News

ബസ്സില്‍ യാത്രക്കിടെ ബാഗ് മോഷ്ടിച്ച തമിഴ് യുവതികളെ യാത്രക്കാര്‍ പിടികൂടി

ഇരിങ്ങാലക്കുട : ബസ്സില്‍ യാത്ര ചെയ്തു കൊണ്ടിരുന്ന യുവതിയുടെ ബാഗ് മോഷ്ടിച്ച അഭിരാമി , ദിവ്യ എന്ന തമിഴ് യുവതികളെ ഇരിങ്ങാലക്കുട ട്രാഫിക് എസ് ഐ തോമസ് വടക്കന്‍ അറസ്റ്റു ചെയ്തു. കൊടുങ്ങല്ലൂര്‍ തൃശൂര്‍ റൂട്ടില്‍ ഓടുന്ന പ്രൈവറ്റ് ബസ് ഇരിങ്ങാലക്കുട ചന്തക്കന്ന് എത്തിയ നേരം ബസ്സില്‍ സഞ്ചരിക്കുകയായിരുന്ന യുവതിയുടെ ബാഗിന്റെ സിബ് തുറന്ന് പേഴ്സ് എടുക്കുന്നത് കണ്ട് മറ്റൊരു യാത്രക്കാരി ബഹളം വെച്ചതിനെ തുടര്‍ന്ന് ബസ്സ് നിര്‍ത്തിയപ്പോള്‍ ബസ്സില്‍ നിന്ന് ഇറങ്ങി ഓടിയ മോഷ്ടാക്കളെ യാത്രക്കാരിയായിരുന്ന അന്‍സിയ എന്ന യുവതി പിന്‍ തുടര്‍ന്ന് പിടിക്കുകയും യാത്രക്കാരും നാട്ടുകാരും ചേര്‍ന്ന് ചന്തക്കുന്നില്‍ ഡ്യൂട്ടിയിലുണ്ടായിരുന്ന സിവില്‍ പോലീസ് ഓഫീസര്‍ മുരളിയുടെ സഹായത്തോടെ ഇരിങ്ങാലക്കുട പോലീസ് സ്റ്റേഷനില്‍ എത്തിച്ചു. തുടര്‍ന്നുള്ള അന്വേഷണത്തില്‍ തമിഴ്നാട് തൂത്തുക്കുടി സ്വദേശികളായ അഭിരാമി, ദിവ്യ എന്നിവര്‍ 32 ഓളം മോഷണക്കേസില്‍ ഉള്‍പ്പെട്ടിട്ടുണ്ടെന്നും മാന്യമായ വേഷം ധരിച്ച് തിരക്കുള്ള ബസ്സുകളില്‍ കയറി യാത്രക്കാരുടെ പണവും സ്വര്‍ണ്ണാഭരണങ്ങളും കൈക്കലാക്കി അടുത്തയാള്‍ക്ക് കൈമാറുകയും തൊട്ടടുത്ത സ്റ്റോപ്പില്‍ ഇറങ്ങി നിമിഷങ്ങള്‍ക്കകം വേഷം മാറി സ്ഥലം വിടുകയാണ് പതിവ് ഇത്തരത്തിലുള്ള 23 ഓളം സംഘങ്ങള്‍ ഓണം പ്രമാണിച്ച് കേരളത്തില്‍ എത്തിയിട്ടുണ്ടെന്നാണ് പ്രതികളില്‍ നിന്ന് അറിയാന്‍ കഴിഞ്ഞത്. പ്രതികളെ ഇരിങ്ങാലക്കുട കോടതി 14 ദിവസത്തേക്ക് റിമാന്റ് ചെയ്തു. അന്വേഷണ സംഘത്തില്‍ എ എസ് ഐ മാരായ വിജു , പ്രതാപന്‍ സി പി ഒ മാരായ വഹാബ്, ബിന്നല്‍, അനിത, സിന്ധു എന്നിവര്‍ ഉണ്ടായിരുന്നു.

ഇന്ദിരാ ജന്മശതാബ്‌ദിയുടെ ഭാഗമായി ഓണക്കിറ്റ് വിതരണവും കുടുംബസംഗമവും നടന്നു

മുരിയാട് : ഇന്ദിരാ ജന്മശതാബ്‌ദി 2017 ഇന്റെ ഭാഗമായി കോണ്‍ഗ്രസ് മുരിയാട് മണ്ഡലം 78 , 79 ബൂത്ത് കമ്മിറ്റികളുടെ നേതൃത്വത്തില്‍ ഓണക്കിറ്റ് വിതരണവും വിവിധ മേഖലകളില്‍ കഴിവ് തെളിയിച്ചവരെ ആദരിക്കലും , കുടുംബസംഗമവും സംഘടിപ്പിച്ചു. ഡി സി സി വൈസ് പ്രസിഡന്റ് അഡ്വ. ജോസഫ് ടാജറ്റ് ഉദ്ഘാടനം നിര്‍വഹിച്ചു. ബൂത്ത് പ്രസിഡന്റ് എം കെ ഉണ്ണികൃഷ്ണന്‍ ചടങ്ങില്‍ അദ്ധ്യക്ഷത വഹിച്ചു. ബ്ലോക്ക് പ്രസിഡന്റ് ടി വി ചാര്‍ളി , മണ്ഡലം പ്രസിഡന്റ് ഐ ആര്‍ ജെയിംസ്, ജവഹര്‍ദര്‍ശനവേദി ഇരിങ്ങാലക്കുട നിയോജകമണ്ഡലം കോ ഓര്‍ഡിനേറ്റര്‍ ശ്രീജിത്ത് പട്ടത്ത് , ബൂത്ത് ഭാരവാഹികളായ ക്രിസ്റ്റിഫര്‍ മുരിയാട് , നന്ദനന്‍ മൂലക്കാട്ടില്‍ , സദാനന്ദന്‍ കൊളത്താപ്പിള്ളി , മെമ്പര്‍മാരായ മോളി ജേക്കബ് , കെ വൃന്ദകുമാരി , ജസ്റ്റിന്‍ ജോര്‍ജ് , പോഷക സംഘടന ഭാരവാഹികളായ കെ മുരളീധരന്‍ , വിപിന്‍ വെള്ളയത്ത്, അംബിക മുകുന്ദന്‍ , മോഹന്‍ദാസ് പിള്ളത്ത് എന്നിവര്‍ പങ്കെടുത്തു സംസാരിച്ചു.

സൗത്ത് ഇന്ത്യന്‍ ബാങ്കിന്റെ സമ്മാനമായി പുല്ലൂര്‍ സേക്രട്ട് ഹാര്‍ട്ട് മിഷന്‍ ഹോസ്പിറ്റലിന് ആംബുലന്‍സ്

ഇരിങ്ങാലക്കുട : സൗത്ത് ഇന്ത്യന്‍ ബാങ്ക് നടപ്പാക്കുന്ന കോര്‍പ്പറേറ്റ് സാമൂഹ്യ പ്രതിബന്ധത പ്രവര്‍ത്തനങ്ങളുടെ ഭാഗമായി പുല്ലൂര്‍ സേക്രട്ട് ഹാര്‍ട്ട് മിഷന്‍ ഹോസ്പിറ്റലിന് സൗത്ത് ഇന്ത്യന്‍ ബാങ്ക് ആംബുലന്‍സ് സമ്മാനിച്ചു. സൗത്ത് ഇന്ത്യന്‍ ബാങ്ക് സീനിയര്‍ ജനറല്‍ മാനേജര്‍ ജോണ്‍ തോമസ് , തൃശൂര്‍ അതിരൂപത ആര്‍ച്ച് ബിഷപ്പ് മാര്‍ ആന്‍ഡ്രൂസ് താഴത്തലിന്റെ സാന്നിധ്യത്തില്‍ ആംബുലന്‍സ് ആശുപത്രി അധികൃതര്‍ക്ക് കൈമാറി . പുല്ലൂര്‍ സേക്രട്ട് ഹാര്‍ട്ട് മിഷന്‍ ഹോസ്പിറ്റലിലെ മെഡിക്കല്‍ സൂപ്രണ്ട് ഡോ. സി റിത സി എസ് എസ് പദ്ധതി സദസ്സിനു പരിചയപ്പെടുത്തി . തൃശൂര്‍ അതിരൂപത ആര്‍ച്ച് ബിഷപ്പ് മാര്‍. ആന്‍ഡ്രൂസ് താഴത്ത് മുഖ്യപ്രഭാഷണം നടത്തി. ബാങ്ക് അസിസ്റ്റന്റ് മാനേജര്‍ ചാക്കോ കെ ജി , റെനില്‍ കാരത്തറ എന്നിവര്‍ സംസാരിച്ചു. ആശുപത്രി അഡ്മിനിസ്ട്രേറ്റര്‍ സി. ലിയോ തോമസ് നന്ദി പ്രഭാഷണം നടത്തി. സൗത്ത് ഇന്ത്യന്‍ ബാങ്ക് ജീവനക്കാരും ആശുപത്രി ജീവനക്കാരും നാട്ടുകാരും ചടങ്ങില്‍ പങ്കെടുത്തു.

ജനപ്രിയ മെഡിക്കല്‍സിന്റെ രണ്ടാമത്തെ ഔട്ട്‌ലെറ്റ്‌ ഇരിങ്ങാലക്കുടയില്‍ പ്രവര്‍ത്തനം ആരംഭിച്ചു

ഇരിങ്ങാലക്കുട : കേരള പ്രവാസി സംഘത്തിന്റെ നേതൃത്വത്തിലുള്ള ജനപ്രിയ മെഡിക്കല്‍സിന്റെ സംസ്ഥാനത്തെ രണ്ടാമത്തെ ഔട്ട്‌ലെറ്റ്‌ ഠാണാവില്‍ സ്‌പീക്കര്‍ പി ശ്രീരാമകൃഷ്‌ണന്‍ ഉദ്‌ഘാടനം ചെയ്‌തു. ഇംഗ്ലീഷ്‌ മരുന്നുകള്‍ 15 മുതല്‍ 50 ശതമാനം വരെ വിലകുറവില്‍ ലഭ്യമാക്കുകയെന്ന ലക്ഷ്യത്തോടെയാണ്‌ എല്ലാ നിയോജക മണ്ഡലങ്ങളിലും ജനപ്രിയ മെഡിക്കല്‍സിന്റെ ഔട്ട്‌ലെറ്റുകള്‍ തുടങ്ങുന്നത്‌.യോഗത്തില്‍ പ്രൊഫ കെ യു അരുണന്‍ എം എല്‍ എ അദ്ധ്യക്ഷത വഹിച്ചു. സിപിഐ(എം) ഏരിയ സെക്രട്ടറി ഉല്ലാസ്‌ കളക്കാട്ട്‌, ബ്ലോക്ക്‌ പഞ്ചായത്ത്‌ പ്രസിഡന്റ്‌ വിഎ മനോജ്‌കുമാര്‍,പി ഐ ഐ ഡി സി എല്‍ ചെയര്‍മാന്‍ സികെ കൃഷ്‌ണദാസ്‌, സി ഇ ഒ പ്രദീപ്‌ യു മേനോന്‍ എന്നിവര്‍ സംസാരിച്ചു. കെസി പ്രേമരാജന്‍ സ്വാഗതവും സി വി ഷിനു നന്ദിയും പറഞ്ഞു.

ഇരിങ്ങാലക്കുടയില്‍ രണ്ടുദിവസമായി പെയ്തത് 78.3 മില്ലി മീറ്റര്‍ മഴ

ഇരിങ്ങാലക്കുട : കഴിഞ്ഞ രണ്ടുദിവസമായി ഇരിങ്ങാലക്കുടയില്‍ പെയ്തത് 78.3 മില്ലി മീറ്റര്‍ മഴ. ശനിയാഴ്ച 47.5 മില്ലി മീറ്റര്‍, ഞായറാഴ്ച 30.8 മില്ലി മീറ്റര്‍ എന്ന തോതിലാണ് മഴ ലഭിച്ചത്. മുകുന്ദപുരം തഹസില്‍ദാരുടെ ഓഫീസിന്‍കീഴില്‍ അര നൂറ്റാണ്ടിലധികമായി പഴയ താലൂക്ക് ഓഫീസ് നിലനിന്നിരുന്ന ആല്‍ത്തറക്കു സമീപത്തെ കൂടല്‍മാണിക്യം ദേവസ്വം കച്ചേരി വളപ്പില്‍ പ്രവര്‍ത്തിപ്പിക്കുന്ന വര്‍ഷമാപിനി സംവിധാനം വഴിയാണ് മഴയുടെ കണക്കുകള്‍ ശേഖരിക്കുന്നത്. മഴനേരിട്ട് മഴമാപിനി സംഭരണിയില്‍ ശേഖരിക്കുകയും സംഭരണിയില്‍ സ്ഥാപിച്ചിരിക്കുന്ന അളവുപകരണം പരിശോധിച്ച് മഴയുടെ തോത് ജില്ലാഭരണകൂടത്തിന് കൈമാറുകയുമാണ് ചെയ്യുന്നത്. എന്നാല്‍ ശനിയാഴ്ചയെ അപേക്ഷിച്ചു ഞായറാഴ്ചയാണ് മഴ കൂടുതലായി അനുഭവപ്പെട്ടത് . എന്നിട്ടും മഴമാപിനി സംഭരണിയില്‍ അളവ് കുറഞ്ഞാണ് രേഖപ്പെടുത്തിയത്. കച്ചേരിവളപ്പില്‍ നിലവില്‍ വര്‍ഷമാപിനി പ്രവര്‍ത്തിപ്പിക്കുന്ന പ്രദേശത്തെ വൃക്ഷങ്ങള്‍ മഴ നേരിട്ട് മാപിനിയില്‍ പതിക്കുന്നതിന് തടസ്സം സൃഷ്ടിക്കുന്നതിനാല്‍ ശേഖരിക്കപ്പെടുന്ന മഴയുടെ അളവില്‍ കുറവുണ്ടാകാന്‍ സാധ്യതയുണ്ടെന്ന് ഡെപ്യൂട്ടി ഒബ്‌സര്‍വര്‍ അഭിപ്രായപ്പെടുന്നു. കുറഞ്ഞതോതില്‍ റിപ്പോര്‍ട്ട് ചെയ്യപ്പെടുന്ന മഴയുടെ അളവ് പലപ്പോഴും കാലവര്‍ഷ ദുരിതാശ്വാസ പ്രവര്‍ത്തനങ്ങള്‍ ആസൂത്രണം ചെയ്യുന്നതിനും ഭരണകൂടത്തിന്റെ അടിയന്തിരശ്രദ്ധ കിട്ടുന്നതിനും തടസ്സമുണ്ടാക്കുമെന്ന ആശങ്കയുണ്ട്. കൂടുതല്‍ സ്ഥല സൗകര്യമുള്ള താലൂക്ക് ആസ്ഥാനം കൂടിയായ സിവില്‍ സ്റ്റേഷനിലേക്ക് വര്‍ഷമാപിനി മാറ്റി സ്ഥാപിച്ചാല്‍ കൃത്യമായ മഴയുടെ അളവ് റിപ്പോര്‍ട്ട് ചെയ്യപ്പെടുകയും അതുവഴി താലൂക്കിലെ പ്രകൃതിക്ഷോഭ ദുരിതാശ്വാസ പ്രവര്‍ത്തനങ്ങള്‍ക്ക് മികച്ച ആസൂത്രണവും വേഗതയും കൈവരുത്താം. ഇതിനുള്ള പ്രവര്‍ത്തനങ്ങള്‍ നടന്നുവരുന്നുണ്ടെന്നും, മഴമാപിനി സ്ഥാപിക്കുന്നതിനുള്ള സ്ഥലവും കാര്യങ്ങളുമേര്‍പ്പെടുത്തി വിവരങ്ങള്‍ ജില്ലാകളക്ടര്‍ക്ക് റിപ്പോര്‍ട്ട് നല്‍കിയിട്ടുണ്ടെന്നും അറിയുന്നു.

related news : മഴയുടെ അളവറിയിച്ചു ഇരിങ്ങാലക്കുടയുടെ സ്വന്തം മഴമാപിനി

ആളൂരിലെ കൊലപാതക ശ്രമം : കുപ്രസിദ്ധ ഗുണ്ട വാവ ഷഫീഖും കൂട്ടാളികളും പിടിയില്‍

കല്ലേറ്റുംകര : സാതന്ത്ര്യ ദിനത്തിന് വൈകിട്ട് ആളൂരില്‍ യുവാവിനെ തലയ്ക്കടിച്ച് കൊലപ്പെടുത്താന്‍ ശ്രമിച്ച കേസ്സില്‍ ഒളിവില്‍ പോയ കുപ്രസിദ്ധ ഗുണ്ട ആളൂര്‍ തിരുന്നല്‍വേലിക്കാരന്‍ ഷാഹുല്‍ ഹമീദ് മകന്‍ വാവ എന്നു വിളിക്കുന്ന ഷഫീഖ് (33) കല്ലേറ്റുംകര സ്വദേശികളായ ശ്രീകൃഷ്ണ വിഹാറില്‍ ശശിയുടെ മകന്‍ രാജേഷ് (22), പാളയംകോട്ട്കാരന്‍ ഇസ്മയില്‍ മകന്‍ മുഹമ്മദ് അഫ്സല്‍ (22), കാഞ്ഞിരപറമ്പില്‍ ബാബു മകന്‍ അന്‍സല്‍ (22) പുത്തനങ്ങാടി ബൈജു മകന്‍ സ്റ്റെഫില്‍(18),തിരുത്തിപ്പറമ്പ് വെളുത്തായി പേങ്ങള്‍ മകന്‍ ജയന്‍ (36) എന്നിവരാണ് പിടിയിലായത്.പൊരുന്നംകുന്ന് നെല്ലിപറമ്പില്‍ സുകുമാരന്‍ മകന്‍ സെബി (32 വയസ്സ്) യാണ് ആക്രമിക്കപ്പെട്ടത്.അറസ്റ്റിലായ ഷഫീഖിന്റെ സഹോദരന്‍ കൊല്ലപ്പെട്ട കേസ്സിലെ പ്രതിയാണ് ഇയാള്‍. സംഭവ ശേഷം പലയിടങ്ങളിലായി ഒളിവില്‍ കഴിഞ്ഞുവരികയായിരുന്നു പ്രതികള്‍. ഇരിങ്ങാലക്കുട ഡി വൈ എസ് പി ഫേമസ് വര്‍ഗ്ഗീസ്, സി ഐ എം.കെ.സുരേഷ് കുമാര്‍ എന്നിവരുടെ നേതൃത്വത്തില്‍ പോലീസ് സംഘം ഇവരെ പിന്‍തുടര്‍ന്നിരുന്നു. ഇവരില്‍ അന്തര്‍ സംസ്ഥാന കുറ്റവാളിയായ വാവ ഷഫീഖ് കൊലപാതകം, കൊലപാതകശ്രമം, കവര്‍ച്ച, ആയുധം കൈവശം വയ്ക്കല്‍ എന്നിവയടക്കം മുപ്പതോളം കേസ്സിലെ പ്രതിയാണ്. ചാലക്കുടി,കൊടകര, വെറ്റിലപ്പാറ, കൊടുങ്ങല്ലൂര്‍, ഇരിങ്ങാലക്കുട, പുതുക്കാട്,നിലമ്പൂര്‍ ,കോയമ്പത്തൂര്‍ എന്നിവിടങ്ങളില്‍ നിരവധി കേസ്സുകളുണ്ട്.

ഗുണ്ടാ തലവന്‍ വാവ വിദ്യാര്‍ത്ഥികള്‍ക്കും, ചെറുപ്പക്കാര്‍ക്കും മദ്യവും, മയക്കുമരുന്നും ആദ്യം സൗജന്യമായി നല്‍കി സംഘാങ്ങളാക്കുകയും പിന്നീട് ഇവരെ ഉപയോഗിച്ച് വില്പന നടത്തുകയുമാണ് ഇയാളുടെ രീതി വാവ ഷഫീഖിന്റെ കീഴില്‍ വന്‍ കഞ്ചാവ് ലോബി വളരെ നാളുകളായി ആളൂര്‍ കേന്ദ്രമാക്കി പ്രവര്‍ത്തിക്കുന്നുണ്ടായിരുന്നു. സ്ഥിരമായി മദ്യവും മയക്കുമരുന്നും ഉപയോഗിക്കുന്ന ഇവര്‍ ആളൂരില്‍ വൈകുന്നേരങ്ങളില്‍ തമ്പടിച്ച് നാട്ടുകാര്‍ക്ക് ഭീഷണിയായി നടക്കുന്നവരാണ്. എന്നാല്‍ ഇവര്‍ക്കെതിരെ പരാതിപ്പെടാന്‍ ആരും ധൈര്യപ്പെട്ടിരുന്നില്ലെന്ന് പോലീസ് പറഞ്ഞു. തെളിവെടുപ്പിനിടയില്‍ പ്രതികള്‍ക്കു നേരേ അവരുടെ വീട്ടുകാര്‍ തന്നെ ശാപവാക്കുകള്‍ പറയുന്നുണ്ടായിരുന്നു എന്നും പോലീസ് പറഞ്ഞു.

സംഘാംഗങ്ങള്‍ക്ക് ഉടന്‍ തന്നെ റിവാര്‍ഡ്

ആളൂരില്‍ ആക്രമണം നടത്തിയ ഗുണ്ടാസംഘത്തെ പിടികൂടിയ പോലീസ് സേനാംഗങ്ങളെ അന്നു തന്നെ തൃശൂര്‍ റൂറല്‍ എസ്.പി.യതീഷ് ചന്ദ്ര പാരിതോഷികം പ്രഖ്യാപിച്ച രീതി പോലീസ് സേനക്ക് തന്നെ ഉണര്‍വ് നല്‍കുന്നതാണെന്ന് ഡി വൈ എസ് പി അറിയിച്ചു. ഗുണ്ടകള്‍, മയക്കു ലോബി എന്നിവയ്ക്കെതിരെ ശക്തമായ നടപടിക്ക് എസ്.പി.യില്‍ നിന്നും നിര്‍ദ്ദേശം ലഭിച്ചതായും അദ്ദേഹം പറഞ്ഞു.ഈ സംഭവം രാഷ്ട്രീയവല്‍ക്കരിക്കാതിരിക്കാനും കൂടുതല്‍ അക്രമത്തിലേക്കും, ആള്‍നാശത്തിലേക്കും എത്തിപ്പെടാതിരിക്കാനും പോലീസ് കാണിച്ച ജാഗ്രതയും, കരുതലും പ്രശംസനീയമായിരുന്നു.

വെള്ളക്കെട്ട് രൂക്ഷം

ഇരിങ്ങാലക്കുട : മഴ കനത്തപ്പോള്‍ ബസ്സ്റ്റാന്‍ഡിന് വടക്ക്ഭാഗത്തുള്ള കാട്ടൂര്‍ റോഡില്‍ നിന്നും സിവില്‍ സ്റ്റേഷന്‍, ക്രൈസ്റ്റ് കോളേജ് എന്നിവിടങ്ങളിലേക്കു പോകുന്ന പുറ്റുങ്കല്‍ റോഡിലെ വെള്ളക്കെട്ടുമൂലം സമീപവാസികളും യാത്രക്കാരും വളരെയധികം ബുദ്ധിമുട്ടുകയാണ്. വെള്ളക്കെട്ട് ഒഴിവാക്കാന്‍ അടുത്തിടെ ഇവിടെ നഗരസഭാ ലക്ഷങ്ങള്‍ ചിലവഴിച്ചു നിര്‍മാണ പ്രവര്‍ത്തികള്‍ ചെയ്തിരുന്നു. എന്നാല്‍ വേണ്ടത്ര പഠനം നടത്താതെയാണ് ഇവ നിര്‍മിച്ചെതെന്നു ഇപ്പോളും ഒഴിവാവാത്ത വെള്ളക്കെട്ട് തെളിയിക്കുന്നതിന് നാട്ടുകാര്‍ പരാതിപ്പെടുന്നു.

‘ഇടിമുറി’ – നാടകകൃതി പ്രകാശനം ചെയ്തു

ഇരിങ്ങാലക്കുട : രാജേഷ് തെക്കിനിയേടത്ത് രചിച്ച ‘ഇടിമുറി’ – നാടകകൃതി പ്രൊഫ. കെ.യു. അരുണന്‍ എം.എല്‍.എ സംഗീത സംവിധായകന്‍ പ്രതാപ് സിംഗിനു് ആദ്യപ്രതി നല്കി പ്രകാശനം ചെയ്തു. ലൈബ്രറി കൗണ്‍സില്‍ ഹാളില്‍ നടന്ന ചടങ്ങില്‍ ഖാദര്‍ പട്ടേപ്പാടം അദ്ധ്യക്ഷത വഹിച്ചു. പ്രൊഫ. സാവിത്രി ലക്ഷ്മണന്‍ മുഖ്യ പ്രഭാഷണം നടത്തി. രാധാകൃഷ്ണന്‍ വെട്ടത്ത് പുസ്തകം പരിചയപ്പെടുത്തി. എം.ആര്‍. സനോജ് സ്വാഗതവും പി.എ. സുരന്‍ നന്ദിയും പറഞ്ഞു. തുടര്‍ന്ന് നടന്ന കവിസമ്മേളനം ഇ.ഡി. മനോജ് ഉദ്ഘാടനം ചെയ്തു. ഷീബ ജയചന്ദ്രന്‍, പ്രൊഫ. വി.കെ. ലക്ഷ്മണന്‍ നായര്‍, പി.എൻ. സുരന്‍, അരുണ്‍ ഗാന്ധിഗ്രാം എന്നിവര്‍ കവിതകളവതരിപ്പിച്ചു.

രംഗാവതരണവുമായി ശ്രീലക്ഷ്മി ഗോവര്‍ദ്ധനന്‍ കൊളംബിയയില്‍

ഇരിങ്ങാലക്കുട : ഇന്ത്യന്‍ സ്വാതന്ത്ര്യത്തിന് എഴുപത് ആണ്ട് പിന്നിട്ടതിന്റെ ഭാഗമായി നടക്കുന്ന കലാസാംസ്‌കാരിക പരിപാടികളില്‍ പങ്കെടുക്കുന്നതിനായി ഇരിങ്ങാലക്കുട സ്വദേശിയായ പ്രശസ്ത നര്‍ത്തകി ശ്രീലക്ഷ്മി ഗോവര്‍ദ്ധനന്‍ കൊളംബിയയില്‍ ഒരു ആഴ്ചക്കാലമായി പര്യടനം നടത്തുന്നു. ഇന്ത്യന്‍ സാംസ്‌കാരിക മന്ത്രാലയത്തിന്റെ കീഴില്‍ കൊളംമ്പിയായിലെ ഇന്ത്യന്‍ എംബസിയുടെ നേതൃത്ത്വം വഹിക്കുന്ന ഈ സാംസ്‌കാരിക പരിപാടിയുടെ മുഖ്യസംയോജകര്‍ ഡല്‍ഹി ആസ്ഥാനമായി പ്രവര്‍ത്തിക്കുന്ന റേയ്‌സ് ഓഫ് വിസ്‌ഡം ആണ്. ഇന്ത്യന്‍ ശാസ്ത്രീയ കലകളായ ഭരതനാട്യം, കുച്ചിപ്പുടി, മണിപ്പൂരി, കഥകളി, കഥക്ക്, ഒഡീസി എന്നി കലാരൂപങ്ങള്‍ ഇന്ത്യയിലെ തന്നെ അറിയപ്പെടുന്ന കലാകാരന്‍മാര്‍ ആണ് അവതരിപ്പിക്കുന്നത്. പ്രശസ്ത ഒഡീസി നര്‍ത്തകി റീലാ ഹോത്തയുടെ നേതൃത്വത്തില്‍ എട്ടോളം ആര്‍ട്ടിസ്റ്റുകള്‍ ആണ് പര്യടനത്തില്‍ പങ്കെടുക്കുന്നത്. ഭരതനാട്യത്തില്‍ ശരണ്യ ചന്ദ്രന്‍, ഒഡീസിയില്‍ സുദര്‍ശന്‍ സാഹു, കഥകില്‍ സ്വാതി സിന്‍ഹ, കഥകളിയില്‍ രാജേഷ് രാമന്‍കുട്ടി, മണിപ്പൂരിയില്‍ നര്‍മദ, പ്രദീപ്സിംഗ് എന്നിവരാണ് അവതരിപ്പിക്കുന്നത് ഈ കലാകാരമാരുടെ കൂടെയാണ് ശ്രീലക്ഷ്മി ഗോവര്‍ദ്ധനന് കൂച്ചുപ്പൂടിയില്‍ പരിപാടി അവതരിപ്പിക്കാന്‍ അവസരം കിട്ടിയത്.

ആഗസ്ത് 14 ,15 തീയ്യതികളില്‍ കൊളംബിയയിലെ ബഗോട്ടയില്‍ വര്‍ക്ക്ഷോപ്പും തുടര്‍ന്ന് രംഗാവതരണവും നടന്നു. 16 ,17 തീയ്യതികളില്‍ മെഡലിനില്‍ രംഗാവതരണവും വര്‍ക്ക്ഷോപ്പും തുടര്‍ന്ന് 19ന് കാലിയില്‍ രംഗാവതരണവും നടന്നു. ഇന്ത്യയിലെ തന്നെ പ്രശസ്ത വേദികളില്‍ രംഗാവതരണം നടത്തിയിട്ടുള്ള ശ്രീലക്ഷ്മി ഗോവര്‍ദ്ധനന്‍ പല അന്താരാഷ്ട്ര വേദികളിലും ഇതിനകം പരിപാടികള്‍ അവതരിപ്പിച്ചിട്ടുണ്ട്. 2015ല്‍ നടന്ന ‘നമോ ഇന്‍ ദുബായ്’ എന്ന പരിപാടിയുടെ ഭാഗമായ നൃത്ത പരിപാടിയുടെ രംഗാവിഷ്കാരം സംവിധാനം ചെയ്ത് ഒരുക്കിയത് ശ്രീലക്ഷ്മി ഗോവര്‍ദ്ധനന്‍ ആണ്. കേരളത്തില്‍ നിന്ന് അന്താരാഷ്ട്രതലത്തില്‍ പോലും അറിയപ്പെടുന്ന ഈ കലാകാരിയ്ക്ക് 2016ല്‍ ചെന്നെയില്‍ നടന്ന 35- ാമത് നാട്യകലയുടെ കോണ്‍ഫെറന്‍സിലും അതുപോലെ പല അംഗീകാരങ്ങളും അവാര്‍ഡുകളും ഇതിനകം തന്നെ തേടിയെത്തിയിട്ടുണ്ട്.

ഇന്ത്യന്‍ ഓവര്‍സീസ് ബാങ്ക് കൊളംബോ കാസിലേക്ക് മാറുന്നു

ഇരിങ്ങാലക്കുട : ഇന്ത്യന്‍ ഓവര്‍സീസ് ബാങ്ക് ഇരിങ്ങാലക്കുട ശാഖാ ആഗസ്ത് 21 തിങ്കളാഴ്ച രാവിലെ 10 മണിക്ക് ബസ് സ്റ്റാന്‍ഡിനു സമീപം കൊളംബോ കാസിലിന്റെ ഒന്നാം നിലയിലേക്ക് പ്രവര്‍ത്തനം ആരംഭിച്ചിരിക്കുന്നു . ഇന്ത്യന്‍ ഓവര്‍സീസ് ബാങ്ക് ചീഫ് റീജിയണല്‍ മാനേജര്‍ ബി എ ആര്‍ പത്രൊ നിര്‍വഹിക്കും .

ഇരിങ്ങാലക്കുട ഭാരതീയ വിദ്യാഭവന്‍ രജതജൂബിലിയുടെ നിറവില്‍

ഇരിങ്ങാലക്കുട : ഭാരതീയ വിദ്യാഭവന്റെ ഇരുപത്തിയഞ്ചാം വാര്‍ഷികാഘോഷങ്ങള്‍ക്ക് വര്‍ണാഭമായ തുടക്കം. പ്രസിദ്ധ സംസ്‌കൃത പണ്ഡിതനും കേരള കലാമണ്ഡലം മുന്‍ വൈസ് ചാന്‍സലറുമായ ഡോ. കെ ജി പൗലോസ് ആഘോഷ പരിപാടികള്‍ ഉദ്‌ഘാടനം ചെയ്തു. വിദ്യാലയത്തിന് ക്വാളിറ്റി ആസ്റ്റ്രിയയുടെ ഐ എസ് ഒ (ഇന്റര്‍നാഷണല്‍ ഓര്‍ഗനൈസേഷന്‍ ഓഫ് സ്റ്റാന്‍ഡേര്‍ഡൈസേഷന്‍) സര്‍ട്ടിഫിക്കറ്റ് ലഭിച്ചതും രജതജൂബിലി ആഘോഷങ്ങള്‍ക്ക് മാറ്റുകൂട്ടി. ഐ എസ് ഒ സര്‍ട്ടിഫിക്കറ്റ് ഡോ. കെ ജി പൗലോസ് സ്കൂള്‍ പ്രിന്‍സിപ്പല്‍ പി പ്രസന്നകുമാരിയ്ക്ക് കൈമാറി. ലിംഗ വിവേചനവും ഭ്രൂണഹത്യകളുമില്ലാത്ത കാലം പുലരണമെങ്കില്‍ കുഞ്ഞുനാളില്‍ തന്നെ ജീവിതത്തില്‍ മൂല്യബോധം വളരണമെന്ന് കെ ജി പൗലോസ് പറഞ്ഞു. ജഗദ്ഗുരു ശങ്കരാചാര്യരുടെ ജീവിതം കുട്ടികള്‍ മാതൃകയാക്കണമെന്നും അദ്ദേഹം ഉദ്‌ബോധിപ്പിച്ചു. ചെയര്‍മാന്‍ ഡോ പോള്‍ ശങ്കൂരിക്കല്‍ ചടങ്ങില്‍ അധ്യക്ഷത വഹിച്ചു. വൈസ് ചെയര്‍മാന്‍ സി സുരേന്ദ്രന്‍ ഐ എസ് ഒ സര്‍ട്ടിഫിക്കേഷനെപ്പറ്റി വിശദീകരിച്ചു. വേളൂക്കര ഗ്രാമപഞ്ചായത്ത് പ്രസിഡണ്ട് ഇന്ദിര തിലകന്‍, സ്‌കൂള്‍ സെക്രട്ടറി എ എസ് മാധവ മേനോന്‍, പി ടി എ സെക്രട്ടറി സി വി ആന്റണി, സ്മിത സജീവ് എന്നിവര്‍ പങ്കെടുത്തു. തുടര്‍ന്ന് വിദ്യാര്‍ഥികള്‍ അവതരിപ്പിച്ച വിവിധ കലാപരിപാടികളും അരങ്ങേറി.

ഇരിങ്ങാലക്കുടയില്‍ കനത്ത മഴ: മെയിന്‍ റോഡില്‍ മരം വീണു ഗതാഗതം തടസപ്പെട്ടു

ഇരിങ്ങാലക്കുട : ഞായറാഴ്ച രാവിലെ മുതല്‍ ഇരിങ്ങാലക്കുടയിലും പരിസര പ്രദേശങ്ങളിലും കനത്ത മഴയും കാറ്റും അനുഭവപെട്ടു. 11 മണിയോടെ വീശിയടിച്ച കാറ്റില്‍ ബസ് സ്റ്റാന്‍ഡിനു സമീപം മെയിന്‍ റോഡില്‍ കൂടല്‍മാണിക്യം കച്ചേരിവളപ്പിലെ മരം റോഡില്‍ വീണു ഗതാഗതം തടസപ്പെട്ടു. ഉടന്‍ തന്നെ ഇരിങ്ങാലക്കുട ഫയര്‍ ഫോഴ്സ് സ്ഥലത്തെത്തി മരം വെട്ടിമാറ്റി ഗതാഗതം പുനഃസ്ഥാപിച്ചു .

സര്‍ക്കാരിന്റെ ജനവിരുദ്ധ നയങ്ങള്‍ക്കെതിരേ യു.ഡി.എഫ്. ധര്‍ണ

ഇരിങ്ങാലക്കുട : എല്‍.ഡി.എഫ്. സര്‍ക്കാരിന്റെ ജനവിരുദ്ധനയങ്ങള്‍ക്കെതിരേ യു.ഡി.എഫ്. സായാഹ്ന ധര്‍ണ നടത്തി. യു.ഡി.എഫ്. ചെയര്‍മാന്‍ ജോസഫ് ചാലിശ്ശേരി ഉദ്ഘാടനം ചെയ്തു. കോണ്‍ഗ്രസ് ബ്ലോക്ക് പ്രസിഡന്റ് ടി.വി. ചാര്‍ളി അധ്യക്ഷനായി. ഡി.സി.സി. ജനറല്‍ സെക്രട്ടറിമാരായ ആന്റോ പെരുമ്പിള്ളി, കെ.കെ. ശോഭനന്‍, സോണിയാഗിരി, നഗരസഭ ചെയര്‍പേഴ്‌സന്‍ നിമ്യാ ഷിജു, ഘടകകക്ഷി നേതാക്കളായ കെ.കെ. ബാബു, കെ.എ. റിയാസുദ്ദിന്‍, എ.പി. ആന്റണി, പി.ബി. മനോജ്, മാര്‍ട്ടിന്‍ പോള്‍, ജോസഫ് ചാക്കോ, വി.സി. വര്‍ഗീസ്, എം.ആര്‍. ഷാജു എന്നിവര്‍ സംസാരിച്ചു.

നിയോജകമണ്ഡലത്തിലെ വികസന പ്രവര്‍ത്തനങ്ങള്‍ക്ക് വേണ്ടി എം എല്‍ എയുടെ ആസ്തി വികസന ഫണ്ടില്‍ നിന്നും 81. 92 ലക്ഷം രൂപ

ഇരിങ്ങാലക്കുട : നിയോജകമണ്ഡലത്തിലെ വികസന പ്രവര്‍ത്തനങ്ങള്‍ക്ക് വേണ്ടി ആസ്തി വികസന ഫണ്ടില്‍ നിന്നും 81. 92 ലക്ഷം രൂപ അനുവദിച്ചതായി പ്രൊഫ കെ യു അരുണന്‍ എം എല്‍ എ അറിയിച്ചു. കാറളം ഗ്രാമപഞ്ചായത്തിലെ പുല്ലത്തറ പി എച്ച് സി കെട്ടിടം നിര്‍മ്മിക്കുന്നതിന് വേണ്ടി 42 .32 ലക്ഷം രൂപയും പൂമംഗലം ഗ്രാമപഞ്ചായത്തിലെ എടക്കുളത്ത് വുമണ്‍സ് ഇന്‍ഡസ്ട്രിയല്‍ പാര്‍ക്ക് നിര്‍മ്മാണത്തിന് വേണ്ടി 24 ലക്ഷം രൂപയും , ഇരിങ്ങാലക്കുട മുന്‍സിപ്പാലിറ്റിയില്‍ 40- ാം വാര്‍ഡില്‍ തേലപ്പിള്ളി അംഗനവാടി കെട്ടിടവും , ജനസേവന കേന്ദ്രവും നിര്‍മ്മിക്കുന്നതിന് വേണ്ടി 15 .60 ലക്ഷം രൂപയും ആണ് അനുവദിച്ച് ഭരണാനുമതി കിട്ടിയിട്ടുള്ളത് എന്ന് എം എല്‍ എ അറിയിച്ചു.

എ ഐ വൈ എഫ് സഖാക്കളുടെ ജൈവ കപ്പ കൃഷി വിളവെടുപ്പ് നടന്നു

പടിയൂര്‍ : എ ഐ വൈ എഫ് പടിയൂര്‍ പഞ്ചായത്ത് കമ്മറ്റിയുടെ നേതൃത്വത്തില്‍ രണ്ടേക്കര്‍ സ്ഥലത്ത് നടത്തിയ ജൈവ കപ്പ കൃഷിയുടെ വിളവെടുപ്പ് നടന്നു. സി പി ഐ ഇരിങ്ങാലക്കുട മണ്ഡലം സെക്രട്ടറി പി. മണി ഉദ്ഘാടനം ചെയ്തു. പടിയൂര്‍ ഗ്രാമപഞ്ചായത്ത് പ്രസിഡണ്ട് കെ.സി.ബിജു, സി പി ഐ പടിയൂര്‍ ലോക്കല്‍ സെക്രട്ടറി കെ.എസ് രാധാകൃഷ്ണന്‍ , എ ഐ വൈ എഫ് മണ്ഡലം ഭാരവാഹികളായ വി.ആര്‍ രമേഷ് , എ.എസ് ബിനോയ്, എന്നിവര്‍ സന്നിഹിതരായിരുന്നു. വിളവെടുപ്പു പ്രവര്‍ത്തനങ്ങള്‍ക്ക് കെ.പി കണ്ണന്‍, ടി.വി വിബിന്‍ എന്നിവര്‍ നേതൃത്വം നല്‍കി. കഴിഞ്ഞ വര്‍ഷവും ഇതു പോലെ കരനെല്‍കൃഷിയും,ജെെവ പച്ചക്കറി കൃഷിയും ചെയ്തു എ ഐ വൈ എഫ് പ്രവര്‍ത്തകര്‍ നാട്ടിന് മാതൃകയായി.

Top
Close
Menu Title