News

Category: Events

ഇരിങ്ങാലക്കുട സെന്റ് ജോസഫ്സ് കോളേജില്‍ പി.ജി. പ്രവേശനം ജൂലൈ 5 വരെ

ഇരിങ്ങാലക്കുട : സെന്റ് ജോസഫ്സ് കോളേജില്‍ വിവിധ വിഷയങ്ങളില്‍ പി.ജി. കോഴ്സുകള്‍ക്ക് ജൂലൈ 5 വരെ അപേക്ഷിക്കാം. ഓട്ടോണമസ് കോളേജായതിനാല്‍ കോളേജ് വെബ്സൈറ്റില്‍ ഓണ്‍ലൈനായാണ് അപേക്ഷിക്കേണ്ടത്. മലയാളം, മാത്തമാറ്റിക്സ്, കെമിസ്ട്രി, ഇംഗ്ലീഷ്, എം.കോം എന്നീ എയ്ഡഡ് കോഴ്സുകളിലേക്കും, ഫിസിക്സ്, സുവോളജി, ബോട്ടണി, ബയോടെക്നോളജി, കമ്പ്യൂട്ടര്‍ സയന്‍സ്, ഇക്കണോമിക്സ്, MCJ, MSW എന്നീ സ്വാശ്രയ കോഴ്സുകളിലേക്കുമാണ് പ്രവേശനം. കൂടുതല്‍ വിവരങ്ങള്‍ക്ക് www.stjosephs.edu.in എന്ന സൈറ്റ് സന്ദര്‍ശിക്കുക.

സി.പി.ഐ കാറളം മുന്‍ ലോക്കല്‍ സെക്രട്ടറി കെ.എം അജയഘോഷ് അന്തരിച്ചു

കിഴുത്താണി : സി.പി.ഐ കാറളം മുന്‍ ലോക്കല്‍ സെക്രട്ടറിയായിരുന്ന കുഞ്ഞിലിക്കാട്ടില്‍ അജയഘോഷ് (58) അന്തരിച്ചു. സി.പി.ഐ മണ്ഡലം കമ്മിറ്റി അംഗം, മുന്‍ പഞ്ചായത്ത് വൈസ് പ്രസിഡന്റ്, കാറളം സര്‍വ്വീസ് സഹകരണബാങ്ക് വൈസ് പ്രസിഡന്റ് എന്നി നിലകളില്‍ പ്രവര്‍ത്തിച്ചിട്ടുണ്ട്. ഭാര്യ: ഷീല. മക്കള്‍: അശ്വിന്‍ഘോഷ്, അജയ് കോഹ്‌ലി. മരുമകന്‍: ദീപു.

സര്‍വ്വകക്ഷിയോഗം അനുശോചിച്ചു

സി.പി.ഐ കാറളം മുന്‍ ലോക്കല്‍ സെക്രട്ടറിയായിരുന്ന കെ.എ അജയഘോഷിന്റെ നിര്യാണത്തില്‍ സര്‍വ്വകക്ഷിയോഗം അനുശോചിച്ചു. താണിശ്ശേരി സെന്ററില്‍ നടന്ന സര്‍വ്വകക്ഷി യോഗത്തില്‍ എന്‍.കെ ഉദയപ്രകാശ് അദ്ധ്യക്ഷനായിരുന്നു. കെ. ശ്രീകുമാര്‍, ടി.കെ സുധീഷ്, കെ.കെ സുരേഷ് ബാബു, പി.വി ഹരിദാസ്, അംബിക സുഭാഷ്, ടി. പ്രസാദ്, പ്രൊഫ. എം.എസ് വിശ്വനാഥന്‍, രഞ്ജിത്ത്, കെ.എസ് ബൈജു എന്നിവര്‍ സംസാരിച്ചു.

ലയണ്‍സ് ക്ലബ്ബിന്റെ പുതിയ ഭാരവാഹികളുടെ സ്ഥാനാരോഹണ ചടങ്ങ് നടന്നു

ഇരിങ്ങാലക്കുട : ലയണ്‍സ് ക്ലബ്ബിന്റെ 2017 -18 വര്‍ഷത്തെ പുതിയ ഭാരവാഹികളുടെ സ്ഥാനാരോഹണ ചടങ്ങ് ലയണ്‍സ് ഹാളില്‍ നടന്നു. ഇരിങ്ങാലക്കുട ലയണ്‍സ് ക്ലബ് പ്രസിഡന്റ് കെ എന്‍ സുഭാഷിന്റെ അദ്ധ്യക്ഷതയില്‍ കൂടിയ യോഗത്തില്‍ ലയണ്‍സ് ക്ലബ് ഫസ്റ്റ് വൈസ് ഡിസ്ട്രിക്ട് ഗവര്‍ണര്‍ ഇ ഡി ദീപക് സ്ഥാനാരോഹണ ചടങ്ങ് നിര്‍വഹിച്ചു.  ചടങ്ങില്‍ ലയണ്‍സ് ഡിസ്ട്രിക്ട് ക്യാബിനറ്റ് സെക്രട്ടറി എം സി എംസണ്‍, റീജിയണല്‍ ചെയര്‍മാന്‍ വിത്സണ്‍ എലിഞ്ഞിക്കല്‍ , സോണ്‍ ചെയര്‍മാന്‍ ബീന വിജയകുമാര്‍ , പോള്‍ തോമസ് മാവേലി എന്നിവര്‍ ആശംസകള്‍ നേര്‍ന്നു . പുതിയ ഭാരവാഹികളായി ലയണ്‍സ് ക്ലബ് പ്രസിഡന്റ് ജോര്‍ജ് ചീരന്‍ , സെക്രട്ടറി ജോസ്സി ജോയ് മണ്ണുമെല്‍, ട്രഷറര്‍ ബിജോയ് പോള്‍ , ലയണസ് ക്ലബ് പ്രസിഡന്റ് അനിത ജോര്‍ജ് ,സെക്രട്ടറി മെഡ്‌ലി റോയ് , ട്രഷറര്‍ അനീറ്റ ബാബു എന്നിവരും ചുമതലയേറ്റു . ലിയോ ക്ലബ് പ്രസിഡന്റ് ലാസര്‍ ടോണി ,സെക്രട്ടറി ഹാരീസ് ജോണ്‍ , ട്രഷറര്‍ ഒലിവിയ മരിയ റോയ് എന്നിവരും ഭാരവാഹിത്വം ഏറ്റെടുത്തു . പുതിയ സെക്രട്ടറി ജോസ്സി ജോയ് നന്ദി രേഖപ്പെടുത്തി .

അമ്മന്നൂര്‍ ജന്മശതാബ്ദി സമാപനം : ആഹാര്യോത്സവം ജൂലൈ 10 വരെ

ഇരിങ്ങാലക്കുട : അമ്മന്നൂര്‍ ചാച്ചുചാക്യാര്‍ സ്മാരക ഗുരുകുലത്തിന്റെ ആഭിമുഖ്യത്തില്‍ ‘ഗുരുസ്മരണ കൂടിയാട്ട മഹോത്സവം ‘ആഹാര്യോത്സവം’ മാധവനാട്യഭൂമിയിലാരംഭിച്ചു. 2016 – 17 അമ്മന്നൂര്‍ ജന്മശതാബ്ദി വര്‍ഷം കൂടിയാണ്. ഇതിന്റെ സമാപനവുമായി ബന്ധപ്പെ ട്ട് ഗുരുകുലം മറ്റ് കൂടിയാട്ട വിദ്യാലയങ്ങള്‍ സാംസ്‌കാരിക സംഘങ്ങള്‍, സ്ഥാപനങ്ങള്‍ എന്നിവയുമായി സഹകരിച്ച് പ്രഗല്‍ഭരായ കലാകാരന്മാരെ വേദിയില്‍ ആദരിക്കുക കൂടി ചെയുന്നുണ്ട് . ചതുര്‍വിധാഭിനയങ്ങളില്‍ പ്രധാനപ്പെട്ട ഒന്നാണ് ആഹാര്യം . കൂടിയാട്ടത്തിലെ ക്രമദീപിക അനുസരിച്ചും ഗുരുകുലത്തിലും നടനകൈരളിയിലും പുതിയതായി ചി ട്ടപ്പെടുത്തിയതുമായ ഒട്ടുമിക്ക വേഷങ്ങളും രംഗത്ത് കൊണ്ടുവരിക എന്നതാണ് ആഹാര്യോത്സവം കൊണ്ട് ഗുരുകുലം ലക്ഷ്യമാക്കുന്നത്. ചതുര്‍വിധാഭിനയങ്ങളില്‍ പ്രധാനപ്പെട്ട ഒന്നാണ് ആഹാര്യം . വേഷവിധാനങ്ങള്‍, രംഗസജ്ജീകരണങ്ങള്‍ എന്നിവ ഉള്‍പ്പെടുന്ന ആഹാര്യാഭിനയം കേന്ദ്രീകരിച്ചുകൊണ്ട് ഒരു മഹോത്സവം സംഘടിപ്പിക്കുന്നത് കൂടിയാട്ട ചരിത്രത്തില്‍ തന്നെ ആദ്യമായിട്ടാണ്.  ജൂണ്‍ 28-ാം തിയ്യതി പത്മശ്രീ പി.കെ. നാരായണന്‍ നമ്പ്യാര്‍ ഗുരുസ്മരണ മഹോത്സവവും ഉദ്ഘാടനവും അമ്മന്നൂര്‍ അനുസ്മരണ പ്രഭാഷണവും മാധവനാട്യഭൂമിയില്‍ നിര്‍വ്വഹിച്ചു. ഡോ. എം.വി. നാരായണന്‍ ആട്ടപ്രകാരങ്ങളും നടശരീരവും എന്ന വിഷയത്തില്‍ ഗുരു അമ്മന്നൂര്‍ സ്മാരക പ്രഭാഷണം നടത്തി. തുടര്‍ന്ന് സൂരജ് നമ്പ്യാര്‍ ഭീമനായി രംഗത്തെത്തിയ കല്യാണസൗഗന്ധികം കൂടിയാട്ടം അവതരിപ്പിച്ചു. തുടര്‍ന്ന് ജൂണ്‍ 29ന് അഗ്നിപ്രവേശാങ്കം കൂടിയാട്ടവും അവതരിപ്പിച്ചു.
ജൂണ്‍ 30 ന് വൈകീട്ട് 6.30 ന് കലാമണ്ഡലം സംഗീത് ചാക്യാര്‍ സുഗ്രീവനും പൊതിയില്‍ രഞ്ജിത് ചാക്യാര്‍ ബാലിയായും കീര്‍ത്തി
സാഗര്‍ താരയുമായി അഭിനയിക്കുന്ന ബാലിവധം കൂടിയാട്ടം നടക്കും. ജൂലായ് 1-ാം തിയ്യതി മാധവനാട്യഭൂമിയില്‍ രാവിലെ 10 മണിക്ക് കൂടിയാട്ടത്തിലെ വര്‍ണ്ണവേഷ വൈവിദ്ധ്യങ്ങള്‍ എന്ന വിഷയത്തില്‍ സെമിനാര്‍ നടക്കും. കേന്ദ്രസംഗീതനാടകഅക്കാദമി കൂടിയാട്ടകേന്ദ്രം ഡയറക്ടര്‍ ഡോ. ഏറ്റുമാനൂര്‍ പി. കണ്ണന്‍ മോഡറേറ്ററാകുന്ന യോഗത്തില്‍ കലാമണ്ഡലം രാംമോഹന്‍ വിഷയാവതരണം നടത്തും. കലാനിലയം പരമേശ്വരന്‍, കലാമണ്ഡലം സതീശന്‍, ഹരിദാസ് കുറുപ്പ്, കോതാവില്‍ രാമന്‍കുട്ടി , അമ്മന്നൂര്‍ രജനീഷ് ചാക്യാര്‍, സൂരജ് നമ്പ്യാര്‍, കലാനിലയം ഹരിദാസ് എന്നിവര്‍ ചര്‍ച്ചയില്‍ പങ്കെടുക്കും. 5 മണിക്ക് അമ്മന്നൂര്‍ ചരമദിനാചരണവും അനുസ്മരണവും ജന്മശതാബ്ദി സമാപനസമ്മേളനവും നടക്കും. ഗുരുകുലം കുലപതി വേണുജി ഗുരുവന്ദനം നടത്തും. സി.എന്‍.ജയദേവന്‍ എം.പി. അദ്ധ്യക്ഷനാകുന്ന ജന്മശതാബ്ദി സമ്മേളനം കൃഷിവകുപ്പ് മന്ത്രി വി.എസ്.സുനില്‍കുമാര്‍ ഉദ്ഘാടനം ചെയ്യും. പ്രൊഫ. കെ.യു.അരുണന്‍ എം.എല്‍.എ., അഡ്വ. തോമസ് ഉണ്ണിയാടന്‍ എന്നിവര്‍ മുഖ്യാതിഥികളായിരിക്കും. കേരളസംഗീതനാടകഅക്കാദമി സെക്രട്ടറി എന്‍.രാധാകൃഷ്ണന്‍ നായര്‍, ചമയകലാകാരന്‍ കലാനിലയം പരമേശ്വരന്‍, മിഴാവ് കലാകാരന്മാരായ കലാമണ്ഡലം ഉണ്ണികൃഷ്ണന്‍ നമ്പ്യാര്‍, ഗോപിനാഥന്‍ നമ്പ്യാര്‍, വി.കെ.കെ.ഹരിഹരന്‍ എന്നിവരെ ആദരിക്കും. ഡോ.കെ.ജി.പൗലോസ് വിശിഷ്ട സാന്നിദ്ധ്യം വഹിക്കും. ഡോ.ഏറ്റുമാനൂര്‍ കണ്ണന്‍ ആശംസാപ്രസംഗം നടത്തും. തുടര്‍ന്നു വേണുജി സംവിധാനം ചെയ്ത ഊരുഭംഗം കൂടിയാട്ടത്തില്‍ പൊതിയില്‍ രഞ്ജിത് ചാക്യാര്‍ ബലരാമനായി അഭിനയിക്കും. ജൂലായ് 2-ാം തിയ്യതി രാവിലെ 10 മണിക്ക് കൂടിയാട്ടത്തിലെ സ്ത്രീകഥാപാത്രങ്ങളുടെ വളര്‍ച്ചയും സ്വതന്ത്രരംഗവേദിയും എന്ന വിഷയത്തില്‍ സെമിനാര്‍ നടക്കും. ഡോ. സി.കെ.ജയന്തി മോഡറേറ്ററാകുന്ന സെമിനാറില്‍ കലാമണ്ഡലം ഗിരിജ വിഷയാവതരണം നടത്തും. ഉഷാനങ്ങ്യാര്‍, മാര്‍ഗ്ഗി ഉഷാരത്‌നം, കലാമണ്ഡലം സിന്ധു, കൃഷ്‌ണേന്ദു, സംഗീത, പ്രശാന്തി, രശ്മി, ഭദ്ര പി.കെ.എം, ഭാഗീരഥി പ്രശാന്ത് എന്നിവര്‍ ചര്‍ച്ചയില്‍ പങ്കെടുക്കും. വൈകീട്ട് 6.30 ന് സൂരജ് നമ്പ്യാര്‍ ജാംബവാനായി അഭിനയിക്കുന്ന അഗ്നിപ്രവേശാങ്കത്തിലെ പുറപ്പാട് അവതരണം നടക്കും. തുടര്‍ന്ന് കലാമണ്ഡലം കൃഷ്ണകുമാര്‍ രാവണനായും കലാമണ്ഡലം കനകകുമാര്‍ ഹനുമാനായും ഗണേഷ് കൃഷ്ണ വിഭീഷണനായും അഭിനയിക്കുന്ന തോരണയുദ്ധം 3-ാം ദിവസം അവതരിപ്പിക്കും. ജൂലായ് 3-ാം തിയ്യതി ജടായുവധം, 4-ാം തിയ്യതി ഹനുമദ്ദൂതാങ്കം, സുഭദ്രാധനഞ്ജയം 2-ാം ദിവസം, 5-ാം തിയ്യതി സമുദ്രതരണാങ്കം, 6-ാം തിയ്യതി അഗ്നിപ്രവേശാങ്കം, 7-ാം തിയ്യതി ശാകുന്തളം ആറും ഏഴും അങ്കങ്ങള്‍, 8-ാം തിയ്യതി മായാശിരസ്സ് തുടങ്ങിയ കൂടിയാട്ടങ്ങള്‍ അവതരിപ്പിക്കും. 9-ാം തിയ്യതി രാവിലെ 10ന് യുഗപ്രഭാവനായ അമ്മന്നൂരിന്റെ കൂടിയാട്ട ജീവിതത്തിലൂടെ ഒരു യാത്ര എന്ന പരിപാടി ‘മാധവായനം’ നടക്കും. ഡോ. പി. വേണുഗോപാല്‍ മോഡറേറ്ററും വിഷയാവതരണവും നടത്തും. വിവിധ വിഷയങ്ങളില്‍ പ്രഗത്ഭര്‍ പ്രബന്ധാവതരണം നടത്തും. വൈകീട്ട് 6.30ന് അശോകവനികാങ്കവും ജൂലായ് 10-ാം തിയ്യതി നിണത്തോട് കൂടിയ ശൂര്‍പ്പണഖാങ്കവും നടക്കും. പത്രസമ്മേളനത്തില്‍ കെ പി നാരായണന്‍ നമ്പ്യാര്‍ , രജനീഷ് ചാക്യാര്‍ , സൂരജ് നമ്പ്യാര്‍ ,കലാനിലയം ഹരിദാസ് എന്നിവര്‍ പങ്കെടുത്തു.

വൈദികന് നേരെ അക്രമം : റാലിയില്‍ പ്രതിഷേധം ഇരമ്പി

ഇരിങ്ങാലക്കുട : ക്രൈസ്റ്റ് ആശ്രമത്തിന്റെ കീഴില്‍ പ്രവര്‍ത്തിക്കുന്ന സ്നേഹഭവന്‍ ഐ.ടി.സിയുടെ ഡയറക്ടറായ ഫാ. ജോയി വൈദ്യക്കാരനെ ചില സാമൂഹ്യ ദ്രോഹികള്‍ ആക്രമിച്ചതില്‍ പ്രതിഷേധിച്ചു നടത്തിയ പ്രതിഷേധറാലി ഇരിങ്ങാലക്കുട സെന്റ് തോമസ് കത്തീഡ്രല്‍ അങ്കണത്തില്‍ വെച്ച് കത്തീഡ്രല്‍ വികാരി ഫാ. ജോയ് കടമ്പാട്ട് ഉദ്ഘാടനം നിര്‍വ്വഹിച്ചു. പ്രതിഷേധറാലി ഠാണാ വഴി ആല്‍ത്തറയില്‍ സമാപിച്ചു. തുടന്ന് നടന്ന പ്രതിഷേധ യോഗത്തില്‍ രൂപതാദ്ധ്യക്ഷന്‍ മാര്‍ പോളി കണ്ണൂക്കാടന്‍ മുഖ്യപ്രഭാഷണം നടത്തി. എം.എല്‍.എ. പ്രൊഫ. കെ.യു. അരുണന്‍ മാസ്റ്റര്‍, നഗരസഭാ ചെയര്‍പേഴ്സണ്‍ നിമ്മ്യ ഷിജു, കൂടല്‍മാണിക്യം ദേവസ്വം ചെയര്‍മാന്‍ പനംമ്പിള്ളി രാഘവമേനോന്‍, ടൗണ്‍ ജുമാമസ്ജിദ് ഇമാം കബീര്‍ മൗലവി, രൂപതാ വികാരി ജനറാള്‍ ഫാ. ജോബി പോഴോലിപറമ്പില്‍, സി.എം.ഐ ദേവമാതാ പ്രോവിന്‍സിന്റെ കൗണ്‍സിലര്‍മാരായ ഫാ. പോള്‍സണ്‍ പാലിയേക്കര, ഫാ. ഷാജു എടമന എന്നിവര്‍ സംസാരിച്ചു. യോഗത്തില്‍ ക്രൈസ്റ്റ് ആശ്രമാധിപന്‍ ഫാ. ജേക്കബ് ഞെരിഞ്ഞാംപിളളി സ്വാഗതവും പ്രതിഷേധ കമ്മിറ്റി കണ്‍വീനര്‍ ജെയ്സണ്‍ പാറേക്കാടന്‍ നന്ദിയുമര്‍പ്പിച്ചു.

മഴക്കാലമായതോടെ സംസ്ഥാന പാതകള്‍ തകര്‍ന്നു തുടങ്ങി

ഇരിങ്ങാലക്കുട : കോടികള്‍ ചിലവാക്കി മെക്കാര്‍ഡാം ടാറിങ് നടത്തി പണി കഴിപ്പിച്ച ഇരിങ്ങാലക്കുട വഴി കടന്നു പോകുന്ന പോട്ട – മൂന്നുപീടിക സംസ്ഥാന പാത മഴക്കാലമായതോടെ വീണ്ടും തകര്‍ന്നു തുടങ്ങി . കഴിഞ്ഞ ഗവര്‍ന്മെന്റിന്റെ കാലത്ത് റീടാറിങ് നടത്തിയതോടെയാണ് സംസ്ഥാന പാതയുടെ ഗതികേട് തുടങ്ങിയത് . നിലവാരമില്ലാത്ത ടാറിങ് ആണ് ഇതെന്നും വന്‍ അഴിമതി ഇതിനു പുറകില്‍ ഉണ്ടെന്നും അന്ന് ആരോപണം ഉണ്ടായിരുന്നു. റീടാറിങ് ചെയ്ത പ്രതലം ആളൂര്‍ മുതല്‍ ഇരിങ്ങാലക്കുട വരെ ഭൂരിഭാഗം ഭാഗത്തും അടര്‍ന്നു പോയി. ഇതിനു താഴെ പത്ത് വര്‍ഷം മുന്‍പ് ആദ്യമായി ചെയ്ത ബി എം ബി സി ടാറിങ് ഒട്ടും തന്നെ കേടുകൂടാതെ നിലനില്‍ക്കുന്നതും ഇപ്പോള്‍ കാണാം . പുതിയ ഗവര്‍ണ്മെന്റ് വന്നതിനു ശേഷം റോഡിന്‍റെ ദുരവസ്ഥ കണ്ടു മാസങ്ങള്‍ക്കു മുന്‍പ് പാച്ച് വര്‍ക്ക് നടത്തിയിരുന്നു . എന്നാല്‍ മഴക്കാലം ആരംഭിച്ചു മാസ്സങ്ങള്‍ക്കകം തന്നെ റോഡ് വിണ്ടുകീറി പ്രതലങ്ങളില്‍ ഗര്‍ത്തങ്ങള്‍ രൂപപ്പെട്ടു തുടങ്ങി . പലയിടത്തും റോഡില്‍ ടാര്‍ ഇളകി പോയി മെറ്റല്‍ പുറത്തു വന്ന അവസ്ഥയില്‍ ആണ് . ഇരുചക്ര വാഹനങ്ങള്‍ ഉള്‍പ്പെടയുള്ളവര്‍ക്ക് ഇത് ഭീഷണി ആകുന്നുണ്ട് .

ശനിയാഴ്ച വൈദ്യുതി മുടങ്ങും

ഇരിങ്ങാലക്കുട : നമ്പര്‍ വണ്‍ സെക്‌ഷന്‍റെ പരിധിയില്‍ വരുന്ന കെ പി എല്‍ ഓയില്‍ മില്‍, സെന്റ് ജോസഫ്‌സ് കോളേജ്, റാണാ കോളനി , ചന്തക്കുന്നു, മുനിസിപ്പല്‍ പാര്‍ക്ക് എന്നിവിടങ്ങളില്‍ 11 കെ വി ലൈനുകളില്‍ അറ്റകുറ്റപ്പണി നടക്കുന്നതിനാല്‍ ജൂലായ് 1 ശനിയാഴ്ച രാവിലെ 8:30 മണി മുതല്‍ വൈകീട്ട് 5:30 വരെ വൈദ്യുതി മുടങ്ങുമെന്ന് അസി. എഞ്ചിനീയര്‍ അറിയിച്ചു.

കല്ലേലി തോട് നിറഞ്ഞു കവിഞ്ഞു അംബേദ്കര്‍ റോഡില്‍ വെള്ളക്കെട്ട്

ഇരിങ്ങാലക്കുട : ക്രൈസ്റ്റ് കോളേജ് റോഡിനു സമീപത്തുള്ള അംബേദ്കര്‍ റോഡില്‍ (പഴയ കോപ്പറേറ്റീവ് കോളേജ് റോഡ്) താമസിക്കുന്നവര്‍ക്ക് വീട്ടിലെത്താന്‍ ഇനി വഞ്ചി വേണം. ഈ വഴിയുടെ അരികില്‍ കൂടി പോകുന്ന കല്ലേലി തോട് നിറഞ്ഞു കവിഞ്ഞു റോഡും തോടും പ്രദേശ വാസികള്‍ക്ക് തിരിച്ചറിയാന്‍ പറ്റാത്ത അവസ്ഥയിലാണ്. കുട്ടികള്‍ റോഡിനരികില്‍ കൂടി പോകുമ്പോള്‍ നിറഞ്ഞൊഴുകുന്ന തോട്ടിലേക്ക് കാല്‍ വഴുതി വീഴുന്നത് നിത്യസംഭവം ആയിരിക്കുകയാണ് . കല്ലേലി തോടില്‍ മാലിന്യങ്ങള്‍ അടിഞ്ഞു കൂടി പലയിടത്തും മലിനജലം കെട്ടിക്കിടക്കുന്നതാണ് വെള്ളക്കെട്ടിന് കാരണം. പ്രദേശവാസികള്‍ നിരന്തരം പരാതികള്‍ മുനിസിപ്പല്‍ അധികാരികള്‍ക്ക് കൊടുത്തിട്ടും, ഇതിനൊരു പരിഹാരം കാണാന്‍ സാധിച്ചിട്ടില്ല. മഴ ഇനിയും കനത്തു പെയ്യുകയാണെങ്കില്‍ മഴയില്‍ നിറഞ്ഞൊഴുകുന്ന തൊടുവക്കത്തു കൂടിയുള്ള യാത്ര പ്രദേശവാസികള്‍ക്കു മഹാദുരിതം ആയി മാറും . മുനിസിപ്പാലിറ്റിയില്‍ നിന്നും അടിയന്തിര നടപടികള്‍ ഉണ്ടാകുമെന്ന പ്രത്യാശയിലാണ് ഇവിടത്തെ നാട്ടുകാര്‍.

ദേശാഭിമാനി അക്ഷരമുറ്റം ക്വിസ്‌ ഫെസ്‌റ്റിവല്‍ സീസണ്‍ 7ന്‌ സംഘാടക സമിതി രൂപീകരിച്ചു

ഇരിങ്ങാലക്കുട : ദേശാഭിമാനി അക്ഷരമുറ്റം ക്വിസ്‌ ഫെസ്‌റ്റിവല്‍ സീസണ്‍ 7ന്‌ സംഘാടക സമിതി രൂപീകരിച്ചു. സിപിഐ(എം) ഏരിയ സെക്രട്ടറി ഉല്ലാസ്‌ കളക്കാട്ട്‌ ഉദ്‌ഘാടനം ചെയ്‌തു. കെപി ദിവാകരന്‍ അധ്യക്ഷനായി. ദേശാഭിമാനി തൃശൂര്‍ യൂണിറ്റ്‌ മാനേജര്‍ ഐ പി ഷൈന്‍, അസിസ്‌റ്റന്റ്‌ മാനേജര്‍ ടോം പനയ്‌ക്കല്‍, സര്‍ക്കുലേഷന്‍ മാനേജര്‍ ടിആര്‍ ദാസ്‌, കെഎസ്‌ടിഎ ജില്ലാ ട്രഷറര്‍ പിവി ഉണ്ണികൃഷ്‌ണന്‍ എന്നിവര്‍ സംസാരിച്ചു. കെസി പ്രേമരാജന്‍ സ്വാഗതവും കെപി ഹരി നന്ദിയും പറഞ്ഞു. ഭാരവാഹികള്‍ – വിഎ മനോജ്‌കുമാര്‍ ( ഇരിങ്ങാലക്കുട ബ്ലോക്ക്‌പഞ്ചായത്ത്‌ പ്രസിഡന്റ്‌. ചെയര്‍മാന്‍) കെസി പ്രേമരാജന്‍ (കണ്‍വീനര്‍)

വിദ്യാഭ്യാസ – തൊഴില്‍ മേള : ജൂലൈ 1 ന് ടൗണ്‍ ഹാളില്‍

ഇരിങ്ങാലക്കുട : ഇന്ദിരാഗാന്ധി ജന്മശതാബ്‌ദി വര്‍ഷത്തോടനുബന്ധിച്ചു ഇരിങ്ങാലക്കുടയിലെ കലാ-സാംസ്‌കാരിക വിദ്യഭ്യാസ ആരോഗ്യ മേഖലകളില്‍ പ്രവര്‍ത്തിക്കുന്ന സംഘടനയായ പ്രിയദര്‍ശിനി കലാസാംസ്കാരിക വേദിയുടെ ആഭിമുഖ്യത്തില്‍ ജൂലൈ 1 ശനിയാഴ്ച രാവിലെ 10 മണിക്ക് ടൗണ്‍ ഹാളില്‍ പ്ലസ് ടു വിനും എസ് എസ് എല്‍ സി ക്കും മുഴുവന്‍ എ പ്ലസ് നേടിയ വിദ്യാര്‍ത്ഥികളെ പുരസ്‌കാരം നല്‍കി ആദരിക്കുന്നു . സാധാരണ സ്കൂളുകളില്‍ പഠിച്ച് മികച്ച വിജയം നേടിയ വിദ്യാര്‍ത്ഥികളെയാണ് ആദരിക്കുന്നത് .തുടര്‍ന്ന് ഒരു വിദ്യാഭ്യാസ തൊഴില്‍ സംരംഭത്വ മേളയും സംഘടിപ്പിക്കുന്നു . പ്രശസ്ത മാനേജ്മെന്റ് വിദഗ്ധരും സൈക്കോളജിസ്റ്റുകളും പങ്കെടുക്കുന്ന വിവിധ സെമിനാറുകളും നടക്കുന്നു . വിദ്യാഭ്യാസം കഴിഞ്ഞു ഒരു നല്ല കരിയര്‍ തുടങ്ങാന്‍ ഉദ്ദേശിക്കുന്നവര്‍ക്കും ,കേരളത്തിന് പുറത്തും വിദേശ രാജ്യങ്ങളിലും ഉപരിപഠനം ആഗ്രഹിക്കുന്നവര്‍ക്കും സ്കോളര്‍ഷിപ്പുകള്‍ എന്നിവയെ കുറിച്ചു അറിയുന്നതിനും ഏറെ പ്രയോജനപ്പെടും . ഇന്ത്യന്‍ യൂണിവേഴ്സിറ്റികള്‍ ,വിദേശ യൂണിവേഴ്സിറ്റികള്‍ ,ഇന്റര്‍നാഷണല്‍ സെര്‍ട്ടിഫിക്കറ്റുകള്‍ നല്‍കുന്ന സ്ഥാപനങ്ങള്‍ തുടങ്ങി മുപ്പതിലധികം സ്ഥാപനങ്ങള്‍ പങ്കെടുക്കുന്ന 300 -ല്‍ പരം കോഴ്സുകളെകുറിച്ചും അറിയാവുന്നതാണ് . കൂടാതെ കേരളത്തിലെ കുട്ടികള്‍ക്ക് എയര്‍ ട്രാഫിക് കണ്‍ട്രോളര്‍ എന്ന പഠന വിഭാഗവും പരിചയപ്പെടുത്തുന്നു. വിദ്യാഭ്യാസ മേള രാജീവ് ഗാന്ധി പഠന കേന്ദ്രം ചെയര്‍മാന്‍ ജോസ് വള്ളൂര്‍ ഉദ്ഘാടനം ചെയ്യും. മുന്‍സിപ്പല്‍ ചെയര്‍പേഴ്സണ്‍ നിമ്യ ഷിജു വിദ്യാര്‍ത്ഥികള്‍ക്ക് പുരസ്‌കാര സമര്‍പ്പണം നടത്തുന്നു . വെള്ളാങ്കല്ലുര്‍ ബ്ലോക്ക് പഞ്ചായത്ത് മെമ്പര്‍ തോമസ് കോലംകണ്ണി , ഇരിങ്ങാലക്കുട വികസനകാര്യ സ്റ്റാന്റിംഗ് കമ്മിറ്റി ചെയര്‍മാന്‍ അഡ്വവി സി വര്‍ഗീസ് എന്നിവര്‍ മുഖ്യാതിഥികള്‍ ആയിരിക്കും. പ്രിയദര്‍ശിനി കലാ സാംസ്‌കാരിക വേദി പ്രസിഡന്റ് പി കെ ഭാസി അദ്ധ്യക്ഷത വഹിക്കും.

നഗരത്തില്‍ കമാനങ്ങളും ഫ്‌ളക്‌സ് ബോര്‍ഡുകളും വയ്ക്കുന്നതിന് പോലിസ് നിയന്ത്രണം

ഇരിങ്ങാലക്കുട: ഗതാഗത കുരുക്ക് രൂക്ഷമായ ഇരിങ്ങാലക്കുട നഗരത്തില്‍ കമാനങ്ങള്‍ സ്ഥാപിക്കുന്നതിന് പോലിസ് നിയന്ത്രണം ഏര്‍പ്പെടുത്തി. വാഹനഗതാഗതത്തിന് തടസ്സം സൃഷ്ടിക്കുന്ന തരത്തില്‍ പരസ്യ കമാനങ്ങള്‍ വയ്ക്കുന്നതും പൊതുജനങ്ങളുടെ ജീവന് ഭീഷണി ഉയര്‍ത്തുന്ന രീതിയില്‍ ഫ്‌ളക്‌സ് ബോര്‍ഡുകള്‍ സ്ഥാപിക്കുന്നതുമാണ് പോലിസ് തടഞ്ഞിരിക്കുന്നത്. കമാനങ്ങള്‍ റോഡിലേക്ക് കയറ്റി വയ്ക്കുന്നതുമൂലം ബസ് സ്റ്റാന്റ് ഠാണ റോഡില്‍ ഏറെ ഗതാഗത കുരുക്കാണ് അനുഭവപ്പെടുന്നത്. ഭൂരിഭാഗം പേരും അനുമതിയില്ലാതെയാണ് കമാനങ്ങള്‍ സ്ഥാപിക്കുന്നത്. ഈ സാഹചര്യത്തിലാണ് നടപടി ശക്തമാക്കാന്‍ പോലിസ് തിരുമാനിച്ചിരിക്കുന്നത്. ഇത്തരത്തില്‍ ഫ്‌ളക്‌സുകളും കമാനങ്ങളും വയ്ക്കുന്നവര്‍ക്കെതിരെ നിയമനടപടി സ്വീകരിക്കുമെന്ന് ഇരിങ്ങാലക്കുട എസ്.ഐ കെ.എസ് സുശാന്ത് അറിയിച്ചു.

ഹരിത പൂര്‍വ്വം – ഞാറ്റുവേല സസ്യവല്‍ക്കരണ പരിപാടി ജൂലൈ 2 ന്

ഇരിങ്ങാലക്കുട : നൂറ്റൊന്നംഗ സഭയുടെ ഈ വര്‍ഷത്തെ ഞാറ്റുവേല സസ്യവല്‍ക്കരണ പരിപാടി ജൂലൈ 2 ഞായറാഴ്ച രാവിലെ 9 മണിക്ക് കാരുകുളങ്ങര നൈവേദ്യം അങ്കണത്തില്‍ നടക്കും . കേരള വനംവകുപ്പിന്റെ സഹകരണത്തോടെ നടത്തുന്ന പരിപാടിയുടെ ഉദ്ഘാടനം ചാലക്കുടി ഡിവിഷണല്‍ ഫോറസ്റ്റ് ഓഫീസര്‍ ആര്‍ കീര്‍ത്തി നിര്‍വഹിക്കും എന്ന് സഭക്കു വേണ്ടി ചെയര്‍മാന്‍ ഡോ. ഇ പി ജനാര്‍ദ്ദനന്‍ , ജനറല്‍ കണ്‍വീനര്‍ എം സനല്‍ കുമാര്‍ , സെക്രട്ടറി പി രവി ശങ്കര്‍ ,ട്രഷറര്‍ എം നാരായണന്‍കുട്ടി എന്നിവര്‍ പറഞ്ഞു.

ശ്രീലക്ഷ്മി ഗോവര്‍ദ്ധനന്‍ ഏപ്രില്‍ 24 മുതല്‍ 29 വരെ നൃത്തകല ക്യാമ്പ് സംഘടിപ്പിക്കുന്നു

ഇരിങ്ങാലക്കുട : പ്രശസ്ത നര്‍ത്തകി ശ്രീലക്ഷ്മി ഗോവര്‍ദ്ധനന്‍ ഇരിങ്ങാലക്കുടയില്‍ ഏപ്രില്‍ 24 മുതല്‍ 29 വരെ നൃത്തകല ക്യാമ്പ് സംഘടിപ്പിക്കുന്നു. ബാഹ്യമായി നൃത്തകലയെ പഠിക്കുന്നതിന്നപ്പുറം നൃത്തകലയുമായി ബന്ധപ്പെട്ട മറ്റു വിഷയങ്ങളെയും സമഗ്രമായി സമീപിച്ച് ആ വിഷയങ്ങളുമായുള്ള അവബോധം നൃത്തം പഠിക്കുന്ന വിദ്യാര്‍ത്ഥികളില്‍ വളര്‍ത്തുക എന്ന ലക്ഷ്യത്തോടെയാണ് ഈ ക്യാമ്പ് സംഘടിപ്പിക്കുന്നത് . രാവിലെ 8 മണി മുതല്‍ വൈകിട്ട് 5 മണി വരെ നീണ്ടു നില്‍ക്കുന്ന രീതിയിലാണ് 6 ദിവസത്തെ നൃത്തകല ക്യാമ്പ് വിഭാവനം ചെയ്തിരിക്കുന്നത് . ദിവസേന രാവിലെ കുച്ചിപ്പുടിയുടെ സമ്പ്രദായികമായ ശൈലികളെയും അതിലെ ഭേദശുദ്ധികളെയും കുറിച്ചുമുള്ള ആധികാരികമായ ക്ലാസ്സുകള്‍ക്ക് ശേഷം പ്രശസ്ത ഗായകന്‍ സുരേഷ് നീലംപേരൂര്‍ നയിക്കുന്ന നൃത്തത്തിലെ താളത്തെ കേന്ദ്രികരിച്ച ക്ലാസുകള്‍ ഒരുക്കിയിട്ടുണ്ട് . എല്ലാ ദിവസവും ഉച്ചക്ക് ശേഷം പ്രത്യേകം ക്ഷണിക്കപ്പെട്ട പ്രമുഖ കലാകാരന്മാരും കലാ വിചക്ഷണരും പങ്കെടുക്കുന്ന പഠന ക്ലാസ്സുകളും ഈ ക്യാമ്പിന്റെ മുഖ്യ ആകര്‍ഷണമാണ്. 24ന് പ്രശസ്ത ഗായിക മീര രാം മോഹന്‍ അഭിനയ സംഗീതത്തിലെ വഴികള്‍ എന്ന വിഷയത്തെ കേന്ദ്രീകരിച്ചു ക്ലാസ് എടുക്കുന്നു . 25ന്പ്രശസ്ത കൂടിയാട്ട കലാകാരന്‍ സൂരജ് നമ്പ്യാര്‍ രസാഭിനയത്തെ കേന്ദ്രീകരിച്ചു ക്ലാസ് എടുക്കുന്നു. 26ന് സാഹിത്യ ആസ്വാദകന്‍ സുരേഷ് മാധവന്‍ കാവ്യബിംബങ്ങളെ കുറിച്ച് ക്ലാസ് എടുക്കുന്നു. 27ന് ശ്രീലക്ഷ്മി ഗോവര്‍ധന്‍ നൃത്തകലകളിലെ ബിംബങ്ങളെ കേന്ദ്രീകരിച്ചു ക്ലാസ് എടുക്കുന്നു. 28ന് ആയോധനകല വിദഗ്ധനും വൈല്‍ഡ് ലൈഫ് ഫോട്ടോഗ്രാഫറുമായ എന്‍ എ നസിര്‍ ഒരുക്കുന്ന പ്രകൃതിയിലെ ചലനങ്ങള്‍ ശരീരത്തില്‍ എങ്ങനെ നൃത്തമാകുന്നു എന്ന വിഷയത്തെ കേന്ദ്രീകരിച്ച് ക്ലാസ് എടുക്കുന്നു . 29ന് ക്യാമ്പില്‍ പങ്കെടുത്തവരുടെ അവതരണങ്ങളും ഒപ്പം ശ്രീലക്ഷ്മി ഗോവര്‍ദ്ധനന്‍ അവതരിപ്പിക്കുന്ന സോളോ പെര്‍ഫോമന്‍സും ഉണ്ടായിരിക്കും. നൃത്തകല ക്യാമ്പില്‍ പങ്കെടുക്കുവാന്‍ താല്‍പ്പര്യമുള്ള വിദ്യാര്‍ത്ഥി വിദ്യാര്‍ത്ഥിനികള്‍ കൂടുതല്‍ വിവരങ്ങള്‍ക്ക് ബന്ധപ്പെടുക 9895222413.

ഇന്ത്യന്‍ ഫാഷന്‍ ലീഗ് IFL കൊച്ചിയില്‍

എസ്പാനിയോ ഇവെന്റ്സ് അവതരിപ്പിക്കുന്ന കേരളത്തിലെ ബിഗ് ബഡ്ജറ്റ് ഡിസൈനര്‍ ഷോ യാണ് ” IFL – ഇന്ത്യന്‍ ഫാഷന്‍ ലീഗ് ” 2017 ഓഗസ്റ്റ് ആദ്യ പകുതിയില്‍ കൊച്ചിയിലെ പ്രധാനപ്പെട്ട വേദിയിലായിരിക്കും 2 ദിവസങ്ങളിലായി IFL നടക്കുക. ഇന്ത്യയിലെ പ്രഗത്ഭരായ ഡിസൈനര്‍മാരുടെ ഫാഷന്‍ ഷോയോടോപ്പോം പ്രധാനപ്പെട്ട എല്ലാ ഡിസൈനേഴ്സ് കളക്ഷനുകളുടെ ഷോകേസ്സ്‌സിങ്ങും ഉണ്ടാകും. IFL ലോഗോ ലോഞ്ച് ഗോകുലം കണ്‍വെന്‍ഷന്‍ സെന്ററില്‍ പ്രശസ്ത മോഡലും ചലച്ചിത്ര നടിയുമായ നേഹ സക്‌സേന പ്രകാശനം ചെയ്തു. ഡാലു കൃഷ്ണനും ഷായി ഷോബോയും പിന്നണിയില്‍ പ്രവര്‍ത്തിക്കുന്ന IFL ഷോ സംവിധാനം ചെയുന്നത് ഇടവേള ബാബു ആണ്.

ക്യാമ്പസ് ഓര്‍മകളുണര്‍ത്തി ക്രൈസ്റ്റ് കോളേജില്‍ 1998-2001 പൂര്‍വവിദ്യാര്‍ഥി സംഗമം : തത്സമയം ഇപ്പോള്‍ ഇരിങ്ങാലക്കുടലൈവ് ഡോട്ട് കോമില്‍

ഇരിങ്ങാലക്കുട : ക്യാമ്പസ്സിന്റെ ഗൃഹാതുരത്വ ഓര്‍മകളുണര്‍ത്തികൊണ്ട് 1998 – 2001 ലെ വിദ്യാര്‍ഥികള്‍ ക്രൈസ്റ്റ് കോളേജില്‍ ഒത്തു കൂടി. ക്യാമ്പസ് റിഡക്‌സ്‌ ’16 എന്ന് പേരിട്ടിരിക്കുന്ന ഈ പൂര്‍വ വിദ്യാര്‍ത്ഥി സംഗമത്തില്‍ വിവിധ ബാച്ചുകളിലെ വിദ്യാര്‍ത്ഥികള്‍ ഒരുമിച്ചു കൂടിയിട്ടുണ്ട്. രാവിലെ 10.30 മുതല്‍ 4.30 വരെയാണ് പരിപാടികള്‍ നടന്നു വരുന്നത്. ഇപ്പോള്‍ തത്സമയം ഇരിങ്ങാലക്കുട ലൈവ് ഡോട്ട് കോമില്‍ കാണുവാനായി ഇവിടെ ക്ലിക്ക് ചെയ്യുക.

Top
Close
Menu Title