News

Category: Latest

കോണ്‍ഗ്രസ്സുകാര്‍ സമുദായ സംഘടന ഭാരവാഹികള്‍ ആകണം -ഡി സി സി പ്രസിഡന്റ് ടി എന്‍ പ്രതാപന്‍

ഇരിങ്ങാലക്കുട : എന്‍ എസ് എസ്, എസ് എന്‍ ഡി പി, പള്ളി കമ്മിറ്റികള്‍ തുടങ്ങിയ സമുദായ സംഘടനകളില്‍ കോണ്‍ഗ്രസ്സ് ബൂത്ത് പ്രസിഡന്റുമാര്‍ നിര്‍ബന്ധമായി പങ്കെടുക്കുകയും നേതൃസ്ഥാനങ്ങള്‍ ഏറ്റെടുക്കുകയും വേണമെന്ന് ഡി സി സി പ്രസിഡന്റ് ടി എന്‍ പ്രതാപന്‍ ആവശ്യപ്പെട്ടു. പുതിയതായി തിരഞ്ഞെടുക്കപ്പെട്ട ബൂത്ത് പ്രസിഡന്റുമാര്‍ക് ഇരിങ്ങാലക്കുട ബ്ലോക്ക് കോണ്‍ഗ്രസ്സ് (ഐ) നല്‍കിയ സ്വീകരണ സമ്മേളനം മുന്‍സിപ്പല്‍ ടൗണ്‍ ഹാളില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം . സമുദായ സംഘടനകള്‍ ഒരു പാര്‍ട്ടിയുടെയും സ്വകാര്യ സ്വത്തല്ലെന്നും അദ്ദേഹം കൂടി ചേര്‍ത്തു. താഴെ തട്ടിലുള്ള രാഷ്ട്രീയ പ്രവര്‍ത്തകര്‍ അധ്വാനിക്കുന്നതിന്റെ ഫലം മേലെ തട്ടിലുള്ള നേതാക്കള്‍ വിയര്‍പ്പൊഴുക്കാതെ ആസ്വദിക്കുന്ന രീതി ഇനി തൃശൂര്‍ ജില്ലയില്‍ വച്ചു പൊറുപ്പിക്കില്ലെന്നും ബൂത്ത് പ്രസിഡന്റുമാര്‍ അറിയാതെ സംഘടിപ്പിക്കുന്ന ഒരു കോണ്‍ഗ്രസ്സ് പരിപാടിക്കും ഡി സി സി പ്രസിഡന്റ് എന്ന നിലയില്‍ താന്‍ ഇനി പങ്കെടുക്കില്ല എന്ന് ടി എന്‍ പ്രതാപന്‍ പറഞ്ഞപ്പോള്‍ പിന്തുണയേകി സദസില്‍ നിന്നും വന്‍കരഘോഷം ഉയര്‍ന്നു . എല്ലാ ബൂത്തുകളിലെയും പ്രധാന കവലകളില്‍ കൊടിമരം നാട്ടി വാര്‍ത്താബോര്‍ഡ് സ്ഥാപിക്കണമെന്നും ആദ്യമായി ബൂത്ത് പ്രസിഡന്റുമാര്‍ക് ഫോട്ടോ പതിച്ച ഐഡന്റിറ്റി കാര്‍ഡ് നല്‍കുമെന്നും അദ്ദേഹം പറഞ്ഞു.

ജില്ലയില്‍ ഇരിങ്ങാലക്കുടയൊഴിച്ചു എല്ലായിടത്തും നിയോജക മണ്ഡലടിസ്ഥാനത്തിലാണ് നേതൃത്വ സമ്മേളനം വിളിച്ചു ചേര്‍ത്തത് എന്നും ഇവിടെ മാത്രം കാട്ടൂര്‍ ബ്ലോക്കിനെ ഒഴിച്ച് നിര്‍ത്തിയതിന്റെ രഹസ്യം ബ്ലോക്ക് പ്രസിഡന്റുമാരായ ടി വി ചാര്‍ളിക്കും, വര്‍ഗീസ് പുത്തനങ്ങാടിക്കും മാത്രമേ അറിയൂ എന്ന് ഡി സി സി പ്രസിഡന്റ് പരസ്യമായി പറഞ്ഞു തന്റെ നീരസം പ്രകടിപ്പിക്കുകയും ചെയ്തത് നേതൃത്വ സമ്മേളനത്തില്‍ പോലും ഗ്രുപ്പിസം വിട്ടു മാറിയിട്ടില്ല എന്നുള്ളതിന് തെളിവായി . ഐ ഗ്രുപ്പുകാരെ മനഃപൂര്‍വം മാറ്റി നിര്‍ത്താനാണ് നിയോജക മണ്ഡല തലത്തില്‍ ഒരു ആക്ഷേപം ഉണ്ട് . കെ പി സി സി ജനറല്‍ സെക്രട്ടറി എം പി ജാക്‌സന്റെ അസാന്നിധ്യം ചടങ്ങില്‍ ശ്രദ്ധിക്കപ്പെട്ടു .

ബ്ലോക്ക് കോണ്‍ഗ്രസ്സ് പ്രസിഡന്റ് ടി വി ചാര്‍ളി അധ്യക്ഷനായി. ജില്ലാ കോണ്‍ഗ്രസ്സ് നേതാക്കളായ ജോസഫ് ചാലിശേരി , ടി വി ചന്ദ്രമോഹന്‍ , കെ വി ദാസന്‍ , ടി വി ജോണ്‍സന്‍ ഡി സി സി സെക്രട്ടറിമാരായ ആന്റോ പെരുമ്പിള്ളി , കെ കെ ശോഭനന്‍, സോണിയ ഗിരി, നഗരസഭാ അധ്യക്ഷ നിമ്യ ഷിജു നിയോജക മണ്ഡലം പ്രസിഡന്റ് ജോസഫ് ചാക്കോ എന്നിവര്‍ ചടങ്ങില്‍ പങ്കെടുത്തു .

 

ഭഗത് സിംഗ് ദിനാചരണം സംഘടിപ്പിച്ചു

ഇരിങ്ങാലക്കുട : സാമ്രാജ്യത്വ വിരുദ്ധ പോരാട്ടങ്ങളില്‍ യുവജനങ്ങള്‍ക്കു എന്നും ആവേശമായ സഖാവ് ഭഗത് സിംഗ്, രാജ്‌ഗുരു ,സുഖ്‌ദേവ് എന്നിവരുടെ രക്തസാക്ഷി ദിനമായ മാര്‍ച്ച് 23 നു ആര്‍ വൈ എഫ് ഐ സംസ്ഥാനകമ്മിറ്റി പഠന ക്യാമ്പും പ്രകടനവും പൊതുയോഗവും സംഘടിപ്പിച്ചു .പഠനക്യാമ്പ് സി പി ഐ (എം ല്‍ ) സംസ്ഥാന സെക്രട്ടറി എം കെ ദാസന്‍ ഉദ്ഘാടനം ചെയ്തു. സലിം ദിവാകരന്‍ ക്ലാസെടുത്തു.സംസ്ഥാന സെക്രട്ടറി എന്‍ ഡി വേണു ,ടി വി മഹേഷ് എന്നിവര്‍ ചടങ്ങില്‍ സംസാരിച്ചു. പ്രകടനത്തിന് ഡാനി ഡേവിസ് ,എന്‍ കെ അക്ബര്‍ , കെ ബി രാകേഷ് , വി വി പ്രസാദ് എന്നിവര്‍ നേതൃത്വം നല്‍കി . ബസ് സ്റ്റാന്‍ഡ് പരിസരത്ത് നടന്ന പൊതുയോഗം രാജേഷ് അപ്പാട്ട് ഉദ്ഘാടനം ചെയ്തു

യൂസഫലി കേച്ചേരി കൃഷ്ണഗീതികളുടെ പ്രിയകവി – തപസ്യ

ഇരിങ്ങാലക്കുട : കവി യൂസഫലി കേച്ചേരിയെ തപസ്യ കലാസാഹിത്യവേദി അനുസ്മരിച്ചു. മലയാള ചലച്ചിത്രഗാനശാഖയ്ക്കും, കാവ്യഭൂമികയ്ക്കും അനുപമമായ സംഭാവനകള്‍ നല്‍കിയ യൂസഫലി കേച്ചേരി നിറഞ്ഞ കൃഷ്ണഭക്തനായിരുന്നുവെന്നും, അദ്ദേഹത്തിന്റെ ഗാനങ്ങള്‍ കൃഷ്ണഭാവമുഖരിതങ്ങളായിരുന്നുവെന്നും, തപസ്യ കലാസാഹിത്യവേദി അഭിപ്രായപ്പെട്ടു.സാഹിത്യ രംഗത്ത് പക്ഷംപിടിക്കലുകളുടെ രാഷ്ട്രീയജടിലതകളില്ലാതെ, മാനവികതയെയും, പ്രകൃതിയുടെ ലാളനങ്ങളെയും, സംഗീതപ്രധാനമായ ഭക്തിഭാവങ്ങളെയും തന്റെ ഗാനങ്ങളിലും കവിതകളിലുമാവാഹിച്ച അനുഗ്രഹീത പ്രതിഭാധനനായിരുന്നു അദ്ദേഹം. തപസ്യയുടെ വേദികളില്‍ അനുഗ്രഹവര്‍ഷമായും, മാര്‍ഗദീപമായും യൂസഫലി കേച്ചേരി ഉണ്ടായിരുന്നുവെന്ന് തപസ്യ കലാസാഹിത്യവേദി ഇരിങ്ങാലക്കുട ജില്ലാസമിതി കാര്യാലയത്തില്‍ ചേര്‍ന്ന അനുസ്മരണയോഗത്തില്‍ അവതരിപ്പിച്ച പ്രമേയത്തില്‍ പ്രസ്താവിച്ചു. അനുസ്മരണയോഗത്തില്‍ സംസ്ഥാന സംഘടനാസെക്രട്ടറി പി. ഉണ്ണികൃഷ്ണന്‍, സഹസംഘടനാസെക്രട്ടറി സി.സി. സുരേഷ്, ശ്രീജിത്ത് മൂത്തേടത്ത് പി.വിജയകുമാര്‍, എ.എസ്.സതീശന്‍, ഇ.കെ.കേശവന്‍, കെ.ഉണ്ണികൃഷ്ണന്‍, രഞ്ചിത്ത് മേനോന്‍ തുടങ്ങിയവര്‍ പങ്കെടുത്തു.

ഇരിങ്ങാലക്കുട സഹകരണ ആശുപത്രി പ്രസിഡന്റ് എം പി ജാക്‌സന് ഹഡ്‌കോയുടെ അറസ്റ്റ് വാറന്റ്

ഇരിങ്ങാലക്കുട : കേന്ദ്ര ധനകാര്യ സ്ഥാപനമായ ഹഡ്‌കോയില്‍നിന്നും വായ്പയെടുത്ത് തിരിച്ചടയ്ക്കാത്തതിന്റെ പേരില്‍ ഇരിങ്ങാലക്കുട സഹകരണ ആശുപത്രി പ്രസിഡന്റ് എം പി ജാക്‌സന് ഹഡ്‌കോയുടെ അറസ്റ്റ് വാറന്റ് . വ്യാഴാഴ്ച ഹഡ്‌കോയുടെ എറണാകുളം ഡെപ്യൂട്ടി ജനറല്‍ മാനേജര്‍ (ലോ) റോഹിന്‍ജെത്ത് ഇരിങ്ങാലക്കുട പോലീസ് സ്റ്റേഷനില്‍ നേരിട്ടെത്തി പോലീസിന് വാറന്റ് കൈമാറുകയായിരുന്നു. ഏപ്രില്‍ 10ന് മുന്‍പ് എറണാകുളം ഡെബിറ്റ്‌സ് റിക്കവറി ട്രിബ്യൂണല്‍ മുന്നാക്ക ഹാജരാകണമെന്നും അല്ലെങ്കില്‍ അറസ്റ്റ് ഉണ്ടകുമെന്നാണ് .1997ല്‍ എം പി ജാക്‌സന്‍ പ്രസിഡന്റായ ഇരിങ്ങാലക്കുട സഹകരണ ആശുപത്രി ഹഡ്‌കോയില്‍നിന്നും വായ്പയെടുത്ത 5.31 കോടി തിരികെ അടയ്ക്കാത്തതിന്റെ പേരില്‍ മുതലും പലിശയും അടക്കം 20കോടിയിലധികം ആയതിന്റെ അടിസ്ഥാനത്തില്‍ ഡെബിറ്റ്‌സ് റിക്കവറി ട്രിബ്യൂണല്‍ ഉത്തരവ് പ്രകാരം ആസ്​പത്രി ലേലം ചെയ്യാന്‍ തീരുമാനിച്ചിരുന്നു . എന്നാല്‍ ലേലം ചെയ്യാനുള്ള നടപടി നീട്ടിവെച്ചു. എന്നിട്ടും പലകാരണങ്ങള്‍ നിരത്തി വായ്പയെടുത്ത് തിരിച്ചടയ്ക്കാത്തതിന്റെ പേരിലാണ് ഇപ്പോള്‍ ആശുപത്രി പ്രസിഡന്റ് എം പി ജാക്‌സന് ഹഡ്‌കോയുടെ അറസ്റ്റ് വാറന്റ്. മുതിര്‍ന്ന കോണ്‍ഗ്രസ് നേതാവും കെ പി സി സി ജനറല്‍ സെക്രട്ടറി കൂടിയാണ് എം പി ജാക്‌സന്‍.

ബാങ്കോക്കിലെ മൊയ് തായ് മാര്‍ഷല്‍ ആര്‍ട്സ് ഗെയിംസ് ആന്‍ഡ് ഫെസ്റ്റിവലില്‍ ഇന്ത്യന്‍ പതാക പാറിച്ച് കരൂപ്പടന്ന സ്വദേശി

വെള്ളാങ്ങല്ലൂര്‍: ബാങ്കോക്കില്‍ നടന്ന രണ്ടാമത് മൊയ് തായ് മാര്‍ഷല്‍ ആര്‍ട്സ് ഗെയിംസ് ആന്‍ഡ് ഫെസ്റ്റിവലില്‍ ഇന്ത്യന്‍ പതാക പാറിയപ്പോള്‍ ആ വിജയത്തിനു പിന്നില്‍ കരൂപ്പടന്ന സ്വദേശിയും ഉണ്ടായിരുന്നു. കരൂപ്പടന്ന അറക്കല്‍ വീട്ടില്‍ മുഹമ്മദ് നജീബിന്റെയും ഷാഹിദയുടെയും മകന്‍ മുഹമ്മദ് ഷുഹൈബാണ് അന്താരാഷ്ട്ര തലത്തില്‍ ഇന്ത്യന്‍ കൊടി പാറിച്ചത്. 53 രാജ്യങ്ങളില്‍ നിന്നുള്ള മത്സരാര്‍ത്ഥികള്‍ ഫെസ്റ്റിവലില്‍ പങ്കെടുത്തു. 75 കിലോ വിഭാഗം ഫൈനലില്‍ വെള്ളി മെഡലാണ് മുഹമ്മദ് ഷുഹൈബിന് ലഭിച്ചത്. ഫൈനലില്‍ ഇറ്റലി, ബ്രസീല്‍ എന്നീ രാജ്യങ്ങളില്‍ നിന്നുള്ളവരെ പരാജയപ്പെടുത്തിയ ഷുഹൈബ് ഫ്രാന്‍സില്‍ നിന്നുള്ള മത്സരാര്‍ത്ഥിയോട് രണ്ട് പോയന്റ് വ്യത്യാസത്തിലാണ് പരാജയപ്പെട്ടത്. ഫൈനലില്‍ ഫ്രാന്‍സ് സ്വര്‍ണ്ണവും ഇന്ത്യ വെള്ളിയും ബ്രസീല്‍ വെങ്കലവും നേടി. കഴിഞ്ഞ നവംബറില്‍ ഗുജറാത്തിലെ സൂറത്തില്‍ നടന്ന ദേശീയ ചാമ്പ്യന്‍ഷിപ്പില്‍ ദേശീയ ചാമ്പ്യനായിരുന്നു ഷുഹൈബ്. 19 വയസ്സുകാരനായ ഷുഹൈബ് നാലുവര്‍ഷമായി കോണത്തുകുന്ന് മസ്കുലര്‍ ഫിറ്റ്നസ് ആന്‍ഡ് ആര്‍ട്സ് ക്ലബ്ബില്‍ പരിശീലിക്കുന്നു. അഷ്ക്കര്‍ ബഷീര്‍ ആണ് ട്രെയിനര്‍. ദിവസേന അഞ്ചു മണിക്കൂറോളം പരിശീലനം നടത്തുന്ന ഷുഹൈബ് രണ്ടു വര്‍ഷം മുമ്പുതന്നെ മൊയ് തായ് ബ്ലാക്ക് ബെല്‍ട്ട് കരസ്ഥമാക്കി. കൂടാതെ കഴിഞ്ഞ രണ്ട് തവണ ദേശീയ ചാമ്പ്യനായിരുന്നു.

വിദ്യാര്‍ത്ഥികളെ മാനസികമായി തളര്‍ത്തുന്ന രീതിയില്‍ ചോദ്യപേപ്പര്‍ തയ്യാറാക്കുന്നതില്‍ കെ.പി.എസ്.ടി.എ പ്രതിഷേധിച്ചു

ഇരിങ്ങാലക്കുട : വിദ്യാര്‍ത്ഥികളെ മാനസികമായി തളര്‍ത്തുന്ന രീതിയില്‍ ചോദ്യപേപ്പര്‍ തയ്യാറാക്കുന്നതില്‍ ഇരിങ്ങാലക്കുട ഉപജില്ല കെ.പി.എസ്.ടി.എ കമ്മിറ്റി പ്രതിഷേധിച്ചു. പത്താംതരം മാത്ത്‌സ്, ഹയര്‍ സെക്കന്ററി ഒന്നാം വര്‍ഷ കെമിസ്ട്രി, രണ്ടാംവര്‍ഷ മാത്ത്‌സ് എന്നിവ വിദ്യാര്‍ത്ഥികളെ വളരെയേറെ ബുദ്ധിമുട്ടിലാക്കി. വി.എച്ച്.എസ്.ഇ ലൈവ് സ്റ്റോക്ക് മാനേജ്‌മെന്റ് വിദ്യാര്‍ത്ഥികള്‍ക്കായി ബി.വി.എസ്.സിയിലേക്ക് കഴിഞ്ഞ സര്‍ക്കാര്‍ ഏര്‍പ്പെടുത്തിയിരുന്ന സംവരണസീറ്റുകള്‍ എടുത്തുകളയുവാനുള്ള നീക്കം ഉപേക്ഷിക്കണമെന്ന് യോഗം സര്‍ക്കാറിനോട് ആവശ്യപ്പെട്ടു. സമയദൈര്‍ഘ്യം വര്‍ദ്ധിപ്പിച്ച് ഹയര്‍ സെക്കന്ററി മേഖലയെ തകര്‍ക്കരുതെന്നും യോഗം ആവശ്യപ്പെട്ടു. പ്രസിഡന്റ് എ.ജി അനില്‍കുമാര്‍ അദ്ധ്യക്ഷനായിരുന്നു. സെക്രട്ടറി ജിനേഷ് എ, ജില്ലാ പ്രസിഡന്റ് സി.എച്ച്. അബ്ദുള്‍ ഹഖ്, ഷാജി എം.ജെ, സുശീല്‍, നിക്‌സന്‍ പോള്‍, ശങ്കരനുണ്ണി, കമലം എന്നിവര്‍ സംസാരിച്ചു.

കൊട്ടിലായിക്കലിലെ കൈമള്‍ കുളം വൃത്തിയാകുന്നു

ഇരിങ്ങാലക്കുട : കൂടല്‍മാണിക്യം കൊട്ടിലയ്‌ക്കല്‍ പറമ്പിലെ ദേവസ്വം ഓഫീസിനോട് ചേര്‍ന്നുള്ള കൈമള്‍ കുളം വൃത്തിയാകുന്നു. അരനൂറ്റാണ്ടിലധികമായി ഈ കുളം വൃത്തിയാക്കിയിട്ട് . ഉത്സവം അടുക്കുന്നതോടെ ഇവിടെ കെട്ടാറുള്ള ആനകള്‍ക്കുള്ള വെള്ളത്തിന്റെ പ്രധാന സ്രോതസാക്കി മാറ്റുവാനാണ് ഈ കുളം ഇപ്പോള്‍ യുദ്ധകാല അടിസ്ഥാനത്തില്‍ വൃത്തിയാക്കുന്നത് എന്ന് ദേവസ്വം ചെയര്‍മാന്‍ പനമ്പിള്ളി രാഘവമേനോന്‍ പറഞ്ഞു. കൊട്ടിലയ്ക്കല്‍ പറമ്പില്‍ നിരവധി കുളങ്ങള്‍ ഉണ്ടായിരുന്നു എന്നാല്‍ കാലാന്തരത്തില്‍ എല്ലാം മൂടപെടുകയാണുണ്ടായത്. കൈമള്‍ കുളവും മാസങ്ങള്‍ക്കു മുന്‍പ് പകുതി മൂടിയ അവസ്ഥയിലായിരുന്നു. ദേവസ്വം ആനയായ മേഘാര്‍ജ്ജുനനെ ഇതിനടുത്താണ് തളച്ചിടാറുള്ളത് .ആനയുടെ തീറ്റയുടെ അവശിഷ്ടവും മറ്റും കൈമള്‍ കുളത്തില്‍ തളളി പകുതി മൂടിയ നിലയിലായിരുന്നു. ഭക്തജനങ്ങളുടെ പരാതിയെ തുടര്‍ന്നു അന്ന് ഇത് നീക്കം ചെയ്തിരുന്നു . ഇപ്പോള്‍ വെള്ളത്തിന്റെ ലഭ്യത കുറഞ്ഞത് മൂലം ഈ കുളം നേരെയാക്കി എടുക്കുവാന്‍ ദേവസ്വം കമ്മിറ്റി തീരുമാനിക്കുകയായിരുന്നു .

നരസിംഹാവതാരം കഥകളി അരങ്ങേറി

ഇരിങ്ങാലക്കുട : കാരുകളങ്ങര നരസിംഹസ്വാമി ക്ഷേത്രോത്സവത്തിന്റെ ഭാഗമായ വലിയ വിളക്കു ദിവസം നരസിംഹാവതാരം കഥകളി അരങ്ങിലെത്തിച്ചു.കാരുകളങ്ങര സ്വദേശിയായ ടി.വേണുഗോപാല്‍ രചിച്ചു ചിട്ടപ്പെടുത്തിയ കഥകളി കാരുകളങ്ങര കളിയരങ്ങാണ് വേദിയിലെത്തിച്ചത്. ഹിരണ്യകശിപുവായി കലാനിലയം മനോജ്, പ്രഹ്ലാദ നായി തീമതി ജയന്തി ദേവരാജ് , ശുക്രനായി  ബിജു ഭാസ്കര്‍ , നരസിംഹമായി ഇ.കെ.വിനോദ് വാര്യര്‍ ലക്ഷ്മിയായി മാസ്റ്റര്‍ശരത്തും അരങ്ങിലെത്തി. കലാമണ്ഡലം സുധിഷ്, കലാനിലയം ദീപക്, കലാനിലയം മണികണ്ഠന്‍ എന്നിവര്‍ സംഗീതവും വാദ്യവും ഒരുക്കി. വേഷമൊരുക്കുവാന്‍ കലാനിലയം പ്രശാന്ത്, കലാനിലയം നിഖില്‍ എന്നിവരും ഉണ്ടായിരുന്നു.

തിരാത്ത് കുളത്തില്‍ സാമൂഹ്യ വിരുദ്ധര്‍ വിഷം കലക്കി : മീനുകള്‍ ചത്തുപൊങ്ങി

എടതിരിഞ്ഞി : എച്ച് ഡി പി സമാജം സ്കൂളിന് സമീപത്തെ തിരാത്ത് കുളത്തില്‍ ലോക ജലദിനം ആചരിച്ച ദിനത്തില്‍ സാമൂഹ്യ വിരുദ്ധര്‍ വിഷം കലക്കിയത് മൂലം ഇവിടെ വളര്‍ത്തിയിരുന്ന നിരവധി മീനുകള്‍ ചത്തു പൊങ്ങി .  മൂവായിരത്തിലധികം മീനുകള്‍ ഈ കുളത്തില്‍ വളര്‍ത്തിയിരുന്നതായി സെക്രട്ടറി കെ ബി ദിനചന്ദ്രന്‍ പറഞ്ഞു. പഞ്ചായത്തിന്റെ മീന്‍ വളര്‍ത്തല്‍ പദ്ധതി പ്രകാരം ഗ്രസ്സ്കാര്‍പ് , കട്ടള ,  മൃഗാള്‍ എന്നി മീനുകള്‍ പൂര്‍ണ്ണ വളര്‍ച്ച എത്തിയ നിലയിലായിരുന്നു .  ഇതിനു മുന്‍പും അനധികൃതമായി മീന്‍ പിടിക്കാന്‍ ശ്രമിച്ചിരുന്നവരെ സമാജം വിലക്കിയിരുന്നതായി സമാജം പ്രസിഡന്റ് കണ്ടേക്കാട്ടില്‍ ഭരതന്‍ പറഞ്ഞു .  ഈ നീചമായ പ്രവര്‍ത്തി ചെയ്തവരെ കണ്ടുപിടിച്ചു സമൂഹത്തിനു മുന്‍പില്‍ തുറന്നു
കാണിക്കണമെന്നും അദ്ദേഹം പറഞ്ഞു.  സമാജം വക ഇവിടെ നീരിക്ഷണ ക്യാമറകള്‍ ഉണ്ടെങ്കിലും കുളിക്കടവ് ആയതിനാല്‍ ഈ ഭാഗത്തു ക്യാമറ പ്രവര്‍ത്തിപ്പിച്ചിരുന്നില്ല. വേനലവധികാലത്തു വിദ്യാര്‍ത്ഥികളെ ഇവിടെ നീന്തല്‍ പഠിപ്പിക്കാനുള്ള പദ്ധതികളുമായി മുന്നോട്ട് പോകുകയായിരുന്നു സ്കൂള്‍ അധികൃതര്‍ . എത്രയും പെട്ടെന്നു ഈ ഹീനകൃത്യം ചെയ്തവരെ സമൂഹത്തിനു മുന്‍പില്‍ കൊണ്ടുവരണമെന്നും പടിയൂര്‍ പഞ്ചായത്തു പ്രസിഡന്റ് കെ സി ബിജു പറഞ്ഞു.

മൊബെലില്‍ യുവതിയുടെ ചിത്രം പകര്‍ത്താന്‍ ശ്രമിച്ച യുവാവ് പോലിസ് കസ്റ്റഡിയില്‍

ഇരിങ്ങാലക്കുട : മൊബെലില്‍ യുവതിയുടെ വിഡിയോ പകര്‍ത്താന്‍ ശ്രമിച്ച യുവാവിനെ കടക്കാര്‍ തടഞ്ഞുവെച്ച് പോലിസിന് കൈമാറി. ഊരകം വെറ്റില മൂല സ്വദേശി കണ്ണനെയാണ് ഇരിങ്ങാലക്കുട പോലിസ് കസ്റ്റഡിയിലെടുത്തത്. ബുധനാഴ്ച വൈകീട്ട് ഇരിങ്ങാലക്കുട ഈവനിംഗ് മാര്‍ക്കറ്റില്‍ വെച്ചായിരുന്നു സംഭവം. മിന്‍ വാങ്ങാനെത്തിയതായിരുന്നു യുവതി. മൊബെലില്‍ തന്റെ വിഡിയോ എടുക്കുന്നത് കണ്ട് യുവതി കടക്കാരോട് കാര്യം പറഞ്ഞു. തുടര്‍ന്ന് മിന്‍ വാങ്ങാനെത്തിയവരും വില്‍പ്പനക്കാരും ചേര്‍ന്ന് ഇയാളെ തടഞ്ഞ് വെച്ച് പോലിസിന് കൈമാറുകയായിരുന്നു. ഇയാള്‍ മദ്യലഹരിയിലായിരുന്നെന്ന് എസ്.ഐ സിബിഷ് പറഞ്ഞു. സ്‌റ്റേഷനിലെത്തിയ ശേഷം യുവതിയുടെ സാന്നിദ്ധൃത്തില്‍ പോലിസ് ഇയാളുടെ ഫോണ്‍ പരിശോധിച്ചു. കുറെ കടകളുടെ ചിത്രങ്ങളാണ് കണ്ടതെന്ന് പോലിസ് പറഞ്ഞു. യുവതിയുടെ ചിത്രം ഉണ്ടായിരുന്നില്ല. ഇതിനെ തുടര്‍ന്ന് യുവതി പരാതി നല്‍കാതെ തിരിച്ചു പോയി.

തളിയക്കോണം ഗ്രാമീണവായനശാലയുടെ ആഭിമുഖ്യത്തില്‍ ലോകജലദിനം ആചരിച്ചു

തളിയക്കോണം : ഗ്രാമീണവായനശാലയുടെ ആഭിമുഖ്യത്തില്‍ ലോകജലദിനം ആചരിച്ചു. ജലദിനറാലിയും ബോധവല്‍ക്കരണ ക്ലാസ്സും നടത്തി. താലൂക്ക് ലൈബ്രറി കൗണ്‍സില്‍ സെക്രട്ടറി ഖാദര്‍ പട്ടേപ്പാടം ഉദ്ഘാടനം ചെയ്തു. കരുവന്നൂര്‍ സഹകരണ ബാങ്ക് സെക്രട്ടറി ടി.ആര്‍. സുനില്‍കുമാര്‍ ജലദിനസന്ദേശം നല്‍കി. പി.എസ്. വിശ്വംഭരന്‍, കൗണ്‍സിലര്‍മാരായ ബിന്ദു ശുദ്ധോധനന്‍, സിന്ധു ബൈജന്‍, ടി.എസ്. ബൈജു, ടി.കെ. ജയാനന്ദന്‍ എന്നിവര്‍ പ്രസംഗിച്ചു.

ഷണ്‍മുഖം കനാല്‍ മലിനമാക്കുന്നതിന് സോള്‍വെന്റ് കമ്പനി കാരണമാകുന്നുവെന്ന് കൗണ്‍സിലില്‍ പ്രതിപക്ഷം

ഇരിങ്ങാലക്കുട : ഇരിങ്ങാലക്കുടയില്‍ നിന്നും ആരംഭിക്കുന്ന ഷണ്‍മുഖം കനാല്‍ മലിനമാക്കുന്നതിന് കെ.എസ്.ഇ കമ്പനി കാരണമാകുന്നുവെന്ന് കൗണ്‍സില്‍ യോഗത്തില്‍ പ്രതിപക്ഷം. മൂന്ന് മാസത്തിനുള്ളില്‍ ഷണ്‍മുഖം കനാലിലെ മാലിന്യം നീക്കം ചെയ്ത് വ്യത്തിയാക്കി സംരക്ഷിക്കണമെന്ന ഓംബുഡ്‌സ്മാന്‍ ഉത്തരവിട്ടിരുന്നു. ബുധനാഴ്ച നടന്ന കൗണ്‍സില്‍ യോഗത്തില്‍ ഇക്കാര്യം അജണ്ടയില്‍ ഉള്‍പ്പെടുത്തി ചര്‍ച്ചയ്ക്ക് വന്നപ്പോഴാണ് പ്രതിപക്ഷാംഗങ്ങള്‍ ഒന്നടങ്കം കെ.എസ്.ഇക്കെതിരെ രംഗത്തെത്തിയത്. കെ.എസ്.ഇയുടെ രണ്ട് ഡ്രൈനേജ് ഷണ്‍മുഖം കനാലിലേയ്ക്ക് തുറന്നു വെച്ചിരിക്കുകയാണെന്ന് വാര്‍ഡ് കൗണ്‍സിലര്‍ കൂടിയായ എം.സി രമണന്‍ ആരോപിച്ചു. കമ്പനിയില്‍ നിരവധി അനധികൃത നിര്‍മ്മാണപ്രവര്‍ത്തികള്‍ നടക്കുന്നുണ്ട്. ഇക്കാര്യം ചൂണ്ടിക്കാട്ടി നാല് മാസം മുമ്പ് ആരോഗ്യവിഭാഗത്തിന് അവിടത്തെ റസിഡന്റ്‌സ് അസോസിയേഷനും താനും പരാതി നല്‍കിയിരുന്നു. എന്നാല്‍ എന്ത് നടപടിയാണ് നഗരസഭ എടുത്തതെന്ന് രമണന്‍ ചോദിച്ചു. ലോറി താവളമടക്കം കമ്പനിയില്‍ നടന്ന നിര്‍മ്മാണപ്രവര്‍ത്തനങ്ങള്‍ എഞ്ചിനിയറിംഗ് വിഭാഗം അന്വേഷിക്കണമെന്ന് ബി.ജെ.പി അംഗം സന്തോഷ് ബോബന്‍ ആവശ്യപ്പെട്ടു. മാലിന്യം മൂലം ഷണ്‍മുഖം കനാലിലെ മത്സ്യ സമ്പത്തെല്ലാം നശിച്ചുപോകുന്നതായി നിരവധി പരാതികള്‍ ലഭിച്ചിട്ടുണ്ടെന്ന് സി.പി.എം അംഗം ശിവകുമാര്‍ പറഞ്ഞു.

ഇക്കാര്യങ്ങള്‍ അന്വേഷിച്ച് അടുത്ത കൗണ്‍സില്‍ യോഗത്തില്‍ റിപ്പോര്‍ട്ട് നല്‍കണമെന്നും അദ്ദേഹം ആവശ്യപ്പെട്ടു. സോള്‍വെന്റ് കമ്പനി ഗോഡൗണിനും കെട്ടിടത്തിനുമുള്ള പെര്‍മിറ്റിന് അപേക്ഷകള്‍ നല്‍കിയിട്ടുണ്ടെന്ന് ഉദ്ദ്യോഗസ്ഥര്‍ വ്യക്തമാക്കി. കമ്പനിയിലെ അനധികൃത നിര്‍മ്മാണ പ്രവര്‍ത്തനങ്ങള്‍ അന്വേഷിച്ച് നടപടിയെടുക്കുമെന്നും അവര്‍ കൗണ്‍സിലില്‍ പറഞ്ഞു. ലൈസന്‍സില്ലാത്തതിനാല്‍ ഏപ്രില്‍ ഒന്നുമുതല്‍ എം.സി.പി കണ്‍വെന്‍ഷന്‍ സെന്റര്‍ അടച്ചിടാന്‍ ചെയര്‍പേഴ്‌സന്‍ നടപടിയെടുക്കണമെന്ന് എല്‍.ഡി.എഫ് ആവശ്യപ്പെട്ടു. മൊബൈല്‍ ടവര്‍ പൊളിച്ചുനീക്കാന്‍ ചെയര്‍പേഴ്‌സന്‍ കാണിച്ച ശുഷ്‌കാന്തി ഇക്കാര്യത്തിലും കാണിക്കണമെന്നും ശിവകുമാര്‍ ആവശ്യപ്പെട്ടു.

ഇരിങ്ങാലക്കുട ഇനി സമ്പൂര്‍ണ്ണ വൈദ്യുതീകൃത അസംബ്ലി നിയോജക മണ്ഡലം

ഇരിങ്ങാലക്കുട : ഇരിങ്ങാലക്കുട നിയോജക മണ്ഡലം സമ്പൂര്‍ണ വൈദ്യുതീകരണ പ്രഖ്യാപനം മുനിസിപ്പല്‍ ടൗണ്‍ഹാളില്‍ എം എല്‍ എ പ്രൊഫ് കെ യു അരുണന്‍ നിര്‍വഹിച്ചു. നിയോജക മണ്ഡലത്തിലെ 267 പട്ടികജാതി കുടുംബങ്ങളും, 539 ബി.പി.എല്‍.കുടുംബങ്ങളും ഉള്‍പ്പെടെ 614 പാവപ്പെട്ട കുടുംബങ്ങളില്‍ വെളിച്ചമെത്തി. 56.4 ലക്ഷം രൂപ ഇതിനായി ചിലവഴിച്ചു. 25 ലക്ഷം രൂപ എം എല്‍ എ ഫണ്ടില്‍ നിന്നും, 31.4 ലക്ഷം രൂപ കെ എസ് ഈ ബിയുടെ തനതു ഫണ്ടില്‍ നിന്നുമാണ് ചിലവഴിച്ചത്. വയറിങ്ങ് പൂര്‍ത്തിയാക്കിയ 4 അങ്കണവാടികളിലും വൈദ്യുതിയെത്തിച്ചു. സാമ്പത്തിക ക്ലേശത്താല്‍ വയറിങ്ങ് നടത്താന്‍ കഴിയാതിരുന്ന 20 നിര്‍ദ്ധന കുടുംബങ്ങള്‍ക്ക് കെ എസ് ഈ ബി ജീവനക്കാരും, സംഘടനകളും ചേര്‍ന്ന് വയറിങ്ങ് നടത്തിക്കൊടുത്തു. 2017 മാര്‍ച്ച് 31ന് കേരളം എല്ലാ വീടുകളിലും വൈദ്യുതി എത്തിച്ചു കൊടുത്ത ഇന്ത്യയിലെ ആദ്യ സംസ്ഥാനമായി മാറുന്നതിന്റെ ഭാഗമായാണ് ഇരിങ്ങാലക്കുട സമ്പൂര്‍ണ്ണ വൈദ്യുതീകൃത നിയോജക മണ്ഡലമായത്.

ആനന്ദപുരത്ത് ബിവറേജ് വില്‍പ്പനശാല നീക്കത്തില്‍ നിന്നും പിന്‍മാറണം: മഹിള കോണ്‍ഗ്രസ്

ആനന്ദപുരം : മുരിയാട്- നെല്ലായി റോഡില്‍ അമേത്യിക്കുഴി പാലത്തിനു സമീപം ബിവറേജ് മദ്യ വില്‍പ്പനശാല സ്ഥാപിക്കാനുള്ള നീക്കത്തില്‍ നിന്നും പിന്‍മാറണമെന്ന് മഹിള കോണ്‍ഗ്രസ് മുരിയാട് മണ്ഡലം കമ്മിറ്റി ആവശ്യപ്പെട്ടു. നിരവധി സ്ക്കുള്‍ വിദ്യാര്‍ത്ഥികളും സ്ത്രീകളടക്കമുള്ള യാത്രക്കാരും ദിനംപ്രതി യാത്ര ചെയ്യുന്ന റോഡില്‍ മദ്യവില്‍പ്പനശാല പ്രവര്‍ത്തനമാരംഭിച്ചാല്‍ അത് സുരക്ഷക്ക് ഭീഷണിയാകുമെന്ന് കമ്മിറ്റി യോഗം പറഞ്ഞു. പ്രസിഡന്റ് അംബിക മുകുന്ദന്‍ അധ്യക്ഷത വഹിച്ചു. പഞ്ചായത്ത് സ്ഥിരം സമിതി അധ്യക്ഷ മോളി ജേക്കബ്‌, അംഗങ്ങളായ ഗംഗാദേവി സുനില്‍, കെ. വൃന്ദകുമാരി, ടെസി ജോഷി, ഭാരവാഹികളായ ഓമന ഡേവിസ്, ശാരിക രാമകൃഷ്ണന്‍, വിജയലക്ഷ്മി വേണുഗോപാല്‍, രാധിക മുരുകന്‍, നിത അര്‍ജുനന്‍, ജിഷ ജോബി, ജിനിത പ്രശാന്ത്, സുവര്‍ണ്ണ ഷിബു എന്നിവര്‍ പ്രസംഗിച്ചു.

ഇന്ന് ലോകജലദിനം: അനാസ്ഥ മൂലം ഇരിങ്ങാലക്കുടയിലെ ജലസംഭരണികള്‍ നാശത്തില്‍

ഇരിങ്ങാലക്കുട : ജലം എന്ന അമൂല്യ സമ്പത്തിനെ സംരക്ഷിക്കാനുള്ള ബാധ്യത എല്ലാവരിലും നിക്ഷിപ്തമായിരിക്കെ അധികൃതരുടെ അനാസ്ഥ മൂലം ഇരിങ്ങാലക്കുടയിലെ ജലസംഭരണികള്‍ നാശത്തില്‍ . ലോക ജലദിനം ആചരിക്കുന്ന ഈ വേളയില്‍ ഇരിങ്ങാലക്കുടയിലെ കാലങ്ങളായുള്ള ജലസ്രോതസുകളായ മുപ്പതോളം കുളങ്ങള്‍ക്കു അടിയന്തര ശ്രദ്ധ ലഭിച്ചില്ലെങ്കില്‍ വിസ്‌മൃതിയിലാകുന്ന അവസ്ഥയിലാണ് . കുടിവെള്ളം കിട്ടാക്കനിയാകാന്‍ പോകുന്ന വരും കാലങ്ങളില്‍ കുളങ്ങളുടെ സംരക്ഷണത്തിന്റെ ആവശ്യകത ഇതുവരെ പൊതുജനങ്ങളില്‍ എത്തിയിട്ടില്ല . അജ്ഞതയും സ്വാര്‍ത്ഥതയും മൂലം നഗര ഹൃദയത്തില്‍ തന്നെ പല കുളങ്ങളും അധികൃതര്‍ തന്നെ മൂടി കളഞ്ഞിട്ടുണ്ട് . ഒരുകാലത്തു ജലസമൃതിയിലായിരുന്ന ഠാണാവിലെ പൂതംകുളം ഇപ്പോള്‍ അറിയപ്പെടുന്നത് അത് നികത്തി പണിത നഗരസഭയുടെ പൂതംകുളം ഷോപ്പിംഗ് കോംപ്ലെക്സിന്റെ പേരിലാണ് . കൂടല്‍മാണിക്യം കൊട്ടിലക്കല്‍ പറമ്പ് എട്ടോളം കുളങ്ങളെ കൊണ്ട് സമൃദ്ധിയിലായിരുന്നു . എന്നാല്‍ ഇപ്പോള്‍ ഒരു കുളം മാത്രമേ ഉള്ളു അതും പകുതി നികത്തിയ നിലയില്‍ .

ഇതിനു പുറമെ ചേലൂര്‍ കാട്ടിക്കുളം , കോതക്കുളം , ശാസ്താന്‍ക്കുളം , തുറുകയിക്കുളം , ഹനുമാന്‍ക്കുളം, കാഞ്ഞാണിക്കുളം , കോലുക്കുളം, കണക്കന്‍ക്കുളം , ചിറത്തിക്കുളം , പള്ളികാട്ക്കുളം , ചാത്തന്‍ക്കുളം , ചെമ്പുഞ്ചിറക്കുളം , വല്ലാഞ്ചിറക്കുളം, മണിക്കുളം , പൂച്ചക്കുളം , ഉമ്മന്‍കുളം , എന്നി കുളങ്ങളടക്കം മുനിസിപ്പാലിറ്റി പരിധിയിലെ മുപ്പതോളം കുളങ്ങളും കിണറുകളും നശിച്ചുകൊണ്ടിരിക്കുകയാണ്. സമീപ പഞ്ചായത്തുകളിലെ കുളങ്ങളുടെ സ്ഥിതിയിലും മാറ്റമില്ല .

Top
Menu Title