News

Category: Flash

ഇ കെ നായനാര്‍ സ്മാരക അക്കാദമി ഹുണ്ടിക പിരിവ്

ഇരിങ്ങാലക്കുട : കണ്ണൂരില്‍ നിര്‍മ്മിക്കുന്ന സ. ഇ കെ നായനാര്‍ സ്മാരക അക്കാദമിയുടെ നിര്‍മ്മാണ പ്രവര്‍ത്തനങ്ങള്‍ക്ക് വേണ്ടി സി പി ഐ എം സംസ്ഥാന കമ്മിറ്റിയുടെ ആഹ്വാനമനുസരിച്ച് നടത്തുന്ന ഹുണ്ടിക പിരിവ് ഇരിങ്ങാലക്കുടയില്‍ തൃശൂര്‍ ജില്ലാ കമ്മിറ്റി അംഗം സ. സി കെ ചന്ദ്രന്‍ നിര്‍വഹിച്ചു. ഇരിങ്ങാലക്കുട ഏരിയ കമ്മിറ്റി അംഗങ്ങളായ സ. വി എം മനോജ്‌കുമാര്‍ , സ. ടി എസ് സജീവന്‍മാസ്റ്റര്‍ , സ. കെ ഗോവിന്ദന്‍കുട്ടി തുടങ്ങിയവരും പങ്കെടുത്തു.

പ്രവാസി സംഘത്തിന്റെ ജനപ്രിയ മെഡിക്കല്‍സ് ഇരിങ്ങാലക്കുടയിലും

ഇരിങ്ങാലക്കുട : കേരള പ്രവാസി സംഘം നേതൃത്വം നല്‍കുന്ന  പ്രവാസി ഇന്‍ഡസ്ട്രിയല്‍ ഇന്‍ഫ്രാസ്ട്രക്ച്ചര്‍ ഡെവലപ്മെന്റ് കമ്പനി ലിമിറ്റഡ് (PIIDCL)എന്ന സ്ഥാപനം കേരളത്തിലെ 140 അസ്സംബ്ലി മണ്ഡലങ്ങളിലും ആരംഭിക്കുന്ന ജനപ്രിയ മെഡിക്കല്‍സിന്റെ ഭാഗമായി ഇരിങ്ങാലക്കുട മെറീന ഹോസ്പിറ്റലിന് സമീപം മാളിയേക്കല്‍ കോംപ്ലെക്സില്‍ ആരംഭിക്കുന്ന സ്ഥാപനത്തിന്റെ ഉദ്ഘാടനം ആഗസ്ത് 19 ശനിയാഴ്ച രാവിലെ 9 മണിക്ക് നിയമസഭ സ്‌പീക്കര്‍ പി ശ്രീരാമകൃഷ്ണന്‍ നിര്‍വഹിക്കും.ഇരിങ്ങാലക്കുട എം എല്‍ എ പ്രൊഫ് കെ യു അരുണന്‍ അദ്ധ്യക്ഷത വഹിക്കും. സി പി എം ഇരിങ്ങാലക്കുട ഏരിയ സെക്രട്ടറി ഉല്ലാസ് കളക്കാട്ട്, ഇരിങ്ങാലക്കുട ബ്ലോക്ക് പഞ്ചായത്ത് പ്രസിഡന്റ് മനോജ്‌കുമാര്‍ , മുന്‍സിപ്പല്‍ ചെയര്‍പേഴ്സണ്‍ നിമ്യ ഷിജു എന്നിവര്‍ വിശിഷ്ടാതിഥികള്‍ ആയിരിക്കും. സി കെ കൃഷ്ണദാസ് , സി കെ ചന്ദ്രന്‍, ടി ജി ശങ്കരനാരായണന്‍ , എന്‍ എ ജോണ്‍, കുര്യന്‍ ജോസഫ് എന്നിവര്‍ ആശംസകള്‍ അര്‍പ്പിച്ചു സംസാരിക്കും. പ്രദീപ് യു മേനോന്‍ ( ചീഫ് എക്സിക്യൂട്ടീവ് പി ഐ ഐ ഡി സി എല്‍ ) പദ്ധതി വിശദീകരണം നടത്തും. സ്വന്തമായി നിര്‍മ്മാണ യൂണിറ്റും മരുന്ന് വിതരണവും ശൃംഖലയും ഇവര്‍ക്ക് ഉണ്ട്. കേരളത്തിലെ രണ്ടാമത്തെ ജനപ്രിയ മെഡിക്കല്‍ സ്റ്റോര്‍ ആണ് ഇത്.

സ്വകാര്യ ബസ് സമരം : ചില ബസ്സുകള്‍ വിട്ടുനിന്നു, ജനം വലഞ്ഞു

ഇരിങ്ങാലക്കുട : സംസ്ഥാന വ്യാപകമായി വെള്ളിയാഴ്ച നടക്കുന്ന സ്വകാര്യ ബസ്സ് സമരത്തില്‍ ഇരിങ്ങാലക്കുട മേഖലയില്‍ പൊതു ജനത്തെ ബുദ്ധിമുട്ടില്‍ ആക്കി അപൂര്‍വം ചില സ്വകാര്യ ബസുകള്‍ സര്‍വീസ് നടത്തിയത് ഒഴിച്ചാല്‍ ഭൂരിപക്ഷം ബസുകളും സമരത്തിന് ഐക്യദാര്‍ഢ്യം പ്രഖ്യാപിച്ച് സമരത്തിന് ഇറങ്ങിയില്ല . തൃശൂര്‍ – കൊടുങ്ങലൂര്‍ റൂട്ടില്‍ 4 ബസ്സുകളും ചില ദീര്‍ഘദൂര ലിമിറ്റഡ് സ്റ്റോപ്പ് ബസുകളും കൊടകര – ഇരിങ്ങാലക്കുട റൂട്ടില്‍ ഒരു ബസും ആണ് ഓടിയത് . കെ എസ് ആര്‍ ടി സി തൃശൂര്‍ കൊടുങ്ങലൂര്‍ റൂട്ടിലും ഇരിങ്ങാലക്കുട ചാലക്കുടി റൂട്ടിലും അധിക സര്‍വീസുകള്‍ നടത്തി .

സ്വകാര്യ ബസുകള്‍ വെള്ളിയാഴ്ച സര്‍വീസ് നിര്‍ത്തിവെക്കും

ഇരിങ്ങാലക്കുട : സ്വകാര്യ ബസുകള്‍ വെള്ളിയാഴ്ച സംസ്ഥാനവ്യാപകമായി സര്‍വീസ് നിര്‍ത്തിവയ്ക്കുമെന്ന് പ്രൈവറ്റ് ബസ് ഓപ്പറേറ്റേഴ്‌സ് കോണ്‍ഫെഡറേഷന്‍ ഭാരവാഹികള്‍ അറിയിച്ചു. വിദ്യാര്‍ഥികള്‍ ഉള്‍പ്പെടെയുള്ളവരുടെ യാത്രാനിരക്ക് വര്‍ധിപ്പിക്കുക, സ്റ്റേജ് ഗാരേജുകളുടെ വര്‍ധിപ്പിച്ച റോഡ് ടാക്‌സ് പിന്‍വലിക്കുക, പെട്രോളിയം ഉത്പന്നങ്ങളെ ചരക്ക്-സേവന നികുതിയുടെ പരിധിയില്‍ കൊണ്ടുവരുക തുടങ്ങിയ ആവശ്യങ്ങള്‍ ഉന്നയിച്ചാണ് സമരം. തൃശൂര്‍ ജില്ലയിലും ഇരിങ്ങാലക്കുട മേഖലയിലും സ്വകാര്യ ബസ്സുകള്‍ വെള്ളിയാഴ്ച സര്‍വീസ് നടത്തുകയില്ലെന്നു സമരത്തിലുള്ള പ്രൈവറ്റ് ബസ് ഓപ്പറേറ്റേഴ്‌സ് അസോസിയേഷന്‍ സെക്രട്ടറി അനില്‍കുമാര്‍ ഇരിങ്ങാലക്കുടലൈവ് ഡോട്ട് കോമിനോട് പറഞ്ഞു.

ആര്‍ എസ് എസ് നേതാക്കള്‍ പൊതുപരിപാടികളില്‍ സജീവമാകുന്നു

ഇരിങ്ങാലക്കുട : സംഘടനാ കാര്യങ്ങളില്‍ മാത്രം സജീവമായിരുന്ന ആര്‍ എസ് എസിന്റെ മുതിര്‍ന്ന നേതാക്കള്‍ പൊതു പരിപാടികളിലും സജീവമാകുന്നു. ആര്‍ എസ് എസ് സംഘചാലക് മോഹന്‍സിംഗ് ഭാഗവത് പാലക്കാട് പൊതു പരിപാടിയില്‍ പങ്കെടുത്തതിന് പിന്നാലെ തൃശൂര്‍ ജില്ലാ സംഘചാലക് കെ എസ് പത്മനാഭന്‍ ഇരിങ്ങാലക്കുടയില്‍ കേരള ഗവണ്മെന്റ് നിര്‍ദേശാനുസരണം തദ്ദേശ സ്വയംഭരണ സ്ഥാപനങ്ങളുടെ വാര്‍ഡ് തലങ്ങളില്‍ സംഘടിപ്പിച്ച ശുചിത്വ സംഗമത്തില്‍ ഇരിങ്ങാലക്കുട ബി ജെ പി കൗണ്‍സിലറുടെ 25 – ാം വാര്‍ഡില്‍ ഉദ്ഘാടകനായത് മാറിയ രാഷ്ട്രീയ സാഹചര്യത്തില്‍ ശ്രദ്ധേയമാവുകയാണ് . സാധാരണ നിലയില്‍ ആര്‍ എസ് എസിന്റെ സംഘടനാ കാര്യങ്ങളിലും അവര്‍ നിര്‍ദേശിക്കുന്ന കാര്യങ്ങളിലും മാത്രമേ ഉന്നത നേതാക്കള്‍ പങ്കെടുക്കാറുള്ളു . സാധാരാണ  പൊതു പരിപാടികളില്‍ ഇത്രയും കാലമായി ഇവര്‍ പങ്കെടുക്കാറില്ല . ഇരിങ്ങാലക്കുട നഗരഭയിലെ ബി ജെ പി കൗണ്‍സിലര്‍ സന്തോഷ് ബോബന്റെ വാര്‍ഡായ കൂടല്‍മാണിക്യം വാര്‍ഡില്‍ ശുചിത്വ സംഗമ പരിപാടിയും മാലിന്യ വിരുദ്ധ പ്രതിജ്ഞയും ഉണ്ടായിരുന്നു. കൂടുതല്‍ ജനപങ്കാളിത്തത്തിനു വേണ്ടി വാര്‍ഡ് കൗണ്‍സിലര്‍ ഒരു ട്രോഫിയും പ്രഖ്യാപിച്ചിരുന്നു. ഏറ്റവും അധികം ആളുകളെ പങ്കെടുപ്പിക്കുന്ന റസിഡന്‍സ് അസ്സോസിയേഷനുള്ള ട്രോഫി സംഗമേശ്വര റസിഡന്‍സ്അസോസിയേഷന് സംഘചാലക് സമ്മാനിച്ചു. സമ്മേളനത്തില്‍ നാഷണല്‍ ഹൈസ്കൂള്‍ പ്രിന്‍സിപ്പല്‍ ഉഷപ്രഭ പ്രതിജ്ഞ ചൊല്ലിക്കൊടുത്തു . രാധേഷ് പാഴാട്ട് സ്വാഗതവും പ്രൊഫ് ആശ പ്രസന്നകുമാര്‍ നന്ദിയും പറഞ്ഞു.

ത്രിദിന റസിഡന്‍ഷ്യല്‍ മെഡിറ്റേഷന്‍ ക്യാമ്പ് ആഗസ്ത് 26 മുതല്‍

ഇരിങ്ങാലക്കുട : നൂറ്റൊന്നംഗ സഭ ഇരിങ്ങാലക്കുട,  ഇന്നര്‍ ഹാര്‍മണി, ഓഷോ ധാരാ സെന്റര്‍ കോഴിക്കോട് എന്നിവയുടെ സംയുക്താഭിമുഖ്യത്തില്‍ നൈവേദ്യം മിനി ഹാളില്‍ ആഗസ്ത് 26 ,27 ,28 എന്നീ തീയതികളില്‍ ത്രിദിന റസിഡന്‍ഷ്യല്‍ മെഡിറ്റേഷന്‍ ക്യാമ്പ് സംഘടിപ്പിക്കുന്നു.  ആഗസ്ത് 26 ശനിയാഴ്ച്ച രാവിലെ 9 മണിക്ക് സ്വാമി ബ്രഹ്മ സ്വരൂപാനന്ദ ക്യാമ്പ് ഉദ്ഘാടനം നിര്‍വഹിക്കും. ഡോ. ഇ പി ജനാര്‍ദ്ദനന്‍ അധ്യക്ഷത വഹിക്കും. സ്വാമി ആനന്ദ് അഭിഷേക് കോഴിക്കോട് ക്യാമ്പ് നയിക്കും. കൂടുതല്‍ വിവരങ്ങള്‍ക്കും രജിസ്‌ട്രേഷനും ബന്ധപെടുക : 9495852838 , 9946732675 .

കെ എസ് ഇയില്‍ കര്‍ഷകദിനം ആചരിച്ചു

ഇരിങ്ങാലക്കുട : ചിങ്ങം ഒന്ന് കര്‍ഷകദിനത്തിന്റെ ഭാഗമായി കെ എസ് ഇ ലിമിറ്റഡില്‍ വൃക്ഷതൈ നട്ട് കര്‍ഷകദിനം ആചരിച്ചു. കമ്പനി മാനേജിങ് ഡയറക്ടര്‍ എം സി പോള്‍ ആദ്യ തൈ നട്ട് ഉദ്ഘാടനം നിര്‍വഹിച്ചു. കമ്പനി എക്സിക്യൂട്ടീവ് ഡയറക്ടര്‍ അഡ്വ. എ പി ജോര്‍ജ് അധ്യക്ഷത വഹിച്ചു. ചീഫ് ജനറല്‍ മാനേജര്‍ ആനന്ദ് മേനോന്‍, ഫൈനാന്‍സ് മാനേജര്‍ ആര്‍ ശങ്കരനാരായണന്‍ , ഓപ്പറേഷന്‍സ് ജനറല്‍ മാനേജര്‍ എം അനില്‍ എന്നിവര്‍ കര്‍ഷകദിനത്തിന്റെ പ്രത്യേകതകളെ കുറിച്ച് സംസാരിച്ചു. ടി ജെ വര്‍ഗീസ് ബാബു , കെ ടി ജോയ് , ടി ഡി ജോയ്, പി കെ ദേവസ്സി , ലാല്‍സണ്‍ എന്നിവര്‍ വൃക്ഷതൈകള്‍ നട്ടു.

ശ്രീ കൂടല്‍മാണിക്യം ക്ഷേത്രത്തില്‍ മഹാസുകൃതഹവനം ആഗസ്ത് 21 മുതല്‍

ഇരിങ്ങാലക്കുട : ശ്രീ കൂടല്‍മാണിക്യം ക്ഷേത്രത്തില്‍ ചിങ്ങം 5 മുതല്‍ 8 വരെ (ആഗസ്ത് 21 മുതല്‍ 24 വരെ)  സുകൃതഹവനം നടക്കും. ക്ഷേത്രത്തിന്റെയും ഭക്തജനങ്ങളുടെയും സര്‍വ്വോപരി നാടിന്റെയും ഐശ്വര്യത്തിനും സമ്പല്‍ സമൃദ്ധിക്കും വേണ്ടി നടത്തപ്പെടുന്ന ഈ മഹത്ത് കര്‍മത്തിന് മുന്നോടി ആയി ചിങ്ങം 1 മുതല്‍ 4 വരെ ( ആഗസ്ത് 17 മുതല്‍ 20 വരെ ) കൂടല്‍മാണിക്യ സ്വാമിക്ക് ദ്രവ്യകലശം , മുറജപം, മുതലായവയും നടത്തപ്പെടുന്നു. ക്ഷേത്രം കൂത്തമ്പലത്തിനു വടക്ക് വശത്തായി പ്രത്യേകം തയ്യാറാക്കപ്പെടുന്ന ഹവന മണ്ഡപത്തില്‍ ആണ് സുകൃതഹവനം നടക്കുക. ക്ഷേത്രം തന്ത്രിമാരുടെ മുഖ്യ കാര്‍മികത്വത്തില്‍ നടക്കുന്ന ചടങ്ങുകളില്‍ പരികര്‍മികള്‍ , ശാന്തിക്കാര്‍, മറ്റു പാരമ്പര്യ -പാരമ്പര്യേതര ജീവനക്കാര്‍ എന്നിവരും പങ്കെടുക്കുന്നു. ക്ഷേത്രത്തില്‍ ആഗസ്ത് 17 ന് വൈകിട്ട് പ്രസാദശുദ്ധി , രക്ഷോഘ്‌നഹോമം , വാസ്തുഹോമം, , വാസ്തുബലി, വാസ്തുകലശം എന്നിവയും 18 – ാം തീയ്യതി രാവിലെ ചതുഃശുദ്ധി ,ധാര എന്നിവയും 19 – ാം തീയ്യതി രാവിലെ പഞ്ചഗവ്യം, പഞ്ചകം, വൈകിട്ട് മണ്ഡപ സംസ്കാരം, പത്മലേഖനം എന്നിവയും 20 – ാം തീയ്യതി ബ്രഹ്മകലശപൂജ, കുംഭേശകലശപൂജ , പരികലശപൂജ, അധിവാസ ഹോമം നടക്കും . തുടര്‍ന്ന് എതൃത്ത് പൂജക്ക് ശേഷം സ്വര്‍ണ്ണകുടത്തില്‍ നെയ്യ് നിറച്ച് പ്രത്യേകം പൂജിച്ച ബ്രഹ്മകലശം, തേന്‍, പാല്‍ , തൈര് , നാല്പാമരക്കഷായം , തീര്‍ത്ഥം, എന്നിവ വാദ്യമേളങ്ങളുടെ അകമ്പടിയോടെ ഭഗവാന് അഭിഷേകം ചെയ്യുന്നു. തുടര്‍ന്ന് ഉച്ചപൂജ , ആഗസ്ത് 21 മുതല്‍ 24 വരെ രാവിലെ 6 മണി മുതല്‍ 10 വരെ സുകൃതഹവനം നടക്കും. സമാപനദിവസം ഉച്ചപൂജക്ക് ശേഷം പ്രസാദ വിതരണം, പ്രസാദ ഊട്ട്, എന്നിവ ഉണ്ടാകും.

പുല്ലൂര്‍ സെന്റ് സേവിയേഴ്‌സ് ഐ.ടി.ഐയിലെ വിദ്യാരംഭം

പുല്ലൂര്‍ : സെന്റ് സേവിയേഴ്‌സ് ഐ ടി ഐ യിലെ 2017 -19 അധ്യയന വര്‍ഷത്തെ വിദ്യാരംഭ ശുശ്രുഷ തൃശൂര്‍ ദേവമാതാ പ്രൊവിന്‍ഷ്യല്‍ ഫാ. വാള്‍ട്ടര്‍ തേലപ്പിള്ളി സി എം ഐ ഉദ്ഘാടനം ചെയ്തു. തൃശൂര്‍ ദേവമാതാ എഡ്യൂക്കേഷണല്‍ കൗണ്‍സിലര്‍ ഫാ. ഷാജു എടമന അധ്യക്ഷ പ്രസംഗം നടത്തി. നവാഗരും അവരുടെ മാതാപിതാക്കളും, സ്റ്റാഫ് അംഗങ്ങളും അടങ്ങുന്ന സദസ്സിനു ജോസ് മാസ്റ്റര്‍ സ്വാഗതം ആശംസിച്ചു. പ്രാര്‍ത്ഥന നിഭരമായ അന്തരീക്ഷത്തില്‍ ഹിന്ദു- മുസ്ലിം -ക്രിസ്ത്യന്‍ മതഗ്രന്ഥങ്ങളില്‍ നിന്നുള്ള വായനകള്‍ നടത്തി. വിദ്യാര്‍ത്ഥികളുടെ ഉപകരണ സമര്‍പ്പണം നടന്നു. മാനേജര്‍ ഫാ. തോംസണ്‍ അറക്കല്‍ സി എം ഐ സന്ദേശം നല്‍കി. പ്രിന്‍സിപ്പല്‍ ഫാ യേശുദാസ് കൊടക്കരക്കാരന്‍ നന്ദി പറഞ്ഞു .

കര്‍ഷകദിനം ആഘോഷിച്ച് ചേലൂര്‍ സെന്റ് മേരീസ് സ്കൂളിലെ കുരുന്നുകള്‍

ചേലൂര്‍ : സെന്റ് മേരീസ് സ്കൂളില്‍ കര്‍ഷകദിനം വിപുലമായ രീതിയില്‍ ആഘോഷിച്ചു. മലയാള മാസാരംഭം , കൃഷിയുടെ മാഹാത്മ്യം എന്നിവ മനസ്സിലാക്കി കൊടുക്കുന്ന രീതിയിലുള്ള പ്രവര്‍ത്തനങ്ങളാണ് സ്കൂളിലെ കുട്ടികള്‍ നടത്തിയത്. അതിനായി കര്‍ഷക വേഷവും പാളത്തൊപ്പിയും അണിഞ്ഞ നൂറോളം കുട്ടികള്‍ അണി നിരന്ന കാഴ്ച കര്‍ഷക പെരുമ വിളിച്ചോതുന്ന തരത്തിലുള്ളതായിരുന്നു. അസംബ്ലിയോട് അനുബന്ധിച്ച് ക്ലാസ് അടിസ്ഥാനത്തില്‍ നാടന്‍ പാട്ടുകളും കൃഷി പാട്ടുകളും കുട്ടികള്‍ ആലപിച്ചത് ഏറെ ആകര്‍ഷകമായി . കേരളത്തിലെ കര്‍ഷകര്‍ക്ക് നഷ്ടപെടുന്ന കാര്‍ഷിക സംസ്കാരം തിരിച്ചു പിടിക്കുക , എല്ലാവരും കൃഷിക്കാര്‍ ആവുക, എല്ലായിടത്തും കൃഷി ഇറക്കുക , ആരോഗ്യപരമായ ജീവിതം നയിക്കുക , എന്നി സന്ദേശങ്ങള്‍ ഉള്‍കൊള്ളന്ന രീതിയിലുള്ള ഹെഡ്മിസ്ട്രെസ്സിന്റെ പ്രഭാഷണം കുട്ടികളില്‍ ആവേശമുണര്‍ത്തി. സ്കൂള്‍ ലീഡര്‍ നന്ദിയും പറഞ്ഞു.

കേരളത്തില്‍ തുടരുന്ന പനി മരണങ്ങളില്‍ പ്രതിഷേധിച്ചു ബി ജെ പിയുടെ വക ആരോഗ്യവകുപ്പ് മന്ത്രിക്കു മണിയോഡര്‍

ഇരിങ്ങാലക്കുട : കേരളത്തില്‍ ദിനംപ്രതി നിരവധി ജനങ്ങളാണ് പനി മൂലം മരണപ്പെടുന്നത് . ഇതിനെതിരെ ആരോഗ്യവകുപ്പ് കണ്ണടക്കുന്നതില്‍ പ്രതിഷേധിച്ച് ബി ജെ പി ഇരിങ്ങാലക്കുട 82 – ാം ബൂത്ത് കമ്മിറ്റിയുടെ നേതൃത്വത്തില്‍ പനിക്കുള്ള മരുന്ന് വാങ്ങുന്നതിനു ആരോഗ്യവകുപ്പ് മന്ത്രി കെ കെ ഷൈലജക്കു മണിയോഡര്‍ അയച്ചു കൊടുത്തു . മുനിസിപ്പല്‍ സമിതി സെക്രട്ടറി വിജയന്‍ പാറേക്കാട്ട് ,ബൂത്ത് പ്രസിഡന്റ് ഷാജി ,സെക്രട്ടറി സുനില്‍ ,ഷൈജു കാളിയങ്കര ,പുഷ്ക്കരന്‍ ,അജിത് തുടങ്ങിയവര്‍ നേതൃത്വം നല്‍കി.

സുമനസുകളുടെ സഹായത്താല്‍ അക്ഷയ് ഇനി സ്വന്തം വാഹനത്തില്‍ കോളേജിലേക്ക്

ഇരിങ്ങാലക്കുട : പടിയൂര്‍ പഞ്ചായത്തിലെ എടച്ചാലി ഭരതന്‍ മകന്‍ അക്ഷയ്‌ക്ക് ഇനി സ്വന്തം വാഹനത്തില്‍ കോളേജിലേക്ക് വരാം. ജന്മനാ അരക്കുതാഴെ തളര്‍ന്ന് ക്രൈസ്റ്റ് കോളേജിലേക്ക് ദിവസവും ഓട്ടോയില്‍ പോയി വരുന്ന അക്ഷയ് പരസഹായമില്ലാതെ ഇനി മുതല്‍ യാത്രചെയ്യും. രണ്ടാം വര്‍ഷ ബികോം വിദ്യാര്‍ത്ഥിയായ അക്ഷയ് പഠനത്തില്‍ മിടുക്കനായ വിദ്യാര്‍ത്ഥിയാണ്. അക്ഷയ് തന്റെ അംഗപരിമിതി കാണിച്ച് ജില്ല പഞ്ചായത്ത്, ഗ്രാമപഞ്ചായത്ത് തുടങ്ങീ സര്‍ക്കാര്‍ ഓഫിസുകളിലും എല്ലാം സഹായമഭ്യര്‍ത്ഥിച്ച് കയറിയിറങ്ങി അപേക്ഷ നല്‍കിയെങ്കിലും ആരും തന്നെ തുണച്ചില്ല. പിന്നീടാണ് കേന്ദ്രഗവര്‍മെന്റിന്റെ സഹായമെന്തെങ്കിലും കിട്ടുന്നതിനായി ബിജെപി പഞ്ചായത്ത് പ്രസിഡണ്ടായിരുന്ന അനൂപ് മാമ്പ്രയെ സമീപിച്ചത്. അനൂപ് സഹായം ഏറ്റെടുക്കുകയും പഞ്ചായത്തില്‍ പ്രവര്‍ത്തിക്കുന്ന പുണ്യം, വ്യാസ, സമന്വയ, ധര്‍മ്മഭാരതി എന്നീ ഗ്രാമസേവാസമിതികളുടെ സഹായത്തോടെ അക്ഷയിന് കോളേജില്‍ പോകാന്‍ ആക്ടീവ മോട്ടോര്‍ സൈക്കിള്‍ വാങ്ങി അഡീഷണല്‍ ചക്രം ഫിറ്റ് ചെയ്ത് മുച്ചക്രവാഹനമാക്കി നല്കുകയാണ് ഉണ്ടായത്. പടിയൂര്‍ എടച്ചാലി വിഷ്ണുമായ ക്ഷേത്ര മൈതാനില്‍ നടന്ന രക്ഷാബന്ധനമഹോത്സവത്തില്‍ ബിജെപി സംസ്ഥാന സമിതി അംഗം സന്തോഷ് ചെറാക്കുളവും ക്ഷേത്രം മഠാധിപതി എടച്ചാലി കുമാരനും ചേര്‍ന്ന് താക്കോല്‍ അക്ഷയ്ക്ക് കൈമാറി. ചടങ്ങില്‍ അനൂപ് മാമ്പ്ര, പി.ജി.അനില്‍കുമാര്‍, ഗ്രാമസേവാസമിതികളുടെ ഭാരവാഹികളായ രാജേഷ് പുല്ലാനി, മധു മാമ്പ്രമത്ത്, സനല്‍ തേനാശ്ശേരി, മണ്ഡല്‍ കാര്യവാഹ് മനോജ്, ശരത്ത് കോപ്പുള്ളി എന്നിവര്‍ സന്നിഹിതരായിരുന്നു.

നവലിബറല്‍ നയങ്ങളുടെ പ്രത്യാഘാതമാണ്‌ ഖോരഖ്‌പൂരിലെ ശിശുകൂട്ടകൊല -എ എന്‍ ഷംസീര്‍ എംഎല്‍എ

ഇരിങ്ങാലക്കുട : നവലിബറല്‍ നയങ്ങളുടെ പ്രത്യാഘാതമാണ്‌ ഖോരഖ്‌പൂരിലെ ശിശുകൂട്ടകൊലയെന്ന്‌ ഡി വൈ എഫ് ഐ സംസ്ഥാന പ്രസിഡന്റ്‌ എഎന്‍ ഷംസീര്‍ എംഎല്‍എ. പൊതുജനാരോഗ്യ സംവിധാന മുള്‍പെടെ സാമൂഹ്യ സുരക്ഷ മേഖലകളില്‍ നിന്ന്‌ സര്‍ക്കാരുകള്‍ പിന്മാറണമെന്നതാണ്‌ നവലിബറല്‍ നയങ്ങളുടെ കാതല്‍.കോണ്‍ഗ്രസ്‌ രാജ്യത്ത്‌ എല്ലും തോലുമായത്‌ 25 വര്‍ഷം മുമ്പ്‌ നടപ്പിലാക്കിയ നവലിബറല്‍ നയങ്ങള്‍കാരണമാണ്‌.ഈ നയത്തിന്റെ ഉപോല്‍പന്നമാണ്‌ അഴിമതി.അഴിമതിയില്‍ മുങ്ങിയ ബിജെപി യും കോണ്‍ഗ്രസിനെ പോലെ നാശത്തിന്റെ പാതയിലാണെന്നും ഷംസീര്‍ പറഞ്ഞു. ഇരിങ്ങാലക്കുടയില്‍ നവലിബറല്‍ നയങ്ങളെ ചെറുക്കുക മതനിരപേക്ഷതയുടെ കാവലാളാവുക എന്ന മുദ്രാവാക്യമുയര്‍ത്തി ഡിവൈഎഫ്‌ഐ യുടെ യുവജന പ്രതിരോധനത്തോട് അനുബന്ധിച്ചു പൊതുസമ്മേളനം ഉദ്‌ഘാടനം ചെയ്യുകയായിരുന്നു അദ്ദേഹം. സ്വാതന്ത്ര്യ സമരകാലത്ത്‌ ജയില്‍ മോചനത്തിന്‌ ബ്രിട്ടിഷ്‌കാര്‍ക്ക്‌ മാപ്പെഴുതി കൊടുത്ത വീരസവര്‍ക്കറെ കുറിച്ച്‌ പറഞ്ഞുകൊണ്ടാണ്‌ സ്വാതന്ത്ര്യ സമരത്തില്‍ പങ്കെടുക്കാത്ത ആര്‍എസ്‌എസും ബിജെപിയും തങ്ങള്‍ സ്വാതന്ത്ര്യസമരത്തിന്റെ നേരവകാശികളെന്ന്‌ അവകാശപെടുന്നത്‌.ആള്‍കൂട്ടം ഗോരക്ഷയുടെ പേരില്‍ ആളുകളെ തല്ലികൊല്ലുമ്പോള്‍ നിസംഗത പാലിക്കുന്ന ഭരണാധികാരികള്‍ നാടിന്‌ അപമാനമാണ്‌.മോദിയും ഹിറ്റ്‌ലറും സമാനരാണ്‌. ഹിറ്റലര്‍ക്ക്‌ സംഭവിച്ചത്‌ ഇന്ത്യയില്‍ മോദിക്കും സംഭവിക്കുന്ന കാലം വിദൂരമല്ല.ഗുജറാത്തില്‍ രാഹുല്‍ഗാന്ധിക്ക്‌ നേരെ അക്രമണമുണ്ടായപ്പോള്‍ നിശബ്ദത പാലിച്ച കോണ്‍ഗ്രസിന്‌ ബിജെപിയെ പ്രതിരോധിക്കാനാവില്ല. രാജ്യത്ത്‌ വര്‍ഗീയതക്കെതിരെ നടക്കുന്ന പോരാട്ടം പിണറായിയും മോദിയും തമ്മിലാണ്‌.അതുകൊണ്ടാണ്‌ വര്‍ഗീയവാദികള്‍ പിണറായിയുടെ തലക്ക്‌ ഒരു കോടി ഇനാം പ്രഖ്യാപിക്കുന്നതെന്നും ഷംസീര്‍ പറഞ്ഞു. ഖോരക്‌പൂരിലെ ആശുപത്രിയില്‍ ഓക്‌സിജന്‍ ലഭിക്കാതെ മരിച്ച കുട്ടികള്‍ക്ക്‌ സമ്മേളനം അനുശോചനം രേഖപെടുത്തി. സംഘാടക സമിതി ചെയര്‍മാന്‍ ഉല്ലാസ്‌ കളക്കാട്ട്‌അധ്യക്ഷനായി.അഡ്വ കെആര്‍ വിജയ, വിഎ മനോജ്‌കുമാര്‍ എന്നിവര്‍ സംസാരിച്ചു. വിഎം കമറുദ്ദീന്‍ പ്രതിജ്ഞ ചൊല്ലികൊടുത്തു.ബ്ലോക്ക്‌ സെക്രട്ടറി സിഡി സിജിത്ത്‌ സ്വാഗതവും പ്രസിഡന്റ്‌ ആര്‍എല്‍ ശ്രീലാല്‍ നന്ദിയും പറഞ്ഞു.

 

യു പി ദുരന്തത്തില്‍ പ്രതിഷേധിച്ച് ജോയിന്റ് കൗണ്‍സില്‍ മേഖല കമ്മിറ്റി

ഇരിങ്ങാലക്കുട : ഗോരഖ്പൂരിലെ ആശുപത്രിയില്‍ കുട്ടികളുടെ ജീവന്‍ രക്ഷിക്കുന്നതില്‍ യു പി സര്‍ക്കാര്‍ കാണിച്ച അലംഭാവത്തില്‍ പ്രതിഷേധിച്ച് ജോയിന്റ് കൗണ്‍സില്‍ മേഖല കമ്മിറ്റി സിവില്‍ സ്റ്റേഷനില്‍ പ്രതിഷേധ പ്രകടനം നടത്തി. ജില്ലാ കമ്മിറ്റി അംഗം എ എം നൗഷാദ് പ്രതിഷേധം ഉദ്ഘാടനം ചെയ്തു. മേഖല കമ്മിറ്റി അംഗം ടി ജെ സാജു അദ്ധ്യക്ഷത വഹിച്ചു. പി എ സജീവ്, പി ആര്‍ റോഷന്‍ , എന്‍ വി നന്ദകുമാര്‍ , പി ബിന്ദു , കെ കെ സന്ധ്യ തുടങ്ങിയവര്‍ സംസാരിച്ചു.

വ്യാഴാഴ്ച വൈദ്യുതി മുടങ്ങും

ഇരിങ്ങാലക്കുട : നമ്പര്‍ വണ്‍ സെക്‌ഷന്‍റെ പരിധിയില്‍ വരുന്ന ചേലൂര്‍, ചേലൂര്‍ പള്ളി, നെറ്റിയാട്, എടക്കുളം എന്നിവിടങ്ങളില്‍ 11 കെ വി ലൈനുകളില്‍ അറ്റകുറ്റപ്പണി നടക്കുന്നതിനാല്‍ ആഗസ്ത് 17 വ്യാഴാഴ്ച രാവിലെ 8 .30 മുതല്‍ വൈകീട്ട് 5 .30 വരെ വൈദ്യുതി മുടങ്ങുമെന്ന് അസി. എഞ്ചിനീയര്‍ അറിയിച്ചു.

Top
Close
Menu Title