ഭാരതീയ വിദ്യാഭവനിൽ ലഹരിവിരുദ്ധ ബോധവത്കരണ ഓട്ടൻ തുള്ളൽ അരങ്ങേറി

ഇരിങ്ങാലക്കുട : ലഹരിവസ്തുക്കളുടെ ഉപയോഗം വരുത്തുന്ന മാരകമായ വിപത്തുകളെ കുറിച്ച് പുതുതലമുറയെ ബോധവത്കരിക്കുന്നതിനായി ഇരിങ്ങാലക്കുട ഭാരതീയ വിദ്യാഭവനിൽ ഓട്ടൻ തുള്ളൽ അരങ്ങേറി.

അസിസ്റ്റന്റ് എക്സൈസ് ഇൻസ്പെക്ടർ എറണാകുളം ജയരാജ് വി ആണ് ഓട്ടൻ തുള്ളൽ അവതരിപ്പിച്ചത്. മൂർച്ചയുള്ള യാഥാർത്ഥ്യങ്ങൾ നർമ്മത്തിൽ ചാലിച്ച് അവതരിപ്പിച്ചപ്പോൾ അത് കുട്ടികളുടെ മനസ്സിൽ പതിയുന്ന വേറിട്ട അനുഭവമായി.

സ്കൂളിലെ വിമുക്തി ക്ലബ്ബ്, സ്കൂൾ പ്രൊട്ടക്ഷൻ ഗ്രൂപ്പ്, എൻ എസ് എസ് എന്നിവരുടെ നേതൃത്വത്തിലാണ് പരിപാടി സംഘടിപ്പിച്ചത്. പ്രിൻസിപ്പൽ ബിജു ഗീവർഗീസ്, സെക്രട്ടറി വി രാജൻ, വൈസ് പ്രിൻസിപ്പൽമാരായ സുജാത രാമനാഥൻ, ഗിരിജ മേനോൻ, അഡ്മിനിസ്ട്രേറ്റർ നവിൻ എന്നിവർ സന്നിഹിതരായിരുന്നു. അധ്യാപകരായ സറീന കെ എം , നിഷ നായർ, അഞ്ജു കെ രാജഗോപാൽ എന്നിവർ പരിപാടി ഏകോപിപ്പിച്ചു.