“കൂട്ടുകാരിക്കൊരു കരുതൽ ” പദ്ധതിയുമായി ഇരിങ്ങാലക്കുട ഗവ. മോഡൽ ബോയ്സ് വി.എച്ച്.എസ്.ഇ വിഭാഗം എൻ.എസ്.എസ് വൊളന്റിയേഴ്സ്

ഇരിങ്ങാലക്കുട : ഗവ മോഡൽ ബോയ്സ് വി.എച്ച്.എസ്.ഇ വിഭാഗം നാഷണൽ സർവ്വീസ് സ്കീമിന്റെ ആഭിമുഖ്യത്തിൽ “കൂട്ടുകാരിക്കൊരു കരുതലൽ ” പരിപാടിയുടെ ഭാഗമായി നിർധന കുടുംബത്തിന് ഒരു സ്ഥിരവരുമാനം സംഘടിപ്പിച്ചു നൽകുന്നതിലേക്കായി തയ്യൽ മെഷീനും സാന്ത്വന സ്പർശം പരിപാടിയുടെ ഭാഗമായി ഇരിഞ്ഞാലക്കുട ആൽഫാ പെയിൻ ആൻ്റ് പാലിയേറ്റീവിന് വാക്കറും കൈമാറുന്ന ചടങ്ങിൻ്റെ ഉത്ഘാടനം ഇരിഞ്ഞാലക്കുട നഗരസഭാ ചെയർപേഴ്സൺ ശ്രീമതി. മേരിക്കുട്ടി ജോയ് നിർവ്വഹിച്ചു.

പി ടി എ പ്രസിഡൻ്റ് ഭക്തവത്സലൻ അധ്യക്ഷത വഹിച്ച ചടങ്ങിൽ പ്രിൻസിപ്പാൾ രാജലക്ഷ്മി. ആർ, എൻ എസ് എസ് പ്രോഗ്രാം ഓഫീസർ ലസീദ എം.എ ആൽഫാ പെയിൻ ആന്റ് പാലിയേറ്റീവ് നഴ്സ് ഷൈനി, സുബിത, വൊളൻ്റിയർ ലീഡർ അനന്യ എം.എസ് എന്നിവർ സംസാരിച്ചു.

എൻ എസ് എസ് വൊളന്റിയേഴ്സ് തങ്ങളുടെ റെഗുലർ പ്രവർത്തനങ്ങളുടെ ഭാഗമായി നടത്തിയ സ്വാന്ത്വന കുടുക്ക പദ്ധതി, ഭക്ഷ്യമേള, ഐസ്ക്രീം,ന്യൂസ് പേപ്പർ,ദോത്തി, ഉപ്പേരി , ബിരിയാണി, ഹാൻഡ് വാഷ് എന്നിങ്ങനെ വിവിധ ചലഞ്ചുകളും നടത്തിയാണ് തയ്യൽ മെഷീനും വാക്കറും വാങ്ങാനുള്ള തുക സമാഹരിച്ചത്.

വയനാട്ടിലേക്ക് ഭവന നിർമ്മാണ ധനസമാഹരണം, കാട്ടൂർ സ്ക്കൂളിലെ നിർധനനായ കുട്ടിക്ക് ഭവന നിർമ്മാണ ധനസമാഹരണം,താലൂക്ക് ആശുപത്രി യിൽ പൊതിച്ചോർ വിതരണം, ക്യാൻസർ രോഗികൾക്ക് കേശദാനം ,ദത്ത് കോളനിയിലെ നിർധനരായ രോഗികൾക്ക് മരുന്ന്, വസ്ത്രം, നിത്യോപയോഗസാധനങ്ങൾ, ഓണക്കിറ്റ് എന്നിവ വിതരണം, സഹപാഠിയുടെ പിതാവിന് ഒരു മാസത്തേക്കുള്ള മരുന്ന് നൽകൽ, ജീവനം ജീവധനം പരിപാടിയുടെ ഭാഗമായി തിരഞ്ഞെടുക്കപ്പെട്ട വൊളന്റിയേഴ്സിന് കോഴിയെ നൽകൽ, വൃദ്ധ സദനത്തിലെ അന്തേവാസികൾക്ക് നിത്യോപയോഗ സാധനങ്ങൾ നൽകൽ, ഓട്ടിസം പാർക്കിലെ കുട്ടികൾക്ക് കളിപ്പാട്ടങ്ങൾ വാങ്ങി നൽകൽ, പാലിയേറ്റീവ് ഹോം കെയർ , എന്നിങ്ങനെ ഒട്ടേറേ സാന്ത്വന പ്രവർത്തനങ്ങൾ വൊളന്റിയേഴ്സ് ഈ വർഷം നടപ്പിലാക്കിയിട്ടുണ്ട്.

ഡോ. എ പി ജെ അബ്ദുൾ കലാം ഫൗണ്ടേഷൻ ഏർപ്പെടുത്തിയ 2024 ലെ ജീവകാരുണ്യം, പാലിയേറ്റീവ് പ്രവർത്തനങ്ങൾക്കുള്ള ഏറ്റവും മികച്ച സ്ക്കൂളിനും മികച്ച പ്രോഗ്രാം ഓഫീസർക്കുമുള്ള അവാർഡും എൻ എസ് എസ് യൂണിറ്റിന് ലഭിച്ചിട്ടുണ്ട്.