സ്വകാര്യ ബസ് സൂചന പണിമുടക്ക് പൂർണ്ണം, ഇരിങ്ങാലക്കുടയിൽ കെഎസ്ആർടിസി സർവീസ് നടത്തി – അഖിലേന്ത്യ പണിമുടക്കിൽ നാളെയും ബസ് സർവീസ് മുടങ്ങാൻ സാധ്യത

ഇരിങ്ങാലക്കുട ; സ്വകാര്യ ബസ്സുകൾ സർവീസ് നിർത്തിവെച്ച് നടത്തുന്ന സൂചന പണിമുടക്ക് ഇരിങ്ങാലക്കുടയിലും പൂർണം. വിവിധ ആവശ്യങ്ങൾ ഉന്നയിച്ചു ബസ്സുടമ സംയുക്ത സമിതി നടത്തുന്ന സൂചന പണിമുടക്കിനു ശേഷം തീരുമാനമായില്ലെങ്കിൽ ജൂലൈ 22 മുതൽ അനിശ്ചിതകാലത്തേക്ക് സർവീസ് നിർത്തിവയ്ക്കും എന്നും അറിയിച്ചിട്ടുണ്ട്.

ഇരിങ്ങാലക്കുട ബസ് സ്റ്റാൻഡിൽ രാവിലെ മുതൽ കെഎസ്ആർടിസി ബദൽ സംവിധാനം ഏർപ്പെടുത്തിയിരുന്നു. യാത്രക്കാരുടെ ആവശ്യം പരിഗണിച്ച് വിവിധ മേഖലകളിലേക്ക് 4 ബസ്സുകൾ ഇരിങ്ങാലക്കുട കെഎസ്ആർടിസി ഡിപ്പോയിൽ നിന്ന് അനുവദിച്ചിട്ടുണ്ട്. നിലവിൽ സർവീസ് നടത്തുന്ന ബസുകൾക്ക് പുറമെ ആണിത്. തൃശ്ശൂർ കൊടുങ്ങല്ലൂർ ചാലക്കുടി റൂട്ടുകളിൽ ബസ്സുകൾ ഓടിയിരുന്നു.

ഇതിനുപുറമെ തൃശൂർ കൊടുങ്ങല്ലൂർ ഡിപ്പുകളിൽ നിന്നുള്ള കെഎസ്ആർടിസി ബസുകളും ഇരിങ്ങാലക്കുട ബസ് സ്റ്റാൻഡ് വഴി കടന്നുപോയി. സൂചന പണിമുടക്ക് ഉണ്ടെന്നറിഞ്ഞ് യാത്രക്കാർ പൊതുവേ കുറവായിരുന്നു. ഇരിങ്ങാലക്കുടയിലെ വിദ്യാഭ്യാസ സ്ഥാപനങ്ങളിൽ അധ്യായനം നടന്നിട്ടില്ല. സർക്കാർ സ്വകാര്യസ്ഥാപനങ്ങൾ പ്രവർത്തിച്ചു.

നാളെ നടക്കുന്ന അഖിലേന്ത്യ പണിമുടക്കിൽ കെഎസ്ആർടിസിയിലെ യൂണിയനകൾ പങ്കെടുക്കുന്നുണ്ട്, ബസ്സുകൾ ഓടാൻ സാധ്യത ഇല്ല എന്നാണ് അറിവ്.