News

ശ്രീ കൂടല്‍മാണിക്യം ക്ഷേത്രത്തില്‍ മഹാസുകൃതഹവനം ആഗസ്ത് 21 മുതല്‍

ഇരിങ്ങാലക്കുട : ശ്രീ കൂടല്‍മാണിക്യം ക്ഷേത്രത്തില്‍ ചിങ്ങം 5 മുതല്‍ 8 വരെ (ആഗസ്ത് 21 മുതല്‍ 24 വരെ)  സുകൃതഹവനം നടക്കും. ക്ഷേത്രത്തിന്റെയും ഭക്തജനങ്ങളുടെയും സര്‍വ്വോപരി നാടിന്റെയും ഐശ്വര്യത്തിനും സമ്പല്‍ സമൃദ്ധിക്കും വേണ്ടി നടത്തപ്പെടുന്ന ഈ മഹത്ത് കര്‍മത്തിന് മുന്നോടി ആയി ചിങ്ങം 1 മുതല്‍ 4 വരെ ( ആഗസ്ത് 17 മുതല്‍ 20 വരെ ) കൂടല്‍മാണിക്യ സ്വാമിക്ക് ദ്രവ്യകലശം , മുറജപം, മുതലായവയും നടത്തപ്പെടുന്നു. ക്ഷേത്രം കൂത്തമ്പലത്തിനു വടക്ക് വശത്തായി പ്രത്യേകം തയ്യാറാക്കപ്പെടുന്ന ഹവന മണ്ഡപത്തില്‍ ആണ് സുകൃതഹവനം നടക്കുക. ക്ഷേത്രം തന്ത്രിമാരുടെ മുഖ്യ കാര്‍മികത്വത്തില്‍ നടക്കുന്ന ചടങ്ങുകളില്‍ പരികര്‍മികള്‍ , ശാന്തിക്കാര്‍, മറ്റു പാരമ്പര്യ -പാരമ്പര്യേതര ജീവനക്കാര്‍ എന്നിവരും പങ്കെടുക്കുന്നു. ക്ഷേത്രത്തില്‍ ആഗസ്ത് 17 ന് വൈകിട്ട് പ്രസാദശുദ്ധി , രക്ഷോഘ്‌നഹോമം , വാസ്തുഹോമം, , വാസ്തുബലി, വാസ്തുകലശം എന്നിവയും 18 – ാം തീയ്യതി രാവിലെ ചതുഃശുദ്ധി ,ധാര എന്നിവയും 19 – ാം തീയ്യതി രാവിലെ പഞ്ചഗവ്യം, പഞ്ചകം, വൈകിട്ട് മണ്ഡപ സംസ്കാരം, പത്മലേഖനം എന്നിവയും 20 – ാം തീയ്യതി ബ്രഹ്മകലശപൂജ, കുംഭേശകലശപൂജ , പരികലശപൂജ, അധിവാസ ഹോമം നടക്കും . തുടര്‍ന്ന് എതൃത്ത് പൂജക്ക് ശേഷം സ്വര്‍ണ്ണകുടത്തില്‍ നെയ്യ് നിറച്ച് പ്രത്യേകം പൂജിച്ച ബ്രഹ്മകലശം, തേന്‍, പാല്‍ , തൈര് , നാല്പാമരക്കഷായം , തീര്‍ത്ഥം, എന്നിവ വാദ്യമേളങ്ങളുടെ അകമ്പടിയോടെ ഭഗവാന് അഭിഷേകം ചെയ്യുന്നു. തുടര്‍ന്ന് ഉച്ചപൂജ , ആഗസ്ത് 21 മുതല്‍ 24 വരെ രാവിലെ 6 മണി മുതല്‍ 10 വരെ സുകൃതഹവനം നടക്കും. സമാപനദിവസം ഉച്ചപൂജക്ക് ശേഷം പ്രസാദ വിതരണം, പ്രസാദ ഊട്ട്, എന്നിവ ഉണ്ടാകും.

പുല്ലൂര്‍ സെന്റ് സേവിയേഴ്‌സ് ഐ.ടി.ഐയിലെ വിദ്യാരംഭം

പുല്ലൂര്‍ : സെന്റ് സേവിയേഴ്‌സ് ഐ ടി ഐ യിലെ 2017 -19 അധ്യയന വര്‍ഷത്തെ വിദ്യാരംഭ ശുശ്രുഷ തൃശൂര്‍ ദേവമാതാ പ്രൊവിന്‍ഷ്യല്‍ ഫാ. വാള്‍ട്ടര്‍ തേലപ്പിള്ളി സി എം ഐ ഉദ്ഘാടനം ചെയ്തു. തൃശൂര്‍ ദേവമാതാ എഡ്യൂക്കേഷണല്‍ കൗണ്‍സിലര്‍ ഫാ. ഷാജു എടമന അധ്യക്ഷ പ്രസംഗം നടത്തി. നവാഗരും അവരുടെ മാതാപിതാക്കളും, സ്റ്റാഫ് അംഗങ്ങളും അടങ്ങുന്ന സദസ്സിനു ജോസ് മാസ്റ്റര്‍ സ്വാഗതം ആശംസിച്ചു. പ്രാര്‍ത്ഥന നിഭരമായ അന്തരീക്ഷത്തില്‍ ഹിന്ദു- മുസ്ലിം -ക്രിസ്ത്യന്‍ മതഗ്രന്ഥങ്ങളില്‍ നിന്നുള്ള വായനകള്‍ നടത്തി. വിദ്യാര്‍ത്ഥികളുടെ ഉപകരണ സമര്‍പ്പണം നടന്നു. മാനേജര്‍ ഫാ. തോംസണ്‍ അറക്കല്‍ സി എം ഐ സന്ദേശം നല്‍കി. പ്രിന്‍സിപ്പല്‍ ഫാ യേശുദാസ് കൊടക്കരക്കാരന്‍ നന്ദി പറഞ്ഞു .

കര്‍ഷകദിനം ആഘോഷിച്ച് ചേലൂര്‍ സെന്റ് മേരീസ് സ്കൂളിലെ കുരുന്നുകള്‍

ചേലൂര്‍ : സെന്റ് മേരീസ് സ്കൂളില്‍ കര്‍ഷകദിനം വിപുലമായ രീതിയില്‍ ആഘോഷിച്ചു. മലയാള മാസാരംഭം , കൃഷിയുടെ മാഹാത്മ്യം എന്നിവ മനസ്സിലാക്കി കൊടുക്കുന്ന രീതിയിലുള്ള പ്രവര്‍ത്തനങ്ങളാണ് സ്കൂളിലെ കുട്ടികള്‍ നടത്തിയത്. അതിനായി കര്‍ഷക വേഷവും പാളത്തൊപ്പിയും അണിഞ്ഞ നൂറോളം കുട്ടികള്‍ അണി നിരന്ന കാഴ്ച കര്‍ഷക പെരുമ വിളിച്ചോതുന്ന തരത്തിലുള്ളതായിരുന്നു. അസംബ്ലിയോട് അനുബന്ധിച്ച് ക്ലാസ് അടിസ്ഥാനത്തില്‍ നാടന്‍ പാട്ടുകളും കൃഷി പാട്ടുകളും കുട്ടികള്‍ ആലപിച്ചത് ഏറെ ആകര്‍ഷകമായി . കേരളത്തിലെ കര്‍ഷകര്‍ക്ക് നഷ്ടപെടുന്ന കാര്‍ഷിക സംസ്കാരം തിരിച്ചു പിടിക്കുക , എല്ലാവരും കൃഷിക്കാര്‍ ആവുക, എല്ലായിടത്തും കൃഷി ഇറക്കുക , ആരോഗ്യപരമായ ജീവിതം നയിക്കുക , എന്നി സന്ദേശങ്ങള്‍ ഉള്‍കൊള്ളന്ന രീതിയിലുള്ള ഹെഡ്മിസ്ട്രെസ്സിന്റെ പ്രഭാഷണം കുട്ടികളില്‍ ആവേശമുണര്‍ത്തി. സ്കൂള്‍ ലീഡര്‍ നന്ദിയും പറഞ്ഞു.

കേരളത്തില്‍ തുടരുന്ന പനി മരണങ്ങളില്‍ പ്രതിഷേധിച്ചു ബി ജെ പിയുടെ വക ആരോഗ്യവകുപ്പ് മന്ത്രിക്കു മണിയോഡര്‍

ഇരിങ്ങാലക്കുട : കേരളത്തില്‍ ദിനംപ്രതി നിരവധി ജനങ്ങളാണ് പനി മൂലം മരണപ്പെടുന്നത് . ഇതിനെതിരെ ആരോഗ്യവകുപ്പ് കണ്ണടക്കുന്നതില്‍ പ്രതിഷേധിച്ച് ബി ജെ പി ഇരിങ്ങാലക്കുട 82 – ാം ബൂത്ത് കമ്മിറ്റിയുടെ നേതൃത്വത്തില്‍ പനിക്കുള്ള മരുന്ന് വാങ്ങുന്നതിനു ആരോഗ്യവകുപ്പ് മന്ത്രി കെ കെ ഷൈലജക്കു മണിയോഡര്‍ അയച്ചു കൊടുത്തു . മുനിസിപ്പല്‍ സമിതി സെക്രട്ടറി വിജയന്‍ പാറേക്കാട്ട് ,ബൂത്ത് പ്രസിഡന്റ് ഷാജി ,സെക്രട്ടറി സുനില്‍ ,ഷൈജു കാളിയങ്കര ,പുഷ്ക്കരന്‍ ,അജിത് തുടങ്ങിയവര്‍ നേതൃത്വം നല്‍കി.

സുമനസുകളുടെ സഹായത്താല്‍ അക്ഷയ് ഇനി സ്വന്തം വാഹനത്തില്‍ കോളേജിലേക്ക്

ഇരിങ്ങാലക്കുട : പടിയൂര്‍ പഞ്ചായത്തിലെ എടച്ചാലി ഭരതന്‍ മകന്‍ അക്ഷയ്‌ക്ക് ഇനി സ്വന്തം വാഹനത്തില്‍ കോളേജിലേക്ക് വരാം. ജന്മനാ അരക്കുതാഴെ തളര്‍ന്ന് ക്രൈസ്റ്റ് കോളേജിലേക്ക് ദിവസവും ഓട്ടോയില്‍ പോയി വരുന്ന അക്ഷയ് പരസഹായമില്ലാതെ ഇനി മുതല്‍ യാത്രചെയ്യും. രണ്ടാം വര്‍ഷ ബികോം വിദ്യാര്‍ത്ഥിയായ അക്ഷയ് പഠനത്തില്‍ മിടുക്കനായ വിദ്യാര്‍ത്ഥിയാണ്. അക്ഷയ് തന്റെ അംഗപരിമിതി കാണിച്ച് ജില്ല പഞ്ചായത്ത്, ഗ്രാമപഞ്ചായത്ത് തുടങ്ങീ സര്‍ക്കാര്‍ ഓഫിസുകളിലും എല്ലാം സഹായമഭ്യര്‍ത്ഥിച്ച് കയറിയിറങ്ങി അപേക്ഷ നല്‍കിയെങ്കിലും ആരും തന്നെ തുണച്ചില്ല. പിന്നീടാണ് കേന്ദ്രഗവര്‍മെന്റിന്റെ സഹായമെന്തെങ്കിലും കിട്ടുന്നതിനായി ബിജെപി പഞ്ചായത്ത് പ്രസിഡണ്ടായിരുന്ന അനൂപ് മാമ്പ്രയെ സമീപിച്ചത്. അനൂപ് സഹായം ഏറ്റെടുക്കുകയും പഞ്ചായത്തില്‍ പ്രവര്‍ത്തിക്കുന്ന പുണ്യം, വ്യാസ, സമന്വയ, ധര്‍മ്മഭാരതി എന്നീ ഗ്രാമസേവാസമിതികളുടെ സഹായത്തോടെ അക്ഷയിന് കോളേജില്‍ പോകാന്‍ ആക്ടീവ മോട്ടോര്‍ സൈക്കിള്‍ വാങ്ങി അഡീഷണല്‍ ചക്രം ഫിറ്റ് ചെയ്ത് മുച്ചക്രവാഹനമാക്കി നല്കുകയാണ് ഉണ്ടായത്. പടിയൂര്‍ എടച്ചാലി വിഷ്ണുമായ ക്ഷേത്ര മൈതാനില്‍ നടന്ന രക്ഷാബന്ധനമഹോത്സവത്തില്‍ ബിജെപി സംസ്ഥാന സമിതി അംഗം സന്തോഷ് ചെറാക്കുളവും ക്ഷേത്രം മഠാധിപതി എടച്ചാലി കുമാരനും ചേര്‍ന്ന് താക്കോല്‍ അക്ഷയ്ക്ക് കൈമാറി. ചടങ്ങില്‍ അനൂപ് മാമ്പ്ര, പി.ജി.അനില്‍കുമാര്‍, ഗ്രാമസേവാസമിതികളുടെ ഭാരവാഹികളായ രാജേഷ് പുല്ലാനി, മധു മാമ്പ്രമത്ത്, സനല്‍ തേനാശ്ശേരി, മണ്ഡല്‍ കാര്യവാഹ് മനോജ്, ശരത്ത് കോപ്പുള്ളി എന്നിവര്‍ സന്നിഹിതരായിരുന്നു.

നവലിബറല്‍ നയങ്ങളുടെ പ്രത്യാഘാതമാണ്‌ ഖോരഖ്‌പൂരിലെ ശിശുകൂട്ടകൊല -എ എന്‍ ഷംസീര്‍ എംഎല്‍എ

ഇരിങ്ങാലക്കുട : നവലിബറല്‍ നയങ്ങളുടെ പ്രത്യാഘാതമാണ്‌ ഖോരഖ്‌പൂരിലെ ശിശുകൂട്ടകൊലയെന്ന്‌ ഡി വൈ എഫ് ഐ സംസ്ഥാന പ്രസിഡന്റ്‌ എഎന്‍ ഷംസീര്‍ എംഎല്‍എ. പൊതുജനാരോഗ്യ സംവിധാന മുള്‍പെടെ സാമൂഹ്യ സുരക്ഷ മേഖലകളില്‍ നിന്ന്‌ സര്‍ക്കാരുകള്‍ പിന്മാറണമെന്നതാണ്‌ നവലിബറല്‍ നയങ്ങളുടെ കാതല്‍.കോണ്‍ഗ്രസ്‌ രാജ്യത്ത്‌ എല്ലും തോലുമായത്‌ 25 വര്‍ഷം മുമ്പ്‌ നടപ്പിലാക്കിയ നവലിബറല്‍ നയങ്ങള്‍കാരണമാണ്‌.ഈ നയത്തിന്റെ ഉപോല്‍പന്നമാണ്‌ അഴിമതി.അഴിമതിയില്‍ മുങ്ങിയ ബിജെപി യും കോണ്‍ഗ്രസിനെ പോലെ നാശത്തിന്റെ പാതയിലാണെന്നും ഷംസീര്‍ പറഞ്ഞു. ഇരിങ്ങാലക്കുടയില്‍ നവലിബറല്‍ നയങ്ങളെ ചെറുക്കുക മതനിരപേക്ഷതയുടെ കാവലാളാവുക എന്ന മുദ്രാവാക്യമുയര്‍ത്തി ഡിവൈഎഫ്‌ഐ യുടെ യുവജന പ്രതിരോധനത്തോട് അനുബന്ധിച്ചു പൊതുസമ്മേളനം ഉദ്‌ഘാടനം ചെയ്യുകയായിരുന്നു അദ്ദേഹം. സ്വാതന്ത്ര്യ സമരകാലത്ത്‌ ജയില്‍ മോചനത്തിന്‌ ബ്രിട്ടിഷ്‌കാര്‍ക്ക്‌ മാപ്പെഴുതി കൊടുത്ത വീരസവര്‍ക്കറെ കുറിച്ച്‌ പറഞ്ഞുകൊണ്ടാണ്‌ സ്വാതന്ത്ര്യ സമരത്തില്‍ പങ്കെടുക്കാത്ത ആര്‍എസ്‌എസും ബിജെപിയും തങ്ങള്‍ സ്വാതന്ത്ര്യസമരത്തിന്റെ നേരവകാശികളെന്ന്‌ അവകാശപെടുന്നത്‌.ആള്‍കൂട്ടം ഗോരക്ഷയുടെ പേരില്‍ ആളുകളെ തല്ലികൊല്ലുമ്പോള്‍ നിസംഗത പാലിക്കുന്ന ഭരണാധികാരികള്‍ നാടിന്‌ അപമാനമാണ്‌.മോദിയും ഹിറ്റ്‌ലറും സമാനരാണ്‌. ഹിറ്റലര്‍ക്ക്‌ സംഭവിച്ചത്‌ ഇന്ത്യയില്‍ മോദിക്കും സംഭവിക്കുന്ന കാലം വിദൂരമല്ല.ഗുജറാത്തില്‍ രാഹുല്‍ഗാന്ധിക്ക്‌ നേരെ അക്രമണമുണ്ടായപ്പോള്‍ നിശബ്ദത പാലിച്ച കോണ്‍ഗ്രസിന്‌ ബിജെപിയെ പ്രതിരോധിക്കാനാവില്ല. രാജ്യത്ത്‌ വര്‍ഗീയതക്കെതിരെ നടക്കുന്ന പോരാട്ടം പിണറായിയും മോദിയും തമ്മിലാണ്‌.അതുകൊണ്ടാണ്‌ വര്‍ഗീയവാദികള്‍ പിണറായിയുടെ തലക്ക്‌ ഒരു കോടി ഇനാം പ്രഖ്യാപിക്കുന്നതെന്നും ഷംസീര്‍ പറഞ്ഞു. ഖോരക്‌പൂരിലെ ആശുപത്രിയില്‍ ഓക്‌സിജന്‍ ലഭിക്കാതെ മരിച്ച കുട്ടികള്‍ക്ക്‌ സമ്മേളനം അനുശോചനം രേഖപെടുത്തി. സംഘാടക സമിതി ചെയര്‍മാന്‍ ഉല്ലാസ്‌ കളക്കാട്ട്‌അധ്യക്ഷനായി.അഡ്വ കെആര്‍ വിജയ, വിഎ മനോജ്‌കുമാര്‍ എന്നിവര്‍ സംസാരിച്ചു. വിഎം കമറുദ്ദീന്‍ പ്രതിജ്ഞ ചൊല്ലികൊടുത്തു.ബ്ലോക്ക്‌ സെക്രട്ടറി സിഡി സിജിത്ത്‌ സ്വാഗതവും പ്രസിഡന്റ്‌ ആര്‍എല്‍ ശ്രീലാല്‍ നന്ദിയും പറഞ്ഞു.

 

യു പി ദുരന്തത്തില്‍ പ്രതിഷേധിച്ച് ജോയിന്റ് കൗണ്‍സില്‍ മേഖല കമ്മിറ്റി

ഇരിങ്ങാലക്കുട : ഗോരഖ്പൂരിലെ ആശുപത്രിയില്‍ കുട്ടികളുടെ ജീവന്‍ രക്ഷിക്കുന്നതില്‍ യു പി സര്‍ക്കാര്‍ കാണിച്ച അലംഭാവത്തില്‍ പ്രതിഷേധിച്ച് ജോയിന്റ് കൗണ്‍സില്‍ മേഖല കമ്മിറ്റി സിവില്‍ സ്റ്റേഷനില്‍ പ്രതിഷേധ പ്രകടനം നടത്തി. ജില്ലാ കമ്മിറ്റി അംഗം എ എം നൗഷാദ് പ്രതിഷേധം ഉദ്ഘാടനം ചെയ്തു. മേഖല കമ്മിറ്റി അംഗം ടി ജെ സാജു അദ്ധ്യക്ഷത വഹിച്ചു. പി എ സജീവ്, പി ആര്‍ റോഷന്‍ , എന്‍ വി നന്ദകുമാര്‍ , പി ബിന്ദു , കെ കെ സന്ധ്യ തുടങ്ങിയവര്‍ സംസാരിച്ചു.

വ്യാഴാഴ്ച വൈദ്യുതി മുടങ്ങും

ഇരിങ്ങാലക്കുട : നമ്പര്‍ വണ്‍ സെക്‌ഷന്‍റെ പരിധിയില്‍ വരുന്ന ചേലൂര്‍, ചേലൂര്‍ പള്ളി, നെറ്റിയാട്, എടക്കുളം എന്നിവിടങ്ങളില്‍ 11 കെ വി ലൈനുകളില്‍ അറ്റകുറ്റപ്പണി നടക്കുന്നതിനാല്‍ ആഗസ്ത് 17 വ്യാഴാഴ്ച രാവിലെ 8 .30 മുതല്‍ വൈകീട്ട് 5 .30 വരെ വൈദ്യുതി മുടങ്ങുമെന്ന് അസി. എഞ്ചിനീയര്‍ അറിയിച്ചു.

ഇരിങ്ങാലക്കുടക്ക് അഭിമാനമായി എം സുകുമാരന്‍ ഡി.വൈ.എസ്.പിക്ക് പ്രസിഡന്റിന്റെ പോലീസ് മെഡല്‍

ഇരിങ്ങാലക്കുട : സ്വാതന്ത്ര്യദിനത്തോട് അനുബന്ധിച്ചു പ്രഖ്യാപിച്ച വിശിഷ്ട സേവനത്തിനുള്ള  പ്രസിഡന്റിന്റെ പോലീസ് മെഡലിന് ഇരിങ്ങാലക്കുട കാരുകുളങ്ങര സ്വദേശിയായ എം സുകുമാരന്‍ ഡി വൈ എസ് പി അര്‍ഹനായി. കണ്ണൂരിലെ ഡിസ്ട്രിക്ട് ക്രൈം റെക്കോര്‍ഡ് ബ്യുറോയില്‍ ആണ് ഇദ്ദേഹം ഇപ്പോള്‍ സേവനം അനുഷ്ഠിക്കുന്നത് . കൂടാതെ മികച്ച വിജിലെന്‍സ് കേസ് അന്വേഷത്തിനുള്ള ബാഡ്ജ് ഓഫ് ഹോണര്‍ അവാര്‍ഡും ഈ വര്‍ഷം ഇദ്ദേഹം നേടിയിട്ടുണ്ട്. ഭാര്യ ശോഭ , മക്കള്‍ ഗോകുല്‍ , രാഹുല്‍.

ഇന്ത്യന്‍ സ്വാതന്ത്ര്യത്തിനു വേണ്ടി ചെറുവിരല്‍ പോലും അനക്കാത്തവര്‍ നേതൃത്വം കൊടുക്കുന്ന ഭരണകൂട നീരാളി പിടുത്തത്തില്‍ ഇന്ത്യന്‍ ജനത വീര്‍പ്പുമുട്ടുന്നു – ആര്‍ ശശി

ഇരിങ്ങാലക്കുട : ബ്രിട്ടീഷുകാരില്‍ നിന്നും ഇന്ത്യയെ മോചിപ്പിക്കാന്‍ സ്വാതന്ത്ര്യസമര പ്രസ്ഥാനത്തിന്റെ രണവീഥികളില്‍ കമ്മ്യൂണിസ്റുകാര്‍ ഉള്‍പ്പെടെ ഒട്ടേറെ ധീര ദേശാഭിമാനികള്‍ ജീവന്‍ നഷ്ടപെടുത്തുവാനും ക്രൂരമായ ഭരണകൂട മര്‍ദ്ദനത്തിന് ഇരയാവുകയും ചെയ്തു. എന്നാല്‍ ഇന്ന് ഇന്ത്യ ഭരിക്കുന്നതിന് നേതൃത്വം നല്‍കുന്ന ആര്‍ എസ് എസ് ഉള്‍പ്പെടയുള്ള ഹിന്ദു സംഘടനകള്‍ രാജ്യത്തിനു വേണ്ടി പോരാടിയതായി ചരിത്രത്തില്‍ രേഖപ്പെടുത്തിയിട്ടില്ല . സ്വതന്ത്ര ഇന്ത്യ കണ്ട ഏറ്റവും ജനദ്രോഹ പരിപാടികളുമായി മോദി സര്‍ക്കാര്‍ മുന്നോട്ടു നീങ്ങുന്നു . സാധാരണക്കാരന്റെ ഭക്ഷണ കാര്യങ്ങളില്‍ ഇടപെടുകയും ക്രൂരമായി കൊലപ്പെടുത്തുകയും , സാമ്പത്തിക പ്രതിസന്ധി സൃഷ്ടിച്ച് നോട്ട് നിരോധനത്തെ മറികടക്കാന്‍ ധാന്യകൃഷി കര്‍ഷകര്‍ എടുത്ത വായ്പ തിരിച്ചടക്കല്‍, തിരിച്ചടക്കാന്‍ കഴിയാത്ത കര്‍ഷകര്‍ ആത്‍മഹത്യ ചെയേണ്ടി വരുക തുടങ്ങി ജനദ്രോഹ നടപടികളുടെ പരമ്പര തന്നെ ഇവിടെ കാണാനാകും. രാജ്യത്തിന്റെ 71 – ാം സ്വാതന്ത്ര്യദിനത്തോട് അനുബന്ധിച്ച് എ ഐ വൈ എഫിന്റെ നേതൃത്വത്തില്‍ സംഘപരിവാര്‍ ഫാസിസത്തിന് എതിരെ ഇരിങ്ങാലക്കുട മണ്ഡലത്തില്‍ സംഘടിപ്പിച്ച സമരഐക്യ സംഗമ പ്രകടനവും , പൊതു സമ്മേളനവും ഉദ്ഘാടനം ചെയ്തു സംസാരിക്കുകയായിരുന്നു സി പി ഐ സംസ്ഥാന കമ്മിറ്റി അംഗം ആര്‍ ശശി . സ്വാതന്ത്ര്യ സമര രണവീഥികളില്‍ കമ്മ്യൂണിസ്റ് പാര്‍ട്ടി വഹിച്ച പങ്ക് വളരെ വലുതാണ് .എ ഐ വൈ എഫ് മണ്ഡലം പ്രസിഡന്റ് ബിനോയ് അദ്ധ്യക്ഷത വഹിച്ചു. എ ഐ വൈ എഫ് ജില്ലാ സെക്രട്ടറി പ്രദീപ് കുമാര്‍ , സി പി ഐ ജില്ലാ എക്സിക്യൂട്ടീവ് അംഗം ടി കെ സുധീഷ്, മണ്ഡലം സെക്രട്ടറി പി മണി, ജില്ലാ ട്രഷറര്‍ കെ ശ്രീകുമാര്‍ , കെ സി ബിജു , അനിത രാധാകൃഷ്ണന്‍ , ടി ആര്‍ രമേശ്, സുധീര്‍ദാസ്  എന്നിവര്‍ സംസാരിച്ചു.

സ്വാതന്ത്ര്യദിനം സേവനദിനമാക്കി കാട്ടുങ്ങച്ചിറ ഫിനിക്സ് ക്ലബ്ബ്

ഇരിങ്ങാലക്കുട : പുത്തന്‍ തലമുറക്കു മാതൃകയായി സ്വാതന്ത്ര്യദിനം ആഘോഷിച്ച് കാട്ടുങ്ങച്ചിറ ഫീനിക്സ് ആര്‍ട്ട്സ് ആന്‍ഡ് സ്പോര്‍ട്സ് ക്ലബ്ബ് അംഗങ്ങള്‍. സ്വാതന്ത്ര്യദിനം സേവനദിനം കൂടിയാക്കി ഈ യുവാക്കള്‍ മാറ്റി എടുത്തു. ലിസ്യുസ് സ്കൂളിലേക്കുള്ള വഴി കാടു കയറി വിദ്യാര്‍ത്ഥികള്‍ ഉള്‍പ്പെടെയുള്ള കാല്‍നട യാത്രക്കാര്‍ക്ക് അപകടകരമായ അവസ്ഥയില്‍ ആയിരുന്നു. കാട്ടുങ്ങച്ചിറ സെന്റര്‍ മുതല്‍ ലിസ്യുസ് സ്കൂള്‍ വരെയുള്ള വഴിയാണ് ക്ലബ്ബ് അംഗങ്ങള്‍ വൃത്തിയാക്കിയത് . ഇരിങ്ങാലക്കുട വനിത സ്റ്റേഷന്‍ സബ് ഇന്‍സ്‌പെക്ടര്‍ ഉഷ പി ആര്‍ പതാക ഉയര്‍ത്തി സേവന പരിപാടി ഉദ്ഘാടനം ചെയ്തു. സേവന പ്രവര്‍ത്തനങ്ങള്‍ക്ക് ക്ലബ്ബ് പ്രസിഡന്റ് ശരത്ത് ദാസ് , സെക്രട്ടറി മുഹ്സിന്‍ കെ എം എന്നിവര്‍ നേതൃത്വം നല്‍കി.

സെന്‍ട്രല്‍ റോട്ടറി ക്ലബ് സ്പെഷ്യല്‍ സബ് ജയിലില്‍ സ്വാതന്ത്ര്യദിനം ആഘോഷിച്ചു

ഇരിങ്ങാലക്കുട : സെന്‍ട്രല്‍ റോട്ടറി ക്ലബ് സ്പെഷ്യല്‍ സബ് ജയിലില്‍ 71 – ാം സ്വാതന്ത്ര്യദിനം ആഘോഷിച്ചു. ഡെപ്യൂട്ടി പ്രിസണ്‍ കെ ജെ ജോണ്‍സണ്‍ ദേശീയപതാക ഉയര്‍ത്തി. സെന്‍ട്രല്‍ റോട്ടറി ക്ലബ് പ്രസിഡന്റ് പി ടി ജോര്‍ജ് സ്വാതന്ത്ര്യദിന സന്ദേശം നല്‍കി. ഡെപ്യൂട്ടി പ്രിസണ്‍ ഓഫീസര്‍ കെ ആര്‍ ആല്‍ബി, അസിസ്റ്റന്റ് പ്രിസണ്‍ ഓഫീസര്‍മാരായ കെ എം ആരിഫ് , പി എസ് ഷിബു , കെ വൈ ജിജോ, പി ജി ബിനോയ്, കെ സുമേഷ്, കെ ആര്‍ ആനന്ദ്, എ ബി രതീഷ്, റോട്ടറി അസിസ്റ്റന്റ് ഗവര്‍ണര്‍ രാജേഷ് മേനോന്‍, സെക്രട്ടറി രാജേഷ് കുമാര്‍, ഷാജു ജോര്‍ജ് , ടി പി സെബാസ്റ്റ്യന്‍, ഫ്രാന്‍സിസ് കോക്കാട്ട് , ടി ജെ പ്രിന്‍സ് , എന്നിവര്‍ സന്നിഹിതരായിരുന്നു. ഉദ്യോഗസ്ഥര്‍ക്കും ജയില്‍ അന്തേവാസികള്‍ക്കും മധുരം നല്‍കി സ്വാതന്ത്ര്യദിന ആഘോഷം പങ്കുവച്ചു.

ശാന്തിനികേതന്‍ പബ്ലിക് സ്കൂളില്‍ സ്വാതന്ത്ര്യ ദിനം ആഘോഷിച്ചു

ഇരിങ്ങാലക്കുട : ശാന്തിനികേതന്‍ പബ്ലിക് സ്കൂളില്‍ സ്വാതന്ത്ര്യദിന ആഘോഷങ്ങള്‍ നടന്നു. എസ് എന്‍ ഇ എസ് ചെയര്‍മാന്‍ കെ ആര്‍ നാരായണന്‍ പതാക ഉയത്തി. എസ് എന്‍ ഇ എസ് ഡയറക്ടര്‍ മേജര്‍ പി സി രാമകൃഷ്ണന്‍ വിദ്യാര്‍ത്ഥികള്‍ക്ക് സ്വാതന്ത്ര്യ ദിന സന്ദേശം നല്‍കി. പ്രിന്‍സിപ്പല്‍ ഹരീഷ് മേനോന്‍ , മാനേജര്‍ എം എസ് വിശ്വനാഥന്‍ , പി ടി എ പ്രസിഡന്റ് ലീന പ്രകാശ്, സവിത മോഹന്‍ എന്നിവര്‍ സംസാരിച്ചു. കെ ജി വിഭാഗം വിദ്യാര്‍ത്ഥികളുടെ നൃത്താവിഷ്കാരം , ഹൈസ്കൂള്‍ കുട്ടികളുടെ പ്രസംഗങ്ങള്‍, ടാബ്ലോ , സംഘ നൃത്തം , ടാബ്ലോ ചിത്രപ്രദര്‍ശനം , തുടങ്ങിയ കലാപരിപാടികള്‍ നടന്നു. സ്കൂള്‍ പാര്‍ലമെന്റിലേക്ക് തിരഞ്ഞെടുക്കപ്പെട്ട വിദ്യാര്‍ത്ഥികളുടെ സ്ഥാനാരോഹണ ചടങ്ങും നടന്നു.

സില്‍വര്‍ ജൂബിലിയുടെ നിറവില്‍ ഇരിങ്ങാലക്കുട ഭാരതീയ വിദ്യാഭവന്‍ സ്കൂളിന് ഐ എസ് ഒ സര്‍ട്ടിഫിക്കറ്റ്

നടവരമ്പ് : ഇരിങ്ങാലക്കുട ഭാരതീയ വിദ്യാഭവന്‍ വിദ്യ മന്ദിര്‍ സ്കൂളിന്റെ ഒരു വര്‍ഷം നീണ്ടു നില്‍ക്കുന്ന സില്‍വര്‍ ജൂബിലി ആഘോഷവും ഗുണനിലവാരത്തിനുള്ള അന്തര്‍ദേശിയ മാനദണ്ഡം അനുസരിച്ചുള്ള ഐ എസ് ഒ സര്‍ട്ടിഫിക്കറ്റ് സ്വീകരിക്കുന്ന ചടങ്ങും ആഗസ്ത് 19 ശനിയാഴ്ച 2 മണിക്ക് നടക്കുമെന്ന് ഭാരവാഹികള്‍ പത്രസമ്മേളനത്തില്‍ അറിയിച്ചു. കോലോത്തുംപടിയിലെ ഭാരതീയ വിദ്യാഭവന്‍ വിദ്യ മന്ദിര്‍ സ്കൂള്‍ അങ്കണത്തില്‍ സംഘടിപ്പിക്കുന്ന ചടങ്ങില്‍ കേരള കലാമണ്ഡലം വൈസ് ചാന്‍സിലര്‍ ഡോ. കെ ജി പൗലോസ് മുഖ്യാതിഥി ആയിരിക്കും. സ്കൂള്‍ ചെയര്‍മാന്‍ ഡോ .പോള്‍ ശങ്കുരിക്കല്‍ അദ്ധ്യക്ഷത വഹിക്കും. ഐ എസ് ഒ കണ്‍സള്‍റ്റന്‍റ് അഡ്വ. ജോര്‍ഫിന്‍ പെട്ട ഐ എസ് ഒ സര്‍ട്ടിഫിക്കറ്റ് ഡോ കെ ജി പൗലോസിന് നല്‍കും. വേളൂക്കര ഗ്രാമപഞ്ചായത്ത് പ്രസിഡന്റ് ഇന്ദിരാ തിലകന്‍ , എ എസ് മാധവന്‍ മേനോന്‍ , സി വി ആന്റണി, സ്മിത സജീവ് എന്നിവര്‍ ആശംസകള്‍ നേരും. പത്രസമ്മേളനത്തില്‍ സ്കൂള്‍ പ്രിന്‍സിപ്പല്‍ പ്രസന്നകുമാരി പി , പി ടി എ പ്രസിഡന്റ് എം സുകുമാര്‍ , സി നന്ദകുമാര്‍ , സജു എന്നിവര്‍ പങ്കെടുത്തു.

പീപ്പിള്‍സ് കോ ഓപ്പറേറ്റീവ് ബാങ്ക് സ്വാതന്ത്ര്യദിനം ആഘോഷിച്ചു

ഇരിങ്ങാലക്കുട : പീപ്പിള്‍സ് കോ ഓപ്പറേറ്റീവ് ബാങ്ക് (156 ) രാഷ്ട്രത്തിന്റെ 71- ാം സ്വാതന്ത്ര്യദിനം ആഘോഷിച്ചു. രാവിലെ 9 മണിക്ക് ബാങ്ക് പ്രസിഡന്റ് കെ സി ജോസ് കൊറിയന്‍ പതാക ഉയര്‍ത്തുകയും സ്വാതന്ത്ര്യദിന സന്ദേശം നല്‍കുകയും ചെയ്തു. വൈസ് പ്രസിഡന്റ് ജോസ് മാമ്പിള്ളി , സെക്രട്ടറി ഷെല്ലി എന്നിവര്‍ സംസാരിച്ചു.

Top
Close
Menu Title