News

അവധിക്കാലം അവസാനിക്കാനിരിക്കെ വിപണി സജീവമായി

16052704ഇരിങ്ങാലക്കുട: സ്കൂള്‍ വര്‍ഷാരംഭത്തിന് ദിവസങ്ങള്‍ ബാക്കിനില്‍ക്കെ വിപണിയില്‍ തിരക്കിന്റെ മണിമുഴക്കം.  കുരുന്നുകള്‍ മുതല്‍ ഹൈസ്കൂള്‍ വിദ്യാര്‍ഥികള്‍ക്ക് വരെയും കാര്‍ട്ടൂണ്‍ കഥാപാത്രങ്ങളുടെ ചിത്രം പതിപ്പിച്ച ബാഗുകള്‍. വ്യത്യസ്തമായ ബാഗുകള്‍ ആവശ്യപ്പെടുന്ന ഗൌരവക്കാരും കുറവല്ല. അവധിക്കാലം അവസാനിക്കാനിരിക്കെ വിപണി സജീവമായി. ബാഗ്, കുട, ലഞ്ച്ബോക്സ്, ചെരുപ്പ്, ഷൂ, റെയിന്‍കോട്ട്, നോട്ടുബുക്ക് തുടങ്ങിയവയെല്ലാം ആകര്‍ഷകമായ വൈവിധ്യങ്ങളൊരുക്കിയാണ് ഉല്‍പ്പന്നം വിപണിയിലെത്തിച്ചത്. പെന്‍സില്‍–ലഞ്ച്ബോക്സുകളും ഏറെ വ്യത്യസ്തമാണ്. കാല്‍ക്കുലേറ്റര്‍ അടങ്ങിയ പെന്‍സില്‍ ബോക്സാണ് സ്കൂള്‍ വിപണിയിലെ മിന്നുംതാരം. 30 രൂപ മുതല്‍ ബോക്സുകള്‍ ലഭിക്കും. ചൂടാറാതെ ഇരിക്കാന്‍ കാസറോള്‍ മാതൃകയിലുള്ള ലഞ്ച്ബോക്സുകളും കൂടുതല്‍ തട്ടുള്ള സ്നാക്സ് ബോക്സുകളും വിപണിയെ സമ്പന്നമാക്കി. 50 രൂപ മുതല്‍ 300 രൂപ വരെയാണ് ലഞ്ച്ബോക്സിന്റെ വില. കുപ്പികള്‍ക്ക് 50 രൂപ മുതലാണ് വില.200 രൂപ മുതല്‍ 2000 രൂപ വരെയുള്ള സ്കൂള്‍ ബാഗുകള്‍ വില്‍പ്പനക്കെത്തിയിട്ടുണ്ട്. ബ്രാന്‍ഡുകള്‍ മാറുന്നതനുസരിച്ച് വിലയില്‍ വ്യത്യാസമുണ്ട്. വിദ്യാര്‍ഥികള്‍ക്ക് ഇളം–കടും നിറങ്ങളോടുള്ള താല്‍പര്യം അവസാനിച്ചിട്ടില്ല. മഴക്കാലമായതോടെ കുടകള്‍ക്കും ആവശ്യക്കാരേറെയാണ്. 200 രൂപയാണ് കുടയുടെ കുറഞ്ഞവില. വിവിധ നിറങ്ങളിലുള്ള കാലന്‍കുടകളും ആണ്‍കുട്ടികളേയും പെണ്‍കുട്ടികളെയും ആകര്‍ഷിക്കുന്നു. കാര്‍ട്ടൂണ്‍ ചിത്രം പതിച്ച റെയിന്‍കോട്ടുകളും വിപണി കീഴടക്കി.ഷൂ, ചെരുപ്പ് എന്നിവയുടെ വില്‍പ്പനയും ഊര്‍ജിതമായി. ലേസ് ലെസ് ഷൂവിനാണ് വില്‍പ്പന കൂടുതല്‍. 200 രൂപ മുതലാണ് ഷൂവിന്റെ വില. 15 രൂപ മുതല്‍ ആരംഭിക്കുന്ന നോട്ടുബുക്കിന്റെ വില ഗുണമേന്മ കൂടുന്നതനുസരിച്ച് ഉയരും. പുസ്തകങ്ങള്‍ പൊതിയുന്ന ബ്രൌണ്‍പേപ്പര്‍ മുതല്‍ എല്ലാ പഠനോപകരണങ്ങളുമൊരുക്കി വിപണി ആഘോഷത്തിലാണ്. യൂണിഫോം തുണികള്‍ക്ക് മീറ്ററിന് കുറഞ്ഞത് 120–130 വരെ ഈടാക്കുന്നുണ്ട്. യൂണിഫോം തുണിയും മറ്റും എങ്ങനെയും വാങ്ങാമെങ്കിലും തയ്യല്‍ക്കാരെ തേടി നെട്ടോട്ടത്തിലാണ് രക്ഷിതാക്കള്‍.


Comments

Top
Menu Title