News

സൈബര്‍ ക്രൈം, ലഹരി വര്‍ജ്ജനം, സ്ത്രീ സുരക്ഷ എന്നീ വിഷയങ്ങളില്‍ സെന്റ് ജോസഫ് കോളേജില്‍ സെമിനാര്‍ സംഘടിപ്പിച്ചു

ഇരിങ്ങാലക്കുട : കേരള സംസ്ഥാന യുവജന കമ്മീഷന്‍ സൈബര്‍ ക്രൈം, ലഹരി വര്‍ജ്ജനം, സ്ത്രീ സുരക്ഷ എന്നീ വിഷയങ്ങളില്‍ സെന്റ് ജോസഫ് കോളേജില്‍ ക്ലാസ്സ് സംഘടിപ്പിച്ചു. അഡീഷ്ണല്‍ സബ്ബ് ഇന്‍സ്പെക്റ്റര്‍ ഓഫ് പോലീസ് പി ആര്‍ ഉഷ വിഷയം അവതരിപ്പിച്ച് ക്ലാസെടുത്തു. യുവജന കമ്മീഷന്‍ ഡിഫന്‍സ് ഫോര്‍സ് അംഗം ആര്‍ എല്‍ ശ്രീലാല്‍, വനിതാ പോലീസ് ഓഫീസര്‍മാരായ സ്വപ്ന, മിനി എന്നിവര്‍ പങ്കെടുത്തു.

ഡി വൈ എഫ് ഐ യുടെ നേതൃത്വത്തിലുള്ള ചികിത്സാ സഹായ നിധിയിലേക്ക് മരിയ ബസിന്റെ ഒരു ദിവസത്തെ കളക്ഷനും

ഇരിങ്ങാലക്കുട : പള്ളിക്കാട് പ്രദേശത്ത് താമസിക്കുന്ന ചെമ്പലക്കാടന്‍ ബാബു മകന്‍ അഖില്‍ വിദേശത്ത് ജോലി ചെയ്യവെ കെട്ടിടത്തിന്റെ ഭീം തകര്‍ന്ന് വീണ് നട്ടെല്ല് തകര്‍ന്ന് കിടപ്പിലാണ്. “ഞങ്ങളെപോലെ അഖിലിനും നടക്കാന്‍ കഴിയണം” എന്ന സന്ദേശവുമായി ഡി വൈ എഫ് ഐ നടത്തിയ ഫണ്ട് ശേഖരണത്തിന് പിന്‍തുണ പ്രഖ്യാപിച്ച് മരിയ ബസ് ഓണര്‍ ചേനത്തുപറമ്പില്‍ ലോറന്‍സ് ബസിന്റെ ഒരു ദിവസത്തെ കളക്ഷന്‍ മുഴുവന്‍ ഇന്ധനചിലവ് പോലും എടുക്കാതെ നല്‍കി. ബസ് ജീവനക്കാരുടെ ഒരു ദിവസത്തെ വേതനവും ചികിത്സാ നിധിയിലേക്ക് നല്‍കി. ചികിത്സാ സഹായത്തിന് വേണ്ടിയുള്ള മരിയ ബസിന്റെ യാത്ര ഡി വൈ എഫ് ഐ ജില്ലാ പ്രസിഡണ്ട് കെ വി രാജേഷ് ഉദ്ഘാടനം ചെയ്തു. ജില്ലാ സെക്രട്ടേറിയറ്റ് അംഗം ആര്‍ എല്‍ ശ്രീലാല്‍, ബസ് ഉടമ ചേനത്തുപറമ്പില്‍ ലോറന്‍സ്, മേഖലാ സെക്രട്ടറി കെ എന്‍ ഷാഹിര്‍, മേഖലാ കമ്മറ്റി അംഗങ്ങയെ കെ ബി സജീഷ്, അനൂപ് സുലൈമാന്‍ എന്നിവര്‍ പങ്കെടുത്തു

പ്രധാനമന്ത്രി ഗരീബ് കല്യാണ്‍ യോജന – നിക്ഷേപങ്ങളും നികുതി ഘടനയും : സെമിനാര്‍ നടത്തി

ഇരിങ്ങാലക്കുട : ചേംബര്‍ ഓഫ് കോമേഴ്‌സ് ഇരിങ്ങാലക്കുടയും കേരളം വ്യാപാര വ്യവസായി ഏകോപന സമിതിയും സംയുക്തമായി പ്രധാനമന്ത്രി ഗരീബ് കല്യാണ്‍ യോജന – നിക്ഷേപങ്ങളും നികുതിയെയും സംബന്ധിച്ച് സെമിനാര്‍ സംഘടിപ്പിച്ചു. ഇന്‍കംടാക്സ് തൃശൂര്‍ റേഞ്ച് ജോയിന്റ് കമ്മീഷ്ണര്‍ ജി ചന്ദ്ര ബാബു ഐ ആര്‍ എസ് ഉദ്‌ഘാടനം ചെയ്തു. ഇരിങ്ങാലക്കുട ടൗണ്‍ കോ-ഓപ്പറേറ്റീവ് ബാങ്ക് കോണ്‍ഫറന്‍സ് ഹാളില്‍ നടന്ന ചടങ്ങില്‍ പ്രധാനമന്ത്രി ഗരീബ് കല്യാണ്‍ യോജനയെ കുറിച്ച് ഇന്‍കംടാക്സ് അസിസ്റ്റന്റ് കമ്മീഷ്ണര്‍ ടി വേണുഗോപാല്‍, ഗോപാല്‍ നായ്ക്ക്, ഇന്‍കംടാക്സ് ഓഫീസര്‍ വി ജി ശിവദാസന്‍ എന്നിവര്‍ സംസാരിച്ചു. വ്യാപാരി വ്യവസായി ഏകോപന സമിതി പ്രസിഡന്റ് ടെന്നീസണ്‍ തെക്കേക്കര സ്വാഗതവും ചേംബര്‍ ഓഫ് കോമേഴ്‌സ് പ്രതിനിധി ടി ഐ ജോസഫ് നന്ദിയും പറഞ്ഞു.

ക്രൈസ്റ്റ് കോളേജില്‍ നിന്നും വിരമിക്കുന്ന അദ്ധ്യാപക അനദ്ധ്യാപ ജീവനക്കാര്‍ക്കും യാത്രയയപ്പ് നല്‍കുന്നു

ഇരിങ്ങാലക്കുട : ക്രൈസ്റ്റ് കോളേജില്‍ നിന്നും ഈ വര്‍ഷം വിരമിക്കുന്ന അദ്ധ്യാപക അനദ്ധ്യാപ ജീവനക്കാര്‍ക്ക് ക്രൈസ്റ്റ്‌കോളേജ് നല്‍കുന്ന ഔദ്യോഗിക യാത്രയയപ്പില്‍ കാലിക്കറ്റ് സര്‍വ്വകലാശാല വൈസ്ചാന്‍സിലര്‍ ഡോ കെ മുഹമ്മദ് ബഷീര്‍ മുഖ്യാതിഥിയായിരിക്കും. ഫെബ്രുവരി 22 ബുധനാഴ്ച 10.30 ന് ഓഡിറ്റോറിയത്തില്‍ ചേരുന്ന യോഗത്തില്‍ സി എം ഐ സഭാ ജനറല്‍ കൗസിലര്‍ റവ ഫാ സെബാസ്റ്റ്യന്‍ തെക്കേടത്ത്, മാനേജര്‍ ഫാ ജോണ്‍ തോട്ടാപ്പിള്ളി സി എം ഐ, കണ്‍വീനര്‍ ഡോ സി ഒ ജോഷി, ഡോ എ വി ജോര്‍ജ്ജ്, എ ആര്‍ ഡേവീസ്, ഷാജു വര്‍ഗ്ഗീസ്, പ്രൊഫ വി പി ആന്റോ, യൂണിയന്‍ ചെയര്‍മാന്‍ വിഷ്ണു എം എസ്, എന്നിവര്‍ സംസാരിക്കും. ഡോ ആര്‍ വി രാജന്‍ (ജിയോളജി), ഡോ എസ്ശ്രീ കുമാര്‍ (ജിയോളജി), ഡോ പി എല്‍ ജോര്‍ജ്ജ് (കോമേഴ്‌സ്), ഡോ ബാലു ടി കുഴിവേലില്‍ (സുവോളജി), എന്നീ അദ്ധ്യാപകരും ഓഫീസ് സൂപ്രണ്ട് വി ഡി വര്‍ഗ്ഗീസ്, യു എ ആന്റോ, ഒ കെ തോമസ് എന്നീ അനദ്ധ്യാപകരുമാണ് ഇക്കൊല്ലം വിരമിക്കുത്.

ഭാരതീയ സംസ്കാരത്തിന് കേരളത്തില്‍ അപചയം : റാവല്‍ജി

ഇരിങ്ങാലക്കുട : ലോകം ആദരവോടെ കാണുന്ന ഭാരതീയ സംസ്കാരത്തിന് കേരളത്തില്‍ ഇന്ന് അപചയം സംഭവിച്ചതായി ബദരീനാഥ് റാവല്‍ജി ബ്രഹ്മശ്രീ ഈശ്വര്‍ പ്രസാദ് നമ്പൂതിരി അഭിപ്രായപ്പെട്ടു. നൂറ്റൊന്നംഗസഭയുടെ ആഭിമുഖ്യത്തില്‍ ഇരിങ്ങാലക്കുട പൗരാവലി നല്‍കിയ സ്വീകരണത്തിന് മറുപടി പറയുകയായിരുന്നു അദ്ദേഹം. എട്ടാം നൂറ്റാണ്ടില്‍ ഭാരതീയ സംസ്കാരത്തിന്റെ പ്രഭവസ്ഥാനം കേരളമായിരുന്നെന്നും ശ്രീശങ്കരന്റെ നേതൃത്വത്തില്‍ അത് ഭാരതമാകെ പ്രചരിച്ചിരുന്ന ഒരു കാലഘട്ടമുണ്ടായിരുന്നെന്നും റാവല്‍ജി ഓര്‍മ്മിപ്പിച്ചു. ബദരീപ്രണാമം പരിപാടിയില്‍ റാവല്‍ജിക്ക് താലമേന്തിയ നൂറ്റൊന്ന് വനിതകളും മംഗളവാദ്യവുമായി പൂര്‍ണ്ണകുംഭം നല്‍കി സ്വീകരിച്ചു. സഭാചെയര്‍മാന്‍ ഡോ ഇ പി ജനാര്‍ദ്ദനന്റെ അധ്യക്ഷതയില്‍ ചേര്‍ന്ന യോഗത്തില്‍ നഗരസഭാദ്ധ്യക്ഷ നിമ്മ്യ ഷിജു പൗരാവലിക്ക് വേണ്ടി റാവല്‍ജിക്ക് ഉപഹാരം സമര്‍പ്പിച്ചു. റാവല്‍ജി പുതിയ സഭാംഗങ്ങളുടെ തിരിച്ചറിയല്‍ രേഖ വിതരണം ചെയ്തു. സണ്‍ ഗ്രൂപ്പ് ഇന്റര്‍നാഷനലിന്റെ ചെയര്‍മാന്‍ പത്മശ്രീ ഡോ ടി എ സുന്ദര്‍മേനോന്‍ ഇന്‍സിനേറ്റര്‍ സമര്‍പ്പിക്കുകയും ഡോ ധര്‍മ്മരാജ് അടാട്ട് മുഖ്യപ്രഭാഷണം നടത്തി. ചടങ്ങില്‍ സഭാംഗം ചേലൂര്‍ ശങ്കുണ്ണി രാമസ്വാമി ഗണിച്ചുണ്ടാക്കിയ പെര്‍പെക്ട്യല്‍ ലൈഫ് ടൈം കലണ്ടര്‍ പ്രകാശനം ചെയ്തു. ജനറല്‍ കണ്‍വീനര്‍ എം സനല്‍കുമാര്‍, സെക്രട്ടറി പി രവിശങ്കര്‍, ട്രഷറര്‍ എം നാരായണന്‍ കുട്ടി, പ്രസന്ന ശശി, ബ്രഹ്മശ്രീ മണക്കാട് പരമേശ്വരന്‍ നമ്പൂതിരി എന്നിവര്‍ പ്രസംഗിച്ചു.

മാതൃഭാഷാദിനത്തില്‍ കേരളകലാമണ്ഡലം സന്ദര്‍ശിച്ച് ശാന്തിനികേതന്‍ വിദ്യാര്‍ത്ഥികള്‍

ഇരിങ്ങാലക്കുട : ലോക മാതൃഭാഷ ദിനത്തോടനുബന്ധിച്ച് ഇരിങ്ങാലക്കുട ശാന്തിനികേതന്‍ വിദ്യാര്‍ത്ഥികള്‍ മാതൃഭാഷയെയും മാതൃ രാജ്യത്തെയും ഏറെ സ്നേഹിച്ച മഹാകവി വള്ളത്തോള്‍ കേരളീയ കാളകളെ പരിപോഷിപ്പിക്കുന്നതിന് സ്ഥാപിച്ച കലാമണ്ഡലം സന്ദര്‍ശിച്ചു. കൂടാതെ വള്ളത്തോളിന്റെ സ്മരണകളുറങ്ങുന്ന വള്ളത്തോള്‍ മ്യൂസിയവും പഴയ കലാമണ്ഡലവും കണ്ടാണ് വിദ്യാര്‍ത്ഥികള്‍ മടങ്ങിയത്. കേരളീയ കലകളെ അടുത്തറിയുന്നതിനും, സാഹിത്യത്തില്‍ വള്ളത്തോളിന്റെ സംഭാവനകളെക്കുറിച്ച് മനസിലാക്കാനും ഈ പഠനയാത്ര പ്രയോജനപ്പെട്ടു. മാനേജര്‍ ഇ എ ഗോപി, പ്രിന്‍സിപ്പല്‍ ടി കെ ഉണ്ണികൃഷ്ണന്‍, എ ജി സന്തോഷ്, വി എസ് സോന, കെ വി റെനിമോള്‍, വി എസ് നിഷ, കെ സി ബീന എന്നിവര്‍ നേതൃത്വം നല്‍കി.

കേരള ആരോഗ്യ സര്‍വ്വകലാശാല എം.എസ്.സി എം.എല്‍.ടി ഒന്നാം റാങ്ക് ആനന്ദപുരം സ്വദേശിനി മില വി എസ്ന്

ആനന്ദപുരം : കേരള ആരോഗ്യ സര്‍വ്വകലാശാല നടത്തിയ എം.എസ്.സി എം എല്‍ ടി (MSc MLT) പരീക്ഷയില്‍ ഒന്നാം റാങ്ക് ആനന്ദപുരം സ്വദേശിനി മില വി എസ് നേടി . ആനന്ദപുരം വാരിയത്ത് വിട്ടില്‍ സുകമാരന്റെയും (മിലന്‍ സ്റ്റുഡിയോ ), കുമാരിയുടെയും മകളാണ് .

ഇരിങ്ങാലക്കുട രൂപത മാതൃസംഘത്തിന്റെ ആഭിമുഖ്യത്തില്‍ സ്നേഹസംഗമം സംഘടിപ്പിക്കുന്നു

ഇരിങ്ങാലക്കുട : ഇരിങ്ങാലക്കുട രൂപത മാതൃസംഘത്തിന്റെ ആഭിമുഖ്യത്തില്‍ അനുരഞ്ജന വര്‍ഷത്തിനോടനുബന്ധിച്ച് രൂപത അതിര്‍ത്തിക്കുള്ളില്‍ മുപ്പത്തിനാലോളം സ്ഥാപനങ്ങളില്‍ നിന്നും 350 ല്‍ അധികം വരുന്ന അനാഥമക്കളെ കൊണ്ടുവന്ന് സ്നേഹസംഗമം 2017 സംഘടിപ്പിക്കുന്നു. രോഗവും ശാരീരിക പരിമിതികളും, വാര്‍ധക്യവും ജീവിതത്തെ പാര്‍ശ്വവത്കരിച്ച അനേകര്‍ക്ക് സാന്ത്വനവും സമാധാനവും പ്രതീക്ഷയും കുടുംബവും നല്‍കുന്നതാണ് ഓരോ അഗതി മന്ദിരങ്ങളും വൃദ്ധസദനങ്ങളും. ഒറ്റപ്പെടുന്നവരും ഒഴിവാക്കുന്നവരുമായ ഇവരെ രൂപത മാതൃസംഘം എല്ലാവര്‍ഷവും ഒരുമിച്ചുകൂട്ടി സ്നേഹസംഗമം സംഘടിപ്പിക്കുന്നു എന്ന ഭാരവാഹികള്‍ പത്രസമ്മേളനത്തില്‍ അറിയിച്ചു. പങ്കെടുക്കുന്ന ഓരോ ഭവനത്തിനും കാരുണ്യ ഫണ്ടില്‍ നിന്നും സ്നേഹോപഹാരം നല്‍കുന്നു. 350 ഓളം അനാഥമക്കളുടെ കൂട്ടായ്മ, 135 ഇടവകകളില്‍നിന്നും 600 ഓളം അമ്മമാരുടെ പ്രതിനിധി സംഗമം, 34 അഗതി മന്ദിരങ്ങളിലെ മക്കളുടെ കലാപരിപാടികള്‍, രൂപതയിലെ 135 പള്ളികളിലേക്ക് ഏകസ്ഥര്‍ക്ക് ഓരോ മാസത്തേക്കുള്ള കാരുണ്യ സഹായം എന്നിവയുടെ ഉദ്‌ഘാടനം ഫെബ്രുവരി 25 ശനിയാഴ്ച്ച ആനന്ദപുരം ലിറ്റില്‍ ഫ്‌ളവര്‍ പള്ളിയില്‍ ഇരിങ്ങാലക്കുട രൂപത മെത്രാന്‍ മാര്‍ പോളി കണ്ണൂക്കാടന്‍ നിര്‍വഹിക്കും.ഇരിങ്ങാലക്കുട രൂപത മാതൃ സംഘം പ്രസിഡന്റ് ആലീസ് തോമസ് അധ്യക്ഷത വഹിക്കും.
രൂപത ഡയറക്ടര്‍ ഫാ വില്‍സണ്‍ എലുവത്തിങ്കല്‍ കൂനന്‍, രൂപത മാതൃ സംഘം പ്രസിഡന്റ് ആലീസ് തോമസ്, ഗ്ലോബല്‍ സെനറ്റ് മെമ്പര്‍ റോസിലി പോള്‍ തട്ടില്‍, രൂപത ട്രഷറര്‍ തുഷം സൈമണ്‍ എന്നിവര്‍ പത്രസമ്മേളനത്തില്‍ പങ്കെടുത്തു.

കിഴുത്താണി ശ്രീ മഹാവിഷ്ണു ക്ഷേത്രതിരുവുത്സവം കൊടിയേറ്റം 24 ന്

കിഴുത്താണി : ശ്രീ മഹാവിഷ്ണു ക്ഷേത്രത്തിലെ തിരുവുത്സവം വിപുലമായ പരിപാടികളോടെ ഫെബ്രുവരി 24 ന് കൊടിയേറി മാര്‍ച്ച് 1 ബുധനാഴ്ച്ച ആറാട്ടോടുകൂടി ആഘോഷിക്കുന്നു എന്ന് ഭാരവാഹികള്‍ പത്രസമ്മേളനത്തില്‍ അറിയിച്ചു. ഫെബ്രുവരി 24 ന് ഉച്ച തിരിഞ്ഞു 4 ന് വേട്ടക്കൊരുമകന്‍ ക്ഷേത്രനടയില്‍ നിന്ന് നാദസ്വരം, താലപ്പൊലി, എന്നിവയുടെ അകമ്പടിയോടെ പുറപ്പെട്ട് ക്ഷേത്രനടയില്‍ എത്തിച്ചേരും. വൈകിട്ട് 5:30 ന് ഡോ എം വി നടേശന്‍, ശ്രീ ശങ്കര സര്‍വ്വകലാശാല കാലടി ശിവരാത്രി മാഹാത്മ്യത്തെക്കുറിച്ച് ആധ്യാത്മിക പ്രഭാഷണം നടത്തും. 7:45 ന് കൊടിയേറ്റം, തിരുവാതിരക്കളി തുടര്‍ന്ന് പ്രദീപ് ആറാട്ടുപുഴ അവതരിപ്പിക്കുന്ന രുഗ്മണി സ്വയംവരം ഓട്ടന്‍തുള്ളല്‍ അരങ്ങേറും. 25- ാം തിയ്യതി വൈകിട്ട് 6 മണിക്ക് സാംസ്കാരിക സമ്മേളനം ഉപ്പും മുളകും ഫെയിം ശിവാനി മേനോന്‍ ഉദ്‌ഘാടനം ചെയ്യും. തിരുവുത്സവാഘോഷകമ്മിറ്റി ചെയര്‍മാന്‍ ഇ അപ്പുമേനോന്‍
അധ്യക്ഷത വഹിക്കുന്ന സമ്മേളനത്തില്‍ ആയുര്‍വേദ ആചാര്യന്‍ ഡോ നാട്ടുവള്ളി ജയചന്ദ്രന്‍ മുഖ്യപ്രഭാഷണം നടത്തും. തുടര്‍ന്ന് വിവിധ കലാപരിപാടികള്‍ അരങ്ങേറും. 26 ന് വൈകിട്ട് 6 മണിക്ക് രാജേഷ് തംബുരു അവതരിപ്പിക്കുന്ന വണ്‍ മാന്‍ ഷോ, വൈകിട്ട് 7:30 ന് നൃത്തതി കഥകളി അക്കാദമി, ഇരിങ്ങാലക്കുട അവതരിപ്പിക്കുന്ന മേജര്‍ സെറ്റ് കഥകളി പ്രഹ്ലാദചരിതം അരങ്ങേറും. 27 തിങ്കളാഴ്ച്ച 7 ന് കൊച്ചിന്‍ സെവന്‍സ് ആര്‍ട്ട്സ് അവതരിപ്പിക്കുന്ന ഗാനമേള ഉണ്ടാകും. 28 ന് ഉച്ച തിരിഞ്ഞു 3:30 ന് 3 ഗജവീരന്മാരോടുകൂടിയ കാഴ്ചശീവേലി, 7 ന് വര്‍ണ്ണമഴ, 8:30 ന് തായമ്പക. പള്ളിവേട്ട എഴുന്നെള്ളിപ്പ് 8:45 ന് പഞ്ചവാദ്യം തുടര്‍ന്ന് പാണ്ടിമേളം എന്നിവയും ഉണ്ടാകും. മാര്‍ച്ച് 1 ന് 7 മണിക്ക് ആറാട്ടുബലി, 7:30 ന് ആറാട്ട്. കോടികള്‍ പറ, ഇരുപത്തി അഞ്ച് കലശാഭിഷേകം, ശ്രീഭൂതബലി, ആറാട്ടുകഞ്ഞി, രാവിലെയും വൈകിട്ടും എല്ലാ ദിവസവും തന്ത്രീ മുഖമായ കലശവും പൂജകളും പുറത്തേക്ക് എഴുന്നള്ളിപ്പും ഉണ്ടാകും.

ചെയര്‍മാന്‍ ഇ അപ്പുമേനോന്‍, ജനറല്‍ കണ്‍വീനര്‍ കുഞ്ഞുവീട്ടില്‍ പരമേശ്വരന്‍, പ്രോഗ്രാം കണ്‍വീനര്‍ ബാബു പെരുമ്പിള്ളി, പബ്ലിസിറ്റി കണ്‍വീനര്‍ ജ്യോതി പെരുമ്പിള്ളി ട്രഷറര്‍ കുഞ്ഞുവീട്ടില്‍ അപ്പു എന്നിവര്‍ പത്രസമ്മേളനത്തില്‍ പങ്കെടുത്തു.

എടതിരിഞ്ഞി എച്ച് ഡി പി സമാജം ശിവകുമാരേശ്വര ക്ഷേത്രത്തിലെ പൂയമഹോത്സവത്തിന്റെ ഭാഗമായി കാവടി വരവ് നടന്നു

എടതിരിഞ്ഞി : വര്‍ണ്ണകാവടികള്‍ വിസ്മയം തീര്‍ത്ത് എടതിരിഞ്ഞി എച്ച്.ഡി.പി സമാജം ശിവകുമാരേശ്വര ക്ഷേത്രത്തില്‍ പൂയമഹോത്സവം. രാവിലെ അഭിഷേകകാവടി സംഘത്തിന്റെ നേതൃത്വത്തില്‍ അഭിഷേക കാവടിവരവ് നടന്നു. തുടര്‍ന്ന് വിവിധ ദേശങ്ങളില്‍ നിന്നെത്തിയ കാവടികള്‍ ഉച്ചയോടെ കൂടി താളവാദ്യമേള അകമ്പടിയോടെ ക്ഷേത്രത്തില്‍ എത്തിചേര്‍ന്നു. ഉച്ചതിരിഞ്ഞ് വിവിധ ദേശങ്ങളില്‍ നിന്നും എഴുന്നള്ളിപ്പ് ക്ഷേത്രത്തിലെത്തി. തുടര്‍ന്ന് നടന്ന കൂട്ടിയെഴുന്നള്ളിപ്പില്‍ തിരുവമ്പാടി ശിവസുന്ദര്‍ തിടമ്പേറ്റി. 17 ഗജവീരന്മാര്‍ കൂട്ടിയെഴുന്നള്ളിപ്പില്‍ പങ്കെടുത്തു. വൈകീട്ട് ദിപാരാധന, തുടര്‍ന്ന് ഭസ്മക്കാവടി വരവ് എന്നിവ നടന്നു. ചൊവ്വാഴ്ച ആറാട്ട് നടക്കും.

ദീനദയാല്‍ജി അനുസ്മരണവും സമര്‍പ്പണ നിധിശേഖരണവും നടന്നു

ഇരിങ്ങാലക്കുട : ദീനദയാല്‍ജി ഉപാധ്യായ അനുസ്മരണവും സമര്‍പ്പണനിധിശേഖരണവും നടന്നു. 36, 37, 38, 39, 50, 70, 75, 76 ബൂത്തുകളില്‍ നടന്ന പരിപാടിയില്‍ ബി ജെ പി മുനിസിപ്പല്‍ പ്രസിഡണ്ട് വി സി രമേഷ് അദ്ധ്യക്ഷത വഹിച്ചു. ജില്ല ജനറല്‍ സെക്രട്ടറി കെ പി ജോര്‍ജ്ജ്, സംസ്ഥാന സമിതി അംഗം സന്തോഷ് ചെറാക്കുളം, മണ്ഡലം പ്രസിഡണ്ട് ടി എസ് സുനില്‍കുമാര്‍, ട്രഷറര്‍ ഗിരീഷ് കിഴുത്താണി, മുനിസിപ്പല്‍ വൈസ് പ്രസിഡണ്ട് ഷൈജു കുറ്റിക്കാട്ട്, ജോ സെക്രട്ടറി വിജയന്‍ പാറേക്കാട്ട് എന്നിവര്‍ പങ്കെടുത്തു.

അമ്മനത്ത് രാധാകൃഷ്ണന്‍ ചരമവാര്‍ഷികവും ബേബി ജോണ്‍ ചരമവാര്‍ഷികവും അനുസ്മരണവും സംയുക്തമായി നടത്തി

ഇരിങ്ങാലക്കുട : മുന്‍ ബ്ലോക്ക് കോണ്‍ഗ്രസ് പ്രസിഡന്റുമാരായ അമ്മനത്ത് രാധാകൃഷ്ണന്റെ 10- ാം ചരമവാര്‍ഷികവും ബേബി ജോണിന്റെ 7- ാം ചരമവാര്‍ഷികവും ഇരിങ്ങാലക്കുട കോണ്‍ഗ്രസ് നിയോജകമണ്ഡലം കമ്മിറ്റിയുടെ നേതൃത്വത്തില്‍ രാജീവ് ഗാന്ധി മന്ദിരത്തില്‍ സംയുക്തമായി നടത്തി. എം പി ജാക്സണ്‍ മുഖ്യപ്രഭാഷണം നടത്തി. ബ്ലോക്ക് കോണ്‍ഗ്രസ് പ്രസിഡണ്ട് ടി വി ചാര്‍ളി, ഡി സി സി ജനറല്‍ സെക്രട്ടറി സോണിയ ഗിരി, ബ്ലോക്ക് സെക്രട്ടറി എല്‍ ഡി ആന്റോ, ജസ്റ്റിന്‍ ജോണ്‍, നിധിന്‍ തോമസ്, കെ എസ് കബീര്‍, സുജിത് പൊറത്തിശ്ശേരി, ഫ്ലോറന്‍ ടി ഒ, ഡീന്‍സ് ഷഹീദ്, ഹൃതിക്ക് പി എസ്, ഔസെഫ് പൊറത്തിശ്ശേരി, ഷെല്ലി മുട്ടത്ത് എന്നിവര്‍ പുഷ്പാര്‍ച്ചനയ്ക്ക് നേതൃത്വം നല്‍കി.

ഇടിമുറികളല്ല, പരസ്‌പര ബഹുമാനമാണ്‌ ഉന്നത വിദ്യാഭ്യാസത്തിന്റേ ചാലകശക്തി- വൈസ്‌ ചാന്‍സിലര്‍

ഇരിങ്ങാലക്കുട : ഗുരുവിനെ ആദരിക്കുന്ന ശിഷ്യരും ശിഷ്യരെ മക്കളെപ്പോലെ സ്‌നേഹിക്കുന്ന അദ്ധ്യാപകരുമാണ്‌ കാലഘട്ടത്തിന്റെ ആവശ്യം എന്നും കോളേജുകളിലെ ഇടിമുറികളല്ല, പരസ്‌പരബഹുമാനവും ആദരവുമായിരിക്കണം ഉന്നതവിദ്യാഭ്യാസത്തിന്റെ ചാലകശക്തികള്‍ എന്നും കാലടി ശ്രീശങ്കര സംസ്‌കൃത സര്‍വ്വകലാശാല വൈസ്‌ചാന്‍സിലര്‍ ഡോ. എം.സി. ദിലീപ്‌കുമാര്‍. കാലിക്കറ്റ്‌ സര്‍വ്വകലാശാലയിലെ മികച്ച വിദ്യാര്‍ത്ഥി പ്രതിഭയ്‌ക്ക്‌ ഇരിങ്ങാലക്കുട ക്രൈസ്റ്റ്‌ കോളേജ്‌ ഏര്‍പ്പെടുത്തിയ ഫാ.ജോസ്‌ ചുങ്കന്‍ കലാലയ രത്‌നപുരസ്‌കാരം തൃശൂര്‍ സെന്റ്‌ തോമസ്‌ കോളേജിലെ ശ്രുതി സജിക്ക്‌ നല്‍കിക്കൊണ്ട്‌ സംസാരിക്കുകയായിരുന്നു അദ്ദേഹം.  വൈസ്‌ പ്രിന്‍സിപ്പല്‍, ഡോ. മാത്യു പോള്‍ ഊക്കന്‍, പി.ആര്‍.ഒ. പ്രൊഫ. സെബാസ്റ്റ്യന്‍ ജോസഫ്‌, ഫാ.ജോസ്‌ ചുങ്കന്‍, ഡോ.എസ്‌. ശ്രീകുമാര്‍, ഡോ. കെ.എം. ജയകൃഷ്‌ണന്‍, യൂണിയന്‍ ജനറല്‍ സെക്രട്ടറി ഗോകുല്‍ എന്നിവര്‍ സംസാരിച്ചു.

ചാച്ചു ചാക്യാര്‍ റോഡിലെ ഇടപ്പിള്ളി ലൈനില്‍ പൈപ്പ് പൊട്ടി കുടിവെള്ളം പാഴാകുന്നു

ഇരിങ്ങാലക്കുട : ചാച്ചു ചാക്യാര്‍ റോഡിലെ ഇടപ്പിള്ളി ലൈനില്‍ ജല അതോറിറ്റിയുടെ പൈപ്പ് പൊട്ടി കുടിവെള്ളം പാഴാകുന്നു. റോഡില്‍ പരന്നൊഴുകി റോഡും ഇവിടെ നാശമാകുന്നുണ്ട്. പലതവണ നേരിട്ട് അധികൃതരുമായി ബന്ധപ്പെട്ടിട്ടും തിരിഞ്ഞ നോക്കിയില്ല എന്ന പരാതിയുണ്ട്. വരള്‍ച്ച രൂക്ഷമാകുമ്പോള്‍ ഇതുപോലെ കുടിവെള്ളം പാഴാകുന്നത് അധികൃതരുടെ അനാസ്ഥയാണെന്ന് പരിസരവാസികള്‍ കുറ്റപ്പെടുത്തുന്നു.

കനാല്‍ വെള്ളം വിടാത്തതിനാല്‍ എം എല്‍ എയുടെ അടിയന്തിര ഇടപെടല്‍ ഉണ്ടാകണം

കല്ലേറ്റുംകര : ആളൂര്‍ പഞ്ചായത്ത് പരിധിയിലും മുരിയാട് പഞ്ചായത്തു പരിധിയിലും സ്ഥിതി ചെയ്യുന്ന പുതുച്ചിറ, അരിക്കാകുളം, കണ്ണംപുഴപ്പാടം, എന്നീ മേഖലകളില്‍ കനാല്‍ വെള്ളം വിടാത്തതിനാല്‍ എം എല്‍ എയുടെ അടിയന്തിര ഇടപെടല്‍ ഉണ്ടാകണമെന്നും പഞ്ചായത്ത് യുദ്ധകാലാടിസ്ഥാനത്തില്‍ ഇടപ്പെട്ട് കുടിവെള്ളക്ഷാമം പരിഹരിക്കണമെന്ന് ആവശ്യപ്പെട്ട് യു ഡി എഫ് മണ്ഡലം കര്‍ഷകസമിതിയുടെ ആഭിമുഖ്യത്തില്‍ ആളൂര്‍ പഞ്ചായത്ത് ഓഫീസിലേക്ക് പ്രതിഷേധ മാര്‍ച്ചും ധര്‍ണ്ണയും നടത്തി. ആളൂര്‍ പഞ്ചായത്ത് മെമ്പര്‍ ഐ കെ ചന്ദ്രന്‍ അദ്ധ്യക്ഷത വഹിച്ചു. മണ്ഡലം പ്രസിഡന്റ് സോമന്‍ ചിറ്റേത്ത് യോഗം ഉദ്‌ഘാടനം ചെയ്തു. യോഗത്തില്‍ എന്‍ കെ ജോസഫ്, മുരിയാട് പഞ്ചായത്ത് മെമ്പര്‍ ജസ്റ്റിന്‍ ജോര്‍ജ്, മെമ്പര്‍ ലത രാമകൃഷ്ണന്‍, തോമസ് തൊകലത്ത്, അബ്‌ദുള്‍ സത്താര്‍, തോമസ് തത്തംപ്പിള്ളി, സോജന്‍ കെ തുടങ്ങിയവര്‍ സംസാരിച്ചു.

തൊഴിലുറപ്പ് തൊഴിലാളികള്‍ നഗരസഭാ ഓഫീസ് മാര്‍ച്ച് നടത്തി

ഇരിങ്ങാലക്കുട : സാമ്പത്തിക വര്‍ഷം അവസാനിക്കാറായിട്ടും, തൊഴിലുറപ്പ് പദ്ധതി നടപ്പാക്കാത്തതില്‍ പ്രതിഷേധിച്ച് ഇരിങ്ങാലക്കുട മുനിസിപ്പല്‍ പ്രദേശത്തെ അയ്യങ്കാളി നഗര തൊഴിലുറപ്പ് പദ്ധതി തൊഴിലാളികള്‍ നഗരസഭാ ഓഫീസിലേക്ക് മാര്‍ച്ചും ധര്‍ണ്ണയും നടത്തി. 2015-16 വര്‍ഷത്തില്‍ നഗരസഭയ്ക്ക് ലഭിച്ച 46 ലക്ഷം രൂപയുടെ പ്രവൃത്തികളില്‍ സ്പില്‍ ഓവര്‍ ആയ പ്രവൃത്തികള്‍ മാത്രമാണ് ഈ വര്‍ഷം നഗരസഭ നടപ്പാക്കിയിട്ടുള്ളത്. 2016-17 വര്‍ഷത്തെ തൊഴിലുറപ്പ് പദ്ധതിയിലുള്‍പ്പെടുത്തി നടപ്പാക്കേണ്ട പദ്ധതി നിര്‍ദ്ദേശങ്ങള്‍ കഴിഞ്ഞ ഒക്ടോബര്‍ മാസത്തില്‍ വാര്‍ഡ് സഭാ യോഗങ്ങളില്‍ വെച്ച് അംഗീകരിച്ചിരുന്നെങ്കിലും, ഡി.പി.ആര്‍, ആക്ഷന്‍ പ്ലാന്‍ എന്നിവ തയ്യാറാക്കി ജില്ലാ ആസൂത്രണ സമിതിയുടെ അംഗീകാരം ലഭ്യമാക്കുന്നതില്‍ ഗുരുതര വീഴ്ചയാണ് ഭരണസമിതിയുടെ ഭാഗത്ത് നിന്നുണ്ടായത്.തന്മൂലം ആവശ്യമായ ഫണ്ട് ഇതുവരെ സര്‍ക്കാരില്‍ നിന്നും നഗരസഭയ്ക്ക് ലഭിച്ചിട്ടില്ല. കഴിഞ്ഞ ഡിസംബര്‍ മുതല്‍ തൊഴിലുറപ്പ് പദ്ധതിക്ക് വേണ്ടി കരാര്‍ അടിസ്ഥാനത്തില്‍ ജോലി ചെയ്തു വന്നിരുന്ന ഓവര്‍സിയറും, അക്കൗണ്ടന്റും സേവനം അവസാനിപ്പിച്ചു പോയി. കൗണ്‍സില്‍ യോഗത്തില്‍ പ്രതിപക്ഷം ഈ വിഷയമുന്നയിച്ച് ബഹളം വെച്ചതിനെ തുടര്‍ന്ന് ജനുവരി അവസാനം നടന്ന ജില്ലാ ആസൂത്രണ സമിതി യോഗത്തില്‍ 3.62 കോടി രൂപ അടങ്കല്‍ വരുന്ന ആക്ഷന്‍ പ്ലാന്‍ അംഗീകരിച്ച് കിട്ടിയിട്ടുണ്ട്. എന്നാല്‍ ഈ സാമ്പത്തിക വര്‍ഷം തൊഴിലാളികള്‍ക്ക് തൊഴില്‍ കൊടുക്കാന്‍ സാധ്യത കുറവാണ്. ഈ സാഹചര്യത്തിലാണ് തൊഴിലാളികള്‍ സമരത്തിന് ഇറങ്ങിയത്.കടുത്ത വരള്‍ച്ച നേരിടുന്ന ഇക്കാലത്ത് ജലാശയങ്ങളുടെ നവീകരണവും, ജല സ്രോതസ്സുകളുടെ സംരക്ഷണവും തൊഴിലുറപ്പ് പദ്ധതിയില്‍ ചെയ്യാമെന്നിരിക്കെ നഗര സഭയിലെ തൊഴിലാളികള്‍ പണിയില്ലാതെ വീട്ടിലിരിപ്പാണ്. മുനിസിപ്പല്‍ ഓഫീസിനു മുന്നില്‍ നടന്ന ധര്‍ണ്ണ സി.പി.ഐ (എം) ഏരിയാ സെക്രട്ടറി ഉല്ലാസ് കളക്കാട്ട് ഉദ്ഘാടനം ചെയ്തു.നഗരസഭാ കൗണ്‍സിലര്‍ പി.വി.ശിവകുമാര്‍ അദ്ധ്യക്ഷത വഹിച്ചു. എം.ബി.രാജു മാസ്റ്റര്‍, സുമതി ഗോപാലകൃഷ്ണന്‍, പ്രജിത സുനില്‍ കുമാര്‍ എന്നിവര്‍ പ്രസംഗിച്ചു. കെ.കെ.ദാസന്‍, ഗീത പുരുഷോത്തമന്‍ ,ഗിരിജ ബാബു, പി വി.സദാനന്ദന്‍ തുടങ്ങിയവര്‍ മാര്‍ച്ചിന് നേതൃത്വം നല്‍കി. മാര്‍ച്ച് മാസം ഒന്നാം തിയ്യതി മുതല്‍ തൊഴില്‍ നല്‍കണമെന്നാവശ്യപ്പെട്ട് ചെയര്‍പേഴ്സണ്‍ നിമ്യ ഷിജുവിനും, മുനിസിപ്പല്‍ സെക്രട്ടറിയ്ക്കും തൊഴിലാളികള്‍ ഒപ്പിട്ട നിവേദനം സമര്‍പ്പിച്ച ശേഷമാണ് തൊഴിലാളികള്‍ പിരിഞ്ഞു പോയത്.

20- ാം വാര്‍ഡ് ഡി സി കോളനിയിലെ അംഗനവാടി വൈദ്യുതീകരിച്ചു

ഇരിങ്ങാലക്കുട : 20- ാം വാര്‍ഡ് ഡി സി കോളനിയിലെ അംഗനവാടി വൈദ്യുതീകരിച്ചു. ഇരിങ്ങാലക്കുട എം എല്‍ എ പ്രൊഫ കെ യു അരുണന്‍ സ്വിച്ച് ഓണ്‍ കര്‍മ്മം നിര്‍വഹിച്ചു. കൗണ്‍സിലര്‍ പി വി ശിവകുമാര്‍ അദ്ധ്യക്ഷത വഹിച്ചു. എ ഇ ഹനീഷ് ആശംസകള്‍ അര്‍പ്പിച്ചു. ഐ ടി സൂപ്പര്‍വൈസര്‍ സ്വാഗതവും അംഗനവാടി ടീച്ചര്‍ നന്ദിയും പറഞ്ഞു.

ആശാകിരണം കാന്‍സര്‍ സുരക്ഷായജ്ഞം & പ്രധാനമന്ത്രി സുരക്ഷാ ഭീമ യോജന

ഇരിങ്ങാലക്കുട : ഇരിങ്ങാലക്കുട രൂപതയുടെ സാമൂഹ്യ സേവന വിഭാഗമായ സോഷ്യല്‍ ആക്‌ഷന്‍ ഫോറത്തിന്റെ നേതൃത്വത്തില്‍ കാരിത്താസ് ഇന്ത്യയുടെ സഹകരണത്തോടെ കാരുണ്യവര്‍ഷ സമാപനത്തില്‍ നടപ്പിലാക്കുന്ന ആശാകിരണം കാന്‍സര്‍ സുരക്ഷായജ്ഞം പദ്ധതിയുടെയും പ്രധാനമന്ത്രി സുരക്ഷാ ഭീമ യോജന പദ്ധതിയുടെയും ഉദ്‌ഘാടനം ബിഷപ് ഹൗസ് ഓഡിറ്റോറിയത്തില്‍ രൂപത മെത്രാന്‍ പോളി കണ്ണൂക്കാടന്‍ നിര്‍വഹിച്ചു. വികാരി ജനറലും സോഷ്യല്‍ ആക്‌ഷന്‍ ഫോറം പ്രസിഡന്റുമായ മോന്‍ ആന്റോ തച്ചില്‍ അദ്ധ്യക്ഷത വഹിച്ചു.

വെട്ടിക്കര നനദുര്‍ഗാ നവഗ്രഹ ക്ഷേത്രത്തില്‍ വിദ്യാഗോപാല മന്ത്രാര്‍ച്ചന

ഇരിങ്ങാലക്കുട : വെട്ടിക്കര നനദുര്‍ഗാ നവഗ്രഹ ക്ഷേത്രത്തില്‍ കുട്ടികളുടെ പരീക്ഷാവിജയത്തിനും ദോഷപരിഹാരത്തിനും എല്ലാ വര്‍ഷവും നടത്തിവരാറുള്ള വിദ്യാ ഗോപാല മന്ത്രാര്‍ച്ചന വെട്ടിക്കര നനദുര്‍ഗാ നവഗ്രഹ ക്ഷേത്രത്തില്‍ സമുചിതമായി നടത്തി. നൂറോളം വിദ്യാര്‍ഥികള്‍ പങ്കെടുത്ത പരിപാടിയില്‍ ഉണ്ണികൃഷ്ണന്‍ ചെരാകുളം മുഖ്യ കാര്‍മികത്വം വഹിച്ചു. ഗോപിനാഥന്‍, സായി സേവാസമിതി, അനുഗ്രഹ പ്രഭാഷണം നടത്തി.

മഞ്ജു വാര്യര്‍ക്ക് ഐക്യദാര്‍ഢ്യം പ്രഖ്യാപിച്ച് മഹിളാ സംഘം

ഇരിങ്ങാലക്കുട : മലയാളത്തിന്റെ പ്രിയപ്പെട്ട എഴുത്തുകാരി മാധവിക്കുട്ടിയുടെ ആത്മകഥയെ ആസ്പദമാക്കി കമല്‍ സംവിധാനം ചെയ്യുന്ന സിനിമയില്‍ അഭിനയിക്കുന്നതിന്റെ പേരില്‍ നടി മഞ്ജു വാര്യരെ അപകീര്‍ത്തിപ്പെടുത്തുവാന്‍ ശ്രമിക്കുന്നവര്‍ സ്ത്രീസമൂഹത്തെ ഒന്നാകെ അവഹേളിക്കുകയാണെന്നും മഞ്ജു വാര്യര്‍ക്ക് ഐക്യദാര്‍ഢ്യം പ്രഖ്യാപിക്കുവാന്‍ കേരള മഹിളാ സംഘം ലീഡേഴ്‌സ് ക്യാമ്പ് തീരുമാനിച്ചു. ക്യാമ്പ് സി പി ഐ ജില്ലാ സെക്രട്ടറി കെ കെ വത്സരാജ് ഉദ്‌ഘാടനം ചെയ്തു. മണ്ഡലം പ്രസിഡന്റ് അല്‍ഫോന്‍സാ തോമസ് അദ്ധ്യക്ഷത വഹിച്ചു. പ്രൊഫ മീനാക്ഷി തമ്പാന്‍, കെ ശ്രീകുമാര്‍, ടി കെ സുധീഷ്, പി മണി, സ്വര്‍ണ്ണലത ടീച്ചര്‍, ഷീന പയെങ്കാട്ടില്‍, കെ എസ് ജയ, വി കെ സരിത എന്നിവര്‍ സംസാരിച്ചു. അനിത രാധാകൃഷ്ണന്‍ സ്വാഗതവും, അഡ്വ ജിഷ ജോബിന്‍ നന്ദിയും പറഞ്ഞു.

Top
Menu Title