ബി.വി.എം.എച്ച്.എസ് കല്ലേറ്റുംകരയിലെ മാതൃക പദ്ധതിയായ ഏഴാം സാന്ത്വന ഭവനം താക്കോൽ കൈമാറ്റം ചടങ്ങ് വെള്ളിയാഴ്ച

കല്ലേറ്റുംകര : പഠനപ്രവർത്തനങ്ങൾക്കൊപ്പം തികഞ്ഞ സാമൂഹ്യ പ്രതിബദ്ധതയോടെ പൊതു സമൂഹവുമായി എന്നും ചേർന്നു പ്രവർത്തിക്കുന്ന കല്ലേറ്റുംകരയിലെ ബി വി എം എച്ച് എസ് വിദ്യാലയത്തിലെ 2012 മുതൽ തുടർന്ന് വരുന്ന മാതൃക പദ്ധതിയായ ‘സാന്ത്വന ഭവന പദ്ധതി’ പ്രകാരം ഒരുക്കിനല്കുന്ന ഏഴാം സാന്ത്വന ഭവനത്തിന്റെ താക്കോൽ കൈമാറ്റം ഫെബ്രുവരി 21 വെള്ളിയാഴ്ച നടക്കും.

ഈ പദ്ധതിക്കു കീഴിൽ വിദ്യാലയത്തിലെ നിർധനരായ 6 വിദ്യാർത്ഥികൾക്ക് ഇതിനോടകം സുരക്ഷിത ഭവനങ്ങൾ ഒരുക്കി നൽകിയിട്ടുണ്ട്. 7-ാം സാന്ത്വന ഭവനത്തിൻ്റെ താക്കോൽ കൈമാറ്റത്തിന് വെള്ളിയാഴ്ച 2 മണിക്ക് പഞ്ഞപ്പിള്ളി കമ്മ്യൂണിറ്റി ഹാളിൽ നടക്കുന്ന ചടങ്ങിൽ വിദ്യാലയത്തിലെ ഒൻപതാം ക്ലാസ്സിലേയും ആറാം ക്ലാസ്സിലേയും കുട്ടികൾക്കാണ് ഇക്കുറി താക്കോൽ കൈമാറുന്നത്.

സ്കൂൾ മാനേജർ വർഗീസ് പന്തല്ലൂക്കാരൻ അദ്ധ്യക്ഷത വഹിക്കുന്ന സമ്മേളനത്തിൽ ആളൂർ ഗ്രാമപഞ്ചായത്ത് പ്രസിഡൻ്റ് കെ ആർ ജോജോ ഉദ്‌ഘാടനവും യുവ സിനി ആർട്ടിസ്റ്റ് ഗബ്രി ജോസ് മുഖ്യാതിഥി ആയിരിക്കുമെന്ന് വാർത്താ സമ്മേളനത്തിൽ സംഘടകർ അറിയിച്ചു.

2024 എസ്.എസ്.എൽ സി ബാച്ചിലെ സമ്പൂർണ A+ കരസ്ഥമാക്കിയവർക്ക് പന്തല്ലൂക്കാരൻ ജോൺസൺ തുടർച്ചയായി നല്കിക്കൊണ്ടിരിക്കുന്ന ക്യാഷ് അവാർഡ് ഇരിങ്ങാലക്കുട വിദ്യാഭ്യാസ ജില്ലാ ഓഫീസർ ഷൈലജ വിതരണം ചെയ്യുന്നു. കല്ലേറ്റുകേര ഉണ്ണിമിശിഹാ പള്ളി ഇടവക വികാരി ഡോ. സെബാസ്റ്റ്യൻ പഞ്ഞിക്കാരൻ, കല്ലേറ്റുംകര ജുമാമസ്ജിദ് ചീഫ് ഇമാം കുഞ്ഞുമുഹമ്മദ് മളാഹിരി, ഇരിങ്ങാടപ്പിള്ളി മന അംഗം രാജ് കുമാർ നമ്പൂതിരി എന്നിവർ അനുഗ്രഹ പ്രഭാഷണം നടത്തും.

ഇരിങ്ങാലക്കുട പ്രസ് ക്ലബ്ബിൽ നടന്ന വാർത്താ സമ്മേളനത്തിൽ സ്കൂൾ മാനേജർ വർഗീസ് പന്തല്ലൂക്കാരൻ, പ്രധാന അദ്ധ്യാപകൻ അബ്ദുൽ ഹമീദ് എ, പി ടി എ പ്രസിഡണ്ട് കെ എ ജോൺസൺ, സ്വാന്തന ഭാവന പദ്ധതി കൺവീനർ റിനി റാഫേൽ കെ,സ്റ്റാഫ് പ്രതിനിധി ഷൈന എൻ എ എന്നിവർ പങ്കെടുത്തു.