നവകിരൺ ആർട്‌സ് & സ്പോർട്ട്സ് ക്ലബ് എടത്തിരുത്തിയുടെ ആഭിമുഖ്യത്തിൽ 2-ാമത് അഖിലേന്ത്യ വോളിബോൾ ടൂർണ്ണമെൻ്റ് ഏപ്രിൽ 8 മുതൽ 12 വരെ

എടത്തിരുത്തി : നവകിരൺ ആർട്‌സ് & സ്പോർട്ട്സ് ക്ലബ് എടത്തിരുത്തിയുടെ ആഭിമുഖ്യത്തിൽ 2-ാമത് അഖിലേന്ത്യ വോളിബോൾ ടൂർണ്ണമെൻ്റ് നവകിരൺ ഫ്ളഡ് ലൈറ്റ് സ്റ്റേഡിയത്തിൽ ഏപ്രിൽ 08 മുതൽ 12 വരെ നടക്കും. അഖിലേന്ത്യ മത്സരത്തിൽ കേരളാ പോലീസ്, ഇന്ത്യൻ എയർ ഫോഴ്സ‌് ഡൽഹി, ഇന്ത്യൻ ആർമി ഡൽഹി, CISF റാഞ്ചി, കൊച്ചിൻ കസ്റ്റംസ്, ഇൻകം ടാക്‌സ് ചെന്നൈ എന്നിവർ മാറ്റുരയ്ക്കും.

ടൂർണ്ണമെൻ്റിനോടനുബന്ധിച്ച് ടൂർണ്ണമെൻ്റിൻ്റെ കൊടിമര കാൽനാട്ടുകർമ്മം കൈപ്പമംഗലം എം.എൽ.എ ഈ ടി ടൈസൺ മാസ്റ്റർ നിർവഹിച്ചു. എടത്തിരുത്തിയിൽ രണ്ടാം തവണയാണ് അഖിലേന്ത്യ വോൾളിബോൾ മത്സരം അരങ്ങേറുന്നത്. കഴിഞ്ഞ 20 വർഷവും അഖില കേരളാടിസ്ഥാനത്തിൽ വോളിബോൾ ടൂർണമെൻ്റ് NKASC നടത്തിവരുന്നു.

ദിവസവും ഒരു കളിമാത്രമേ ഉണ്ടാവുകയുള്ളു. വിജയികൾക്ക് എലുവത്തിങ്കൽ വിൽസൺ മെമ്മോറിയൽ റോളിങ്ങ് ട്രോഫിയും, കോഴിപറമ്പിൽ ഗോപാലൻ മെമ്മോറിയൽ റണ്ണേഴ്‌സ് റോളിങ്ങ് ട്രോഫിയും, മുനപ്പിൽ ശങ്കര നാരായണൻ മെമ്മോറിയൽ വിന്നേഴ്‌സ് സ്ഥിരം ട്രോഫിയും, കുറ്റിപറമ്പിൽ അപ്പുക്കുട്ടൻ & വനജ അപ്പുക്കുട്ടൻ മെമ്മോറിയൽ റണ്ണേഴ്‌സ് സ്ഥിരം ട്രോഫിയും സമ്മാനിക്കും.

മത്സരങ്ങൾ 8 മണിക്ക് ആരംഭിക്കും. പ്രവേശനം പാസ് മൂലം നിയന്ത്രിക്കുന്നതാണ്. ഇരിങ്ങാലക്കുട പ്രസ് ക്ലബ്ബിൽ ചേർന്ന വാർത്ത സമ്മേളനത്തിൽ ക്ലബ് പ്രേസിടെന്റും ടൂർണമെന്റ് ജനറൽ കൺവീനറുമായ പ്രശോഭിതൻ മുനപ്പിൽ, ഉത്തമ കുമാർ കെ, സുനിൽകുമാർ, , സലാൽ എംഡി, ഗോപിദാസ് പി സി, കെ സതീശൻ എന്നിവർ പങ്കെടുത്തു.