ബസ് സ്റ്റോപ്പിനുള്ളിലെ ലൈബ്രറി – യുവജന കൂട്ടായ്മയിൽ പൂവത്തുംകടവിൽ ആധുനിക സൗകര്യങ്ങളോടെ വേറിട്ട ബസ് സ്റ്റോപ്പ്

പൂവത്തുംകടവ് : ബസ് യാത്രയ്ക്കായി കാത്തിരിക്കുന്ന സമയം വായനയ്ക്കായി പ്രയോജനപ്പെടുത്തുക എന്ന ലക്ഷ്യത്തോടെ ഗ്രാമീണ ഭംഗിയോട് ഇണങ്ങുന്ന മാതൃകയിൽ ശ്രീഭുവനേശ്വരി ക്ലബ്ബിന്റെ നേതൃത്വത്തിൽ നാട്ടുകാരും പ്രവാസി സുഹൃത്തുക്കളും നിർമിച്ച പൂവത്തുംകടവിലെ ബസ് സ്റ്റോപ്പ് ആധുനിക സൗകര്യങ്ങളാൽ ശ്രദ്ധേയമാകുന്നു.

പൂവത്തുംകടവ് പാലത്തിനു സമീപത്തെ ബസ് സ്റ്റോപ്പിനുള്ളിലെ ലൈബ്രറിയാണ് പ്രധാന ആകർഷണം. യാത്രക്കാർക്ക് വായനയ്ക്കുള്ള അവസരമൊരുക്കുന്ന ലൈബ്രറിക്കു പുറമേ, ബസ് സ്റ്റോപ്പിലെ വൈദ്യുതിവിളക്കുകൾക്കായി സൗരോർജമാണ് ഉപയോഗിക്കുന്നത്. ബസ് സ്റ്റോപ്പും പരിസരവും 24 മണിക്കൂറും സിസിടിവി നിരീക്ഷണത്തിലായിരിക്കും. കുടിവെള്ളം, എഫ്.എം. റേഡിയോ, ദിനപത്രങ്ങൾ തുടങ്ങിയ സൗകര്യങ്ങളും ഇവിടെ ഒരുക്കിയിട്ടുണ്ട്.
രണ്ട് ലക്ഷം രൂപയിൽ താഴെയാണ് നിർമാണച്ചെലവ്.

നാട്ടുകാരുടെ കൂട്ടായ്മയും യുവജനങ്ങളുടെ ഇച്ഛാശക്തിയും കൈകോർത്തപ്പോൾ കുറഞ്ഞ ചെലവിൽ മികച്ച പൊതുസൗകര്യം ഒരുക്കാനായി. ഗ്രാമീണ സൗന്ദര്യവും ആധുനിക സംവിധാനങ്ങളും ഒരുമിപ്പിക്കുന്ന ഈ സംരംഭം മറ്റു പ്രദേശങ്ങൾക്കും മാതൃകയാകുകയാണ്.
വെള്ളാങ്ങല്ലൂർ പഞ്ചായത്ത് പ്രസിഡന്റ് സുലേഖ അബ്‌ദുള്ളക്കുട്ടി ഉദ്‌ഘാടനം ചെയ്തു. ജില്ലാ പഞ്ചായത്തംഗം സി.ബി. ഷക്കീല, ബ്ലോക്ക് പഞ്ചായത്തംഗം ആലീസ് തോമസ്, പഞ്ചായത്തംഗങ്ങളായ ഷിബിൻ, മുകേഷ് എന്നിവർ സംസാരിച്ചു.