News

മുട്ടക്കോഴി വിതരണം

ഇരിങ്ങാലക്കുട : മിത്രഭാരതി സോഷ്യല്‍ സര്‍വീസ് സൊസൈറ്റി നടപ്പാക്കുന്ന മുട്ടക്കോഴി വളര്‍ത്തല്‍ പദ്ധതിയുടെ ഭാഗമായുള്ള രണ്ടാംഘട്ട മുട്ടക്കോഴി വിതരണം ഒക്ടോബര്‍ 10 ന് നടക്കുന്നു. ബി വി 380 ഇനത്തിലുള്ള 50 ദിവസം പ്രായമായ 25 കോഴിക്കുഞ്ഞുങ്ങളും ആധുനീകരീതിയിലുള്ള കൂടും ലഭിക്കും. വായ്പ ആവശ്യമുള്ളവര്‍ക്ക് വായ്പ ലഭ്യമാക്കുന്നതാണ്. മുട്ടക്കോഴി വളര്‍ത്താന്‍ താല്പര്യമുള്ളവര്‍ സൊസൈറ്റിയുടെ ഇരിങ്ങാലക്കുടയിലുള്ള ഹെഡ് ഓഫീസിലോ, എടക്കുളത്തുള്ള പൂമംഗലം ബ്രാഞ്ച് ഓഫീസിലോ അപേക്ഷകള്‍ സമര്‍പ്പിക്കണം. അപേക്ഷാഫോം ഓഫീസില്‍ നിന്നും ലഭ്യമാണ് ബന്ധപ്പെടേണ്ട നമ്പര്‍ 04802828755 9745769324 7025955999

കൂടല്‍മാണിക്യം തിരുവുത്സവം : വരവ്ചിലവ് കണക്കുകള്‍ അവതരിപ്പിച്ചു

ഇരിങ്ങാലക്കുട : മെയ് 6 മുതല്‍ 16 വരെ നടന്ന കൂടല്‍മാണിക്യം തിരുവുത്സവത്തിന്റെ ഭാഗമായുള്ള വരവ് ചിലവ് കണക്കുകള്‍ വ്യാഴാഴ്ച്ച നടന്ന ഭക്തജനങ്ങളുടെ യോഗത്തില്‍ അവതരിപ്പിച്ചു. 8030616 രൂപ വരവും 8025243 ചിലവുമുള്ള കണക്കുകള്‍ ആണ് അവതരിപ്പിച്ചത്. സെപ്റ്റംബര്‍ 23 നു കാലാവധി കഴിയുന്ന പനമ്പിള്ളി രാഘവമേനോന്‍ ചെയര്‍മാനായുള്ള കൂടല്‍മാണിക്യം ദേവസ്വം മാനേജിങ് കമ്മിറ്റിയുടെ അവസാന യോഗമായിരുന്നു ഇത്. യോഗത്തില്‍ കണക്കുകള്‍ കൈയടിച്ചു പാസ്സാക്കി. ചെയര്‍മാന്‍ പനമ്പിള്ളി രാഘവമേനോന്റെ അധ്യക്ഷതയില്‍ ചേര്‍ന്ന യോഗത്തില്‍ എ .എസ് ശ്രീവല്ലഭന്‍ നമ്പൂതിരി, വി. പി രാമചന്ദ്രന്‍ ജെ .മനോജ്, സി .മുരാരി അശോകന്‍ ഐത്താടന്‍, ടി .എ വിനോദ്കുമാര്‍ ദേവസ്വം അഡ്മിനിസ്ട്രേറ്റര്‍ എ എം സുമ എന്നിവര്‍ പങ്കെടുത്തു. ഈ മാനേജ്‌മന്റ് കമ്മിറ്റിയുടെ ഭരണകാലത്ത് കാര്യമായ പരാതികള്‍ ഒന്നും ഇല്ലാതെ തന്നെ ഉത്സവാഘോഷങ്ങള്‍ നടത്താന്‍ കഴിഞ്ഞത് അഭിമാനകരമായ നേട്ടമായി കാണുന്നു എന്ന് സ്ഥാനം ഒഴിയുന്ന ദേവസ്വം ചെയര്‍മാന്‍ പറഞ്ഞു.

സംസ്കാര സാഹിതിയ്ക്ക് പുതിയ ഭാരവാഹികള്‍

ഇരിങ്ങാലക്കുട : സംസ്കാര സാഹിതി നിയോജകമണ്ഡലം വാര്‍ഷിക സമ്മേളനം നഗരസഭാധ്യക്ഷ നിമ്യ ഷിജു ഉദ്‌ഘാടനം ചെയ്തു. ചെയര്‍മാന്‍ ഹരി അധ്യക്ഷത വഹിച്ചു. ഡി സി സി സെക്രട്ടറി ആന്റോ പെരുമ്പിള്ളി, സംസ്കാര സാഹിതി ജില്ലാ വൈസ് ചെയര്‍മാന്‍ സി ജി നാരായണന്‍ കുട്ടി, കണ്‍വീനര്‍ എ സി സുരേഷ്, കെ എ അബൂബക്കര്‍, തോമസ് തത്തംപിള്ളി, ജോജി തെക്കൂടന്‍, കെ കെ അബ്ദുള്ളക്കുട്ടി എന്നിവര്‍ പ്രസംഗിച്ചു. കാട്ടൂര്‍ സര്‍വീസ് സഹകരണ ബാങ്ക് പ്രസിഡന്റായി തിരഞ്ഞെടുക്കപ്പെട്ട രാജലക്ഷ്മി കുറുമാത്തിനെ പൊന്നാടയണിയിച്ചു ആദരിച്ചു. പുതിയ ഭാരവാഹികള്‍ : എ സി സുരേഷ്(ചെയര്‍മാന്‍), കെ എ അബൂബക്കര്‍, രാജലക്ഷ്മി കുറുമാത്ത്(വൈസ് ചെയര്‍മാന്‍മാര്‍), രാജീവ് മുല്ലപ്പിള്ളി(കണ്‍വീനര്‍), ജോജി തെക്കൂടന്‍, നീന ജോസ്(സെക്രട്ടറിമാര്‍), സി എം ഉണ്ണികൃഷ്ണന്‍(ട്രെഷറര്‍).

കലാമണ്ഡലം നാരായണന്‍ എമ്പ്രാന്തിരിയുടെ ഷഷ്ട്യബ്ദപൂര്‍ത്തിയാഘോഷം ‘സുകൃതം’ സെപ്റ്റംബര്‍ 24 ന് കലാനിലയത്തില്‍

ഇരിങ്ങാലക്കുട : ഉണ്ണായിവാരിയര്‍ സ്മാരക കലാനിലയത്തിന്റെ പ്രിന്‍സിപ്പലായി സേവനമനുഷ്ഠിച്ചു കൊണ്ടിരിക്കുന്ന പ്രശസ്ത കഥകളി ഗായകന്‍ കലാമണ്ഡലം നാരായണന്‍ എമ്പ്രാന്തിരിയുടെ ഷഷ്ട്യബ്ദപൂര്‍ത്തിയും റിട്ടയര്‍മെന്റും ‘സുകൃതം’ എന്ന പേരില്‍ കലാസ്നേഹികളും ശിഷ്യരും കലാനിലയവും ചേര്‍ന്ന് 2017 സെപ്റ്റംബര്‍ 24 ന് ഞായറാഴ്ച്ച ഇരിങ്ങാലക്കുട ഉണ്ണായിവാര്യര്‍ സ്മാരക കലാനിലയത്തില്‍ സമുചിതമായി ആഘോഷിക്കുമെന്ന് ആഘോഷക്കമ്മിറ്റി പത്രസമ്മേളനത്തില്‍ അറിയിച്ചു. ആഘോഷത്തോടനുബന്ധിച്ച് രാവിലെ 11 നു നടക്കുന്ന സുഹൃദ്സമ്മേളനം എം പി ഇന്നസെന്റ് ടി വി ഉദ്‌ഘാടനം ചെയ്യും. കെ യു അരുണന്‍ എം എല്‍ എ അധ്യക്ഷത വഹിക്കുന്ന ചടങ്ങില്‍ എം പി ജാക്സണ്‍ മുഖ്യാതിഥിയായിരിക്കും. തുടര്‍ന്ന് വൈകീട്ട് 5 നു നടക്കുന്ന പൊതു സമ്മേളനം സി എന്‍ ജയദേവന്‍ എം പി ഉദ്‌ഘാടനം ചെയ്യും. കേരള മുന്‍ നിയമസഭാ സ്പീക്കര്‍ കെ രാധാകൃഷ്‍ണന്‍ വിശിഷ്ടാഥിതിയായിരിക്കും. വൈകീട്ട് 7 മുതല്‍ വിവിധ കലാകാരന്‍മാര്‍ അവതരിപ്പിക്കുന്ന നൃത്തനൃത്ത്യങ്ങള്‍ ഉണ്ടായിരിക്കും. രാത്രി 9 മണി മുതല്‍ സുഭദ്രാഹരണം, കീചകവധം, ബാലി വധം, കിരാതം എന്നീ കഥകളിയും ഉണ്ടായിരിക്കും.

കലാമണ്ഡലം നാരായണന്‍ എമ്പ്രാന്തിരി

മലപ്പുറം ജില്ലയില്‍ വണ്ടൂരിനു സമീപം പൂങ്ങോട് ദേശത്ത് പിരിയാത്ത മഠത്തില്‍ നാരായണന്‍ എമ്പ്രാന്തിരിയുടെയും സരസ്വതി അന്തര്‍ജനത്തിന്റെയും മകനായി 1957 സെപ്റ്റംബര്‍ 29 ന് ജനിച്ചു. 8 – ാം ക്ലാസ് വരെയുള്ള വിദ്യാഭ്യാസത്തിനു ശേഷം ജി പി ഗോപാലകൃഷ്ണ പിഷാരടിയുടെ കീഴില്‍ സംഗീത അഭ്യസനം ആരംഭിച്ചു. അതിന് ശേഷം പാലക്കാട് മ്യൂസിക് അക്കാദമിയില്‍ നിന്ന് ഗാനഭൂഷണം കരസ്ഥമാക്കി. തുടര്‍ന്ന് 1972ല്‍ കേരള കലാമണ്ഡലത്തില്‍ കഥകളി സംഗീത വിദ്യാര്‍ത്ഥിയായി ചേര്‍ന്നു. കലാമണ്ഡലം ഗംഗാധരന്‍ ആശാന്റെ മുഖ്യ ശിക്ഷണത്തില്‍ കലാമണ്ഡലം നീലകണ്ഠന്‍ നമ്പീശന്‍, കലാമണ്ഡലം രാമവാര്യര്‍, കലാമണ്ഡലം മാടമ്പി സുബ്രഹ്മണ്യന്‍ നമ്പൂതിരി എന്നീ ഗുരുക്കന്മാരുടെ കീഴില്‍ 6 വര്‍ഷം പഠിച്ച ഡിപ്ലോമ കരസ്ഥമാക്കി. തുടര്‍ന്ന് 2 വര്‍ഷം കലാമണ്ഡലം ശങ്കരന്‍ എമ്പ്രാന്തിരിയുടെ കീഴില്‍ ഉപരിപഠനം നടത്തി. 1982ല്‍ ഉണ്ണായി വാര്യര്‍ സ്മാരക കലാനിലയത്തില്‍ കഥകളി സംഗീത വിഭാഗത്തിലെ അധ്യാപകനായി നിയമിതനായി. 2011ല്‍ കലാനിലയത്തിന്റെ പ്രിന്‍സിപ്പലായി ചുമതലയേറ്റു. 36 വര്‍ഷത്തെ അധ്യാപന ജീവിതത്തില്‍ പ്രഗത്ഭമായൊരു ശിഷ്യസമ്പത്തിനുടമയായി. സ്വദേശത്തും വിദേശത്തുമായി നിരവധി അരങ്ങുകളില്‍ കഥകളി അവതരിപ്പിച്ചു വരുന്നു. വിദ്യാര്‍ത്ഥി ആയിരിയ്ക്കേ തന്നെ കേരള കലാമണ്ഡലത്തില്‍ നിന്ന് ലഭിച്ച ഡോ കെ എന്‍ പിഷാരടി സ്മാരക സുവര്‍ണ്ണ മുദ്രയടക്കമുള്ള പുരസ്‌കാരങ്ങള്‍ ഇക്കാലയളവില്‍ അദ്ദേഹത്തെ തേടിയെത്തി. ഭാര്യ : ഗീത , മക്കള്‍ : സംഗീത, സുധര്‍മ്മ. (9446885528)

വല്ലക്കുന്നില്‍ വീണ്ടും അപകടം

വല്ലക്കുന്ന് : സംസ്ഥാനപാതയിലെ അപകടമേഖലയായ വല്ലക്കുന്നില്‍ വീണ്ടും അപകടം. വ്യാഴാഴ്ച്ച രാവിലെ തകര്‍ന്ന റോഡിലെ കുഴി ഒഴിവാക്കുന്നതിനിടെ നിയന്ത്രണം തെറ്റി കുഴിയില്‍ വീണ് ആക്സില്‍ ഒടിഞ്ഞ മിനി ടെമ്പോ വല്ലക്കുന്ന് ഇറക്കത്ത് തൊമ്മാന പാടത്തേക്ക് മറിഞ്ഞു. പാടത്ത് വെള്ളക്കെട്ടുണ്ടായിരുന്നെങ്കിലും ആര്‍ക്കും പരിക്കേറ്റിട്ടില്ല. ഈ അപകടവളവില്‍ ഇപ്പോള്‍ റോഡിന്റെ അവസ്ഥ മോശമാണ്. കുഴികളില്‍ പെടാതിരിക്കാന്‍ ബൈക്ക് യാത്രക്കാരടക്കം എതിര്‍ദിശയിലേക്ക് മാറുമ്പോള്‍ വാഹനാപകടങ്ങള്‍ സ്ഥിരമാകുന്നുണ്ട്. ഒരു മാസത്തിനിടെ ചെറുതും വലുതുമായ 9 അപകടങ്ങളാണ് ഇവിടെ ഉണ്ടായത്.

പാര്‍ലിമെന്ററി പാര്‍ട്ടി ലീഡറെ മറികടന്ന് യോഗം വിളിച്ചു – ഐ ഗ്രൂപ്പ് ബഹിഷ്കരിച്ചു

ഇരിങ്ങാലക്കുട : നഗരസഭയിലെ കോണ്‍ഗ്രസ് പാര്‍ലിമെന്ററി പാര്‍ട്ടി യോഗം പാര്‍ലിമെന്ററി പാര്‍ട്ടി ലീഡര്‍ അബ്ദുള്‍ ബഷീറിനെ അറിയിക്കാതെയും മറികടന്നും എം ആര്‍ ഷാജു വിളിച്ചതിനെ ചൊല്ലി പുതിയ തര്‍ക്കം. ഇതില്‍ പ്രതിഷേധിച്ച ഐ ഗ്രൂപ്പ് ബുധനാഴ്ച്ച രാവിലെ 9 മണിക്ക് രാജീവ്ഗാന്ധി ഭവനില്‍ ചേര്‍ന്ന പാര്‍ലിമെന്ററി പാര്‍ട്ടി യോഗം ബഹിഷ്കരിച്ചു. ഐ ഗ്രൂപ്പ് കൗണ്‍സിലര്‍മാരായ പാര്‍ലിമെന്ററി പാര്‍ട്ടി ലീഡര്‍ അബ്ദുള്‍ ബഷീര്‍ നഗരസഭാ വൈസ് ചെയര്‍പേഴ്സണ്‍ രാജേശ്വരി ശിവരാമന്‍, അബ്ദുള്ളക്കുട്ടി , ശ്രീജ സുരേഷ്, ജിനി മാത്യു എന്നീ അഞ്ചു പേരാണ് ഈ നിലപാടില്‍ പ്രതിഷേധിച്ച് യോഗത്തില്‍ നിന്ന് വിട്ടുനിന്നത്. ബ്ലോക്ക് കോണ്‍ഗ്രസ് വൈസ് പ്രസിഡണ്ട് കൂടിയായ അബ്ദുള്‍ ബഷീര്‍ ആണ് കഴിഞ്ഞ രണ്ടു വര്‍ഷമായി സ്ഥിരമായി പാര്‍ലിമെന്ററി പാര്‍ട്ടി യോഗങ്ങള്‍ വിളിച്ചു കൂട്ടാറ്. എന്നാല്‍ പാര്‍ലിമെന്ററി പാര്‍ട്ടി സെക്രട്ടറി എന്ന സ്ഥാനം വഹിക്കുന്ന എം ആര്‍ ഷാജു തനിക്ക് യോഗം വിളിച്ചുകൂട്ടുവാനുള്ള അധികാരമുണ്ടെന്ന് ഇത് സംബന്ധിച്ചു പ്രതികരിച്ചു. നഗരസഭാ ഭരണത്തില്‍ ഗ്രൂപ്പുകള്‍ വീണ്ടും ശക്തമാകുന്നു എന്നതിന്റെ സൂചന കുറച്ചു നാളുകളായി കണ്ടുവരുന്നതിന്റെ ഏറ്റവും പുതിയ ഉദാഹരണമാണിത്. മുന്നണിയിലില്ലെങ്കിലും കേരള കോണ്‍ഗ്രസിന്റ രണ്ടു പ്രതിനിധികള്‍ പൊതുവെ പാര്‍ലിമെന്ററി പാര്‍ട്ടി യോഗത്തില്‍ ക്ഷണിതാക്കളായി എത്താറുണ്ടെങ്കിലും ഇത്തവണ അവരും വന്നിരുന്നില്ല.

ബിബിന്‍ തുടിയത്ത് ജില്ലാ കെട്ടിട നിര്‍മാണ തൊഴിലാളി സഹകരണ സംഘം പ്രസിഡണ്ട്

ഇരിങ്ങാലക്കുട : തൃശൂര്‍ ജില്ലാ കെട്ടിട നിര്‍മാണ തൊഴിലാളി സഹകരണ സംഘം ക്ലിപ്തം നമ്പര്‍ R – 1372 ന്റെ പുതിയ പ്രസിഡന്റായി ബിബിന്‍ തുടിയത്ത് ബുധനാഴ്ച്ച സംഘം ഓഫീസില്‍ നടന്ന പ്രസിഡണ്ട് തിരഞ്ഞെടുപ്പ് യോഗത്തില്‍ ഏകപക്ഷീയമായി തിരഞ്ഞെടുക്കപ്പെട്ടു. ടിപ്പര്‍ ലോറി വര്‍ക്കേഴ്സ് കോണ്‍ഗ്രസ് ജില്ലാ പ്രസിഡന്റ് , വ്യാപാരി വ്യവസായി കോണ്‍ഗ്രസ് ജില്ലാ വൈസ് പ്രസിഡന്റ്, കെട്ടിട നിര്‍മാണ തൊഴിലാളി കോണ്‍ഗ്രസ് ജില്ലാ സെക്രട്ടറി എന്നി സ്ഥാനങ്ങളും ഇപ്പോള്‍ വഹിക്കുണ്ട് .

കൊടകരയിലെ ബിവറേജ് ഇരിങ്ങാലക്കുടയിലേക്ക് മാറ്റാനുള്ള ഗൂഢനീക്കം: വിജിലന്‍സില്‍ പരാതി

ഇരിങ്ങാലക്കുട : കൊടകരയിലെ ബിവറേജ് ഔട്ട്‌ലെറ്റ് ഇരിങ്ങാലക്കുട സിവില്‍ സ്റ്റേഷന് സമീപത്തേക്ക് മാറ്റി സ്ഥാപിക്കുന്നതിനുള്ള സ്വകാര്യ കെട്ടിട ഉടമയുടേയും ബിവറേജ് കോര്‍പ്പറേഷന്‍ ഉദ്യോഗസ്ഥരുടേയും നീക്കത്തിനെതിരെ വിജിലന്‍സില്‍ പരാതി. കൂത്തുപറമ്പ് ജനകീയ സമിതിയുടേയും കൂത്തുപറമ്പ് റെസിഡന്റ്‌സ് അസോസിയേഷന്‍ ഭാരവാഹികളുമാണ് ജനവാസകേന്ദ്രത്തിലേക്ക് മാറ്റാനുള്ള നീക്കത്തിലെ അഴിമതിയെ കുറിച്ച് അന്വേഷിക്കണമെന്നാവശ്യപ്പെട്ട് തൃശ്ശൂര്‍ വിജിലന്‍സ് ഡി.വൈ.എസ്.പിക്ക് പരാതി നല്‍കിയത്. ദൂരപരിധിയുടെ പേരില്‍ രണ്ട് തവണ എക്‌സൈസ് വകുപ്പ് അനുമതി നിഷേധിച്ച കെട്ടിടത്തിലേക്ക് തന്നെ ഔട്ട്‌ലെറ്റ് കൊണ്ട് കൊണ്ടുവരാനുള്ള നീക്കത്തില്‍ വ്യാപക ക്രമക്കേട് നടന്നതായി ഭാരവാഹികള്‍ പരാതിയില്‍ ആരോപിക്കുന്നു. കൊടകരയിലെ ഔട്ട് ലെറ്റ് പറപ്പൂക്കര പഞ്ചായത്തിലെ കോന്തിപുലം പാടത്തെ ജനവാസമില്ലാത്ത തുരുത്തില്‍ ആരംഭിക്കുന്നതിന് ഒരുമാസം മുമ്പ് എക്‌സൈസ് വകുപ്പ് അനുമതി നല്‍കിയിരുന്നു. എന്നാല്‍ ഇരിങ്ങാലക്കുടയിലെ കെട്ടിട ഉടമയ്ക്ക് വേണ്ടി കോര്‍പ്പറേഷനിലെ ഉന്നതര്‍ ഔട്ട് ലെറ്റ് തുറക്കാതെ ലൈസന്‍സ് മരവിപ്പിച്ചിരിക്കുകയാണെന്ന് പരാതിയില്‍ ചൂണ്ടികാട്ടുന്നു. ഇതുമൂലം കോര്‍പ്പറേഷന് കോടിക്കണക്കിന് രൂപയുടെ നഷ്ടം ഉണ്ടായിട്ടുണ്ടെന്നും ഇതിനെ കുറിച്ചും അന്വേഷിക്കണമെന്നും പരാതിയില്‍ ആവശ്യപ്പെട്ടിട്ടുണ്ട്. കൂത്തുപറമ്പ് ജനകീയ സമിതി ചെയര്‍മാന്‍ സതിഷ് പുളിയത്ത്, റെസിഡന്റ്‌സ് അസോസിയേഷന്‍ സെക്രട്ടറി കെ.എസ് സിജി എന്നിവരാണ് പരാതി നല്‍കിയിരിക്കുന്നത്.

നഗരസഭാ സ്ട്രീറ്റ് ലൈറ്റ് : എല്‍.ഡി.എഫ് നേതൃത്വത്തിലുള്ള പൊതുമരാമത്ത് വകുപ്പ് ഏറ്റെടുക്കണം – കൗണ്‍സിലില്‍ ബി.ജെ.പി യുടെ കുത്തിയിരിപ്പു സമരം

ഇരിങ്ങാലക്കുട : നഗരസഭയിലെ സ്റ്റാന്റിംഗ് കമ്മിറ്റികള്‍ നിയമാനുസരണം പ്രവര്‍ത്തിക്കണമെന്നും, തെരുവ് വിളക്കുകളുടെ ചുമതല നിയമപ്രകാരം നിര്‍വഹിക്കേണ്ട എല്‍ ഡി എഫ് ഭരണത്തിലുള്ള പൊതുമരാമത്ത് സ്റ്റാന്റിംഗ് കമ്മിറ്റി അത് നിര്‍വഹിക്കണമെന്നും ആവശ്യപ്പെട്ട് ഇരിങ്ങാലക്കുട നഗരസഭയിലെ ബി ജെ പി അംഗങ്ങള്‍ നഗരസഭ കൗണ്‍സില്‍ ഹാളില്‍ കുത്തിയിരിപ്പ് സത്യാഗ്രഹം നടത്തി. ബി ജെ പി അംഗങ്ങളായ സന്തോഷ് ബോബന്‍, രമേശ് വാരിയര്‍, അമ്പിളി ജയന്‍ എന്നിവരാണ് സത്യാഗ്രഹം നടത്തിയത്. നിലവിലെ കൗണ്‍സില്‍ അധികാരത്തില്‍ വന്നതിനു ശേഷമുണ്ടായിട്ടുള്ള എല്ലാ കൗണ്‍സില്‍ യോഗങ്ങളിലും തെരുവ് വിളക്കുകളുടെ പേരില്‍ എല്‍ ഡി എഫ് പ്രശ്നങ്ങളുണ്ടാക്കിയിരുന്നു. നിരവധി തവണ ചെയര്‍പേഴ്‌സനെ തടയുകയും ചെയ്തിരുന്നു. എന്നാല്‍ തെരുവ് വിളക്കുകളുടെ ചുമതല എല്‍ ഡി എഫ് നിലവില്‍ ഭരിക്കുന്ന പൊതുമരാമത്ത് സ്റ്റാന്‍ഡിങ് കമ്മിറ്റിയ്ക്കാണ്. 6 അംഗങ്ങളുള്ള പൊതുമരാമത്തു കമ്മിറ്റിയുടെ ചെയര്‍മാന്‍ അടക്കം 4 പേര്‍ എല്‍ ഡി എഫ് ആണ്. കൗണ്‍സില്‍ അധികാരത്തില്‍ വന്ന് 2 വര്‍ഷമായിട്ടും എല്‍ ഡി എഫ് തെരുവ് വിളക്കുകളുടെ ചുമതല ഏറ്റെടുത്തിട്ടില്ല. കോണ്‍ഗ്രസിലെ വികസന സ്റ്റാന്റിംഗ് കമ്മിറ്റി ചെയര്‍മാന്‍ ആണ് ഇതെല്ലാം ചെയ്യുന്നത് എന്ന് ബി ജെ പി കൗണ്‍സിലര്‍മാര്‍ ആരോപിച്ചു. നിയമാനുസൃതം എല്‍ ഡി എഫ് ചെയ്യേണ്ട കാര്യങ്ങള്‍ ചെയ്യാതിരിക്കുകയും മറ്റുള്ളവര്‍ അത് കൈകാര്യം ചെയ്യുകയും ചെയ്യുന്ന രീതി ശരിയല്ലെന്ന് ബിജെപി പാര്‍ലിമെന്ററി പാര്‍ട്ടി ലീഡര്‍ സന്തോഷ് ബോബന്‍ പറഞ്ഞു. 50 ലക്ഷത്തോളം രൂപ ഒരു വര്‍ഷം ചിലവാക്കിയിട്ടും നഗര സഭയിലെ മുക്കാല്‍ ഭാഗം ലൈറ്റുകളും ഇപ്പോള്‍ കത്തുന്നില്ല. കൗണ്‍സിലര്‍മാരെ ജനങ്ങള്‍ ചീത്ത വിളിക്കുന്ന അവസ്ഥയാണ് ഇപ്പോള്‍ എന്നും ഈ കെടുകാര്യസ്ഥതയ്ക്ക് യു ഡി എഫ് പോലെ തന്നെ എല്‍ ഡി എഫും തുല്യ ഉത്തരവാദികളാണെന്നു ഇവര്‍ ആരോപിച്ചു.

ഓട്ടോമാറ്റിക് തെരുവ് വിളക്കുകളെത്തി, പക്ഷെ ഏതു വാര്‍ഡില്‍ നിന്ന് ആരംഭിക്കുമെന്നതിനെ ചൊല്ലി കൗണ്‍സിലര്‍മാര്‍ തമ്മില്‍ തര്‍ക്കം

ഇരിങ്ങാലക്കുട : നഗരസഭയില്‍ വഴിവിളക്കുകള്‍ കത്തുന്നില്ലെന്ന മാസങ്ങളായുള്ള പരാതിയെ തുടര്‍ന്ന് 400 ആധുനിക ഓട്ടോമാറ്റിക് ബള്‍ബുകള്‍ നഗരസഭയിലെത്തിയെങ്കിലും ഏതു വാര്‍ഡ് മുതല്‍ ബള്‍ബുകള്‍ ഇട്ടു തുടങ്ങണമെന്നതിനെ ചൊല്ലി ബുധനാഴ്ച്ച ചേര്‍ന്ന കൗണ്‍സിലില്‍ തര്‍ക്കം. താന്‍ 41- ാം വാര്‍ഡുകാരനായതിനാല്‍ എല്ലാം അവസാനമേ കിട്ടൂ എന്ന കൗണ്‍സിലര്‍ സഹദേവന്റെ പരാതിയില്‍ നിന്നാരംഭിച്ച ബഹളത്തെ തുടര്‍ന്ന് മറ്റു കൗണ്‍സിലര്‍മാരെ രാഷ്ട്രീയ ഭേദമന്യേ തങ്ങളുടെ വാര്‍ഡുകളില്‍ ആദ്യം ലൈറ്റുകളെത്തണമെന്നു നിര്‍ബന്ധം പിടിക്കുകയായിരുന്നു. 20 ബള്‍ബുകള്‍ വീതമാണ് ഒരു വാര്‍ഡിലേക്ക് ആദ്യഘട്ടമെന്ന നിലയില്‍ അനുവദിക്കുന്നതെന്ന് സ്റ്റാന്റിംഗ് കമ്മിറ്റി ചെയര്‍മാന്‍ അഡ്വ വി സി വര്‍ഗീസ് പറഞ്ഞു. ഇതില്‍ പത്തെണ്ണം ഓട്ടോമാറ്റിക് ബള്‍ബുകളും ബാക്കി റിപ്പയര്‍ ചെയ്തു നല്കുന്നതുമായിരിക്കും. പൊറത്തിശേരി മേഖലയ്ക്കും, ഇരിങ്ങാലക്കുട മേഖലയ്ക്കും ഓരോ വണ്ടികള്‍ വീതം ബള്‍ബിടാന്‍ അനുവദിച്ചിട്ടുണ്ട്. ആദ്യം ഒന്നാം വാര്‍ഡ്, അടുത്തത് 41- ാം വാര്‍ഡ് പിന്നെ രണ്ടാം വാര്‍ഡും 40- ാം വാര്‍ഡും എന്ന ഒരു നിര്‍ദ്ദേശം വാര്‍ഡുകളിലെ തുടക്കക്കാര്‍ക്കും വാലറ്റക്കാര്‍ക്കും സന്തോഷം പകര്‍ന്നെങ്കിലും ക്രമനമ്പര്‍ മധ്യത്തില്‍ വരുന്നവര്‍ പ്രതിഷേധവുമായി എണീറ്റു. എന്നാല്‍ ഇവരെയും പരിഗണിക്കാമെന്ന് നഗരസഭ ചെയര്‍പേഴ്സണ്‍ നിമ്യ ഷിജു പറഞ്ഞപ്പോള്‍ ആദ്യം ശാന്തരായവര്‍ ഉടനെ രോഷാകുലരായി. അവസാനം നിയമം നിയമത്തിന്റെ വഴിക്ക് ക്രമനമ്പര്‍ അനുസരിച്ചു
മാത്രമേ ഇടാന്‍ പറ്റുള്ളൂ എന്നും ഇക്കാര്യത്തില്‍ എല്ലാവരെയുമൊരുപോലെ സന്തോഷിപ്പിക്കാന്‍ സാധിക്കില്ലെന്ന് ചെയര്‍പേഴ്സണ്‍ കര്‍ക്കശ നിലപാടെടുക്കുകയായിരുന്നു. കൗണ്‍സില്‍ എന്ത് തീരുമാനിച്ചലും അടുത്ത വാര്‍ഡില്‍ ബള്‍ബിടാന്‍ വരുമ്പോള്‍ തൊട്ടടുത്ത തന്റെ വാര്‍ഡിലേക്ക് വാഹനം നിര്‍ബന്ധമായി കൊണ്ട് പോകുമെന്നു മനസ്സില്‍ തീരുമാനിച്ചാണ് പല കൗണ്‍സിലര്‍മാരും കൗണ്‍സില്‍ വിട്ടത്.

കേന്ദ്രസര്‍ക്കാരിന്റെ കര്‍ഷകദ്രോഹ നയങ്ങള്‍ക്കെതിരെയുള്ള സംയുക്ത കര്‍ഷകസമിതിയുടെ കര്‍ഷക മാര്‍ച്ചിന്റെ പ്രചാരണ ജാഥയ്ക്ക് ഇരിങ്ങാലക്കുടയില്‍ സ്വീകരണം നല്‍കി

ഇരിങ്ങാലക്കുട : കേന്ദ്ര സര്‍ക്കാരിന്റെ കര്‍ഷകദ്രോഹ നയങ്ങള്‍ക്കെതിരെ സംയുക്ത കര്‍ഷക സമിതിയുടെ നേതൃത്വത്തില്‍ സെപ്റ്റംബര്‍ 25 ന് രാജ്ഭവനിലേക്കും ജില്ലാ കേന്ദ്രങ്ങളിലേക്കും നടത്താനിരിക്കുന്ന കര്‍ഷക മാര്‍ച്ചിന്റെ മുന്നോടിയായി ഇരിങ്ങാലക്കുടയിലെത്തിയ സംസ്ഥാന മേഖല പ്രചാരണ ജാഥയ്ക്ക് ടൌണ്‍ ഹാള്‍ പരിസരത്ത് സംയുക്ത കര്‍ഷക സമിതി ഇരിങ്ങാലക്കുട മണ്ഡലം കമ്മിറ്റിയുടെ നേതൃത്വത്തില്‍ സ്വീകരണം നല്‍കി. കാര്‍ഷിക കടങ്ങള്‍ എഴുതിത്തള്ളാന്‍ കേന്ദ്ര സര്‍ക്കാര്‍ തയ്യാറാവുക, കാര്‍ഷികോല്പന്നങ്ങള്‍ക്ക് ഉല്പാദന ചിലവും അതിന്റെ 50 ശതമാനവും ചേര്‍ത്തു താങ്ങുവില നിശ്ചയിക്കുക, നാളികേര മേഖലയിലെ പ്രതിസന്ധിയ്ക്ക് കാരണമായ ഇറക്കുമതി നയം തിരുത്തുക തുടങ്ങി പതിനൊന്നോളം ആവശ്യങ്ങള്‍ ഉന്നയിച്ചാണ് മാര്‍ച്ച്.

കുരുന്നുകളുടെ കൊഞ്ചലുമായി കിഡ്സ്‌ഫെസ്റ് 2017 നടത്തി

ആനന്ദപുരം : കുരുന്നുകളുടെ കൊഞ്ചലുമായി ആനന്ദപുരം ഗവ യു പി സ്‌കൂളില്‍ കിഡ്സ്‌ഫെസ്റ് 2017 നടത്തി. ആനന്ദപുരം, മുരിയാട് വില്ലേജിലെ അങ്കണവാടികളിലെ കുട്ടികള്‍ പങ്കെടുത്തു. മുരിയാട് ഗ്രാമ പഞ്ചായത്ത് പ്രസിഡണ്ട് സരള വിക്രമന്‍ പരിപാടി ഉദ്‌ഘാടനം ചെയ്തു. പി ടി എ പ്രസിഡണ്ട് കെ കെ സന്തോഷിന്റെ അധ്യക്ഷത വഹിച്ച യോഗത്തില്‍ ഹെഡ്മാസ്റ്റര്‍ ബോബന്‍ സ്വാഗതം പറഞ്ഞു. തുടര്‍ന്ന് കഥ പറയല്‍, ആക്ഷന്‍ സോങ്, പ്രച്ഛന്നവേഷം, കസേരകളി, മുത്തുപെറുക്കല്‍ എന്നിങ്ങനെ വിവിധങ്ങളായ മത്സരങ്ങള്‍ നടന്നു. സമാപന സമ്മേളനം വിദ്യാഭ്യാസ സ്റ്റാന്റിംഗ് കമ്മിറ്റി ചെയര്‍മാന്‍ മോളി ജേക്കബ് ഉദ്‌ഘാടനം ചെയ്തു. പതിനേഴാം വാര്‍ഡ് മെമ്പര്‍ എ എം ജോണ്‍സന്‍, മൂന്നാം വാര്‍ഡ് മെമ്പര്‍ വൃന്ദകുമാരി എന്നിവര്‍ പങ്കെടുത്തു. വിജയികള്‍ക്ക് സമ്മാനദാനം നടത്തി.

കുറി കമ്പനി മാനേജര്‍ ആത്മഹത്യ ചെയ്ത സംഭവത്തില്‍ മുന്‍ എം.ഡി അറസ്റ്റില്‍

ഇരിങ്ങാലക്കുട : ബസ്സ് സ്റ്റാന്റിന് സമീപമുള്ള നിവ്യ കുറിസ് മാനേജര്‍ കൊടകര കോടാലി സ്വദേശി ജോസഫ് ചെങ്ങിനിയാടന്‍ പെട്രോള്‍ ഒഴിച്ച് തീ കൊളുത്തി ആത്മഹത്യ ചെയ്ത സംഭവത്തില്‍ കമ്പനിയുടെ മുന്‍ എം.ഡി തുറവങ്കാട് സ്വദേശി അക്കരക്കാരന്‍ ജോയ് എം.ജെയെ (52) ഇരിങ്ങാലക്കുട സി.ഐ സുരേഷ് കുമാറും സംഘവും അറസ്റ്റ് ചെയ്തു. കമ്പനിയിലെ മാനേജറായിരുന്ന കൊടകര കോടാലി സ്വദേശി ജോസഫ് ചെങ്ങിനിയാടന്‍ (66) ആത്മഹത്യ ചെയ്ത സംഭവത്തിലാണ് പ്രേരണാകുറ്റത്തിന് ഇയാളെ പോലിസ് അറസ്റ്റ് ചെയ്തത്. കഴിഞ്ഞ ഒക്ടോബര്‍ ഏഴിനാണ് സംഭവം. കമ്പനിയിലെ യോഗം കഴിഞ്ഞ ഉടനെ ഗുരുതരമായി പൊള്ളലേറ്റ നിലയില്‍ കണ്ട മാനേജർ ജോസഫിനെ ആദ്യം താലൂക്കാശുപത്രിയിലും പിന്നിട് തൃശ്ശൂരിലെ സ്വകാര്യ മെഡിക്കല്‍ കോളേജിലേക്ക് മാറ്റുകയുമായിരുന്നു. മരണകിടക്കയില്‍ വെച്ച് ജോയ് മാനസീകമായി പീഡിപ്പിച്ചുവെന്ന ജോസഫ് മജിസ്‌ട്രേറ്റിന് നല്‍കിയ മരണമൊഴിയുടെ അടിസ്ഥാനത്തില്‍ പോലിസ് കേസ് ആത്മഹത്യപ്രേരണകുറ്റമാക്കി റജിസ്റ്റര്‍ ചെയ്യുകയായിരുന്നു. കോടതിയില്‍ ഹാജരാക്കിയ ജോയിയെ റിമാന്റ് ചെയ്തു. . സംസ്ഥാന അധ്യാപക അവാര്‍ഡ് ജേതാവായിരുന്നു . സ്കൗട്ട് ആന്‍ഡ് ഗൈഡ്‌സിന്റെ ചുമതലക്കാരനായിരുന്നു. വിരമിച്ചതിന് ശേഷം കുറിക്കമ്പനിയില്‍ മാനേജരായി ജോലി ചെയ്തു വരികയായിരുന്നു. അന്വേഷണ സംഘത്തില്‍ എ.എസ്.ഐ പി.കെ സുരേഷ്, സീനിയര്‍ സി.പി.ഒ മുരുകേഷ് എന്നിവരും ഉണ്ടായിരുന്നു.

എസ് എന്‍ സ്‌കൂളില്‍ ‘അമ്മവായന’ പദ്ധതി ആരംഭിച്ചു

ഇരിങ്ങാലക്കുട : എസ്എന്‍ എല്‍ പി സ്‌കൂളിന്റെയും എസ് എന്‍ പബ്ലിക് ലൈബ്രറിയുടെയും സംയുക്താഭിമുഖ്യത്തില്‍ നടന്ന ‘അമ്മവായന’ പദ്ധതിയുടെ ഉദ്‌ഘാടനം എസ് എന്‍ സ്‌കൂളിലെ പ്രഥമ ബാച്ചിലെ (1964) വിദ്യാര്‍ത്ഥിനി ഹണിബക്ക് എസ് എന്‍ എല്‍ പി സ്‌കൂളിലെ വിദ്യാര്‍ത്ഥികളുടെ മുത്തശ്ശിമാര്‍ക്ക് പുസ്തകം കൈമാറിക്കൊണ്ട് നിര്‍വഹിച്ചു. വര്‍ത്തമാനകാലത്തെ വിദ്യാഭ്യാസരംഗത്തെ കലുഷിതമായ അന്തരീക്ഷത്തില്‍ പുസ്തകവായന ഒരു പരിഹാരമാര്‍ഗമാണ് മാറുന്നു എന്ന തിരിച്ചറിവാണ് അമ്മവായനയിലൂടെ ആവിഷ്കൃതമാവുന്നത്. ബ്ലൂവെയില്‍ പോലുള്ള ഗെയിമുകള്‍ കുട്ടികളുടെ സ്വാഭാവിക ബാല്യം നഷ്ടപ്പെടുത്തുകയും അവരെ ഏകാകികളാക്കി തീര്‍ക്കുകയും ചെയ്യുന്നു. തിരക്കുപിടിച്ച ജീവിതയാത്രയില്‍ ആകട്ടെ മാതാപിതാക്കള്‍ക്ക് ഇത് കണ്ടെത്താനുമാകുന്നില്ല. അങ്ങനെയിരിക്കെ വഴി തെറ്റി പോകുന്ന കുട്ടികളെ ശരിയായ ദിശയിലേക്ക് തിരിച്ചു വിടണമെങ്കില്‍ അമ്മമാര്‍ക്ക് അറിവുണ്ടാകണം, മാറ്റങ്ങള്‍ തിരിച്ചറിയാനും കഴിയണം, അതിനുള്ള ഒരു ഔഷധം എന്ന നിലയില്‍ പുസ്തകവായന പ്രയോജനപ്പെടുമെന്ന് ‘അമ്മവായന’ പദ്ധതി വിശദീകരിച്ചു കൊണ്ട് ചടങ്ങില്‍ ദേശീയ അധ്യാപക അവാര്‍ഡ് ജേതാവ് ഭരതന്‍ മാസ്റ്റര്‍ പറഞ്ഞു. ചടങ്ങില്‍ പ്രധാനാദ്ധ്യാപിക പി എസ് ബിജുന, പി ടി എ പ്രസിഡണ്ട് ഷീജ മണികണ്ഠന്‍ എന്നിവര്‍ സംസാരിച്ചു.

മിത്രഭാരതി സോഷ്യല്‍ സര്‍വീസ് സൊസൈറ്റി സമ്മേളനം

ഇരിങ്ങാലക്കുട : മിത്രഭാരതി സോഷ്യല്‍ സര്‍വീസ് സൊസൈറ്റി സമ്മേളനം ഹിന്ദുഐക്യവേദി സംസ്ഥാന സെക്രട്ടറി അഡ്വക്കേറ്റ് രമേഷ് കൂട്ടാല ഉദ്ഘാടനം ചെയ്തു . ഓണാഘോഷ പരിപാടികളുടെ ഭാഗമായി നടത്തിയ കായികമത്സരങ്ങളിലെ വിജയികള്‍ക്ക് ചടങ്ങില്‍ സമ്മാനം വിതരണം ചെയ്തു. ഇരിങ്ങാലക്കുട ഉണ്ണായിവാര്യര്‍ സ്മാരക കലാനിലയം ഹാളില്‍ നടന്ന ചടങ്ങില്‍ സൊസൈറ്റി പ്രസിഡന്റ് കെ.മനോജ് അധ്യക്ഷത വഹിച്ചു. ധില്ലന്‍ അണ്ടിക്കോട്ട്, പി.പരമേശ്വരന്‍ എന്നിവര്‍ ചേര്‍ന്ന് സമ്മാനദാനം നിര്‍വ്വഹിച്ചു. ഭരതകുമാര്‍ കൊറ്റായില്‍, വി.എസ്.ഷൈജു, അനീഷ് പാമടത്ത്, കെ.വി.സന്തോഷ്, ജോജു കൈപറമ്പില്‍, മഹേഷ്. എം. കെ.സുനില്‍കുമാര്‍ തുടങ്ങിയവര്‍ പ്രസംഗിച്ചു. സൊസൈറ്റി വൈസ് പ്രസിഡന്റ് എം.യു. മനോജ് സ്വാഗതവും സെക്രട്ടറി ഷാന്റി കൈപറമ്പില്‍ നന്ദിയും പറഞ്ഞു.

Top
Menu Title