ക്രൈസ്റ്റ് കോളേജ് ക്രിക്കറ്റ് അക്കാദമിക്ക് നവംബർ 7ന് തുടക്കം

ഇരിങ്ങാലക്കുട : ക്രൈസ്റ്റ് കോളേജിന്റെ ആഭിമുഖ്യത്തിൽ, ക്രിക്കറ്റ് രംഗത്ത് പുതിയൊരു കായിക മുന്നേറ്റത്തിന് വഴിയൊരുക്കിക്കൊണ്ട് ക്രൈസ്റ്റ് കോളേജ് ക്രിക്കറ്റ് അക്കാദമി നവംബർ 7-ന് പ്രവർത്തനമാരംഭിക്കുന്നു. ലെതർ ആൻഡ് വില്ലോ ക്ലബ് ഈ സംരംഭത്തിന്റെ സ്പോൺസറും പ്രവർത്തന പങ്കാളിയുമാണ്. കേന്ദ്ര പെട്രോളിയം, പ്രകൃതിവാതക, ടൂറിസം സഹമന്ത്രി സുരേഷ് ഗോപി ശനിയാഴ്ച രാവിലെ 10 മണിക്ക് ഔദ്യോഗിക ഉദ്ഘാടനം നിർവഹിക്കും.

ക്രൈസ്റ്റ് കോളേജിന്റെ വിപുലമായ അടിസ്ഥാന സൗകര്യങ്ങളും സ്ഥാപനത്തിന്റെ അനുഭവസമ്പത്തും ലെതർ ആൻഡ് വില്ലോ ക്ലബ്ബിന്റെ സജീവമായ പങ്കാളിത്തവും സംയോജിപ്പിച്ച്, ഇരിങ്ങാലക്കുടയിലെയും സമീപപ്രദേശങ്ങളിലെയും യുവ ക്രിക്കറ്റ് പ്രതിഭകൾക്ക് മികച്ച പരിശീലനവും വളർച്ചയ്ക്കുള്ള അവസരങ്ങളും ലഭ്യമാക്കാൻ ഈ അക്കാദമിക്ക് കഴിയുമെന്നാണ് പ്രതീക്ഷിക്കുന്നത്.

ക്രിക്കറ്റിനോടുള്ള അഗാധമായ അഭിനിവേശവും സമൂഹത്തിൽ കായികസംസ്കാരം വളർത്തിയെടുക്കണമെന്ന ലക്ഷ്യവും പങ്കിടുന്ന അഞ്ച് അടുത്ത സുഹൃത്തുക്കളായ അജിത് കെ കെ, ഡോ ജോജോ കൂനൻ, സത്യനാരായണൻ, ജ്യോതിഷ് കുമാർ, ഹരീഷ് കെ യു എന്നിവരുടെ കൂട്ടായ്മയാണ് ഈ ക്ലബ്. അക്കാദമിയുടെ സുഗമമായ പ്രവർത്തനത്തിനാവശ്യമായ അടിസ്ഥാന സൗകര്യങ്ങൾ ഒരുക്കുക, പ്രവർത്തനങ്ങൾക്ക് മേൽനോട്ടം വഹിക്കുക, പരിശീലനവുമായി ബന്ധപ്പെട്ട മറ്റ് ക്രമീകരണങ്ങൾ ഏകോപിപ്പിക്കുക തുടങ്ങിയ പ്രധാന ഉത്തരവാദിത്വങ്ങളും ക്ലബ് നിർവഹിക്കുന്നതാണ്.

യുവതലമുറയിലും മുതിർന്നവരിലും കായികമനോഭാവവും ആരോഗ്യബോധവും വളർത്തിയെടുക്കുകയും വരുംതലമുറകൾക്കായി ആരോഗ്യകരമായ ഒരു കായികസംസ്കാരം പ്രോത്സാഹിപ്പിക്കുകയും ചെയ്യുക എന്ന വിശാലമായ ലക്ഷ്യവും ഈ കൂട്ടായ്മയ്ക്കുണ്ട്.

വിദ്യാഭ്യാസം, കല, സാഹിത്യം, സംസ്കാരം, ശാസ്ത്രം, ഗവേഷണം തുടങ്ങി വിവിധ മേഖലകളിൽ പതിറ്റാണ്ടുകളായി ശ്രദ്ധേയമായ സംഭാവനകൾ നൽകി വരുന്ന ക്രൈസ്റ്റ് കോളേജ്, കായികരംഗത്തും ഒട്ടേറെ നേട്ടങ്ങളും അംഗീകാരങ്ങളും സ്വന്തമാക്കിയിട്ടുണ്ട്. അക്കാദമിക മികവിനൊപ്പം വിദ്യാർത്ഥികളുടെ സർവതോന്മുഖമായ വളർച്ചയ്ക്കും അവരുടെ സർഗാത്മകവും കായികപരവുമായ കഴിവുകളുടെ പരിപോഷണത്തിനും എന്നും പ്രാധാന്യം നൽകിയിട്ടുള്ള സ്ഥാപനത്തിന്റെ ഈ പുതിയ സംരംഭം, ആ പാരമ്പര്യത്തിന്റെ സ്വാഭാവികമായ തുടർച്ച കൂടിയാണ് എന്ന് വാർത്താ സമ്മേളനത്തിൽ ക്രൈസ്റ്റ് കോളേജ് മാനേജർ ഫാ. ജോയ് പീനിക്കപറമ്പിൽ പറഞ്ഞു.

പ്രദേശത്തെ ക്രിക്കറ്റ് പ്രതിഭകളെ കണ്ടെത്തി അവർക്ക് ശാസ്ത്രീയവും വ്യവസ്ഥാപിതവുമായ പരിശീലനം ലഭ്യമാക്കുക, മികച്ച കായികശേഷിയും അച്ചടക്കവും കായികമനോഭാവവും വളർത്തിയെടുക്കുക, ഭാവിയിൽ ഉയർന്ന തലങ്ങളിൽ ക്രിക്കറ്റ് രംഗത്ത് മികവ് തെളിയിക്കാൻ പ്രാപ്തരായ താരങ്ങളെ വാർത്തെടുക്കുക എന്നിവയാണ് അക്കാദമിയുടെ മുഖ്യലക്ഷ്യങ്ങൾ.

എട്ടു വയസ്സിന് മുകളിലുള്ള ആൺകുട്ടികൾക്കും പെൺകുട്ടികൾക്കും അക്കാദമിയിൽ പ്രവേശനം ലഭിക്കുന്നതാണ്. ലിംഗഭേദമന്യേ എല്ലാ കുട്ടികൾക്കും തുല്യമായ പരിശീലനാവസരങ്ങൾ ഒരുക്കി, അവരുടെ കഴിവുകൾക്കനുസരിച്ച് വളരാനുള്ള മികച്ച അന്തരീക്ഷം സൃഷ്ടിക്കുകയാണ് ഈ സംരംഭത്തിന്റെ ലക്ഷ്യം.

ഉദ്ഘാടനത്തോടനുബന്ധിച്ച് ഫാദർ ജോസ് തെക്കൻ മെമ്മോറിയൽ സെമിനാർ ഹാളിൽ നടക്കുന്ന പൊതുസമ്മേളനത്തിൽ കേന്ദ്രമന്ത്രി സുരേഷ് ഗോപി അധ്യക്ഷത വഹിക്കും. ഇരിങ്ങാലക്കുട എം.എൽ.എ. തോമസ് ഉണ്ണിയാടൻ, നഗരസഭാ ചെയർമാൻ എം.പി. ജാക്സൺ, ക്രൈസ്റ്റ് കോളേജ് പ്രിൻസിപ്പാൾ ഫാ. ജോളി ആൻഡ്രൂസ്, മാനേജർ ഫാ. ജോയ് പീനിക്കപറമ്പിൽ, വാർഡ് കൗൺസിലർ റോണി പോൾ മാവേലി, സതീശൻ (TDCA), ജോസ് പോൾ (TDCA), രാകേഷ് (TDCA), സതീഷ് പിള്ള (ചീഫ് ക്രിക്കറ്റ് കോച്ച് ), ബിജു ജോർജ് (വിസിറ്റിംഗ് എലൈറ്റ് ക്രിക്കറ്റ് കൺസൾറ്റൻറ് ) എന്നിവർ ഉൾപ്പെടെയുള്ള വിശിഷ്ട വ്യക്തികളും ചടങ്ങിൽ പങ്കെടുക്കും.

ഇരിങ്ങാലക്കുട പ്രസ് ക്ലബ്ബിൽ ചേർന്ന വാർത്താ സമ്മേളനത്തിൽ മാനേജർ ക്രൈസ്റ്റ് കോളേജ് ഫാ ജോയ് പീനിക്കപ്പറമ്പിൽ, ഹെഡ് കോച്ച് സതീഷ് പിള്ള, ലെതർ ആൻഡ് വില്ലോ ക്ലബ് പ്രസിഡന്റ് അജിത് കെ കെ, സെക്രട്ടറി ഡോ ജോജോ കൂനൻ, ട്രഷറർ ഹരീഷ് കെ യു എന്നിവർ പങ്കെടുത്തു.