“സുവർണ്ണ”ത്തിൽ അഡ്വ. കെ കെ തമ്പാൻ, അഡ്വ. കെ ആർ തമ്പാൻ അനുസ്മരണം നടത്തി

ഇരിങ്ങാലക്കുട : ഡോക്ടർ കെ എൻ പിഷാരടി സ്മാരക കഥകളി ക്ലബ്ബിന്റെ ഒരുവർഷം നീണ്ടുനില്ക്കുന്ന സുവർണ്ണജൂബിലി ആഘോഷപരമ്പരയുടെ ഭാഗമായി ഇരിങ്ങാലക്കുടയിലെ സാംസ്കാരിക സാമൂഹികരംഗത്ത് വലിയ സംഭാവനകൾ നല്കിയ അഡ്വക്കേറ്റ് കെ കെ തമ്പാനേയും അഡ്വക്കേറ്റ് കെ ആർ തമ്പാനേയും അനുസ്മരിച്ചു.

മുനിസിപ്പൽ ടൗൺ ഹാളിൽ ഒരുക്കിയ അനുസ്മരണപരിപാടിയിൽ ക്ലബ്ബ് ഭരണസമിതിയംഗം റഷീദ് കാറളം നടത്തിയ ആമുഖത്തെ തുടർന്ന് അഡ്വക്കേറ്റ് രഞ്ജിത്ത് തമ്പാൻ ഭദ്രദീപം തെളിയിക്കുകയും, മീര തമ്പാൻ ഓർമ്മകൾ പങ്കുവക്കുകയും ചെയ്തു. ടി ആർ ദാമോദരൻ നമ്പ്യാർ അനുസ്മരണപ്രഭാഷണം നടത്തി. “സംഗമഗ്രാമത്തിന്റെ സാംസ്കാരികപൈതൃകസ്വത്തിൽ ഭരണസിരാകേന്ദ്രത്തിന്റെ ഇടപെടലുകളും, ഇടർച്ചകളും, പരിഹാരങ്ങളും” എന്ന വിഷയത്തെ അധികരിച്ച് യുവകലാസാഹിതി സംസ്ഥാന രക്ഷാധികാരി ഇ എം സതീശൻ, സ്മാരകപ്രഭാഷണം നടത്തി.

“സുവർണ്ണ”ത്തിന്റെ ഭാഗമായി “കെ പി എസ് മേനോനും രംഗകലകളും” എന്ന വിഷയത്തെ ആസ്പദമാക്കി നടന്ന സെമിനാറിൽ പ്രശസ്ത കൂടിയാട്ട ആചാര്യൻ വേണുജി, കേരള കലാമണ്ഡലം ഡീനും ഭരണസമിതിയംഗവുമായ ഡോക്ടർ എൻ അജയകുമാർ എന്നിവരുടെ പ്രഭാഷണങ്ങൾ നടന്നു. “നളചരിതം രണ്ടാംദിവസം കഥയുടെ കാണാപ്പുറങ്ങൾ” എന്ന വിഷയത്തെക്കുറിച്ച് പ്രശസ്ത കലാനിരൂപകൻ കെ ബി രാജ് ആനന്ദ് ആമുഖപ്രഭാഷണവും തുടർന്ന് നളചരിതം രണ്ടാംദിവസം കഥകളിയും അരങ്ങേറി.

കലാമണ്ഡലം കൃഷ്ണകുമാർ (നളൻ), ചമ്പക്കര വിജയകുമാര്‍ (ദമയന്തി), ഹരി ആർ നായർ (കലി), ശ്രീരാമൻ (ദ്വാപരൻ), ആഷിക് (ഇന്ദ്രൻ), ഷൺമുഖദാസ് (പുഷ്കരൻ), കലാനിലയം സൂരജ് (മന്ത്രി), അജയ് (കാള), കലാമണ്ഡലം മനോജ് കുമാർ (കാട്ടാളൻ) എന്നിവർ വേഷമിട്ടു. കലാമണ്ഡലം ജയപ്രകാശ്, വിനോദ്, തൃപ്പൂണിത്തുറ അർജ്ജുൻരാജ്, വൈക്കം വിഷ്ണുദേവ് എന്നിവർ സംഗീതത്തിലും, കലാമണ്ഡലം കൃഷ്ണദാസ്, കലാനിലയം രതീഷ്, ദീപക് എന്നിവർ ചെണ്ടയിലും, സദനം ഭരതരാജൻ, കലാനിലയം പ്രകാശൻ, ആർഎൽവി ജിതിൻ എന്നിവർ മദ്ദളത്തിലും പശ്ചാത്തലമേളമൊരുക്കി. കലാമണ്ഡലം സുധീഷ്, ധഗിൻ എന്നിവർ ചുട്ടികുത്തി. ഊരകം നാരായണൻ നായർ, ചേർത്തല ശ്രീരാജ്, നാരായണൻകുട്ടി, ശ്യാംമനോഹർ എന്നിവർ അണിയറ സഹായികളായി. ഇരിങ്ങാലക്കുട രംഗഭൂഷ ചമയമൊരുക്കി.