എസ്.എൻ പബ്ലിക് ലൈബ്രറിയുടെ ആഭിമുഖ്യത്തിൽ വിജയോത്സവം സംഘടിപ്പിച്ചു

ഇരിങ്ങാലക്കുട : എസ് എൻ പബ്ലിക് ലൈബ്രറിയുടെ ആഭിമുഖ്യത്തിൽ ഈ വർഷത്തെ എസ്എസ്എൽസി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർത്ഥികളെ ആദരിക്കുന്നതിനായി വിജയോത്സവം നടത്തി. ലൈബ്രറി ഹാളിൽ നടന്ന പരിപാടിയിൽ എസ് എൻ പബ്ലിക് ലൈബ്രറി പ്രസിഡണ്ട് ഡോ. സി കെ രവി അധ്യക്ഷത വഹിച്ചു.

വിദ്യാലയം പോലെ തന്നെ ലൈബ്രറിയും വിദ്യാർത്ഥികളുടെ വ്യക്തിത്വ രൂപീകരണത്തിനും ബൗദ്ധിക വികാസത്തിനും അനിവാര്യമാണ്. ക്ലാസ് റൂം പഠനപ്രക്രിയയോട് അനുബന്ധിച്ച് പുസ്തക വായനയും ചേർത്ത് പിടിക്കാൻ അധ്യാപകർ ജാഗ്രത കാണിക്കേണ്ടതാണ് എന്ന് ചടങ്ങിൽ പുരസ്കാരങ്ങൾ വിതരണം ചെയ്തുകൊണ്ട് അദ്ദേഹം പറഞ്ഞു.

എസ് എൻ ലൈബ്രറി സെക്രട്ടറി പി കെ ഭരതൻ മാസ്റ്റർ അനുഗ്രഹഭാഷണം നടത്തുകയുണ്ടായി. എസ് എൻ ഹയർ സെക്കൻഡറി സ്കൂൾ പ്രിൻസിപ്പാൾ സിൻല സി ജി ആശംസകൾ അർപ്പിച്ചു. പരീക്ഷകളിൽ ഉന്നത വിജയം നേടിയ ഗായത്രി കെ എസ്, അസ്ന വി എ, ലക്ഷ്മിപ്രിയ സതീഷ്, കെ ആർ ദേവദത്തൻ എന്നിവർ പുരസ്കാരങ്ങൾ ഏറ്റുവാങ്ങി

ലൈബ്രേറിയൻ മഞ്ജുള കെ കെ, എക്സിക്യൂട്ടീവ് അംഗം ഷീന ഇ എം, എസ് എൻ വിദ്യാലയ സമുച്ചയങ്ങളിലെ അധ്യാപകർ വിദ്യാർത്ഥികൾ എന്നിവരും ചടങ്ങിൻ്റെ ഭാഗമായി. ഹയർ സെക്കൻഡറി വിഭാഗം അധ്യാപകൻ ഡോ. രാഗേഷ് എസ് ആർ സ്വാഗതവും ലൈബ്രറി ജോയിൻ സെക്രട്ടറി പി കെ അജയഘോഷ് നന്ദിയും രേഖപ്പെടുത്തി.