കംബോഡിയൻ ചിത്രം ” റിട്ടേൺ ടു സോൾ ” ഇരിങ്ങാലക്കുട ഫിലിം സൊസൈറ്റി വെള്ളിയാഴ്ച സ്ക്രീൻ ചെയ്യുന്നു

ഇരിങ്ങാലക്കുട : 95 – മത് അക്കാദമി അവാർഡിനായുള്ള കംബോഡിയൻ എൻട്രിയായിരുന്ന ” റിട്ടേൺ ടു സോൾ ” ഇരിങ്ങാലക്കുട ഫിലിം സൊസൈറ്റി മെയ് 19 വെള്ളിയാഴ്ച സ്ക്രീൻ ചെയ്യുന്നു. ടോക്കിയോയിലേക്കുള്ള യാത്രയ്ക്കിടയിൽ ദക്ഷിണ കൊറിയയിൽ എത്തിപ്പെടുകയാണ് 25 കാരിയായ ഫ്രഞ്ച് യുവതി ഫ്രെഡ്ഡി . ഫ്രെഡ്ഡിയെ ദക്ഷിണ കൊറിയയിൽ നിന്ന് ഫ്രഞ്ച് ദമ്പതികൾ ദത്തെടുത്തതാണ്.

ആകസ്മികമായി കൊറിയയിൽ എത്തിച്ചേർന്ന ഫ്രെഡ്ഡി തന്റെ യഥാർത്ഥ മാതാപിതാക്കളെ കണ്ടെത്താനുളള ശ്രമങ്ങൾ നടത്തുന്നു. 2022 ലെ കാൻ ഫിലിം ഫെസ്റ്റിവലിൽ പ്രദർശിപ്പിക്കുകയും നിരൂപക ശ്രദ്ധ തേടുകയും ചെയ്ത, 119 മിനിറ്റുള്ള ചിത്രത്തിന്റെ പ്രദർശനം വൈകീട്ട് 6 ന് ക്രൈസ്റ്റ് കോളേജ് ജംഗ്ഷനിലെ ഓർമ്മ ഹാളിൽ.