News

തൃശൂര്‍ ജില്ലാ കുടുംബസംഗമം ലിവര്‍പൂളില്‍ വര്‍ണ്ണാഭമായി ആഘോഷിച്ചു

ലിവര്‍പൂള്‍:  ബ്രിട്ടനിലെ തൃശൂര്‍ ജില്ല സൗഹൃദവേദിയുടെ ആഭിമുഖ്യത്തില്‍ ലിവര്‍പൂളിലെ വിസ്റ്റനിലെ ടൗണ്‍ ഹാളില്‍ സംഘടിപ്പിച്ച നാലാമത് ജില്ലാ കുടുംബസംഗമം അവിസ്മരണീയമായാ കാഴ്ചയായി മാറി. ഇംഗ്ലണ്ടിന്റെ നോര്‍ത്തില്‍ ആദ്യമായി കൊണ്ടുവന്ന ജില്ലാ സംഗമത്തിനെ നോര്‍ത്തിലെ തൃശൂര്‍ ജില്ലക്കാര്‍ രണ്ടുകൈയ്യും നീട്ടി സ്വീകരിച്ചു. നോര്‍ത്തിലെ ജില്ലാനിവാസികളുടെ നിര്‍ലോഭമായ സഹായങ്ങള്‍ കൊണ്ടും സഹകരണങ്ങള്‍ കൊണ്ടും വളരെ വര്‍ണ്ണാഭമായ ഒരു പരിപാടിയായി മാറ്റുവാന്‍ സംഘാടകര്‍ക്ക് കഴിഞ്ഞു.  തൃശൂര്‍ ജില്ലക്കാരുടെ പരമ്പരാഗത ആചാരങ്ങളും അനുഷ്ഠാനങ്ങളും സംസ്‌കാരങ്ങളും ഒക്കെ പങ്കുവെയ്ക്കുന്ന ഒരു വേദിയായി മാറിയപ്പോള്‍ തൃശൂര്‍ പൂരത്തിന് ഒത്തുകൂടിയ ഒരു പ്രതീതിയാണ് വിസ്റ്റണ്‍ ടൗണ്‍ ഹാളില്‍ ഉണ്ടായത്. ഇംഗ്ലണ്ടിന്റെ നോര്‍ത്തില്‍ സ്ഥിരതാമസക്കാരായ തൃശ്ശൂര്‍ അതിരൂപതയില്‍ നിന്നുള്ള വൈദികനായ ഫാ.ലോനപ്പന്‍ അരങ്ങാശേരിയും ഇരിങ്ങാലക്കുട രൂപതയില്‍ നിന്നുള്ള വൈദികനായ ഫാ.ജിനോ അരീക്കാട്ടും ചേര്‍ന്ന് നാലാമത് കുടുംബസംഗമം നിലവിളക്കില്‍ ദീപം തെളിയിച്ചുകൊണ്ട് ഉദ്ഘാടനം ചെയ്തു. വിദേശരാജ്യത്ത് താമസിക്കുന്നവര്‍ക്ക് ഇതുപോലുള്ള പ്രാദേശിക കൂട്ടായ്മകള്‍ അടുത്ത തലമുറയ്ക്ക് നാടുമായുള്ള ബന്ധം ഊട്ടിയുറപ്പിക്കുതിന് വളരെയേറെ സഹായിക്കുമെന്നു ഫാ.ജിനോ അരീക്കാട്ട് പറഞ്ഞു. ബ്രിട്ടനിലെ തൃശൂര്‍ ജില്ലാ സൗഹൃദവേദിയുടെ പ്രസിഡന്റ് അഡ്വ.ജെയ്‌സണ്‍ ഇരിങ്ങാലക്കുട അധ്യക്ഷത വഹിച്ച യോഗത്തില്‍ സംഘടനയുടെ ട്രഷറര്‍ സണ്ണി ജേക്കബ് സ്വാഗതവും ജനറല്‍ സെക്രട്ടറി ജീസ പോള്‍ കടവി നന്ദിയും പറഞ്ഞു. ഈ കുടുംബസംഗമത്തിനു ഫാ.ലോനപ്പന്‍ അരങ്ങാശേരിയുടെയും ഫാ.ജിനോ അരീക്കാട്ടിലിന്റെയും സാന്നിധ്യം വലിയ ഒരു മുതല്‍ക്കൂട്ടായിരുന്നു .
കുടുംബങ്ങള്‍ തമ്മിലുള്ള പരിചയപ്പെടലിനുശേഷം തൃശൂര്‍ ജില്ലാ സൗഹൃദവേദി അംഗങ്ങളുടെ മക്കളുടെ കലാപരിപാടികള്‍ നടന്നു. കീര്‍ത്തന തെരസ്സാ കുറ്റിക്കാട്ട് അവതരിതപ്പിച്ച ഗിറ്റാര്‍ വാദ്യോപകരണം കൊണ്ടുള്ള മലയാള ചലച്ചിത്രഗാനങ്ങളും . സംഗീതത്തിന്റെ മാധുര്യം നല്‍കി ജോസഫ് ബിന്നിയും നൃത്തച്ചുവടുകളുമായി ജോ അന്ന ജീസനും പരിപാടികള്‍ അവതരിപ്പിച്ചു. ഈ കുടുംബസംഗമം
വന്‍വിജയമാക്കിത്തീര്‍ക്കുന്നതിന് വേണ്ടി സംഘടനയുടെ ട്രഷറര്‍ സണ്ണി ജേക്കബ്ബ് ,ഡോ പോള്‍, സ്വപ്ന സണ്ണി, ലിസ ജിജു എന്നിവരുടെ സഹായങ്ങള്‍ വളരെ വിലപ്പെട്ടതായിരുന്നു. റാഫില്‍ ടിക്കറ്റിന്റെ വിജയികള്‍ക്കുള്ള സമ്മാനങ്ങള്‍ ഫാ.ലോനപ്പന്‍ അരങ്ങാശേരിയും ഫാ.ജിനോ അരീക്കാട്ടും ചേര്‍ന്ന് സമ്മാനിച്ചു. കലാപരിപാടികള്‍ അവതരിപ്പിച്ച കുട്ടികള്‍ക്കുള്ള സമ്മാനം സംഘടനയുടെ ഭാരവാഹികളും മെമ്പര്‍മാരും ചേര്‍ന്ന് നല്‍കി.

 

പ്രവര്‍ത്തിക്കാത്ത അപകട മുന്നറിയിപ്പ് സംവിധാനത്തിനടുത്ത് വല്ലക്കുന്നില്‍ കാറും ഓട്ടോയും കൂട്ടിയിടിച്ചു

വല്ലക്കുന്ന് : സംസ്ഥാന പാതയിലെ സ്ഥിരം അപകട മേഖലയായ വല്ലക്കുന്നില്‍ വീണ്ടും അപകടം . സ്നേഹോദയ നഴ്സിംഗ് കോളേജിന് സമീപം ശനിയാഴ്ച രാത്രി 9 മണിക്കായിരുന്നു അപകടം. ഇരിങ്ങാലക്കുട നഗരസഭാ കൗണ്‍സിലര്‍ റോക്കി ആളൂക്കാരന്‍ യാത്ര ചെയ്തിരുന്ന സ്വിഫ്റ്റ് കാറിന്റെ പുറകില്‍ അമിതവേഗതയില്‍ മറികടക്കുകയായിരുന്നു പെട്ടി ഓട്ടോറിക്ഷ ഇടിക്കുകയായിരുന്നു. ചാലക്കുടിയില്‍നിന്നും വാടാനപ്പിള്ളിയിലേക്കു മീനും ഇറച്ചിയും കൊണ്ടുപോയിരുന്നു പെട്ടി ഓട്ടോറിക്ഷയാണ് ഇടിച്ചത്. അപകടത്തില്‍ ആര്‍ക്കും പരിക്കേറ്റില്ല . ഇരുവാഹനങ്ങള്‍ക്കും കേടുപാടുകള്‍ സംഭവിച്ചു. വല്ലക്കുന്ന് മേഖലയില്‍ വാഹനങ്ങളുടെ അമിത വേഗതയാണ് അപകടങ്ങള്‍ക്കു പ്രധാന കാരണം. മഴക്കാലമായതിനാല്‍ റോഡില്‍ നിലവാരത്തകര്‍ച്ചമൂലം ഇപ്പോള്‍ പലയിടത്തും കുഴികള്‍ രൂപപ്പെട്ടിട്ടുണ്ട്. ഇതും അപകടകരണമാകുന്നു. കേരളത്തില്‍ ഏറ്റവും കൂടുതല്‍ അപകടമുണ്ടാക്കുന്ന 100 മേഖലയില്‍ ഒന്നാണ് ഇവിടം. അതിനാല്‍ ഇവിടെ 7 വര്‍ഷങ്ങള്‍ക്കുമുന്‍പ് ബ്ലാങ്ക് സ്പോട്ട് ട്രീറ്റ്മെന്റ് അപകട മുന്നറിയിപ്പ് സംവിധാനം സ്ഥാപിച്ചിരുന്നു. സോളാറില്‍ പ്രവര്‍ത്തിക്കുന്ന മഞ്ഞ ബ്ലിങ്കിങ് അലെര്‍ട്ട് ലൈറ്റ് സിസ്റ്റം ആണിത്. എന്നാല്‍ യഥാസമയത്തെ അറ്റകുറ്റപണികള്‍ നടത്താതെ ബാറ്ററി കേടാവുകയും 2 വര്‍ഷത്തോളമായി പ്രവര്‍ത്തനരഹിതമാണ്, ഇതിനു സമീപമാണ് കഴിഞ്ഞദിവസം രാത്രിയിലെ അപകടവും നടന്നത്.

അടിയന്തിരാവസ്ഥ ജനാധിപത്യത്തെ മുകള്‍തട്ടില്‍ നിന്ന്‌ തകര്‍ക്കുകയായിരുന്നുവെങ്കില്‍ ഇപ്പോള്‍ ജനാധിപത്യത്തിന്റെ അടിവേരറുക്കുന്ന നവ ഫാസിസത്തിന്റെ കാലമാണ്‌ ഇന്ത്യയിലെന്ന്‌ കെഇഎന്‍ കുഞ്ഞഹമ്മദ്‌

ഇരിങ്ങാലക്കുട : അടിയന്തിരാവസ്ഥ ജനാധിപത്യത്തെ മുകള്‍തട്ടില്‍ നിന്ന്‌ തകര്‍ക്കുകയായിരുന്നുവെങ്കില്‍ ഇപ്പോള്‍ ജനാധിപത്യത്തിന്റെ അടിവേരറുക്കുന്ന നവ ഫാസിസത്തിന്റെ കാലമാണ്‌ ഇന്ത്യയിലെന്ന്‌ കെഇഎന്‍ കുഞ്ഞഹമ്മദ്‌. 2017 ല്‍ ഭരണകുടത്തിന്റെ സര്‍ക്കാര്‍ തന്നെ ജനാധിപത്യ വിരുദ്ധ പ്രവര്‍ത്തനങ്ങളുടെ കേന്ദ്രമായി തീരുകയാണ്‌.എസ്‌ എന്‍ ക്ലബ്ബ്‌ ഹാളില്‍ പുരോഗമന കലാ സാഹിത്യ സംഘം മേഖല കമ്മിറ്റിയും ഡിവൈഎഫ്‌ഐയും എസ്‌എഫ്‌ഐ യും സംയുക്തമായി സംഘടിപ്പിച്ച അടിയന്തിരാവസ്ഥ ഓര്‍മ്മയും താക്കീതും എന്ന സെമിനാര്‍ ഉദ്‌ഘാടനം ചെയ്‌ത്‌ സംസാരിക്കുകയായിരുന്നു അദ്ദേഹം. ക്ലാസിക്കല്‍ ഫാസിസത്തിനേക്കാള്‍ ഇന്ത്യയിലെ നവഫാസിസത്തിനുണ്ട്‌. ക്ലാസിക്കല്‍ ഫാസിസത്തിന്‌ ആവശ്യമില്ലാത്തതും നവ ഫാസിസത്തിന്‌ ആവശ്യവുമായ ജനങ്ങളുടെ പ്രതികരണശേഷി പരിശോധനയാണ്‌ നോട്ട്‌ നിരോധനവും സിപിഐ(എം) കേന്ദ്രകമ്മിറ്റി ഓഫിസ്‌ അക്രമവും കന്നുകാലി ചന്ത നിരോധനവും വഴി സംഘപരിവാര്‍ ലക്ഷ്യമിട്ടത്‌. മനുഷ്യരെ അപരരാക്കി ജാതിയുടെയും മതത്തിന്റെയും ഭാഷയുടെയും ലിംഗത്തിന്റെയും പേരില്‍ സംഘര്‍ഷമുണ്ടാക്കുകയാണ്‌ സംഘപരിവാര്‍ ലക്ഷ്യം. മനുഷ്യത്വത്തിന്റെ കാവല്‍ക്കാരനാവാന്‍ ഞങ്ങളുണ്ടെന്ന്‌ പ്രഖ്യാപനമാണ്‌ ജനാധിപത്യവാദികളില്‍ നിന്നും ഉയരേണ്ടത്‌. കെപി ദിവാകരന്‍ അധ്യക്ഷനായി. പ്രൊഫ കെയു അരുണന്‍ എംഎല്‍എ, പോള്‍ കോക്കാട്ട്‌ എന്നിവര്‍ സംസാരിച്ചു. ഡോ കെപി ജോര്‍ജ്‌ സ്വാഗതവും സിഡി സിജിത്ത്‌ നന്ദിയും പറഞ്ഞു. ദ ഫൈനല്‍ സൊല്യൂഷന്‍ എന്ന സിനിമ പ്രദര്‍ശിപ്പിച്ചു.

സ്നേഹഭവന്‍ ഡയറക്ടര്‍ ഫാ: ജോയ് വൈദ്യക്കാരന് നേരെ ബൈക്കിലെത്തിയ രണ്ടംഗ സംഘം ആക്രമണം നടത്തി

ഇരിങ്ങാലക്കുട : വൈദികന് നേരെ ആക്രമണം. ഇരിങ്ങാലക്കുട സ്നേഹ ഭവന്‍ ഡയറക്ടര്‍ ഫാ: ജോയ് വൈദ്യക്കാരന് നേരെയാണ് ബൈക്കിലെത്തിയ രണ്ടംഗ സംഘം ആക്രമണം നടത്തിയത്. ശനിയാഴ്ച വൈകിട്ട് ആറരയോടെയായിരുന്നു സംഭവം. ക്രൈസ്റ്റ് കോളേജ് റോഡിലുള്ള സ്നേഹഭവന്റെ വരാന്തയില്‍ നില്‍ക്കുമ്പോഴായിരുന്നു ആക്രമണമെന്ന് പറയുന്നു.കോട്ടിട്ടു കൊണ്ട് ബൈക്കില്‍ എത്തിയ രണ്ടംഗ സംഘത്തില്‍ ഒരാള്‍ ഇറങ്ങി ചെന്ന് ഇരുമ്പുവടി കൊണ്ട് ഫാ.ജോയിയുടെ കൈയ്യിലും കാലിലും അടിക്കുകയായിരുന്നു. ഉടന്‍ തന്നെ സംഘം ബൈക്കിലേറി പോയി. ആക്രമണത്തില്‍ ഫാ. eജായിയുടെ കാലിന് ഒടിവു സംഭവിച്ചിട്ടുണ്ടെന്ന് കരുതുന്നു.. ഇരിങ്ങാലക്കുട ജനറല്‍ ആശുപത്രയില്‍ പ്രാഥമിക ചികിത്സ നല്‍കിയ ശേഷം വിദഗ്ദ്ധ ചികിത്സയ്ക്കായി ഫാ.ജോയിയെ തൃശൂര്‍ അമല ആശുപതിയിലേക്ക് മാറ്റി.

നഗരസഭാ കൗണ്‍സിലറുടെ ഭര്‍ത്താവടക്കം 3 പേര്‍ മരുന്ന് മാലിന്യം പാടത്തു തള്ളിയ സംഭവത്തില്‍ അറസ്റ്റില്‍

ഇരിങ്ങാലക്കുട : പോട്ട മൂന്നുപീടിക റോഡില്‍ തൊമ്മാന പാടത്തും, ഊരകത്തും മുന്ന് ആഴ്ചകള്‍ക്കുമുമ്പ് അനധികൃതമായി മരുന്ന് മാലിന്യം നിക്ഷേപിച്ച സംഭവത്തില്‍ നഗരസഭാ കൗണ്‍സിലറുടെ ഭര്‍ത്താവടക്കം 3 പേര്‍ അറസ്റ്റില്‍. കേരള കോണ്‍ഗ്രസ് നേതാവും ഇരിങ്ങാലക്കുട നഗരസഭാ പതിനാറാം വാര്‍ഡ് കൗണ്‍സിലറുടെ ഭര്‍ത്താവുമായ ഗാന്ധിഗ്രാം സ്വദേശി തീതായി ഫ്രാന്‍സിസ് (40), പുല്ലൂര്‍ സ്വദേശികളായ കൊച്ചുകുളം ശ്രീരാഥ്‌ (26), മഠത്തില്‍ മനോജ് (35) എന്നിവരെ ഇരിങ്ങലക്കുട എസ് ഐ സുശാന്ത് ശനിയാഴ്ച അറസ്റ്റ് ചെയ്തു. രാത്രിയുടെ മറവില്‍ മരുന്ന് മാലിന്യം നിക്ഷേപിച്ച സംഭവത്തില്‍, നാട്ടുകാര്‍ നല്‍കിയ വിവരങ്ങള്‍ അനുസരിച്ച പോലീസും വേളൂക്കര ഹെല്‍ത്ത് ഡിപ്പാര്‍ട്മെന്‍റ്റും കൂടി നടത്തിയ പരിശോധനയില്‍ ഇരിങ്ങാലക്കുടയിലെ സി ഇ- ബയോടെക് എന്ന സ്ഥാപനത്തിലെ മരുന്നുകളാണെന്ന് തെളിയുകയും തുടര്‍ന്ന് ഈ കമ്പനിയെ കൊണ്ട് തന്നെ അവിടെ നിന്നും മാലിന്യം നീക്കിക്കുകയും അവരുടെ ഓഫീസില്‍ തന്നെ നിക്ഷേപിക്കുകയും ചെയ്തിരുന്നു. പ്രതികളെ അറസ്റ്റ് ചെയ്ത സംഘത്തില്‍ സീനിയര്‍ സി പി ഓ രഘു, സി പി ഓ മാരായ സുനില്‍, ബിനല്‍ എന്നിവര്‍ ഉണ്ടായിരുന്നു.

ഇരിങ്ങാലക്കുട കെ.എസ്.ആര്‍.ടി.സി സബ് ഡിപ്പോ അല്ലെന്ന് എം.എല്‍.എ കെ യു അരുണന്‍

ഇരിങ്ങാലക്കുട : ഇരിങ്ങാലക്കുടയിലെ കെ.എസ്.ആര്‍.ടി.സി സബ് ഡിപ്പോ അല്ലെന്നും വെറും ഓപ്പറേറ്റിംഗ് സെന്റര്‍ മാത്രമാണെന്നും എം.എല്‍.എ കെ യു അരുണന്‍. സബ് ഡിപ്പോ പദവിയും എ ടി ഒ പോസ്റ്റും വെറും സാങ്കേതികം മാത്രമാണെന്നും അദ്ദേഹം കൂട്ടിച്ചേര്‍ത്തു. ഇരിങ്ങാലക്കുട റസ്റ്റ് ഹൌസില്‍ ചേര്‍ന്ന അവലോകന മീറ്റിംഗില്‍ സംസാരിക്കുകയായിരുന്നു അദ്ദേഹം. എന്നാല്‍ സബ് ഡിപ്പോ അല്ലെന്ന എം എല്‍ എയുടെ പ്രസ്താവനയെ മീറ്റിംഗില്‍ ഉണ്ടായിരുന്ന ജീവനക്കാരുടെ ചില പ്രതിനിധികള്‍ എതിര്‍ത്തു. ചിലര്‍ അനുകൂലിക്കുകയും ചെയ്തു. ചില വര്‍ക്കിംഗ് അറേന്‍ജ്‌മെന്റിന്റെ ഭാഗമായാണ് കുറച്ചുമാസം ഒരു എ ടി ഓ പോസ്റ്റ് ഇവിടെ ഉണ്ടായിരുന്നെതെന്നും എം എല്‍ എ പറഞ്ഞു. സബ് ഡിപ്പോയാക്കി ഉയര്‍ത്തി എ ടി ഒ യുടെ പുതിയ തസ്തിക ഉണ്ടാക്കി എ ടി ഒ യെ നിയമിക്കുകയും ചെയ്യുകയും, ഒന്‍പത് മാസങ്ങള്‍ക്ക് മുന്‍പ് വിരമിച്ച എ ടി ഒ ക്ക് പകരം പുതിയ ആളെ നിയമിച്ചിട്ടില്ലന്നും കാണിച്ചു ഗതാഗത മന്ത്രിക്ക് നിവേദനം നല്‍കുമെന്ന മുന്‍ എം എല്‍ എ തോമസ് ഉണ്ണിയാടന്റെ പ്രസ്താവനയെ കുറിച്ചുള്ള ഇരിങ്ങാലക്കുട ലൈവ് ഡോട്ട് കോം പ്രതിനിധിയുടെ ചോദ്യത്തിന് മറുപടി പറയുകയായിരുന്നു പ്രൊഫ്. കെ യു അരുണന്‍ എം എല്‍ എ. ഇപ്പോള്‍ ഈ പ്രസ്താവന ഒരു പുതിയ വിവാദത്തിനു തിരികൊളുത്തിയിരിക്കുന്നു . കഴിഞ്ഞ കുറച്ചുനാളുകളായി ഇരിങ്ങാലക്കുടയിലെ കെ.എസ്.ആര്‍.ടി.സി സബ് ഡിപ്പോ ആണെന്ന ധാരണയിലായിരുന്നു എല്ലാവരും. 27 സര്‍വീസുകള്‍ ഉണ്ടായിരുന്ന ഇവിടെ ഇപ്പോള്‍ 23 സര്‍വീസുകള്‍ മാത്രമായി ചുരുങ്ങിയെന്നും, ഇരിങ്ങാലക്കുടയെ വെറും ഓപ്പറേറ്റിംഗ് സെന്റര്‍ മാത്രമായി ചുരുക്കാന്‍ ശ്രമം നടക്കുന്നതിന്റെ ഭാഗമാണിതെന്നും ജീവനക്കാര്‍ പറയുന്നു. എന്നാല്‍ ഇരിങ്ങാലക്കുട കെ.എസ്.ആര്‍.ടി.സി സബ് ഡിപ്പോ ആണെന്ന് ജനങ്ങളെ മുന്‍ എം എല്‍ എ തെറ്റിദ്ധരിപ്പിക്കുകയായിരുനെന്നും പ്രൊഫ്. കെ യു അരുണന്‍ ഇരിങ്ങാലക്കുട ലൈവ് ഡോട്ട് കോമിനോട് പറഞ്ഞു. കെ.എസ്.ആര്‍.ടി.സിയുടെ വെബ്‌സൈറ്റില്‍  ഇരിങ്ങലക്കുട ഓപ്പറേറ്റിംഗ് സെന്റര്‍ (കോഡ് 89) ആയിട്ടാണ് രേഖപെടുത്തിയിരിക്കുന്നത്. കേരളത്തിലെ നിലവിലെ 45 സബ് ഡിപ്പോയുടെ ലിസ്റ്റില്‍ ഇരിങ്ങാലക്കുടയില്ലതാനും.

പനി പ്രതിരോധക്യാമ്പ് നടത്തി

മാപ്രാണം : തളിയകോണം എസ്എന്‍ഡിപി ശാഖയുടെ ആഭിമുഖ്യത്തില്‍ പനി പ്രതിരോധ ക്യാമ്പ് നടത്തി. കുഴിക്കാട്ടുകോണം ഹോമിയോ ഡിസ്‌പെന്‍സറിയുടെ സഹായത്തോടെയാണ് ക്യാമ്പ് സംഘടപ്പിച്ചത്. ഹോമിയോ ഡോക്ടര്‍മാരായ ഡോ.സിനിജോയി, ഡോ.റോസ് ദീപ്തി എന്നിവരുടെ നേതൃത്വത്തിലാണ് രോഗപ്രതിരോധ ബോധവല്‍ക്കരണവും മരുന്നുവിതരണവും നടത്തിയത്. ക്യാമ്പില്‍ പങ്കെടുത്ത 890 പേര്‍ക്ക് പ്രതിരോധമരുന്നുകള്‍ വിതരണം ചെയ്തു. ശാഖ പ്രസിഡണ്ട് ഷാജുട്ടന്‍, സെക്രട്ടറി കെ.വി.രവീന്ദ്രന്‍ എന്നിവര്‍ ക്യാമ്പിന് നേതൃത്വം നല്‍കി.

ക്രൈസ്റ്റ് നഗര്‍ റസിഡന്റ് അസോസിയേഷന്‍ ഞാറ്റുവേല ആഘോഷത്തിന് തുടക്കം

ഇരിങ്ങാലക്കുട : ക്രൈസ്റ്റ് നഗര്‍ റസിഡന്റ് അസോസിയേഷന്‍ ഞാറ്റുവേല ആഘോഷത്തിന് , ക്രൈസ്റ്റ് കോളേജ് റോഡിന്‍റെ ഇരുവശങ്ങളിലും വൃക്ഷതൈകള്‍ നട്ടുകൊണ്ട് ക്രൈസ്റ്റ് കോളേജ് അദ്ധാപകനും പരിസ്ഥിതി പ്രവര്‍ത്തകുനുമായ ഫാ. ജോയ് പീനിക്കപറമ്പില്‍ നഗരസഭാ വാര്‍ഡ് കൗണ്‍സിലര്‍ ഫിലോമിനാ ജോയിക്ക് നല്‍കികൊണ്ട് ഉദ്ഘാടനം ചെയ്തു. റസിഡന്റ് അസോസിയേഷന്‍ അംഗങ്ങള്‍ക്ക് വൃക്ഷത്തൈകളും, വിത്തുവിതരണവും ഇതോടു അനുബന്ധിച്ചു ശനിയാഴ്ച രാവിലെ ഉണ്ടായിരുന്നു. ജൈവകൃഷിയുടെ പ്രവര്‍ത്തനങ്ങളും അസോസിയേഷന്‍ ആരംഭിച്ചിട്ടുണ്ട്. ക്രൈസ്റ്റ് നഗര്‍ റസിഡന്റ് അസോസിയേഷന്‍ പ്രസിഡന്റ് ജോണ്‍സന്‍ മാമ്പിള്ളി സെക്രട്ടറി സുധന്‍ എന്നിവര്‍ നേതൃത്വം നല്‍കി.

എക്സ്പെര്‍ട്ട് കമ്മീഷന്‍ പരിശോധനക്കെത്തിയപ്പോഴും നഗരസഭയുടെ പൊതു തോടുകളിലൂടെ സ്ഥാപനങ്ങള്‍ മലിനജലം ഒഴുക്കുന്നു

ഇരിങ്ങാലക്കുട : കോടതി നിര്‍ദേശം അനുസരിച്ച് ആരോഗ്യ വകുപ്പ് ജില്ലാ മെഡിക്കല്‍ ഓഫീസറുടെ നേതൃത്വത്തില്‍ എക്സ്പെര്‍ട്ട് കമ്മീഷന്‍ പരിശോധനക്കെത്തിയപ്പോഴും ഇരിങ്ങാലക്കുട നഗരസഭയുടെ പൊതു തോടുകളിലൂടെ മലിനജലം നിര്‍ബാധം ഒഴുകുന്നുണ്ടായിരുന്നു. ഇരിങ്ങാലക്കുട മുന്‍സിഫ് കോടതിയിലെ ഒ എസ് 294/12 നമ്പര്‍ കേസുമായി ബന്ധപ്പെട്ടായിരുന്നു പരിശോധന. മലിനജലത്തിന്റെ സ്രോതസ്സ് കണ്ടുപിടിക്കാനായി സമീപത്തെ ഹോട്ടലുകളുടെയും സ്ഥാപനങ്ങളുടെയും മുന്നിലെ കാനയുടെ സ്ലാബ്‌ പൊളിച്ചു നീക്കി പരിശോധന നടത്തി. ബസ്സ് സ്റ്റാന്‍ഡില്‍ നിന്നും കൂടല്‍മാണിക്യം റോഡിലെ ഇടതുവശത്തെ കാനയിലാണ് പരിശോധന ആരംഭിച്ചത്.

ആലേങ്ങാടന്‍ ജോണി ഭാര്യ റോസിലി (74) അന്തരിച്ചു

ഇരിങ്ങാലക്കുട : ആലേങ്ങാടന്‍ ജോണി ഭാര്യ റോസിലി (74) അന്തരിച്ചു. മക്കള്‍: സുമ മാത്യു, സുജ ജേക്കബ്ബ്, സിന്ധു ജോര്‍ജ്ജ്. മരുമക്കള്‍: മാത്യു ഒലക്കേങ്കില്‍, ജോക്കബ്ബ് ആലപ്പാട്ട്, ജോര്‍ജ്ജ് പുളിക്കല്‍. ശവസംസ്‌ക്കാര കര്‍മ്മം ഞായറാഴ്ച ഉച്ചതിരിഞ്ഞ് മൂന്നിന് ഇരിങ്ങാലക്കുട സെന്റ് തോമാസ് കത്തീഡ്രലില്‍ നടക്കും.

വായന മാസാചരണം : ഉപജില്ലാതല രചനാ മത്സരങ്ങളിലെ വിജയികള്‍

ഇരിങ്ങാലക്കുട : ഇരിങ്ങാലക്കുട വിദ്യാഭ്യാസ ഉപജില്ലാതലം വായന മാസാചരണത്തോടനുബന്ധിച്ച് യു പി, എച്ച് എസ് വിഭാഗത്തിലുള്ള കുട്ടികള്‍ക്ക് നടത്തിയ രചനാ മത്സരങ്ങളിലെ വിജയികള്‍. യു പി വിഭാഗം കവിതാരചനയില്‍ ഹന അമീന എം കെ (എല്‍ എഫ് സി എച്ച് എസ് എസ്, ഇരിങ്ങാലക്കുട), ഉത്രജ ഓ എസ്,(എല്‍ സി യു പി സ്കൂള്‍ ഇരിങ്ങാലക്കുട), ഉപന്യാസരചന: ദേവി നന്ദന ടി എം(എസ് എന്‍ ജി എസ് എസ്, എടക്കുളം) എന്നിവരും ഹൈസ്കൂള്‍ വിഭാഗം കവിതാരചനയില്‍ അനന്യ ഒ (ജി ജി എച്ച് എസ് എസ്, ഇരിങ്ങാലക്കുട), അശ്വതി കെ സുരേന്ദ്രന്‍ (ജി എം എച്ച് എസ് എസ്,നടവരമ്പ്), ഉപന്യാസരചനയില്‍ ഗോവിന്ദ് വി കര്‍ത്ത (എസ് കെ എച്ച് എസ് എസ്, ആനന്ദപുരം), ബിന്ധ്യ എ ബി (സെന്റ് മേരിസ് എച്ച് എസ് എസ്, ഐഎ ഇരിങ്ങാലക്കുട) യും അര്‍ഹരായി

മുരിയാട് ഞാറ്റുവേല മഹോത്സവത്തിന് തുടക്കമായി

മുരിയാട് : ആനന്ദപുരം റൂറല്‍ ബാങ്കിന്റെ മുരിയാട് ഞാറ്റുവേല മഹോത്സവത്തിന് മുരിയാട് എന്‍ഇആര്‍ ഗ്രൗണ്ടില്‍ തുടക്കമായി. ഇരിങ്ങാലക്കുട ബ്ലോക്ക് പഞ്ചായത്ത് പ്രതിപക്ഷ നേതാവ് തോമസ് തത്തംപിള്ളി ഉദ്ഘാടനം ചെയ്തു. ബാങ്ക് പ്രസിഡന്റ് ജോമി ജോണ്‍ അധ്യക്ഷത വഹിച്ചു. മുരിയാട് പഞ്ചായത്ത് സ്ഥിരം സമിതി അധ്യക്ഷ മോളി ജേക്കബ്, അംഗങ്ങളായ എ.എം. ജോണ്‍സന്‍, കെ.വൃന്ദകുമാരി, ജെസ്റ്റിന്‍ ജോര്‍ജ്‌, തോമസ് തൊകലത്ത്, കൃഷി ഓഫീസര്‍ റീസ മോള്‍ സൈമണ്‍, സെക്രട്ടറി കാഞ്ചന നന്ദനന്‍, ടി.വി. ചാര്‍ളി, ഐ.ആര്‍. ജെയിംസ്, ബാങ്ക് വൈസ് പ്രസിഡൻറ് കെ.കെ. ചന്ദ്രശേഖരന്‍, ബാങ്ക് ഡയറക്ടര്‍മാര്‍ എന്നിവര്‍ പ്രസംഗിച്ചു. വിവിധയിനം സസ്യ -ഫലവൃക്ഷങ്ങളുടെ പ്രദര്‍ശനവും വിപണനവും നാടന്‍ കലാരൂപങ്ങളുടെ അവതരണം, വിവിധ മത്സരങ്ങള്‍, കാര്‍ഷിക സെമിനാറുകള്‍, നാടന്‍ കാര്‍ഷിക ഉപകരണങ്ങളുടെ പ്രദര്‍ശനം, വിവിധ തരം ഭക്ഷ്യപദാര്‍ത്ഥങ്ങള്‍ എന്നിവ മേളയില്‍ ഒരുക്കിയിട്ടുണ്ട്. ഞാറ്റുവേലചന്ത ജൂണ്‍ 25 വരെ തുടരും.

കരുവന്നൂര്‍ ബാങ്കിന്റെ ആറാമത് ഞാറ്റുവേലചന്ത ആരംഭിച്ചു

കരുവന്നൂര്‍ : കരുവന്നൂര്‍ ബാങ്ക് നടത്തുന്ന ആറാമത് ഞാറ്റുവേലചന്ത ബാങ്ക് പ്രസിഡണ്ട് കെ.കെ. ദിവാകരന്‍ മാസ്റ്റര്‍ ഉദ്ഘാടനം ചെയ്തു. സെക്രട്ടറി ടി.ആര്‍ സുനില്‍കുമാര്‍ അദ്ധ്യക്ഷനായിരുന്നു. ബാങ്ക് സ്പര്‍ശ് വൈസ് ചെയര്‍മാന്‍ സി.കെ. ചന്ദ്രന്‍ ‘ഓണത്തിന് ഒരു മുറം പച്ചക്കറിയ്ക്കാവവ്യമായ തൈകള്‍ നല്‍കി. സ്കൂളുകളില്‍ ജൈവ വൈവിധ്യമൊരുക്കുന്നതിനു വേണ്ടി നക്ഷത്രവനം പൊറത്തിശ്ശേരി കൃഷി ഓഫീസര്‍ വി.വി സുരേഷ് വിതരണം നടത്തി. ടി.എസ്. ബൈജു സ്വാഗതവും എം.ബി. ദിനേഷ് നന്ദിയും രേഖപ്പെടുത്തി. ഞാറ്റുവേലചന്ത ജൂണ്‍ 29 വരെ തുടരും.

റോഡില്‍ വെള്ളക്കെട്ടിന് കാരണമായ മതില്‍ നാട്ടുകാര്‍ പൊളിച്ചു

ആനന്ദപുരം : നെല്ലായി – ആനന്ദപുരം റോഡില്‍ ആനന്ദപുരം ആഗസ്തി പടിയില്‍ സ്വാഭാവികമായി മഴവെള്ളം ഒഴുകി പോയിരുന്നത് തടസ്സപെടുത്തുന്ന രീതിയില്‍ സ്വകാര്യ വ്യക്തി മതില്‍ കെട്ടിയതിനെ തുടര്‍ന്ന് രൂക്ഷമായ വെള്ളക്കെട്ട് റോഡില്‍ രൂപപ്പെടുകയും, റോഡിലെ ഗര്‍ത്തം വെള്ളക്കെട്ടില്‍ കാണാനാവാതെ ഇരുചക്രവാഹനങ്ങളും യാത്രക്കാരും വീഴുകയും പതിവായി. നാട്ടുകാരുടെ നിരന്തര പരാതിയെ തുടര്‍ന്ന് മുരിയാട് പഞ്ചായത്ത് വാര്‍ഡ് മെമ്പര്‍ ടി.വി. വത്സന്റ നേതൃത്വത്തില്‍ നാട്ടുകാര്‍ മതില്‍ പൊളിച്ച് വ്യാഴാഴ്ച രാവിലെ വെള്ളo ഒഴുക്കി കളയുകയുണ്ടായി. പൊതുമരാമത്തു വകുപ്പ് മഴ മാറിയാല്‍ റോഡിലെ ഗട്ടറുകള്‍ ടാര്‍ ചെയ്യുമെന്ന് അറിയിച്ചിട്ടുണ്ടെന്നും മെമ്പര്‍ വത്സന്‍ പറഞ്ഞു.

മാളിയേക്കല്‍ വെള്ളാനിക്കാരന്‍ തോമസ്

ഇരിങ്ങാലക്കുട : മാളിയേക്കല്‍ വെള്ളാനിക്കാരന്‍ ദേവസ്സി മകന്‍ തോമസ്(61വയസ്സ്) വെള്ളിയാഴ്ച പുലര്‍ച്ചെ അന്തരിച്ചു. സംസ്കാരം ശനിയാഴ്ച. ഭാര്യ പൗളി, മക്കള്‍ ഡോ. എബിന്‍, അഖില .

Top
Menu Title