News

Category: Crime

വാട്സാപ്പ് ഗ്രൂപ്പ് വഴി വാറ്റുചാരായ വില്‍പ്പന നടത്തുന്ന യുവാക്കള്‍ പിടിയില്‍

ഇരിങ്ങാലക്കുട : മദ്യപാനികളായ ഉപഭോക്താക്കളെ മാത്രം ഉള്‍പ്പെടുത്തിയ വാട്സ്ആപ് ഗ്രൂപ്പിലൂടെ മദ്യവിതരണം നടത്തുന്ന സംഘത്തെ വാറ്റുചാരായവുമായി പോലീസ് പിടികൂടി. ചാലക്കുടി-പോട്ട കേന്ദ്രമാക്കിയ നിര്‍മാണ കേന്ദ്രത്തില്‍ നിന്ന് ഇരിങ്ങാലക്കുടയിലേക്ക് വില്‍പ്പനയ്ക്കായി ഓട്ടോറിക്ഷയില്‍ കൊണ്ടുവന്ന 25 ലി ചാരായവുമായി എത്തിയ കനകമല സ്വദേശികളായ കല്ലിങ്ങപ്പുറം സുധീഷ്(29), വെള്ളാംപറമ്പില്‍ വിപിന്‍ (27), ഓട്ടോറിക്ഷ ഡ്രൈവര്‍ ചേലക്കന്‍ സുഗേഷ് (19) എന്നിവരെ പോലീസിനെ വെട്ടിച്ചു കടക്കുന്നതിനിടെ ഇരിങ്ങാലക്കുട നഗരസഭാ മൈതാനത്തിനു സമീപത്തു നിന്ന് സി ഐ എം കെ സുരേഷ്കുമാറും സംഘവും അറസ്റ്റ് ചെയ്തു. ചാലക്കുടിയിലെ വാടക വീട്ടില്‍ നിര്‍മിച്ച ചാരായവുമായി ഇവര്‍ വില്‍പ്പനയ്ക്ക് വരുന്നുണ്ടെന്നു രഹസ്യ വിവരം ഡി വൈ എസ് പി ഫേമസ് വര്‍ഗീസിന് ലഭിച്ചതിനെ തുടര്‍ന്ന് ഇവരുടെ ഓട്ടോറിക്ഷ ഠാണാവില്‍ വച്ച് പോലീസ് കൈ കാണിച്ചെങ്കിലും നിര്‍ത്താതെ പോകുകയായിരുന്നു. ഓട്ടോറിക്ഷയില്‍ ലൗഡ് സ്പീക്കറിനുള്ളിലെ രഹസ്യ അറയിലായിരുന്നു ചാരായം സൂക്ഷിച്ചിരുന്നത്. 8 മാസക്കാലമായി ഈ രീതിയില്‍ വില്‍പ്പന നടത്തിയിരുന്നതായി പ്രതികള്‍ പോലീസിനോട് സമ്മതിച്ചു.ഒന്നാം പ്രതി സുധീഷിന് വധശ്രമം ഉള്‍പ്പെടെ 22 ഓളം ക്രിമിനല്‍ കേസുകള്‍ നിലവിലുണ്ട്. കൂട്ടുപ്രതികളും പല കേസുകളിലും ഉള്‍പ്പെട്ടിട്ടുണ്ട്. പ്രതികളെ പിടികൂടിയ സംഘത്തില്‍ ഇരിങ്ങാലക്കുട എസ് ഐ മാരായ കെ എസ് സുശാന്ത്, തോമസ് വടക്കന്‍, റോയ് രാമചന്ദ്രന്‍, സീനിയര്‍ സി പി ഒ മാരായ മുരുകേഷ് കടവത്ത് , മുഹമ്മദ് അഷ്‌റഫ് , എം കെ ഗോപി, സി പി ഒ മാരായ പി കെ മനോജ്, എ കെ മനോജ്, ജീവന്‍ ഇ എസ് , ജോഷി ജോസഫ് എന്നിവര്‍ ഉണ്ടായിരുന്നു.

മദ്യപിച്ച് സ്കൂള്‍ബസ് ഓടിച്ച ഡ്രൈവര്‍ അറസ്റ്റില്‍ : ലൈസന്‍സ് റദ്ദ് ചെയ്തു

കരുവന്നൂര്‍ : നിറയെ സ്കൂള്‍ കുട്ടികളുമായി പോകുന്ന സ്കൂള്‍ ബസ്സിന്റെ വരവില്‍ പന്തികേടുതോന്നിയ പോലീസ് വാഹനം പരിശോധിച്ചപ്പോള്‍ ഡ്രൈവര്‍ മദ്യപിച്ചതായി കണ്ടെതിയതിനെ തുടര്‍ന്ന് അറസ്റ്റ് ചെയ്യുകയും തുടര്‍ന്ന് അയാളുടെ ഡ്രൈവിംഗ് ലൈസന്‍സ് റദ്ദ് ചെയ്തു. മാപ്രാണം സ്വദേശി തൊഴുത്തുംപറമ്പില്‍ കൊച്ചുപോളിനെയാണ് (55) ഇരിങ്ങാലക്കുട ട്രാഫിക് എസ് ഐ തോമസ് വടക്കന്‍ പരിശോധനയില്‍ പിടികൂടിയത്. വെള്ളിയാഴ്ച 4 മണിയോടെയായിരുന്നു സംഭവം. ഒരു ട്രിപ്പ് പോയിവന്നു രണ്ടാമത്തെ ട്രിപ്പിലാണ് ഡ്രൈവര്‍ പിടിയിലായത്. വിദ്യാര്‍ത്ഥികളെ മറ്റൊരു വാഹനത്തില്‍ വീടുകളിലെത്തിക്കാന്‍ പോലീസ് നടപടിയെടുത്തു. സ്കൂള്‍ ബസ്സുകളില്‍ വരും ദിവസങ്ങളിലും പരിശോധനയുണ്ടാകുമെന്നു പോലീസ് അറിയിച്ചു. സംഘത്തില്‍ സി.പി.ഓമാരായ രാകേഷ്, സത്യന്‍ എന്നിവരും ഉണ്ടായിരുന്നു.

യാത്രക്കാരിയോട് അപമര്യാദയായി പെരുമാറിയ ബസ് കണ്ടക്ടറെ അറസ്റ്റ് ചെയ്തു

ഇരിങ്ങാലക്കുട : കഴിഞ്ഞ ദിവസം യാത്രക്കാരിയോട് അപമര്യാദയായി പെരുമാറിയ തൃശ്ശൂര്‍- കൊടുങ്ങല്ലൂര്‍ റൂട്ടില്‍ സര്‍വ്വീസ് നടത്തുന്ന എം.എസ് മേനോന്‍ ബസ് കണ്ടക്ടര്‍ തുമ്പൂര്‍ സ്വദേശി പറപ്പുള്ളി അന്സന്‍ ജോസിനെ (23) ഇരിങ്ങാലക്കുട എസ്.ഐ കെ.എസ് സുശാന്ത് അറസ്റ്റ് ചെയ്തു. കോമ്പാറയില്‍ നിന്നും ഇരിങ്ങാലക്കുടയിലേക്ക് ബസ്സില്‍ കയറിയ യുവതി പത്ത് രൂപ നല്‍കിയപ്പോള്‍ കണ്ടക്ടര്‍ ബാക്കി തരില്ലെന്ന് പറയുകയും അപമര്യാദയായി പെരുമാറുകയും അസഭ്യം പറയുകയുമായിരുന്നെന്ന് യുവതി ഇരിങ്ങാലക്കുട പോലിസ് സ്‌റ്റേഷനിലെത്തി പരാതി നല്‍കിയിരുന്നു. എന്നാല്‍ ബസ് ട്രിപ്പ് തുടരുകയും വീണ്ടും ട്രിപ്പ് എടുക്കുകയും ചെയ്തിട്ടും ബസ് കണ്ടക്ടര്‍ക്കെതിരെ പോലിസ് നടപടിയെടുത്തില്ലെന്ന് ആക്ഷേപിച്ച് യുവതി വീണ്ടും രംഗത്തുവരികയിരുന്നു. ഇത് വിവാദമായതോടെ ബുധനാഴ്ച പോലീസ് ബസ് കണ്ടക്ടറെ അറസ്റ്റ് ചെയ്തു. ഇതിനിടെ വനിത സ്റ്റേഷനില്‍ യുവതി നല്‍കിയ പരാതിയില്‍ യുവതിയുടെ പേരും നമ്പറും ബസ്സിന്റെ ഉടമയെ അറിയിക്കുകയും അവര്‍ വിളിച്ച് ഒത്തുതീര്‍പ്പിന്റെ പേരില്‍ ബുദ്ധിമുട്ടിച്ചതായും യുവതി വ്യക്തമാക്കിയിരുന്നു. എന്നാല്‍ ഇത് പോലീസ് അല്ലാ നല്‍കിയതെന്ന് ഇരിങ്ങാലക്കുട എസ്.ഐ കെ.എസ് സുശാന്ത് പറഞ്ഞു. ഇത്തരം ആരോപണം വന്നതിനെ തുടര്‍ന്നു പ്രത്യേക അന്വേഷണം നടത്തിയതിനെ തുടര്‍ന്ന് , സംഭവം നടന്നതിന് ശേഷം യുവതി സര്‍വ്വീസ് നടത്തുന്ന എം.എസ് മേനോന്‍റെ മറ്റൊരു ബസ്സില്‍ കയറുകയും അതിലെ കണ്ടക്ടര്‍ നിഖിലിന് തന്റെ വിവരങ്ങള്‍ കൈമാറുകയായിരുനെന്നും പോലീസ് പറയുന്നു. ബസ്സുകളില്‍ യാത്രക്കാര്‍ക്ക് ജീവനക്കാരില്‍ നിന്നും മോശം അനുഭവമുണ്ടായാല്‍ ബസ്സ്റ്റാന്‍ഡിലെ ഡ്യൂട്ടിയിലുള്ള പോലിസിനെയോ അല്ലെങ്കില്‍ പോലീസ് സ്റ്റേഷനിലോ അറിയിച്ചാല്‍ വേണ്ട നടപടികള്‍ ഉണ്ടാക്കുമെന്ന് എസ്.ഐ അറിയിച്ചു.

സ്നേഹഭവന്‍ ഡയറക്ടര്‍ ഫാ:ജോയ് വൈദ്യക്കാരനെ ആക്രമിച്ച രണ്ടംഗ സംഘം പോലീസ് പിടിയില്‍ : ഗൂഢാലോചനയില്‍ ഉന്നതര്‍ക്കും പങ്കെന്ന് പോലീസ്

ഇരിങ്ങാലക്കുട : സ്നേഹഭവന്‍ ഡയറക്ടര്‍ ഫാ: ജോയ് വൈദ്യക്കാരന് നേരെ ബൈക്കിലെത്തി ആക്രമണം നടത്തിയ രണ്ടംഗ സംഘത്തെ പോലീസ് പിടികൂടി. കോടാലി മറ്റത്തൂര്‍ വിജയവിലാസം വീട്ടില്‍ മനീഷ്‌കുമാര്‍ (32 ) , കൊടകര വാസുപുരം മരോട്ടിക്കുന്ന് വീട്ടില്‍ രാകേഷ് (30 ) എന്നിവരെയാണ് പോലീസ് പിടികൂടിയത് . സ്നേഹഭവനില്‍ കരാര്‍ ജോലി ഏറ്റെടുത്ത ആളുടെ പണിക്കാരാണ് അറസ്റ്റിലായ രണ്ടുപേര്‍. വ്യക്തിവൈരാഗ്യം ആണ് അക്രമത്തിനു പുറകില്‍ എന്നും പോലീസ് പറയുന്നു. പ്രതികളും സ്നേഹഭവന്‍ ഐ ടി സി യുമായി ബന്ധമുള്ള ചിലരും നടത്തിവന്നിരുന്ന നിര്‍മ്മാണ പ്രവൃത്തികളുമായി ഉണ്ടായ അഭിപ്രായ വ്യാത്യാസങ്ങളും മറ്റു ചില സംഭവങ്ങളും ആണ് തര്‍ക്കത്തിന് കാരണം എന്ന് പോലീസ് പറയുന്നു. സംഭവത്തിന്റെ ഗൂഢലയോചനയുമായി ബന്ധപ്പെട്ട ഉന്നതരായ പ്രതികളെ ഇനിയും പിടി കൂടാനുണ്ട്. പ്രതികള്‍ പോലീസിന്റെ നീരിക്ഷണത്തിലാണ് . ജൂണ്‍ 24 ന് വൈകിട്ട് ആറരയോടെ ബൈക്കിലെത്തിയ രണ്ടംഗ സംഘം ആക്രമണം നടത്തിയത്. ക്രൈസ്റ്റ് കോളേജ് റോഡിലുള്ള സ്നേഹഭവന്റെ വരാന്തയില്‍ നില്‍ക്കുമ്പോഴായിരുന്നു ആക്രമണം .കോട്ടിട്ടു കൊണ്ട് ബൈക്കില്‍ എത്തിയ രണ്ടംഗ സംഘത്തില്‍ ഒരാള്‍ ഇറങ്ങി ചെന്ന് ഇരുമ്പുവടി കൊണ്ട് ഫാ.ജോയിയുടെ കൈയ്യിലും കാലിലും അടിക്കുകയായിരുന്നു. ഉടന്‍ തന്നെ സംഘം ബൈക്കിലേറി പോയി. ആക്രമണത്തില്‍ ഫാ. ജോയുടെ കാലിന് ഒടിവു സംഭവിച്ചു അദ്ദേഹം ഇപ്പോള്‍ ചികിത്സയിലാണ്. തൃശൂര്‍ റൂറല്‍ ജില്ലാ പോലീസ് മേധാവി എന്‍ വിജയകുമാര്‍ ഐ പി എസിന്റെ നിര്‍ദേശപ്രകാരം ഇരിങ്ങാലക്കുട ഡി വൈ എസ്‌ പി ഫെയ്മസ് വര്‍ഗീസിന്റെ നേതൃത്വത്തില്‍ ഇരിങ്ങാലക്കുട സി ഐ എം സുരേഷ്‌കുമാര്‍ , എസ്‌ ഐ കെ എസ്‌ സുശാന്ത്, പ്രൊബേഷനറി എസ്‌ ഐ കെ മണികണ്ഠന്‍ , എ എസ്‌ ഐ വിജു പൗലോസ് , സിനിയര്‍ സി പി ഒ മാരായ കെ എം മുഹമ്മദ് അഷറഫ് , മുരുകേഷ് കടവത്ത്, എം കെ ഗോപി, സി പി ഒ മാരായ മനോജ് അത്തിക്കായ് , രാജീവ് വി ബി , മനോജ് പേരാമ്പ്ര എന്നിവരടങ്ങിയ പ്രത്യേക അന്വേഷണ സംഘമാണ് കേസ് അന്വേഷിച്ചത്.

വിവാഹവീട്ടില്‍ ആക്രമണം നടത്തിയ പ്രതികള്‍ പിടിയില്‍

ഇരിങ്ങാലക്കുട :  ഗാന്ധിഗ്രാം മാളിയേക്കല്‍ മിലന്‍റെ വിവാഹത്തലേന്ന് വീട്ടില്‍ അതിക്രമിച്ചു കയറി സഹോദരന്മാരെ വധിക്കാന്‍ ശ്രമിച്ച കുറ്റത്തിന് മൂന്ന് പേര്‍ പിടിയിലായി . പൊലിയത്ത് വീട്ടില്‍ ഫ്രെഡി(25 ) , ഇരിങ്ങാലക്കുട കെ എസ്‌ പാര്‍ക്കില്‍, കല്ലേറ്റിണ്ടല്‍ പ്രിജോ (26 ), മാപ്രാണം ഓട്ടാറാട്ട് വീട്ടില്‍ ബിബിന്‍ (30 ) എന്നിവരെയാണ് ഇരിങ്ങാലക്കുട എസ്‌ ഐ കെ എസ്‌ സുശാന്ത് , സര്‍ക്കിള്‍ ഇന്‍സ്‌പെക്ടര്‍ എം കെ സുരേഷ് കുമാര്‍ എന്നിവര്‍ അറസ്റ്റ് ചെയ്തത്.വിവാഹവീട്ടില്‍ മദ്യപിച്ചു വന്നു സ്ത്രീകളോട് മോശമായി പെരുമാറിയത് അയല്‍വാസിയും ബന്ധുക്കളുമായ മാളിയേക്കല്‍ വീട്ടില്‍ ഡിക്സണും സഹോദരന്‍ വിത്സനും ചോദ്യം ചെയ്തിരുന്നു. തുടര്‍ന്ന് മദ്യലഹരിയിലായിരുന്ന പ്രതികള്‍ ഭക്ഷണം പാചകം ചെയ്യാന്‍ കൊണ്ടുവന്ന ചട്ടുകവും മറ്റു ആയുധങ്ങളുമായി സഹോദരങ്ങളെ ആക്രമിക്കുകയായിരുന്നു. ആക്രമണത്തില്‍ തലക്ക് ഗുരുതര പരിക്കുപറ്റിയ ഇരുവരും ഇരിങ്ങാലക്കുട ഗവ. താലൂക് ആശുപത്രയില്‍ ചികിത്സയിലാണ് .ഈ മൂന്ന് പ്രതികളും ഇരിങ്ങാലക്കുട പോലീസ് സ്റ്റേഷന്‍ പരിധിയിലെ റൗഡികളും തൃശൂര്‍ ജില്ലയിലെ വിവിധ പോലീസ് സ്റ്റേഷനുകളിലുമായി നിരവധി ക്രിമിനല്‍ കേസില്‍ ഉള്‍പ്പെട്ടവരുമാണ്. അന്വേഷണസംഘത്തില്‍ എ എസ്‌ ഐ സി പി വിജു , സീനിയര്‍ സി പി ഒമാരായ മുരുകേഷ് കടവത്ത്, രഘു വി എസ്‌ , മനോജ് പി കെ , മനോജ് എ കെ എന്നിവരും ഉണ്ടായിരുന്നു.

ബസ്സില്‍ മോഷണം – തമിഴ് സ്ത്രീ അറസ്റ്റില്‍

പണം മോഷ്ടിച്ച് അറസ്റ്റിലായ നാഗര്‍കോവില്‍ സ്വദേശിനി മഹാലക്ഷ്മി

ഇരിങ്ങാലക്കുട : ബസ്സ് യാത്രക്കാരിയുടെ പേഴ്സില്‍ നിന്നും പണം മോഷ്ടിച്ച തമിഴ്നാട് നാഗര്‍കോവില്‍ വടശ്ശേരി സ്വദേശിനി കണ്ണന്‍ മകള്‍ മഹാലക്ഷ്മി( 28 ) എന്ന സ്ത്രീയെ ഇരിങ്ങാലക്കുട എസ് ഐ സുശാന്തും സംഘവും ബസ്സില്‍ നിന്നും പിടികൂടി. വെള്ളിയാഴ്ച രാവിലെ പുല്ലൂര്‍ മഞ്ഞളി വീട്ടില്‍ ജോര്‍ജിന്റെ ഭാര്യ സജിയുടെ ബാഗില്‍ നിന്നും 25000 രൂപ അടങ്ങിയ പേഴ്‌സ് ആണ് തമിഴ് സ്ത്രീ മോഷ്ടിച്ചത്. ഠാണാ സ്റ്റോപ്പില്‍ എത്തിയപ്പോള്‍ തന്റെ പണം നഷ്ടപെട്ടതറിഞ്ഞ യാത്രക്കാരി ഉടന്‍ തന്നെ ഇരിങ്ങാലക്കുട പോലീസില്‍ വിവരം അറിയിക്കുകയും ഉടനെ സ്ഥലത്തു എത്തിയ പോലീസ് യാത്രക്കാരെ പരിശോധിക്കുകയും ഒടുവില്‍ പണം മോഷ്ടിച്ച മഹാലക്ഷ്മിയെ പിടികൂടുകയുമയിരുന്നു. അറസ്റ്റിലായ പ്രതിക്ക് തമിഴ്‌നാട്ടിലെ കന്യാകുമാരി പോലീസ് സ്റ്റേഷന്‍ , നാഗര്‍കോവില്‍ പോലീസ് സ്റ്റേഷന്‍ തുടങ്ങി നിരവധി സ്റ്റേഷനുകളില്‍ 13 ഓളം കേസുകളില്‍ ഉള്‍പ്പെട്ടിട്ടുണ്ടെന്നും ,നിരവധി തവണ ജയില്‍ വാസം അനുഭവിച്ചിട്ടുണ്ടെന്നും ഇവര്‍ പോലീസിനോട് പറഞ്ഞു. പ്രത്യേകം അന്വേഷണസംഘത്തില്‍ സീനിയര്‍ സി പി ഒ മുരുകേഷ് കടവത്ത്, മുഹമ്മദ് അഷറഫ് , എം കെ ഗോപി, സി പി ഒ മാരായ പി കെ മനോജ്, എ കെ മനോജ്, എന്നിവരും, വനിതാ പോലീസുകാരി അപര്‍ണ ലവകുമാര്‍ എന്നിവരും സംഘത്തില്‍ ഉണ്ടായിരുന്നു. പണവും ആഭരണവും വിലപിടിപ്പുള്ള വസ്തുക്കളും നഷ്ടപ്പെടാതിരിക്കാന്‍ യാത്രക്കാര്‍ ജാഗ്രത പുലര്‍ത്തണമെന്നും പോലീസ് നിര്‍ദേശിച്ചു.

പോക്‌സോ കേസില്‍ ഒരാള്‍ അറസ്റ്റില്‍ : സുഹൃത്ത് അറസ്റ്റ് ഭയന്ന് തുങ്ങി മരിച്ചു

പോക്‌സോ കേസില്‍ അറസ്റ്റ് ചെയ്ത വള്ളിവട്ടം ഇയ്യാട്ടി പറമ്പില്‍ നാരായണന്‍ (40 )

വള്ളിവട്ടം : പ്രായപൂര്‍ത്തിയാവാത്ത ബാലനെ പ്രകൃതി വിരുദ്ധ പീഡനത്തിന് വിധേയമാക്കിയെന്ന പരാതിയെത്തുടര്‍ന്ന് പോലീസ് ഒരാളെ അറസ്റ്റ് ചെയ്തു. കേസില്‍ 3 പേരാണുള്ളത് . ഇതില്‍ ഒരാള്‍ പോലീസിന്റെ ചോദ്യം ചെയ്യലും അറസ്റ്റും ഭയന്ന് ആത്മഹത്യ ചെയ്തനിലയില്‍ കണ്ടെത്തി. ഇയ്യാട്ടി പറമ്പില്‍ നാരായണനെയാണ് (40 ) ഇരിങ്ങാലക്കുട പോലീസ് അറസ്റ്റ് ചെയ്തത്. ആക്ലിപ്പറമ്പില്‍ ശങ്കരനെ (70) താണിയത്തുപറമ്പില്‍ ബന്ധുവിന്റെ പറമ്പില്‍ തൂങ്ങിമരിച്ചനിലയില്‍ കണ്ടെത്തി. കേസില്‍ ഇയാളെയും ചോദ്യം ചെയ്യാനിരിക്കുകയായിരുനെന്നു ഇരിങ്ങാലക്കുട എസ് ഐ സുശാന്ത് പറഞ്ഞു.

ചേലൂരില്‍ റോഡരികില്‍ കക്കൂസ് മാലിന്യം തള്ളി രക്ഷപ്പെട്ടവരെ അറസ്റ് ചെയ്തു

ഇരിങ്ങാലക്കുട : കഴിഞ്ഞ ദിവസം രാത്രി ചേലൂരില്‍ റോഡരികില്‍ കക്കൂസ് മാലിന്യം തള്ളുന്നതിനിടയില്‍ വണ്ടി കേടായതിനെ തുടര്‍ന്ന് ലോറി ഉപേക്ഷിച്ചു രക്ഷപ്പെട്ട 3 പേരെ പോലീസ് അറസറ്റ് ചെയ്തു. ചേര്‍ത്തല സ്വദേശി വാരനാട് കരിയില്‍ വീട്ടില്‍ അജിത് നായര്‍, മലപ്പുറം താഴേക്കാട് സ്വദേശി ആലടി പീട് വീട്ടില്‍ മുഹമ്മദ് സാദിഖ് , കൊടുങ്ങലൂര്‍ കോതപറമ്പ് സ്വദേശി രാജീവ് പരിത്തേഴത്ത് എന്നിവരെയാണ് ഇരിങ്ങാലക്കുട എസ് ഐ സുശാന്ത് കെ എസിന്റെ നേതൃത്വത്തില്‍ പോലീസ് അറസ്റ്റ് ചെയ്തത്.

ചായക്കടയുടെ മറവില്‍ ലഹരി വില്‍പന നടത്തിയ ആളെ അറസ്റ്റ് ചെയ്തു

മാപ്രാണം : കുഴിക്കാട്ടുകോണത്ത് ചായക്കടയുടെ മറവില്‍ നിരോധിത പുകയില ഉല്‍പ്പന്നമായ ഹാന്‍സ് വിറ്റിരുന്ന മണികണ്ഠന്‍ (35) എന്നയാളെ ഇരിങ്ങാലക്കുട എസ് ഐ സുശാന്ത് കെ എസ് അറസ്റ്റു ചെയ്തു. ഇരിങ്ങാലക്കട സര്‍ക്കിള്‍ ഇന്‍സ്പെക്ടര്‍ സുരേഷ് കുമാറിനു ലഭിച്ച രഹസ്യവിവരത്തിന്റെ അടിസ്ഥാനത്തില്‍ പോലീസ് നടത്തിയ പരിശോധനയിലാണ് ഹാന്‍സ് പായ്ക്കറ്റുകള്‍ പിടിച്ചെടുത്തത്. മൂന്ന് രൂപക്ക് ലഭിക്കുന്ന പായ്ക്കറ്റുകള്‍ 50 രൂപക്കാണ് വിറ്റിരുന്നത് ഒന്നിലധികം പായ്ക്കറ്റുകള്‍ വാങ്ങുന്നവര്‍ക്ക് വിലയില്‍ ഇളവു നല്‍കിയിരുന്നു. ദൂരദിക്കുകളില്‍ നിന്നുമുള്ള സ്ക്കൂള്‍ വിദ്യാര്‍ത്ഥികളും ഡ്രൈവര്‍മാരും ഇവിടുത്തെ സ്ഥിരം ഉപഭോക്താക്കളാണ്. “മരുന്ന് ” എന്ന കോഡുഭാഷയില്‍ ആവശ്യപ്പെടുന്നവര്‍ക്കു മാത്രമാണ് സാധനം നല്‍കിയിരുന്നത്. ചാവക്കാട്ടുനിന്നുമാണ് ഹോള്‍സെയിലായി ഹാന്‍സ് എത്തിച്ചിരുന്നതെന്ന് പ്രതി പോലീസിനോട് പറഞ്ഞു അന്വേഷണ സംഘത്തില്‍ എ എസ് ഐ സുനില്‍ കുമാര്‍ കണ്ണങ്കാട്ടില്‍ സി പി ഓമാരായ രാകേഷ് പറപ്പറമ്പില്‍, രാഗേഷ് പൊറ്റേക്കാട്ട് എന്നിവര്‍ ഉണ്ടായിരുന്നു.

അമ്പതോളം മോഷണ കേസുകളിലെ പ്രതിയായ മദ്ധ്യവയസ്‌ക്കനെ അറസ്റ്റ് ചെയ്തു

ഇരിങ്ങാലക്കുട : അമ്പതോളം മോഷണ കേസുകളില്‍ പ്രതിയായ മദ്ധ്യവയസ്‌ക്കനെ ഇരിങ്ങാലക്കുട പോലിസ് അറസ്റ്റ് ചെയ്തു. കോടാലി മുരിക്കിങ്ങല്‍ ആളൂപറമ്പില്‍ ഉടുമ്പ് സുരേഷ് എന്ന സുരേഷ് (48)നെയാണ് കഴിഞ്ഞ ദിവസം രാത്രി ഇരിങ്ങാലക്കുട സി.ഐ എം.കെ സുരേഷ് കുമാറും സംഘവും അവിട്ടത്തൂരില്‍ നിന്നും പിടികൂടിയത്. കടുപ്പശ്ശേരി കോക്കാട്ടി വീട്ടില്‍ ജോണ്‍സന്‍ എന്നയാളുടെ ഫാം ഹൗസില്‍ നിന്നും അമ്പത് കിലോയോളം ജാതിക്കയും മറ്റും മോഷണം പോയിരുന്നു. ഇതിനെതിരെ ലഭിച്ച പരാതിയെ തുടര്‍ന്ന് പോലിസ് നടത്തിയ അന്വേഷണത്തിലാണ് പ്രതിയെ അറസ്റ്റ് ചെയ്തത്. സ്‌കൂള്‍ കാലം മുതലെ മോഷണം ആരംഭിച്ചയാളാണ് സുരേഷെന്ന് പോലിസ് പറഞ്ഞു. ഉയരം കൂടിയ മതിലുകളില്‍ പോലും വലിഞ്ഞുകയറുന്നതില്‍ പ്രാഗത്ഭ്യം നേടിയതിനാലാണ് ഇയാളെ ഉടുമ്പ് സുരേഷ് എന്ന് വിളിക്കുന്നത്. വെള്ളിക്കുളങ്ങര പോലിസ് സ്‌റ്റേഷന്‍ പരിധിയില്‍ മോഷണ കേസില്‍ പെട്ട് ജയിലിലായിരുന്ന പ്രതി ഏതാനും ദിവസം മുമ്പാണ് ശിക്ഷ കഴിഞ്ഞ് പുറത്തിറങ്ങിയത്. പെയിന്റിംഗ് തൊഴിലാളിയായ ഇയാള്‍ ജോലിക്ക് പോകുന്ന വീടുകള്‍ കേന്ദ്രീകരിച്ചാണ് കൂടുതല്‍ മോഷണം നടത്തിയിരിക്കുന്നത്. ഇരിങ്ങാലക്കുട, ചാലക്കുടി, കൊടകര, വരന്തരപ്പിള്ളി, പുതുക്കാട് തുടങ്ങി ജില്ലയിലെ വിവിധ സ്റ്റേഷനുകളിലായി ഇയാള്‍ക്കെതിരെ അമ്പതോളം മോഷണകേസുകള്‍ നിലവിലുണ്ട്. 12ഓളം മോഷണ കേസുകളില്‍ ശിക്ഷിക്കപ്പെട്ട് ജയില്‍വാസം അനുഭവിച്ചിട്ടുണ്ട്. ജാതിക്ക, റബ്ബര്‍ ഷീറ്റ്, കുരുമുളക് തുടങ്ങിയ കാര്‍ഷിക വിളകള്‍ മാത്രം മോഷ്ടിക്കുന്ന പ്രത്യേകതരം ശീലവും പ്രതിക്കുണ്ട്. എസ്.ഐ മാരായ കെ.എസ് സുശാന്ത്, ജോഷി പി.എ, സീനിയര്‍ സി.പി.ഒ മുരുകേഷ് കടവത്ത്, സി.പി.ഒ മാരായ മനോജ് പി.കെ, മനോജ് എ.കെ എന്നിവരും അന്വേഷണ സംഘത്തിലുണ്ടായിരുന്നു.

മദ്യലഹരിയില്‍ കുടുംബവഴക്ക് : അച്ഛന്‍ മകനെ വെട്ടിക്കൊലപ്പെടുത്തി

മുരിയാട് : മദ്യലഹരിയില്‍ വീട്ടുവഴക്കിനെത്തുടര്‍ന്ന് മുരിയാട് വെള്ളിലംകുന്നില്‍ അച്ഛന്‍ മകനെ വെട്ടിക്കൊലപ്പെടുത്തി. വെള്ളിലംകുന്ന് തോണിയില്‍ വീട്ടില്‍ രാഘവന്‍നായര്‍ (70) മകനായ ഗിരീഷിനെയാണ് വീട്ടില്‍ വച്ച് ചൊവാഴ്ച രാത്രി ഏഴരക്ക് കൊലപ്പെടുത്തിയത്. ഇരുവരും മദ്യപിച്ചെത്തി വീട്ടില്‍ ഉണ്ടായ വഴക്കിനെത്തുടര്‍ന്നാണ് നാടിനെ നടുക്കിയ കൊലപാതകം ഉണ്ടായതെന്ന് പോലീസ് പറയുന്നു. തര്‍ക്കം മൂത്തപ്പോള്‍ പിതാവായ രാഘവന്‍ നായര്‍ കത്രികയും അരിവാളും എടുത്ത് മകനെ വെട്ടുകയായിരുന്നു. കഴുത്തില്‍ ആഴത്തിലേറ്റ മുറിവാണ് മരണകാരണമായി പറയുന്നത്. വെട്ടേറ്റ ഗിരീഷ് വീട്ടില്‍ തന്നെ വച്ച് മരിച്ചു. സംഭവമറിഞ്ഞ് നാട്ടുക്കാരും പോലീസും ചേര്‍ന്നാണ് ഗിരീഷിനെ ആശുപത്രിയില്‍ എത്തിച്ചത്. സംഭവം നടക്കുമ്പോള്‍ ഇവര്‍ക്കു പുറമേ മാതാവായ സരസ്വതിയും മാത്രമാണ് വീട്ടില്‍ ഉണ്ടായിരുന്നത്. ഗിരീഷ് അവിവാഹിതനാണ്. മൃതദേഹം താലൂക്ക് ആശുപത്രിയിലെ മേര്‍ച്ചറിയില്‍. രാഘവന്‍ നായരെ വീട്ടല്‍ നിന്നും പോലീസ് കസ്റ്റഡിയിലെടുത്തു. ഇരിങ്ങാലക്കുട സിഐ എം.കെ സുരേഷ് കുമാര്‍, സബ്ബ് ഇന്‍സ്‌പെക്ടര്‍ കെ.എസ് സുശാന്ത് എന്നിവരുടെ നേതൃത്വത്തിലുള്ള പോലീസ് സംഘം സ്ഥലത്തെത്തിയിരുന്നു.

കഞ്ചാവുകേസില്‍ ഒളിവില്‍ കഴിഞ്ഞിരുന്ന പ്രതി പിടിയില്‍

ഇരിങ്ങാലക്കുട : കഞ്ചാവുകേസില്‍ ഒളിവില്‍ കഴിഞ്ഞിരുന്ന പ്രതി പിടിയില്‍. എസ്.എന്‍ പുരം പള്ളിനട സ്വദേശി മനവളപ്പില്‍ വീട്ടില്‍ രതീഷി(26)നെയാണ് ഇരിങ്ങാലക്കുട എസ്.ഐ കെ.എസ് സുശാന്തും സംഘവും മതിലകം പോലിസിന്റെ സഹായത്തോടെ അറസ്റ്റ് ചെയ്തത്. പ്രതി രതീഷ് പാലക്കാട് ജില്ലയില്‍ മൊബൈല്‍ ഫോണും പണവും തട്ടിയെടുത്ത കേസിലും ചാവക്കാട് പോലിസ് സ്‌റ്റേഷനില്‍ വാഹന മോഷണകേസിലും ഉള്‍പ്പെട്ട് ജയില്‍ ശിക്ഷ അനുഭവിച്ചിട്ടുണ്ട്. കൂടാതെ ഇയാള്‍ കൊടുങ്ങല്ലൂര്‍, മതിലകം, ചാവക്കാട് തുടങ്ങിയ സ്റ്റേഷനുകളില്‍ ക്രിമിനല്‍ കേസില്‍ ഉള്‍പ്പെട്ടിട്ടുണ്ട്. 2013ല്‍ കഞ്ചാവുവില്‍പ്പന നടത്തിയ കേസില്‍ പിടികൂടിയ പ്രതി കോടതിയില്‍ നിന്നും ജാമ്യത്തിലിറങ്ങിയശേഷം മുങ്ങി നടക്കുകയായിരുന്നു. തുടര്‍ന്ന് ഇരിങ്ങാലക്കുട കോടതി പ്രതിയെ പിടികിട്ടാപ്പുള്ളിയായി പ്രഖ്യാപിച്ചു. പ്രതിയെ പിടികൂടിയ സംഘത്തില്‍ സീനിയര്‍ സി.പി.ഒ മുരുകേഷ് കടവത്ത്, ബിജു കെ.എ, വഹാബ് ടി.എം, രാഹുല്‍, ബിന്നല്‍ എന്നിവരും ഉണ്ടായിരുന്നു.

പ്രായപൂര്‍ത്തിയാകാത്ത പെണ്‍കുട്ടിയെ തട്ടികൊണ്ടു പോയ യുവാവ് അറസ്റ്റില്‍

ഇരിങ്ങാലക്കുട : പ്രായപൂര്‍ത്തിയാകാത്ത പെണ്‍കുട്ടിയെ വിവാഹ വാഗ്ദാനം നല്‍കി ഓട്ടോയില്‍ തട്ടികൊണ്ടു പോയ യുവാവിനെ പോലിസ് അറസ്റ്റ് ചെയ്തു. മുരിയാട് കടവില്‍ വീട്ടില്‍ സുനില്‍ (34) നെയാണ്‌ ഇരിങ്ങാലക്കുട സി.ഐ എം.കെ സുരേഷ് കുമാറും സംഘവും അറസ്റ്റ് ചെയ്തത്. ടിപ്പര്‍ ഡ്രൈവറാണ് പ്രതി. പെണ്‍കുട്ടിയുടെ മാതാപിതാക്കള്‍ നല്‍കിയ പരാതിയെ തുടർന്ന് നടത്തിയ അന്വേഷണത്തിലാണ് കണ്ണൂരില്‍ നിന്നും പ്രതിയെ പിടികൂടിയത്. എ സ്.ഐ കെ.എസ് സൂശാന്ത്, പോലിസുകാരായ അനീഷ്, ബിന്നന്‍, രാഗേഷ്, രാജേഷ്, വനിത പോലിസുകാരായ സുജമോള്‍, ഡാജി എന്നിവരും അന്വേഷണ സംഘത്തില്‍ ഉണ്ടായിരുന്നു.

മോഷണത്തിന് ഇറങ്ങിയ നാടോടി സ്ത്രികളെ പോലീസ് പിടികൂടി

ഇരിങ്ങാലക്കുട : വീട്ടുകാരുടെ ശ്രദ്ധ തിരിച്ചു അകത്തുകയറി മോക്ഷണം നടത്തുന്ന നാടോടി സ്ത്രീകളുടെ സംഘത്തെ പോലീസ് പിടികൂടി . ചൊവാഴ്ച കൊരുമ്പിശ്ശേരി മാരിയമ്മന്‍ കോവിലിനടുത്ത് ഒരു വീട്ടില്‍ കയറി മുറ്റത്തിരുന്ന സൈക്കിള്‍ മോഷ്ടികയുകയും, വീട്ടുകാര്‍ അതിനുപുറകേ പോകുമ്പോള്‍ സംഘത്തിലെ മറ്റുള്ളവര്‍ വീടിനുള്ളില്‍ കയറാന്‍ ശ്രമിക്കുന്നതിനിടെ നാട്ടുകാര്‍ കാണുകയും, ഇവര്‍ ഓടി രക്ഷപെടുകയും ചെയ്തു. പരാതിയെത്തുടര്‍ന്ന് പോലീസ് എത്തി അന്വേഷണം ആരംഭിച്ചു. സമീപത്തെ പാടത്തിനടുത്ത് നിന്നും ഈ സംഘത്തിലെ നാല് നാടോടി സ്ത്രികളെ ഇരിങ്ങലക്കുട എസ്.ഐ കെ.എസ് സുശാന്തും സംഘവും പിടികൂടി. ചെന്നൈ കുപ്പ സ്വദേശിനികളായ മുത്തുമാരി (25), മരിയ(31), അഞ്ജലി (24), കാവ്യ (28) എന്നിവരാണ് അറസ്റ്റിലായത്. സമാന മോഷണശ്രമങ്ങള്‍ ചാലക്കുടിയിലും നടന്നതായി പരാതി പോലീസിന് ലഭിച്ചിരുന്നു. അന്വേഷണ സംഘത്തില്‍ എ എസ് ഐ സുനില്‍, സീനിയര്‍ സി.പി.ഒ സത്യന്‍, സി.പി.ഒ അരുണ്‍ സൈമണ്‍, ജോസഫ് , വുമണ്‍ സി.പി.ഒ അപര്‍ണ എന്നിവരും ഉണ്ടായിരുന്നു.

വിദ്യാര്‍ത്ഥിനിയെ പിഡിപ്പിക്കാന്‍ ശ്രമം: മദ്ധ്യവയസ്‌ക്കന്‍ അറസ്റ്റില്‍

ഇരിങ്ങാലക്കുട: സ്‌കൂള്‍ വിട്ടുപോകുകയായിരുന്ന വിദ്യാര്‍ത്ഥിനിയെ അപമാനിക്കാനും പിഡിപ്പിക്കാനും ശ്രമിച്ച സംഭവത്തില്‍ മദ്ധ്യവയസ്‌ക്കന്‍ അറസ്റ്റില്‍. കരൂപ്പടന്ന കടലായി അറയ്ക്കല്‍ കരിം (57)നെയാണ് എസ്.ഐ കെ.എസ് സുശാന്തും സംഘവും അറസ്റ്റ് ചെയ്തത്. സ്‌കൂള്‍ വിട്ട് വീട്ടിലേയ്ക്ക് മടങ്ങുകയായിരുന്ന പെണ്‍കുട്ടിയെയാണ് ഓട്ടോ ഡ്രൈവറായ ഇയാള്‍ പിഡിപ്പിക്കാന്‍ ശ്രമിച്ചത്. വീട്ടുകാര്‍ നല്‍കിയ പരാതിയുടെ അടിസ്ഥാനത്തിലാണ് അറസ്റ്റ്. ഇയാള്‍ നേരത്തേയും പെണ്‍കുട്ടികളെ ശല്യം ചെയ്തിരുന്നുവെന്ന് പരാതികള്‍ ലഭിച്ചിട്ടുണ്ടെന്ന് പോലിസ് പറഞ്ഞു. അന്വേഷണ സംഘത്തില്‍ സീനിയര്‍ സി.പി.ഒ മുരുകേഷ് കടവത്ത്, സി.പി.ഒ അരുണ്‍ സൈമണ്‍, ജോസഫ് എന്നിവരും അന്വേഷണ സംഘത്തിലുണ്ടായിരുന്നു.

Top
Menu Title