News

ഡോ കെ എ സ്റ്റീഫന്‍സണിന്റെ ആത്മകഥ ‘ ഒരൊറ്റപ്പൂഴാന്റെ പാട്ട് ‘ പ്രകാശനം 27 ന്

ഇരിങ്ങാലക്കുട : സെന്റ് ജോസഫ്‌സ് കോളേജില്‍ 27 ന് നടക്കുന്ന അക്ഷരദിന-പുസ്തകപ്രകാശന ചടങ്ങില്‍ ഡോ കെ എ സ്റ്റീഫന്‍സണിന്റെ ആത്മകഥ ‘ ഒരൊറ്റപ്പൂഴാന്റെ പാട്ട് ‘ ന്റെ പ്രകാശനം എഴുത്തുകാരിയും സാമൂഹ്യ പ്രവര്‍ത്തകയുമായ സാറാ ജോസഫ് നിര്‍വഹിക്കും. കോളജ് വൈസ് പ്രന്‍സിപ്പല്‍ ഡോ സി ലില്ലി കാച്ചപ്പിള്ളി ആദ്യ പുസ്തകം സ്വീകരിയ്ക്കും. ഇരിങ്ങാലക്കുട എം എല്‍ എ പ്രൊഫ കെ യു അരുണന്‍ ഉദ്‌ഘാടനം നിര്‍വഹിക്കുന്ന ചടങ്ങില്‍ കോളേജ് പ്രിന്‍സിപ്പല്‍ ഡോ സി ക്രിസ്റ്റി അധ്യക്ഷത വഹിക്കും. ഇരിങ്ങാലക്കുട ക്രൈസ്റ്റ് കോളേജിലെ മുന്‍ ധനതത്വശാസ്ത്രവിഭാഗം വകുപ്പ് അധ്യക്ഷനും കൊച്ചി- തേവര സേക്രഡ് ഹാര്‍ട്ട് കോളേജ് ധനതത്വശാസ്ത്രവിഭാഗം റീസേര്‍ച്ച് ഗൈഡുമാണ് ഡോ കെ എ സ്റ്റീഫന്‍സണ്‍.

ആനന്ദപുരം ചെറുപുഷ്പ ദേവാലയത്തിലെ തിരുനാള്‍ 30, 1 തീയതികളില്‍

ഇരിങ്ങാലക്കുട : ആനന്ദപുരം ചെറുപുഷ്പ ദേവാലയത്തിലെ ഇടവക മധ്യസ്ഥയായ വി കൊച്ചുത്രേസ്യയുടെയും രക്തസാക്ഷിയായ വി സെബാസ്ത്യാനോസിന്റെയും തിരുനാള്‍ സെപ്റ്റംബര്‍ 30 , ഒക്ടോബര്‍ 1 തീയതികളില്‍ ആഘോഷിക്കുമെന്ന് വികാരി ഫാ ആന്‍ഡ്‌റൂസ് ചെതലന്‍ പത്രസമ്മേളനത്തില്‍ അറിയിച്ചു. സെപ്റ്റംബര്‍ 27 ബുധനാഴ്ച്ച വൈകീട്ട് 5.30 ന് തിരുനാള്‍ കൊടികയറ്റ കര്‍മം ഇരിങ്ങാലകുട രൂപത വികാരി ജനറാല്‍ മോണ്‍ ജോബി പൊഴോലിപറമ്പില്‍ നിര്‍വഹിക്കും. സെപ്റ്റംബര്‍ 30 ശനിയാഴ്ച്ച രാവിലെ 7 മണിക്ക് അമ്പു എഴുന്നള്ളിപ്പ് ഉണ്ടായിരിക്കും. ഒക്ടോബര്‍ 1 ന് തിരുനാള്‍ ദിനത്തില്‍ രാവിലെ 10 മണിക്ക് നടക്കുന്ന തിരുനാള്‍ പാട്ടുകുര്‍ബാനയ്ക്ക് പെരുമ്പാവൂര്‍ ആയത്തുപടി വികാരി ഫാ ജോണ്‍ പൈനുങ്കല്‍ കാര്‍മികത്വം വഹിക്കും. ഡി സി എല്‍, ഡി എഫ് സി സംസ്ഥാന ഡയറക്ടര്‍ ഫാ റോയ് കണ്ണഞ്ചിറ തിരുനാള്‍ സന്ദേശം നല്‍കും. ഒക്ടോബര്‍ 8 ഞായറാഴ്ച്ച എട്ടാമിടം ഊട്ടുതിരുനാളും 11.30 മുതല്‍ ഊട്ടു നേര്‍ച്ചയും ഉണ്ടായിരിക്കും.

കൊടകരയിലെ ബിവറേജ് ഔട്ട്‌ലെറ്റ് കോന്തിപുലത്ത് തുടങ്ങി : കൂത്തുപറമ്പ് ജനകീയ സമിതി സമരം നിറുത്തി

ഇരിങ്ങാലക്കുട : കൊടകരയിലെ ബിവറേജ് ഔട്ട്‌ലെറ്റ് ഇരിങ്ങാലക്കുട സിവില്‍ സ്റ്റേഷനടുത്ത് ജനവാസകേന്ദ്രത്തിലേക്ക് മാറ്റി സ്ഥാപിക്കാനുള്ള നീക്കത്തിന് തിരിച്ചടി. ഔട്ട്‌ലെറ്റ് കോന്തിപുലത്ത് പ്രവര്‍ത്തനം ആരംഭിച്ചു. ഞായറാഴ്ച രാവിലെ 10നാണ് കോന്തിപുലത്ത് ഔട്ട്‌ലെറ്റ് പ്രവര്‍ത്തനം ആരംഭിച്ചത്. പുതുക്കാട് എസ്.ഐയുടെ നേതൃത്വത്തില്‍ പോലിസ് സംഘവും സ്ഥലത്തെത്തിയിരുന്നു. കഴിഞ്ഞ 23ന് ഔട്ട്‌ലെറ്റ് പറപ്പൂക്കര പഞ്ചായത്തിലെ കോന്തിപുലം പാടത്ത് സ്ഥാപിക്കുന്നതിന് എക്‌സൈസ് അനുമതി നല്‍കിയിരുന്നെങ്കിലും കോര്‍പ്പറേഷനിലെ ഉന്നതര്‍ ഇത് നടപ്പാക്കാതെ കെട്ടിട ഉടമയ്ക്ക് വേണ്ടി ഉത്തരവ് മരവിപ്പിക്കുകയായിരുന്നു. ഇതിനെതിരെ കൂത്തുപറമ്പ് ജനകീയ സമിതിയും കൂത്തുപറമ്പ് റസിഡന്റ്‌സ് അസോസിയേഷനും വകുപ്പുമന്ത്രിക്കും വിജിലന്‍സിനും പരാതി നല്‍കിയിരുന്നു. തുടര്‍ന്നാണ് ഔട്ട്‌ലെറ്റ് തുറക്കാന്‍ വഴിയൊരുങ്ങിയത്. നേരത്തെ രണ്ടുതവണ ബിവറേജ് സിവില്‍ സ്റ്റേഷന് സമീപത്തേക്ക് കെട്ടിട ഉടമയും കോര്‍പ്പറേഷനിലെ ചില ഉന്നതരും ഇടപെട്ട് ശ്രമം നടത്തിയിരുന്നെങ്കിലും രണ്ട് തവണയും അത് തള്ളി. ആദ്യം ഇരിങ്ങാലക്കുടയിലെ ബിവറേജ് ഓട്ട് ലെറ്റ് ഈ സ്ഥലത്തേക്ക് മാറ്റാന്‍ ശ്രമം നടത്തിയിരുന്നു. ഇത് നടപ്പാകാതെ വന്നതോടെയാണ് കൊടകര ബിവറേജ് ഔട്ട്‌ലെറ്റ് ഇതേ കെട്ടിടത്തിലേക്ക് വരുത്താന്‍ ഉടമ ശ്രമിച്ചത്. എന്നാല്‍ കൂത്തുപറമ്പ് ജനകീയ സമിതിയുടെ നേതൃത്വത്തില്‍ നടന്ന സമരത്തെ തുടര്‍ന്ന് ആദ്യത്തെ നീക്കം എക്‌സൈസ് കമ്മിഷണര്‍ തടഞ്ഞ് ഉത്തരവിട്ടിരുന്നു. തുടര്‍ന്നാണ് കൊടകര ഔട്ട്‌ലെറ്റ് ഇരിങ്ങാലക്കുടയിലേക്ക് മാറ്റാന്‍ ഉടമയും കോര്‍പ്പറേഷനിലെ ഉന്നതരും ശ്രമം നടത്തിയത്. എന്നാല്‍ ഈ നീക്കങ്ങള്‍ക്കെതിരെ പരിസരവാസികള്‍ ശക്തമായ എതിര്‍പ്പുയര്‍ത്തിയിരുന്നു. ജനവാസകേന്ദ്രത്തിലേക്ക് ഔട്ട്‌ലെറ്റ് മാറ്റുന്നതിനെതിരെ പ്രൊഫ. കെ.യു അരുണന്‍ എം.എല്‍.എ അടക്കമുള്ളവരും രംഗത്തെത്തിയിരുന്നു. ഔട്ട്‌ലെറ്റ് കോന്തിപുലത്ത് തുറന്ന സാഹചര്യത്തില്‍ തല്‍ക്കാലം സമരപരിപാടികള്‍ നിറുത്തിവെച്ചതായി സമിതി ചെയര്‍മാന്‍ സതീഷ് പുളിയത്ത്, അസോസിയേഷന്‍ സെക്രട്ടറി കെ.എസ് സിജി എന്നിവര്‍ അറിയിച്ചു.

വാട്സാപ്പ് ഗ്രൂപ്പ് വഴി വാറ്റുചാരായ വില്‍പ്പന നടത്തുന്ന യുവാക്കള്‍ പിടിയില്‍

ഇരിങ്ങാലക്കുട : മദ്യപാനികളായ ഉപഭോക്താക്കളെ മാത്രം ഉള്‍പ്പെടുത്തിയ വാട്സ്ആപ് ഗ്രൂപ്പിലൂടെ മദ്യവിതരണം നടത്തുന്ന സംഘത്തെ വാറ്റുചാരായവുമായി പോലീസ് പിടികൂടി. ചാലക്കുടി-പോട്ട കേന്ദ്രമാക്കിയ നിര്‍മാണ കേന്ദ്രത്തില്‍ നിന്ന് ഇരിങ്ങാലക്കുടയിലേക്ക് വില്‍പ്പനയ്ക്കായി ഓട്ടോറിക്ഷയില്‍ കൊണ്ടുവന്ന 25 ലി ചാരായവുമായി എത്തിയ കനകമല സ്വദേശികളായ കല്ലിങ്ങപ്പുറം സുധീഷ്(29), വെള്ളാംപറമ്പില്‍ വിപിന്‍ (27), ഓട്ടോറിക്ഷ ഡ്രൈവര്‍ ചേലക്കന്‍ സുഗേഷ് (19) എന്നിവരെ പോലീസിനെ വെട്ടിച്ചു കടക്കുന്നതിനിടെ ഇരിങ്ങാലക്കുട നഗരസഭാ മൈതാനത്തിനു സമീപത്തു നിന്ന് സി ഐ എം കെ സുരേഷ്കുമാറും സംഘവും അറസ്റ്റ് ചെയ്തു. ചാലക്കുടിയിലെ വാടക വീട്ടില്‍ നിര്‍മിച്ച ചാരായവുമായി ഇവര്‍ വില്‍പ്പനയ്ക്ക് വരുന്നുണ്ടെന്നു രഹസ്യ വിവരം ഡി വൈ എസ് പി ഫേമസ് വര്‍ഗീസിന് ലഭിച്ചതിനെ തുടര്‍ന്ന് ഇവരുടെ ഓട്ടോറിക്ഷ ഠാണാവില്‍ വച്ച് പോലീസ് കൈ കാണിച്ചെങ്കിലും നിര്‍ത്താതെ പോകുകയായിരുന്നു. ഓട്ടോറിക്ഷയില്‍ ലൗഡ് സ്പീക്കറിനുള്ളിലെ രഹസ്യ അറയിലായിരുന്നു ചാരായം സൂക്ഷിച്ചിരുന്നത്. 8 മാസക്കാലമായി ഈ രീതിയില്‍ വില്‍പ്പന നടത്തിയിരുന്നതായി പ്രതികള്‍ പോലീസിനോട് സമ്മതിച്ചു.ഒന്നാം പ്രതി സുധീഷിന് വധശ്രമം ഉള്‍പ്പെടെ 22 ഓളം ക്രിമിനല്‍ കേസുകള്‍ നിലവിലുണ്ട്. കൂട്ടുപ്രതികളും പല കേസുകളിലും ഉള്‍പ്പെട്ടിട്ടുണ്ട്. പ്രതികളെ പിടികൂടിയ സംഘത്തില്‍ ഇരിങ്ങാലക്കുട എസ് ഐ മാരായ കെ എസ് സുശാന്ത്, തോമസ് വടക്കന്‍, റോയ് രാമചന്ദ്രന്‍, സീനിയര്‍ സി പി ഒ മാരായ മുരുകേഷ് കടവത്ത് , മുഹമ്മദ് അഷ്‌റഫ് , എം കെ ഗോപി, സി പി ഒ മാരായ പി കെ മനോജ്, എ കെ മനോജ്, ജീവന്‍ ഇ എസ് , ജോഷി ജോസഫ് എന്നിവര്‍ ഉണ്ടായിരുന്നു.

ബാങ്കിങ്ങിനെ ബാധിക്കുന്ന രീതിയില്‍ കറന്‍സിയിലുള്ള വിശ്വാസം ജനങ്ങള്‍ക്ക് നഷ്ടപ്പെട്ടുകൊണ്ടിരിക്കുന്നു – ആര്യാടന്‍ മുഹമ്മദ്

ഇരിങ്ങാലക്കുട : അശാസ്ത്രീയമായ ഡിമോണിറ്റൈസേഷന്‍ നടപ്പിലാക്കിയതിന് ശേഷം രാജ്യത്ത് സാധാരണക്കാര്‍ക്ക് കറന്‍സിയിലുള്ള വിശ്വാസം നഷ്ടപ്പെട്ടു കൊണ്ടിരിക്കുകയാണെന്നും ഇത് ബാങ്കിങ് രംഗത്ത് കടുത്ത പ്രത്യാഘാതങ്ങളുണ്ടാക്കുമെന്നും മുന്‍മന്ത്രിയും കുബ്‌സോ രക്ഷാധികാരിയുമായ ആര്യാടന്‍ മുഹമ്മദ് പറഞ്ഞു. കേരള അര്‍ബന്‍ ബാങ്ക് സ്റ്റാഫ് അസോസിയേഷന്‍ (കുബ്‌സോ) 15- ാമത് സംസ്ഥാന സമ്മേളനം ഇരിങ്ങാലക്കുട മുനിസിപ്പല്‍ ടൗണ്‍ ഹാളില്‍ ഉദ്‌ഘാടനം ചെയ്തു സംസാരിക്കുകയായിരുന്നു അദ്ദേഹം. തൊഴില്‍ രംഗത്ത് കറന്‍സിപിന്‍വലിക്കല്‍ വമ്പിച്ച തിരിച്ചടിക്ക് കാരണമായെന്നും ജി ഡി പി യിലെ 40 % വരുന്ന ഇത്തരക്കാരുടെ വരുമാനം ഇതുമൂലം നഷ്ടപ്പെട്ടുവെന്നും ഇദ്ദേഹം പറഞ്ഞു. സഹകരണ മേഖലയ്ക്കും അര്‍ബന്‍ ബാങ്കുകളിലെ ബാങ്കിങ് സംവിധാനത്തെ ഇത് സാരമായ ബാധിച്ചിട്ടുണ്ടെന്നും അതിജീവനത്തിനായി ഈ രംഗത്ത് പ്രവര്‍ത്തിക്കുന്നവര്‍ കഠിന പ്രയത്നം നടത്തേണ്ട സമയമാണിതെന്നും സമ്മേളന പ്രതിനിധികളെ കുബ്‌സോവിന്റെ രക്ഷാധികാരി കൂടിയായ ആര്യാടന്‍ മുഹമ്മദ് ഓര്‍മിപ്പിച്ചു. കുബ്‌സോ സംസ്ഥാന പ്രസിഡണ്ട് ബെന്നി ബെഹന്നാന്‍ അധ്യക്ഷത വഹിച്ച യോഗത്തില്‍ ജനറല്‍ സെക്രട്ടറി എം കെ ബാലകൃഷ്ണന്‍ ആമുഖപ്രഭാഷണം നടത്തി. ചടങ്ങിന് മുന്നോടിയായി വര്‍ക്കിങ് പ്രസിഡണ്ട് പി യു സുരേഷ്‌കുമാര്‍ പതാക ഉയര്‍ത്തി. ഓര്‍ഗനൈസിംഗ് കമ്മിറ്റി ചെയര്‍മാനും കെ പി സി സി ജനറല്‍ സെക്രട്ടറിയുമായ എം പി ജാക്സണ്‍ സ്വാഗതവും ഓര്‍ഗനൈസിംഗ് കമ്മിറ്റി ജനറല്‍ കണ്‍വീനര്‍ ടി വി ചാര്‍ളി നന്ദിയും പറഞ്ഞു. വൈകീട്ട് 4 മണിക്ക് വിരമിച്ച ജീവനക്കാരെ ആദരിക്കുന്നതിനായുള്ള സമാദരണീയം പരിപാടിയുടെ ഉദ്‌ഘാടനം എം എല്‍ എ കെ മുരളീധരന്‍ നിര്‍വഹിക്കും. മുന്‍ മന്ത്രി കെ പി വിശ്വനാഥന്‍ മുഖ്യാതിഥിയായിരിക്കും. തുടര്‍ന്ന് 5.30 ന് നടക്കുന്ന സാംസ്‌കാരിക സമ്മേളനം എം എല്‍ എ അനില്‍ അക്കര ഉദ്‌ഘാടനം ചെയ്യും. കുബ്‌സോ മുന്‍ സ്റ്റേറ്റ് ജനറല്‍ സെക്രട്ടറി ശബരീഷ് കുമാര്‍ അധ്യക്ഷത വഹിക്കുന്ന ചടങ്ങില്‍ നിലമ്പൂര്‍ അര്‍ബന്‍ ബാങ്ക് പ്രസിഡന്റും സംസ്കാര സാഹിതി പ്രസിഡന്റുമായ ആര്യാടന്‍ ഷൗക്കത്ത് മുഖ്യപ്രഭാഷണം നടത്തും. സാഹിത്യകാരന്മാരായ ആലങ്കോട് ലീലാകൃഷ്ണന്‍, സുരേന്ദ്രന്‍ എന്നിവര്‍ മുഖ്യാതിഥികളായിരിക്കും. രാത്രി 8 മണിക്ക് ജനറല്‍ കൗണ്‍സില്‍ ഉണ്ടായിരിക്കുന്നതാണ്.24 ന് രാവിലെ 9 മണിക്ക് നടക്കുന്ന പ്രതിനിധി സമ്മേളനത്തിന്റെ ഉദ്‌ഘാടനം തൃശൂര്‍ ജില്ലാ കോണ്‍ഗ്രസ് കമ്മിറ്റി പ്രസിഡണ്ട് ടി എന്‍ പ്രതാപന്‍ നിര്‍വഹിക്കും. എം എല്‍ എ ഷാഫി പറമ്പില്‍ മുഖ്യാഥിതിയായിരിക്കും. തുടര്‍ന്ന് വൈകീട്ട് 4 മണിക്ക് നടക്കുന്ന സമാപന സമ്മേളനം മുന്‍ മുഖ്യമന്ത്രി ഉമ്മന്‍ചാണ്ടി ഉദ്‌ഘാടനം ചെയ്യും.

തിരുവോണം ബമ്പര്‍ ലോട്ടറി വില്‍പ്പനയില്‍ സംസ്ഥാനത്ത് മൂന്നാം സ്ഥാനം ഇരിങ്ങാലക്കുട ലോട്ടറി സബ് ഓഫീസിന്

ഇരിങ്ങാലക്കുട : ഓണക്കാല വില്‍പ്പനയില്‍ ബീവറേജസിന് മാത്രമല്ല ലോട്ടറി വില്‍പ്പനയിലും ഇരിങ്ങാലക്കുടയ്ക്ക് പൊന്‍തിളക്കം. 10 കോടിയുടെ സുവര്‍ണ്ണ ജൂബിലി തിരുവോണം ബമ്പര്‍ ടിക്കറ്റ് വില്‍പ്പനയില്‍ പുതുതായി ഇരിങ്ങാലക്കുടയില്‍ ആരംഭിച്ച സബ് ലോട്ടറി ഓഫീസ് മൂന്നാം സ്ഥാനം നേടി. ഒരു ലക്ഷത്തി ഇരുപതിനായിരം ഓണം ബമ്പര്‍ ലോട്ടറി ടിക്കറ്റാണ് 141 ഏജന്റുമാര്‍ മുഖേന ഇവിടെ വിറ്റഴിച്ചത്. ഗുരുവായൂര്‍, പട്ടാമ്പി എന്നിവയാണ് ഒന്നും രണ്ടും സ്ഥാനങ്ങള്‍ അലങ്കരിച്ചത്. ഇരിങ്ങാലക്കുട മിനി സിവില്‍ സ്റ്റേഷനില്‍ പുതുതായി നിര്‍മിച്ച അനെക്സ് കെട്ടിടത്തില്‍ പ്രഥമ ഓഫീസായി 2017 ഏപ്രിലില്‍ പ്രവര്‍ത്തനം ആരംഭിച്ചത് ഈ ഓഫീസാണ്. ഒട്ടേറെ പരാധീനതകള്‍ക്കിടയിലും ലോട്ടറി വില്‍പ്പനയില്‍ മികച്ച നേട്ടം കൈവരിക്കാന്‍ ഇവര്‍ക്ക് കഴിഞ്ഞു. അഡിഷണല്‍ ഡിസ്ട്രിക്ട് ലോട്ടറി ഓഫീസറിന്റെ ചുമതലയിലുള്ള ഈ ഓഫീസില്‍ ഇദ്ദേഹത്തിന് പുറമെ ഒരു ജൂനിയര്‍ സൂപ്രണ്ട്, സീനിയര്‍ ക്ലാര്‍ക്ക്, 2 ഡെയ്‌ലി വേജസ് ജീവനക്കാരും ഒരു ഓഫിസ് അറ്റെന്‍ഡറുമാണ് ഉള്ളത്. ഡെയ്‌ലി ഡ്രോ ടിക്കറ്റുകളുടെ വില്‍പ്പനയിലും ഈ ഓഫിസ് മുന്‍പന്തിയിലാണ് ഉള്ളത്. ഒരു ലക്ഷത്തി തൊണ്ണൂറ്റി രണ്ടായിരം ടിക്കറ്റുകള്‍ വരെ ഇവിടെ വിറ്റുപോയിട്ടുണ്ട്. ജി എസ് ടി ഇനത്തില്‍ ഒമ്പത് ലക്ഷത്തോളം രൂപ സര്‍ക്കാരിന് വരുമാനമുണ്ടാക്കി കൊടുക്കുന്നുണ്ടെങ്കിലും ഓഫീസിലെ ജീവനക്കാരുടെ കുറവ് പ്രവര്‍ത്തനത്തെ സാരമായി ബാധിക്കുന്നുണ്ട്. ഓഫിസ് പ്രവര്‍ത്തിക്കുന്ന അനെക്സ് കെട്ടിടത്തില്‍ ഇത് വരെ ട്രാന്‍സ്‌ഫോര്‍മര്‍ സ്ഥാപിക്കാത്തതിനാല്‍ വെള്ളം, വൈദ്യുതി എന്നിവയ്ക്ക് ബുദ്ധിമുട്ട് അനുഭവപ്പെടുന്നുണ്ട്. മുകുന്ദപുരം തഹസില്‍ദാരുടെ ഇടപെടല്‍ മൂലം മിനി സിവില്‍ സ്റ്റേഷന്‍ കെട്ടിടത്തില്‍ നിന്നാണ് ഇവ ഇപ്പോള്‍ താല്‍ക്കാലികമായി ലഭിച്ചു വരുന്നത്. ഇത്തരം പരാധീനതകള്‍ക്കിടയിലും ഭാഗ്യം വിറ്റു ഒന്നാം സ്ഥാനത്തേക്ക് മുന്നേറുമ്പോള്‍ തങ്ങളുടെ ഓഫീസിനു അധികൃതരില്‍ നിന്ന് എന്നാണ് ഭാഗ്യം കടാക്ഷിക്കുകയെന്ന പ്രതീക്ഷയിലാണ് ഇവരിപ്പോള്‍.

ഡോണ്‍ബോസ്കോ സംസ്ഥാനതല ബാസ്കറ്റ്ബോള്‍ ടൂര്‍ണമെന്റിനു ആരംഭമായി

ഇരിങ്ങാലക്കുട : 34 – ാമത് അഖിലകേരള ഡോണ്‍ബോസ്കോ ബാസ്കറ്റ്ബോള്‍ ടൂര്‍ണമെന്റ് ഡോണ്‍ബോസ്‌കോ ഇന്‍ഡോര്‍ സ്റ്റേഡിയത്തില്‍ ഇരിങ്ങാലക്കുട ഡി വൈ എസ് പി ഫേമസ് വര്‍ഗീസ് ഉദ്‌ഘാടനം ചെയ്തു. സ്‌കൂള്‍ മാനേജര്‍ ഫാ മാനുവല്‍ മേവട അധ്യക്ഷത വഹിച്ച യോഗത്തില്‍ പ്രിന്‍സിപ്പല്‍ ഫാ കുര്യാക്കോസ് ശാസ്താംകാല, ബാസ്കറ്റ്ബാള്‍ ഡിസ്ട്രിക്ട് അസോസിയേഷന്‍ പ്രസിഡണ്ട് പി ജെ സണ്ണി, ഐ സി എസ് ഇ സ്‌കൂള്‍ പ്രിന്‍സിപ്പല്‍ ഫാ മനു പീടികയില്‍, അഡ്മിനിസ്ട്രേറ്റര്‍ ഫാ ജോര്‍ജ് കാപ്പന്‍, ഫാ തോമസ് വൈലാറ്റ്, പി ടി എ പ്രസിഡന്റുമാരായ തിലകന്‍ ഇ കെ, ടെല്‍സണ്‍ കോട്ടോളി, എല്‍ പി സ്‌കൂള്‍ ഹെഡ്മിസ്ട്രസ് ഓമന വി പി, പൂര്‍വവിദ്യാര്‍ഥി സംഘടനാ പ്രസിഡണ്ട് മനീഷ് അരീക്കാട്ട് എന്നിവര്‍ പങ്കെടുത്തു. ഡോണ്‍ബോസ്കോ ടീം ക്യാപ്റ്റന്‍ നഫ്രീദ് ഗുലാം പ്രതിജ്ഞ ചൊല്ലിക്കൊടുത്തു. കൊരട്ടി എം എ എം എച് എസ് എസ് സ്‌കൂളും ആതിഥേയരായ ഡോണ്‍ബോസ്കോ സ്‌കൂളും തമ്മില്‍ നടന്ന ഉദ്‌ഘാടന മത്സരത്തില്‍ ഡോണ്‍ബോസ്‌കോ ടീം വിജയികളായി. 4 ദിവസം നീണ്ടു നില്‍ക്കുന്ന ടൂര്‍ണമെന്റില്‍ 24 ടീമുകളാണ് പങ്കെടുക്കുന്നത്. 24 ന് തിങ്കളാഴ്ച രാവിലെ 10.30 ന് ഫൈനല്‍ മത്സരം നടക്കും.

ഇന്ധന വില വര്‍ദ്ധനവ് : സ്വകാര്യ ബസ് ഉടമകള്‍ കരിദിനം ആചരിച്ചു

ഇരിങ്ങാലക്കുട : ഇന്ധന വില വര്‍ധനവിലും കേന്ദ്ര ഗവര്‍മെന്റിന്റെയും കേരള ഗവര്‍മെന്റിന്റെയും നികുതിയില്‍ പ്രതിഷേധിച്ച് ഇരിങ്ങാലക്കുടയില്‍ നിന്ന് പുറപ്പെടുന്ന എല്ലാ ബസുകളിലും കരിങ്കൊടി കെട്ടി ബസ് ജീവനക്കാരും ബസ് ഉടമകളും കറുത്ത ബാഡ്ജ് ധരിച്ചും കരിദിനം ആചരിച്ചു. തൃശൂര്‍ ജില്ലാ പ്രൈവറ്റ് ബസ് ഓണേഴ്‌സ് അസോസിയേഷന്‍ പ്രസിഡണ്ട് എം എസ് പ്രേംകുമാര്‍ ഉദ്‌ഘാടനം ചെയ്തു. ഇരിങ്ങാലക്കുട യൂണിറ്റ് പ്രസിഡണ്ട് പി വി മാത്യു, ജനറല്‍ സെക്രെട്ടറി അനില്‍കുമാര്‍ വെള്ളാംപറമ്പില്‍, ട്രെഷറര്‍ നന്ദകുമാര്‍ കാട്ടിക്കുളം , മോഹനന്‍ എന്നിവര്‍ നേതൃത്വം നല്‍കി.

കേരള അര്‍ബന്‍ ബാങ്ക് സ്റ്റാഫ് അസോസിയേഷന്‍ സംസ്ഥാന സമ്മേളനം ഇരിങ്ങാലക്കുടയില്‍ 23,24 ന്

ഇരിങ്ങാലക്കുട : അര്‍ബന്‍ ബാങ്ക് ജീവനക്കാരുടെ ഏറ്റവും വലിയ സംഘടനയായ കേരള അര്‍ബന്‍ ബാങ്ക് സ്റ്റാഫ് അസോസിയേഷന്റെ (കുബ്‌സോ) 15 -)മത് സംസ്ഥാന സമ്മേളനം സെപ്റ്റംബര്‍ 23,24 തീയതികളില്‍ ഇരിങ്ങാലക്കുട ടൗണ്‍ ഹാളില്‍ നടത്തുമെന്ന് സംഘാടകസമിതി പത്രസമ്മേളനത്തില്‍ അറിയിച്ചു. 23 ന് രാവിലെ 10 മണിക്ക് മുന്‍മന്ത്രിയും കുബ്‌സോ രക്ഷാധികാരിയുമായ ആര്യാടന്‍ മുഹമ്മദ് സമ്മേളനം ഉദ്‌ഘാടനം ചെയ്യും. കുബ്‌സോ സംസ്ഥാന പ്രസിഡണ്ട് ബെന്നി ബെഹന്നാന്‍ അധ്യക്ഷത വഹിക്കുന്ന ചടങ്ങില്‍ മുന്‍മന്ത്രി സി എന്‍ ബാലകൃഷ്ണന്‍ മുഖ്യപ്രഭാഷണം നടത്തും. വൈകീട്ട് 4 മണിക്ക് വിരമിച്ച ജീവനക്കാരെ ആദരിക്കുന്നതിനായുള്ള സമാദരണീയം പരിപാടിയുടെ ഉദ്‌ഘാടനം എം എല്‍ എ കെ മുരളീധരന്‍ നിര്‍വഹിക്കും. മുന്‍ മന്ത്രി കെ പി വിശ്വനാഥന്‍ മുഖ്യാതിഥിയായിരിക്കും. തുടര്‍ന്ന് 5.30 ന് നടക്കുന്ന സാംസ്‌കാരിക സമ്മേളനം എം എല്‍ എ അനില്‍ അക്കര ഉദ്‌ഘാടനം ചെയ്യും. കുബ്‌സോ മുന്‍ സ്റ്റേറ്റ് ജനറല്‍ സെക്രട്ടറി ശബരീഷ് കുമാര്‍ അധ്യക്ഷത വഹിക്കുന്ന ചടങ്ങില്‍ നിലമ്പൂര്‍ അര്‍ബന്‍ ബാങ്ക് പ്രസിഡന്റും സംസ്കാര സാഹിതി പ്രസിഡന്റുമായ ആര്യാടന്‍ ഷൗക്കത്ത് മുഖ്യപ്രഭാഷണം നടത്തും. സാഹിത്യകാരന്മാരായ ആലങ്കോട് ലീലാകൃഷ്ണന്‍, സുരേന്ദ്രന്‍ എന്നിവര്‍ മുഖ്യാതിഥികളായിരിക്കും. രാത്രി 8 മണിക്ക് ജനറല്‍ കൗണ്‍സില്‍ ഉണ്ടായിരിക്കുന്നതാണ്.24 ന് രാവിലെ 9 മണിക്ക് നടക്കുന്ന പ്രതിനിധി സമ്മേളനത്തിന്റെ ഉദ്‌ഘാടനം തൃശൂര്‍ ജില്ലാ കോണ്‍ഗ്രസ് കമ്മിറ്റി പ്രസിഡണ്ട് ടി എന്‍ പ്രതാപന്‍ നിര്‍വഹിക്കും. എം എല്‍ എ ഷാഫി പറമ്പില്‍ മുഖ്യാഥിതിയായിരിക്കും. സ്വാഗതസംഘം ചെയര്‍മാന്‍ എം പി ജാക്സണ്‍, സ്വാഗതസംഘം ജനറല്‍ കണ്‍വീനര്‍ ടി വി ചാര്‍ളി, കുബ്‌സോ വര്‍ക്കിംഗ് പ്രസിഡണ്ട് പി യു സുരേഷ്‌കുമാര്‍, കുബ്‌സോ ജനറല്‍ സെക്രട്ടറി എം കെ ബാലകൃഷ്ണന്‍ എന്നിവരുടെ നേതൃത്വത്തിലാണ് സമ്മേളനത്തിനുള്ള ഒരുക്കങ്ങള്‍ പൂര്‍ത്തിയാകുന്നത്. പത്രസമ്മേളനത്തില്‍ എം ആര്‍ ഷാജു, ജോസഫ് ചാക്കോ, ജോയ് എന്‍ ജെ, ബിജു ലാസര്‍ , ജസ്റ്റിന്‍ എന്നിവര്‍ പങ്കെടുത്തു.

നവരാത്രി ആഘോഷങ്ങള്‍ക്ക് തുടക്കം കുറിച്ച് നനദുര്‍ഗാ നവഗ്രഹക്ഷേത്രത്തില്‍ മൃദംഗമേള

ഇരിങ്ങാലക്കുട : വെട്ടിക്കര നനദുര്‍ഗാ നവഗ്രഹക്ഷേത്രത്തില്‍ കൊരമ്പ് മൃദംഗ കളരിയുടെ ആഭിമുഖ്യത്തില്‍ മൃദംഗ മേള അവതരിപ്പിച്ചു. 30 ഓളം വിദ്യാര്‍ത്ഥി-വിദ്യാര്‍ത്ഥിനികള്‍ പങ്കെടുത്ത പരിപാടി ഒരു മണിക്കൂറോളം നീണ്ടു നിന്നു. വിക്രമന്‍ നമ്പൂതിരി മൃദംഗമേളക്ക് നേതൃത്വം നല്‍കി.

കുബ്‌സോ സംസ്ഥാന സമ്മേളനം ഇരിങ്ങാലക്കുടയില്‍ വിളംബര ജാഥ നടത്തി

ഇരിങ്ങാലക്കുട : കേരള അര്‍ബന്‍ ബാങ്ക് സ്റ്റാഫ് ഓര്‍ഗനൈസേഷന്‍ സെപ്റ്റംബര്‍ 23 , 24 തീയതികളിലായി ഇരിങ്ങാലക്കുടയില്‍ നടത്തുന്ന സംസ്ഥാന സമ്മേളനത്തിന്റെ ഭാഗമായി വ്യാഴാഴ്ച വിളംബരജാഥ നടത്തി. ജീവനക്കാര്‍ ഠാണാവിലെ ഇരിങ്ങാലക്കുട ടൗണ്‍ അര്‍ബന്‍ ബാങ്ക് ഹെഡ് ഓഫീസില്‍ നിന്നും നാസിക് ഡോളിന്റെ അകമ്പടിയോടെ ആരംഭിച്ച വിളംബര ജാഥ നട ബ്രാഞ്ച് ഓഫീസിനു മുന്‍പില്‍ അവസാനിച്ചു.

കൂടല്‍മാണിക്യം തിരുവുത്സവം : വരവ്ചിലവ് കണക്കുകള്‍ അവതരിപ്പിച്ചു

ഇരിങ്ങാലക്കുട : മെയ് 6 മുതല്‍ 16 വരെ നടന്ന കൂടല്‍മാണിക്യം തിരുവുത്സവത്തിന്റെ ഭാഗമായുള്ള വരവ് ചിലവ് കണക്കുകള്‍ വ്യാഴാഴ്ച്ച നടന്ന ഭക്തജനങ്ങളുടെ യോഗത്തില്‍ അവതരിപ്പിച്ചു. 8030616 രൂപ വരവും 8025243 ചിലവുമുള്ള കണക്കുകള്‍ ആണ് അവതരിപ്പിച്ചത്. സെപ്റ്റംബര്‍ 23 നു കാലാവധി കഴിയുന്ന പനമ്പിള്ളി രാഘവമേനോന്‍ ചെയര്‍മാനായുള്ള കൂടല്‍മാണിക്യം ദേവസ്വം മാനേജിങ് കമ്മിറ്റിയുടെ അവസാന യോഗമായിരുന്നു ഇത്. യോഗത്തില്‍ കണക്കുകള്‍ കൈയടിച്ചു പാസ്സാക്കി. ചെയര്‍മാന്‍ പനമ്പിള്ളി രാഘവമേനോന്റെ അധ്യക്ഷതയില്‍ ചേര്‍ന്ന യോഗത്തില്‍ എ .എസ് ശ്രീവല്ലഭന്‍ നമ്പൂതിരി, വി. പി രാമചന്ദ്രന്‍ ജെ .മനോജ്, സി .മുരാരി അശോകന്‍ ഐത്താടന്‍, ടി .എ വിനോദ്കുമാര്‍ ദേവസ്വം അഡ്മിനിസ്ട്രേറ്റര്‍ എ എം സുമ എന്നിവര്‍ പങ്കെടുത്തു. ഈ മാനേജ്‌മന്റ് കമ്മിറ്റിയുടെ ഭരണകാലത്ത് കാര്യമായ പരാതികള്‍ ഒന്നും ഇല്ലാതെ തന്നെ ഉത്സവാഘോഷങ്ങള്‍ നടത്താന്‍ കഴിഞ്ഞത് അഭിമാനകരമായ നേട്ടമായി കാണുന്നു എന്ന് സ്ഥാനം ഒഴിയുന്ന ദേവസ്വം ചെയര്‍മാന്‍ പറഞ്ഞു.

മുട്ടക്കോഴി വിതരണം

ഇരിങ്ങാലക്കുട : മിത്രഭാരതി സോഷ്യല്‍ സര്‍വീസ് സൊസൈറ്റി നടപ്പാക്കുന്ന മുട്ടക്കോഴി വളര്‍ത്തല്‍ പദ്ധതിയുടെ ഭാഗമായുള്ള രണ്ടാംഘട്ട മുട്ടക്കോഴി വിതരണം ഒക്ടോബര്‍ 10 ന് നടക്കുന്നു. ബി വി 380 ഇനത്തിലുള്ള 50 ദിവസം പ്രായമായ 25 കോഴിക്കുഞ്ഞുങ്ങളും ആധുനീകരീതിയിലുള്ള കൂടും ലഭിക്കും. വായ്പ ആവശ്യമുള്ളവര്‍ക്ക് വായ്പ ലഭ്യമാക്കുന്നതാണ്. മുട്ടക്കോഴി വളര്‍ത്താന്‍ താല്പര്യമുള്ളവര്‍ സൊസൈറ്റിയുടെ ഇരിങ്ങാലക്കുടയിലുള്ള ഹെഡ് ഓഫീസിലോ, എടക്കുളത്തുള്ള പൂമംഗലം ബ്രാഞ്ച് ഓഫീസിലോ അപേക്ഷകള്‍ സമര്‍പ്പിക്കണം. അപേക്ഷാഫോം ഓഫീസില്‍ നിന്നും ലഭ്യമാണ് ബന്ധപ്പെടേണ്ട നമ്പര്‍ 04802828755 9745769324 7025955999

സംസ്കാര സാഹിതിയ്ക്ക് പുതിയ ഭാരവാഹികള്‍

ഇരിങ്ങാലക്കുട : സംസ്കാര സാഹിതി നിയോജകമണ്ഡലം വാര്‍ഷിക സമ്മേളനം നഗരസഭാധ്യക്ഷ നിമ്യ ഷിജു ഉദ്‌ഘാടനം ചെയ്തു. ചെയര്‍മാന്‍ ഹരി അധ്യക്ഷത വഹിച്ചു. ഡി സി സി സെക്രട്ടറി ആന്റോ പെരുമ്പിള്ളി, സംസ്കാര സാഹിതി ജില്ലാ വൈസ് ചെയര്‍മാന്‍ സി ജി നാരായണന്‍ കുട്ടി, കണ്‍വീനര്‍ എ സി സുരേഷ്, കെ എ അബൂബക്കര്‍, തോമസ് തത്തംപിള്ളി, ജോജി തെക്കൂടന്‍, കെ കെ അബ്ദുള്ളക്കുട്ടി എന്നിവര്‍ പ്രസംഗിച്ചു. കാട്ടൂര്‍ സര്‍വീസ് സഹകരണ ബാങ്ക് പ്രസിഡന്റായി തിരഞ്ഞെടുക്കപ്പെട്ട രാജലക്ഷ്മി കുറുമാത്തിനെ പൊന്നാടയണിയിച്ചു ആദരിച്ചു. പുതിയ ഭാരവാഹികള്‍ : എ സി സുരേഷ്(ചെയര്‍മാന്‍), കെ എ അബൂബക്കര്‍, രാജലക്ഷ്മി കുറുമാത്ത്(വൈസ് ചെയര്‍മാന്‍മാര്‍), രാജീവ് മുല്ലപ്പിള്ളി(കണ്‍വീനര്‍), ജോജി തെക്കൂടന്‍, നീന ജോസ്(സെക്രട്ടറിമാര്‍), സി എം ഉണ്ണികൃഷ്ണന്‍(ട്രെഷറര്‍).

കലാമണ്ഡലം നാരായണന്‍ എമ്പ്രാന്തിരിയുടെ ഷഷ്ട്യബ്ദപൂര്‍ത്തി ആഘോഷം ‘സുകൃതം’ സെപ്റ്റംബര്‍ 24 ന് കലാനിലയത്തില്‍

ഇരിങ്ങാലക്കുട : ഉണ്ണായിവാരിയര്‍ സ്മാരക കലാനിലയത്തിന്റെ പ്രിന്‍സിപ്പലായി സേവനമനുഷ്ഠിച്ചു കൊണ്ടിരിക്കുന്ന പ്രശസ്ത കഥകളി ഗായകന്‍ കലാമണ്ഡലം നാരായണന്‍ എമ്പ്രാന്തിരിയുടെ ഷഷ്ട്യബ്ദപൂര്‍ത്തിയും റിട്ടയര്‍മെന്റും ‘സുകൃതം’ എന്ന പേരില്‍ കലാസ്നേഹികളും ശിഷ്യരും കലാനിലയവും ചേര്‍ന്ന് 2017 സെപ്റ്റംബര്‍ 24 ന് ഞായറാഴ്ച്ച ഇരിങ്ങാലക്കുട ഉണ്ണായിവാര്യര്‍ സ്മാരക കലാനിലയത്തില്‍ സമുചിതമായി ആഘോഷിക്കുമെന്ന് ആഘോഷക്കമ്മിറ്റി പത്രസമ്മേളനത്തില്‍ അറിയിച്ചു. ആഘോഷത്തോടനുബന്ധിച്ച് രാവിലെ 11 നു നടക്കുന്ന സുഹൃദ്സമ്മേളനം എം പി ഇന്നസെന്റ് ടി വി ഉദ്‌ഘാടനം ചെയ്യും. കെ യു അരുണന്‍ എം എല്‍ എ അധ്യക്ഷത വഹിക്കുന്ന ചടങ്ങില്‍ എം പി ജാക്സണ്‍ മുഖ്യാതിഥിയായിരിക്കും. തുടര്‍ന്ന് വൈകീട്ട് 5 നു നടക്കുന്ന പൊതു സമ്മേളനം സി എന്‍ ജയദേവന്‍ എം പി ഉദ്‌ഘാടനം ചെയ്യും. കേരള മുന്‍ നിയമസഭാ സ്പീക്കര്‍ കെ രാധാകൃഷ്‍ണന്‍ വിശിഷ്ടാഥിതിയായിരിക്കും. വൈകീട്ട് 7 മുതല്‍ വിവിധ കലാകാരന്‍മാര്‍ അവതരിപ്പിക്കുന്ന നൃത്തനൃത്ത്യങ്ങള്‍ ഉണ്ടായിരിക്കും. രാത്രി 9 മണി മുതല്‍ സുഭദ്രാഹരണം, കീചകവധം, ബാലി വധം, കിരാതം എന്നീ കഥകളിയും ഉണ്ടായിരിക്കും.

കലാമണ്ഡലം നാരായണന്‍ എമ്പ്രാന്തിരി

മലപ്പുറം ജില്ലയില്‍ വണ്ടൂരിനു സമീപം പൂങ്ങോട് ദേശത്ത് പിരിയാത്ത മഠത്തില്‍ നാരായണന്‍ എമ്പ്രാന്തിരിയുടെയും സരസ്വതി അന്തര്‍ജനത്തിന്റെയും മകനായി 1957 സെപ്റ്റംബര്‍ 29 ന് ജനിച്ചു. 8 – ാം ക്ലാസ് വരെയുള്ള വിദ്യാഭ്യാസത്തിനു ശേഷം ജി പി ഗോപാലകൃഷ്ണ പിഷാരടിയുടെ കീഴില്‍ സംഗീത അഭ്യസനം ആരംഭിച്ചു. അതിന് ശേഷം പാലക്കാട് മ്യൂസിക് അക്കാദമിയില്‍ നിന്ന് ഗാനഭൂഷണം കരസ്ഥമാക്കി. തുടര്‍ന്ന് 1972ല്‍ കേരള കലാമണ്ഡലത്തില്‍ കഥകളി സംഗീത വിദ്യാര്‍ത്ഥിയായി ചേര്‍ന്നു. കലാമണ്ഡലം ഗംഗാധരന്‍ ആശാന്റെ മുഖ്യ ശിക്ഷണത്തില്‍ കലാമണ്ഡലം നീലകണ്ഠന്‍ നമ്പീശന്‍, കലാമണ്ഡലം രാമവാര്യര്‍, കലാമണ്ഡലം മാടമ്പി സുബ്രഹ്മണ്യന്‍ നമ്പൂതിരി എന്നീ ഗുരുക്കന്മാരുടെ കീഴില്‍ 6 വര്‍ഷം പഠിച്ച ഡിപ്ലോമ കരസ്ഥമാക്കി. തുടര്‍ന്ന് 2 വര്‍ഷം കലാമണ്ഡലം ശങ്കരന്‍ എമ്പ്രാന്തിരിയുടെ കീഴില്‍ ഉപരിപഠനം നടത്തി. 1982ല്‍ ഉണ്ണായി വാര്യര്‍ സ്മാരക കലാനിലയത്തില്‍ കഥകളി സംഗീത വിഭാഗത്തിലെ അധ്യാപകനായി നിയമിതനായി. 2011ല്‍ കലാനിലയത്തിന്റെ പ്രിന്‍സിപ്പലായി ചുമതലയേറ്റു. 36 വര്‍ഷത്തെ അധ്യാപന ജീവിതത്തില്‍ പ്രഗത്ഭമായൊരു ശിഷ്യസമ്പത്തിനുടമയായി. സ്വദേശത്തും വിദേശത്തുമായി നിരവധി അരങ്ങുകളില്‍ കഥകളി അവതരിപ്പിച്ചു വരുന്നു. വിദ്യാര്‍ത്ഥി ആയിരിയ്ക്കേ തന്നെ കേരള കലാമണ്ഡലത്തില്‍ നിന്ന് ലഭിച്ച ഡോ കെ എന്‍ പിഷാരടി സ്മാരക സുവര്‍ണ്ണ മുദ്രയടക്കമുള്ള പുരസ്‌കാരങ്ങള്‍ ഇക്കാലയളവില്‍ അദ്ദേഹത്തെ തേടിയെത്തി. ഭാര്യ : ഗീത , മക്കള്‍ : സംഗീത, സുധര്‍മ്മ. (9446885528)

Top
Menu Title