ഇരിങ്ങാലക്കുടയിൽ സ്നേഹക്കൂടിന്റെ ഏഴാമത്തെ വീടും യഥാർത്ഥ്യമായി – വീടിന്റെ താക്കോൽ കൈമാറി മന്ത്രി ഡോ: ആർ. ബിന്ദു

ഇരിങ്ങാലക്കുട : കൂട്ടായ്‌മയുടെയും സഹജീവിസ്നേഹത്തിന്റെയും ഉദാത്തമാതൃക തീർത്ത് ഇരിങ്ങാലക്കുട നിയോജക മണ്ഡലത്തിൽ ഇരിങ്ങാലക്കുട എം.എൽ.എ യുടെ നേതൃത്വത്തിൽ നടപ്പിലാക്കുന്ന ‘സ്‌നേഹക്കൂട്’ ഭവനനിർമ്മാണ പദ്ധതിയിലെ ഏഴാമത്തെ വീടും യാഥാർത്ഥ്യമായി.

ഉന്നതവിദ്യാഭ്യാസ വകുപ്പിന് കീഴിലുള്ള നാഷണൽ സർവ്വീസ് സ്‌കീമിന്റെ വിവിധ യൂണിറ്റുകളുടെയും സുമനസ്സുകളുടെയും സഹായത്താൽ ഉയർന്ന ഏഴാമത്തെ വീടിന്റെ താക്കോൽ കൈമാറ്റം ഉന്നതവിദ്യാഭ്യാസ സാമൂഹ്യനീതി വകുപ്പ് മന്ത്രി ഡോ:ആർ.ബിന്ദു നിർവ്വഹിച്ചു.

പൂമംഗലം ഗ്രാമപഞ്ചായത്തിലെ കാളത്തുപറമ്പിൽ പ്രകാശന്റെ കുടുംബത്തിനാണ് സ്നേഹക്കൂട് കൈമാറിയത്. ഭാര്യയും രണ്ടു മക്കളും അടങ്ങുന്ന കുടുംബത്തിന്റെ ഏക ആശ്രയമാണ് കൂലിപ്പണിക്കാരനായ പ്രകാശൻ.

സാങ്കേതിക കാരണങ്ങളാൽ സംസ്ഥാന സർക്കാരിന്റെ മറ്റു ഭവനനിർമ്മാണ പദ്ധതികളിൽ ഉൾപ്പെടാതെ പോയതോടെ പ്രകാശനും കുടുംബത്തിനും വീടെന്ന സ്വപ്നം സാക്ഷാത്കരിക്കാൻ കഴിയുമോ എന്ന വിഷമത്തിൽ ആയിരുന്നു. അതിനിടയിലാണ് മന്ത്രിയുടെ ‘സ്നേഹക്കൂട് പദ്ധതി’ വഴി വീടിന് അർഹനായത്. സ്നേഹക്കൂടിലൂടെ അടച്ചുറപ്പുള്ള സ്വന്തമായ വീട് എന്നപ്രകാശന്റെയും കുടുംബത്തിന്റെയും സ്വപ്നം സാക്ഷാത്കരിക്കപ്പെട്ടിരിക്കുകയാണ്.

സാങ്കേതിക കാരണങ്ങളാൽ സംസ്ഥാന സർക്കാരിന്റെ മറ്റു ഭവനനിർമ്മാണ പദ്ധതികളിൽ ഉൾപ്പെടാൻ കഴിയാതെ പോയവർക്ക് വീടെന്ന സ്വപ്‍നം സാക്ഷാത്കരിക്കാൻ മന്ത്രി ആർ.ബിന്ദുവിന്റെ ഭാവനയിൽ വിരിഞ്ഞ പദ്ധതിയാണിത്.ഭിന്നശേഷിക്കാർ, നിരാലംബർ, വിധവകൾ തുടങ്ങിയവർക്ക് മുൻഗണന നൽകിക്കൊണ്ട് സന്നദ്ധസംഘടനകൾ, എൻ. എസ്. എസ് യൂണിറ്റുകൾ, പൊതുജനങ്ങൾ എന്നിവരുടെ സഹായം സംയോജിപ്പിച്ച് മണ്ഡലത്തിൽ നടപ്പാക്കുന്ന പദ്ധതിയിൽ ബാക്കി വീടുകൾക്കായുള്ള പ്രവർത്തനങ്ങൾ പുരോഗമിക്കുകയാണെന്ന് മന്ത്രി ഉദ്ഘാടന ചടങ്ങിൽ പറഞ്ഞു.

ഇരിങ്ങാലക്കുട ക്രൈസ്റ്റ് കോളേജ് ഓട്ടോണമസ് നാഷണൽ സർവീസ് സ്കീം (എൻ.എസ്.എസ്) യൂണിറ്റുകൾ 20, 49 ന്റെ നേതൃത്വത്തോടെയാണ് വീട് നിർമ്മിച്ചത്.

കൂട്ടായ്‌മയുടെയും സഹജീവിസ്നേഹത്തിന്റെയും ഉദാത്തമാതൃക തീർത്ത് ഇരിങ്ങാലക്കുട നിയോജകമണ്ഡലത്തിൽ നടപ്പിലാക്കുന്ന ‘സ്‌നേഹക്കൂട്’ ഭവനനിർമ്മാണ പദ്ധതിയിലെ ഏഴാമത്തെ വീടും യാഥാർത്ഥ്യമായതിൽ ഏറെ സന്തോഷമുണ്ടെന്നും അതിനായി പ്രവർത്തിച്ച എൻ. എസ്.എസ് വിദ്യാർത്ഥികൾ,അധ്യാപകർ,നാട്ടുകാർ, സുമനസ്സുകൾ ഏവരും അഭിനന്ദനമർഹിക്കുന്നതായും മന്ത്രി ആർ.ബിന്ദു പറഞ്ഞു.

പൂമംഗലം കൂനാക്കമ്പുള്ളി ക്ഷേത്ര പരിസരത്ത് നടന്ന ചടങ്ങിൽ പൂമംഗലം ഗ്രാമപഞ്ചായത്ത് പ്രസിഡന്റ് കെ. എസ്. തമ്പി അധ്യക്ഷത വഹിച്ചു.

ഇരിങ്ങാലക്കുട ക്രൈസ്റ്റ് കോളേജ് മാനേജർ ഫാ. ജോയ് പി.ഡി, കോളേജ് പ്രിൻസിപ്പൽ ഫാ. ഡോ. ജോളി ആൻഡ്രൂസ്, സ്റ്റേറ്റ് എൻ.എസ്.എസ് ഓഫീസർ ഡോ. ഡി. ദേവപ്രിയ, കാലിക്കറ്റ് യൂണിവേഴ്സിറ്റി എൻ.എസ്.എസ് കോർഡിനേറ്റർ ഡോ. വി. വിജയകുമാർ എന്നിവർ മുഖ്യാതിഥികളായി പങ്കെടുത്തു. തൃശൂർ ജില്ലാ എൻ.എസ്.എസ് കോർഡിനേറ്റർ രഞ്ജിത് വർഗീസ്, പൂമംഗലം ഗ്രാമപഞ്ചായത്ത് വാർഡ് മെമ്പർ സന്ധ്യ വിജയൻ, മുൻ എൻ എസ് എസ് പ്രോഗ്രാം ഓഫീസർ ഷിന്റോ വി പി, എൻ.എസ്.എസ് പ്രോഗ്രാം ഓഫീസർ ഡോ. അനുഷ മാത്യു, ജനപ്രതിനിധികൾ തുടങ്ങിയവർ പങ്കെടുത്തു.