കാട്ടൂർ ഗവ. ഹയർ സെക്കൻഡറി സ്കൂളിൽ പുതിയ കെട്ടിടത്തിന് 2 കോടി രൂപയുടെ ഭരണാനുമതി : മന്ത്രി ഡോ ആർ ബിന്ദു

കാട്ടൂർ : ഇരിങ്ങാലക്കുട നിയോജക മണ്ഡലത്തിലെ കാട്ടൂർ ഗവ ഹയർ സെക്കൻഡറി സ്കൂളിൽ പുതിയ കെട്ടിടം നിർമ്മിക്കുന്നതിന് രണ്ട് കോടി രൂപയുടെ ഭരണാനുമതി ലഭ്യമായതായി ഉന്നതവിദ്യാഭ്യാസ – സാമൂഹ്യനീതി വകുപ്പ് മന്ത്രി ഡോ ആർ ബിന്ദു അറിയിച്ചു.

പൊതുവിദ്യാഭ്യാസ വകുപ്പിന്റെ 2025 – 26 വർഷത്തെ പ്ലാൻ ഫണ്ടിൽ ഉൾപ്പെടുത്തിയാണ് തുക വകയിരുത്തിയിരിക്കുന്നത്. ഇരിങ്ങാലക്കുട നിയോജകമണ്ഡലത്തിലെ പൊതുവിദ്യാഭ്യാസ രംഗത്തെ സമഗ്ര പുരോഗതിയിലേക്ക് നയിക്കുക എന്ന ലക്ഷ്യത്തിന്റെ ഭാഗമായാണ് സ്കൂൾ കെട്ടിടത്തിന്റെ നിർമ്മാണത്തിന് തുക അനുവദിപ്പിച്ചതെന്നും ഇനിയും ഇരിങ്ങാലക്കുടയിലെ പൊതുവിദ്യാഭ്യാസരംഗത്ത് നിരവധി വികസന പ്രവർത്തികൾ കൊണ്ടുവരുമെന്നും മന്ത്രി ആർ ബിന്ദു പറഞ്ഞു. സാങ്കേതിക അനുമതി കൂടി ലഭ്യമാക്കി ഉടൻ നിർമ്മാണ പ്രവൃർത്തികൾ ആരംഭിക്കുമെന്നും മന്ത്രി പറഞ്ഞു.