ക്രൈസ്റ്റ് കോളേജിൽ വിഹാൻ- 23 നാഷണൽ മാനേജ്മെന്റ് ഫെസ്റ്റ് സമാപിച്ചു

ഇരിങ്ങാലക്കുട : ക്രൈസ്റ്റ് കോളേജ് (ഓട്ടോണൊമസ് ) മാനേജ്മെന്റ് സ്റ്റഡീസ് വിഭാഗം സംഘടിപ്പിച്ച നാഷണൽ മാനേജ്മെന്റ് ഫെസ്റ്റ് വിഹാൻ-23 സമാപിച്ചു. 4 വേദികളിലായി 10 ഇനങ്ങളിൽ കേരളത്തിനകത്തും പുറത്തുമുള്ള 31 പ്രശസ്ത കലാലയങ്ങളിലെ വിദ്യാർത്ഥികൾ വിഹാൻ-23 ൽ പങ്കെടുത്തു.

ബെസ്റ്റ് മാനേജർ, മാർക്കറ്റിംഗ് ഗെയിം, എച്ച് ആർ ഗെയിം, ഐ പി എൽ ഒക്ഷൻ, മൈക്രോ പ്രസന്റേഷൻ എന്നീ മാനേജ്മെന്റ് മത്സരങ്ങൾക്ക് പുറമെ സ്പോട് ഫോട്ടോഗ്രഫി, ഗ്രൂപ്പ്‌ ഡാൻസ്, സ്പോട് കൊറിയോഗ്രാഫി എന്നീ മത്സരങ്ങളും പരിപാടിയുടെ ഭാഗമായി സംഘടിപ്പിച്ചിരുന്നു.

32 പോയിന്റോടെ ആതിഥേയരായ ക്രൈസ്റ്റ് കോളേജ് (ഓട്ടോണോമസ് ) ഒന്നാം സ്ഥാനം നിലനിർത്തി. വിജയികൾക്കുള്ള ട്രോഫി, സർട്ടിഫിക്കറ്റ്, ക്യാഷ് അവാർഡ് വിതരണം ക്രൈസ്റ്റ് കോളേജ് മാനേജർ ഫാ. ജോയ് പീണിക്കപറമ്പിൽ സി.എം.ഐ, ക്രൈസ്റ്റ് കോളേജ് പ്രിൻസിപ്പാൾ ഫാ. ഡോ. ജോളി ആൻഡ്രൂസ് സി. എം. ഐ എന്നിവർ ചേർന്ന് നിർവഹിച്ചു.

സെൽഫ് ഫിനാൻസിംഗ് പ്രോഗ്രാം ഡയറക്ടർ ഫാ. വിൽ‌സൺ തറയിൽ സി. എം. ഐ., കോർഡിനേറ്റർ ഡോ. വിവേകാനന്ദൻ എന്നിവർ ആശംസകൾ അർപ്പിച്ചു. പരിപാടിയുടെ ഭാഗമായി മത്സരാർഥികൾക്കായ് വയലിൻ ഫ്യൂഷൻ സംഗീതവിരുന്ന് സംഘടിപ്പിച്ചിരുന്നു.