്ങളായ വിനോദ് തറയില്‍ , രാമചന്ദ്രന്‍, കെ.എസ്‌.ആര്‍ടി.സി ഇന്‍സ്‌പെക്ടര്‍ ഇന്‍ ചാര്‍ജ് പി എ ഷാജു , വെഹിക്കിള്‍ സൂപ്രവൈസര്‍ സലില്‍, ദേവസ്വം മാനേജര്‍ രാജി ഭക്തജനങ്ങള്‍ തുടങ്ങിയവര്‍ സംബന്ധിച്ചു. നാലമ്പല സ്പെഷ്യല്‍ ബസ്സുകളുടെ കണ്ടക്ടര്‍മാരായ ശ്രീജിത്ത് പി ആര്‍, കെ കെ സുബ്രമണ്യന്‍, ഡ്രൈവര്‍മാരായ പി സി സുകുമാരന്‍ ശിവദാസ് പി കെ എന്നിവരെ എം എല്‍ എ അഭിനന്ദിച്ചു . വര്‍ഷങ്ങളായി ഇവര്‍ തന്നെയാണ് ഈ സെര്‍വിസിന് പോകുന്നത്. യാത്രക്കാരില്‍നിന്നും വളരെനല്ല അഭിപ്രായമാണ് കെ.എസ്.ആര്‍.ടി.സി ജീവനക്കാരെക്കുറിച്ചു ലഭിച്ചതെന്നും എം എല്‍ എ പറഞ്ഞു. നാലമ്പല തീര്‍ത്ഥാടകര്‍ക്കായി ഇരിങ്ങാലക്കുട കെ.എസ്.ആര്‍.ടി.സി. സ്റ്റാന്‍ഡില്‍ നിന്ന് രണ്ട് സ്‌പെഷല്‍ ബസ്സുകളാണ് സര്‍വീസ് നടത്തുക. രാവിലെ 6നും 6.30-നും കൂടല്‍മാണിക്യം ക്ഷേത്രത്തിനുമുന്നില്‍ രാവിലെ ആരംഭിക്കും. 93 രൂപയാണ് ടിക്കറ്റ് നിരക്ക്. രാമായണമാസം കഴിയുന്നതുവരെ പ്രത്യേക സര്‍വീസ് ഉണ്ടായിരിക്കും. ഇരിങ്ങാലക്കുട കൂടല്‍മാണിക്യ ക്ഷേത്ര പരിസരത്ത് നിന്ന് യാത്ര ആരംഭിച്ച് തൃപ്രയാര്‍, കൂടല്‍മാണിക്യം , മൂഴിക്കുളം , പായമ്മല്‍ എന്നിങ്ങനെ ദര്‍ശനം നടത്തി തിരിച്ച് കൂടല്‍മാണിക്യം ക്ഷേത്ര പരിസരത്ത് ഒരു മണിയോടെ എത്തുന്ന രീതിയിലാണ് യാത്ര സജ്ജികരിച്ചിരിക്കുന്നത്.

കൂടല്‍മാണിക്യം ദേവസ്വം കൊട്ടിലാക്കല്‍ ഗണപതി ക്ഷേത്രത്തിലെ പ്രതിഷ്ഠാദിനം ജൂലൈ 10 ന്

ഇരിങ്ങാലക്കുട : ശ്രീ കൂടല്‍മാണിക്യം ദേവസ്വം കൊട്ടിലാക്കല്‍ ഗണപതി ക്ഷേത്രത്തിലെ പ്രതിഷ്ഠാദിനം ജൂലൈ 10 തിങ്കളാഴ്ച വിശേഷാല്‍ ചടങ്ങുകളോടെ ആഘോഷിക്കും എന്ന് ദേവസ്വം അഡ്മിനിസ്ട്രേറ്റര്‍ അറിയിച്ചു. ഇതിനോട് അനുബന്ധിച്ചു ഗണപതിഹോമം , അപ്പം , നിവേദ്യം, എന്നി വഴിപാടുകള്‍ ഭക്തജനങ്ങള്‍ക്ക് രസീത് ആക്കാവുന്നതാണ്.

കൂടല്‍മാണിക്യത്തില്‍ നാലമ്പല ദര്‍ശനത്തിനായുള്ള ഒരുക്കങ്ങള്‍ ആരംഭിച്ചു

ഇരിങ്ങാലക്കുട : കര്‍ക്കിടക പുണ്യം തേടിയുള്ള നാലമ്പല ദര്‍ശനം തുടങ്ങാന്‍ രണ്ടാഴ്ച മാത്രം ബാക്കി നില്‍ക്കേ നാലമ്പലങ്ങളില്‍ ഭരത പ്രതിഷ്ഠയുള്ള ക്ഷേത്രമായ കൂടല്‍മാണിക്യം ക്ഷേത്രത്തില്‍ ഒരുക്കങ്ങള്‍ പൂര്‍ത്തിയായി. ദര്‍ശനത്തിന് ക്ഷേത്രത്തില്‍ എത്തുന്ന ഭക്തജനങ്ങള്‍ക്കായി പ്രത്യേക സജ്ജീകരങ്ങള്‍ ആണ് ദേവസ്വം ഇത്തവണ ഒരുക്കിയിരിക്കുന്നത്. ഭക്തര്‍ക്ക്‌ മഴ നനയാതെ ദര്‍ശനം നടത്തുന്നതിനായി കിഴക്കേ നടയിലും പടിഞ്ഞാറും വടക്കേ നടയിലും പന്തലുകള്‍ ,വാഹനങ്ങള്‍ ആവശ്യമായ സൗകര്യങ്ങള്‍ പാര്‍ക്ക് ചെയ്യുന്നതിന് വിപുലമായ സൗകര്യങ്ങളും ഒരുക്കിയിട്ടുണ്ട്. അയ്യായിരം പേര്‍ക്ക് വരി നില്‍ക്കാവുന്ന കിഴക്കേ നടപ്പുരയോട് ചേര്‍ന്നുള്ള പന്തലിനു പുറമെ ഇത്തവണ ഊട്ടു പുരക്കും കൂത്തമ്പലത്തിനുമിടയില്‍ പതിനായിരം പേര്‍ക്ക് വരി നില്‍ക്കാനുള്ള കൂറ്റന്‍ പന്തല്‍ ഇത്തവണ ഒരുക്കുന്നത് പ്രത്യേകതയാണ് . റോഡില്‍ ക്യൂ നീണ്ടു ഗതാഗതസ്തംഭനം ഒഴിവാക്കനായിട്ടാണ് ക്ഷേത്രമതില്കെട്ടിനകത്തു ഭക്തജനങ്ങള്‍ക്ക്‌ നില്‍ക്കാനായി കൂറ്റന്‍ പന്തല്‍ ഒരുക്കിയിരിക്കുന്നത് എന്ന് ദേവസ്വം അധികൃതര്‍ പറഞ്ഞു. കിഴക്കേ നടയിലൂടെയാണ് പ്രവേശനം നല്‍കുക. കിഴക്കേ നടയിലൂടെ അകത്തേയ്ക്ക് കടന്ന് ദര്‍ശനം നടത്തിയ ശേഷം പടിഞ്ഞാറേ നടയിലൂടെ പുറത്തേയ്ക്ക് ഇറങ്ങും. തുടര്‍ന്ന് കുലീപിനി തീര്‍ത്ഥക്കുളം വലം വച്ച ശേഷം കിഴക്കേ നടയിലെത്തും. കിഴക്കേ നടയിലാണ് പ്രസാദ വിതരണം നടക്കുക. ഭക്തജനങ്ങള്‍ക്ക് വഴിപാട് നടത്താന്‍ സൗകര്യത്തിന് നാല് കൗണ്ടറുകള്‍ ഒരുക്കും. കുട്ടംകുളം മുതല്‍ ക്ഷേത്രം വരെ പാര്‍ക്കിങ് നിരോധിച്ചിട്ടുണ്ട്. പകരം കൊട്ടിലാക്കല്‍ പറമ്പിലാണ് പാര്‍ക്കിങ്ങിന് സൗകര്യം ഒരുക്കിയിരിക്കുന്നത്.

അടച്ചുകെട്ടിയ കൂടല്‍മാണിക്യം തെക്കേനടവഴി പൊളിച്ചുമാറ്റുന്നത് ഹൈകോടതി തടഞ്ഞു

ഇരിങ്ങാലക്കുട : കൂടല്‍മാണിക്യം ക്ഷേത്രത്തോട് ചേര്‍ന്നുള്ള തെക്കേ മതില്‍ ഇടവഴി ദേവസ്വം അടച്ചുകെട്ടിയത് പൊളിച്ചുനീക്കാന്‍ സബ്ബ് ഡിവിഷണല്‍ മജിസ്‌ട്രേറ്റ് ഉത്തരവിനു ഹൈകോടതിയുടെ സ്റ്റേ . ഒരു മാസത്തേക്ക് സ്റ്റാറ്റസ്കോ നിലനിര്‍ത്തനാണ് ഉത്തരവിലുള്ളതെന്നു ദേവസ്വം അഡ്മിനിസ്‌ട്രേറ്റര്‍ പറഞ്ഞു. ആവശ്യമായ രേഖകള്‍ സംഘടിപ്പിക്കാന്‍ സമയം അനുവദിക്കണമെന്ന് ദേവസ്വം ആവശ്യപ്പെട്ടിരുന്നു. സാമൂഹ്യവിരുദ്ധരുടെ ശല്യവും വലിയ വാഹനങ്ങള്‍ കടന്നുപോയാല്‍ ക്ഷേത്ര മതില്‍ക്കെട്ടിന് കോട്ടം സംഭവിക്കുമെന്നും കാണിച്ച് ദേവസ്വം ഭരണസമിതിയാണ് റോഡിന്റെ ഇരുവശത്തും വാഹനങ്ങള്‍ക്ക് കടന്നുപോകാന്‍ സാധിക്കാത്ത രീതിയില്‍ കാലുകള്‍ സ്ഥാപിച്ച് തടഞ്ഞത്. എന്നാല്‍ ഇതിനെതിരെ ചില എതിര്‍പ്പുകള്‍ ഉയര്‍ന്നുവന്നിരുന്നു. ചരിത്രപ്രസിദ്ധമായ കുട്ടംകുളം സമരത്തിലൂടെ ജനങ്ങള്‍ നേടിയെടുത്ത സഞ്ചാരസ്വാതന്ത്ര്യമാണ് റോഡ് അടച്ചുകെട്ടിയതിലൂടെ ഇല്ലാതായതെന്നായിരുന്നു സമരക്കാരുടെ നിലപാട്. ഇതിനെ തുടര്‍ന്നാണ് പൊതുപ്രവര്‍ത്തകയായ നടവരമ്പ് കുന്നത്തുവീട്ടില്‍ കെ ആര്‍ തങ്കമ്മ ദേവസ്വം അഡ്മിനിസ്‌ട്രേറ്റര്‍, നഗരസഭ സെക്രട്ടറി എന്നിവരെ എതിര്‍കക്ഷികളാക്കി ആര്‍.ഡി.ഒയ്ക്ക് പരാതി നല്‍കിയത്. തുടര്‍ന്ന് വില്ലേജ് ഓഫീസര്‍ സ്ഥലത്തെത്തി സമര്‍പ്പിച്ച അന്വേഷണ റിപ്പോര്‍ട്ടിന്റെ അടിസ്ഥാനത്തിലാണ് അടച്ചുകെട്ടിയ തെക്കേനടവഴി പൊളിച്ചുനിക്കാന്‍ നേരെത്തെ ഉത്തരവ് ഉണ്ടായത്. ഉത്തരവിനെ തുടര്‍ന്ന് കഴിഞ്ഞ ഫെബ്രുവരിയില്‍ എസ് സി, എസ് ടി കമ്മിഷന്‍ ചെയര്‍മാന്‍ എസ് സി/എസ്.ടി കമ്മിഷന്‍ ചെയര്‍മാന്‍ ക്ഷേത്ര പരിസരത്ത് തെളിവെടുപ്പിന് എത്തിയിരുന്നു.

ഒരുക്കങ്ങള്‍ വിലയിരുത്താന്‍ നാലമ്പല കോ-ഓര്‍ഡിനേഷന്‍ കമ്മിറ്റി യോഗം ചേര്‍ന്നു

ഇരിങ്ങാലക്കുട : കര്‍ക്കിടകം ഒന്നു മുതല്‍ ആരംഭിക്കുന്ന രാമായണ മാസാചരണത്തിന്റെ ഭാഗമായുള്ള നാലമ്പല തീര്‍ത്ഥാടനത്തിന്റെ ഒരുക്കങ്ങള്‍ വിലയിരുത്തുവാന്‍ ചൊവാഴ്ച്ച ഇരിങ്ങാലക്കുടയില്‍ നാലമ്പല കോ -ഓര്‍ഡിനേഷന്‍ കമ്മിറ്റിയുടെ യോഗം ചേര്‍ന്നു. കോ ഓര്‍ഡിനേഷന്‍ കമ്മിറ്റി ചെയര്‍മാന്‍ ഇരിങ്ങാലക്കുട എം എല്‍ എ പ്രൊഫ കെ യു അരുണന്‍ , നാട്ടിക എം എല്‍ എ ഗീത ഗോപി എന്നിവരുടെ നേതൃത്വത്തില്‍ തൃപ്പയാര്‍ ശ്രീരാമക്ഷേത്രം , ഇരിങ്ങാലക്കുട കൂടല്‍മാണിക്യം ക്ഷേത്രം ,തിരുമൂഴിക്കുളം ലക്ഷ്മണ സ്വാമി ക്ഷേത്രം, പായമ്മല്‍ ശത്രുഘ്ന സ്വാമിക്ഷേത്രം എന്നിവിടങ്ങളില്‍ നിന്നുള്ള പ്രതിനിധികളും പങ്കെടുത്തു. തീര്‍ത്ഥാടനക്കാലത്ത് ഭക്തജനങ്ങള്‍ക്കു വേണ്ടി സൗകര്യങ്ങള്‍ ഒരുക്കുവാന്‍ സര്‍ക്കാരില്‍ നിന്നും കൂടുതല്‍ സഹായങ്ങള്‍ ലഭ്യമാക്കാന്‍ എം എല്‍ എ മാരുടെ നേതൃത്വത്തില്‍ കമ്മിറ്റി അംഗങ്ങള്‍ ദേവസ്വം മന്ത്രിയെ കണ്ടു സംസാരിക്കാന്‍ തീരുമാനിച്ചു .ഭക്തര്‍ക്ക് വേണ്ട എല്ലാ വിധ സൗകര്യങ്ങളും നല്‍കാന്‍ വേണ്ട സജീകരണങ്ങള്‍ ഒരുക്കുമെന്നും എം എല്‍ എ മാരായ കെ യു അരുണന്‍ , ഗീത ഗോപി എന്നിവര്‍ പറഞ്ഞു. കൂടല്‍മാണിക്യം ദേവസ്വം ചെയര്‍മാന്‍ പനമ്പിള്ളി രാഘവമേനോന്‍ , ദേവസ്വം കമ്മിറ്റി മെമ്പര്‍മാരായ സി മുരാരി , വിനോദ് തറയില്‍ , തിരുമൂഴിക്കുളം ക്ഷേത്രം പ്രതിനിധി സി എന്‍ ശശിധരന്‍ , തൃപ്പയാര്‍ ക്ഷേത്ര സേമസമിതി പ്രസിഡന്റ് എം സ്വര്‍ണ്ണലത , പ്രതിനിധി വി ആര്‍ പ്രകാശന്‍ , ദേവസ്വം മാനേജര്‍ എം മനോജ് , പായമ്മല്‍ ക്ഷേത്ര പ്രതിനിധികളായ സുനില്‍കുമാര്‍ സി ആര്‍ , രാമചന്ദ്രന്‍ മാനേകാട്ടില്‍ , ഐ എസ് ഉണ്ണിമോന്‍ ,ഐ ആര്‍ അക്കിത്തം , കെ എസ് ഷാജി , ടി വി നാരായണന്‍ എന്നിവര്‍ സന്നിഹിതരായിരുന്നു .

കൂടല്‍മാണിക്യം കൂത്തമ്പലത്തില്‍ മൂന്നര വര്‍ഷങ്ങള്‍ക്ക് ശേഷം വീണ്ടും അരങ്ങുണര്‍ന്നു

ഇരിങ്ങാലക്കുട : കൂടല്‍മാണിക്യം ക്ഷേത്രത്തിലെ കൂത്തമ്പലത്തില്‍ മൂന്നര വര്‍ഷങ്ങള്‍ക്ക് ശേഷം വീണ്ടും കൂത്ത് അരങ്ങേറി. നവീകരണത്തിന് ശേഷം കൂടല്‍മാണിക്യം കൂത്തമ്പലത്തിലെ ആദ്യത്തേ കൂത്ത് നടത്തിയത് അമ്മന്നൂര്‍ കുട്ടന്‍ ചാക്യാര്‍ ആയിരുന്നു. എടാട്ട് വിജയന്‍ നമ്പ്യാര്‍ മിഴാവ് കൊട്ടി. അപര്‍ണ്ണ നങ്ങ്യാര്‍ നങ്ങാര്യമ്മയായും അരങ്ങത്ത് എത്തി. ദിഗ്പാലകരെയും ബ്രാഹ്മണരെയും വന്ദിക്കുന്ന കൂത്ത് പുറപ്പാടാണ് അരങ്ങേറിയത്. കേരളീയ വാസ്തുവിദ്യയുടെ പ്രത്യക്ഷ ഉദാഹരണമായ കൂത്തമ്പലമാണ് കൂടല്‍മാണിക്യ ക്ഷേത്രത്തില്‍ ഉള്ളത്. വലിയ ഉരുളന്‍ തൂണുകള്‍ ഇവിടത്തേ പ്രത്യേകതയാണ്. കൂടല്‍മാണിക്യം ക്ഷേത്രം ശ്രീകോവിലിന്റെ അതേ പവിത്രതയാണ് കൂത്തമ്പലത്തിനുമുള്ളത്. ക്ഷേത്രത്തിന് തെക്ക് കിഴക്ക് ഭാഗത്തായി വടക്കോട്ടു ദര്‍ശനം തരുന്ന രീതിയിലാണ് കൂത്തമ്പലം സ്ഥിതിചെയ്യുന്നത്. പാരമ്പര്യ കലകളായ ചാക്യാര്‍ക്കൂത്ത്, കഥകളി, നങ്ങ്യാര്‍ക്കൂത്ത് തുടങ്ങിയവ അവതരിപ്പിക്കാനുള്ള പ്രദര്‍ശന വേദിയാണിത്. 2012ല്‍ സ്വാമി വിവേകാനന്ദന്റെ 150-ാം ജന്മദിന വാര്‍ഷികത്തിന്റെ ഭാഗമായി കേന്ദ്ര സാംസ്‌ക്കാരിക വകുപ്പ് അനുവദിച്ച മൂന്ന് കോടിയോളം രൂപ ചിലവഴിച്ചാണ് കൂത്തമ്പലം നവീകരിച്ചത്. ആര്‍ക്കിയോളജിക്കല്‍ സര്‍വ്വേ ഓഫ് ഇന്ത്യയുടെ മേല്‍നോട്ടത്തിലായിരുന്നു നവീകരണം. നവീകരണത്തിന് ശേഷമുള്ള ആദ്യകൂത്തിന് മുമ്പായി ദിഗ്പാലക പൂജ, കലശം തുടങ്ങി വിശേഷാല്‍ പൂജകള്‍ നടന്നു. നെടുമ്പുള്ളി പരമേശ്വരന്‍ നമ്പൂതിരി, സതീശന്‍ നമ്പൂതിരി, അണിമംഗലം സുബ്രമുണ്യന്‍ നമ്പൂതിരി, ചെമ്പാപ്പിള്ളി നാരായണന്‍ നമ്പൂതിരി, മേല്‍ശാന്തി പുത്തിലത്ത് ഹരി നമ്പൂതിരി എന്നിവര്‍ പൂജാകര്‍മ്മങ്ങള്‍ക്ക് നേതൃത്വം നല്‍കി.

Top
Menu Title