News

Category: Exclusive

നഗരസഭാ കെട്ടിടത്തിലെ മാലിന്യങ്ങള്‍ മൂലം കെ എസ് ഇ ബി ക്ക് റീഡിങ് എടുക്കാന്‍ സാധിക്കുന്നില്ല : ബില്‍ കിട്ടാതെ ഉപഭോക്താക്കള്‍ വലയുന്നു

ഇരിങ്ങാലക്കുട : നഗരസഭ ബസ് സ്റ്റാന്‍ഡ് ഷോപ്പിംഗ് കോംപ്ലെക്സിലെ ഇരുപതോളം കടയുടമകള്‍ക്കു ഇത്തവണ കെ എസ് ഇ ബി യുടെ ബില്‍ ലഭിക്കാത്തതിനാല്‍ പൈസ അടക്കാന്‍ സാധിച്ചില്ല .ഡിസ്കണക്ഷന് ജീവനക്കാര്‍ എത്തിയപ്പോള്‍ ആണ് ബില്‍ അടക്കുന്ന തീയ്യതിയെ കുറിച്ച് ഇവര്‍ അറിയുന്നത് . ഷോപ്പിങ് കോംപ്ലെക്സിലെ മീറ്റര്‍ ബോര്‍ഡ് ഇരിക്കുന്നിടം മാലിന്യകൂമ്പാരത്തില്‍ നിറഞ്ഞിരിക്കുകയാണ് . ഇതുമൂലം റീഡിങ് എടുക്കാനോ ബില്‍ വയ്ക്കനോ സാധിക്കാത്ത അവസ്ഥയാണ് ഈ കെട്ടിടത്തില്‍ നിലവിലുള്ളത് എന്ന് കെ എസ് ഇ ബി ഉദ്യോഗസ്ഥര്‍ പറയുന്നു . കോമണ്‍ മീറ്റര്‍ ബോര്‍ഡിന്‍റെ സമീപത്തെ മാലിന്യങ്ങള്‍ മാറ്റി വൃത്തിയാക്കി തരുവാന്‍ നഗരസഭാ സെക്രട്ടറിക്കു അപേക്ഷ നല്കാന്‍ കെ എസ് ഇ ബി തീരുമാനിച്ചിട്ടുണ്ട് . എന്നാല്‍ ഈ കെട്ടിടത്തിലെ കടകാരില്‍ ചിലരാണ് ഇവിടെ സ്ഥിരമായി മാലിന്യങ്ങള്‍ ഇടുന്നതു എന്നാണ് നഗരസഭയുടെ ഭാഷ്യം .

കൂടല്‍മാണിക്യം പില്‍ഗ്രിം സെന്റര്‍ നിര്‍മ്മാണ പ്രവര്‍ത്തനം പുനരാരംഭിച്ചു

ഇരിങ്ങാലക്കുട :  നാലമ്പലതീര്‍ത്ഥാടകരുടെ സൗകര്യവികസനത്തിനായി അനുവദിച്ച തുകയുപയോഗിച്ച് ശ്രീ കൂടല്‍മാണിക്യം ക്ഷേത്രത്തിലെ കൊട്ടിലാക്കല്‍ പറമ്പില്‍ മാസങ്ങളായി പണി നിലച്ചിരുന്ന നിര്‍മാണത്തിലിരിക്കുന്ന പില്‍ഗ്രിം സെന്റര്‍ നിര്‍മ്മാണ പ്രവര്‍ത്തനം പുനരാരംഭിച്ചു . കേരള ടൂറിസം വകുപ്പ് നല്‍കിയ നാലു കോടിയില്‍ നിന്ന് ശ്രീ കൂടല്‍മാണിക്യം ക്ഷേത്രത്തിലെത്തുന്ന നാലമ്പലതീര്‍ത്ഥാടകര്‍ക്കായി വിശ്രമത്തിനും താമസിക്കുന്നതിനും പ്രാഥമികാവശ്യങ്ങള്‍ നിര്‍വഹിക്കുന്നതിനും വേണ്ടി നിര്‍മ്മാണം ആരംഭിച്ച കെട്ടിടത്തിനാണ് വര്‍ഷങ്ങളായി ഈ ദുര്യോഗം നേരിട്ടിരുന്നത് . ഇരിങ്ങാലക്കുട ശ്രീകൂടല്‍മാണിക്യം, തൃപ്രയാര്‍ ശ്രീരാമസ്വാമിക്ഷേത്രം, പായമ്മല്‍ ശത്രുഘ്‌നക്ഷേത്രം, മൂഴിക്കുളം ലക്ഷ്മണക്ഷേത്രം എന്നീ ക്ഷേത്രങ്ങള്‍ക്കാണ് ടൂറിസം വകുപ്പ് 4 കോടി രൂപ അനുവദിച്ചത്. പിന്നീട് ഓരോ കോടി രൂപ വീതം 4 ക്ഷേത്രങ്ങള്‍ വീതിച്ചെടുത്ത് തീര്‍ത്ഥാടകര്‍ക്ക് ഉപകാരപ്രദമായ വികസനപ്രവര്‍ത്തനങ്ങള്‍ നടത്തുകയെന്നതായിരുന്നു തീരുമാനം. പായമ്മലും മൂഴിക്കുളവും തൃപ്രയാര്‍ ക്ഷേത്രങ്ങളിലെ വികസനപ്രവര്‍ത്തനങ്ങള്‍ നടന്നുകഴിഞ്ഞു. എന്നാല്‍ കൂടല്‍മാണിക്യം ക്ഷേത്രത്തില്‍ കൊട്ടിലാക്കല്‍ പറമ്പില്‍  തീര്‍ത്ഥാടകര്‍ക്ക് വേണ്ടി ഒരു പില്‍ല്‍ഗ്രിം സെന്റര്‍ നിര്‍മ്മിക്കാനാണ് തീരുമാനിച്ചത്. ടൂറിസം വകുപ്പ് സര്‍ക്കാര്‍ അംഗീകൃത ഏജന്‍സിയായ കിറ്റ്കോ നിര്‍മ്മാണപണികള്‍ക്കായി ഏല്‍പ്പിച്ചത്. അവര്‍ നിര്‍മ്മാണം നടത്തുന്നതിനായി സ്ഥലത്തെത്തിയപ്പോള്‍ നിര്‍മ്മാണസ്ഥലം മാറ്റണമെന്നാവശ്യപ്പെട്ട് ശ്രീകൂടല്‍മാണിക്യ ക്ഷേത്രസംരക്ഷണസമിതിയും ഹിന്ദു ഐക്യവേദി പ്രവര്‍ത്തകരും നിര്‍മ്മാണം തടഞ്ഞിരുന്നു . അന്നത്തെ ദേവസ്വം ഭരണസമിതിയാകട്ടെ ഈ പ്രശ്‌നത്തില്‍ ഇടപെട്ടുമില്ല. നിര്‍മ്മാണം നിലക്കുകയും ചെയ്തു.

പഴയ ഭരണസമിതിയുടെ കാലാവധി കഴിഞ്ഞ് പുതിയ ഭരണസമിതി വരുന്നതിന് മുമ്പ് അഡ്മിനിസ്‌ട്രേറ്റര്‍ ഭരിച്ചിരുന്നപ്പോള്‍ അപ്പോഴത്തെ ജില്ല കളക്ടര്‍ ടൂറിസം പ്രൊജക്ടുകളുടെ പുരോഗമനം വിലയിരുത്തുന്നതിനായി യോഗം വിളിച്ചു. യോഗത്തില്‍ ഭക്തജനങ്ങള്‍ നിര്‍ദ്ദേശിച്ച സ്ഥലത്തേക്ക് നിര്‍മ്മാണം മാറ്റുവാനായി അനുമതി നല്‍കിയിട്ടും ഏജന്‍സി നിര്‍മ്മാണം ഏറ്റെടുക്കുന്നില്ലെന്ന് ദേവസ്വം അഡ്മിനിസ്‌ട്രേറ്റര്‍ ജില്ല കളക്ടര്‍ക്ക് പരാതി നല്‍കി. തുടര്‍ന്ന് 2 ആഴ്ചക്കകം നിര്‍മ്മാണം ആരംഭിക്കുമെന്ന് ഏജന്‍സി കളക്ടര്‍ക്ക് ഉറപ്പുനല്‍കി . പണി ആരംഭിക്കുകയും പുതിയ ഭരണസമിതിയും നിലവില്‍ വരികയും ചെയ്തു.

നിര്‍മ്മാണപ്രവര്‍ത്തനം ആരംഭിച്ചുവെങ്കിലും പിന്നീടും വലിയ പുരോഗതിയുണ്ടായില്ല. ടൂറിസം ഡിപ്പാര്‍ട്ടുമെന്റ് അനുവദിച്ച് ഏജന്‍സിയെ ഏല്‍പിച്ച കോണ്‍ട്രാക്ടര്‍ പണം വഴിമാറി ചെലവുചെയ്തു എന്നാണറിവ്. ഫൗണ്ടേഷന്‍ പണി മാത്രമാണ് അന്ന്കഴിഞ്ഞിട്ടുള്ളത്. 4 കോടി രൂപയില്‍ 3 കോടി 20 ലക്ഷം ഇതിനോടകം പിന്‍വലിച്ചു കഴിഞ്ഞിട്ടുണ്ട്. ഇനി ബാക്കിയുള്ളത് 80 ലക്ഷം രൂപയാണ്. കൂല്‍ടല്‍മാണിക്യത്തിന് ഒരു കോടിയാണ് അവകാശപ്പെട്ടത്. കോണ്‍ട്രാക്ടറെ മാറ്റി കിറ്റ്കോ പുതിയ കോണ്‍ട്രാക്ടറെ ഏല്പിക്കുകുയും പില്‍ഗ്രിം സെന്ററിന്റെ പണി വളരെ വേഗം പുരോഗമിക്കുകയും ചെയുന്നുണ്ട്. 4000 സ്ക്വയര്‍ ഫീറ്റ് കെട്ടിടത്തില്‍ രണ്ടു നിലകളാണ് ഉള്ളത് ഒന്നാം നിലയില്‍ എല്ലാ സ്വകര്യങ്ങളോട് കൂടിയ രണ്ടു വിസിറ്റേഴ്സ് റൂമും താഴെ തീര്‍ഥാടകര്‍ക്കു വിശ്രമിക്കാനുള്ള വലിയ ഹാളും ആഭരണങ്ങളും വില പിടിപ്പുള്ള സാധനങ്ങള്‍ സൂക്ഷിക്കാനുമുള്ള ഗോള്‍ഡ് ലോക്കര്‍ സൗകര്യങ്ങളും ഉണ്ട് .  ഇതിനു പുറമെ അടുക്കള , ഡൈനിങ്ങ് ഏരിയ എന്നിവയും ഉണ്ട് 2017 ലെ നാലമ്പല തീര്‍ത്ഥാടന സമയത്തിന് മുന്‍പ് പണി പൂര്‍ത്തിയാക്കുകയാണ് ലക്‌ഷ്യം.

എം.സി.പി കണ്‍വെന്‍ഷന്‍ സെന്ററിലെ ഹാളുകള്‍ പ്രവര്‍ത്തിക്കുന്നതിന് ഹൈക്കോടതി തടഞ്ഞു – ബുക്കിംഗ് നിര്‍ത്തിവച്ചു

ഇരിങ്ങാലക്കുട : എം.സി.പി ഇന്റര്‍നാഷണല്‍ കണ്‍വെന്‍ഷന്‍ സെന്ററിലെ ഹാളുകള്‍ പ്രവര്‍ത്തിക്കുന്നത് ഹൈക്കോടതി തടഞ്ഞു. എം.സി.പി കണ്‍വെന്‍ഷന്‍ സെന്ററിന്റെ ലൈസന്‍സ് പുതുക്കി കിട്ടുവാന്‍ കെ പി സി സി ജനറല്‍ സെക്രട്ടറി കൂടിയായ  കണ്‍വെന്‍ഷന്‍ സെന്റര്  ചെയര്‍മാന്‍ എം.പി ജാക്‌സന്‍ ബോധിപ്പിച്ച റിട്ട് ഹര്‍ജിയിലാണ് ഹൈക്കോടതിയുടെ താല്‍ക്കാലിക ഉത്തരവ്. ഇത് പ്രകാരം നഗരസഭയില്‍ നിന്നും നേരത്തെ താല്‍ക്കാലിക അനുമതി ലഭിച്ച 5071 മീറ്റര്‍ സ്‌ക്വയര്‍ മാത്രമാണ് 31-05-2017 വരെ ഉപയോഗിക്കാന്‍ അനുമതി നല്‍കിയിരിക്കുന്നത്. കണ്‍വെന്‍ഷന്‍ സെന്ററിലെ മറ്റു 8 ഹാളുകളും, സ്യുട് റൂമുകളും പ്രവര്‍ത്തിക്കുന്നതും കോടതി തടഞ്ഞു . വിവാഹത്തിനും മറ്റുമായി മുന്‍കൂട്ടി ഹാളുകള്‍ ബുക്കുചെയ്തവരുടെ സൗകര്യാര്‍ത്ഥമാണ് മേല്‍പറഞ്ഞ സൗജന്യം അനുവദിച്ചിട്ടുള്ളത്. ഇതിനായി ഒരാഴ്ചയ്ക്കുള്ളില്‍ 25 ലക്ഷം രൂപ മുനിസിപ്പാലിറ്റിയില്‍ കെട്ടിവയ്ക്കാനും കോടതി ഉത്തരവില്‍ പറയുന്നു. മാത്രമല്ല, മാര്‍ച്ച് 30 മുതല്‍ ആറുമാസത്തേക്ക് എടുത്തിട്ടുള്ള മറ്റെല്ലാ ബുക്കിംഗുകളും റദ്ദ് ചെയ്യേണ്ടതാണെന്നും കോടതി ഹര്‍ജിക്കാരനായ ചെയര്‍മാനോട് നിര്‍ദ്ദേശിച്ചു. എം.സി.പി കണ്‍വെന്‍ഷന്‍ സെന്ററിന്റെ 2017-18 കാലയളവിലെ ലൈസന്‍സ് പുതുക്കി നല്‍കുവാനുള്ള അപേക്ഷ ഇരിങ്ങാലക്കുട നഗരസഭ നിരസിച്ചതിനെ ചോദ്യം ചെയ്താണ് ചെയര്‍മാന്‍ ഹൈക്കോടതിയെ സമീപിച്ചത്. എന്നാല്‍ അനുവദിച്ചതിനേക്കാളും അനധികൃതമായി 5227.02 മീറ്റര്‍ സ്‌ക്വയര്‍ നിര്‍മ്മാണം നടത്തിയിട്ടുണ്ടെന്നും ആയത് എട്ടോളം ഹാളുകളായി തിരിച്ച് പ്രവര്‍ത്തിക്കുന്നുണ്ടെന്നും നഗരസഭ കോടതിയില്‍ വ്യക്തമാക്കി. കണ്‍വെന്‍ഷന്‍ സെന്ററിന്റെ ടാക്‌സ് കുടിശ്ശിക സംബന്ധിച്ചും മറ്റൊരു റിട്ട് ഹര്‍ജി നിലനില്‍ക്കുന്നതുമൂലവും മൊത്തം നിര്‍മ്മാണം അനധികൃതമാണെന്ന് മുനിസിപ്പാലിറ്റിക്ക് ബോധ്യപ്പെട്ടതുകൊണ്ടാണ് ലൈസന്‍സ് പുതുക്കി നല്‍കാതിരിക്കാന്‍ കാരണമായി നഗരസഭ വാദിച്ചത്. വിശദമായി വാദം കേള്‍ക്കുന്നതിനും അന്തിമ ഉത്തരവിനുമായി വേനലവധിക്ക് ശേഷം കേസ് പരിഗണിക്കും. അതിനിടെ കേസില്‍ കക്ഷി ചേരുവാന്‍ ഇരിങ്ങാലക്കുട സ്വദേശികളായ ജോസഫ് മാര്‍ട്ടിന്‍ ആലേങ്ങാടനും ഷൈജു കുറ്റിക്കാട്ടുപറമ്പിലും അപേക്ഷ ബോധിപ്പിച്ചിട്ടുണ്ട്.

അപകടവളവുകളിലെ ബ്ലാക്ക്സ്പോട്ട് ട്രീറ്റ്മെന്റ് സംവിധാനം പ്രവര്‍ത്തന രഹിതം

വല്ലക്കുന്ന് : തുടര്‍ച്ചയായി അപകടമുണ്ടാകുന്ന വല്ലക്കുന്നിലെ അപകടവളവുകളിലെ ബ്ലാക്ക്സ്പോട്ട് ട്രീറ്റ്മെന്റ് സംവിധാനം പ്രവര്‍ത്തന രഹിതമായിട്ട് രണ്ടു വര്‍ഷമാകുന്നു.  പകലും രാത്രിയിലും വാഹനം ഓടിക്കുന്നവരുടെ ശ്രദ്ധയില്‍പ്പെടുന്ന രീതിയില്‍ ഉയരമുള്ള ബോര്‍ഡില്‍ അപകടസാധ്യത മേഖല എന്ന് രേഖപ്പെടുത്തുകയും 24 മണിക്കൂറും പ്രവര്‍ത്തിക്കുന്ന സോളാര്‍ പാനല്‍ സംവിധാനമുള്ള മഞ്ഞ ബ്ലിങ്കിംഗ് ലൈറ്റ് സിസ്റ്റവും ഇതില്‍ ഉള്‍പ്പെടുത്തിയിട്ടുണ്ട്. എന്നാല്‍ സമയബന്ധിതമായ അറ്റകുറ്റ പണികള്‍ നടത്താത്തതുമൂലമാണ് ബ്ലിങ്കിംഗ് ലൈറ്റ് സംവിധാനം പ്രവര്‍ത്തന രഹിതമായത് . സോളാര്‍ ബാറ്ററികളില്‍ വന്ന കേടുപാടുകളാകാം ഇതിന് കാരണമെന്ന് കരുതുന്നു. 2012 ല്‍ കെല്‍ട്രോണ്‍ ആണ് സിഗ്നല്‍ സംവിധാനം സ്ഥാപിച്ചത്.  കേരളത്തിലെ ഏറ്റവും കൂടുതല്‍ അപകടം നടക്കുന്ന 100 മേഖലയില്‍ ഒന്നാണ് ഇവിടം എന്നുള്ളതുകൊണ്ട് 7 വര്‍ഷം മുമ്പ് ബ്ലാക്ക്‌ സ്പോട്ട് ട്രീറ്റ്‌മെന്റ് അപായ സൂചനകളും ഇവിടെ സ്ഥാപിച്ചത്. എന്നിട്ടും അപകട നിരക്ക് കുറയുന്നില്ല എന്നത് ജനങ്ങളില്‍ ആശങ്ക ഉണര്‍ത്തുന്നു. ഒട്ടേറെ വിലപ്പെട്ട ജീവനുകള്‍ ഈ അപകട വളവില്‍ പൊലിഞ്ഞിട്ടുണ്ട്.

അപകടത്തില്‍ മരണപ്പെട്ട ഗോപികക്ക് ആദരാഞ്ജലികള്‍ അര്‍പ്പിച്ച് നാട്ടുകാര്‍

വല്ലക്കുന്ന്  : റോഡ് തകര്‍ന്നിട്ടും അറ്റകുറ്റപണികള്‍ നടത്താന്‍ വൈകിക്കുന്ന അധികൃതരുടെ അനാസ്ഥയുടെ അവസാനത്തെ ഇരയായ അപകടത്തില്‍ മരണപ്പെട്ട ഗോപികക്ക് ആദരാഞ്ജലികള്‍ അര്‍പ്പിച്ച് കല്ലേറ്റുംകര വല്ലക്കുന്നു നിവാസികള്‍.  അപകടം നടന്നിടത് രാത്രി മെഴുകുതിരി കത്തിച്ചു നാട്ടുകാര്‍ ആദരാഞ്ജലികള്‍ അര്‍പ്പിച്ചതോടൊപ്പം അപകടത്തിന് കാരണമായ റോഡിന്‍റെ അവസ്ഥയുടെ പ്രതിഷേധവും അണപൊട്ടി.   പോട്ട- ഇരിങ്ങാലക്കുട സംസ്ഥാന പാതയില്‍ അപകട മേഖലയായ വല്ലക്കുന്ന് നാഷണല്‍ ഇന്‍സ്റ്റിറ്റ്യൂട്ട് ഓഫ് ഫിസിക്കല്‍ മെഡിസിന്‍ ആന്‍ഡ് റീഹാബിലിറ്റേഷന്‍ സെന്ററിന് മുന്നില്‍ വ്യാഴാഴ്ച രാവിലെയായിരുന്നു ബൈക്ക് അപകടത്തില്‍ ഗോപിക മരണപ്പെട്ടത്. കഴിഞ്ഞതവണ നടന്ന റോഡ് ടാറിങ്ങിന്റെ നിലവാര തകര്‍ച്ചമൂലം ഇപ്പോള്‍ അപകടമുണ്ടായ ഭാഗത്തു റോഡ് മാസങ്ങളായി തകര്‍ന്നു കിടക്കുകയാണ്, വലിയ കുഴികളും ഇവിടെ രൂപപ്പെട്ടിട്ടുണ്ട്. കുഴികള്‍ ഒഴിവാക്കാനായി വാഹനങ്ങള്‍ പെട്ടന്ന് വെട്ടിക്കുമ്പോള്‍ ഇവിടെ അപകടങ്ങള്‍ സ്ഥിരമാണ് .

related news : ബൈക്കിനു പുറകില്‍ സഞ്ചരിച്ച വിദ്യാര്‍ത്ഥിനി കോളേജ് ബസ് കയറി മരിച്ചു

ബഡ്ജറ്റ് ചര്‍ച്ച : നഗരസഭയില്‍ കയ്യാങ്കളി, കൗണ്‍സിലര്‍മാര്‍ ആശുപത്രിയില്‍

ഇരിങ്ങാലക്കുട : ഇരിങ്ങാലക്കുട നഗരസഭയുടെ ബഡ്ജറ്റ് ചര്‍ച്ചക്കിടെ നഗരസഭാ കൗണ്‍സിലര്‍മാര്‍ തമ്മില്‍ കയ്യാങ്കളി നടന്നു എന്ന ആരോപണത്തില്‍ കൗണ്‍സില്‍ നിര്‍ത്തിവച്ചു. കൗണ്‍സിലര്‍മാരായ സുജ സജീവ്കുമാര്‍, പി സി മുരളീധരന്‍ എന്നിവരെ ആശുപത്രിയില്‍ പ്രവേശിപ്പിച്ചു. പട്ടിക ജാതി ഫണ്ട് ഉപയോഗിക്കുന്നതില്‍ കോടതിയില്‍ തര്‍ക്കം നിലനില്‍ക്കെ ഇരിങ്ങാലക്കുട നഗരസഭാ ബഡ്ജറ്റില്‍ വീണ്ടും പട്ടിക ജാതി ഫണ്ടില്‍ നിന്നും ഒരു കോടി രൂപ വിലയിരുത്തി ജനങ്ങളെ തെറ്റിദ്ധരിപ്പിക്കുന്നത് അവസാനിപ്പിക്കണമെന്നും, ചാത്തന്‍ മാസ്റ്റര്‍ ഹാള്‍ പുതുക്കി പണിയുന്നതിന് ജനറല്‍ ഫണ്ടില്‍ നിന്നും ഒരു കോടി രൂപ അനുവദിക്കണമെന്നും ആവശ്യപ്പെട്ടു സി പി ഐ , സി പി എം അംഗങ്ങള്‍ ബഡ്ജറ്റ് ചര്‍ച്ചക്കിടെ പ്ലൈകാര്‍ഡുകളുമേന്തി നടുക്കളത്തിലിരുന്നു പ്രതിക്ഷേധം നടന്നു .

ഇതിനെ തുടര്‍ന്നുള്ള ബഹളത്തില്‍ സി പി ഐ   അംഗവും ചാത്തന്‍ മാസ്റ്ററുടെ മകനുമായ പിസി മുരളിധരനെ കോണ്‍ഗ്രസ് കൗണ്‍സിലര്‍ സുജ സജീവ്കുമാര്‍ അക്രമിച്ചുവെന്ന പരാതിയില്‍ പ്രതിപക്ഷം കൗണ്‍സില്‍ ബഹളമയമാക്കി . ഇതേ തുടര്‍ന്ന് 12 മണിയോടെ കൗണ്‍സില്‍ താല്‍കാലികമായി അവസാനിപ്പിച്ചു.   കൗണ്‍സില്‍ 12 .30 നോട് കൂടി തുടങ്ങുമെന്ന് പറഞ്ഞിരുന്നുവെങ്കിലും 29- ാംതീയതിയിലേക്കു മാറ്റി വച്ചു . പി സി മുരളീധരന്‍ തന്നെ അക്രമിച്ചുവെന്നു സുജ സജീവ്കുമാര്‍  ചെയര്‍പേഴ്സനും,പോലീസിനും പരാതി നല്‍കി . എന്നാല്‍ സുജ സഞ്ജീവ്‌കുമാര്‍  തന്നെ അക്രമിച്ചുവെന്ന പരാതി  പി സി മുരളീധരന്‍  നഗരസഭക്കും ഡി വൈ എസ് പി ക്കും  നല്‍കി. കൗണ്‍സിലര്‍മാരായ സുജ സജീവ്കുമാര്‍ , പി സി മുരളീധരന്‍ എന്നിവരെ ഉച്ചക്ക് ഒരു മണിയോടെ ഗവണ്മെന്റ് ആശുപത്രിയില്‍ പ്രവേശിപ്പിച്ചു. പിന്നീട് സുജ സജീവ് കുമാറിനെ ബി പി കൂടിയതിനെത്തുടര്‍ന്ന് ഇരിങ്ങാലക്കുട സഹകരണ ആശുപത്രിയിലെ അത്യാഹിത വിഭാഗത്തിലേക്ക് മാറ്റി.

related news : ജാതിപേര് പറഞ്ഞു കൗണ്‍സിലറെ ആക്ഷേപിച്ച സുജ സജീവ്കുമാറിനെതിരെ നടപടി വേണമെന്നു എല്‍ ഡി എഫ്

related news :  സുജ സജീവ്കുമാറിന് നേരെ കൗണ്‍സിലില്‍ നടന്ന ആക്രമണത്തില്‍ കോണ്‍ഗ്രസ്സ് പ്രതിക്ഷേധിച്ചു

ജലസമൃദ്ധിയില്‍ തൊമ്മാന പാടം

തൊമ്മാന : കത്തുന്ന വേനലില്‍ ചുറ്റും ജലദൗര്‍ലബ്യം നേരിടുമ്പോള്‍ കണ്ണിനു കുളിര്‍മ്മയേകി തൊമ്മാന പാടം ജലസമൃദ്ധിയില്‍. നബാര്‍ഡ് സഹായത്തോടെയുള്ള ചെമ്മീന്‍ചാല്‍ തോട് നിര്‍മ്മാണം പൂര്‍ത്തീകരണത്തോട് അടുക്കുമ്പോള്‍ സംസ്ഥാനപാത കടന്നുപോകുന്ന തൊമ്മാന പാടത്തിന്റെ ഒരുവശം വേനലില്‍ വെള്ളം നിറഞ്ഞു കിടക്കുന്നതും പക്ഷികള്‍ കൂട്ടത്തോടെ ഇവിടെ നീരാടുന്ന കാഴ്ച നയനാനന്ദകരമാണ് . കഴിഞ്ഞാഴ്ച മുന്ന് ദിവസം നിന്ന് പുകഞ്ഞു കത്തിയമര്‍ന്ന ചെമ്മീന്‍ചാല്‍ പാടശേഖരം ഇപ്പോള്‍ പൂര്‍ണ്ണമായും വെള്ളത്തിനടിയിലാണ് . നബാര്‍ഡ് സഹായത്തോടെ കെ എല്‍ ഡി സി ആണ് റൂറല്‍ ഇന്‍ഫ്രസ്ട്രക്ച്ചര്‍ ഡെവലപ്പ്മെന്റ് ഫണ്ട് ഉപയോഗിച്ച് ദശാബ്ദങ്ങളായി മുടങ്ങിക്കിടക്കുന്ന തൊമ്മാന പാടത്തെ ഇടതു കരയിലെ ചെമ്മീന്‍ചാല്‍ തോട് നിര്‍മ്മാണ പ്രവര്‍ത്തനം അവസാനഘട്ടത്തില്‍ എത്തിനില്‍കുന്നവേളയില്‍ ബണ്ടിനു കുറുകെ പൈപുവഴി വെള്ളം തടകെട്ടി ഒഴുക്കുന്നതുമൂലം വല്ലക്കുന്നു, തൊമ്മാന, താഴേക്കാട്, കടുപ്പശ്ശേരി ഭാഗത്ത് കിണര്‍ വെള്ളം ലഭ്യമാകാന്‍ സഹായിക്കുന്നുണ്ട്. സംസ്ഥാനപാത കടന്നു പോകുന്ന തൊമ്മാന പാലം മുതല്‍ ചെമ്മീന്‍ചാല്‍ കുളത്തിന് സമീപത്തിലൂടെ താഴേക്കാട് കുളത്തിന്റെ സമീപം വരെയാണ് ഒന്നര കിലോ മീറ്ററോളം നീളുന്ന ബണ്ട് നിര്‍മ്മിക്കുന്നത്. വേളൂക്കര ആളൂര്‍ പഞ്ചായത്തുകള്‍ക്ക് ഇതിന്റെ ഗുണം ലഭിക്കും.

ഇന്ന് ലോകജലദിനം: അനാസ്ഥ മൂലം ഇരിങ്ങാലക്കുടയിലെ ജലസംഭരണികള്‍ നാശത്തില്‍

ഇരിങ്ങാലക്കുട : ജലം എന്ന അമൂല്യ സമ്പത്തിനെ സംരക്ഷിക്കാനുള്ള ബാധ്യത എല്ലാവരിലും നിക്ഷിപ്തമായിരിക്കെ അധികൃതരുടെ അനാസ്ഥ മൂലം ഇരിങ്ങാലക്കുടയിലെ ജലസംഭരണികള്‍ നാശത്തില്‍ . ലോക ജലദിനം ആചരിക്കുന്ന ഈ വേളയില്‍ ഇരിങ്ങാലക്കുടയിലെ കാലങ്ങളായുള്ള ജലസ്രോതസുകളായ മുപ്പതോളം കുളങ്ങള്‍ക്കു അടിയന്തര ശ്രദ്ധ ലഭിച്ചില്ലെങ്കില്‍ വിസ്‌മൃതിയിലാകുന്ന അവസ്ഥയിലാണ് . കുടിവെള്ളം കിട്ടാക്കനിയാകാന്‍ പോകുന്ന വരും കാലങ്ങളില്‍ കുളങ്ങളുടെ സംരക്ഷണത്തിന്റെ ആവശ്യകത ഇതുവരെ പൊതുജനങ്ങളില്‍ എത്തിയിട്ടില്ല . അജ്ഞതയും സ്വാര്‍ത്ഥതയും മൂലം നഗര ഹൃദയത്തില്‍ തന്നെ പല കുളങ്ങളും അധികൃതര്‍ തന്നെ മൂടി കളഞ്ഞിട്ടുണ്ട് . ഒരുകാലത്തു ജലസമൃതിയിലായിരുന്ന ഠാണാവിലെ പൂതംകുളം ഇപ്പോള്‍ അറിയപ്പെടുന്നത് അത് നികത്തി പണിത നഗരസഭയുടെ പൂതംകുളം ഷോപ്പിംഗ് കോംപ്ലെക്സിന്റെ പേരിലാണ് . കൂടല്‍മാണിക്യം കൊട്ടിലക്കല്‍ പറമ്പ് എട്ടോളം കുളങ്ങളെ കൊണ്ട് സമൃദ്ധിയിലായിരുന്നു . എന്നാല്‍ ഇപ്പോള്‍ ഒരു കുളം മാത്രമേ ഉള്ളു അതും പകുതി നികത്തിയ നിലയില്‍ .

ഇതിനു പുറമെ ചേലൂര്‍ കാട്ടിക്കുളം , കോതക്കുളം , ശാസ്താന്‍ക്കുളം , തുറുകയിക്കുളം , ഹനുമാന്‍ക്കുളം, കാഞ്ഞാണിക്കുളം , കോലുക്കുളം, കണക്കന്‍ക്കുളം , ചിറത്തിക്കുളം , പള്ളികാട്ക്കുളം , ചാത്തന്‍ക്കുളം , ചെമ്പുഞ്ചിറക്കുളം , വല്ലാഞ്ചിറക്കുളം, മണിക്കുളം , പൂച്ചക്കുളം , ഉമ്മന്‍കുളം , എന്നി കുളങ്ങളടക്കം മുനിസിപ്പാലിറ്റി പരിധിയിലെ മുപ്പതോളം കുളങ്ങളും കിണറുകളും നശിച്ചുകൊണ്ടിരിക്കുകയാണ്. സമീപ പഞ്ചായത്തുകളിലെ കുളങ്ങളുടെ സ്ഥിതിയിലും മാറ്റമില്ല .

പച്ചക്കൊടിയും കാത്ത് ഇരിങ്ങാലക്കുട റെയില്‍വേ സ്റ്റേഷന്‍: എം പി യുടെ അവഗണന വീണ്ടും

കല്ലേറ്റുംകര :  ജില്ലയിലെ രണ്ടാമത്തെ വലിയ സ്റ്റേഷനായ ഇരിങ്ങാലക്കുട സ്റ്റേഷന്‍ വികസനം തീരെ ചെറിയ സ്റ്റേഷനുകള്‍ക്കും പുറകിലാക്കുന്നതിന്റെ പ്രധാന കാരണങ്ങളില്‍ ഒന്ന് ഈ സ്റ്റേഷന്‍ നിലനില്‍ക്കുന്ന പ്രദേശത്തെ പ്രതിനിധീകരിച്ചിരുന്ന എം പിമാരുടെ വഴിയേ തന്നെയാണ് ഇപ്പോത്തെ എം.പിയും. തൃശ്ശൂരിനും പൂങ്കുന്നത്തിനും വാരിക്കോരി ഫണ്ട് ചിലവഴിക്കുന്ന എം.പി ഇരിങ്ങാലക്കുടയെ തഴയുന്നു. 115 വര്‍ഷത്തെ പാരമ്പര്യമുള്ള കല്ലേറ്റുംകരയില്‍ സ്ഥിതി ചെയുന്ന ഇരിങ്ങാലക്കുട റെയില്‍വേ സ്റ്റേഷന്‍ തൊട്ടടുത്ത പാസഞ്ചര്‍ ട്രെയിനുകള്‍ മാത്രം നിര്‍ത്തുന്ന ചെറിയ സ്റ്റേഷനുകള്‍ പോലും നവീകരിച്ചപ്പോള്‍ സൂപ്പര്‍ഫാസ്റ്റ് ട്രെയിനുകള്‍ അടക്കം ഇരുഭാഗങ്ങളിലേക്കുമായി നില്‍പ്പത്തിനാലോളം ട്രെയിനുകള്‍ക്ക് സ്റ്റോപ്പുള്ള ആദര്‍ശ് സ്റ്റേഷനായ ഇരിങ്ങാലക്കുടയുടെ പരിതാപകരമായ അവസ്ഥക്ക് പരിഹാരം കാണാന്‍ സാധിക്കുന്നില്ല

ഇപ്പോഴും മുന്‍പും ഇരിങ്ങാലക്കടയുടെ ആവശ്യങ്ങള്‍ക്ക് റെയില്‍വേ തടസ്സം നില്‍ക്കുന്നു എന്നു പറയുന്നവര്‍ എം.പി ഫണ്ടുപോലും ഇവിടേക്ക് നല്‍കാതെ അവഗണിച്ചതില്‍ വലിയ രീതിയിലുള്ള ജന രോഷമാണ് ഉയരുന്നത്. തൃശൂര്‍ എം പി സി എന്‍ ജയദേവന്റെ ഈ നടപടിക്കെതിരെ രൂക്ഷമായ രീതിയിലാണ് യാത്രക്കാരും, പൊതുജനങ്ങളും പ്രതികരിക്കുന്നത് .

രണ്ടു പ്ലാറ്റ്ഫോമുകളിലും വളരെ കുറച്ച് ഭാഗത്തു മാത്രമേ മേല്‍ക്കൂരയുള്ളൂ.  ഇതിന്റെ പല ഭാഗങ്ങളും, സ്റ്റേഷന്‍ കെട്ടിടവും മഴ പെയ്യുമ്പോള്‍ ചോര്‍ന്നൊലിക്കുന്ന അവസ്ഥയിലാണ്. ഒന്നാം നമ്പര്‍ പ്ലാറ്റ്ഫോമിനെ അപേക്ഷിച്ച് രണ്ടാം നമ്പര്‍ പ്ലാറ്റ്ഫോം വളരെ ഉയരം കുറഞ്ഞതാണ്.  ഇതു മൂലം സത്രീകളും കുട്ടികളും വയസായവരും ശാരീരിക ബുദ്ധിമുട്ടനുഭവിക്കുന്നവരും ട്രെയിനില്‍ കയറുവാനും ഇറങ്ങുവാനും വളരെയധികം ബുദ്ധിമുട്ടനുഭവിക്കുന്നുണ്ട്. മാത്രമല്ല ഇവിടെ സ്ലാബുകള്‍ നിരതെറ്റി കിടക്കുന്നതും പലതട്ടുകളായി കോണ്‍ക്രീറ്റ് ചെയ്തിരിക്കുന്നതും കാരണം അനുഭവിക്കുന്ന കഷ്ടതകള്‍ ഏറെയാണ്. രാത്രിയില്‍ പലയിടത്തും വെളിച്ചം തീരെയില്ലാത്തതിനാല്‍ വൃത്തിഹീനമായ പ്ലാറ്റ്ഫോമുകളിലൂടേയും, സ്റ്റേഷന്‍ പരിസരങ്ങളിലൂടേയുമുള്ള സഞ്ചാരം ദുഷ്കരമായ ഒന്നാണ്. ഇരുട്ടിന്റെ മറവില്‍ സാമൂഹു വിരുദ്ധരുടേയും മയക്കുമരുന്ന് മാഫിയകളുടേയും അഴിഞ്ഞാട്ടത്തിന് മൗനാനുവാദം നല്‍കുകയാണ് അധികാരികള്‍.

ടാര്‍ ചെയ്തു മണിക്കൂറുകള്‍ക്കകം അപാകത കണ്ടു പൊളിച്ചു നീക്കി

ഇരിങ്ങാലക്കുട : ഠാണാവില്‍ നിന്ന് ആരംഭിക്കുന്ന കോളനി റോഡ് ടാര്‍ ചെയ്ത മണിക്കൂറുകള്‍ക്കകം പരിശോധനയില്‍ ഉദ്യോഗസ്ഥര്‍ അപാകത കണ്ടെത്തിയതിനെ തുടര്‍ന്നു പൊളിച്ചുനീക്കി . നിലവിലെ റോഡില്‍ 20 എംഎം കനത്തില്‍ ചിപ്പിങ് കാര്‍പെറ്റ് ചെയ്തതാണ് ഇളകി പോന്നതായി കണ്ടത്. തിങ്കളാഴ്ച്ച രാവിലെ ടാര്‍ ചെയ്ത ഭാഗത്തിനെ കുറിച്ച് പരാതി ലഭിച്ചതിനെ തുടര്‍ന്നു മുനിസിപ്പല്‍ എന്‍ജിനീയരുടെ നേതൃത്വത്തില്‍ ഉദ്യോഗസ്‌ഥര്‍ സംഭവ സ്ഥലം പരിശോധിക്കുകയും
അപാകത കണ്ടെത്തുകയുമായിരുന്നു .ഇതിനെ തുടര്‍ന്നു ഈ ഭാഗം പൊളിച്ചുനീക്കാന്‍ കോണ്‍ട്രാക്ടറോട്‌ ആവശ്യപ്പെടുകയും ചെയ്തു .പുതിയ നിലവാരത്തിലുള വി ജി 30 ടാറിങ് ആണ് ഇവിടെ ചെയ്തിരുന്നത്. റാപിഡ് സീലിംഗ് എമല്‍ഷന്‍ ഉപയോഗിച്ചാണ് ഇവിടെ ടാറിങ് ചെയ്തത് എന്ന് കോണ്‍ട്രാക്ടര്‍ പറയുന്നു . നിലവാര തകര്‍ച്ചയാണോ മറ്റു സാങ്കേതിക തകരാറുകള്‍ ആണോ ഇതിനു പുറകില്‍ എന്ന് അന്വേഷണത്തിലൂടെ പറയാമെന്നു ഉദ്യോഗസ്‌ഥര്‍.

ആത്മഹത്യക്കു ശ്രമിച്ച ക്രൈസ്റ്റ് കോളേജ് വിദ്യാര്‍ത്ഥി ഡെന്‍സന് നീതി ലഭിക്കണമെന്നാവശ്യപ്പെട്ട് വിദ്യാര്‍ത്ഥികള്‍ പ്രിന്‍സിപ്പലിനെ വളഞ്ഞു -ക്രൈസ്റ്റില്‍ സമരം തുടരുന്നു

ഇരിങ്ങാലക്കുട : ഹാജര്‍ കുറവെന്ന് പറഞ്ഞു കോളേജ് അധികൃതര്‍ പരീക്ഷ എഴുതാന്‍ അനുമതി നിഷേധിച്ചതിനെ തുടര്‍ന്ന് ആത്മഹത്യക്ക് ശ്രമിച്ച ക്രൈസ്റ്റ് കോളേജിലെ ബിഎ അവസാന വര്‍ഷ ഫംഗ്ഷണല്‍ ഇംഗ്ലിഷ് വിദ്യാര്‍ത്ഥി ഡെന്‍സന് നീതി ലഭിക്കണമെന്നാവശ്യപ്പെട്ട് വിദ്യാര്‍ത്ഥികള്‍ പ്രിന്‍സിപ്പലിനെ വളഞ്ഞു. കോളേജ് അധികൃതരുടെ സമീപനത്തില്‍ പ്രതിഷേധിച്ചു വെള്ളിയാഴ്ച ക്രൈസ്റ്റ് കോളേജില്‍ എസ്‌ എഫ് ഐയുടെ നേതൃത്വത്തില്‍ വിദ്യാര്‍ത്ഥികള്‍ സമരത്തിലാണ് .  ഇവര്‍ രാവിലെ തന്നെ പ്രിന്‍സിപ്പലിന്റെ മുറി വളയുകയും കുത്തിയിരിപ്പു സമരം നടത്തുകയും ചെയ്തു. കെ എസ് യു , എ ബി വി പി എന്നി വിദ്യാര്‍ത്ഥി സംഘടനകളും വൈകാതെ പ്രിന്‍സിപ്പാലിനെതിരെ മുദ്രാവാക്യം വിളിച്ചെത്തിയതോടെ പ്രതിഷേധം ആര്‍ത്തിരമ്പി .

ഇതിന്ടെ മാധ്യമപ്രവര്‍ത്തകര്‍ പ്രിന്‍സിപ്പാളുമായി സംസാരിക്കാന്‍ തുടങ്ങിയതോടെ വിദ്യാര്‍ത്ഥി സംഘടന പ്രതിനിധികള്‍ മുറിയിലേക്കു ഇടിച്ചു കയറുകയും ഏകപക്ഷീയമായി പ്രിന്‍സിപ്പല്‍ സംസാരിക്കണ്ട എന്നും വിദ്യാര്‍ത്ഥികളുടെ ഭാഗം കൂടെ വിശദികരിക്കാൻ അനുവദിക്കണമെന്ന് പറയുകയും ചെയ്തു. മാനേജ്മെന്റിന് എതിരെ സംസാരിക്കുന്നവരെയും സംഘടന പ്രവര്‍ത്തനങ്ങള്‍ നടത്തുന്നവരെയും പല രീതിയില്‍ കോളേജ് അധികൃതര്‍ പീഡിപ്പിക്കുന്നെണ്ടെന്നും അതിലെ അവസാന ഇരയാണ് ഡെന്‍സണ്‍ എന്ന് വിദ്യാര്‍ത്ഥികള്‍ പറഞ്ഞു. ഡെന്‍സന് നീതി ലഭിക്കണമെന്ന തങ്ങളുടെ ആവശ്യം അംഗീകരിക്കുകയും വരെ സമരം തുടരുമെന്നും  ഇവരറിയിച്ചു.

related news : ചര്‍ച്ച അലസി :എസ്എഫ് ഐ തിങ്കളാഴ്ച മുതല്‍ ക്രൈസ്റ്റ് കോളേജില്‍ അനിശ്ചിതകാല സമരത്തില്‍

പീസ് സ്കൂള്‍ ഡയറിയില്‍ നിന്നും ദേശീയഗാനം കീറി കളഞ്ഞു വിതരണം ചെയ്തു -പ്രതിഷേധം ഭയന്നു വീണ്ടും കൂട്ടിചേര്‍ത്തു

ഇരിങ്ങാലക്കുട : പാഠ്യവിഷയ ഉള്ളടക്കത്തെ ചൊല്ലി വിവാദത്തിലായ പടിയൂര്‍ പീസ് സ്കൂളിനെ ചൊല്ലി വീണ്ടും ആരോപണം . അധ്യയന വര്‍ഷാരംഭത്തില്‍ വിദ്യാര്‍ത്ഥികള്‍ക്ക് വിതരണം ചെയ്ത സ്കൂള്‍ ഡയറിയില്‍ നിന്നും ദേശീയഗാനം ഉള്ള പേജ് കീറി കളഞ്ഞു വിതരണം ചെയ്ത വിവരം ഇപ്പോള്‍ പുറത്തു വരുന്നു . പ്രതിഷേധം ഭയന്നു പിന്നീട് ഡയറികള്‍ തിരിച്ചു വാങ്ങി ദേശീയഗാനം പേജ് വീണ്ടും ഒട്ടിച്ചു നല്‍കുകയായിരുന്നു. ഈ സ്കൂളില്‍ ദേശീയഗാനം ആലപിക്കാറില്ലെന്നും മാസ്സങ്ങള്‍ക്കു മുന്‍പ് ദേശീയവിരുദ്ധ നടപടികളുമായി സ്കൂളിന് എതിരെ അനേഷണം ആരംഭിച്ചപ്പോള്‍ മാത്രം ആണ് ദേശീയഗാനം ആലപിച്ചു തുടങ്ങിയതെന്നും രക്ഷിതാക്കള്‍ മാധ്യമങ്ങളോട് പറഞ്ഞു .

എന്നാല്‍  ഡയറിയില്‍ നിന്നും ദേശീയഗാനം ഉള്ള പേജ്  മനഃപൂര്‍വം കീറി കളഞ്ഞിട്ടില്ലെന്നും , ആപേജിന്റെ മറുവശത്തുള്ള സ്കൂള്‍ യൂണിഫോം വിവരങ്ങള്‍ നല്‍ക്കുന്നതിലെ പ്രിന്‍റിംഗ് തകരാര്‍ ഉള്ളതുകൊണ്ട് മാറ്റുകയാണ് ചെയ്തതെന്നും , ദേശീയഗാനം  ഉള്‍പ്പെടുത്തിയ പേജ് പിന്നീട്  ചേര്‍ത്തിട്ടുണ്ടെന്നും പടിയൂര്‍ പീസ് സ്കൂള്‍ അഡ്മിനിസ്ട്രേറ്റര്‍ ഹരീഷ് കെ എച്ച്  വിശിദികരിച്ചു.  ഇതുനു പുറമെ ദേശീയഗാനം സ്ഥിരമായി സ്കൂളില്‍ ആലപിക്കാറുണ്ടെന്നും അദ്ദേഹം പറഞ്ഞു .

വാര്‍ഡ്സഭയിലെ ചായയും പലഹാരങ്ങളും വേണ്ടെന്നുവച്ചു പകരം പച്ചക്കറിവിത്തുകള്‍ വിതരണം നടത്തി

വാര്‍ഡ്‌സഭയിലെ ചായ കുടിച്ചില്ലെങ്കിലും വരുന്ന മാസങ്ങളില്‍ തങ്ങള്‍ക്കു സ്വയം ഉത്പാദിപ്പിച്ച വിഷരഹിതമായ പച്ചക്കറികള്‍ ലഭിക്കുമെന്ന സന്തോഷത്തിലാണ് 38 ാം വാര്‍ഡിലെ ജനങ്ങള്‍ ഇപ്പോള്‍

തളിയക്കോണം :  ഇരിങ്ങാലക്കുട നഗരസഭയിലെ 38 ാം വാര്‍ഡില്‍ ഞായറാഴ്ച നടന്ന വാര്‍ഡ്സഭ മാതൃകാപരമായി. വാര്‍ഡ്സഭയില്‍ എത്തുന്നവര്‍ക്ക് പതിവായി നല്‍കുന്ന   ചായയും പലഹാരങ്ങളും ഇത്തവണ വേണ്ടെന്നുവച്ചു പകരം പച്ചക്കറി സ്വയം ഉല്‍പ്പാദിപ്പിച്ച് വാര്‍ഡിന് സ്വയംപര്യാപ്തത നേടുന്നതിന്റെ ആദ്യപടി എന്ന നിലയില്‍ വാര്‍ഡ് സഭയില്‍ എത്തിയ മുഴുവന്‍ കുടുംബങ്ങള്‍ക്കും 6 തരം പച്ചക്കറിതൈയും വിത്തുകളും സൗജന്യമായി വിതരണം ചെയ്തു. ബ്ലോക്ക് ഓഫീസ് ഹാളില്‍ വെച്ച് നടന്ന വാര്‍ഡ്സഭയില്‍ വാര്‍ഡിലെ മുതിര്‍ന്ന അംഗമായ കഴുങ്കില്‍ ഭാര്‍ഗവിയമ്മയ്ക്ക് ആദ്യ വിത്ത് പായ്ക്കറ്റ് കൗണ്‍സിലര്‍ സി.സി. ഷിബിന്‍ നല്‍കി . സാധാരണയായി ആയിരം രൂപയിലധികം ചെലവുവരുന്ന വാര്‍ഡ്സഭയിലെ  ചായയും പലഹാരങ്ങളും വേണ്ടെന്നുവച്ചു അതിലൂടെ സമാഹരിച്ച തുകവച്ചാണ് ഈ മാതൃകാ  ഉദ്യമം നടപ്പിലാക്കിയത് എന്ന് വാര്‍ഡ് കൗണ്‍സിലര്‍ പറഞ്ഞു . പ്ലാസ്റ്റിക്ക് കവര്‍ ബഹിഷ്ക്കരിച്ചു കൊണ്ട് പേപ്പര്‍ കവറുകളിലാക്കിയാണ് വിത്ത്   വിതരണം ചെയ്തത്. വാര്‍ഡ്‌സഭയിലെ ചായ കുടിച്ചില്ലെങ്കിലും വരുന്ന മാസങ്ങളില്‍ തങ്ങള്‍ക്കു സ്വയം ഉത്പാദിപ്പിച്ച വിഷരഹിതമായ പച്ചക്കറികള്‍ ലഭിക്കുമെന്ന സന്തോഷത്തിലാണ് 38 ാം വാര്‍ഡിലെ ജനങ്ങള്‍ ഇപ്പോള്‍.

പുതംകുളം ഷോപ്പിംഗ് കോംപ്ലക്സില്‍ ടൈല്‍ വിരിക്കുന്നതില്‍ ക്രമക്കേട്

ഇരിങ്ങാലക്കുട : നഗരസഭയുടെ അധിനതയില്‍ ഉള്ള പുതംകുളം ഷോപ്പിംഗ് കോംപ്ലെക്സിന്റെ പാര്‍ക്കിംഗ് സ്ഥലത്തു കോണ്‍ക്രീറ്റ് ടൈല്‍ വിരിക്കുന്നതില്‍ വീണ്ടും അപാകത . കഴിഞ്ഞ തവണ ഇവിടം പൂര്‍ണമായി ടാര്‍ ചെയ്‌തിരുന്നെങ്കിലും, ഒരു പൊതുപരിപാടിക്കായി വേദി കെട്ടിയപ്പോള്‍ ഇവിടെ താഴ്ന്നു പോകുകയായിരുന്നു . നിര്‍മാണ പാളിച്ചയും നിലവാരതകര്‍ച്ചയുമാണ് ഇതിനു കാരണം എന്ന് ആരോപണം ഉണ്ടായിരുന്നു. ഇതേ കോണ്‍ട്രാക്ടര്‍ തന്നെ ഇപ്പോള്‍ ഇവിടെ കോണ്‍ക്രീറ്റ് ടൈല്‍ വിരിക്കുമ്പോള്‍ നിര്‍മാണ മാനദണ്ഡങ്ങള്‍ക്കു വിരുദ്ധമായി ബേബിമെറ്റല്‍നു പകരം മണ്ണ് നിറച്ചാണ് നിര്‍മാണം പുരോഗമിക്കുന്നത് . സംഭവം അറിഞ്ഞു സ്ഥലത്തെത്തിയ നഗരസഭാ കൗണ്‍സില്‍ ഷിബിന്‍ ഇത് ചോദ്യം ചെയുകയും ഇതേ തുടര്‍ന്നു മണ്ണു മാറ്റി ബേബിമെറ്റല്‍ ഇടാന്‍ കോണ്‍ട്രാക്ടര്‍ നിര്‍ബന്ധിതനാവുകയും ചെയ്തു.

ബസ്‌ സ്റ്റാന്റ് പരിസരത്ത് കൂടല്‍മാണിക്യം ക്ഷേത്ര സ്ഥിരം കവാട നിര്‍മാണത്തിനുള്ള പ്രാരംഭ പ്രവര്‍ത്തനങ്ങള്‍ ആരംഭിച്ചു

ഇരിങ്ങാലക്കുട: സംഗമേശ ഭക്തരുടെ ഏറെ നാളത്തെ ആഗ്രഹമായ കൂടല്‍മാണിക്യം ക്ഷേത്ര കവാടം സാക്ഷാത്കാരമാകാനുള്ള പ്രാരംഭ പ്രവര്‍ത്തനങ്ങള്‍ വെള്ളിയാഴ്ച ആരംഭിച്ചു . ബസ്‌ സ്റ്റാന്റ് പരിസരത്ത് കൂടല്‍മാണിക്യം റോഡ്‌ ആരംഭിക്കുന്നതിനു സമീപം പെട്രോള്‍ പമ്പിനും സുപ്രീം ബേക്കറിക്കും മുന്നിലാണ് കവാടം വരുന്നത്. സ്പോണ്‍സര്‍ഷിപ്പിലൂടെ ധനം സമാഹരിച്ചാണ് കവാടം നിര്‍മാണം ഉദേശിക്കുന്നത് . സ്ഥിരം കവാട നിര്‍മ്മാണത്തിന് പ്രഥമ കൂടല്‍മാണിക്യം ദേവസ്വം മാനേജിംഗ് കമ്മിറ്റി ചെയര്‍മാന്‍ തങ്കപ്പന്‍ മാസ്റ്ററുടെ നേതൃത്വത്തില്‍ തീരുമാനം എടുക്കുകയും അതെ തുടര്‍ന്ന് അന്നത്തെ എല്‍ ഡി എഫ് മന്ത്രിസഭയിലെ ദേവസ്വം മന്ത്രിയായിരുന്ന കടന്നപ്പിള്ളി രാമചന്ദ്രന്‍ ഉദ്ഘാടനം നിര്‍വഹിക്കുകയും ചെയ്തിരുന്നു. ക്ഷേത്ര കവാട നിര്‍മ്മാണത്തിന് 2009 ഡിസംബര്‍ 1 ന് നഗരസഭ അനുമതി നല്കിയിട്ടുള്ളതുമാണ്. എന്നാല്‍ നീണ്ട 8 വര്‍ഷക്കാലമായിട്ടും കവാട നിര്‍മ്മാണം നടത്താനായി പിന്നിട് വന്ന ദേവസ്വം ഭരണസമിതിയ്ക്ക് ആവാഞ്ഞത്‌ ഭക്തരില്‍ നിന്ന് കടുത്ത പ്രതിക്ഷേധത്തിന് ഇടയാക്കിയിരുന്നു.


പ്രസിദ്ധമായ കൂടല്‍മാണിക്യ ക്ഷേത്രോത്സവത്തിന് ബസ്‌ സ്റ്റാന്റ് പരിസരത്ത് താത്കാലിക പന്തല്‍ പോലും ഉയര്‍ത്താനായി ദേവസ്വം, ഭരണസമിതിയ്ക്ക് കഴിഞ്ഞിരുന്നില്ല നഗരത്തിലെ ചെറുകിട ക്ലബ്ബുകള്‍ പോലും പരിപാടികള്‍ക്ക് വലിയ കമാനങ്ങളും പന്തലും ഉയര്‍ത്തുന്ന സാഹചര്യത്തില്‍ ദേവസ്വം പന്തല്‍ ഉയര്‍ത്താതിരുന്നത് പ്രതിക്ഷേധം ക്ഷണിച്ച് വരുത്തിയിരുന്നു. എന്നാല്‍ സ്ഥിരം കവാടമെന്ന സ്വപ്നം യാഥാര്‍ത്ഥ്യമാക്കാന്‍ ഇപ്പോള്‍ പനമ്പിള്ളി രാഘവമേനോന്റെ നേതൃത്വത്തിലുള്ള ഭരണസമിതി മുന്‍കൈ എടുക്കുന്നത് പൊതുവെ സ്വാഗതാര്‍ഹം ആയിട്ടുണ്ട്. തൃപ്രയാര്‍ ക്ഷേത്ര കവാട മാതൃകയില്‍ സ്പോന്‍സര്‍ഷിപ്പിലൂടെയാണ് കവാട നിര്‍മ്മാണം എന്ന് അറിയുന്നു. കവാട നിര്‍മാണത്തിന്റെ ഭാഗമായി റോഡില്‍ അളന്നു തിട്ടപ്പെടുത്തി തൂണിനുള്ള സ്ഥലം രേഖപ്പെടുത്തി .ദേവസ്വം മാനേജിങ് കമ്മിറ്റി മെമ്പര്‍ വിനോദ് തറയില്‍, കൂടല്‍മാണിക്യം പരികര്‍മി മണക്കാട് പരമേശ്വരന്‍ നമ്പൂതിരി എന്നിവരുടെ നേതൃത്വത്തില്‍ ആയിരുന്നു പ്രാരംഭ പ്രവര്‍ത്തനങ്ങള്‍ .

Top
Menu Title