News

Category: Exclusive

ഭൂമിദാനം വേറിട്ടൊരു മനസാക്ഷി കാഴ്ച – സുരേഷ് ഗോപി

ഇരിങ്ങാലക്കുട : തലചായ്ക്കുവാന്‍ സ്വന്തമായി മണ്ണ് ഇല്ലാത്തവര്‍ക്ക് ഭൂമിദാനം നടത്തിയ സുന്ദരന്‍ പൊറത്തിശ്ശേരിയുടെയും വനജ ആണ്ടവന്റെയും തീരുമാനം വേറിട്ടൊരു മനസാക്ഷി കാഴ്ചയായി അനുഭവപ്പെട്ടതായി സുരേഷ് ഗോപി എം പി പറഞ്ഞു. സേവാഭാരതിയുടെ ആഭിമുഖ്യത്തില്‍ ഇരിങ്ങാലക്കുട കാരുകുളങ്ങര നൈവേദ്യം ഹാളില്‍ നടന്ന ഭൂമിദാന ചടങ്ങില്‍ സംസാരിക്കുകയായിരുന്നു അദ്ദേഹം. അസാധ്യമായ കാര്യം സേവാഭാരതി വഴി സാധ്യമാക്കിയതില്‍ സംഘടനക്ക് അഭിമാനിക്കാം എന്നും അദ്ദേഹം പറഞ്ഞു. പ്രധാനമന്ത്രിയുടെ സ്വപ്നമാണ് വീടില്ലാത്ത എല്ലാവര്ക്കും വീട് നല്‍കുക എന്നത്. ഇത് സര്‍ക്കാരിന് മാത്രം സാധിക്കുന്ന ഒന്നല്ല പ്രധാനമന്ത്രിയുടെ സ്വപ്നം സാക്ഷാത്‌കരിക്കുവാന്‍ വേണ്ടി ‘അണ്ണാറക്കണ്ണനും തന്നാലായത്’ പോലെ ഓരോരുത്തരും അവര്‍ക്കു സാധിക്കുന്ന രീതിയില്‍ ഇതിനു വേണ്ടി പ്രയത്നിക്കണം എന്നും അദ്ദേഹം പറഞ്ഞു. സമ്പത്ത് അല്ല മറിച്ചു അത് ദാനം ചെയ്യാനുള്ള മനസാണ് വലിയത് എന്നും അദ്ദേഹം കൂട്ടിച്ചേര്‍ത്തു. ഭൂമിദാനം സുരേഷ്‌ഗോപിയെകൊണ്ട് വിതരണം ചെയ്യിക്കണമെന്ന സുന്ദരന്റെ ആഗ്രഹമാണ് ഇവിടെ സഫലീകരിക്കപ്പെട്ടത്. അസാധ്യമായത് സാധ്യമാക്കിയവരാണ് സുന്ദരനും വനജയുമെന്ന് സുരേഷ്‌ഗോപി എം.പി പറഞ്ഞു. സമര്‍പ്പണത്തിന്റെ ഉദാത്തമാതൃകയാണിവര്‍. സേവാഭാരതിയുമായി തനിക്ക് പതിനാറോളം വര്‍ഷത്തെ ബന്ധമുണ്ടെന്നും അദ്ദേഹം പറഞ്ഞു. തങ്ങള്‍ അധ്വാനിച്ചുണ്ടാക്കിയ ഭൂമി വീടില്ലാത്ത നിര്‍ധനര്‍ക്ക് നല്‍കുവാന്‍ ഭൂമിദാനം നല്‍കിയ സുന്ദരനെയും വനജയെയും ചടങ്ങില്‍ സുരേഷ് ഗോപി ആദരിച്ചു. സുന്ദരന്‍ തന്റെ സ്വന്തം അധ്വാനത്താല്‍ സ്വന്തമാക്കിയ ഭൂമിയില്‍ നിന്ന് 50 സെന്റ് തലചായ്ക്കാനിടമില്ലാത്ത 13 ഓളം കുടുംബങ്ങളെ കണ്ടെത്തി നല്‍കുന്നതിനായി ഇരിങ്ങാലക്കുട സേവാഭാരതിയെ ഏല്‍പിച്ചിരുന്നു. 11-ാം വയസ്സില്‍ അച്ഛന്‍ നഷ്ടപ്പെട്ട സുന്ദരന്‍ അന്നു മുതല്‍ ഇന്നുവരെ വിവിധ തൊഴിലുകളിലൂടെ നേടിയ പണം കൊണ്ടാണ് ഭൂമി വാങ്ങിയത്. ഇപ്പോള്‍ മാങ്ങ പറിച്ചു വിറ്റ് ഉപജീവനം നടത്തുന്ന ഇദ്ദേഹം ചെമ്മണ്ടയില്‍ 10 വര്‍ഷം മുമ്പ് വാങ്ങിയ ലക്ഷങ്ങള്‍ വിലമതിക്കുന്ന ഭൂമിയാണ് സേവാഭാരതിക്ക് നല്‍കുന്നത്. കുടുംബപരമായി വലിയ സാമ്പത്തിക സ്ഥിതിയിലല്ലാത്ത സുന്ദരന്‍ തന്റെ സ്വപ്രയത്‌നംകൊണ്ട് ആര്‍ജ്ജിച്ചെടുത്ത സ്വത്തില്‍ നിന്ന് ഒരു ഭാഗമാണ് സമൂഹത്തില്‍ ബുദ്ധിമുട്ട് അനുഭവിക്കുന്ന സഹജീവികള്‍ക്ക് സൗജന്യമായി നല്‍കിയത്. സുന്ദരന്റെ സേവനത്തിന് പുറകേയാണ് വനജയും മക്കളായ അഞ്ജു, അജില്‍ എന്നിവര്‍ അര്‍ഹരായവരെ കണ്ടെത്തി നല്‍കാന്‍ 45 സെന്റ് സ്ഥലം ഇരിങ്ങാലക്കുട സേവാഭാരതിയെ ഏല്‍പ്പിക്കുന്നത്. ആണ്ടവന്‍ പ്രിയപത്‌നിക്കായി വാങ്ങിയ ഭൂമിയാണ് അവശതയനുഭവിക്കുന്നവര്‍ക്ക് നല്‍കാനാന്‍ വനജ സമര്‍പ്പിച്ചത്. മൂന്നുവര്‍ഷം മുമ്പ് നടന്ന അപകടത്തിലാണ് ആണ്ടവന്‍ മരിച്ചത്. മകള്‍ അഞ്ജു വിവാഹിതയും ബി എഡ് വിദ്യാര്‍ത്ഥിനിയുമാണ്. മകന്‍ അജില്‍ ഏറണാകുളത്ത് ഡിഗ്രിക്ക് പഠിക്കുന്നു. അര്‍ഹതയുള്ളവരിലേക്ക് എത്തിചേരുന്നതിനുവേണ്ടിയാണ് ഭൂമി സേവാഭാരതിയെ

ഏല്‍പ്പിക്കുന്നതെന്ന് വനജയും സുന്ദരനും പറഞ്ഞു. 24 പേര്‍ക്ക് ഭൂമിയുടെ രേഖകള്‍ സുരേഷ്‌ഗോപി വിതരണം ചെയ്തു. 350 ഓളം അപേക്ഷകളില്‍ നിന്നും അര്‍ഹരായ 24 പേര്‍ക്കാണ് ഭൂമി രജിസ്റ്റര്‍ ചെയ്ത് നല്‍കിയത്. ഭൂമിയില്ലാത്ത അര്‍ഹരായവരില്‍ നിന്നും സേവാഭാരതിക്കു ലഭിച്ച 350 ഓളം അപേക്ഷകരില്‍ നിന്ന് കണ്ടെത്തി 3 സെന്‍റ് ഭൂമി വീതമാണ് ഓരോരുത്തര്‍ക്കും നല്‍കുന്നത്. ചെമ്മണ്ടയില്‍ സുന്ദരന്‍ നല്‍കിയ ഭൂമിയില്‍ 13 പേര്‍ക്കും മുരിയാട് വനജ നല്‍കിയ ഭൂമിയില്‍11 പേര്‍ക്കുമാണ് വിതരണം ചെയ്യുന്നത്. പൊതുവായ കിണര്‍ സൗകര്യം സേവാഭാരതി ഒരുക്കും. സര്‍ക്കാര്‍ ഏജന്‍സികളില്‍ നിന്നോ ഉദാരമതികളായ വ്യക്തികളില്‍ നിന്നോ സഹായം ലഭ്യമാക്കി 24 പേര്‍ക്കും ഏകദേശം 6 ലക്ഷം രൂപ ചിലവില്‍ 550 സ്‌ക്വയര്‍ ഫീറ്റില്‍ വീടുകള്‍ നിര്‍മ്മിച്ചുകൊടുക്കണം എന്നാണ് സേവാഭാരതി ലക്ഷ്യമിടുന്നത്. ഈ പദ്ധതിയില്‍ പങ്കാളികളാവാന്‍ താല്‍പ്പര്യമുള്ളവര്‍ക്ക് സേവാഭാരതിയുമായി സഹകരിക്കാം. സേവാഭാരതി പ്രസിഡന്റ് പി കെ ഉണ്ണികൃഷ്ണന്‍ അദ്ധ്യക്ഷത വഹിച്ചു. ജന.സെക്രട്ടറി പി ഹരിദാസ്, നൂറ്റിയൊന്നംഗ സഭ ചെയര്‍മാന്‍ ഡോ.ഇ പി ജനാര്‍ദ്ദനന്‍, സേവാഭാരതി സംഘടനാ സെക്രട്ടറി യു എന്‍ ഹരിദാസ്, ആര്‍എസ്എസ് വിഭാഗ് സംഘചാലക് കെ എസ് പത്മനാഭന്‍, സെക്രട്ടറി എം ഡി ശശിധര പൈ, ഭൂമിസമര്‍പ്പണം നടത്തിയ സുന്ദരന്‍, വനജ തുടങ്ങിയവര്‍ ചടങ്ങില്‍ സംസാരിച്ചു.

ബൈപാസ് റോഡില്‍ ആറടി ഉയരത്തില്‍ ചെരുപ്പ് മാലിന്യം തള്ളിയ നിലയില്‍

ഇരിങ്ങാലക്കുട : യാത്രക്കാര്‍ക്ക് ഉപകാരമാകുന്നതിനു പകരം ബൈപാസ് റോഡ് ഇപ്പോള്‍ സാമൂഹ്യ വിരുദ്ധര്‍ക്ക് വലിയ തോതില്‍ മാലിന്യം തള്ളാനുള്ള ഒരു ഇടമായിരിക്കുകയാണ് . തിങ്കളാഴ്ച രാവിലെ ബൈ പാസ് റോഡിന്‍റെ രണ്ടാം ഘട്ടം അവസാനിക്കുന്നിടത്ത് റോഡിന്‍റെ മധ്യഭാഗം വരെ ആറടി ഉയരത്തില്‍ ഉപയോഗശൂന്യമായ ചെരുപ്പുകള്‍ അടങ്ങിയ മാലിന്യം തള്ളിയ നിലയില്‍ കാണപ്പെട്ടു. സാധാരണ ബൈപാസ് റോഡിന്‍റെ അരികിലാണ് മാലിന്യം തള്ളാറുള്ളത് . കഴിഞ്ഞ ദിവസം മാലിന്യം തള്ളിയ വാഹനം റോഡിരികില്‍ താഴ്ന്നു പോയത് മൂലം വാഹനം ഉപേക്ഷിച്ചു കടന്നു കളഞ്ഞവരെ കഴിഞ്ഞദിവസം പോലീസ് പിടിച്ചിരുന്നു. ഇതുമൂലം ആകാം ‘റിസ്ക് എടുക്കാന്‍ തയാറാകാതെ ഇവര്‍ റോഡില്‍ തന്നെ മാലിന്യം നിക്ഷേപിച്ചു കടന്നു കളഞ്ഞത് ‘ ഇത്ര അധികം തോതില്‍ മാലിന്യം ബൈപാസ് റോഡില്‍ തള്ളുന്നത് ആദ്യമായാണ് .

ആറാം വയസ്സില്‍ അരങ്ങേറ്റം: സമുദ്രക്ക് കുട്ടിക്കളിയല്ല കഥകളി

ഇരിങ്ങാലക്കുട : കഥകളി പുറപ്പാടിന്റെ ചിട്ടയില്‍ നിന്നും അണുവിട പോലും വ്യതിചലിക്കാതെ മുദ്രാബോധത്തോടും താള-ഭാവ പൂര്‍ണതയോടെ ആറ് വയസ്സുകാരി സമുദ്ര സങ്കല്‍പിന്റെ അരങ്ങേറ്റം കര്‍ക്കിടത്തലേന്ന് കൂടല്‍മാണിക്യം കിഴെക്കെനടപ്പുരയില്‍ എത്തിച്ചേര്‍ന്ന ആസ്വാദകരുടെ മനം കവര്‍ന്നു. അരങ്ങത്ത് നില്‍ക്കുമ്പോള്‍ സമുദ്രക്ക് പ്രായം ആറ് വയസ്സാണെന്നത് ആസ്വാദകര്‍ മറക്കും. അഭിനയവും പാട്ടും വാദ്യവും ചമഞ്ഞൊരൊക്കവുമൊക്കെയായി ആറ് വയസ്സുകാരി സമുദ്രയുടെ കഥകളി പുറപ്പാട് അരങ്ങേറ്റം സദസ്സിനെ പിടിച്ചിരുത്തി. പൂതനാമോക്ഷം കഥകളിയോട് അനുബന്ധിച്ചാണ് രണ്ടാം ക്ലാസ് വിദ്യാര്‍ഥിനിയായ സമുദ്ര കഥകളിയില്‍ ‘പുറപ്പാട്’ അരങ്ങേറ്റം നടത്തിയത്. ഇത്ര ചെറുപ്പത്തിലേ കഥകളി പോലുള്ള അനുഷ്ഠാന കലയില്‍ തികഞ്ഞ അഭിനയ പാടവത്തോടെ ഈ നാട്യരൂപം അവതരിപ്പിക്കുന്നത് അപൂര്‍വമാണ്. നാല്‍പത്‌ മിനിറ്റ് നീണ്ടുനിന്ന പുറപ്പാട് അരങ്ങേറ്റവും മറ്റൊരു റെക്കാഡിലേക്ക് . ഇരിങ്ങാലക്കുട ഡോണ്‍ബോസ്‌കോ സ്കൂള്‍ അധ്യാപകന്‍ പായമ്മല്‍ സുരേഷ് ബാബുവിന്റയും സിജിയുടെയും മകളാണ് സമുദ്ര സങ്കല്‍പ്. ഇപ്പോള്‍ താമസം കൂടല്‍മാണിക്യം പടിഞ്ഞാറെ നടയിലെ കൈലാസ് കോട്ടേജ്ജില്‍. കലാനിലയം മനോജിന്റെ ശിഷ്യയാണ് ഡോണ്‍ ബോസ്കോ സെന്‍ട്രല്‍ സ്കൂള്‍ രണ്ടാം ക്ലാസ് വിദ്യാത്ഥിനി സമുദ്ര . പൂതനാമോക്ഷം കഥകളിയില്‍ കലാമണ്ഡലം വിജയകുമാര്‍ ലളിതയായി . സംഗീതം കലാനിലയം രാമകൃഷ്ണന്‍, കലാനിലയം വിഷ്ണു, കലാനിലയം സഞ്ജയ് . ചെണ്ട കലാനിലയം ദീപക്. മദ്ദളം കലാനിലയം പ്രകാശന്‍. ചുട്ടി കലാനിലയം പ്രശാന്ത്. അണിയറയില്‍ അനിയന്‍ കുട്ടി, ശ്യാം, അവതരണം കലാനിലയം മനോജ്ജും സംഘവും.

തൃശൂര്‍ എറണാകുളം ജില്ലയിലെ പി ഡബ്ലിയു ഡി ഉദ്യോഗസ്ഥരില്‍ ക്രിമിനലുകളും – മന്ത്രി ജി സുധാകരന്‍

ഇരിങ്ങാലക്കുട : തൃശൂര്‍ എറണാകുളം ജില്ലയിലെ പി ഡബ്ലിയു ഡി ഉദ്യോഗസ്ഥരില്‍ നല്ലൊരു സംഘം ക്രിമിനലുകളാണെന്നു പൊതുമരാമത്ത് വകുപ്പ് മന്ത്രി ജി സുധാകരന്‍ തുറന്നടിച്ചു. ഇരിങ്ങാലക്കുട നിയോജകമണ്ഡലത്തിലെ  5 റോഡുകളുടെ പുനഃരുദ്ധാരണ പ്രവര്‍ത്തന ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം . മര്യാദക്ക് പ്രവര്‍ത്തിക്കുന്ന ഉദ്യോഗസ്ഥരെ പോലും ഈ സംഘം ഭീഷണി പെടുത്തിയിരുന്നു. ചില മുന്‍ ഭരണാധികാരികളും ഈ കൂട്ടത്തില്‍ ഉണ്ട്. ഗവണ്‍മെന്റിന്റെ സൗമനസ്യം കൊണ്ട് ഞങ്ങള്‍ ആരെയും പ്രതികള്‍ ആക്കിയിട്ടില്ല ആരെയും പ്രതികള്‍ ആക്കാന്‍ ഉദ്ദേശിക്കുന്നുമില്ല അത് ഒരു കാലഘട്ടത്തിന്റെ പ്രത്യേകതയാണ് എന്നും അദ്ദേഹം പറഞ്ഞു  . പക്ഷെ ഇനി ഉദ്യോഗസ്ഥര്‍ ആര് തെറ്റ് കാണിച്ചാലും നടപടി ഉറപ്പാണെന്നും ഒരു വിട്ടുവീഴ്ചക്കും തയ്യാറല്ല എന്നും മന്ത്രി ഓര്‍മിപ്പിച്ചു. ഉദ്യോഗസ്ഥന്മാര്‍ക്കെതിരെ ആര്‍ക്കും പരാതി നല്‍കാം അത് അന്വേഷിക്കുകയും ചെയ്യും എന്നും അദ്ദേഹം പറഞ്ഞു. എന്നാല്‍ കള്ള പെറ്റിഷന്‍ ആണെന്ന് അറിഞ്ഞാല്‍ അവര്‍ക്കെതിരെ ഗൂഢാലോചനയ്ക്ക് ക്രിമിനല്‍ കേസ് എടുക്കുമെന്നും മന്ത്രി പറഞ്ഞു. ഇപ്പോള്‍  ഇരിക്കുന്ന കുറച്ചു ഉദ്യോഗസ്ഥമാരെ കൂടി സ്ക്രീന്‍ ചെയ്യാന്‍ ഉണ്ടെന്നും. അവര്‍ സ്വയം തിരിച്ചറിയുകയാണെങ്കില്‍ നല്ലത് എന്നും അദ്ദേഹം പറഞ്ഞു . പി ഡബ്ലിയു ഡി റോഡ് വെട്ടിപ്പൊളിച്ചു പൈപ്പിടുന്നതും കേബിള്‍ ഇടുന്നതിനും പുതിയ മാനദണ്ഡം വക്കുമെന്നും അല്ലാതെ റോഡിന്‍റെ നടുവിലൂടെ വെട്ടിപൊളിക്കുവാന്‍ ഇനി അനുവദിക്കുകയില്ലെന്നും മന്ത്രി പറഞ്ഞു. സര്‍ക്കാര്‍ പണം ഉപയോഗിച്ചുണ്ടാക്കിയ ആസ്തികള്‍ കൂടിയാലോചനകള്‍ ഇല്ലാതെ അന്യായമായി വെട്ടിപൊളിക്കുന്ന കോണ്‍ട്രാക്ടര്‍ , ഉദ്യോഗസ്ഥര്‍ , തൊഴിലാളികള്‍, ആര് തന്നെ ആയാലും നടപടി ഉണ്ടാകുമെന്നും അദ്ദേഹം പറഞ്ഞു. വെള്ളക്കെട്ടില്‍ വെള്ളം നിറഞ്ഞു റോഡ് നശിക്കാതിരിക്കാന്‍ പുതിയ സാങ്കേതിക വിദ്യ ആയ കയര്‍ വസ്ത്രം ഇട്ടുകൊണ്ടുള്ള റോഡ് നിര്‍മ്മാണം , ബേസ് പ്ലാസ്റ്റിക് ഉപയോഗിച്ചുള്ള റോഡ് നിര്‍മ്മാണം എന്നിവയും ബിറ്റുമിനില്‍ 70 ശതമാനം റബ്ബര്‍ ഉപയോഗപെടുത്തികൊണ്ടുള്ള നിര്‍മ്മാണവും  ഇപ്പോള്‍ പരീക്ഷിക്കുന്നുണ്ട് അത് വര്‍ഷങ്ങളോളം കേടാകാതെ നിലനില്‍ക്കുമെന്നും അദ്ദേഹം പറഞ്ഞു. ഇരിങ്ങാലക്കുട നിയോജകമണ്ഡലത്തിലെ ഠാണാ-കൂടല്‍മാണിക്യം അമ്പലം റോഡ് , മുരിയാട് -കാരൂര്‍ കൊപ്രക്കളം റോഡ് , കാട്ടൂര്‍ -ഗവ. ഹോസ്പിറ്റല്‍ റോഡ് , ഈസ്റ്റ് -പാഞ്ഞപ്പിള്ളി -പാറേക്കാട്ടുക്കര റോഡ്, പുല്ലൂര്‍ അപകടവളവ് റോഡ് എന്നി റോഡുകളുടെ പുനഃരുദ്ധാരണ പ്രവര്‍ത്തനങ്ങളുടെ പ്രവര്‍ത്തന ഉദ്ഘാടന ചടങ്ങില്‍ ഇരിങ്ങാലക്കുട എം എല്‍ എ പ്രൊഫ കെ യു അരുണന്‍ അദ്ധ്യക്ഷത വഹിച്ചു. സൂപ്രണ്ടിങ് എന്‍ജിനിയര്‍ സുജാറാണി റിപ്പോര്‍ട്ട് അവതരിപ്പിച്ചു.

മുന്‍ ചെയര്‍പേഴ്സണ്‍ പ്രൊഫ.റോസ് വില്യംസിന്റെ നിര്യാണത്തില്‍ നഗരസഭ കൗണ്‍സില്‍ അനുശോചിച്ചു

ഇരിങ്ങാലക്കുട : നഗരസഭയില്‍ നീണ്ട 17 വര്‍ഷക്കാലം കൗണ്‍സിലറും 1995 -97 കാലയളവില്‍ ഇരിങ്ങാലക്കുട ചെയര്‍പേഴ്സനുമായിരുന്ന പ്രൊഫ റോസ് വില്യംസ് വിദ്യാഭ്യാസ രംഗത്തും സാമൂഹിക രംഗത്തും വിലപ്പെട്ട സംഭാവനകള്‍ ആണ് നല്‍കിയിട്ടുള്ളത് എന്ന് വ്യാഴാഴ്ച രാവിലെ ചേര്‍ന്ന പ്രത്യേക കൗണ്‍സിലില്‍ അനുശോചനകുറിപ്പ് അവതരിപ്പിച്ചുകൊണ്ട് നഗരസഭ അധ്യക്ഷ നിമ്യ ഷിജു പറഞ്ഞു. പൊതുജീവിതത്തില്‍ വളരെ മാതൃകാപരമായ സ്വാഭാവത്തിനു ഉടമയായ പ്രൊഫ. റോസ് വില്യംസിന്റെ നിര്യാണത്തില്‍ ഇരിങ്ങാലക്കുട നഗരസഭ കൗണ്‍സില്‍ അഗാധമായ അനുശോചനം രേഖപ്പെടുത്തുന്ന പ്രമേയം അവതരിപ്പിച്ചു. മുഴുവന്‍ നഗരസഭ ജീവനക്കാരും കൗണ്‍സിലില്‍ ചേര്‍ന്ന അനുശോചനയോഗത്തില്‍ പങ്കെടുത്തു. നഗരസഭ സെക്രട്ടറി ഇന്‍ചാര്‍ജ് സന്തോഷ്  ജീവനക്കാര്‍ക്ക് വേണ്ടി അനുശോചനം രേഖപ്പെടുത്തി. സ്റ്റാന്റിംഗ് കമ്മിറ്റി ചെയര്‍മാന്മാരും കൗണ്‍സിലര്‍മാരും യോഗത്തില്‍ സംസാരിച്ചു. പരേതയുടെ മൃതദേഹം വ്യാഴാഴ്ച നാലു മണിക്ക് സംസ്കരിക്കുന്നതിനു മുന്‍പ് തന്നെ വ്യാഴാഴ്ച 11 മണിക്ക് നഗരസഭ അനുശോചന യോഗം അടിയന്തരമായി വിളിച്ചുചേര്‍ത്തത് ശരിയായ നിലപാടല്ലെന്നു ചില കൗണ്‍സിലര്‍മാര്‍ യോഗത്തില്‍ ചൂണ്ടിക്കാട്ടി.

നടിയെ ആക്രമിച്ച കേസില്‍ കുറ്റവാളികളെ സംരക്ഷിക്കാന്‍ പരിശ്രമിച്ച ലോകസഭാ അംഗം ഇന്നസെന്റ് തല്‍സ്ഥാനം രാജിവക്കണം – കെ സുരേന്ദ്രന്‍

ഇരിങ്ങാലക്കുട : നടിയെ തട്ടികൊണ്ടുപോയ കേസില്‍ ആദ്യം മുതല്‍ തന്നെ ദിലീപ് പ്രതി സ്ഥാനത്തു ആണെന്ന് അറിയുന്നവരാണ് അമ്മയുടെ ഭാരവാഹികളില്‍ ഭൂരിഭാഗവും, അത് അറിഞ്ഞു കൊണ്ട് തന്നെയാണ് ഇന്നസെന്റും സംഘവും ദിലീപിനെ സംരക്ഷിക്കാനുള്ള പരിശ്രമം നടത്തിയത് എന്ന് കെ സുരേന്ദ്രന്‍ പറഞ്ഞു. അമ്മ എന്ന സംഘടനയുടെ സ്വാധീനം ദിലീപിനെ സംരക്ഷിക്കാന്‍ വേണ്ടി ഉപയോഗിച്ചു എന്ന ഗുരുതരമായ ആരോപണം ഇന്നസെന്റിനെതിരെ നിലനില്‍ക്കുന്നതിനാല്‍ ഇന്നസെന്റ് ഉടന്‍ ലോകസഭാ അംഗസ്ഥാനം രാജി വെക്കണമെന്ന് ബി ജെ പി സംസ്ഥാന ജനറല്‍ സെക്രട്ടറി കെ സുരേന്ദ്രന്‍ പറഞ്ഞു. മാത്രമല്ല സ്ത്രീകളെ അപമാനിക്കുന്ന തരത്തിലും അദ്ദേഹം പ്രസംഗിക്കുകയുണ്ടായി . അതിനാല്‍ ലോകസഭാ അംഗമായി തുടരാനുള്ള ധാര്‍മിക അവകാശം അദ്ദേഹത്തിന് നഷ്ടപെട്ടിരിക്കുന്നു എന്നും ഇന്നസെന്റിന്റെ നടപടികള്‍ അധാര്‍മികവും ജനാധ്യപത്യ വിരുദ്ധവും സ്ത്രീവിരുദ്ധവുമാണെന്നും അതിനാല്‍ ലോകസഭാ അംഗമായി തുടരാന്‍ അര്‍ഹതയില്ല എന്നും കെ സുരേന്ദ്രന്‍ ഇരിങ്ങാലക്കുട ലൈവ് ഡോട്ട് കോമിന് പ്രത്യേകം അനുവദിച്ച അഭിമുഖത്തില്‍ പറഞ്ഞു.

ദീലീപിനെ അമ്മയുടെ പ്രാഥമിക അംഗത്വത്തില്‍ നിന്നും പുറത്താക്കി

അമ്മ അംഗവും ട്രഷറുമായ ദിലീപ് പോലീസിന്റെ അന്വേഷണത്തില്‍ പ്രഥമ ദൃഷ്ട്യാ കുറ്റക്കാരനാണെന്നു കണ്ടെത്തിയതിനാല്‍ ദിലീപിന്റെ ട്രഷറര്‍ സ്ഥാനവും അമ്മയുടെ പ്രാഥമിക അംഗത്വവും അടിയന്തരമായി റദ്ദ് ചെയ്യാന്‍ തീരുമാനിച്ചു. കൊച്ചിയില്‍ ചേര്‍ന്ന സംഘടനയുടെ യോഗത്തിലാണ് തീരുമാനം. എന്നത്തേയും പോലെ അമ്മയുടെ ഐക്യദാര്‍ഢ്യവും പിന്തുണയും ആക്രമിക്കപ്പെട്ട ഞങ്ങളുടെ സഹോദരിയോടൊപ്പമാണ് എന്നും , തുടര്‍ന്നുള്ള നിയമ നടപടികള്‍ക്ക് ഒപ്പവുമാണെന്നു ‘അമ്മ യോഗത്തില്‍ പ്രഖ്യാപിച്ചു. അമ്മയില്‍ അംഗത്വമുള്ള ചിലരാല്‍ ആക്രമിക്കപ്പെട്ട ഞങ്ങളുടെ സഹോദരിക്ക് വീണ്ടും വേദനയുണ്ടാക്കുന്ന തരത്തിലുള്ള പരാമര്‍ശങ്ങള്‍ മാധ്യമങ്ങളിലൂടെയും നടത്തിയതില്‍ അമ്മയ്ക്കുള്ള പ്രതിഷേധവും അതെ തുടര്‍ന്നുണ്ടായ ഞങളുടെ സഹോദരിക്കുണ്ടായ വേദനയില്‍ ഖേദവും അമ്മ സംഘടന രേഖപ്പെടുത്തി. ഇനി മേലാല്‍ ഇത്തരത്തിലുള്ള പരാമര്‍ശങ്ങള്‍ക്കെതിരെ അമ്മയുടെ ഭാഗത്തു നിന്നും ശക്തമായ നടപടി ഉണ്ടാകുമെന്നും സംഘടന പത്രക്കുറിപ്പിലൂടെ അറിയിച്ചു.

നിരവധി ജീവനുകളെടുത്ത പുല്ലൂര്‍ അപകടവളവ് നീക്കാനുള്ള പ്രവര്‍ത്തനങ്ങള്‍ ആരംഭിച്ചു

പുല്ലൂര്‍ : സംസ്ഥാനപാത 61ലെ പുല്ലൂര്‍ മിഷന്‍ ആശുപത്രിക്കും മന്ത്രിപുരത്തിനും മധ്യേയുള്ള അപകടവളവ് നീക്കാനുള്ള പ്രവര്‍ത്തനങ്ങള്‍ പി.ഡബ്ല്യു.ഡി ആരംഭിച്ചു. ഇതിന്റെ ഭാഗമായി കഴിഞ്ഞ രണ്ടു ദിവസമായി ഇവിടെ ജെ സി ബി ഉപയോഗിച്ച് റോഡിന്‍റെ ഇടതുവശം വൃത്തിയാക്കുന്നുണ്ട് . കഴിഞ്ഞ 5 വര്‍ഷത്തോളമായി പുല്ലൂര്‍ അപകടവളവ് നീക്കാനുള്ള പ്രാരംഭ പ്രവര്‍ത്തനങ്ങള്‍ തുടങ്ങിയിട്ട് . എന്നാല്‍, റോഡ് വികസനത്തിനുവേണ്ടി പി.ഡബ്ല്യു.ഡി. മാര്‍ക്ക് ചെയ്തിരുന്ന സ്ഥലങ്ങളില്‍ പലയിടങ്ങളിലും കയ്യേറ്റങ്ങള്‍ ഒഴിപ്പിക്കാനുണ്ടെന്നും ഒഴുപ്പിച്ചെടുത്ത സ്ഥലങ്ങളില്‍ പലതും കയ്യേറിത്തുടങ്ങിയതായും ഇപ്പോള്‍ ആരോപണമുണ്ട് . 2012ലാണ് പി.ഡബ്ല്യു.ഡി. വളവൊഴിവാക്കിക്കൊണ്ടുള്ള റോഡിനായി സ്ഥലം അടയാളപ്പെടുത്തിയത്. തുടര്‍ന്ന് പലയിടങ്ങളിലും കയ്യേറ്റങ്ങള്‍ ഒഴിപ്പിക്കുകയും ചെയ്തു. എന്നാല്‍ വിവാദമായ വില്ലയുടെ മതിലടക്കമുള്ള കയ്യേറ്റങ്ങള്‍ പൊളിച്ചുമാറ്റാന്‍ അധികൃതര്‍ക്ക് കഴിഞ്ഞിരുന്നില്ല. അനധികൃത കയ്യേറ്റങ്ങള്‍ക്കെതിരെ നടപടിയെടുക്കുമെന്ന് പി.ഡബ്ല്യു.ഡി. ഉദ്യോഗസ്ഥര്‍ ആവര്‍ത്തിച്ചിരുന്നെങ്കിലും രാഷ്ട്രീയ ഇടപെടലുകള്‍ മൂലം പൊളിക്കല്‍ അനിശ്ചിതമായി നീണ്ടുപോയിരുന്നു. പിന്നീട് അനധികൃത കയ്യേറ്റങ്ങള്‍ക്കെതിരെ പി.ഡബ്ല്യു.ഡി. നടപടിയെടുത്തപ്പോഴെല്ലാം പൊളിച്ചുനീക്കാതിരുന്ന വിവാദ മതിലും പൊളിച്ചു. എന്നാല്‍ മതിലിനോട് ചേര്‍ന്ന ഗോപുരവും കയ്യേറ്റഭൂമിയിലാണെന്നു ആക്ഷേപമുണ്ട്. അപകടങ്ങള്‍ വര്‍ദ്ധിച്ചുവരുന്നതിനാല്‍ അപകടവളവ് ഇല്ലാതാക്കിക്കൊണ്ടുള്ള റോഡ് നിര്‍മ്മാണം എത്രയും പെട്ടന്ന് പൂര്‍ത്തിയാക്കാന്‍ സമ്മര്‍ദ്ദമുണ്ടായപ്പോളാണ് ഇപ്പോള്‍ മന്ത്രിപുരത്തിനും പുല്ലൂര്‍ മിഷന്‍ ആശുപത്രിക്കും മധ്യേ പോട്ട – മൂന്നുപീടിക റോഡിലെ അപകടകരമായ വളവ് ഇല്ലാതാക്കി വീതികൂട്ടുന്ന പ്രവൃത്തിക്ക് 195 ലക്ഷം രൂപയുടെ പ്രവൃത്തികളാണ് പൊതുമരാമത്ത് വകുപ്പ് റോഡ് വിഭാഗം ഇരിങ്ങാലക്കുട സബ് ഡിവിഷനില്‍ നിന്നും ടെണ്ടര്‍ നടപടികള്‍ പൂര്‍ത്തിയാക്കി നിര്‍മ്മാണത്തിനൊരുങ്ങുന്നത്. നൂറിലധികം അപകടങ്ങളും ഇരുപതിലധികം വിലപ്പെട്ട ജീവനുകളും ഇവിടെ പൊലിഞ്ഞിട്ടുണ്ട്.

സ്ത്രീവിരുദ്ധ പരാമര്‍ശത്തില്‍ കെ.എസ്.യു പ്രവര്‍ത്തകര്‍ ഇന്നസെന്റിന്റെ കോലം കത്തിച്ചു

ഇരിങ്ങാലക്കുട : ക്രൈസ്റ്റ് കോളേജ് കെ എസ് യു യൂണിറ്റിന്റെ ആഭിമുഖ്യത്തില്‍ സിനിമ രംഗത്തുള്ളവരെക്കുറിച്ചു ഉള്ള ഇന്നസെന്റിന്റെ പരാമര്‍ശത്തില്‍ പ്രതിഷേധിച്ചു കോലം കത്തിച്ചു . ക്രൈസ്റ്റ് കോളേജില്‍ നിന്നും ആരംഭിച്ച ഇന്നസെന്റിന്റെ കോലമേന്തിയുള്ള പ്രകടനം ആല്‍ത്തറക്കലില്‍ വച്ച് നഗരസഭ ചെയര്‍പേഴ്സണ്‍ നിമ്യ ഷിജു ഉദ്ഘാടനം
ചെയ്തു. ക്രൈസ്റ്റ് കോളേജ് കെ എസ് യു യൂണിറ്റ് പ്രസിഡന്റ് ഫയാസ് മുഹമ്മദ്ദ് , സെക്രട്ടറി ടോം ജേക്കബ്ബ് , നഗരസഭ സ്റ്റാന്റിംഗ് കമ്മിറ്റി ചെയര്‍മാന്‍ വി സി വര്‍ഗീസ് , കെ എസ് യു പ്രവര്‍ത്തകരായ ആല്‍ഫിന്‍ വിത്സണ്‍ മേച്ചേരി, മിഥുന്‍, സ്റ്റെയിന്‍സ് , റിയാന്‍ , അതുല്‍ , സന എന്നിവര്‍ പ്രകടനത്തിന് നേതൃത്വം നല്‍കി. തുടര്‍ന്ന് ആല്‍ത്തറക്കലില്‍ ഇന്നസെന്റിന്റെ കോലം കത്തിച്ചു.

സിനിമ ലോകത്തെ വനിതകളെക്കുറിച്ചുള്ള ഇന്നസെന്റിന്റെ പരാമര്‍ശം വിവാദമാകുന്നു

ഇരിങ്ങാലക്കുട : ചലച്ചിത്രമേഖലയില്‍ പ്രവര്‍ത്തിക്കുന്ന സ്ത്രീകളെ കുറിച്ചുള്ള ഇന്നസെന്റിന്റെ പരാമര്‍ശം വിവാദമാകുന്നു. സിനിമ മേഖലയില്‍ പ്രവര്‍ത്തിക്കുന്ന വനിതകള്‍ക്ക് അവസരങ്ങള്‍ക്കായി കിടക്ക പങ്കിടേണ്ട അവസ്ഥ ഉണ്ടെന്ന ഒരു നടിയുടെ പരാമര്‍ശം ശ്രദ്ധയില്‍പ്പെടുത്തിയപ്പോള്‍ അത്തരം കാലം ഒക്കെ പോയെന്നും സ്ത്രീകളോട് മോശമായി പെരുമാറിയാല്‍ മാധ്യമപ്രവര്‍ത്തകര്‍ അടക്കം ഉള്ളവര്‍ ആ വിവരം പുറത്തുകൊണ്ടുവരുമെന്നതിനാല്‍ ഇപ്പോള്‍ അങ്ങനെയൊന്നും ഈ മേഖലയില്‍ ഇല്ലെന്നും അദ്ദേഹം പറഞ്ഞു. എന്നാല്‍ ഇത്തരം സ്ത്രികളുടെ സ്വഭാവം മോശമാണെങ്കില്‍ ചിലപ്പോള്‍ അവര്‍ കിടക്ക പങ്കിട്ടുവെന്നും വരും എന്ന് പറഞ്ഞ കാര്യമാണ് ഇപ്പോള്‍ വിവാദമായിരിക്കുന്നത് . താരസംഘടനയായ അമ്മയുടെ തലപ്പത്ത് സ്ത്രീകളെ നിര്‍ബന്ധപൂര്‍വം കൊണ്ടുവരാതിരിക്കുന്നതല്ലെന്നും മിടുക്കികളായവര്‍ തന്നെ രംഗത്ത് വരണമെന്നും അല്ലാതെ സംവരണം എന്ന പേരില്‍ ഒന്നും അറിയാത്തവര്‍ അല്ല വരേണ്ടത് എന്നും അദ്ദേഹം പറഞ്ഞു. ചലച്ചിത്രമേഖലകളില്‍ കാസ്റ്റിംഗ് കൗച്ചിനെ കുറിച്ചുള്ള ഇന്നസെന്റിന്റെ പ്രസ്താവന ദേശീയ മാധ്യങ്ങളടക്കം  ഇപ്പോള്‍ ചര്‍ച്ച ചെയ്യുകയാണ്. അമ്മ പ്രസിഡന്റ് സ്ഥാനത്തു നിന്നും താന്‍ രാജി വെച്ചു എന്നുള്ള അഭ്യൂഹം തിരുത്തികൊണ്ടു ഇരിങ്ങാലക്കുടയിലെ വസതിയില്‍ ബുധനാഴ്ച്ച രാവിലെ വിളിച്ചു ചേര്‍ത്ത വാര്‍ത്ത സമ്മേളനത്തിനിടയിലായിരുന്നു വിവാദംക്ഷണിച്ചു വരുത്തിയ ഈ പ്രസ്താവന. പ്രസ്താവന വിവാദമായതോടെ, ഫേസ്ബുക്കിലൂടെ ഇന്നസെന്റ് വിശദികരണം നല്‍കി. ഒരു ചോദ്യത്തിന് മറുപടി പറയുക മാത്രമേ ചെയ്തതെന്നും ,സ്ത്രികളെ കുറിച്ച മോശമായി താന്‍ ഒന്നും പറഞ്ഞിട്ടില്ലെന്നും അദ്ദേഹം വിശദികരിക്കുന്നു.

related news : അമ്മയുടെ കസേര വിട്ടുകൊടുക്കാന്‍ തയ്യാര്‍ , പക്ഷെ ഇപ്പോള്‍ രാജി ഇല്ല : അംഗങ്ങളുടെ മോശമായ പെരുമാറ്റത്തിന് ക്ഷമ ചോദിക്കുന്നു – ഇന്നസെന്റ്

അമ്മയുടെ കസേര വിട്ടുകൊടുക്കാന്‍ തയ്യാര്‍ , പക്ഷെ ഇപ്പോള്‍ രാജി ഇല്ല : അംഗങ്ങളുടെ മോശമായ പെരുമാറ്റത്തിന് ക്ഷമ ചോദിക്കുന്നു – ഇന്നസെന്റ്

ഇരിങ്ങാലക്കുട : താരസംഘടനയായ അമ്മയുടെ ജനറല്‍ ബോഡിയില്‍ താരങ്ങള്‍ മോശമായി സംസാരിച്ചതിലും കൂകിയതിലും ക്ഷമ ചോദിക്കുന്നതായി അമ്മ പ്രസിഡന്റ് ഇന്നസെന്റ് തന്റെ വീട്ടില്‍ വിളിച്ചുചേര്‍ത്ത പത്രസമ്മേളനത്തില്‍ പറഞ്ഞു. നടിയെ ആക്രമിച്ച കേസില്‍ സിനിമ രംഗത്തെ പല ഉന്നതന്മാരും അറസ്റ്റിലായേക്കുമെന്ന സൂചന നിലനില്‍ക്കുമ്പോഴും അവരെ അമ്മ സംരക്ഷിച്ചുവെന്ന ഊഹാപോഹങ്ങള്‍ നിലനില്‍ക്കുകയും ചെയ്യുന്ന ഈ സാഹചര്യത്തില്‍ താന്‍ രാജി വച്ചു എന്ന വാര്‍ത്ത ഇന്നസെന്റ് നിഷേധിച്ചു. അംഗങ്ങളില്‍ ആര് കുറ്റം ചെയ്തിട്ടുണ്ടെങ്കിലും അവരെ സംരക്ഷിക്കുന്ന പ്രശ്നം ഇല്ലെന്നും സംഘടനാ ഇരക്കൊപ്പം ആണെന്നും ഇന്നസെന്റ് അഭിപ്രായപ്പെട്ടു. ദിലീപിനോട് താന്‍ വ്യക്തിപരമായി ഇതില്‍ പങ്കുണ്ടോ എന്ന് ചോദിച്ചുവെന്നും ഇല്ല എന്നായിരുന്നു മറുപടി എന്നും ഇന്നസെന്റ് പറഞ്ഞു. അമ്മപിരിച്ചുവിടണമെന്ന വൈസ് പ്രസിഡന്റ് ഗണേഷ് കുമാറിന്റെ ആവശ്യം ആദ്യം വലിയ വേദനയുണ്ടാക്കിയെന്ന് ഇന്നസെന്റ് പ്രതികരിച്ചു. എന്നാല്‍ ആ കത്തില്‍ ഗണേഷ് പറഞ്ഞിരിക്കുന്ന കാര്യങ്ങളില്‍ കഴമ്പുണ്ട്. അമ്മയിലെ ചില തീരുമാനങ്ങള്‍ നടപ്പിലാക്കുന്നതില്‍ വീഴ്ച വന്നതാണ് അദ്ദേഹത്തെ പ്രകോപിപ്പിച്ചത്. അക്കാര്യം അദ്ദേഹവുമായി സംസാരിച്ച് തെറ്റിദ്ധാരണകള്‍ നീക്കിഎന്നും ഇന്നസെന്റ് പറഞ്ഞു.

related news : സിനിമ ലോകത്തെ വനിതകളെക്കുറിച്ചുള്ള ഇന്നസെന്റിന്റെ പരാമര്‍ശം വിവാദമാകുന്നു

തെരുവില്‍ ഉപേക്ഷിക്കപ്പെട്ട നായ്ക്ക് സംരക്ഷകനായി വാര്‍ഡ് കൗണ്‍സിലര്‍

ഇരിങ്ങാലക്കുട : മനുഷ്യന്റെ നന്ദികേടിനു വീണ്ടും ഒരു ഉദാഹരണംകൂടി. ഉന്നതകുലജാതനായ ജര്‍മ്മന്‍ ഷെപ്പേര്‍ഡ് വര്‍ഗ്ഗത്തില്‍ പെട്ട ഒരു നായ കൂടി യജമാനാല്‍ തെരുവിലേക്കെറിയപ്പെട്ടു. വാര്‍ഡിലെ ആളുകളുടെ പരാതിയെ തുടര്‍ന്ന് നായ്ക്കള്‍ക്ക് വേണ്ടിയുള്ള തൃശൂരിലെ സംഘടനയെ ബന്ധപ്പെട്ടപ്പോള്‍ ഇവര്‍ക്ക് ഷെല്‍ട്ടര്‍ ഇല്ലാത്തതുകൊണ്ട് ഏറ്റെടുക്കാന്‍ കഴിയില്ലെന്നു അറിയിച്ചതിനെ തുടര്‍ന്ന് നായയുടെ സംരക്ഷണം വാര്‍ഡ് കൗണ്‍സിലര്‍ സന്തോഷ് ബോബന്‍ ഏറ്റെടുത്തു. ഇരിങ്ങാലക്കുട മൃഗാശുപത്രിയിലെ ഡോക്ടര്‍മാരുടെ പൂര്‍ണ പിന്തുണയും കൂടി ആയപ്പോള്‍ നായ ഉന്മേഷവാനായി. ഇരിങ്ങാലക്കുട നഗരസഭ കിട്ടമേനോന്‍ റോഡിലാണ് 4 വയസ്സ് പ്രായം വരുന്ന നായ അനാഥനായി എത്തിച്ചേര്‍ന്നത്. ഭക്ഷണം കൊടുത്താല്‍ നായ പോകില്ല എന്ന ഭയം കൊണ്ട് ആരും തന്നെ നായക്ക് ഭക്ഷണം കൊടുക്കാന്‍ തയ്യാറായില്ല . ഓരോ വീടിന്റെയും ഗേറ്റിനു മുന്നില്‍ മഴയും വെയിലും കൊണ്ടാണ് നായ 4 നാള്‍ കഴിഞ്ഞരുന്നത് . നായയുടെ പ്രശ്നം വാര്‍ഡിലെ ജനങ്ങളുടെ ഇടയില്‍ പേടിയും ആവലാതിയും കൂട്ടിയപ്പോള്‍ ആണ് വാര്‍ഡ് കൗണ്‍സിലര്‍ സന്തോഷ് ബോബന്‍ പ്രശ്നത്തില്‍ ഇടപെട്ടത്. ചെറിയ ത്വക്ക് രോഗലക്ഷണമുള്ള നായയെ ബാധിച്ച വലിയ പ്രശ്നം വിശപ്പാണെന്നു മനസ്സിലാക്കിയതോടെ  ഭക്ഷണം നല്‍കുകയും  കനത്ത മഴയില്‍ തണുത്ത് വിറച്ചു നിന്ന നായയെ ഞായറാഴ്ച രാത്രി സന്തോഷ് ബോബന്‍ തന്റെ വീട്ടിലേക്കു കൊണ്ടുവന്നു . ഒരു ദിവസത്തെ ചികിത്സയോടെ തന്നെ നായ ഉന്മേഷവാനായതോടെ കാര്യമായ അസുഖങ്ങള്‍ ഒന്നുംതന്നെ നായക്കില്ല എന്നും സംരക്ഷിക്കാന്‍ ആര് വന്നാലും പൂര്‍ണ ആരോഗ്യവാനായ നായയെ ഏല്‍പ്പിക്കാന്‍ തയ്യറാണെന്നും സന്തോഷ് ബോബന്‍ പറഞ്ഞു. ഇരിങ്ങാലക്കുടയുടെ പല ഭാഗങ്ങളിലും നല്ല ഇനത്തില്‍ പെട്ട ഒരു പാട് നായകള്‍ യജമാനാല്‍ ഉപേക്ഷിക്കപ്പെട്ട നിലയില്‍ കണ്ടെത്തിയിട്ടുണ്ട് . വളര്‍ത്തു നായകളെ പൊതുനിരത്തില്‍ ഉപേക്ഷിക്കുന്നത് കുറ്റകരമാണ് .

പോലീസ് ഉദ്യോഗസ്ഥരും എം.എല്‍.എയും ആളൂര്‍ പോലീസ്സ് സ്റ്റേഷന്‍ അട്ടിമറിക്കാന്‍ ശ്രമിച്ചു : ചെറുവിരല്‍ അനക്കാത്തവര്‍ അവകാശവാദവുമായി ഇപ്പോള്‍ എത്തുന്നത് അപഹാസം – ഉണ്ണിയാടന്‍

ഇരിങ്ങാലക്കുട : ആളൂര്‍ പോലീസ് സ്റ്റേഷന്‍ നഷ്ടപ്പെടുത്തണെമെന്നു ആഗ്രഹിക്കുകയും പ്രവര്‍ത്തിക്കുകയും ചെയ്ത പലരുമാണ് പോലീസ് സ്റ്റേഷന്റെ രണ്ടാം പ്രവര്‍ത്തന ഉദ്ഘാടനം നടത്തിയത് എന്നത് പ്രതിഷേധം അര്‍ഹിക്കുന്നതാണെന്ന് മുന്‍ എം.എല്‍.എ അഡ്വ. തോമസ് ഉണ്ണിയാടന്‍ പത്രസമ്മേളനത്തില്‍ പറഞ്ഞു . തന്റെ കാലത്തു ഉദ്ഘാടനം ചെയ്ത പോലീസ് സ്റ്റേഷന്‍ രണ്ടരമാസക്കാലം പ്രവര്‍ത്തിച്ചതായും ഉണ്ണിയാടന്‍  പറഞ്ഞു. പ്രവര്‍ത്തനം നില്‍ക്കാന്‍ ഉണ്ടായ കാരണം ഇതിനു വേണ്ടി ആവശ്യമായിട്ടുള്ള ഇടപെടലുകള്‍ പോലീസ് ഡിപ്പാര്‍ട്മെന്റിന്റെ ഭാഗത്തു നിന്നോ ഗവര്‍മെന്റിന്റെ ഭാഗത്തു നിന്നോ എം എല്‍ എ യുടെ ഭാഗത്തു നിന്നോ ഉണ്ടാകാത്തതാണ് എന്നും അദ്ദേഹം പറഞ്ഞു . തുറക്കപ്പെട്ട പോലീസ് സ്റ്റേഷന്‍ പ്രവര്‍ത്തനക്ഷമല്ലാത്ത അവസ്ഥയിലേക്ക് എത്തി ചേര്‍ന്നത് എന്നും അടിയന്തരമായ ഇടപെടല്‍ ആവശ്യമാണെന്നും കാണിച്ചു മുഖ്യമന്ത്രിക്കും മറ്റു ബന്ധപ്പെട്ട വകുപ്പുകളിലേക്കും താന്‍ പരാതി നല്‍കിയിരുന്നു എന്നും ഉണ്ണിയാടന്‍ പറഞ്ഞു. എന്നാല്‍ അവരുടെ ഭാഗത്തു നിന്നും ഒരു നടപടിയും ഉണ്ടായിട്ടില്ല.

രണ്ടരമസക്കാലം പ്രവര്‍ത്തിച്ച ആളൂര്‍ പോലീസ് സ്റ്റേഷന്‍ നിര്‍ത്തുവാനോ അല്ലെങ്കില്‍ പ്രവര്‍ത്തനക്ഷമല്ലാതാക്കി മാറ്റണം എന്നുള്ള ചില നിര്‍ദേശങ്ങള്‍ എസ് പി അടക്കമുള്ള ജില്ലയിലെ പോലീസിന്റെ ഉന്നത ഉദ്യോഗസ്ഥരില്‍ നിന്നും ഉണ്ടായതായി ഉണ്ണിയാടന്‍ പറഞ്ഞു. ബോധപൂര്‍വം പോലീസ് സ്റ്റേഷന്‍ ഇല്ലാതാകുന്നതിനുള്ള ശ്രമങ്ങള്‍ ചിലരുടെ ഭാഗത്തു നിന്നും ഉണ്ടായതായി അനുഭവപ്പെട്ടപ്പോള്‍ ഹൈകോടതിയില്‍ താന്‍ ഒ.പി. ഫയല്‍ ചെയുകയും കോടതി ഇടപെടലുകള്‍ വന്നപ്പോള്‍ കാര്യങ്ങള്‍ക്കു മാറ്റം ഉണ്ടാവുകയും ഇപ്പോള്‍ പോലീസ് സ്റ്റേഷന്‍ വീണ്ടും പ്രവര്‍ത്തിക്കുകയും ചെയ്തു. കേവലം ചുരുങ്ങിയ ദിവസങ്ങള്‍ കൊണ്ട് വകുപ്പ് തലത്തില്‍ എടുക്കാവുന്ന ഒരു നടപടി ക്രമമായ നോട്ടിഫിക്കേഷന്‍ ഇറക്കാന്‍ ഒരു വര്‍ഷം എടുത്തത് ഈ പോലീസ് സ്റ്റേഷന്റെ പ്രവര്‍ത്തനം നല്ല പോലെ കൊണ്ടുപോകണമെന്ന് ആഗ്രഹിക്കുന്നവരല്ല എന്നും ഒരു ചെറുവിരല്‍ പോലും പ്രൊഫ. കെ യു അരുണന്‍ എം എല്‍ എ ഈ പോലീസ് സ്റ്റേഷന്റെ പ്രവര്‍ത്തനങ്ങള്‍ക്കു വേണ്ടി ചെയ്തിട്ടില്ല എന്നും ഉണ്ണിയാടന്‍ പറഞ്ഞു. ചില പോലീസ് ഉദ്യോഗസ്ഥമാരും എം എല്‍ എ യും ഗവര്‍ണ്മെന്റും ഈ പോലീസ് സ്റ്റേഷന്‍ ഇല്ലാതാക്കുന്നതിന് വേണ്ടി ഉള്ള ശ്രമത്തത്തിലായിരുന്നു എന്നും ഇത് തെളിയിക്കുന്നു , ഇപ്പോള്‍ എം എല്‍ എ അല്ലെങ്കിലും പോലും നാടിനോടുള്ള കടപ്പാട് മൂലം ആണ് താന്‍ പോലീസ് സ്റ്റേഷന്‍ തുറക്കുവാന്‍ കോടതിയെ സമീപിച്ചത് എന്നും അദ്ദേഹം പറഞ്ഞു. 15 വര്‍ഷം ഈ നാടിനെ പ്രതിനിധീകരിച്ച വ്യക്തിയാണ് താന്‍ ഈ നാടിനു ഒന്നും നഷ്ടപ്പെടുന്നത് സഹിക്കാന്‍ പറ്റുന്ന ഒന്നല്ല . ഒരുപാട് ബുദ്ധിമുട്ടുകള്‍ സഹിച്ചാണ് ഇരിങ്ങാലക്കുടക്കു വേണ്ടി ഓരോന്നായി നേടിയെടുത്തത്ത് അത് നഷ്ടപ്പെടുന്നത് ഹൃദയവേദന ഉണ്ടാക്കുന്ന ഒന്നാണ് എന്നും അദ്ദേഹം പറഞ്ഞു. താന്‍ നേടിയെടുത്ത പലതും പൂര്‍ത്തീകരിക്കാന്‍ വേണ്ടിയുള്ള നടപടിക്രമങ്ങള്‍ ഇപ്പോള്‍ ഉണ്ടാകുന്നിലെന്നും അദ്ദേഹം പറഞ്ഞു. കിട്ടിയ പോലീസ് സ്റ്റേഷന്‍ നഷ്ടപെടുത്തുവാനുള്ള ശ്രമങ്ങള്‍ നടത്തിയ ആളുകള്‍ പിന്നീട് രണ്ടാം പ്രവര്‍ത്തന ഉദ്ഘാടനത്തിന്റെ മാമാങ്കം നടത്തിയത് എന്തിനെന്നും അദ്ദേഹം ചോദിച്ചു. താന്‍ ഹൈകോടതിയില്‍ കേസ് കൊടുത്തില്ലെങ്കില്‍ ആളൂര്‍ പോലീസ് സ്റ്റേഷന്‍ എന്നെന്നേക്കുമായി നഷ്ടപെട്ടുപോകുമായിരുന്നു എന്നും അദ്ദേഹം പറഞ്ഞു. പോലീസ് സ്റ്റേഷന്‍ തങ്ങളാണ് കൊണ്ടുവന്നത് എന്ന രീതിയില്‍ വീമ്പിളക്കുന്ന പുതിയ എം എല്‍ എ യുടെ പ്രവര്‍ത്തനശൈലി ശരിയല്ലെന്നും അദ്ദേഹം കുറ്റപ്പെടുത്തി.

ഊര്‍ജ്ജിത പൊതുശുചികരണത്തിന് ആഹ്വാനം നല്‍ക്കുന്ന നഗരസഭക്ക് മുന്നിലെ ‘കൊതുക് വളര്‍ത്തു കേന്ദ്രം’

ഇരിങ്ങാലക്കുട : പകര്‍ച്ചപ്പനി നിയന്ത്രണ വിധേയമാക്കുന്നതിനും പനിമരണങ്ങള്‍ തടയുന്നതിന്റെ ഭാഗമായി ഊർജ്ജിത പൊതുശുചികരണം, കൊതുക് നിവാരണം, ബോധവത്കരണ പ്രവര്‍ത്തനങ്ങള്‍ നഗരസഭയുടെ ഭാഗമായി ഇപ്പോള്‍ തകൃതിയായി നടക്കുമ്പോള്‍ പോലും നഗരസഭ ആസ്ഥാനമന്ദിരത്തിന് മുന്നില്‍ കൊതുകുകള്‍ക്ക് വളരുവാനുള്ള സാഹചര്യം നഗരസഭ ഒരുക്കികൊടുക്കുന്നു. നഗരസഭ മൈതാനത്ത് കൂട്ടിയിട്ടിരിക്കുന്ന ടാര്‍ വീപ്പകളില്‍ കെട്ടികിടക്കുന്ന മഴവെള്ളത്തില്‍ കൊതുകുകള്‍ക്ക് വളരുവാനുള്ള സാഹചര്യം ഉണ്ട്. ഇത്തരം വീപ്പകളില്‍ വെള്ളം കെട്ടിക്കിടന്ന അവസ്ഥ ഉണ്ടാകരുത് എന്ന് പൊതുജനങ്ങള്‍ക്ക് മുന്നറിയിപ്പ് നല്‍കുന്ന നഗരസഭ തന്നെ ഈ കാര്യങ്ങള്‍ ശ്രദ്ധിക്കുന്നില്ല എന്നതാണ് വിരോധാഭാസം. കഴിഞ്ഞ മൂന്ന് ദിവസങ്ങളിലായി നഗരസഭയുടെ നേതൃത്വത്തില്‍ ഊര്‍ജ്ജിത പൊതുശുചികരണ പ്രവര്‍ത്തനങ്ങള്‍ നടത്തി കഴിഞ്ഞപ്പോളും , കണ്ണിനുമുന്നിലെ ‘കൊതുക് വളര്‍ത്തു കേന്ദ്രം’ അത് പോലെ തുടരുന്നു .

മഴക്കാലമായതോടെ സംസ്ഥാന പാതകള്‍ തകര്‍ന്നു തുടങ്ങി

ഇരിങ്ങാലക്കുട : കോടികള്‍ ചിലവാക്കി മെക്കാര്‍ഡാം ടാറിങ് നടത്തി പണി കഴിപ്പിച്ച ഇരിങ്ങാലക്കുട വഴി കടന്നു പോകുന്ന പോട്ട – മൂന്നുപീടിക സംസ്ഥാന പാത മഴക്കാലമായതോടെ വീണ്ടും തകര്‍ന്നു തുടങ്ങി . കഴിഞ്ഞ ഗവര്‍ന്മെന്റിന്റെ കാലത്ത് റീടാറിങ് നടത്തിയതോടെയാണ് സംസ്ഥാന പാതയുടെ ഗതികേട് തുടങ്ങിയത് . നിലവാരമില്ലാത്ത ടാറിങ് ആണ് ഇതെന്നും വന്‍ അഴിമതി ഇതിനു പുറകില്‍ ഉണ്ടെന്നും അന്ന് ആരോപണം ഉണ്ടായിരുന്നു. റീടാറിങ് ചെയ്ത പ്രതലം ആളൂര്‍ മുതല്‍ ഇരിങ്ങാലക്കുട വരെ ഭൂരിഭാഗം ഭാഗത്തും അടര്‍ന്നു പോയി. ഇതിനു താഴെ പത്ത് വര്‍ഷം മുന്‍പ് ആദ്യമായി ചെയ്ത ബി എം ബി സി ടാറിങ് ഒട്ടും തന്നെ കേടുകൂടാതെ നിലനില്‍ക്കുന്നതും ഇപ്പോള്‍ കാണാം . പുതിയ ഗവര്‍ണ്മെന്റ് വന്നതിനു ശേഷം റോഡിന്‍റെ ദുരവസ്ഥ കണ്ടു മാസങ്ങള്‍ക്കു മുന്‍പ് പാച്ച് വര്‍ക്ക് നടത്തിയിരുന്നു . എന്നാല്‍ മഴക്കാലം ആരംഭിച്ചു മാസ്സങ്ങള്‍ക്കകം തന്നെ റോഡ് വിണ്ടുകീറി പ്രതലങ്ങളില്‍ ഗര്‍ത്തങ്ങള്‍ രൂപപ്പെട്ടു തുടങ്ങി . പലയിടത്തും റോഡില്‍ ടാര്‍ ഇളകി പോയി മെറ്റല്‍ പുറത്തു വന്ന അവസ്ഥയില്‍ ആണ് . ഇരുചക്ര വാഹനങ്ങള്‍ ഉള്‍പ്പെടയുള്ളവര്‍ക്ക് ഇത് ഭീഷണി ആകുന്നുണ്ട് .

Top
Close
Menu Title