News

അഭിനയ തൊഴിലാളിയും ജാഥ തൊഴിലാളികളും …


നടിയെ ആക്രമിച്ച വിഷയത്തില്‍ കഴിഞ്ഞ ആഴ്ചകളില്‍ ഇരിങ്ങാലക്കുടയിലെ തന്റെ വീട്ടിലേക്കു ജാഥ നടത്തിയത് വെറും ജാഥ തൊഴിലാളികളാണെന്ന ഇന്നസെന്റ് എം പിയുടെ പരിഹാസത്തില്‍ കഴമ്പുണ്ടെന്ന് ത്രിവര്‍ണ പാര്‍ട്ടിയുടെ മേലാവിമാരും ഇപ്പോള്‍ സമ്മതിക്കുന്നുണ്ട്. വിവിധ സംഘടനകള്‍ ജാഥ നടത്തിയപ്പോള്‍ ഇവരില്‍ നേതാക്കള്‍ ഉണ്ടായിരുന്നില്ലെന്നും, ഇനി ജാഥ നടത്തുമ്പോള്‍ നേതാക്കളെ ആരെയെങ്കിലും വിടണമെന്ന് ജാഥ സംഘടിപ്പിച്ച പാര്‍ട്ടിക്കാരോട് ഇന്നസെന്റ് അഭ്യര്‍ത്ഥിക്കുക കൂടി ചെയ്തു. ഈ സംശയം സഞ്ചാരിയുള്‍പ്പടെ അന്ന് അവിടെ ഈ കാഴ്ചകള്‍ നേരില്‍ കാണാന്‍ സൗഭാഗ്യമുണ്ടായവര്‍ക്കെല്ലാം തോന്നിയതാണ്. ജാഥ നയിച്ചിരുന്ന ആശ്രിതന്മാരോട് ഈ സംശയം ചോദിച്ചപ്പോള്‍, മുദ്രാവാക്യം ഉച്ചത്തില്‍ മുഴക്കിയതല്ലാതെ മറ്റു പ്രതികരണം ഒന്നും ഉണ്ടായിരുന്നില്ല. കഴിഞ്ഞ ആഴ്ചകളില്‍ യൂത്ത് കോണ്‍ഗ്രസ്, കോണ്‍ഗ്രസ് മണ്ഡലം കമ്മിറ്റി, മഹിളാ കോണ്‍ഗ്രസ്, യുവ മോര്‍ച്ച എന്നിവരാണ് ഇന്നസെന്റ് എം പി യുടെ വീട്ടിലേക്ക് ജാഥ നടത്തിയിരുന്നത്. കെ പി സി സി ജനറല്‍ സെക്രട്ടറിയും ഡി സി സി സെക്രെട്ടറിമാരും ഇരിങ്ങാലക്കുടയില്‍ ഉണ്ടായിരുന്നിട്ടും അവരില്‍ ഒരാളൊഴിച്ചു ആരും തന്നെ പ്രതിഷേധ ജാഥകളില്‍ പങ്കെടുത്തിരുന്നില്ല എന്നത് യാഥ്യാര്‍ത്ഥമാണുതാനും. അത് മാത്രമല്ല, കെ പി സി സി ജനറല്‍ സെക്രട്ടറി ഇന്നസെന്റിനെതിരെ ഒരു പ്രസ്താവനയും ഇറക്കിയതുമില്ല. മുതിര്‍ന്ന നേതാക്കള്‍ ജാഥയില്‍ പങ്കെടുക്കാത്തത്, ഇന്നസെന്റിനു മുന്നില്‍ തങ്ങളുടെ ‘പ്രതിച്ഛായ’ കളയാന്‍ തയാറല്ല എന്ന കാരണമാണെന്ന് മഹിളാ കോണ്‍ഗ്രസിന്റെ ജാഥയില്‍ നിന്ന് വിട്ടുനിന്ന ചിലരെ ഉദ്ദേശിച്ചു അന്ന് പാര്‍ട്ടിയില്‍ വിമര്‍ശനം ഉയര്‍ന്നിരുന്നു. മഹിളകളുടെ സംസ്ഥാന നേതാവ് വന്നിട്ട് പോലും ഇവിടുത്തെ ‘പ്രധാന മഹിള’ യുടെ അഭാവം ഏവരും ശ്രദ്ധിച്ചിരുന്നു. മുന്നണി വിട്ട ഒരു വനിതാ കൗണ്‍സിലര്‍ പോലും ഐക്യദാര്‍ഢ്യം പ്രകടിപ്പിച്ചു പങ്കെടുത്ത ജാഥയില്‍ ‘ന്യൂജന്‍ നേതാവ്’ ഒരു തിരഞ്ഞെടുപ്പിന്റെ വോട്ടുപിടുത്തത്തിലായിരുന്നു എന്ന് പോലും വിശദീകരണം. ഇന്നസെന്റിന്റെ മുഖം കേരളത്തിലെ എല്ലാ സ്ഥാപനങ്ങളുടെ പരസ്യങ്ങളില്‍ നിന്നും നീക്കണം എന്ന് സംസ്ഥാന വനിതാ നേതാവ് തുറന്നു പറഞ്ഞപ്പോള്‍ ഏവരും കൈയടിച്ചു പ്രോല്‍സാഹിപ്പിച്ചു. എന്നാല്‍ ആവേശത്തോടെ കൈയടിച്ചവരെ പിന്നീട്‌ ‘മേലാവി’ ശാസന അറിയിച്ചപ്പോളാണ് അതിനുപുറകിലെ ഗുട്ടന്‍സ് ആശ്രിതന്മാര്‍ക്ക് പിടികിട്ടിയത്. ഇപ്പോള്‍ നിവൃത്തികേടുകൊണ്ട് പേര് മാറ്റിയ ബാങ്കിന്റെ പരസ്യങ്ങളിലും ഈ ‘ആരോപിതന്റെ ‘ മുഖം ഉണ്ട്. ആവേശത്തോടെ കൈ അടിക്കുന്ന പരിപാടി ഇതോടെ ‘ജാഥ തൊഴിലാളികള്‍’ നിറുത്തിയതായി ഇവരുടെ വക്താവ് അറിയിച്ചിട്ടുണ്ട്. അതുമാത്രമല്ല ഇതുവരെ നേതാക്കള്‍ ചമഞ്ഞവര്‍ എല്ലാം നേതാക്കളല്ലെന്ന് പൊതുജനം അറിഞ്ഞതോടെ ഇവരും ചെറിയ ജാള്യത്തിലാണ്. എന്ത് തന്നെയായാലും ‘അഭിനയ തൊഴിലാളി’യുടെ ഈ പ്രസ്താവനയോടെ അദ്ദേഹത്തിന് നാട്ടിലുണ്ടായ ചെറിയ ക്ഷീണം ഇതിലൂടെ മാറികിട്ടിയെന്നു ആശ്വസിക്കാം.   SANCHARI  – A Political Travelogue

Comments

Top
Menu Title