ഫിഫ മാമാങ്കത്തിന്റെ ആഘോഷവേദിയായി വി.എച്ച്.എസ്.എസ് കാറളം

കാറളം : ലോകമെമ്പാടുമുള്ള കായിക പ്രേമികളുടെ ഹൃദയം കവർന്ന ഫിഫ വേൾഡ് കപ്പ് 2026-നെ ആവേശത്തോടെയും ആഘോഷത്തോടെയും വരവേറ്റ് വി.എച്ച്.എസ്.എസ് കാറളം. ഫുട്ബോൾ ആവേശം സ്കൂൾ ക്യാമ്പസിലാകെ അലയടിച്ചപ്പോൾ അധ്യാപകരും വിദ്യാർത്ഥികളും ഒരുപോലെ ആഘോഷങ്ങളിൽ പങ്കുചേർന്നു.

വർണാഭമായ അന്തരീക്ഷത്തിൽ, ഫിഫ വേൾഡ് കപ്പിനെ പ്രതിനിധീകരിക്കുന്ന കൂറ്റൻ ഫ്ലെക്സ് സ്കൂൾ അങ്കണത്തിലേക്ക് ഹർഷാരവങ്ങളോടെ എത്തിച്ചതോടെയാണ് ആഘോഷങ്ങൾക്ക് തുടക്കമായത്. തുടർന്ന് വിദ്യാർത്ഥികൾ അവതരിപ്പിച്ച എയറോബിക് നൃത്തം പരിപാടിക്ക് കൂടുതൽ നിറം പകർന്നു.

ആഘോഷങ്ങളുടെ ഭാഗമായി വിദ്യാർത്ഥികൾക്കായി വിവിധ മത്സരങ്ങളും സംഘടിപ്പിച്ചു. സ്കൂൾ മാനേജർ സുധ ഭരതൻ ഫുട്ബോൾ കിക്ക് ഓഫ് ചെയ്ത് മത്സരങ്ങളുടെ ഔപചാരിക ഉദ്ഘാടനം നിർവഹിച്ചു. തുടർന്ന് വിദ്യാർത്ഥികളുടെ ആവേശം നിറഞ്ഞ പങ്കാളിത്തത്തോടെ ഷാർപ്പ് ഷൂട്ടർ മത്സരം, ഫിഫ പ്രവചന മത്സരം, ഫുട്ബോൾ ക്വിസ് മത്സരം എന്നിവ അരങ്ങേറി.

സ്കൂൾ പ്രിൻസിപ്പൽ വീണ ജെ.എസ്, സ്പോർട്സ് കമ്മിറ്റി അംഗങ്ങളായ ജിതേഷ്, മുഹമ്മദ് റോഷൽ എന്നിവരുടെ നേതൃത്വത്തിലാണ് പരിപാടികൾ സംഘടിപ്പിച്ചത്. ഫുട്ബോൾ ലോകകപ്പിന്റെ ആവേശം സ്കൂൾ കുടുംബത്തിലാകെ പകർന്ന ഈ ആഘോഷം വിദ്യാർത്ഥികൾക്ക് മറക്കാനാവാത്ത അനുഭവമായി മാറി. ഫുട്ബോളിന്റെ ആവേശവും കൂട്ടായ്മയുടെ ശക്തിയും ഒരുമിച്ചപ്പോൾ വി.എച്ച്.എസ്.എസ് കാറളം ഫിഫ മാമാങ്കത്തിന്റെ ആഘോഷവേദിയായി മാറി.