News

Category: Exclusive

ഇന്ന് ലോകജലദിനം: അനാസ്ഥ മൂലം ഇരിങ്ങാലക്കുടയിലെ ജലസംഭരണികള്‍ നാശത്തില്‍

ഇരിങ്ങാലക്കുട : ജലം എന്ന അമൂല്യ സമ്പത്തിനെ സംരക്ഷിക്കാനുള്ള ബാധ്യത എല്ലാവരിലും നിക്ഷിപ്തമായിരിക്കെ അധികൃതരുടെ അനാസ്ഥ മൂലം ഇരിങ്ങാലക്കുടയിലെ ജലസംഭരണികള്‍ നാശത്തില്‍ . ലോക ജലദിനം ആചരിക്കുന്ന ഈ വേളയില്‍ ഇരിങ്ങാലക്കുടയിലെ കാലങ്ങളായുള്ള ജലസ്രോതസുകളായ മുപ്പതോളം കുളങ്ങള്‍ക്കു അടിയന്തര ശ്രദ്ധ ലഭിച്ചില്ലെങ്കില്‍ വിസ്‌മൃതിയിലാകുന്ന അവസ്ഥയിലാണ് . കുടിവെള്ളം കിട്ടാക്കനിയാകാന്‍ പോകുന്ന വരും കാലങ്ങളില്‍ കുളങ്ങളുടെ സംരക്ഷണത്തിന്റെ ആവശ്യകത ഇതുവരെ പൊതുജനങ്ങളില്‍ എത്തിയിട്ടില്ല . അജ്ഞതയും സ്വാര്‍ത്ഥതയും മൂലം നഗര ഹൃദയത്തില്‍ തന്നെ പല കുളങ്ങളും അധികൃതര്‍ തന്നെ മൂടി കളഞ്ഞിട്ടുണ്ട് . ഒരുകാലത്തു ജലസമൃതിയിലായിരുന്ന ഠാണാവിലെ പൂതംകുളം ഇപ്പോള്‍ അറിയപ്പെടുന്നത് അത് നികത്തി പണിത നഗരസഭയുടെ പൂതംകുളം ഷോപ്പിംഗ് കോംപ്ലെക്സിന്റെ പേരിലാണ് . കൂടല്‍മാണിക്യം കൊട്ടിലക്കല്‍ പറമ്പ് എട്ടോളം കുളങ്ങളെ കൊണ്ട് സമൃദ്ധിയിലായിരുന്നു . എന്നാല്‍ ഇപ്പോള്‍ ഒരു കുളം മാത്രമേ ഉള്ളു അതും പകുതി നികത്തിയ നിലയില്‍ .

ഇതിനു പുറമെ ചേലൂര്‍ കാട്ടിക്കുളം , കോതക്കുളം , ശാസ്താന്‍ക്കുളം , തുറുകയിക്കുളം , ഹനുമാന്‍ക്കുളം, കാഞ്ഞാണിക്കുളം , കോലുക്കുളം, കണക്കന്‍ക്കുളം , ചിറത്തിക്കുളം , പള്ളികാട്ക്കുളം , ചാത്തന്‍ക്കുളം , ചെമ്പുഞ്ചിറക്കുളം , വല്ലാഞ്ചിറക്കുളം, മണിക്കുളം , പൂച്ചക്കുളം , ഉമ്മന്‍കുളം , എന്നി കുളങ്ങളടക്കം മുനിസിപ്പാലിറ്റി പരിധിയിലെ മുപ്പതോളം കുളങ്ങളും കിണറുകളും നശിച്ചുകൊണ്ടിരിക്കുകയാണ്. സമീപ പഞ്ചായത്തുകളിലെ കുളങ്ങളുടെ സ്ഥിതിയിലും മാറ്റമില്ല .

പച്ചക്കൊടിയും കാത്ത് ഇരിങ്ങാലക്കുട റെയില്‍വേ സ്റ്റേഷന്‍: എം പി യുടെ അവഗണന വീണ്ടും

കല്ലേറ്റുംകര :  ജില്ലയിലെ രണ്ടാമത്തെ വലിയ സ്റ്റേഷനായ ഇരിങ്ങാലക്കുട സ്റ്റേഷന്‍ വികസനം തീരെ ചെറിയ സ്റ്റേഷനുകള്‍ക്കും പുറകിലാക്കുന്നതിന്റെ പ്രധാന കാരണങ്ങളില്‍ ഒന്ന് ഈ സ്റ്റേഷന്‍ നിലനില്‍ക്കുന്ന പ്രദേശത്തെ പ്രതിനിധീകരിച്ചിരുന്ന എം പിമാരുടെ വഴിയേ തന്നെയാണ് ഇപ്പോത്തെ എം.പിയും. തൃശ്ശൂരിനും പൂങ്കുന്നത്തിനും വാരിക്കോരി ഫണ്ട് ചിലവഴിക്കുന്ന എം.പി ഇരിങ്ങാലക്കുടയെ തഴയുന്നു. 115 വര്‍ഷത്തെ പാരമ്പര്യമുള്ള കല്ലേറ്റുംകരയില്‍ സ്ഥിതി ചെയുന്ന ഇരിങ്ങാലക്കുട റെയില്‍വേ സ്റ്റേഷന്‍ തൊട്ടടുത്ത പാസഞ്ചര്‍ ട്രെയിനുകള്‍ മാത്രം നിര്‍ത്തുന്ന ചെറിയ സ്റ്റേഷനുകള്‍ പോലും നവീകരിച്ചപ്പോള്‍ സൂപ്പര്‍ഫാസ്റ്റ് ട്രെയിനുകള്‍ അടക്കം ഇരുഭാഗങ്ങളിലേക്കുമായി നില്‍പ്പത്തിനാലോളം ട്രെയിനുകള്‍ക്ക് സ്റ്റോപ്പുള്ള ആദര്‍ശ് സ്റ്റേഷനായ ഇരിങ്ങാലക്കുടയുടെ പരിതാപകരമായ അവസ്ഥക്ക് പരിഹാരം കാണാന്‍ സാധിക്കുന്നില്ല

ഇപ്പോഴും മുന്‍പും ഇരിങ്ങാലക്കടയുടെ ആവശ്യങ്ങള്‍ക്ക് റെയില്‍വേ തടസ്സം നില്‍ക്കുന്നു എന്നു പറയുന്നവര്‍ എം.പി ഫണ്ടുപോലും ഇവിടേക്ക് നല്‍കാതെ അവഗണിച്ചതില്‍ വലിയ രീതിയിലുള്ള ജന രോഷമാണ് ഉയരുന്നത്. തൃശൂര്‍ എം പി സി എന്‍ ജയദേവന്റെ ഈ നടപടിക്കെതിരെ രൂക്ഷമായ രീതിയിലാണ് യാത്രക്കാരും, പൊതുജനങ്ങളും പ്രതികരിക്കുന്നത് .

രണ്ടു പ്ലാറ്റ്ഫോമുകളിലും വളരെ കുറച്ച് ഭാഗത്തു മാത്രമേ മേല്‍ക്കൂരയുള്ളൂ.  ഇതിന്റെ പല ഭാഗങ്ങളും, സ്റ്റേഷന്‍ കെട്ടിടവും മഴ പെയ്യുമ്പോള്‍ ചോര്‍ന്നൊലിക്കുന്ന അവസ്ഥയിലാണ്. ഒന്നാം നമ്പര്‍ പ്ലാറ്റ്ഫോമിനെ അപേക്ഷിച്ച് രണ്ടാം നമ്പര്‍ പ്ലാറ്റ്ഫോം വളരെ ഉയരം കുറഞ്ഞതാണ്.  ഇതു മൂലം സത്രീകളും കുട്ടികളും വയസായവരും ശാരീരിക ബുദ്ധിമുട്ടനുഭവിക്കുന്നവരും ട്രെയിനില്‍ കയറുവാനും ഇറങ്ങുവാനും വളരെയധികം ബുദ്ധിമുട്ടനുഭവിക്കുന്നുണ്ട്. മാത്രമല്ല ഇവിടെ സ്ലാബുകള്‍ നിരതെറ്റി കിടക്കുന്നതും പലതട്ടുകളായി കോണ്‍ക്രീറ്റ് ചെയ്തിരിക്കുന്നതും കാരണം അനുഭവിക്കുന്ന കഷ്ടതകള്‍ ഏറെയാണ്. രാത്രിയില്‍ പലയിടത്തും വെളിച്ചം തീരെയില്ലാത്തതിനാല്‍ വൃത്തിഹീനമായ പ്ലാറ്റ്ഫോമുകളിലൂടേയും, സ്റ്റേഷന്‍ പരിസരങ്ങളിലൂടേയുമുള്ള സഞ്ചാരം ദുഷ്കരമായ ഒന്നാണ്. ഇരുട്ടിന്റെ മറവില്‍ സാമൂഹു വിരുദ്ധരുടേയും മയക്കുമരുന്ന് മാഫിയകളുടേയും അഴിഞ്ഞാട്ടത്തിന് മൗനാനുവാദം നല്‍കുകയാണ് അധികാരികള്‍.

ടാര്‍ ചെയ്തു മണിക്കൂറുകള്‍ക്കകം അപാകത കണ്ടു പൊളിച്ചു നീക്കി

ഇരിങ്ങാലക്കുട : ഠാണാവില്‍ നിന്ന് ആരംഭിക്കുന്ന കോളനി റോഡ് ടാര്‍ ചെയ്ത മണിക്കൂറുകള്‍ക്കകം പരിശോധനയില്‍ ഉദ്യോഗസ്ഥര്‍ അപാകത കണ്ടെത്തിയതിനെ തുടര്‍ന്നു പൊളിച്ചുനീക്കി . നിലവിലെ റോഡില്‍ 20 എംഎം കനത്തില്‍ ചിപ്പിങ് കാര്‍പെറ്റ് ചെയ്തതാണ് ഇളകി പോന്നതായി കണ്ടത്. തിങ്കളാഴ്ച്ച രാവിലെ ടാര്‍ ചെയ്ത ഭാഗത്തിനെ കുറിച്ച് പരാതി ലഭിച്ചതിനെ തുടര്‍ന്നു മുനിസിപ്പല്‍ എന്‍ജിനീയരുടെ നേതൃത്വത്തില്‍ ഉദ്യോഗസ്‌ഥര്‍ സംഭവ സ്ഥലം പരിശോധിക്കുകയും
അപാകത കണ്ടെത്തുകയുമായിരുന്നു .ഇതിനെ തുടര്‍ന്നു ഈ ഭാഗം പൊളിച്ചുനീക്കാന്‍ കോണ്‍ട്രാക്ടറോട്‌ ആവശ്യപ്പെടുകയും ചെയ്തു .പുതിയ നിലവാരത്തിലുള വി ജി 30 ടാറിങ് ആണ് ഇവിടെ ചെയ്തിരുന്നത്. റാപിഡ് സീലിംഗ് എമല്‍ഷന്‍ ഉപയോഗിച്ചാണ് ഇവിടെ ടാറിങ് ചെയ്തത് എന്ന് കോണ്‍ട്രാക്ടര്‍ പറയുന്നു . നിലവാര തകര്‍ച്ചയാണോ മറ്റു സാങ്കേതിക തകരാറുകള്‍ ആണോ ഇതിനു പുറകില്‍ എന്ന് അന്വേഷണത്തിലൂടെ പറയാമെന്നു ഉദ്യോഗസ്‌ഥര്‍.

ആത്മഹത്യക്കു ശ്രമിച്ച ക്രൈസ്റ്റ് കോളേജ് വിദ്യാര്‍ത്ഥി ഡെന്‍സന് നീതി ലഭിക്കണമെന്നാവശ്യപ്പെട്ട് വിദ്യാര്‍ത്ഥികള്‍ പ്രിന്‍സിപ്പലിനെ വളഞ്ഞു -ക്രൈസ്റ്റില്‍ സമരം തുടരുന്നു

ഇരിങ്ങാലക്കുട : ഹാജര്‍ കുറവെന്ന് പറഞ്ഞു കോളേജ് അധികൃതര്‍ പരീക്ഷ എഴുതാന്‍ അനുമതി നിഷേധിച്ചതിനെ തുടര്‍ന്ന് ആത്മഹത്യക്ക് ശ്രമിച്ച ക്രൈസ്റ്റ് കോളേജിലെ ബിഎ അവസാന വര്‍ഷ ഫംഗ്ഷണല്‍ ഇംഗ്ലിഷ് വിദ്യാര്‍ത്ഥി ഡെന്‍സന് നീതി ലഭിക്കണമെന്നാവശ്യപ്പെട്ട് വിദ്യാര്‍ത്ഥികള്‍ പ്രിന്‍സിപ്പലിനെ വളഞ്ഞു. കോളേജ് അധികൃതരുടെ സമീപനത്തില്‍ പ്രതിഷേധിച്ചു വെള്ളിയാഴ്ച ക്രൈസ്റ്റ് കോളേജില്‍ എസ്‌ എഫ് ഐയുടെ നേതൃത്വത്തില്‍ വിദ്യാര്‍ത്ഥികള്‍ സമരത്തിലാണ് .  ഇവര്‍ രാവിലെ തന്നെ പ്രിന്‍സിപ്പലിന്റെ മുറി വളയുകയും കുത്തിയിരിപ്പു സമരം നടത്തുകയും ചെയ്തു. കെ എസ് യു , എ ബി വി പി എന്നി വിദ്യാര്‍ത്ഥി സംഘടനകളും വൈകാതെ പ്രിന്‍സിപ്പാലിനെതിരെ മുദ്രാവാക്യം വിളിച്ചെത്തിയതോടെ പ്രതിഷേധം ആര്‍ത്തിരമ്പി .

ഇതിന്ടെ മാധ്യമപ്രവര്‍ത്തകര്‍ പ്രിന്‍സിപ്പാളുമായി സംസാരിക്കാന്‍ തുടങ്ങിയതോടെ വിദ്യാര്‍ത്ഥി സംഘടന പ്രതിനിധികള്‍ മുറിയിലേക്കു ഇടിച്ചു കയറുകയും ഏകപക്ഷീയമായി പ്രിന്‍സിപ്പല്‍ സംസാരിക്കണ്ട എന്നും വിദ്യാര്‍ത്ഥികളുടെ ഭാഗം കൂടെ വിശദികരിക്കാൻ അനുവദിക്കണമെന്ന് പറയുകയും ചെയ്തു. മാനേജ്മെന്റിന് എതിരെ സംസാരിക്കുന്നവരെയും സംഘടന പ്രവര്‍ത്തനങ്ങള്‍ നടത്തുന്നവരെയും പല രീതിയില്‍ കോളേജ് അധികൃതര്‍ പീഡിപ്പിക്കുന്നെണ്ടെന്നും അതിലെ അവസാന ഇരയാണ് ഡെന്‍സണ്‍ എന്ന് വിദ്യാര്‍ത്ഥികള്‍ പറഞ്ഞു. ഡെന്‍സന് നീതി ലഭിക്കണമെന്ന തങ്ങളുടെ ആവശ്യം അംഗീകരിക്കുകയും വരെ സമരം തുടരുമെന്നും  ഇവരറിയിച്ചു.

related news : ചര്‍ച്ച അലസി :എസ്എഫ് ഐ തിങ്കളാഴ്ച മുതല്‍ ക്രൈസ്റ്റ് കോളേജില്‍ അനിശ്ചിതകാല സമരത്തില്‍

പീസ് സ്കൂള്‍ ഡയറിയില്‍ നിന്നും ദേശീയഗാനം കീറി കളഞ്ഞു വിതരണം ചെയ്തു -പ്രതിഷേധം ഭയന്നു വീണ്ടും കൂട്ടിചേര്‍ത്തു

ഇരിങ്ങാലക്കുട : പാഠ്യവിഷയ ഉള്ളടക്കത്തെ ചൊല്ലി വിവാദത്തിലായ പടിയൂര്‍ പീസ് സ്കൂളിനെ ചൊല്ലി വീണ്ടും ആരോപണം . അധ്യയന വര്‍ഷാരംഭത്തില്‍ വിദ്യാര്‍ത്ഥികള്‍ക്ക് വിതരണം ചെയ്ത സ്കൂള്‍ ഡയറിയില്‍ നിന്നും ദേശീയഗാനം ഉള്ള പേജ് കീറി കളഞ്ഞു വിതരണം ചെയ്ത വിവരം ഇപ്പോള്‍ പുറത്തു വരുന്നു . പ്രതിഷേധം ഭയന്നു പിന്നീട് ഡയറികള്‍ തിരിച്ചു വാങ്ങി ദേശീയഗാനം പേജ് വീണ്ടും ഒട്ടിച്ചു നല്‍കുകയായിരുന്നു. ഈ സ്കൂളില്‍ ദേശീയഗാനം ആലപിക്കാറില്ലെന്നും മാസ്സങ്ങള്‍ക്കു മുന്‍പ് ദേശീയവിരുദ്ധ നടപടികളുമായി സ്കൂളിന് എതിരെ അനേഷണം ആരംഭിച്ചപ്പോള്‍ മാത്രം ആണ് ദേശീയഗാനം ആലപിച്ചു തുടങ്ങിയതെന്നും രക്ഷിതാക്കള്‍ മാധ്യമങ്ങളോട് പറഞ്ഞു .

എന്നാല്‍  ഡയറിയില്‍ നിന്നും ദേശീയഗാനം ഉള്ള പേജ്  മനഃപൂര്‍വം കീറി കളഞ്ഞിട്ടില്ലെന്നും , ആപേജിന്റെ മറുവശത്തുള്ള സ്കൂള്‍ യൂണിഫോം വിവരങ്ങള്‍ നല്‍ക്കുന്നതിലെ പ്രിന്‍റിംഗ് തകരാര്‍ ഉള്ളതുകൊണ്ട് മാറ്റുകയാണ് ചെയ്തതെന്നും , ദേശീയഗാനം  ഉള്‍പ്പെടുത്തിയ പേജ് പിന്നീട്  ചേര്‍ത്തിട്ടുണ്ടെന്നും പടിയൂര്‍ പീസ് സ്കൂള്‍ അഡ്മിനിസ്ട്രേറ്റര്‍ ഹരീഷ് കെ എച്ച്  വിശിദികരിച്ചു.  ഇതുനു പുറമെ ദേശീയഗാനം സ്ഥിരമായി സ്കൂളില്‍ ആലപിക്കാറുണ്ടെന്നും അദ്ദേഹം പറഞ്ഞു .

വാര്‍ഡ്സഭയിലെ ചായയും പലഹാരങ്ങളും വേണ്ടെന്നുവച്ചു പകരം പച്ചക്കറിവിത്തുകള്‍ വിതരണം നടത്തി

വാര്‍ഡ്‌സഭയിലെ ചായ കുടിച്ചില്ലെങ്കിലും വരുന്ന മാസങ്ങളില്‍ തങ്ങള്‍ക്കു സ്വയം ഉത്പാദിപ്പിച്ച വിഷരഹിതമായ പച്ചക്കറികള്‍ ലഭിക്കുമെന്ന സന്തോഷത്തിലാണ് 38 ാം വാര്‍ഡിലെ ജനങ്ങള്‍ ഇപ്പോള്‍

തളിയക്കോണം :  ഇരിങ്ങാലക്കുട നഗരസഭയിലെ 38 ാം വാര്‍ഡില്‍ ഞായറാഴ്ച നടന്ന വാര്‍ഡ്സഭ മാതൃകാപരമായി. വാര്‍ഡ്സഭയില്‍ എത്തുന്നവര്‍ക്ക് പതിവായി നല്‍കുന്ന   ചായയും പലഹാരങ്ങളും ഇത്തവണ വേണ്ടെന്നുവച്ചു പകരം പച്ചക്കറി സ്വയം ഉല്‍പ്പാദിപ്പിച്ച് വാര്‍ഡിന് സ്വയംപര്യാപ്തത നേടുന്നതിന്റെ ആദ്യപടി എന്ന നിലയില്‍ വാര്‍ഡ് സഭയില്‍ എത്തിയ മുഴുവന്‍ കുടുംബങ്ങള്‍ക്കും 6 തരം പച്ചക്കറിതൈയും വിത്തുകളും സൗജന്യമായി വിതരണം ചെയ്തു. ബ്ലോക്ക് ഓഫീസ് ഹാളില്‍ വെച്ച് നടന്ന വാര്‍ഡ്സഭയില്‍ വാര്‍ഡിലെ മുതിര്‍ന്ന അംഗമായ കഴുങ്കില്‍ ഭാര്‍ഗവിയമ്മയ്ക്ക് ആദ്യ വിത്ത് പായ്ക്കറ്റ് കൗണ്‍സിലര്‍ സി.സി. ഷിബിന്‍ നല്‍കി . സാധാരണയായി ആയിരം രൂപയിലധികം ചെലവുവരുന്ന വാര്‍ഡ്സഭയിലെ  ചായയും പലഹാരങ്ങളും വേണ്ടെന്നുവച്ചു അതിലൂടെ സമാഹരിച്ച തുകവച്ചാണ് ഈ മാതൃകാ  ഉദ്യമം നടപ്പിലാക്കിയത് എന്ന് വാര്‍ഡ് കൗണ്‍സിലര്‍ പറഞ്ഞു . പ്ലാസ്റ്റിക്ക് കവര്‍ ബഹിഷ്ക്കരിച്ചു കൊണ്ട് പേപ്പര്‍ കവറുകളിലാക്കിയാണ് വിത്ത്   വിതരണം ചെയ്തത്. വാര്‍ഡ്‌സഭയിലെ ചായ കുടിച്ചില്ലെങ്കിലും വരുന്ന മാസങ്ങളില്‍ തങ്ങള്‍ക്കു സ്വയം ഉത്പാദിപ്പിച്ച വിഷരഹിതമായ പച്ചക്കറികള്‍ ലഭിക്കുമെന്ന സന്തോഷത്തിലാണ് 38 ാം വാര്‍ഡിലെ ജനങ്ങള്‍ ഇപ്പോള്‍.

പുതംകുളം ഷോപ്പിംഗ് കോംപ്ലക്സില്‍ ടൈല്‍ വിരിക്കുന്നതില്‍ ക്രമക്കേട്

ഇരിങ്ങാലക്കുട : നഗരസഭയുടെ അധിനതയില്‍ ഉള്ള പുതംകുളം ഷോപ്പിംഗ് കോംപ്ലെക്സിന്റെ പാര്‍ക്കിംഗ് സ്ഥലത്തു കോണ്‍ക്രീറ്റ് ടൈല്‍ വിരിക്കുന്നതില്‍ വീണ്ടും അപാകത . കഴിഞ്ഞ തവണ ഇവിടം പൂര്‍ണമായി ടാര്‍ ചെയ്‌തിരുന്നെങ്കിലും, ഒരു പൊതുപരിപാടിക്കായി വേദി കെട്ടിയപ്പോള്‍ ഇവിടെ താഴ്ന്നു പോകുകയായിരുന്നു . നിര്‍മാണ പാളിച്ചയും നിലവാരതകര്‍ച്ചയുമാണ് ഇതിനു കാരണം എന്ന് ആരോപണം ഉണ്ടായിരുന്നു. ഇതേ കോണ്‍ട്രാക്ടര്‍ തന്നെ ഇപ്പോള്‍ ഇവിടെ കോണ്‍ക്രീറ്റ് ടൈല്‍ വിരിക്കുമ്പോള്‍ നിര്‍മാണ മാനദണ്ഡങ്ങള്‍ക്കു വിരുദ്ധമായി ബേബിമെറ്റല്‍നു പകരം മണ്ണ് നിറച്ചാണ് നിര്‍മാണം പുരോഗമിക്കുന്നത് . സംഭവം അറിഞ്ഞു സ്ഥലത്തെത്തിയ നഗരസഭാ കൗണ്‍സില്‍ ഷിബിന്‍ ഇത് ചോദ്യം ചെയുകയും ഇതേ തുടര്‍ന്നു മണ്ണു മാറ്റി ബേബിമെറ്റല്‍ ഇടാന്‍ കോണ്‍ട്രാക്ടര്‍ നിര്‍ബന്ധിതനാവുകയും ചെയ്തു.

ബസ്‌ സ്റ്റാന്റ് പരിസരത്ത് കൂടല്‍മാണിക്യം ക്ഷേത്ര സ്ഥിരം കവാട നിര്‍മാണത്തിനുള്ള പ്രാരംഭ പ്രവര്‍ത്തനങ്ങള്‍ ആരംഭിച്ചു

ഇരിങ്ങാലക്കുട: സംഗമേശ ഭക്തരുടെ ഏറെ നാളത്തെ ആഗ്രഹമായ കൂടല്‍മാണിക്യം ക്ഷേത്ര കവാടം സാക്ഷാത്കാരമാകാനുള്ള പ്രാരംഭ പ്രവര്‍ത്തനങ്ങള്‍ വെള്ളിയാഴ്ച ആരംഭിച്ചു . ബസ്‌ സ്റ്റാന്റ് പരിസരത്ത് കൂടല്‍മാണിക്യം റോഡ്‌ ആരംഭിക്കുന്നതിനു സമീപം പെട്രോള്‍ പമ്പിനും സുപ്രീം ബേക്കറിക്കും മുന്നിലാണ് കവാടം വരുന്നത്. സ്പോണ്‍സര്‍ഷിപ്പിലൂടെ ധനം സമാഹരിച്ചാണ് കവാടം നിര്‍മാണം ഉദേശിക്കുന്നത് . സ്ഥിരം കവാട നിര്‍മ്മാണത്തിന് പ്രഥമ കൂടല്‍മാണിക്യം ദേവസ്വം മാനേജിംഗ് കമ്മിറ്റി ചെയര്‍മാന്‍ തങ്കപ്പന്‍ മാസ്റ്ററുടെ നേതൃത്വത്തില്‍ തീരുമാനം എടുക്കുകയും അതെ തുടര്‍ന്ന് അന്നത്തെ എല്‍ ഡി എഫ് മന്ത്രിസഭയിലെ ദേവസ്വം മന്ത്രിയായിരുന്ന കടന്നപ്പിള്ളി രാമചന്ദ്രന്‍ ഉദ്ഘാടനം നിര്‍വഹിക്കുകയും ചെയ്തിരുന്നു. ക്ഷേത്ര കവാട നിര്‍മ്മാണത്തിന് 2009 ഡിസംബര്‍ 1 ന് നഗരസഭ അനുമതി നല്കിയിട്ടുള്ളതുമാണ്. എന്നാല്‍ നീണ്ട 8 വര്‍ഷക്കാലമായിട്ടും കവാട നിര്‍മ്മാണം നടത്താനായി പിന്നിട് വന്ന ദേവസ്വം ഭരണസമിതിയ്ക്ക് ആവാഞ്ഞത്‌ ഭക്തരില്‍ നിന്ന് കടുത്ത പ്രതിക്ഷേധത്തിന് ഇടയാക്കിയിരുന്നു.


പ്രസിദ്ധമായ കൂടല്‍മാണിക്യ ക്ഷേത്രോത്സവത്തിന് ബസ്‌ സ്റ്റാന്റ് പരിസരത്ത് താത്കാലിക പന്തല്‍ പോലും ഉയര്‍ത്താനായി ദേവസ്വം, ഭരണസമിതിയ്ക്ക് കഴിഞ്ഞിരുന്നില്ല നഗരത്തിലെ ചെറുകിട ക്ലബ്ബുകള്‍ പോലും പരിപാടികള്‍ക്ക് വലിയ കമാനങ്ങളും പന്തലും ഉയര്‍ത്തുന്ന സാഹചര്യത്തില്‍ ദേവസ്വം പന്തല്‍ ഉയര്‍ത്താതിരുന്നത് പ്രതിക്ഷേധം ക്ഷണിച്ച് വരുത്തിയിരുന്നു. എന്നാല്‍ സ്ഥിരം കവാടമെന്ന സ്വപ്നം യാഥാര്‍ത്ഥ്യമാക്കാന്‍ ഇപ്പോള്‍ പനമ്പിള്ളി രാഘവമേനോന്റെ നേതൃത്വത്തിലുള്ള ഭരണസമിതി മുന്‍കൈ എടുക്കുന്നത് പൊതുവെ സ്വാഗതാര്‍ഹം ആയിട്ടുണ്ട്. തൃപ്രയാര്‍ ക്ഷേത്ര കവാട മാതൃകയില്‍ സ്പോന്‍സര്‍ഷിപ്പിലൂടെയാണ് കവാട നിര്‍മ്മാണം എന്ന് അറിയുന്നു. കവാട നിര്‍മാണത്തിന്റെ ഭാഗമായി റോഡില്‍ അളന്നു തിട്ടപ്പെടുത്തി തൂണിനുള്ള സ്ഥലം രേഖപ്പെടുത്തി .ദേവസ്വം മാനേജിങ് കമ്മിറ്റി മെമ്പര്‍ വിനോദ് തറയില്‍, കൂടല്‍മാണിക്യം പരികര്‍മി മണക്കാട് പരമേശ്വരന്‍ നമ്പൂതിരി എന്നിവരുടെ നേതൃത്വത്തില്‍ ആയിരുന്നു പ്രാരംഭ പ്രവര്‍ത്തനങ്ങള്‍ .

വല്ലക്കുന്ന് പുതുച്ചിറയില്‍ കനാല്‍ വെള്ളമെത്തിയിട്ട് രണ്ടു വര്‍ഷമാകുന്നു- ഞായറാഴ്ച പ്രതിഷേധയോഗം

വല്ലക്കുന്ന് : വല്ലക്കുന്ന് പുതുച്ചിറയില്‍ കനാല്‍ വെള്ളമെത്തിയിട്ട്  രണ്ടു വര്‍ഷമാകുന്നു. ജനുവരി പകുതിയോടെ ചിറയില്‍ വെള്ളം  നിറക്കാറുണ്ട്. വേനല്‍കാലത്ത് ചിറയില്‍ നിറച്ചുനിര്‍ത്തുന്ന വെള്ളം സമീപത്തെ  പാടങ്ങളില്‍ കൃഷിക്കും പരിസരപ്രദേശങ്ങളിലെ നൂറുകണക്കിന് വീടുകളിലെ കിണറുകളില്‍ കുടിവെള്ളത്തിനായി പ്രയോജനപ്പെടാറുണ്ട്  വെള്ളമെത്താത്തത് മൂലം മേഖലയില്‍ ജലക്ഷാമം രൂക്ഷമാകുന്നു. ചാലക്കുടി ഇറിഗേഷന്‍ പദ്ധതിയിലെ വലതുകര കനാലില്‍ നിന്നും ആളൂര്‍ ഭാഗത്തുള്ള സ്പൗട്ട വഴി കല്ലേറ്റുംകര ബ്രാഞ്ച് കനാലിലേക്ക് തുറന്നു വിടുന്ന വെള്ളമാണ് വേനലില്‍ ചിറയിലെത്തിച്ച് കെട്ടി നിര്‍ത്തുന്നത്. കഴിഞ്ഞ വര്‍ഷം മുതല്‍ ചിറയിലേക്ക് ഒട്ടും വെള്ളമെത്താതായതോടെ കൃഷിക്കും വീട്ടാവശ്യത്തിനും വെള്ളം കിട്ടാത്ത അവസ്ഥയിലായി . പായലും ചാണ്ടിയും നീക്കി കുളം സംരക്ഷിക്കണമെന്നും മേഖലയിലെ ജലക്ഷാമം പരിഹരിക്കാന്‍ അടിയന്തിരമായി ചിറയില്‍ വെള്ളമെത്തിക്കണമെന്നും ആവശ്യപെട്ട് ഞായറാഴ്ച 4  മണിക്ക് വല്ലക്കുന്ന് ന്യൂമൂണ്‍ ആര്‍ട്സ് ആന്‍ഡ് സ്പോര്‍ട്സ് ക്ലബ്ബിന്റെ നേതൃത്വത്തില്‍ പുതുച്ചിറ പരിസരത്ത്‌ നാട്ടുകാരുടെ  ഒരു ആലോചനയോഗം ചേരുന്നുണ്ട്.

കൂടല്‍മാണിക്യം പടിഞ്ഞാറെ ഊട്ടുപുരഭാഗത്തുള്ള ഖാദി കെട്ടിടത്തിന് സമീപം മാലിന്യ കൂമ്പാരത്തിന് തീ പടര്‍ന്നത് ആശങ്ക ഉണര്‍ത്തി

ഇരിങ്ങാലക്കുട : കൂടല്‍മാണിക്യം ക്ഷേത്രത്തിന് പടിഞ്ഞാറെ ഊട്ടുപുരഭാഗത്തുള്ള ഖാദി കെട്ടിടത്തിന് സമീപം മാലിന്യ കൂമ്പാരത്തിന് തീ പിടിച്ചു. വ്യാഴാഴ്ച രാത്രി 11 മണിയോടെയാണ് സംഭവം പരിസരവാസികളുടെ കണ്ണില്‍ പെട്ടത്. ഉടനെ ഫയര്‍ ഫോഴ്സിനെ വിവരം അറിയിച്ചെങ്കിലും ഫയര്‍ എന്‍ജിന്‍ പരിസരത്ത് എത്തിക്കാന്‍ കഴിയാതിരുന്നതിനാല്‍ ബക്കറ്റില്‍ വെള്ളമെടുത്താണ് തീ അണച്ചത്. പെട്ടന്ന് തീ അണയ്ക്കാന്‍ സാധിച്ചതിനാല്‍ ഊട്ടു പുരയിലെ പടിഞ്ഞാറുള്ള ഈ കെട്ടിടത്തിലെ 200 ഓളം വര്‍ഷം പഴക്കമുള്ള ലക്ഷകണക്കിന് രൂപയുടെ മര ഉരുപ്പടികളില്‍ തീ പടര്‍ന്നില്ല. വെള്ളിയാഴ്ച ഉച്ചക്കും ഇതില്‍ നിന്നും പുക ഉയരുന്നുണ്ടായിരുന്നു. തീ പിടിച്ചതിന്റെ സമീപത്തുള്ള പടിഞ്ഞാറെ ഊട്ടുപുരയിലാണ് പുരാവസ്തു വകുപ്പിന്റെ കിഴില്‍ ക്ഷേത്ര നവീകരണത്തിനുള്ള മര ഉരുപിടിക്കള്‍ സൂക്ഷിച്ചിരിക്കുന്നതും പണിക്കള്‍ നടക്കുന്നതും . എന്നാല്‍ രാത്രി ഇവിടെ ആരും ഉണ്ടാകാറില്ല . ഊട്ടുപുരയുടെ പടിഞ്ഞാറെ നടവഴിയില്‍ സാമൂഹ്യ വിരുദ്ധരുടെ താവളമാണ് . ഊട്ടുപുരയുടെ വാതില്‍പടി മാസങ്ങള്‍ക്കു മുന്‍പ് ദുരുഹ സാഹചര്യത്തില്‍ കത്തിയിരുന്നു.

പടിഞ്ഞാറേ ഊട്ടുപുരയുടെ പടിഞ്ഞാറ് ഭാഗത്ത് ഒരു ഹാള്‍ പോലെ ഉണ്ടായിരുന്ന ഈ കെട്ടിടം പിന്നിട് ഖാദി നെയ്ത് കേന്ദ്രത്തിനായി വാടകയ്ക്ക് കൊടുക്കപ്പെടുകയും , കുറച്ചു നാള്‍ ഖാദി ഇവിടെ പ്രവര്‍ത്തിക്കുകയും ചെയ്തിരുന്നു. ആദ്യകാലത്ത് ഈ കെട്ടിടത്തില്‍ നമ്പൂതിരിമാര്‍ വാരസദ്യയും , ഉത്സവകാലത്ത് ഊട്ടും നടത്തിയിരുന്നതായും പറയപ്പെടുന്നു. രാത്രിയില്‍ വിളക്ക് തെളിയിക്കുന്നതിനായി ചുവരുകളില്‍ കല്‍ വിലക്കുകളും ഇവിടെ ഉണ്ടായിരുന്നതായി പറയപ്പെടുന്നു. ഈ കെട്ടിടത്തിന്റെ തറയും ചുവരുകളും അടുത്തകാലം വരെ ഏറെ ശക്തമായിരുന്നു. എന്നാല്‍ ദേവസ്വത്തിന്റെ അനാസ്ഥമൂലം ഇന്ന് ഇവിടെ കാട് കയറി നാശോന്മുഖമായി കിടക്കുകയാണ്. 200 ഓളം വര്‍ഷം പഴക്കമുള്ള ഈ കെട്ടിടത്തിന്റെ ഓടുമേഞ്ഞ മേല്‍ക്കൂര 5 വര്‍ഷം മുന്‍പ് ഉണ്ടായ കനത്ത മഴയില്‍ തകര്‍ന്ന് വീണതിനെ തുടര്‍ന്ന് ഉപയോഗ ശൂന്യമായി കിടക്കുകയായിരുന്നു. പിന്നിട് ക്ഷേത്ര പുനരുദ്ധാരനത്തിന്റെ ഭാഗമായി പുരാവസ്തു വകുപ്പിന്റെ ബാക്കി വന്ന മര ഉരുപ്പടികള്‍ സൂക്ഷിക്കുന്നതിനായി ഈ കെട്ടിടം ഉപയോഗിച്ചിരുന്നു. എന്നാല്‍ ഇപ്പോള്‍ ഈ കെട്ടിടത്തിനൊപ്പം, ഇവിടെ സൂക്ഷിച്ചിരുന്ന ലക്ഷക്കണക്കിന്‌ രൂപ വിലമതിക്കുന്ന മരത്തിന്റെ പട്ടികകളും , അപൂവ്വയിനം മര പലകകളും വേണ്ടവിധത്തില്‍ സൂക്ഷിക്കാനുള്ള യാതൊരു വിധ സജീകരണങ്ങളും ഇല്ലാത്തതിനാല്‍ വെയിലും മഴയും ഏറ്റ് നശിക്കുകയാണ്. കൂടാതെ തേക്ക് , ഈട്ടി, ദേവദാരു തുടങ്ങിയ വിലപിടിപ്പുള്ള മരകപലകകള്‍ ഇവിടെ നിന്നും മോഷണം പോവുന്നതായും നാട്ടുകാര്‍ പറയുന്നുണ്ട്.

കംഫര്‍ട്ട് സ്റ്റേഷനില്‍ മൂക്കുപൊത്തി ആരോഗ്യ സ്റ്റാന്റിംഗ് കമ്മിറ്റി ചെയര്‍മാന്‍ : ലേലത്തിന് എടുത്തിരിക്കുന്നത് നഗരസഭാ ജീവനക്കാരന്‍

ഇരിങ്ങാലക്കുട : നഗരസഭക്ക് കീഴിലുള്ള കംഫര്‍ട്ട് സ്റ്റേഷന്‍ വൃത്തിഹീനമായ സാഹചര്യത്തിലാണെന്ന് കൗണ്‍സിലില്‍ പരാതി ഉയര്‍ന്നതിനാല്‍ ആരോഗ്യ സ്റ്റാന്റിംഗ് കമ്മിറ്റി ചെയര്‍മാന്റെ നേതൃത്വത്തില്‍ നഗരസഭാ ഉദ്യോഗസ്ഥരും കൗണ്‍സിലര്‍മാരും നഗരസഭാ ബസ് സ്റ്റാന്‍ഡില്‍ പ്രവര്‍ത്തിക്കുന്ന കംഫര്‍ട്ട് സ്റ്റേഷന്‍ സന്ദര്‍ശിച്ചപ്പോള്‍ കണ്ടത് ഭയാനകമായ കാഴ്ച്ചയാണ്. അസഹനീയമായ ദുര്‍ഗന്ധം മൂലം മൂക്ക് പൊത്തിയാണ് ആരോഗ്യ സ്റ്റാന്റിംഗ് കമ്മിറ്റി ചെയര്‍മാന്‍ അകത്ത് കടന്നത്. മൂത്രപ്പുരകളും കക്കൂസുകളും പലതും പ്രവര്‍ത്തനരഹിതവും മാലിന്യ കൂമ്പാരവുമായിരുന്നു. ഒരു രൂപയും മൂന്ന് രൂപയും
വാങ്ങുന്നതിന് പകരം രണ്ട് രൂപയും അഞ്ച് രൂപയുമാണ് അനധികൃതമായി കരാറെടുത്തവര്‍ വാങ്ങുന്നത്. കംഫര്‍ട്ട് സ്റ്റേഷന് പുറത്ത് സെപ്റ്റിക് ടാങ്കുകള്‍ നിറഞ്ഞു കവിഞ്ഞു സ്ലാബുകള്‍ പൊട്ടിയ അവസ്ഥയില്‍ പരിസരമാകെ ദുര്‍ഗന്ധം അനുഭവിക്കുന്ന അവസ്ഥയിലായിരുന്നു. ആരോഗ്യ വിഭാഗത്തിന്റെ കൃത്യമായ മേല്‍നോട്ടം കൃത്യമായി ഇല്ലാത്തതാണ് ഇതിന് കാരണം. ഒരു നഗരസഭാ സി എല്‍ ആര്‍ ജീവനക്കാരനാണ് കംഫര്‍ട്ട് സ്റ്റേഷന്റെ കരാര്‍ എടുത്തിരിക്കുന്നത്. തന്റെ സ്വാധീനം മൂലം പല നടപടികളില്‍ നിന്നും ഇയാള്‍ രക്ഷപ്പെടുകയാണ് പതിവ്. ആരോഗ്യ സ്റ്റാന്റിംഗ് കമ്മിറ്റി ചെയര്‍മാന്‍ അബ്‌ദുള്‍ ബഷീര്‍, കൗണ്‍സിലര്‍മാരായ സന്തോഷ് ബോബന്‍, അമ്പിളി ജയന്‍, രമേശ് വാര്യര്‍, നഗരസഭാ സെക്രട്ടറി ഇന്‍ചാര്‍ജ് ഒ എന്‍ അജിത്ത് കുമാര്‍, ഹെല്‍ത്ത് ഇന്‍സ്‌പെക്ടര്‍ മണിപ്രസാദ്‌ എന്നിവര്‍ സംഘത്തിലുണ്ടായിരുന്നു.

ശശിയുടെ കുടിലില്‍ വൈദ്യുതി എന്ന സ്വപ്നം യാഥാര്‍ഥ്യമാക്കിയ സന്തോഷത്തില്‍ കൗണ്‍സിലറും വൈദ്യുതി വകുപ്പ് ജീവനക്കാരും

ഇരിങ്ങാലക്കുട : നിര്‍ധനനും അവശനുമായ ശശി പുളയത്തിന്റെ കുടിലില്‍ വൈദ്യുതി എത്തിക്കാനായതിന്റെ സ്വപ്ന സാഫല്യത്തിലാണ് വാര്‍ഡ് കൗണ്‍സിലര്‍ എം സി രമണനും വൈദ്യുതി വകുപ്പ് ജീവനക്കാരും. വര്‍ഷങ്ങളോളം ഇരിങ്ങാലക്കുട ബസ് സ്റ്റാന്‍ഡിലും പരിസരങ്ങളിലും അപൂര്‍വ്വമായ ” കുട്ടി പപ്പടം വിറ്റു നടന്നിരുന്ന സോള്‍വന്റിന് സമീപം താമസിക്കുന്ന ശശി ഇപ്പോള്‍ തീരെ അവശനാണ്. തന്റെ കുടിലില്‍ ഏകാംഗനായി കഴിയുന്ന ശശിക്ക്, മുന്‍ വൈദ്യുതി വകുപ്പ് ജീവനക്കാരനും വാര്‍ഡ് കൗണ്‍സിലറും കൂടിയായ എം സി രമണന്‍ സര്‍ക്കാരിന്റെ എല്ലാവര്‍ക്കും വൈദ്യുതി എന്ന പദ്ധതി പ്രകാരം അപേക്ഷിക്കുകയും ഇദ്ദേഹത്തിന് വൈദ്യുതി ലഭ്യമാക്കി കൊടുക്കുകയുമാണ് ചെയ്തത്.

വൈദ്യുതിക്ക് വേണ്ടി ഗുണഭോക്താവ് ഒരുക്കേണ്ട അടിസ്ഥാന സൗകര്യങ്ങള്‍ക്കും മറ്റു ചിലവുകളും ഒക്കെയായി 10000 രൂപയ്ക്ക് താഴെ ശശിക്ക് വേണ്ടി വാര്‍ഡ് കൗണ്‍സിലര്‍ തന്നെയാണ് ചിലവാക്കിയത്. ഇതിന് പുറമെ വൈദ്യുതി വകുപ്പിലെ ജീവനക്കാരും വേണ്ട സഹായങ്ങള്‍ ചെയ്തു നല്‍കി. വൈദ്യുതി വിതരണത്തിനായി അധികമായി വേണ്ടിവന്ന ഒരു ഇലക്ട്രിക്ക് പോസ്റ്റ് ശശിയുടെ കുടിലിന് സമീപം ഇവര്‍ സ്ഥാപിക്കുകയും ചെയ്തു. അസിസ്റ്റന്റ് എഞ്ചിനീയര്‍ എ എസ് ഹനീഷ് നേരിട്ട് എത്തി ശശിയുടെ വീട്ടിലേക്കുള്ള കണക്‌ഷന്‍ നല്‍കുകയും, വാര്‍ഡ് കൗണ്‍സിലര്‍ എം സി രമണന്‍ സ്വിച്ച് ഓണ്‍ കര്‍മ്മം നിര്‍വഹിക്കുകയും ചെയ്തു. സബ് എന്‍ജിനീയര്‍ ഗോപാലകൃഷ്ണന്‍, ഓവര്‍സിയര്‍ കൃഷ്ണകുമാര്‍ തുടങ്ങിയ ഇലക്ട്രിസിറ്റി ജീവനക്കാരും നാട്ടുകാരും സന്നിഹിതരായിരുന്നു.

വാഹനങ്ങള്‍ കയറിയിറങ്ങുമ്പോള്‍ റോഡിലെ മാന്‍ഹോള്‍ തുറന്നു പോകുന്നത് അപകടഭീഷണി ഉയര്‍ത്തുന്നു

ഇരിങ്ങാലക്കുട : വിശ്വനാഥപുരം ക്ഷേത്രത്തിനു സമീപം ഠാണാ പോട്ട സംസ്ഥാനപാതയിലെ കേബിള്‍ മാന്‍ഹോള്‍ ചൊവാഴ്ച രാത്രി വലിയ കണ്ടെയ്നര്‍ ലോറി കയറിയിറങ്ങിയപ്പോള്‍ തുറന്നു മാന്‍ഹോള്‍ ക്യാപ് തെറിച്ചു പോയി . പത്തടിയിലധികം താഴ്ചയും ഒരടിയോളം വ്യാസവുമുള്ള വലിയ കുഴിയാണ് ഇപ്പോള്‍ സംസ്ഥാനപാതയുടെ നടുവില്‍ . രാത്രി പത്തുമണിയോടെ ഉണ്ടായ സംഭവം അവിടെയുണ്ടായിരുന്ന യുവാക്കളുടെ ശ്രദ്ധയില്‍ പെടുകയും  പുറകില്‍ വന്നിരുന്ന വാഹനങ്ങളെ തടഞ്ഞു  തെറിച്ചു പോയ മാന്‍ഹോള്‍ അടപ്പ് രണ്ടാമതും സ്ഥാപിച്ചു വാഹനങ്ങളെ വിടുകയുമായിരുന്നു. എന്നാല്‍ മാന്‍ഹോള്‍ ക്യാപ് ഏതുസമയവും ഭാരവാഹനങ്ങള്‍ കയറിയിറങ്ങുമ്പോള്‍ വീണ്ടും തെറിച്ചു പോകാന്‍ സാധ്യതയുണ്ട് . ഇത് കാല്‍നടക്കാര്‍ക്കും പുറകെ വരുന്ന വാഹനങ്ങള്‍ക്കും അപകടഭീഷണി ഉയര്‍ത്തുന്നു.

അധികൃതര്‍ കനിഞ്ഞില്ല : എടതിരിഞ്ഞിയിലെ അപകട സ്ലാബ് സ്വന്തം നിലയില്‍ ശരിയാക്കി പടിയൂര്‍ പൗരസമിതി

എടതിരിഞ്ഞി : റോഡിലെ വാല്‍വ് സ്ലാബ് എടതിരിഞ്ഞിയില്‍ സ്ഥിരം അപകടകാരണമാകുന്നതിന് നേരെ വര്‍ഷങ്ങളായി അധികൃതര്‍ കണ്ണടക്കുന്നതിനെതിരെ സ്വന്തം നിലയില്‍ സ്ലാബ് ഉയര്‍ന്നു നില്‍ക്കുന്നഭാഗം ടാര്‍ ചെയ്തു പടിയൂര്‍ പൗരസമിതി . പോട്ട മൂന്നുപീടിക സംസ്ഥാന പാത കടന്നുപോകുന്ന എടതിരിഞ്ഞി പോസ്റ്റ് ഓഫീസ് ജംങ്ഷനില്‍ ഉയര്‍ന്ന് നില്‍ക്കുന്ന സമഗ്രകുടിവെള്ള പദ്ധതിയുടെ വാല്‍വ് സ്ലാബ് ഇതുവഴി പോകുന്ന വാഹനങ്ങള്‍ക്ക് അപകട ഭീഷണി ഉണ്ടാക്കുന്നുണ്ടായിരുന്നു . 2 വര്‍ഷത്തിലേറെയായി പണി നടന്നുകൊണ്ടിരിക്കുന്ന കുടിവെള്ള പദ്ധതിയുടെ ഭാഗമായാണ് വാല്‍വ് സ്ലാബ് സംസ്ഥാനപാതയുടെ നടുവില്‍ സ്ഥാപിച്ചത്. 15 സെന്റിമീറ്ററില്‍ അതികം റോഡിന്റെ ഉപരിതലത്തില്‍ സ്ലാബ് ഉയര്‍ന്ന് നില്‍ക്കുന്നതിനാല്‍ വാഹനങ്ങള്‍ ഇത് ഒഴിവാക്കാനായി മറുവശത്തേക്ക് തിരിക്കുന്നത് മൂലം ഈ പ്രദേശത്ത് സ്ഥിരം അപകടങ്ങള്‍ ഉണ്ടാകാറുണ്ട്. കഴിഞ്ഞ മാസം പോസ്റ്റ് ഓഫീസ് ജംങ്ഷനില്‍ വച്ചുണ്ടായ സൈക്കിള്‍ യാത്രക്കാരന്റെ മരണത്തിന് ഇടയാക്കിയത് റോഡില്‍ ഉയര്‍ന്ന് കിടക്കുന്ന സ്ലാബ് കയറാതിരിക്കാന്‍ ലോറി വെട്ടിച്ചപ്പോഴാണ്. സമഗ്ര കുടിവെള്ള പദ്ധതിയുമായി ബന്ധപ്പെട്ട് പൊതുമരാമത്ത് വകുപ്പും വാട്ടര്‍ അതോറിറ്റിയും സംസ്ഥാന പാത മുറിച്ച് വാല്‍വ് സ്ലാബ് സ്ഥാപിച്ചത് ഉയര്‍ന്ന് നില്‍ക്കുന്നത് മൂലം അപകടങ്ങള്‍ ഉണ്ടാകുന്നത് പതിവായപ്പോള്‍ അധികൃതരുമായി ബന്ധപ്പെട്ടെങ്കിലും നടപടിയൊന്നും ഉണ്ടായിട്ടില്ലെന്ന് പടിയൂര്‍ പഞ്ചായത്ത് പ്രസിഡന്റ് കെ സി ബിജു പറഞ്ഞു. അടിയന്തിരമായി ഇതിനൊരു ശാശ്വത പരിഹാരം ഉണ്ടാകാന്‍ അധികൃതര്‍ ശ്രമിക്കണമെന്ന് ആവശ്യപെട്ടിട്ടും അധികൃതര്‍ കനിഞ്ഞില്ല . ഇതേത്തുടര്‍ന്നാണ് പടിയൂര്‍ പൗരസമിതി മുന്‍കൈയെടുത്തു പോലീസിന്റെ അനുമതിയോടെ അപകട സ്ലാബ് സ്വന്തം നിലയില്‍ ശരിയാക്കിയത് . ഇതിനുവേണ്ട ചിലവും അവര്‍സ്വയം കണ്ടെത്തി വഹിച്ചു. പടിയൂര്‍ പഞ്ചായത്ത് പ്രസിഡന്റ് ബിജുവിന്റെ സഹകരണത്തോടെ ശുഭ ലാല്‍, അബ്ദുള്‍ റഷീദ്, സീതാരാമന്‍ എന്നിവര്‍ നേതൃത്വം നല്‍കി.

related news : റോഡിലെ വാല്‍വ് സ്ലാബ് എടതിരിഞ്ഞിയില്‍ അപകടകാരണമാകുന്നു

ഇരിങ്ങാലക്കുട റെയില്‍വേ സ്റ്റേഷനിലെ പള്‍സ് പോളിയോ ട്രാന്‍സിറ്റ് വാക്‌സിനേഷന്‍ ബൂത്ത് കുട്ടികളുമായി യാത്രചെയ്യുന്നവര്‍ക്ക് സൗകര്യമായി

കല്ലേറ്റുംകര : ഈ വര്‍ഷത്തെ പള്‍സ് പോളിയോ ഇമ്മ്യൂണൈസേഷന്‍ വഴി അഞ്ചു വയസ്സിന് താഴെയുള്ള എല്ലാ കുട്ടികള്‍ക്കും പോളിയോ തുള്ളിമരുന്ന് നല്‍കുന്നതിനുള്ള ട്രാന്‍സിറ്റ് വാക്‌സിനേഷന്‍ ബൂത്ത് ഇരിങ്ങാലക്കുട റെയില്‍വേ സ്റ്റേഷനിലും ഒരുക്കി . ഞായറാഴ്ച രാവിലെ 8 മുതല്‍ രാത്രി 8 മണിവരെയാണ് കല്ലേറ്റുംകരയിലെ റെയില്‍വേ സ്റ്റേഷനില്‍ ബൂത്ത് പ്രവര്‍ത്തിക്കുന്നത്. ഉച്ച വരെ യാത്രക്കാരുടെ അന്‍പതോളം കുട്ടികള്‍ക്ക് ഇവിടെനിന്നും പോളിയോമരുന്ന് നല്‍കി.  ആളൂര്‍ പ്രൈമറി ഹെല്‍ത്ത് സെന്ററിലെ ആശ വര്‍ക്കര്‍മാരും അവരെ സഹായിക്കാന്‍ വല്ലക്കുന്നിലെ സ്നേഹോദയ  നഴ്സിംഗ് കോളേജ് വിദ്യാര്‍ത്ഥികളും ഇരിങ്ങാലക്കുട റെയില്‍വേ സ്റ്റേഷനിലെ പള്‍സ് പോളിയോ ബൂത്തില്‍ സജീവമായിരുന്നു. ഒരു ബൂത്തില്‍ രണ്ടു പരിശീലനം ലഭിച്ച വാക്‌സിനേറ്റര്‍മാരാണുണ്ടാവുക . റെയില്‍വേ സ്റ്റേഷന്‍ സൂപ്രന്റ് ഓ കെ രാജശേഖരന്‍, ചീഫ് റിസര്‍വേഷന്‍ സൂപ്രവൈസര്‍ ടി ശിവകുമാര്‍ എന്നിവര്‍ ഇവര്‍ക്ക് വേണ്ട എല്ലാ സൗകര്യങ്ങളും ഒരുക്കി നല്‍കിയിരുന്നു .

Top
Menu Title