ആദ്യ ചിത്രത്തിലൂടെ ഫിലിം ക്രിട്ടിക്‌സ് പുരസ്‌കാരം; മലയാള സിനിമയില്‍ സംവിധാന മികവറിയിച്ച് പ്രവാസി വ്യവസായി ഷാജു വാലപ്പന്‍

ഇരിങ്ങാലക്കുട : പ്രവാസ ലോകത്തുനിന്ന് മലയാള സിനിമയിലേക്ക് കടന്നുവന്ന്, ആദ്യ സംവിധാന സംരംഭത്തിലൂടെ തന്നെ സംസ്ഥാന തലത്തില്‍ ശ്രദ്ധേയനായി കല്ലേറ്റുംകര സ്വദേശി പ്രവാസി വ്യവസായി ഷാജു വാലപ്പന്‍. വാലപ്പന്‍ ക്രിയേഷന്‍സിന്റെ ബാനറില്‍ അദ്ദേഹം നിര്‍മ്മിച്ച് സംവിധാനം ചെയ്ത ‘നിഴല്‍ വ്യാപാരികള്‍’ എന്ന ചിത്രത്തിനാണ് മികച്ച നവാഗത സംവിധായകനുള്ള ഈ വര്‍ഷത്തെ കേരള സംസ്ഥാന ഫിലിം ക്രിട്ടിക്‌സ് പുരസ്‌കാരം ലഭിച്ചത്. ഒരു പ്രവാസി വ്യവസായിയില്‍ നിന്നും സാമൂഹിക പ്രതിബദ്ധതയുള്ള ഒരു ചലച്ചിത്രകാരനിലേക്കുള്ള അദ്ദേഹത്തിന്റെ ചുവടുവെപ്പിന് ലഭിച്ച ഏറ്റവും വലിയ അംഗീകാരമാണിത്.

ഒരു ദളിത് യുവാവിന്റെ അതിജീവനത്തിന്റെയും പോരാട്ടത്തിന്റെയും വൈകാരികമായ കഥ പറയുന്ന ‘നിഴല്‍ വ്യാപാരികള്‍’, ആധുനിക ഇന്ത്യയുടെ നേര്‍ചിത്രമാണെന്ന് പുരസ്‌കാര നിര്‍ണ്ണയ വേളയില്‍ ജൂറി വിലയിരുത്തി. ഉന്നത വിദ്യാഭ്യാസം നേടിയിട്ടും സമൂഹത്തില്‍ നിന്നും അവഗണന നേരിടേണ്ടി വരുന്ന ഒരു ദളിത് യുവാവ്, സമൂഹത്തിലെ അഴിമതിക്കും മായം ചേര്‍ക്കലിനുമെതിരെ നടത്തുന്ന ഒറ്റയാള്‍ പോരാട്ടമാണ് ചിത്രം വരച്ചുകാട്ടുന്നത്. കേവലം ഒരു ത്രില്ലര്‍ എന്നതിലുപരി, സമൂഹത്തില്‍ ഇന്നും നിലനില്‍ക്കുന്ന ജാതി വിവേചനങ്ങളുടെ ഇരുണ്ട കോണുകളിലേക്ക് വെളിച്ചം വീശുന്ന ഈ ചലച്ചിത്ര ശ്രമം നേരത്തെ തന്നെ ഏറെ നിരൂപക പ്രശംസ പിടിച്ചുപറ്റിയിരുന്നു.

സംസ്ഥാന തലത്തില്‍ ലഭിച്ച ഈ വലിയ അംഗീകാരത്തിന് മുന്‍പേ തന്നെ ‘നിഴല്‍ വ്യാപാരികള്‍’ രാജ്യാന്തര തലത്തിലും വലിയ നേട്ടങ്ങള്‍ സ്വന്തമാക്കിയിരുന്നു. പ്രശസ്തമായ രാജസ്ഥാന്‍ ഇന്റര്‍നാഷണല്‍ ഫിലിം ഫെസ്റ്റിവലിലും (RIFF), തലസ്ഥാനത്ത് വെച്ച് നടന്ന 11-ാമത് സത്യജിത്ത് റേ ഗോള്‍ഡന്‍ ആര്‍ക്ക് അവാര്‍ഡിലും മികച്ച നവാഗത സംവിധായകനുള്ള പുരസ്‌കാരങ്ങള്‍ ഷാജു വാലപ്പനെ തേടിയെത്തിയിരുന്നു. ഈ തുടര്‍ച്ചയായ പുരസ്‌കാര നേട്ടങ്ങള്‍ അദ്ദേഹത്തിന്റെ കലാപരമായ മികവിനുള്ള അടിവരയാണ്.
ദീര്‍ഘകാലമായി പ്രവാസിയായ ഷാജു വാലപ്പന്‍, കലയോടുള്ള അടങ്ങാത്ത അഭിനിവേശം കൊണ്ടാണ് ചലച്ചിത്ര നിര്‍മ്മാണ-സംവിധാന രംഗങ്ങളിലേക്ക് കടന്നുവന്നത്.

ചുരുങ്ങിയ കാലം കൊണ്ടുതന്നെ മലയാള ചലച്ചിത്ര ലോകത്ത് തന്റെ വ്യക്തമായ സാന്നിധ്യം ഉറപ്പിക്കാന്‍ അദ്ദേഹത്തിന് കഴിഞ്ഞു.വാലപ്പന്‍ ക്രീയേഷന്‌സ് നിര്‍മ്മിച്ച സ്വാലിഹ് എന്ന സിനിമ മികച്ച സാമൂഹ്യ പ്രസക്തിയുള്ള സിനിമയായും ,സിദ്ധിക്ക് പറവൂര്‍ മികച്ച സംവിധായകനായും തെരഞ്ഞെടുക്കപ്പെട്ടു . വാലപ്പന്‍ ക്രീയേഷന്‌സ് നിര്‍മ്മിച്ച ‘സ്വാലിഹ്’ എന്ന സിനിമ മികച്ച സാമൂഹ്യ പ്രസക്തിയുള്ള സിനിമയായും ,സിദ്ധിക്ക് പറവൂര്‍ മികച്ച സംവിധായകനായും തെരഞ്ഞെടുക്കപ്പെട്ടു.

തന്റെ ആദ്യ ചിത്രത്തിന്റെ വലിയ വിജയത്തിന് പിന്നാലെ, പ്രവാസികളായ കലാകാരന്മാര്‍ക്കും സാങ്കേതിക പ്രവര്‍ത്തകര്‍ക്കും കൂടുതല്‍ അവസരങ്ങള്‍ നല്‍കിക്കൊണ്ട്, പുതിയൊരു ചലച്ചിത്രം ഒരുക്കാനുള്ള പണിപ്പുരയിലാണ് ഷാജു വാലപ്പന്‍ ഇപ്പോള്‍. വാലപ്പന്‍ ക്രിയേഷന്‍സിന്റെ ബാനറില്‍ ഉടന്‍ തന്നെ ഈ പുതിയ ചിത്രത്തിന്റെ പ്രഖ്യാപനമുണ്ടാകുമെന്നാണ് സൂചന.