News

Category: Politics

മുരിയാട് ഞാറ്റുവേല മഹോത്സവത്തിന് തുടക്കമായി

മുരിയാട് : ആനന്ദപുരം റൂറല്‍ ബാങ്കിന്റെ മുരിയാട് ഞാറ്റുവേല മഹോത്സവത്തിന് മുരിയാട് എന്‍ഇആര്‍ ഗ്രൗണ്ടില്‍ തുടക്കമായി. ഇരിങ്ങാലക്കുട ബ്ലോക്ക് പഞ്ചായത്ത് പ്രതിപക്ഷ നേതാവ് തോമസ് തത്തംപിള്ളി ഉദ്ഘാടനം ചെയ്തു. ബാങ്ക് പ്രസിഡന്റ് ജോമി ജോണ്‍ അധ്യക്ഷത വഹിച്ചു. മുരിയാട് പഞ്ചായത്ത് സ്ഥിരം സമിതി അധ്യക്ഷ മോളി ജേക്കബ്, അംഗങ്ങളായ എ.എം. ജോണ്‍സന്‍, കെ.വൃന്ദകുമാരി, ജെസ്റ്റിന്‍ ജോര്‍ജ്‌, തോമസ് തൊകലത്ത്, കൃഷി ഓഫീസര്‍ റീസ മോള്‍ സൈമണ്‍, സെക്രട്ടറി കാഞ്ചന നന്ദനന്‍, ടി.വി. ചാര്‍ളി, ഐ.ആര്‍. ജെയിംസ്, ബാങ്ക് വൈസ് പ്രസിഡൻറ് കെ.കെ. ചന്ദ്രശേഖരന്‍, ബാങ്ക് ഡയറക്ടര്‍മാര്‍ എന്നിവര്‍ പ്രസംഗിച്ചു. വിവിധയിനം സസ്യ -ഫലവൃക്ഷങ്ങളുടെ പ്രദര്‍ശനവും വിപണനവും നാടന്‍ കലാരൂപങ്ങളുടെ അവതരണം, വിവിധ മത്സരങ്ങള്‍, കാര്‍ഷിക സെമിനാറുകള്‍, നാടന്‍ കാര്‍ഷിക ഉപകരണങ്ങളുടെ പ്രദര്‍ശനം, വിവിധ തരം ഭക്ഷ്യപദാര്‍ത്ഥങ്ങള്‍ എന്നിവ മേളയില്‍ ഒരുക്കിയിട്ടുണ്ട്. ഞാറ്റുവേലചന്ത ജൂണ്‍ 25 വരെ തുടരും.

ഇടതുപക്ഷ സര്‍ക്കാരിന്റെ മദ്യനയത്തിനെതിരെ യു ഡി എഫ് പ്രതിക്ഷേധ സദസ്സ്

പുത്തന്‍ത്തോടിന്റെ പുനര്‍ജന്മത്തിന് പ്രധാനമന്ത്രിയുടെ ഓഫീസിന്റെ ഇടപെടല്‍

കരുവന്നൂര്‍  : പുത്തന്‍തോടിന്റെ ശോചനീയാവസ്ഥ പരിഹരിക്കാന്‍ പ്രധാനമന്ത്രിയുടെ ഓഫിസ് ഇടപെട്ടു. കരുവന്നൂര്‍ സ്വദേശി കണ്ണോളിവീട്ടില്‍ രാജന്‍ മകന്‍ സിബിന്‍രാജ് അയച്ച പരാതിയുടെ അടിസ്ഥാനത്തിലാണ് 30 ദിവസത്തിനകം പ്രശ്‌നം പരിഹരിക്കണമെന്ന് കേരള ഗവര്‍മെന്റിനോട് ആവശ്യപ്പെട്ടത്. ഗവര്‍മെന്റിന്റെ പ്രശ്‌നപരിഹാര സെല്‍ ഇടപെട്ട് പുത്തന്‍തോട് കടന്നുപോകുന്ന ഇരിങ്ങാലക്കുട മുനിസിപ്പാലിറ്റി, കാറളം, കാട്ടൂര്‍, പറപ്പൂക്കര, എടത്തിരുത്തി, പഞ്ചായത്ത് സെക്രട്ടറിമാര്‍ക്കും ജില്ല കളക്ടര്‍ക്കും പഞ്ചായത്ത് ഡപ്യൂട്ടി ഡയറക്ടര്‍ നോട്ടീസ് അയച്ചു. പരാതിക്കാരനായ സിബിന്‍രാജിനും പിഎംഓയില്‍ നിന്നും കേരള ഗവര്‍മെന്റ് പ്രശ്‌നപരിഹാര സെല്ലില്‍ നിന്നും നോട്ടീസ് കിട്ടിയിട്ടുണ്ട്. പുത്തന്‍തോടിന്റെ ഭൂരിഭാഗവും ഇരിങ്ങാലക്കുട നഗരസഭയുടെ പരിധിയിലായതിനാല്‍ നഗരസഭയാണ് പ്രധാനമായും പുത്തന്‍തോടിന്റെ പ്രശ്‌നപരിഹാരത്തിന് നടപടിയെടുക്കേണ്ടതെന്നും നോട്ടീസില്‍ പറയുന്നു.

കരുവന്നൂര്‍ പുഴയുടെ തെക്കുഭാഗത്തുള്ള പുത്തന്‍തോട് ഇന്ന് വെള്ളം വറ്റികാടുകയറി കിടക്കുകയാണ്. പുല്ലും ചെടികളും വളര്‍ന്ന് തോട് ഒരു കാടായി മാറിയരിക്കുകയാണ്. വിവിധ പഞ്ചായത്തുകളിലൂടെ പോകുന്ന തോടിന് അഞ്ചു കിലോമീറ്റര്‍ നീളമുണ്ട്. പ്രദേശത്തെ കൃഷിക്കും കുടിവെള്ളത്തിനും ജനം ആശ്രയിക്കുന്നത് ഈ തോടിനെയാണ്. എന്നാല്‍ വെള്ളം വറ്റിയതോടെ പൊറിത്തിശ്ശേരി, പറപ്പൂക്കര, കാട്ടൂര്‍, എടത്തിരുത്തി മേഖലയിലെ ഏക്കര്‍ കണക്കിന് കൃഷി പ്രതിസന്ധിയിലായിരിക്കുകയാണ്. കുടിവെള്ള ലഭ്യതയും കുറഞ്ഞു. മാലിന്യങ്ങള്‍ നിക്ഷേപിക്കുവാനുള്ള കേന്ദ്രമായി മാറിയതായിരിക്കുന്നു. കരുവന്നൂര്‍ പുഴയില്‍ നിന്നുളള നീരൊഴുക്ക് തടഞ്ഞതാണ് കെഎല്‍ഡിസി കനാലില്‍ വെള്ളം വറ്റാന്‍ കാരണമെന്ന് നാട്ടുകാര്‍ പറയുന്നു. വര്‍ഷങ്ങള്‍ക്കു മുമ്പ് ജലസേചന സൗകര്യം വര്‍ദ്ധിപ്പിക്കുന്നതിനും പുത്തന്‍തോടിന്റെ വീതി ആഴവും കൂട്ടി നിര്‍മ്മാണ പ്രവര്‍ത്തനങ്ങള്‍ നടന്നിരുന്നു. എന്നാല്‍ പിന്നീട് ഇത് സംരക്ഷിക്കുന്നതിനോ പരിപാലിക്കുന്നതിനോ ഒരു ശ്രമവും അധികൃതരുടെ ഭാഗത്തുനിന്ന് ഉണ്ടായിട്ടില്ല. കനാലിന്റെ അറ്റകുറ്റപണികളുടെ ഉത്തരവാദിത്വവും ഫണ്ടും കൃഷിവകുപ്പിനും കെഎല്‍ഡിസിക്കുമാണ്. എന്നാല്‍ ഇരുകൂട്ടരും പ്രശ്‌നം പരിഹരിക്കുവാന്‍ വേണ്ടത്ര ശ്രമം നടത്തുന്നില്ലെന്ന് നാട്ടുകാര്‍ പറയുന്നു. പുത്തന്‍തോട് വൃത്തിയാക്കി ഇരുഭാഗത്തും കരിങ്കല്‍ഭിത്തി കെട്ടി സംരക്ഷിക്കമെന്നാവശ്യപ്പെട്ട് നാട്ടുകാരും സംഘടനകളും പലവട്ടം സര്‍ക്കാരിന്റെ വകുപ്പുകളിലേക്ക് പലവട്ടം പരാതികളയച്ചിരുന്നു. മാറിമാറി വന്ന ജനപ്രതിനിധികള്‍ക്കും പരാതി കൊടുത്തെങ്കിലും അവഗണനതന്നെയായിരുന്നു ഫലം. മഴവെള്ളം സംരക്ഷിച്ചു നിര്‍ത്തുന്നതിനും റോഡിനു കുറുകെ തടയണ നിര്‍മ്മിക്കാനുള്ള നടപടിയും സര്‍ക്കാരിന്റെ ഭാഗത്തുനിന്ന് ഉണ്ടാകണമെന്നും നാട്ടുകാര്‍ ആവശ്യപ്പെട്ടു. കുടിവെള്ള ക്ഷാമവും, കൃഷിയാവശ്യത്തിനുള്ള വെള്ളത്തിന്റെ ദൗര്‍ലഭ്യവും രൂക്ഷമായിട്ടും നടപടി സ്വീകരിക്കേണ്ട ഗവ. അധികൃതര്‍ അനങ്ങാപ്പാറനയം സ്വീകരിച്ചപ്പോഴാണ് പ്രധാനമന്ത്രിയുടെ ഓഫിസിന് പരാതി അയച്ചതെന്ന് പരാതിക്കാരനായ സിബിന്‍രാജ് പറഞ്ഞു.

ആറാട്ട് കഞ്ഞിയില്‍ ആയിരക്കണക്കിന് ഭക്തജനങ്ങള്‍ പങ്കെടുത്തു

രാപ്പാള്‍: കൂടല്‍മാണിക്യ സ്വാമിയുടെ പള്ളി നീരാട്ടിന് ശേഷം ആറാട്ട് ചടങ്ങില്‍ പങ്കെടുക്കാനെത്തിയ ഭക്ത ജനങ്ങള്‍ക്കായി ആറാട്ട് കഞ്ഞി വിതരണം നടന്നു. രാപ്പാള്‍  എന്‍ എസ് എസ് കരയോഗം ഹാളിലാണ് കഞ്ഞി വിതരണം ചെയ്തത്. കഞ്ഞിക്ക് പുറമേ മുതിര പുഴുക്ക്, മാമ്പഴക്കാളന്‍ ,  നാളികേര പൂള് , പപ്പടം ,ശര്‍ക്കര എന്നിവ വിതരണം ചെയ്തു. ആയിരക്കണക്കിന് ഭക്തര്‍ ആറാട്ട് കഞ്ഞിയില്‍ പങ്കെടുത്തു.രാപ്പാള്‍ എന്‍ എസ് എസ് കരയോഗത്തിന്റെ നേതൃത്വത്തിലാണ് ആറാട്ട് കഞ്ഞി വിതരണം നടന്നത്.

സി.പി.ഐ.എം. ആളൂര്‍ നോര്‍ത്ത് ലോക്കല്‍ ‍കമ്മിറ്റി- ചരിത്ര രചന സമിതിയെ തിരഞ്ഞെടുത്തു

ആളൂര്‍: സി.പി.ഐ.എം.ആളൂര്‍ നോര്‍ത്ത് ലോക്കല്‍ ‍കമ്മിറ്റിയുടെ കേരള പാര്‍ട്ടി ചരിത്ര രചന സമിതിയെ തിരഞ്ഞെടുത്തു. 32 അംഗ കമ്മിറ്റിയുടെ കണ്‍വീനര്‍ ആയി പി.കെ.രവി വല്ലക്കുന്നിനെയും,ചെയര്‍മാനായി എ.ടി.ഉണ്ണികൃഷ്ണനെയും തിരഞ്ഞെടുത്തു.മേയ് 10 മുതല്‍ 25 വരെയുള്ള ദിവസങ്ങളില്‍ കമ്മിറ്റി വിവര ശേഖരണം നടത്തും.അതിനുമുന്‍പ്‌ താഴെത്തട്ടില്‍ പശ്ചാത്തല സൗകര്യങ്ങള്‍ ഒരുക്കും.ആളൂര്‍ നോര്‍ത്ത് ലോക്കല്‍ കമ്മിറ്റി സെക്രട്ടറി കെ.ആര്‍.ജോജോ പാര്‍ട്ടി മെഷിനറിയുടെ നേതൃത്വം വഹിക്കും.

ശ്രീ കൂടല്‍മാണിക്യം ഉത്സവം ദീപകാഴ്ച്ച 2017 ഓഫീസ് തുറന്നു

ഇരിങ്ങാലക്കുട : ശ്രീ കൂടല്‍മാണിക്യം ക്ഷേത്രോത്സവത്തോടനുബന്ധിച്ച്  ഠാണാ മുതല്‍ ക്ഷേത്രം വരെ വീഥികള്‍ ആധുനികരീതിയിലുള്ള പിക്‌സല്‍ എല്‍ഇഡി ദീപങ്ങളെ കൊണ്ട് അലങ്കരിച്ച് ദീപകാഴ്ചയൊരുക്കുന്നു. ദീപകാഴ്ച 2017 എന്ന പേരിലാണ് പരിപാടി നടക്കുന്നത്.  കൂടാതെ ദീപാലങ്കാരത്തോടെയുള്ള ബഹുനില പന്തല്‍, കടകളും കെട്ടിടങ്ങളും അലങ്കരിക്കല്‍ തുടങ്ങിയവയും ഇത്തവണത്തെ പ്രത്യേകതയാണ്. ദീപകാഴ്ച 2017ന്റെ ഓഫീസ് ഉദ്ഘാടനം മുന്‍സിപ്പല്‍ ചെയര്‍പേഴ്‌സണ്‍ നിമ്യാ ഷിജു നിര്‍വഹിച്ചു. ആല്‍ത്തറയ്ക്ക് സമീപം അമ്പിളി ജ്വല്ലറിക്കു മുകളിലാണ്  ഓഫീസ് പ്രവര്‍ത്തിക്കുന്നത്. യോഗത്തില്‍ സ്വാഗതസംഘം ചെയര്‍മാന്‍ റോളി ചന്ദ്രന്‍ അദ്ധ്യക്ഷത വഹിച്ചു. ശ്രീകൂടല്‍മാണിക്യം ദേവസ്വം ചെയര്‍മാന്‍ പനമ്പിള്ളി രാഘവമേനോന്‍, സംഘാടകസമിതി ചീഫ് കോഡിനേറ്റര്‍ കൃപേഷ് ചെമ്മണ്ട, സ്വാഗതസംഘം ജനറല്‍ കണ്‍വീനര്‍ സന്തോഷ് ചെറാക്കുളം, ഡോ.ഇ.പി. ജനാര്‍ദ്ദനന്‍, കൃഷ്ണകുമാര്‍ വല്ലൂപറമ്പില്‍, കല്ലിങ്ങപ്പുറം ചന്ദ്രന്‍, എം.കെ.സുബ്രഹ്മണ്യന്‍, കൗണ്‍സിലര്‍ മാരായ സോണിയ ഗിരി, അമ്പിളിജയന്‍, സന്തോഷ് ബോബന്‍, സരസ്വതി ദിവാകരന്‍ തുടങ്ങിയവര്‍ സംസാരിച്ചു. ഇരിങ്ങാലക്കുടയിലെ പൗരപ്രമുഖരും ബിസിനസ്, പ്രവാസി പ്രമുഖരും, പൊതുജനങ്ങളും ഒത്തുചേര്‍ന്നാണ് പരിപാടി സംഘടിപ്പിക്കുന്നത്.

മുഖ്യമന്ത്രിയുടെ പരിപാടിയില്‍ പങ്കെടുക്കണമോ വേണ്ടയോ എന്നുള്ളത് എന്‍റെ ഇഷ്ട്ടം: എന്നെ ആരും ചോദ്യം ചെയ്യെണ്ട – മുന്‍സിപ്പല്‍ ചെയര്‍പേഴ്സണ്‍

ഇരിങ്ങാലക്കുട : ജില്ലയിലെ റൂറല്‍ വനിത പോലീസ് സ്റ്റേഷന്‍ കാട്ടുങ്ങച്ചിറയില്‍ മുഖ്യമന്ത്രി
ഉദ്ഘാടനം ചെയ്തപ്പോള്‍ ചടങ്ങില്‍ പങ്കെടുക്കേണ്ട ചെയര്‍പേഴ്സണ്‍ എന്തുകൊണ്ട് വന്നില്ല എന്ന് കൗണ്‍സിലില്‍ പ്രതിപക്ഷത്തിന്റെ ചോദ്യത്തിന് മുഖ്യമന്ത്രിയോ മറ്റാരായാലും അവരുടെ കൂടെ ചടങ്ങില്‍ പങ്കെടുക്കണമോ വേണ്ടയോ എന്നുള്ളത് തന്റെ വ്യക്തിപരമായ തീരുമാനം ആണെന്നും ഇതില്‍ തന്നെ ആരും ചോദ്യം ചെയ്യെണ്ടന്നും ചെയര്‍പേഴ്സണ്‍ നിമ്യ ഷിജു കൗണ്‍സിലില്‍ പറഞ്ഞത് ബഹളത്തിനിടയാക്കി. രാഷ്ട്രീയ വിരോധം കൊണ്ടാണ് ചെയര്‍പേഴ്സണ്‍ ചടങ്ങില്‍ പങ്കെടുക്കാത്തത് എന്നും പ്രതിപക്ഷം കൗണ്‍സിലില്‍ വിമര്‍ശിച്ചു.

ജാതിപ്പേര് വിളിച്ചു ആക്ഷേപിച്ച വനിതകൗണ്‍സിലറെ പുറത്താക്കണമെന്ന് ആവശ്യപ്പെട്ടു കൗണ്‍സിലിലേക്കു എല്‍ ഡി എഫ് പ്രതിഷേധ മാര്‍ച്ച്

ഇരിങ്ങാലക്കുട: എല്‍ ഡി എഫ് കൗണ്‍സിലര്‍ പി സി മുരളീധരനെ ജാതിപ്പേര് വിളിച്ചു മര്‍ദിച്ച യു ഡി എഫ്
വനിത കൗണ്‍സിലര്‍ സുജ സജീവ്കുമാറിനെ പുറത്താക്കണമെന്ന് ആവശ്യപ്പെട്ടു ബുധനാഴ്ച രാവിലെ നടന്ന കൗണ്‍സില്‍ യോഗത്തില്‍ എല്‍ ഡി എഫ് റെ നേതൃത്വത്തില്‍ പ്രതിഷേധ മാര്‍ച്ച് നടത്തി .ഇതിനു പുറമെ വനിത കൗണ്‍സിലര്‍ മാപ്പു പറയണമെന്നും എല്‍ ഡി എഫ് ആവശ്യപ്പെട്ടു . കൗണ്‍സില്‍ ആരംഭിക്കുന്നതിനു മുന്‍പ് ഈ വിഷയത്തില്‍ ഒരു തീരുമാനം എടുക്കണമെന്നും കൗണ്‍സില്‍ യോഗത്തില്‍ പി വി ശിവകുമാര്‍ ആവശ്യപ്പെട്ടു. ജാതിപ്പേര് വിളിച്ചു ആക്ഷേപിച്ചിട്ടില്ലെന്നും കള്ള പരാതിയാണെന്നും കൗണ്‍സിലില്‍ കോണ്‍ഗ്രസ് അംഗം അഡ്വ . വി സി വര്‍ഗീസ് പറഞ്ഞു . സുജയെ മര്‍ദിച്ച പി സി മുരളീധരനും മറ്റു വനിത കൗണ്‍സിലര്‍മാര്‍ക്കും എതിരെ ചെയര്‍പേഴ്സണ്‍ നടപടി എടുക്കണമെന്നും അദ്ദേഹം ആവശ്യപ്പെട്ടു . ഇതോടെ പ്രതിപക്ഷം ഒന്നടങ്കം എണിറ്റു. ഏതു വനിത കൗണ്‍സിലര്‍മാരാണ് സുജയെ ആക്രമിച്ചതെന്ന് ഭരണപക്ഷം വ്യക്തമാക്കണമെന്നും ആവശ്യപ്പെട്ടു . ബഹളം രൂക്ഷമായപ്പോള്‍ ചെയര്‍പേഴ്സണ്‍ ഇടപ്പെടുകയും പരാതിമേല്‍ യുക്തമായ തീരുമാനം എടുക്കുമെന്നും പറഞ്ഞു ബഡ്ജറ്റിനുള്ള ചര്‍ച്ച ആരംഭിച്ചു . ആരോപണ വിധേയ രണ്ടു കൗണ്‍സിലര്‍മാരും ഇന്നത്തെ യോഗത്തില്‍ ഹാജരായില്ല .

കോണ്‍ഗ്രസ്സുകാര്‍ സമുദായ സംഘടന ഭാരവാഹികള്‍ ആകണം -ഡി സി സി പ്രസിഡന്റ് ടി എന്‍ പ്രതാപന്‍

ഇരിങ്ങാലക്കുട : എന്‍ എസ് എസ്, എസ് എന്‍ ഡി പി, പള്ളി കമ്മിറ്റികള്‍ തുടങ്ങിയ സമുദായ സംഘടനകളില്‍ കോണ്‍ഗ്രസ്സ് ബൂത്ത് പ്രസിഡന്റുമാര്‍ നിര്‍ബന്ധമായി പങ്കെടുക്കുകയും നേതൃസ്ഥാനങ്ങള്‍ ഏറ്റെടുക്കുകയും വേണമെന്ന് ഡി സി സി പ്രസിഡന്റ് ടി എന്‍ പ്രതാപന്‍ ആവശ്യപ്പെട്ടു. പുതിയതായി തിരഞ്ഞെടുക്കപ്പെട്ട ബൂത്ത് പ്രസിഡന്റുമാര്‍ക് ഇരിങ്ങാലക്കുട ബ്ലോക്ക് കോണ്‍ഗ്രസ്സ് (ഐ) നല്‍കിയ സ്വീകരണ സമ്മേളനം മുന്‍സിപ്പല്‍ ടൗണ്‍ ഹാളില്‍ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം . സമുദായ സംഘടനകള്‍ ഒരു പാര്‍ട്ടിയുടെയും സ്വകാര്യ സ്വത്തല്ലെന്നും അദ്ദേഹം കൂടി ചേര്‍ത്തു. താഴെ തട്ടിലുള്ള രാഷ്ട്രീയ പ്രവര്‍ത്തകര്‍ അധ്വാനിക്കുന്നതിന്റെ ഫലം മേലെ തട്ടിലുള്ള നേതാക്കള്‍ വിയര്‍പ്പൊഴുക്കാതെ ആസ്വദിക്കുന്ന രീതി ഇനി തൃശൂര്‍ ജില്ലയില്‍ വച്ചു പൊറുപ്പിക്കില്ലെന്നും ബൂത്ത് പ്രസിഡന്റുമാര്‍ അറിയാതെ സംഘടിപ്പിക്കുന്ന ഒരു കോണ്‍ഗ്രസ്സ് പരിപാടിക്കും ഡി സി സി പ്രസിഡന്റ് എന്ന നിലയില്‍ താന്‍ ഇനി പങ്കെടുക്കില്ല എന്ന് ടി എന്‍ പ്രതാപന്‍ പറഞ്ഞപ്പോള്‍ പിന്തുണയേകി സദസില്‍ നിന്നും വന്‍കരഘോഷം ഉയര്‍ന്നു . എല്ലാ ബൂത്തുകളിലെയും പ്രധാന കവലകളില്‍ കൊടിമരം നാട്ടി വാര്‍ത്താബോര്‍ഡ് സ്ഥാപിക്കണമെന്നും ആദ്യമായി ബൂത്ത് പ്രസിഡന്റുമാര്‍ക് ഫോട്ടോ പതിച്ച ഐഡന്റിറ്റി കാര്‍ഡ് നല്‍കുമെന്നും അദ്ദേഹം പറഞ്ഞു.

ജില്ലയില്‍ ഇരിങ്ങാലക്കുടയൊഴിച്ചു എല്ലായിടത്തും നിയോജക മണ്ഡലടിസ്ഥാനത്തിലാണ് നേതൃത്വ സമ്മേളനം വിളിച്ചു ചേര്‍ത്തത് എന്നും ഇവിടെ മാത്രം കാട്ടൂര്‍ ബ്ലോക്കിനെ ഒഴിച്ച് നിര്‍ത്തിയതിന്റെ രഹസ്യം ബ്ലോക്ക് പ്രസിഡന്റുമാരായ ടി വി ചാര്‍ളിക്കും, വര്‍ഗീസ് പുത്തനങ്ങാടിക്കും മാത്രമേ അറിയൂ എന്ന് ഡി സി സി പ്രസിഡന്റ് പരസ്യമായി പറഞ്ഞു തന്റെ നീരസം പ്രകടിപ്പിക്കുകയും ചെയ്തത് നേതൃത്വ സമ്മേളനത്തില്‍ പോലും ഗ്രുപ്പിസം വിട്ടു മാറിയിട്ടില്ല എന്നുള്ളതിന് തെളിവായി . ഐ ഗ്രുപ്പുകാരെ മനഃപൂര്‍വം മാറ്റി നിര്‍ത്താനാണ് നിയോജക മണ്ഡല തലത്തില്‍ ഒരു ആക്ഷേപം ഉണ്ട് . കെ പി സി സി ജനറല്‍ സെക്രട്ടറി എം പി ജാക്‌സന്റെ അസാന്നിധ്യം ചടങ്ങില്‍ ശ്രദ്ധിക്കപ്പെട്ടു .

ബ്ലോക്ക് കോണ്‍ഗ്രസ്സ് പ്രസിഡന്റ് ടി വി ചാര്‍ളി അധ്യക്ഷനായി. ജില്ലാ കോണ്‍ഗ്രസ്സ് നേതാക്കളായ ജോസഫ് ചാലിശേരി , ടി വി ചന്ദ്രമോഹന്‍ , കെ വി ദാസന്‍ , ടി വി ജോണ്‍സന്‍ ഡി സി സി സെക്രട്ടറിമാരായ ആന്റോ പെരുമ്പിള്ളി , കെ കെ ശോഭനന്‍, സോണിയ ഗിരി, നഗരസഭാ അധ്യക്ഷ നിമ്യ ഷിജു നിയോജക മണ്ഡലം പ്രസിഡന്റ് ജോസഫ് ചാക്കോ എന്നിവര്‍ ചടങ്ങില്‍ പങ്കെടുത്തു .

 

സമഗ്ര കുടിവെള്ള പദ്ധതി നടപ്പിലാക്കാനും ഷണ്‍മുഖം കനാല്‍ മാലിന്യ വിമുക്തമാക്കാനും ബി ജെ പി ദിനരാത്ര സമരം

എടതിരിഞ്ഞി : പടിയൂര്‍ ഗ്രാമപഞ്ചായത്തിലെ സമഗ്രകുടിവെള്ള പദ്ധതി നടപ്പിലാക്കുക , ഷണ്‍മുഖം കനാല്‍ മാലിന്യ വിമുക്തമാകുക , എം എല്‍ എ യുടെ അനാസ്ഥ അവസാനിപ്പിക്കുക എന്നീ ആവശ്യങ്ങള്‍ ഉന്നയിച്ചു ബി ജെ പി പടിയൂര്‍ ഗ്രാമപഞ്ചായത്ത് കമ്മിറ്റിയുടെ ആഭിമുഖ്യത്തില്‍ മാര്‍ച്ച് 22 ന് രാവിലെ 9 മണി മുതല്‍ 23 ന് വൈകിട്ട് 6 മണി വരെ എടതിരിഞ്ഞി പോസ്റ്റ് ഓഫീസ് ജംഗ്ഷനില്‍ ഒന്നാം ഘട്ട ദിനരാത്ര സമരം ബി ജെ പി ജില്ലാ പ്രസിഡന്റ് എ നാഗേഷ് ഉദ്ഘാടനം നിര്‍വഹിക്കും.

റവന്യു ഡിവിഷന്‍ ഇരിങ്ങാലക്കുടയ്ക്കു തന്നെ വേണം : കെ പി പി സി ജനറല്‍ സെക്രട്ടറി എം പി ജാക്സണ്‍

ഇരിങ്ങാലക്കുട : സംസ്‌ഥാന സര്‍ക്കാര്‍ ബജറ്റില്‍ ജില്ലയില്‍ പുതുതായി അനുവദിച്ച റവന്യു ഡിവിഷന്‍ ഇരിങ്ങാലക്കുടയില്‍ തന്നെ വേണമെന്ന് കെ പി സി സി ജനറല്‍ സെക്രട്ടറി എം പി ജാക്സണ്‍ ബന്ധപ്പെട്ട അധികൃതരോട് ആവശ്യപ്പെട്ടു . കഴിഞ്ഞ ഉമ്മന്‍ചാണ്ടി സര്‍ക്കാര്‍ ഈ ആവശ്യം തത്വത്തില്‍ അംഗീകരിച്ചിരുന്നതാണ്. കഴിഞ്ഞ സര്‍ക്കാരിന്റെ കാലത്തു റവന്യു സെക്രട്ടറി ഇത് സംബന്ധിച്ചു സമര്‍പ്പിച്ച റിപ്പോര്‍ട്ടിലും റവന്യു ഡിവിഷന് ഏറ്റവും അനുയോജ്യമായ സ്ഥലം ഇരിങ്ങാലക്കുട തന്നെയാണെന്ന് നിര്‍ദേശിച്ചിരുന്നു . അതിനെ തുടര്‍ന്നാണ് റവന്യു ഡിവിഷന് ആവശ്യമായ അടിസ്ഥാന സൗകര്യങ്ങള്‍ വിപുലീകരിക്കുന്നതിനു യു ഡി എഫ് സര്‍ക്കാര്‍ നടപടികളും സ്വീകരിച്ചിരുന്നത്. റവന്യു ഡിവിഷൻ തുടങ്ങുന്നതിനാവശ്യമായ എല്ലാ സൗകര്യങ്ങളും ഇരിങ്ങാലക്കുടയില്‍ സജ്ജമാണ് . ഭൂമിശാസ്ത്രപരമായി ഏറ്റവും അനുയോജ്യമായ സ്ഥലവും ഇരിങ്ങാലക്കുട തന്നെയാണ് . ഇരിങ്ങാലക്കുടയിലെ മുഴുവന്‍ ജനങ്ങളും റവന്യു ഡിവിഷന്‍ ഇവിടെ തന്നെ വേണമെന്ന് ആഗ്രഹിക്കുന്നതായി എം പി ജാക്സണ്‍ പറഞ്ഞു.

അവിട്ടത്തൂര്‍ സഹകരണ ബാങ്ക് സി പി ഐ (എം) നിലപാടിനെതിരെ സി പി ഐ പ്രതിഷേധം

ഇരിങ്ങാലക്കുട : അവിട്ടത്തൂര്‍ സര്‍വീസ് സഹകരണ ബാങ്ക് കടുപ്പശേരി ബ്രാഞ്ച് ഉദ്ഘാടനവുമായി ബന്ധപ്പെട്ടു സി പി ഐ (എം ) ന്റെ ഏകപക്ഷിയ നടപടിയില്‍ പ്രതിഷേധിച്ചു സി പി ഐ ഡയറക്ടര്‍ ബോര്‍ഡ് അംഗങ്ങള്‍ ബാങ്ക് യോഗത്തില്‍ നിന്നിറങ്ങിപോയി.  മാര്‍ച്ച് 17 – ാം തീയതി ശനിയാഴ്ച , സംസ്ഥാന സഹകരണ വകുപ്പ് മന്ത്രി കടകംപള്ളി സുരേന്ദ്രന്‍ ചടങ്ങു ഉദ്ഘാടനം ചെയുന്നത്.  ഉദ്ഘാടന പരിപാടികള്‍ ബാങ്ക് ഭരണസമിതി യോഗത്തില്‍ ചര്‍ച്ച ചെയ്തിരുന്നില്ല . ആശംസ പ്രസംഗങ്ങളില്‍ വേളൂക്കര ഗ്രാമപഞ്ചായത്തു വൈസ് പ്രസിഡന്റ് സി പി ഐ പ്രതിനിധി ടി ആര്‍ .  സുനിലിന്റെ പേര് ഗ്രാമപഞ്ചായത്തു മെമ്പര്മാരുടെയും , ഉദ്യോഗസഥരുടെയും , യൂണിയന്‍ നേതാക്കളുടെയും താഴെയാണ് നോട്ടീസില്‍ അച്ചടിച്ചിരുന്നത് .   ഈ അപാകത ചൂണ്ടിക്കാട്ടിയപ്പോള്‍ നാമമാത്രമായി പകരം നോട്ടീസ് അച്ചടിച്ചിരുന്നുവെങ്കിലും , നേരത്തെ അടിച്ച നോട്ടീസാണ് വിതരണം ചെയ്തത്.  പുതിയ നോട്ടീസിലും പ്രോട്ടോക്കോള്‍ ലംഘനമുണ്ട് .സി പി ഐ (എം) നിയന്ത്രണത്തിലുള്ള കലാസമിതിയുടെ സ്റ്റേജ് പ്രോഗ്രാം തീരുമാനിച്ചതും ഭരണസമിതി യോഗത്തില്‍ ചര്‍ച്ച ചെയ്യാതെയാണ് എന്ന് സി പി ഐ പ്രതിനിധികളായ ഡയറക്ടര്‍ ബോര്‍ഡ് അംഗങ്ങളായ കെ അനില്‍കുമാര്‍ ,കെ ആര്‍ മോഹനന്‍ എന്നിവര്‍ പറഞ്ഞു .

പടിയൂര്‍ ഡോണ്‍ ബോസ്കോ യൂറോപ്യന്‍ പ്രൈമറി സ്കൂളില്‍ 71 – ാംമത് വാര്‍ഷികാഘോഷം

പടിയൂര്‍ : പടിയൂര്‍ ഡോണ്‍ ബോസ്കോ യൂറോപ്യന്‍ പ്രൈമറി സ്കൂളില്‍ 71 – ാംമത് വാര്‍ഷികാഘോഷം ,ബാലോത്സവം ,  പ്രധാന അധ്യാപികയുടെ വിരമിക്കല്‍ ചടങ്ങ് എന്നിവ നടന്നു. പടിയൂര്‍ പഞ്ചായത്തു പ്രസിഡന്റ് കെ.സി ബിജു ചടങ്ങ് ഉദ്ഘാടനം ചെയ്തു. വാര്‍ഡ് മെമ്പര്‍ ടി. ഡി. ദശോബ് , ആംഗ്ലോ ഇന്ത്യന്‍ അസോസിയേഷന്‍ പ്രസിഡന്റ് സ്റ്റാന്‍ലി റോഡ്രീഗസ് ,സി.ര്‍.സി കോഡിനേറ്റര്‍ വിക്രമന്‍,പി.ടി.എ അംഗം ബിബിത രമേശ് എന്നിവര്‍ ആശംസകള്‍ നേര്‍ന്നു. വിരമിച്ച ഹെഡ്മിസ്ട്രസ് ട്രീസ വലറിന്‍ മികച്ച വിദ്യാര്‍ത്ഥികള്‍ക്കുള്ള സമ്മാനദാനം നിര്‍വഹിച്ചു. അധ്യാപികയായ  ലവി മെന്‍റ്സ് റിപ്പോര്‍ട്ട് അവതരിപ്പിച്ചു . അധ്യാപകരായ ജൂഡിറ്റ് .ജെ ബീവീര സ്വാഗതവും ,സക്കീന ബീവി നന്ദിയും പറഞ്ഞു.

കലാനിലയം ഗോപിക്ക് നാടിന്‍റെ ആദരം

ഇരിങ്ങാലക്കുട :  ഉണ്ണായിവാര്യര്‍ സ്മാരക കലാനിലയം അധ്യാപകവൃത്തിയില്‍ നിന്ന് ഈയിടെ വിടപറഞ്ഞ കഥകളി രംഗത്തെ അതികായന്‍ കലാനിലയം ഗോപിയെ സാംസ്‌കാരിക പ്രവര്‍ത്തകരും പൊതുസമൂഹവും ആദരിക്കുന്നു.  ഡോ കെ.എന്‍ പിഷാരടി സ്മാരക കഥകളി ക്ലബ്ബിന്റെയും നാദോപാസനയുടെയും സഹകരണത്തോടെ ഉണ്ണായിവാര്യര്‍ സ്മാരക കലാനിലയം ഹാളിലാണ് സമാദരണം നടക്കുന്നത്.  മാര്‍ച്ച് 19 ഞായറാഴ്ച രാവിലെ 10 നു സമാദരണസമ്മേളനം പ്രൊഫ്. സി. രവീന്ദ്രനാഥ്‌ ഉദ്ഘാടനം ചെയ്യും . പ്രൊഫ് കെ.യു അരുണന്‍ എം.ല്‍.എ  അദ്ധ്യക്ഷത വഹിക്കും . കൃഷിവകുപ്പ് മന്ത്രി വി.എസ് സുനില്‍കുമാര്‍ മുഖ്യാഥിതിയായിരിക്കും . സി.എന്‍ ജയദേവന്‍ എം.പി. കീര്‍ത്തിപത്രവും കേരള നാടക അക്കാദമി സെക്രട്ടറി എന്‍. രാധാകൃഷ്ണന്‍ നായര്‍ ഉപഹാര സമര്‍പ്പണവും നടത്തും.  പ്രൊഫ്.വി.കെ. ലക്ഷ്മണന്‍ നായര്‍ സ്വാഗതവും അഡ്വ രാജേഷ് തമ്പാന്‍ നന്ദിയും പറയും . ഉച്ചതിരിഞ്ഞു 3 മണിക്ക് കൂടിയാട്ടം സെന്റര്‍ ഡയറക്ടര്‍ ഡോ. ഏറ്റുമാനൂര്‍ പി.കണ്ണന്‍ ‘തൗരത്രിക പരിചയം ‘ വിഷയത്തില്‍ സോദാഹരണ പ്രഭാഷണം നടത്തും . വൈകിട്ട് 6 നു കലാനിലയം ഗോപി മുഖ്യ വേഷം ചെയുന്ന ‘നരകാസുരവധം’ കഥകളി അരങ്ങേറും .

കൊടിമരവുമായി ബന്ധപ്പെട്ടു ക്രൈസ്റ്റ് കോളേജില്‍ സംഘര്‍ഷം : 4 പേര്‍ക്ക് പരിക്കേറ്റു

ഇരിങ്ങാലക്കുട : കൊടിമരവുമായി ബന്ധപ്പെട്ടു ഇരിങ്ങാലക്കുട ക്രൈസ്റ്റ് കോളേജില്‍ നടന്ന സംഘര്‍ഷത്തില്‍ കോണ്‍ഗ്രസ്സ് ടൗണ്‍ മണ്ഡലം പ്രസിഡന്റ് അടക്കം 4 പേര്‍ക്ക് പരിക്കേറ്റു. ഇരിങ്ങാലക്കുട ടൗണ്‍ മണ്ഡലം പ്രസിഡന്റ് ജോസഫ് ചാക്കോ , കെ. എസ്. യു. മുന്‍ താലൂക്ക് സെക്രട്ടറി സനല്‍ വര്‍ഗീസ് ,കെ.എസ്.യു. യൂണിറ്റ് പ്രസിഡന്റ് മുഹമ്മദ് ഫൈസല്‍,സെക്രട്ടറി ടോം എന്നിവര്‍ക്കാണ് പരിക്കേറ്റത്. ഇന്ന് രാവിലെ 6 .30 നോടെയാണ്കോളേജ് ഗേറ്റിനു അടുത്ത് വച്ച് സംഘര്‍ഷം ഉണ്ടായത്‌. കെ.എസ്.യു വിന്റെ കൊടിമരം നശിപ്പിക്കാന്‍ ശ്രമിച്ച എസ.എഫ്. ഐ. യുടെ പ്രവര്‍ത്തകര്‍ പൂര്‍ണമായി മര്‍ദിച്ചുവെന്നു കെ.എസ്.യു പ്രവര്‍ത്തകര്‍ പറഞ്ഞു. പരിക്കേറ്റവരെ ഇരിങ്ങാലക്കുട ഗവണ്മെന്‍റ് ആശുപത്രിയിലും സഹകരണ ആശുപത്രിയിലും പ്രവേശിപ്പിച്ചു.

ക്രെെസ്റ്റ് കോളേജ് പരിസരത്തെ കെ എസ് യു കൊടിമരം നശിപ്പിക്കുന്നത് കണ്ട് ചോദ്യം ചെയ്ത കെ എസ് യു പ്രവര്‍ത്തകരേയും ഇരിങ്ങാലക്കുട ടൗണ്‍ മണ്ഡലം കോണ്‍ഗ്രസ്സ് പ്രസിഡന്റ് ജോസഫ് ചാക്കോയേയും ഒരുസംഘം എസ് എഫ് ഐ ഗുണ്ടകള്‍ മാരകായുധങ്ങളുമായ് ആക്രമിച്ച് പരിക്കേല്പിച്ചതില്‍ യൂത്ത് കോണ്‍ഗ്രസ്സ് നിയോജകമണ്ഡലം കമ്മിറ്റി പ്രതിക്ഷേധിച് കുറ്റവാളികള്‍ക്കെതിരെ ശക്തമായ നടപടി അധികാരികളുടെ ഭാഗത്തുനിന്നുണ്ടാകണമെന്ന് ധീരജ്തേറാട്ടില്‍ ആവശ്യപ്പെട്ടു

related news : ക്രൈസ്റ്റ് കോളേജില്‍ എസ് എഫ് ഐ യുടെ കൊടിമരം പോലീസ് അറത്തുമാറ്റി : വിദ്യാര്‍ത്ഥികള്‍ റോഡ് ഉപോരോധിച്ചു

Top
Close
Menu Title