News

തെക്കനച്ചന് ക്രൈസ്റ്റ് കോളേജിന്‍റ യാത്രാമൊഴി

ഇരിങ്ങാലക്കുട : ക്രൈസ്റ്റ് കോളേജിന്റെ പ്രിന്‍സിപ്പല്‍ തെക്കനച്ചന്‍റെ മൃതസംസ്‌കാര പരിപാടിയുടെ മുന്നോടിയായി വെള്ളിയാഴ്ച രാവിലെ അമല മെഡിക്കല്‍ കോളേജ്‌ ഹോസ്‌പിറ്റലില്‍നിന്നും യാത്ര തിരിച്ച വിലാപ യാത്രക്ക് ഇരിങ്ങാലക്കുട നഗരസഭ അതിര്‍ത്തിയായ കരുവന്നൂരില്‍ വച്ച് കോളേജ്‌ മാനേജര്‍ റീത്ത്‌ സമര്‍പ്പിച്ച്‌ സ്വീകരിച്ചു. രാവിലെ കൃത്യം 9 മണിക്ക് കോളേജില്‍ എത്തിചേര്‍ന്ന തെക്കനച്ചന്‍റെ മൃതദേഹത്തിന് അദ്ദേഹത്തിന്റെ ആയിരകണക്കിന് വിദ്യാര്‍ത്ഥികളുടെയും സഹപ്രവര്‍ത്തകരുടെയും സാനിധ്യത്തില്‍ എന്‍.സി.സി ഗാര്‍ഡ് ഓഫ് ഹോണറോടുകൂടി പ്രിന്‍സിപ്പല്‍ ഇന്‍ ചാര്‍ജ് റീത്ത്‌ സമര്‍പ്പിച്ചു .
9:30 മുതല്‍ 10.30 വരെ പൊതുദര്‍ശനം ക്രൈസ്‌റ്റ്‌ കോളേജ്‌ ഓഡിറ്റോറിയത്തില്‍ വച്ച്‌ നടത്തുന്നു. 11 മണി മുതല്‍ 2 മണിവരെ പൊതുദര്‍ശനം ക്രൈസ്റ്റ്‌ ആശ്രമദേവാലയത്തില്‍ നടക്കും. 2 മണിക്ക്‌ മൃതസംസ്‌കാര കര്‍മ്മങ്ങള്‍ ആരംഭിക്കുന്നു. 5 മണിക്ക്‌ അനുശോചന സമ്മേളനം എന്നിവയുണ്ടായിരിക്കും.

വല്ലക്കുന്ന് വിശുദ്ധ അല്‍ഫോന്‍സ ദേവാലയത്തിലെ നേര്‍ച്ച ഊട്ടിന്റെ ഒരുക്കങ്ങള്‍ പൂര്‍ത്തിയായി

 വല്ലക്കുന്ന് : വിശുദ്ധ അല്‍ഫോന്‍സാമ്മയുടെ മരണ തിരുനാളിന്റെയും നേര്‍ച്ച ഊട്ടിന്റെയും ഒരുക്കങ്ങള്‍ വല്ലക്കുന്ന് വിശുദ്ധ അല്‍ഫോന്‍സ ദേവാലയത്തില്‍ പൂര്‍ത്തിയായി. ഒരുക്കങ്ങളുടെ ഭാഗമായി ഇടവക വികാരി റവ. ഫാ. അരുണ്‍ തെക്കിനിയത്ത് പച്ചക്കറി വിഭവങ്ങളില്‍ മത്തങ്ങ മുറിച്ചുകൊണ്ട് നേര്‍ച്ച ഊട്ടിന്റ്റെ പ്രാരംഭ പ്രവര്‍ത്തനങ്ങള്‍ക്ക് തുടക്കം കുറിച്ചു. വിവിധ കമ്മിറ്റി കണ്‍വീനര്‍മാരും കൈക്കാരന്‍മാരും നിരവധി വിശ്വാസികളും സന്നിഹിതരായിരുന്നു. ജൂലൈ 28 വെള്ളിയാഴ്ച രാവിലെ 7 .30 മുതല്‍ 6 മണി വരെയാണ് നേര്‍ച്ച ഊട്ട്. നേര്‍ച്ച ഊട്ട് ദിനത്തില്‍ രാവിലെ 6 .15 , 7 .15 , 4 .30 ,6 എന്നി സമയങ്ങളില്‍ വിശുദ്ധ കുര്‍ബാനയും , നൊവേന ,പ്രദക്ഷിണം, ലദീഞ് , തിരുശേഷിപ്പ് , വന്ദനം എന്നിവയും ഉണ്ടാകും. രാവിലെ 10 മണിക്കുള്ള ആഘോഷമായ തിരുനാള്‍ കുബാനക്ക് റവ. ഫാ. ജോസഫ് മണ്ടകത്ത് മുഖ്യകാര്‍മ്മികനും റവ. ഡോ. ഫാ. വിന്‍സെന്റ് ആലപ്പാട്ട് സന്ദേശം നല്‍കും. വൃദ്ധരായ മാതാപിതാക്കള്‍ക്കും , രോഗികള്‍ക്കും, കൈകുഞ്ഞുങ്ങളുള്ള അമ്മമാര്‍ക്കും നേര്‍ച്ച ഊട്ടില്‍ പ്രത്യേകം സൗകര്യം ഒരുക്കിയിട്ടുണ്ട് . 12 മണി മുതല്‍ 3 മണി വരെ വിശുദ്ധ അല്‍ഫോന്‍സാ സന്നിധിയില്‍ കുഞ്ഞുങ്ങളെ അടിമ വയ്ക്കലിനും ചോറൂണിനും ‘അമ്മ തൊട്ടിലില്‍ സമര്‍പ്പിച്ചു പ്രാര്‍ത്ഥിക്കുന്നതിനും ഉള്ള സൗകര്യം ഒരുക്കിയിട്ടുണ്ട്. വാഹനങ്ങള്‍ക്ക് വിശാലമായ പാര്‍ക്കിംഗ് സൗകര്യവും ഒരുക്കിയിട്ടുണ്ട് എന്ന് തിരുനാള്‍ കമ്മിറ്റിക്കു വേണ്ടി റവ. ഫാ. അരുണ്‍ തെക്കിനിയത്ത് , ജനറല്‍ കണ്‍വീനര്‍മാരായ പോള്‍ മരത്തംപിള്ളി , ആന്റണി തണ്ടിയെക്കൽ, കൈക്കാരന്മാരായ വിന്‍സന്‍ കോട്ടപ്പടിക്കല്‍, തരിയത്ത് മൂഞ്ഞേലി, വിന്‍സന്‍ കൂനമ്മാവ് , പബ്ലിസിറ്റി കണ്‍വീനര്‍മാരായ ജോണ്‍സണ്‍ കോക്കാട്ട് , മെജോ തൊടുപറമ്പില്‍ , കോളിന്‍സ് കോക്കാട് എന്നിവര്‍ അറിയിച്ചു.

ഷണ്‍മുഖം കനാല്‍പദ്ധതിക്ക് ഏഴ് കോടിയുടെ അനുവാദം : എം എല്‍ എ ജനങ്ങളെ തെറ്റിദ്ധരിപ്പിക്കുനെന്ന് ഉണ്ണിയാടന്‍

ഇരിങ്ങാലക്കുട : ഷണ്‍മുഖം കനാലിന്റെ രണ്ടാം ഘട്ട പുനരുദ്ധാരണ പദ്ധതിക്ക് ഏഴ് കോടി രൂപ അനുവദിച്ചതും ഭരണാനുമതിയും സാങ്കേതികാനുമതിയും നല്‍കി കരാര്‍ നടപടികള്‍ പൂര്‍ത്തീകരിച്ച് കരാറുക്കാരനെ നിര്‍മ്മാണ പ്രവര്‍ത്തനങ്ങള്‍ ഏല്‍പ്പിച്ചതും കഴിഞ്ഞ യുഡിഎഫ് സര്‍ക്കാരിന്റെ കാലത്താണെന്ന് മുന്‍ സര്‍ക്കാര്‍ ചീഫ് വിപ് തോമസ് ഉണ്ണിയാടന്‍ പറഞ്ഞു.2015 മാര്‍ച്ച് 21 ന് സാങ്കേതികാനുമതി ലഭിച്ച (ജി ഒ നമ്പര്‍ 125/സിഇ/ഐ ആന്റ് എ 2014- 15) ഈ പദ്ധതിയുടെ നിര്‍മ്മാണം 2016 ഫെബ്രവരി 26 ന് ആരംഭിച്ചിരുന്നതുമാണ്. സംഗതി ഇങ്ങനെയായിരിക്കെ ഇപ്പോള്‍ ഏഴ് കോടി രൂപ അനുവദിച്ചെന്നും പ്രവര്‍ത്തനങ്ങള്‍ ആരംഭിച്ചുവെന്നും പ്രസ്താവിക്കുന്നത് തന്റെ ശ്രമഫലമായാണ് ഈ പദ്ധതി നടപ്പാക്കുന്നതെന്ന് ജനങ്ങളെ തെറ്റിദ്ധരിപ്പിക്കാനാണെന്നും ഉണ്ണിയാടന്‍ പറഞ്ഞു. നാല്‍പത്തിയഞ്ച് വര്‍ഷങ്ങളോളം അവഗണിക്കപ്പെട്ട് മണ്ണിടിഞ്ഞും മാലിന്യം നിക്ഷേപിക്കപ്പെട്ടു സംരക്ഷിക്കപ്പെടാതെ ഏറെകുറെ അപ്രത്യക്ഷമായി കൊണ്ടിരുന്ന ഷണ്മുഖം കനാലിനെ സംരക്ഷിക്കുക എന്ന ലക്ഷ്യമിട്ട് 2006 ലാണ് ഷണ്‍മുഖം കനാലിന്റെ പുനര്‍ നിര്‍മ്മാണം ആരംഭിച്ചത്. ഒന്നാം ഘട്ടമായി 77 ലക്ഷം രൂപ ചിലവഴിച്ച് 1400 മീറ്റര്‍ നിര്‍മ്മാണം പൂര്‍ത്തീകരിച്ചിരുന്നു എന്ന് പത്രക്കുറിപ്പിലൂടെ ഉണ്ണിയാടന്‍ പറഞ്ഞു

ഡ്രൈവിംഗ് സ്‌കൂളുകാരുടെ നിസഹകരണം : ആര്‍ ടി ഒ ഓഫീസ് നിലപാടുകള്‍ ശക്തമാക്കുന്നു

ഇരിങ്ങാലക്കുട : തുടര്‍ച്ചയായ മൂന്നാം ദിവസവും ഇരിങ്ങാലക്കുട സബ് ആര്‍ ടി ഓ ഓഫീസിന്‍റെ കീഴിലുള്ള ഗാന്ധിഗ്രാം ഗ്രൗണ്ടിലെ ഡ്രൈവിംഗ് ടെസ്റ്റിന് ഡ്രൈവിംഗ് സ്കൂള്‍ അസോസിയേഷന്‍ ഉദ്യോഗാര്‍ത്ഥികള്‍ക്ക് വാഹനം നല്‍കാത്തതിനാല്‍ വ്യാഴാഴ്ചയും ടെസ്റ്റ്  മുടങ്ങി. എന്നാല്‍ സ്വകാര്യ വാഹനവുമായി എത്തിയവര്‍ക്ക് ഉദ്യോഗസ്ഥര്‍ ടെസ്റ്റ് നല്‍കി. എം വി ഐ വിദ്യാര്‍ത്ഥികളെ അകാരണമായി തോല്പിക്കുന്നു എന്ന പരാതിയിന്മേല്‍ അദ്ദേഹത്തിനെതിരെ നടപടി എടുക്കും വരെ ഡ്രൈവിംഗ് സ്‌കൂള്‍ ഓണേഴ്‌സ് അസോസിയേഷന്റെ നേതൃത്വത്തില്‍ ഡ്രൈവിംഗ് സ്‌കൂളുകളുടെ വാഹനങ്ങള്‍ ഉദ്യോഗാര്‍ത്ഥികള്‍ക്ക്‌ ടെസ്റ്റിന് നല്‍കാതിരുന്നത് മൂലമാണ് തുടര്‍ച്ചയായി ഗ്രൗണ്ട് ടെസ്റ്റും റോഡ് ടെസ്റ്റും മുടങ്ങാന്‍ കാരണം. ഡ്രൈവിംഗ് ടെസ്റ്റ് മുടക്കുന്നവര്‍ക്ക് എതിരെ കര്‍ശന നിലപാടുമായി ആര്‍ ടി ഓഫിസ് രംഗത്ത് വരുവാനുദ്ദേശിക്കുന്നുണ്ട്. ടെസ്റ്റ് മുടങ്ങുന്നവര്‍ക്ക് പുതിയ ടെസ്റ്റ് ഡേറ്റ് നിയമപ്രകാരം അടുത്ത ടെസ്റ്റ്ഡേറ്റ് ഓണ്‍ലൈനില്‍ നിന്ന് രണ്ടു മാസത്തെ കാലതാമസത്തിനു ശേഷം മാത്രമേ ഇനി ലഭിക്കുകയുള്ളു എന്ന് ആര്‍.ടി.ഓ വൃത്തങ്ങളില്‍ നിന്ന് അറിയുവാന്‍ കഴിഞ്ഞു. ഗാന്ധിഗ്രാം ഗ്രൗണ്ടില്‍ ഡ്രൈവിംഗ് ടെസ്റ്റിന് ഹാജരാവുന്ന അപേക്ഷകര്‍ക്ക് ഇനി സ്വകാര്യ വാഹനങ്ങളിലും ഡ്രൈവിംഗ് ടെസ്റ്റ് നടത്താമെന്ന് ഇരിങ്ങാലക്കുട ജോയിന്റ് ആര്‍ ടി ഒ അറിയിച്ചിരുന്നു. സാധുതയുള്ള രേഖകളോട് കൂടിയ “L” പതിപ്പിച്ച ഏതു തരം സ്വകാര്യ വാഹനങ്ങളിലും ലേര്‍ണേഴ്‌സ് ലൈസന്‍സും അനുബന്ധ രേഖകളുമായി മുന്‍ നിശ്ചയിച്ച തീയതികളില്‍ ഹാജരായാല്‍ ഇടനിലക്കാരില്ലാതെ പൊതുജനങ്ങള്‍ക്ക് ഡ്രൈവിംഗ് ടെസ്റ്റ് നടത്താവുന്നതാണെന്നും, സര്‍ക്കാര്‍ രേഖകളായ ലേര്‍ണേഴ്‌സ് ലൈസെന്‍സ് മുതലായ രേഖകള്‍ ഡ്രൈവിംഗ് സ്‌കൂള്‍ അടക്കമുള്ള ഇടനിലക്കാര്‍ തടഞ്ഞു വയ്ക്കുന്നത് ക്രിമിനല്‍ കുറ്റമാണെന്നും ജോയിന്റ് ആര്‍ ടി ഒ കഴിഞ്ഞ ദിവസം അറിയിച്ചിരുന്നെങ്കിലും വ്യാഴാഴ്ച്ച ടെസ്റ്റിനായി  ചുരുക്കം ഉദ്യോഗാര്‍ത്ഥികള്‍ എത്തിയിരുന്നുള്ളു . ഉദ്യോഗാര്‍ത്ഥികളെ ഡ്രൈവിംഗ് സ്‌കൂളുകാര്‍ ടെസ്റ്റ് നടക്കില്ലെന്ന് മുന്‍കൂട്ടി അറിയിച്ചതിനെ തുടര്‍ന്നാണ് ഇവരില്‍ പലരും വരാതിരുന്നത്. പലരുടെയും ടെസ്റ്റിനാവശ്യമായ രേഖകളും ഡ്രൈവിംഗ് സ്‌കൂളുകാരുടെ പക്കലാണ്. ഓടിച്ചു പരിശീലിച്ച വാഹനത്തില്‍ തന്നെ ടെസ്റ്റ് എടുക്കാനാണ് പലര്‍ക്കും താല്പര്യം എന്നുള്ളതും സ്വകാര്യ വാഹനത്തില്‍ ടെസ്റ്റ് എടുത്താല്‍ വിജയിക്കുമോ എന്ന ആത്മവിശ്വാസ കുറവ് ഇതിനു പുറകിലുണ്ട്. ഡ്രൈവിംഗ് ടെസ്റ്റ് പ്രതിസന്ധിയിലായതിനാല്‍ തങ്ങളെ ജില്ലാ ട്രാന്‍സ്‌പോര്‍ട്ട് കമ്മീഷ്ണര്‍ അടുത്ത ദിവസം ചര്‍ച്ചക്ക് വിളിച്ചിട്ടുണ്ടെന്നു ഡ്രൈവിംഗ് സ്‌കൂള്‍ ഓണേഴ്‌സ് അസോസിയേഷന്‍ പറഞ്ഞു.

ഡ്രൈവിംഗ് ടെസ്റ്റിന് സ്വകാര്യ വാഹനവുമായി എത്തിയവര്‍ക്ക് ടെസ്റ്റ് എടുക്കാന്‍ ഗ്രൗണ്ടില്‍ ഉണ്ടായിരുന്ന കമ്പികള്‍ ഡ്രൈവിംഗ് സ്കൂളുകാര്‍ കൊണ്ടുപോയതിനെ തുടര്‍ന്ന് ടെസ്റ്റ് അല്പസമയം വൈകി . ഉദ്യോഗാര്‍ഥികളുടെ അഭ്യര്‍ത്ഥന മാനിച്ച് ഡ്രൈവിംഗ് സ്കൂളുകാര്‍ കമ്പികള്‍ ഇവര്‍ക്ക് നല്‍കുകയും ഉദ്യോഗസ്ഥര്‍ അത് ഗ്രൗണ്ടില്‍ സ്ഥാപിച്ചു റിബണ്‍ കെട്ടിയതിനു ശേഷം ആണ് ടെസ്റ്റ് നടന്നത് .  വെള്ളിയാഴ്ച ഉച്ചക്ക് ജോയിന്റ് ആര്‍ ടി ഒ ഓഫീസില്‍ ചര്‍ച്ച ഉണ്ടെന്നും അതുവരെ സമരം തുടരുമെന്നും ഡ്രൈവിംഗ് സ്കൂള്‍ അസോസിയേഷന്‍ ഭാരവാഹികള്‍ അറിയിച്ചു.

വെള്ളിയാഴ്ച വൈദ്യുതി മുടങ്ങും

ഇരിങ്ങാലക്കുട : നമ്പര്‍ വണ്‍ സെക്‌ഷന്‍റെ പരിധിയില്‍ വരുന്ന അരിപ്പാലം, കുന്നത്തങ്ങാടി, കരുവാപ്പടി, വളവനങ്ങാടി , കെട്ടുചിറ എന്നിവിടങ്ങളില്‍ 11 കെ വി ലൈനുകളില്‍ അറ്റകുറ്റപ്പണി നടക്കുന്നതിനാല്‍ ജൂലൈ 28 വെള്ളിയാഴ്ച രാവിലെ 8:30 മുതല്‍ വൈകീട്ട് 5:30 വരെ വൈദ്യുതി മുടങ്ങുമെന്ന് അസി. എഞ്ചിനീയര്‍ അറിയിച്ചു.

തുടര്‍നടപടികള്‍ അനിശ്ചിതത്വത്തിലായ ഇരിങ്ങാലക്കുട വ്യവസായ പാര്‍ക്ക് യാഥാര്‍ത്ഥ്യമാകാന്‍ വേണ്ടത് നൂറേക്കര്‍ സ്ഥലം

ഇരിങ്ങാലക്കുട: സംസ്ഥാനത്തിന്റെ വ്യവസായ ഭൂപടത്തില്‍ ഇരിങ്ങാലക്കുടയും സ്ഥാനമുറപ്പിക്കും എന്ന പ്രതീക്ഷയോടെ കാത്തിരുന്ന വ്യവസായ പാര്‍ക്കിന്റെ നടപടികള്‍ അനിശ്ചിതത്വത്തില്‍. വ്യവസായ പാര്‍ക്കിനും കിന്‍ഫ്രാ പാര്‍ക്കിനും ആവശ്യമായ സ്ഥലം ഏറ്റെടുക്കല്‍ കഴിയാത്തതാണ് പദ്ധതി ഇനിയും യാഥാര്‍ത്ഥ്യമാകാത്തതിന് കാരണം. നേരത്തെ തണ്ണീര്‍ത്തടങ്ങള്‍ നികത്തി ഇതിനാവശ്യമായ ഭൂമി ലഭ്യമാക്കാന്‍ നീക്കം നടന്നിരുന്നെങ്കിലും അത് ഫലപ്രദമായില്ല. പദ്ധതി യാഥാര്‍ത്ഥ്യമാകാന്‍ സര്‍ക്കാറിന് നൂറേക്കറോളം കരഭൂമി വേണം . ഇരിങ്ങാലക്കുട നിയോജക മണ്ഡലത്തില്‍ ഇത്രയും സ്ഥലം കണ്ടെത്തുകയാണ് ജനപ്രതിനിധികളുടേയും ഉദ്യോഗസ്ഥരുടേയും മുന്നിലുള്ള വെല്ലുവിളി. കഴിഞ്ഞ യു.ഡി.എഫ് സര്‍ക്കാരിന്റെ കാലത്താണ് ഇരിങ്ങാലക്കുട മേഖലയുടെ വന്‍ സാമ്പത്തിക മുന്നേറ്റത്തിനുതകുന്ന കിന്‍ഫ്ര വ്യവസായ പാര്‍ക്ക് പദ്ധതിയും പടിയൂര്‍ വില്ലേജിലെ വ്യവസായ പാര്‍ക്ക് പദ്ധതിയും പ്രഖ്യാപിച്ചത്. ഇതിന്റെ പ്രാരംഭ പ്രവര്‍ത്തനങ്ങള്‍ക്കായി 2014 ലെ ബജറ്റില്‍ 20 ലക്ഷം രൂപ ബജറ്റില്‍ വകയിരുത്തുകയും ചെയ്തു. ആയിരം കോടി രൂപയുടെ നിക്ഷേപമാണ് പദ്ധതിയിലൂടെ പ്രതിക്ഷിച്ചിരുന്നത്. ഇരുപത്തി അയ്യായിരത്തോളം പേര്‍ക്ക് പ്രത്യക്ഷമായും പരോക്ഷമായും ഈ സംരഭങ്ങളിലൂടെ തൊഴില്‍ ലഭ്യമാക്കാന്‍ സാധിക്കുമെന്നും സര്‍ക്കാര്‍ കണക്കുകൂട്ടിയിരുന്നു. ഇരിങ്ങാലക്കുട നിയോജക മണ്ഡലത്തിലെ പടിയൂര്‍ പഞ്ചായത്തിലാണ് തണ്ണീര്‍ത്തടങ്ങള്‍ ഉള്‍പ്പെട്ട സ്ഥലം വ്യവസായ പാര്‍ക്കിനായി കണ്ടെത്തിയത്. പദ്ധതി യാഥാര്‍ത്ഥ്യമായാല്‍ പിന്നോക്കാവസ്ഥയില്‍ നില്‍ക്കുന്ന പടിയൂര്‍ പഞ്ചായത്തിന് അത് സാമ്പത്തിക ഉയര്‍ച്ചയുണ്ടാകുമെന്നും കരുതിയിരുന്നു. പരിസ്ഥിതി സൗഹൃദമായ ഒരു വ്യവസായ പാര്‍ക്കാണ് വിഭാവനം ചെയ്തിരുന്നത്. എന്നാല്‍ തണ്ണീര്‍തടങ്ങള്‍ നികത്തുന്നതുമായി ബന്ധപ്പെട്ടുണ്ടായ തടസ്സങ്ങള്‍ പദ്ധതിയെ ബാധിച്ചു. തുടര്‍ന്ന് 2016 ഫെബ്രുവരിയിലാണ് അതിന്റെ തുടര്‍ നടപടികള്‍ ആരംഭിച്ചത്. പദ്ധതിക്കാവശ്യമായ സ്ഥലം നികത്താന്‍ സെന്‍ട്രല്‍ വാട്ടര്‍ റെഗുലേറ്ററി അതോറിട്ടിയുടെ അനുമതി ആവശ്യമാണെന്നായിരുന്നു കൃഷി വകുപ്പിന്റെ നിലപാട്. ഈ പ്രദേശത്ത് ‘ റംസാര്‍ ‘ മാനദണ്ഡങ്ങള്‍ പാലിക്കേണ്ടതുള്ളതിനാല്‍ കേന്ദ്ര പരിസ്ഥിതി വകുപ്പിന്റെ അനുമതിയോടെ വേണം പദ്ധതി നടപ്പാക്കാനെന്നും കൃഷി വകുപ്പ് നിര്‍ദ്ദേശിച്ചിരുന്നു. ഇതിനെ തുടര്‍ന്നാണ് പരിസ്ഥിതി നിയമ തടസമൊഴിവാക്കാന്‍ ‘ റംസാര്‍ ‘ നിബന്ധനകളില്‍ ഇളവു നല്‍കി റവന്യൂ വകുപ്പ് സ്ഥലമെടുപ്പ് നടത്തണമെന്ന വ്യവസായ വകുപ്പിന്റെ നിര്‍ദ്ദേശം അന്നത്തെ മന്ത്രിസഭ അംഗീകാരിക്കുകയും ചെയ്തു. മുകുന്ദപുരം താലൂക്കില്‍ എടത്തിരിഞ്ഞി വില്ലേജില്‍ കിന്‍ഫ്രയുടെ അധീനതയില്‍ 80 ഏക്കര്‍ സ്ഥലത്ത് കിന്‍ഫ്ര വ്യവസായ പാര്‍ക്ക് സ്ഥാപിക്കുന്നതിന് 2012 മാര്‍ച്ച് 27ന് നല്‍കിയ അംഗീകാരത്തിന്റെ അനുബന്ധമായാണ് ‘ റംസാര്‍ ‘ ഇളവുകളോടെയുള്ള സ്ഥലമെടുപ്പിന് മന്ത്രിസഭാ യോഗം പ്രത്യേക അനുമതി നല്‍കിയത്. പടിയൂര്‍ വില്ലേജിലെ വ്യവസായ പാര്‍ക്ക് പദ്ധതിയ്ക്കാവശ്യമായ അടിസ്ഥാന സൗകര്യമൊരുക്കാനും നടപടികള്‍ പൂര്‍ത്തിയാക്കിരുന്നു. സ്‌റാര്‍ട്ട് അപ്, ഇന്‍കുബേഷന്‍ സംരംഭങ്ങള്‍ക്ക് പ്രത്യേക പ്രോത്സാഹനവും പദ്ധതി ലക്ഷ്യമിട്ടിരുന്നു. സ്ഥലമെടുപ്പുമായി ബന്ധപ്പെട്ട ജനങ്ങളുടെ അഭിപ്രായങ്ങള്‍ കേള്‍ക്കാനും മറ്റു കാര്യങ്ങള്‍ നേരിട്ടറിയാനും വ്യവസായ വകുപ്പു ഡയറക്ടറുടെ നേതൃത്വത്തിലുള്ള ഉദ്യോഗസ്ഥ സംഘം സന്ദര്‍ശിച്ചിരുന്നു. സ്ഥലമെടുപ്പ് നടപടികളുമായി മുന്നോട്ടുപോയ പദ്ധതി പിന്നെ പതുക്കെ നിശ്ചലമാകുകയായിരുന്നു. എല്‍.ഡി.എഫ് സര്‍ക്കാര്‍ അധികാരത്തിലെത്തിയതോടെ പദ്ധതി വീണ്ടും സജീവമാകുകയാണ്. എന്നാല്‍ തണ്ണീര്‍തടങ്ങള്‍ നികത്തികൊണ്ട് പദ്ധതി വേണ്ടെന്ന നിലപാടാണ് പുതിയ സര്‍ക്കാറിനുള്ളത്. ഇരിങ്ങാലക്കുട നിയോജക മണ്ഡലത്തിലെ ഏത് ഭാഗത്തായാലും അമ്പത് മുതല്‍ നൂറ് ഏക്കര്‍ വരെ സ്ഥലം ലഭ്യമാകുന്ന എവിടേയും പദ്ധതി നടപ്പിലാക്കാന്‍ സര്‍ക്കാര്‍ തയ്യാറാണ്. ഇതിനുള്ള എല്ലാ പിന്തുണയും വ്യവസായ മന്ത്രി അറിയിച്ചിട്ടുണ്ടെന്ന് പ്രൊഫ. കെ.യു അരുണന്‍ എം.എല്‍.എ പറഞ്ഞു. സ്ഥലം ഏറ്റെടുത്താല്‍ ഉടന്‍ തന്നെ പദ്ധതി ആരംഭിക്കാന്‍ വേണ്ട നടപടി സര്‍ക്കാര്‍ എടുക്കുമെന്നും എം.എല്‍.എ കൂട്ടിച്ചേര്‍ത്തു. എന്നാല്‍ ഇരിങ്ങാലക്കുട നിയോജക മണ്ഡലത്തില്‍ കരഭൂമിയായി നൂറേക്കര്‍ ലഭ്യമാകുമോയെന്നാണ് പുതിയ ആശങ്ക.

ഓണത്തിന് ഒരു മുറം പച്ചക്കറി പദ്ധതി ആനന്ദപുരം ഗവ. യു പി സ്കൂളിലും

ആനന്ദപുരം : ഓണത്തിന് ഒരു മുറം പച്ചക്കറി പദ്ധതി ആനന്ദപുരം ഗവ. യു പി സ്കൂളില്‍ ആരംഭിച്ചു . മുരിയാട് ഗ്രാമപഞ്ചായത്ത് പ്രസിഡന്റ് സരള വിക്രമന്‍ കുട്ടികള്‍ക്ക് കൃഷിവകുപ്പ് ഏര്‍പ്പെടുത്തിയ വിത്തുകള്‍ വിതരണം ചെയ്തുകൊണ്ട് ഉദ്ഘാടനം നിര്‍വഹിച്ചു. കൃഷിവകുപ്പും സ്കൂളുകളും സഹകരിച്ചുകൊണ്ടു നടത്തുന്ന വിദ്യാലയ പച്ചക്കറി കൃഷിയുടെ ഉദ്ഘാടനവും തദവസരത്തില്‍ നടന്നു . വിദ്യാഭ്യാസ സ്റ്റാന്റിംഗ് കമ്മിറ്റി ചെയര്‍മാന്‍ മോളി ജേക്കബ് ,കൃഷി ഓഫീസര്‍ റിസമോള്‍ , പി ടി എ പ്രസിഡന്റ് കെ കെ സന്തോഷ്, എന്നിവര്‍ ആശംസകള്‍ അര്‍പ്പിച്ചു സംസാരിച്ചു. ഹെഡ്മാസ്റ്റര്‍ ബോബന്‍ മാസ്റ്റര്‍ സ്വാഗതവും കാര്‍ഷിക ക്ലബ് കണ്‍വീനര്‍ പി ഇന്ദിര നന്ദിയും പറഞ്ഞു. ഗാന്ധിജിയുടെ സ്മരണക്കായി സ്കൂളില്‍ സംരക്ഷിച്ചു വരുന്ന ഗാന്ധിമരത്തെ വണങ്ങികൊണ്ടു ഗാന്ധിദര്‍ശന്‍ അംഗങ്ങളും കാര്‍ഷിക ക്ലബ് പ്രവര്‍ത്തകരും പദ്ധതി ഏറ്റെടുത്തു.

ഷണ്‍മുഖം കനാലിന്റെ പുനരുദ്ധാരണത്തിന് വേണ്ടിയുള്ള രണ്ടാം ഘട്ട പ്രവര്‍ത്തികളുടെ തുക അനുവദിച്ചു

ഷണ്‍മുഖം കനാലിന്റെ പഴയകാല ചിത്രം

ഇരിങ്ങാലക്കുട : ഷണ്‍മുഖം കനാലിന്റെ പുനരുദ്ധാരണത്തിന് വേണ്ടിയുള്ള രണ്ടാം ഘട്ട പ്രവര്‍ത്തികളുടെ തുക അനുവദിച്ചു. 7 കോടി രൂപയാണ് ഇതിനുവേണ്ടി വകയിരിത്തിയിട്ടുള്ളത് എന്ന് പ്രൊഫ കെ യു അരുണന്‍ എം എല്‍ എ അറിയിച്ചു . കനാലിന്റെ 1400 മീറ്റര്‍ മുതല്‍ 4935 മീറ്റര്‍ വരെയുള്ള പ്രദേശത്താണ് രണ്ടാം ഘട്ടത്തില്‍ പ്രവര്‍ത്തികള്‍ നടത്തുക . പടിയൂര്‍ – പൂമംഗലം പഞ്ചായത്തുകളിലൂടെ വന്ന് ഇരിങ്ങാലക്കുട മുന്‍സിപ്പാലിറ്റിയിലെ കനാല്‍ ബേസിലാണ് അവസാനിക്കുക. പ്രവര്‍ത്തിയുടെ ആദ്യപടിയായിട്ടുള്ള സോയില്‍ ഇനിഷ്യല്‍ ലെവല്‍ പരിശോധന ആരംഭിച്ചു കഴിഞ്ഞതായും എം എല്‍ എ അറിയിച്ചു. തൃശൂര്‍ അഡിഷണല്‍ ഇറിഗേഷന്‍ സെക്ഷന്റെ കീഴിലാണ് പ്രവര്‍ത്തികള്‍ നടത്തുന്നത്.

സ്വത്ത് കൈവശപ്പെടുത്തിയ ശേഷം വാര്‍ധക്യത്തില്‍ മാതാപിതാക്കളെ ഉപേക്ഷിക്കുന്ന മക്കളുടെ പേരില്‍ നിയമനടപടികള്‍ സ്വീകരിക്കണം – പെന്‍ഷനേഴ്‌സ് യൂണിയന്‍

പൂമംഗലം : കേരള സ്റ്റേറ്റ് സര്‍വീസ് പെന്‍ഷനേഴ്‌സ് യൂണിയന്‍ പൂമംഗലം യൂണിറ്റ് കണ്‍വെന്‍ഷന്‍ സംഘടിപ്പിച്ചു. കണ്‍വെന്‍ഷന്‍ ബ്ലോക്ക് പ്രസിഡന്റ് പി ഐ ബാലന്‍ മാസ്റ്റര്‍ ഉദ്ഘാടനം ചെയ്തു . പെന്‍ഷന്‍ കുടിശിക ഓണത്തിന് മുന്‍പ് ഒറ്റതവണയായി നല്‍കണമെന്നും , സ്വത്ത് കൈക്കലാക്കിയ ശേഷം വാര്‍ധക്യത്തില്‍ മാതാപിതാക്കളെ ഉപേക്ഷിക്കുന്ന മക്കളുടെ പേരില്‍ നിയമനടപടി സ്വീകരിക്കണമെന്നും പൂമംഗലം യൂണിറ്റ് കണ്‍വെന്‍ഷന്‍ ആവശ്യപ്പെട്ടു . യൂണിറ്റ് പ്രസിഡന്റ് കെ പി അലക്‌സാണ്ടര്‍ അദ്ധ്യക്ഷത വഹിച്ചു. ബ്ലോക്ക് സെക്രട്ടറി എം കെ കമലമ്മ നവാഗതരെ സ്വീകരിച്ച് മെമ്പര്‍ഷിപ്പിന്റെ ഉദ്ഘാടനം നിര്‍വഹിച്ചു. സെക്രട്ടറി എന്‍ പി പത്മജ ടീച്ചര്‍ , ബ്ലോക്ക് ട്രഷറര്‍ കെ എം ഹരീഷ് ചന്ദ്രന്‍, എം സുധ, പി വി ജോയ്, എം ഗോപിനാഥന്‍ , ഇ നന്ദകുമാര്‍, യു ഡി ജോസ് , യു ചന്ദ്രശേഖരന്‍ എന്നിവര്‍ ചടങ്ങില്‍ സംസാരിച്ചു. കേരള സര്‍ക്കാരിന്റെ ‘ഓണത്തിന് ഒരു മുറം പച്ചക്കറി’ പദ്ധതി പ്രകാരം പൂമംഗലം കൃഷിഭവനില്‍ നിന്നും ലഭിച്ച പച്ചക്കറി വിത്തുകള്‍ എല്ലാ അംഗങ്ങള്‍ക്കും വിതരണം ചെയ്തു.

പൂമംഗലം പഞ്ചായത്തില്‍ മുട്ടക്കോഴി വളര്‍ത്തല്‍ പദ്ധതി ഉദ്ഘാടനവും സൗജന്യ ഇറച്ചികോഴികുഞ്ഞുങ്ങളുടെ വിതരണവും 27ന്‌

ഇരിങ്ങാലക്കുട : കഴിഞ്ഞ ഏതാനും കാലങ്ങളായി ഇരിങ്ങാലക്കുട കേന്ദ്രമാക്കി പ്രവര്‍ത്തിച്ചു വരുന്ന മിത്രഭാരതി സോഷ്യല്‍ സര്‍വീസ് സൊസൈറ്റി എന്ന സ്ഥാപനത്തിന്റെ ബ്രാഞ്ച് കഴിഞ്ഞ ഏപ്രില്‍ മുതല്‍ പൂമംഗലം പഞ്ചായത്തില്‍ എടക്കുളം ഭാഗത്ത് പ്രവര്‍ത്തിച്ചുവരുന്നുണ്ട്. ഇരിങ്ങാലക്കുട മേഖലയില്‍ ജൈവപച്ചക്കറികൃഷി വ്യാപനം, നാടന്‍ കൃഷി രീതിയുടെ പ്രോത്സാഹനം ക്ഷീരമേഖലയിലെ പ്രവര്‍ത്തനങ്ങള്‍, കാര്‍ഷികമേഖലയെ പുനരുജ്ജീവനം ലക്ഷ്യമാക്കി വിവിധതരം കൃഷിസമ്പ്രദായങ്ങള്‍ എന്നിവ നടപ്പാക്കികൊണ്ടിരിക്കുന്നു. കേരളത്തില്‍ കോഴി പ്രതിസന്ധി രൂക്ഷമായികൊണ്ടിരിക്കുന്ന ഈ കാലഘട്ടത്തില്‍ കാര്‍ഷിക ഭക്ഷ്യമേഖലകളെ പ്രോത്സാഹിപ്പിക്കുന്നതിന്റെ ഭാഗമായി സൊസൈറ്റി മുട്ടക്കോഴി വളര്‍ത്തല്‍ പദ്ധതി നടപ്പാക്കുന്നു. സ്വന്തം വീട്ടുമുറ്റത്ത് വരുമാനവും അതോടൊപ്പം വിഷമയമല്ലാത്ത ഭക്ഷ്യവസ്തുക്കള്‍ ഉത്പാദിപ്പിക്കുകയും ചെയ്യുക എന്ന നയത്തിന്റെ ഭാഗമായിട്ടാണ് മുട്ടക്കോഴി വളര്‍ത്തല്‍ പദ്ധതി നടപ്പാക്കുന്നത്. ഇന്റഗ്രിറ്റി നിധി ലിമിറ്റഡിന്റെ സഹകരണത്തോടെ നടപ്പാക്കുന്ന പദ്ധതിയുടെ ആദ്യഘട്ടത്തില്‍ മിത്രഭാരതി സൊസൈറ്റിയില്‍ രജിസ്റ്റര്‍ ചെയ്ത പൂമംഗലം പഞ്ചായത്തിലെ സ്വയം സഹായ സംഘങ്ങളിലെ തിരഞ്ഞെടുക്കപ്പെട്ട 50 കര്‍ഷകര്‍ക്കാണ് കൂടും കോഴികുഞ്ഞുങ്ങളേയും നല്‍കുന്നത്. ഒപ്പം ഈ സന്ദേശം സാമാന്യ ജനങ്ങളിലേക്ക് എത്തിക്കുന്നതിന്റെ ഭാഗമായി ഇറച്ചി ആവശ്യത്തിനുമാത്രം ഉപയോഗിക്കാവുന്ന 4000 കോഴികുഞ്ഞുങ്ങളെ സൗജന്യമായി വിതരണം ചെയ്യുന്നു. ജൂലായ് 27ന് വ്യാഴ്ച വൈകീട്ട് 5ന് പുമംഗലം പഞ്ചായത്തില്‍ എടക്കുളം സൊസൈറ്റി ഓഫീസില്‍ നടക്കുന്ന ചടങ്ങില്‍ വെള്ളാങ്ങല്ലൂര്‍ ബി ഡി ഒ എം.ആര്‍ തമ്പി വിതരണോദ്ഘാടനം നിര്‍വ്വഹിക്കും. മിത്രഭാരതി സോഷ്യല്‍ സര്‍വീസ് സൊസൈറ്റി പ്രസിഡണ്ട് മനോജ് കല്ലിക്കാട്ട് അധ്യക്ഷത വഹിക്കും. ധില്ലന്‍ ഏ.വി, എം.യു മനോജ് , പി.പരമേശ്വരന്‍, ഷാന്റി കൈപറമ്പില്‍ എന്നിവര്‍ സംസാരിക്കും. മുട്ടക്കോഴി വളര്‍ത്തല്‍ ലാഭകരമായി നടത്തുന്നതിന് വിദഗ്ദര്‍ നയിക്കുന്ന ക്ലാസ്സും ഉണ്ടായിരിക്കും.  സൗജന്യമായി കോഴികുഞ്ഞുങ്ങളെ ആവശ്യമുള്ളവര്‍ ഓഫീസുമായോ ഈ നമ്പറിലോ ബന്ധപ്പെടുക : പി.പരമേശ്വരന്‍: 8075215275 ,സൈജു 7025955399 .

ഉദ്യോഗസ്ഥനെ മാറ്റുന്നതുവരെ ഡ്രൈവിംഗ് ടെസ്റ്റിന് സ്കൂളുകളുടെ വാഹനം നല്‍കാതെ നിസഹകരണം തുടരും : അസോസിയേഷന്‍

ഇരിങ്ങാലക്കുട : ഇരിങ്ങാലക്കുട സബ് ആര്‍ ടി ഒ ഓഫീസിലെ മോട്ടോര്‍ വെഹിക്കിള്‍ ഇന്‍സ്‌പെക്ടറെ മാറ്റാതെ വരും ദിവസങ്ങളില്‍ നടക്കുന്ന റോഡ് ടെസ്റ്റിനും ഗ്രൗണ്ട് ഡ്രൈവിംഗ് ടെസ്റ്റിനും ഡ്രൈവിംഗ് സ്കൂളുകളുടെ വാഹനം നല്‍കാതെ നിസഹകരണം തുടരുമെന്ന് ഡ്രൈവിംഗ് സ്കൂള്‍ ഓണേഴ്‌സ് അസോസിയേഷന്‍ ഭാരവാഹികള്‍ പത്രസമ്മേളനത്തില്‍ പറഞ്ഞു. ചെറിയ കാരണങ്ങള്‍ പറഞ്ഞു എം വി ഐ ആയ എല്‍ദോ വര്‍ഗീസ് ഉദ്യോഗാര്‍ത്ഥികളെ മനപൂര്‍വം ടെസ്റ്റില്‍ പരാജയപെടുത്തുകയാണെന്ന് ആരോപിച്ചു ഡ്രൈവിംഗ് സ്കൂള്‍ ഓണേഴ്‌സ് അസോസിയേഷന്‍ കഴിഞ്ഞ ദിവസം പ്രതിഷേധിച്ചിരുന്നു . ടെസ്റ്റിന് എത്തിയവര്‍ക്കും വാഹനം നല്‍കാന്‍ തയാറായില്ല ഇവരുടെ നിസഹകരണം മൂലം ഈ ആഴ്ച ടെസ്റ്റുകള്‍ മുടങ്ങിയിരിക്കുകയാണ് . ഈ ഉദ്യോഗസ്ഥനെ പേടിച്ചു ടെസ്റ്റിന് ഇരിങ്ങാലക്കുടയില്‍ ഹാജരാകാന്‍ ഉദ്യോഗാര്‍ത്ഥികള്‍ മടി കാണിക്കുന്നത് മൂലം ഡ്രൈവിംഗ് സ്കൂളുകളില്‍ പഠിക്കാന്‍ ആളുകള്‍ എത്തുന്നില്ലെന്നും പല ഡ്രൈവിംഗ് സ്കൂളുകളും അടച്ചുപൂട്ടേണ്ട അവസ്ഥയിലാണെന്നും അസോസിയേഷന്‍ പ്രസിഡന്റ് വത്സരാജന്‍ പറഞ്ഞു. ഉദ്യോഗാര്‍ഥികളുടെ രേഖകള്‍ തങ്ങള്‍ പിടിച്ചുവച്ചിട്ടില്ലെന്നും ആവശ്യപ്പെട്ടാല്‍ നല്‍കാന്‍ തയ്യാറാണെന്നും അസോസിയേഷന്‍ പറയുന്നു . ഇരിങ്ങാലക്കുടയില്‍ ആര്‍ ടി ഒ ഓഫീസ് വന്ന കാലം മുതല്‍ ടെസ്റ്റിന് വേണ്ടി ഉപയോഗിക്കുന്ന മുന്‍സിപ്പല്‍ ഗ്രൗണ്ട് പഠിപ്പിക്കുന്നതിനും ഡ്രൈവിംഗ് ടെസ്റ്റ് കൊടുക്കുന്നതിനും ഡ്രൈവിംഗ് സ്കൂളുകാര്‍ മുന്‍സിപ്പാലിറ്റിയില്‍ വര്‍ഷം തോറും വാടക നല്‍കുന്നുണ്ട്. ഗ്രൗണ്ടില്‍ ഡ്രൈവിംഗ് സ്കൂളുകാര്‍ കയറുന്നത് ക്രിമിനല്‍ കുറ്റമാണെന്ന് ആരോപിക്കുവാന്‍ ഇവര്‍ക്ക് അധികാരമില്ലെന്നും ഈ ഉദ്യോഗസ്ഥനെ മാറ്റുവാന്‍ വേണ്ടി തങ്ങള്‍ പരാതി കൊടുത്തിട്ടുണ്ടെന്നും അസോസിയേഷന്‍ പത്രസമ്മേളനത്തില്‍ അറിയിച്ചു.

സൗജന്യ തൊഴിലധിഷ്ഠിത കോഴ്‌സിന് അപേക്ഷ ക്ഷണിക്കുന്നു

ഇരിങ്ങാലക്കുട : ദേശീയ നഗര ഉപജീവന മിഷന്‍ പദ്ധതിയുടെ ഭാഗമായി ഇരിങ്ങാലക്കുട നഗരസഭാ പരിധിയില്‍ പെട്ട വാര്‍ഷിക വരുമാനം 50,000 രൂപയില്‍ താഴെയുള്ള കുടുംബങ്ങളിലെ 18 നും 35 നും ഇടയില്‍ പ്രായപരിധിയുള്ള യുവതീയുവാക്കളില്‍ നിന്നും സൗജന്യ തൊഴിലധിഷ്ഠിത കോഴ്‌സിന് അപേക്ഷ ക്ഷണിക്കുന്നു. താല്പര്യമുള്ളവര്‍ ജൂലൈ 30 ന് മുന്‍പായി നഗരസഭയിലെ കുടുംബശ്രീ ഓഫീസുമായി ബന്ധപ്പെടുക. കോഴ്‌സുകള്‍ ജനറല്‍ ഡ്യൂട്ടി അസിസ്റ്റന്റ്, ഹോം വെല്‍ത്ത് എയ്ഡ് (ഹോം നഴ്സിംഗ്), ഡയറ്റ് അസിസ്റ്റന്റ്, ആയുര്‍വേദ സ്പാ തെറാപ്പി, ത്രൂഹോള്‍ അസ്സെംബ്ലി ഓപ്പറേറ്റര്‍, ഫിറ്റര്‍ മെക്കാനിക്കല്‍ അസ്സെംബ്ലര്‍, സി എന്‍ സി ഓപ്പറേറ്റര്‍ ടര്‍ണിങ്, ഇന്‍സ്റ്റാളേഷന്‍ ടെക്‌നീഷ്യന്‍ കമ്പ്യൂട്ടിങ് ആന്‍ഡ് പെരിഫെറല്‍സ്, ഓപ്പറേറ്റര്‍ കോണ്‍വെന്‍ഷനല്‍ മില്ലിങ്, അസിസ്റ്റന്റ് സര്‍വേയര്‍, വെബ് ഡിസൈനിങ് ആന്‍ഡ് പബ്ലിഷിംഗ് അസിസ്റ്റന്റ്, ജ്വല്ലറി സെയില്‍സ് അസ്സോസിയേറ്റ്, ഗോള്‍ഡ് അപ്പ്രൈസര്‍ & വാല്യൂവര്‍, കാഡ് ഡിസൈനര്‍ ജെംസ്& ജ്വല്ലറി മുതലായവയാണ്‌.

മഹാത്മാഗാന്ധി യൂണിവേഴ്സിറ്റിയില്‍ നിന്നും മലയാളസാഹിത്യത്തില്‍ ഡോക്ടറേറ്റ് ജെന്‍സി.കെ.എക്ക്

ഇരിങ്ങാലക്കുട : മഹാത്മാഗാന്ധി യൂണിവേഴ്സിറ്റിയില്‍ നിന്നും മലയാളസാഹിത്യത്തില്‍ ഡോക്ടറേറ്റ് നേടിയ ഇരിങ്ങാലക്കുട സെന്റ് ജോസഫ്‌സ് കോളേജില്‍ മലയാളവിഭാഗം അസിസ്റ്റന്റ് പ്രൊഫസറായ ജെന്‍സി.കെ.എ. ഏനാമാക്കല്‍ കൊമ്പന്‍ ആന്റണി അച്ചുമണി ദമ്പതികളുടെ മകളും ഒല്ലൂര്‍ അക്കര പോള്‍സന്റെ ഭാര്യയുമാണ് .

 

കല്ലേറ്റുംകര പോസ്ററ് ഓഫീസിലേക്ക് സി പി ഐയുടെ നേതൃത്വത്തില്‍ മാര്‍ച്ചും ധര്‍ണ്ണയും

കല്ലേററുംകര പോസ്ററ് ഓഫീസിലേക്ക് നടന്ന മാര്‍ച്ചും ധര്‍ണ്ണയും സി പി ഐ ഇരിങ്ങാലക്കുട മണ്ഡലം സെക്രട്ടറി പി. മണി ഉദ്ഘാടനം ചെയ്യുന്നു

കല്ലേറ്റുംകര : കേന്ദ്ര സര്‍ക്കാരിന്റെ കര്‍ഷകദ്രോഹ നയങ്ങള്‍ അവസാനിപ്പിക്കുക, കന്നുകാലികശാപ്പു നിയന്ത്രണം പൂര്‍ണ്ണമായും പിന്‍വലിക്കുക, കള്ളനോട്ടടി കേസ്സില്‍ സമഗ്രമായ അന്വേഷണം നടത്തുക, ദളിത്-ന്യൂനപക്ഷ പീഡനങ്ങള്‍ അവസാനിപ്പിക്കുക തുടങ്ങിയ ആവശ്യങ്ങള്‍ ഉന്നയിച്ചുകൊണ്ട് സി പി ഐ ആഗസ്റ്റ് 26-ാം തിയ്യതി രാജ്യ വ്യാപകമായി “ദേശീയ പ്രക്ഷോഭം” സംഘടിപ്പിച്ചിരിക്കുകയാണ്. ഇതിന്റെ ഭാഗമായി പഞ്ചായത്തു കേന്ദ്രങ്ങളില്‍ ബഹുജന ധര്‍ണ്ണയും, കേന്ദ്ര സര്‍ക്കാര്‍ സ്ഥാപനങ്ങളിലേക്ക് പ്രതിഷേധ മാര്‍ച്ചുകളും സംഘടിപ്പിച്ചിരിക്കുന്നു. ആളൂര്‍ പഞ്ചായത്തിലെ കല്ലേററുംകര പോസ്ററ് ഓഫീസിലേക്ക് നടന്ന മാര്‍ച്ചും ധര്‍ണ്ണയും സി പി ഐ ഇരിങ്ങാലക്കുട മണ്ഡലം സെക്രട്ടറി പി.മണി ഉദ്ഘാടനം ചെയ്തു. പഞ്ചായത്ത് വികസന കാര്യ സ്ററാറ്റിംഗ് കമ്മിററി ചെയര്‍പേഴ്സണ്‍ അജിതാ സുബ്രഹ്മണ്യന്‍ അദ്ധ്യക്ഷത വഹിച്ച യോഗത്തില്‍. എം.ബി.ലത്തീഫ്, എടത്താട്ടില്‍ മാധവന്‍ മാസ്ററര്‍, ടി.സി.അര്‍ജ്ജുനന്‍, എസ്.ബിനോയ്, എന്നിവര്‍ സംസാരിച്ചു.

ജീവിതത്തില്‍ ധാര്‍മിക മൂല്യങ്ങള്‍ സംരക്ഷിക്കാന്‍ യുവജനങ്ങള്‍ക്ക് കഴിയണം -മോണ്‍. ആന്റോ തച്ചില്‍

ഇരിങ്ങാലക്കുട : ജീവിതത്തില്‍ ധാര്‍മിക മൂല്യങ്ങള്‍ സംരക്ഷിക്കുവാനും അവ നമുക്ക് വഴികാട്ടിയാക്കുവാനും യുവജനങ്ങള്‍ മുന്നിട്ടിറങ്ങണമെന്ന് ഇരിങ്ങാലക്കുട രൂപത വികാരി ജനറാള്‍ മോണ്‍. ആന്റോ തച്ചില്‍ അഭിപ്രായപ്പെട്ടു. ഇരിങ്ങാലക്കുട രൂപത സിഎല്‍സി സംഘടിപ്പിച്ച ഗിനോസ്‌കോ 2017 യുവജന ക്യാമ്പ് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ചടങ്ങില്‍ രൂപത സി എല്‍ സി അസിസ്റ്റന്റ് ഡയറക്ടര്‍ ഫാ. ലിന്റോ പനംകുളം അധ്യക്ഷത വഹിച്ചു. ഇരിങ്ങാലക്കുട ഡിവൈഎസ്പി ഫെയ്മസ് വര്‍ഗീസ് വിശിഷ്ടാതിഥിയായിരുന്നു. ക്രൈസ്റ്റ് ആശ്രമാധിപന്‍ ഫാ. ജോക്കബ് ഞെരിഞ്ഞാംപിള്ളി സി എം ഐ അനുഗ്രഹ പ്രഭാഷണം നടത്തി. കത്തീഡ്രല്‍ വികാരി ഫാ. ആന്റോ ആലപ്പാടന്‍ ആമുഖപ്രസംഗം നടത്തി. ക്രൈസ്റ്റ് വിദ്യാനികേതന്‍ പ്രിന്‍സിപ്പല്‍ ഫാ. സണ്ണി പുന്നേലിപറമ്പില്‍, സംസ്ഥാന സി എല്‍ സി സെക്രട്ടറി ഷോബി കെ. പോള്‍, രൂപത സി എല്‍ സി പ്രസിഡന്റ് റോഷന്‍ തെറ്റയില്‍, സെക്രട്ടറി ബിബിന്‍ പോള്‍, ആനിമേറ്റര്‍ സിസ്റ്റര്‍ മരിയ ജെസ്സി തുടങ്ങിയവര്‍ പ്രസംഗിച്ചു.

Top
Menu Title